ບົດທີ 20
ຂ້ອຍຈະເຂົ້າກັບນາຍຄູໄດ້ແນວໃດ?
ໃຫ້ຂຽນຊື່ນາຍຄູທີ່ເຈົ້າມັກທີ່ສຸດ. ․․․․․
ເປັນຫຍັງຈຶ່ງມັກນາຍຄູຜູ້ນັ້ນ? ․․․․․
ໃຫ້ຂຽນຊື່ນາຍຄູທີ່ເຈົ້າຮູ້ສຶກວ່າເຂົ້າກັນໄດ້ຍາກທີ່ສຸດ. ․․․․․
ເຈົ້າສາມາດເລືອກໝູ່ໄດ້ ແຕ່ເມື່ອຍັງນ້ອຍເຈົ້າບໍ່ສາມາດເລືອກນາຍຄູໄດ້. ບາງທີເຈົ້າອາດຈະມັກນາຍຄູໝົດທຸກຄົນ. ທ້າວເດວິດອາຍຸ 18 ປີເວົ້າວ່າ: “ທີ່ຈິງຂ້ອຍບໍ່ເຄີຍມີບັນຫາກັບນາຍຄູຈັກຄົນ. ຂ້ອຍນັບຖືພວກເພິ່ນແລະພວກເພິ່ນກໍມັກຂ້ອຍ.”
ໃນທາງກົງກັນຂ້າມ ເຈົ້າອາດມີນາຍຄູທີ່ຄ້າຍຄືກັບນາຍຄູທີ່ນາງເຊຣາອາຍຸ 11 ປີພັນລະນາເຖິງ. “ນາຍຄູຂອງຂ້ອຍຮ້າຍຫຼາຍແລະຂ້ອຍບໍ່ເຂົ້າໃຈໃນສິ່ງທີ່ເພິ່ນສອນ. ເພິ່ນອະທິບາຍບໍ່ພຽງພໍກ່ຽວກັບບົດຮຽນ ຫຼືບໍ່ຊັ້ນກໍອະທິບາຍແບບນ້ຳຖ້ວມທົ່ງໄປເລີຍ.” ເພື່ອຊ່ວຍໃຫ້ເຂົ້າກັນໄດ້ກັບນາຍຄູ ກ່ອນອື່ນຕ້ອງລະບຸສາເຫດຫຼັກທີ່ເຈົ້າຮູ້ສຶກວ່າເປັນບັນຫາ. ເມື່ອກຳນົດຂໍ້ທ້າທາຍນັ້ນຊັດແຈ້ງຂຶ້ນ ເຈົ້າກໍສາມາດເອົາຊະນະມັນໄດ້ດີກວ່າ. ໃຫ້ໝາຍ ✔ ໃສ່ປ່ອງຕ່າງໆທີ່ເໝາະສົມທາງລຸ່ມນີ້ ຫຼືໃຫ້ຂຽນເຫດຜົນຂອງຕົວເອງໃສ່.
◻ ຂ້ອຍຮູ້ສຶກວ່າເປັນເລື່ອງຍາກທີ່ຈະເຂົ້າໃຈນາຍຄູ
◻ ຂ້ອຍຮູ້ສຶກວ່າຄວນໄດ້ຄະແນນສູງກວ່ານີ້
◻ ຂ້ອຍຮູ້ສຶກວ່າຄົນອື່ນໄດ້ຮັບການປະຕິບັດແບບພິເສດ
◻ ຂ້ອຍໄດ້ຮັບການຕັກເຕືອນຫຼາຍກວ່າທີ່ຄວນໄດ້ຮັບ
◻ ຂ້ອຍຮູ້ສຶກວ່າຕົກເປັນເຫຍື່ອຂອງການແບ່ງຊັ້ນວັນນະ
◻ ອື່ນໆ ․․․․․
ເຈົ້າສາມາດເຮັດຫຍັງໄດ້ແດ່ເພື່ອເຮັດໃຫ້ສະຖານະການດີຂຶ້ນ? ຂັ້ນຕອນທຳອິດແມ່ນໃຫ້ໃຊ້ຄຳແນະນຳທີ່ອັກຄະສາວົກເປໂຕໃຫ້ໄວ້. ລາວຂຽນວ່າ: “ທ່ານທັງປວງຈົ່ງມີໃຈອັນດຽວກັນ ມີໃຈເລົ້າໂລມກັນແລະກັນ [“ສະແດງຄວາມເຫັນອົກເຫັນໃຈກັນ,” ລ.ມ.].” (1 ເປໂຕ 3:8) ສິ່ງໃດອາດກະຕຸ້ນເຈົ້າໃຫ້ມີຄວາມເຫັນອົກເຫັນໃຈຕໍ່ນາຍຄູທີ່ເຈົ້າຄິດວ່າເພິ່ນເຫັນແກ່ຕົວ? ຂໍໃຫ້ພິຈາລະນາແງ່ມຸມບາງຢ່າງກ່ຽວກັບນາຍຄູທີ່ອາດຊ່ວຍເຈົ້າໄດ້.
ນາຍຄູກໍອາດຜິດພາດໄດ້. ເຊັ່ນດຽວກັບທຸກໆຄົນ ນາຍຄູກໍມີນິດໄສແປກໆ ມີບັນຫາ ແລະແມ່ນແຕ່ມີອະຄະຕິ. ສາວົກຢາໂກໂບຂຽນວ່າ: “ຖ້າຜູ້ໜຶ່ງຜູ້ໃດບໍ່ກະທຳຜິດໃນຖ້ອຍຄຳ ຜູ້ນັ້ນເປັນຄົນດີສຳເລັດແລ້ວ ອາດບັງຄັບທັງຕົວໄວ້ໄດ້ດ້ວຍ.” (ຢາໂກໂບ 3:2) ນາງບິດອັນນາອາຍຸ 19 ປີເວົ້າວ່າ: “ອາຈານສອນວິຊາເລກບໍ່ມີຄວາມອົດທົນເລີຍແລະຮ້ອງທັ່ງໃສ່ພວກເຮົາເລື້ອຍໆ. ດັ່ງນັ້ນ ພວກເຮົາຈຶ່ງຮູ້ສຶກວ່າຍາກທີ່ຈະນັບຖືເພິ່ນ.” ອັນໃດແມ່ນເຫດຜົນຢ່າງໜຶ່ງທີ່ນາຍຄູປະພຶດແບບນີ້? ບິດອັນນາເວົ້າວ່າ: “ບໍ່ມີຄວາມເປັນລະບຽບໃນຫ້ອງຮຽນ ແລະພວກນັກຮຽນພາກັນປະພຶດແບບບໍ່ດີພຽງເພື່ອຈະເຮັດໃຫ້ນາຍຄູໃຈຮ້າຍຫຼາຍຂຶ້ນອີກ.”
ແນ່ນອນວ່າ ເຈົ້າມັກທີ່ນາຍຄູເບິ່ງຂ້າມຄວາມຜິດພາດແລະຂໍ້ບົກພ່ອງຂອງເຈົ້າ ໂດຍສະເພາະຖ້າເຈົ້າຢູ່ພາຍໃຕ້ຄວາມກົດດັນຫຼາຍ. ເຈົ້າເຮັດແບບດຽວກັນນັ້ນກັບນາຍຄູໄດ້ບໍ? ໃຫ້ຂຽນກ່ຽວກັບເຫດການທີ່ເກີດຂຶ້ນໃນມໍ່ໆນີ້ຢູ່ໂຮງຮຽນ ແລະສິ່ງທີ່ເຈົ້າຄິດວ່າອາດພາໃຫ້ນາຍຄູປະພຶດແບບນັ້ນ.
․․․․․
ນາຍຄູມີຜູ້ທີ່ເພິ່ນມັກຫຼາຍທີ່ສຸດ. ຂໍໃຫ້ຄິດເຖິງຂໍ້ທ້າທາຍຕ່າງໆທີ່ນາຍຄູປະເຊີນ ມີນັກຮຽນຈັກຄົນຢູ່ໃນຫ້ອງທີ່ຕ້ອງການ ຮຽນໜັງສື? ມີນັກຮຽນຈັກຄົນໃນຈຳນວນນັກຮຽນເຫຼົ່ານັ້ນທີ່ຕ້ອງການຮຽນໜັງສືເຊິ່ງເຕັມໃຈແລະເອົາໃຈໃສ່ໃນຫົວເລື່ອງໜຶ່ງເປັນເວລາເຄິ່ງຊົ່ວໂມງຫຼືຫຼາຍກວ່ານັ້ນ? ມີນັກຮຽນຈັກຄົນທີ່ມັກປ່ອຍອາລົມຮ້າຍເຊິ່ງອັ່ງຢູ່ໃນໃຈໃສ່ນາຍຄູຂອງຕົນ? ຕອນນີ້ຂໍໃຫ້ນຶກພາບວ່າເຈົ້າມີໜ້າທີ່ສອນໝູ່ນັກຮຽນໄວດຽວກັນນັ້ນຈຳນວນ 20 ຄົນ 30 ຄົນ ຫຼືຫຼາຍກວ່ານັ້ນ ໃນຫົວເລື່ອງທີ່ມີບໍ່ເທົ່າໃດຄົນໃນຈຳນວນນັກຮຽນເຫຼົ່ານັ້ນຕ້ອງການພິຈາລະນາ. ເຈົ້າຄົງຈະຢາກເອົາໃຈໃສ່ຜູ້ທີ່ເບິ່ງຄືວ່າສົນໃຈຫຼາຍກວ່າແມ່ນບໍ?
ແມ່ນຢູ່ ມັນອາດເຮັດໃຫ້ເຈົ້າໃຈຮ້າຍເມື່ອເຫັນນາຍຄູລຳອຽງຢ່າງຈະແຈ້ງ. ນາງນາຕາຊາເວົ້າເຖິງນາຍຄູຄົນໜຶ່ງຂອງລາວວ່າ: “ເພິ່ນກຳນົດມື້ສົ່ງວຽກບ້ານ ແຕ່ມັກມີຂໍ້ຍົກເວັ້ນສຳລັບພວກທີມນັກກິລາ ແລະບໍ່ມີຂໍ້ຍົກເວັ້ນສຳລັບຄົນອື່ນອີກເລີຍ. ມັນເປັນຍ້ອນວ່ານາຍຄູຄົນນັ້ນເປັນຜູ້ຊ່ວຍນາຍຄູສອນກິລາຂອງເຂົາເຈົ້າ.” ຖ້າມີສິ່ງທີ່ຄ້າຍໆກັນນັ້ນເກີດຂຶ້ນກັບເຈົ້າ ຂໍໃຫ້ຖາມຕົວເອງວ່າ ‘ຄວາມຈຳເປັນດ້ານການສຶກສາຂອງຂ້ອຍກຳລັງຖືກປ່ອຍປະລະເລີຍບໍ?’ ຖ້າບໍ່ແມ່ນ ເປັນຫຍັງຈຶ່ງອາລົມບໍ່ດີຫຼືອິດສາ?
ໃຫ້ຂຽນສິ່ງທີ່ສາມາດເຮັດໄດ້ເພື່ອສະແດງໃຫ້ນາຍຄູເຫັນແຈ້ງຂຶ້ນຕື່ມວ່າເຈົ້າສົນໃຈໃນສິ່ງທີ່ເພິ່ນກຳລັງສອນ.
․․․․․
ນາຍຄູເຂົ້າໃຈນັກຮຽນຜິດ. ບາງເທື່ອຄວາມແຕກຕ່າງກັນທາງດ້ານນິດໄສໃຈຄໍຫຼືການເຂົ້າໃຈຜິດບາງຢ່າງເຮັດໃຫ້ນາຍຄູບໍ່ມັກເຈົ້າ. ບາງທີການສໍ້ຖາມອາດຖືກມອງວ່າເປັນການຂັດຂືນ ຫຼືການເວົ້າບາງຢ່າງທີ່ຕະຫຼົກອາດຖືກມອງວ່າເປັນການຂາດຄວາມນັບຖືຫຼືໄຮ້ສາລະ.
ຈະເຮັດແນວໃດເມື່ອຖືກເຂົ້າໃຈຜິດ? ພະຄຳພີກ່າວວ່າ: “ຢ່າທຳຊົ່ວຕອບແທນຊົ່ວແກ່ຜູ້ໜຶ່ງຜູ້ໃດສັກເທື່ອ . . . ຖ້າອາດໄດ້ ຕາມເຫດອັນມີຢູ່ໃນທ່ານທັງຫຼາຍ ຈົ່ງມີຄວາມສຸກສຳລານກັນກັບຄົນທັງປວງ.” (ໂລມ 12:17, 18) ດັ່ງນັ້ນ ພະຍາຍາມທີ່ຈະບໍ່ໃຈຮ້າຍໃຫ້ນາຍຄູ. ຫຼີກລ່ຽງການປະທະກັນແບບທີ່ບໍ່ຈຳເປັນ. ຢ່າຈົ່ມໃຫ້ນາຍຄູເຖິງແມ່ນວ່າມີເຫດຜົນທີ່ຈະເຮັດເຊັ່ນນັ້ນ. ທີ່ຈິງແລ້ວ ພະຍາຍາມທີ່ຈະເປັນມິດ. ເຈົ້າຖາມວ່າ ‘ເປັນມິດ? ກັບເພິ່ນ?’ ແມ່ນແລ້ວ ທັກທາຍນາຍຄູດ້ວຍການສະແດງທ່າທີທີ່ເປັນຕາເຄົາລົບນັບຖືເມື່ອເຈົ້າເຂົ້າມາໃນຫ້ອງຮຽນ. ຄວາມສຸພາບອ່ອນໂຍນທີ່ມີຢ່າງຕໍ່ເນື່ອງ ແມ່ນແຕ່ການຍິ້ມເປັນບາງຄັ້ງຄາວ ນາຍຄູອາດປ່ຽນທັດສະນະຂອງເພິ່ນທີ່ມີຕໍ່ເຈົ້າ.—ໂລມ 12:20, 21.
ຕົວຢ່າງເຊັ່ນ ທ້າວເຄນມີນາຍຄູທີ່ມັກຕີລາຄາລາວຜິດຕະຫຼອດ. ລາວບອກວ່າ: “ຂ້ອຍອາຍຫຼາຍ ແລະຈະບໍ່ເວົ້າລົມກັບນາຍຄູເຫຼົ່ານັ້ນ.” ລາວຈັດການກັບບັນຫາແນວໃດ? “ໃນທີ່ສຸດຂ້ອຍສຳນຶກວ່າພວກນາຍຄູຕ້ອງການຊ່ວຍຂ້ອຍ. ດັ່ງນັ້ນ ຂ້ອຍຈຶ່ງຕັ້ງເປົ້າທີ່ຈະຮູ້ຈັກກັບນາຍຄູໝົດທຸກຄົນເປັນສ່ວນຕົວ. ເມື່ອເຮັດແນວນັ້ນກໍເຫັນວ່າມີການປ່ຽນແປງຢ່າງໃຫຍ່ຫຼວງໃນເລື່ອງຄະແນນຂອງຂ້ອຍ.”
ແນ່ນອນວ່າການມີທ່າທີທີ່ເປັນມິດແລະການເວົ້າລົມບໍ່ແມ່ນຈະຊະນະໃຈນາຍຄູໄດ້ຕະຫຼອດ. ແຕ່ຂໍໃຫ້ອົດທົນ. ກະສັດຊາໂລໂມນຂຽນວ່າ: “ຄວາມອົດທົນແລະການເວົ້າລົມທີ່ສຸພາບອ່ອນໂຍນສາມາດໂນ້ມນ້າວໃຈເຈົ້ານາຍ [ນາຍຄູ] ແລະເອົາຊະນະບັນຫາໄດ້.” (ສຸພາສິດ 25:15, ສະບັບຄອນເທມໂພຣາຣີ ອິງລິດສ) ໃຫ້ໃຈເຢັນໆແລະເວົ້າຢ່າງອ່ອນໂຍນເມື່ອຖືກປະຕິບັດຢ່າງບໍ່ຍຸຕິທຳ. ນາຍຄູອາດປະເມີນທັດສະນະຂອງເພິ່ນທີ່ມີຕໍ່ເຈົ້າຄືນໃໝ່.—ສຸພາສິດ 15:1.
ຖ້ານາຍຄູເຂົ້າໃຈເຈົ້າຜິດຫຼືປະຕິບັດກັບເຈົ້າຢ່າງບໍ່ຍຸດຕິທຳ ຕາມປົກກະຕິແລ້ວ ການໂຕ້ຕອບທຳອິດຂອງເຈົ້າແມ່ນຫຍັງ?
․․․․․
ການໂຕ້ຕອບທີ່ດີກວ່າແມ່ນຫຍັງ?
․․․․․
ແກ້ໄຂປະເດັນສະເພາະ
ການເຂົ້າໃຈຂໍ້ຈຳກັດຕ່າງໆຂອງນາຍຄູເປັນພຽງຈຸດເລີ່ມຕົ້ນ. ເຈົ້າສາມາດເຮັດຫຍັງໄດ້ແດ່ເພື່ອແກ້ໄຂປະເດັນສະເພາະ? ຕົວຢ່າງເຊັ່ນ ເຈົ້າອາດຈັດການແນວໃດກັບການຈົ່ມຕໍ່ໄປນີ້?
ຂ້ອຍສົມຄວນໄດ້ຄະແນນດີກວ່ານີ້. ນາງເຄັດທຣີນາເວົ້າວ່າ: “ຂ້ອຍໄດ້ຄະແນນສູງຕະຫຼອດ ແຕ່ຕົກມາໃນປີໜຶ່ງນາຍຄູສອນວິຊາວິທະຍາສາດໃຫ້ຄະແນນຂ້ອຍຕ່ຳຫຼາຍຈົນຕົກ. ຂ້ອຍສົມຄວນໄດ້ຄະແນນດີກວ່ານີ້. ພໍ່ແມ່ໄປລົມກັບຜູ້ອຳນວຍການໂຮງຮຽນ ແຕ່ເພິ່ນກໍມີແຕ່ເພີ່ມຄະແນນໃຫ້ອີກໜ້ອຍໜຶ່ງເທົ່ານັ້ນ ດັ່ງນັ້ນ ຂ້ອຍກໍຍັງອາລົມບໍ່ດີຢູ່.” ຖ້າເຈົ້າປະເຊີນກັບບັນຫາທີ່ຄ້າຍໆກັນ ຢ່າຟ້າວກ່າວຫາໂຈມຕີນາຍຄູທັນທີ. ແທນທີ່ຈະເຮັດແນວນັ້ນ ຂໍໃຫ້ຮຽນຈາກນາທານບຸກຄົນໃນຄຳພີໄບເບິນ. ນາທານໄດ້ຮັບໜ້າທີ່ມອບໝາຍທີ່ຍາກເຊິ່ງເປັນການເປີດເຜີຍການກະທຳຜິດທີ່ຮ້າຍແຮງຂອງກະສັດດາວິດ. ນາທານບໍ່ໄດ້ບຸກເຂົ້າໄປໃນພະລາຊະວັງທັງຮ້ອງກ່າວຫາດັງໆ ແຕ່ລາວເຂົ້າຫາດາວິດດ້ວຍທ່າທີ່ຜ່ອນສັ້ນຜ່ອນຍາວ.—2 ຊາເມືອນ 12:1-7.
ຄ້າຍກັນ ເຈົ້າອາດເຂົ້າຫານາຍຄູຢ່າງຖ່ອມໃຈແລະຢ່າງໃຈເຢັນໆ. ຖ້າເຈົ້າໃຈຮ້າຍຫຼືກ່າວຫານາຍຄູວ່າຂາດຄວາມສາມາດຫຼືຮ້າຍແຮງກວ່ານັ້ນ ເປັນເລື່ອງຍາກທີ່ຈະຜູກມິດໄດ້. ໃຫ້ລອງເຂົ້າຫາແບບວິທີການຂອງຜູ້ໃຫຍ່ຫຼາຍກວ່າ. ເລີ່ມຕົ້ນດ້ວຍການຖາມນາຍຄູໃຫ້ຊ່ວຍເຈົ້າເຂົ້າໃຈລະບົບການໃຫ້ຄະແນນຂອງເພິ່ນ. ຊາໂລໂມນຂຽນວ່າ: “ຕອບຄວາມກ່ອນໄດ້ຍິນກໍເປັນການບ້າແລະຄວາມອາຍໃຈຖືກຄົນທີ່ຕອບຢ່າງນັ້ນ.” (ສຸພາສິດ 18:13) ເມື່ອໄດ້ຟັງແລ້ວ ເຈົ້າອາດສາມາດຊີ້ໃຫ້ເຫັນຈຸດທີ່ເຈົ້າຮູ້ສຶກວ່າເປັນຂໍ້ຜິດພາດ. ເຖິງແມ່ນວ່າຄະແນນຈະບໍ່ປ່ຽນແປງ ຄວາມເປັນຜູ້ໃຫຍ່ຂອງເຈົ້າອາດຈະເຮັດໃຫ້ນາຍຄູປະທັບໃຈເຈົ້າໃນແງ່ທີ່ດີ.
ຂ້ອຍຮູ້ສຶກວ່ານາຍຄູມີອະຄະຕິ. ຂໍໃຫ້ພິຈາລະນາປະສົບການຂອງນາງຣາເຊວ. ລາວໄດ້ຄະແນນດີຕະຫຼອດຢູ່ໂຮງຮຽນ. ແຕ່ເມື່ອຮຽນຢູ່ຫ້ອງມໍ 2 ເລື່ອງນີ້ໄດ້ປ່ຽນໄປ. ຣາເຊວເລົ່າວ່າ: “ນາຍຄູພະຍາຍາມເຮັດທຸກສິ່ງທີ່ລາວເຮັດໄດ້ເພື່ອໃຫ້ຂ້ອຍເສັງຕົກ.” ອັນໃດຄືບັນຫາ? ນາຍຄູເຮັດໃຫ້ທັງຣາເຊວແລະແມ່ເຫັນຢ່າງຈະແຈ້ງວ່າລາວບໍ່ມັກສາສະໜາຂອງເຂົາເຈົ້າ.
ເກີດຫຍັງຂຶ້ນ? ຣາເຊວເລົ່າວ່າ: “ແຕ່ລະເທື່ອມັນເຫັນຢ່າງຈະແຈ້ງວ່ານາຍຄູປ່ອຍໃຫ້ອະຄະຕິກະທົບໃສ່ວິທີທີ່ລາວໃຫ້ຄະແນນການຮຽນຂອງຂ້ອຍ ແມ່ໄປໂຮງຮຽນນຳຂ້ອຍເພື່ອເວົ້າລົມກັບນາຍຄູໃນເລື່ອງນີ້. ໃນທີ່ສຸດ ເພິ່ນກໍເຊົາກໍ່ເລື່ອງຫຍຸ້ງຍາກສຳລັບຂ້ອຍ.” ຖ້າເຈົ້າປະເຊີນກັບສິ່ງທ້າທາຍທີ່ຄ້າຍໆກັນ ຈົ່ງມີຄວາມກ້າຫານທີ່ຈະເວົ້າກັບພໍ່ແມ່ໃນເລື່ອງນີ້. ແນ່ນອນວ່າພວກເພິ່ນຄົງສົນໃຈທີ່ຈະເວົ້າລົມກັບນາຍຄູແລະອາດເວົ້າລົມກັບຜູ້ບໍລິຫານໂຮງຮຽນເພື່ອຫາທາງແກ້ໄຂ.
ມີທັດສະນະທີ່ຍາວໄກ
ເປັນທີ່ຍອມຮັບວ່າ ບໍ່ແມ່ນເລື່ອງສັບສົນວຸ່ນວາຍທັງໝົດຈະຈົບລົງດ້ວຍດີ. ບາງເທື່ອຈຳເປັນຕ້ອງອົດທົນ. ນາງທັນຍາເວົ້າວ່າ: “ນາຍຄູຂອງຂ້ອຍຄົນໜຶ່ງມີທັດສະນະທີ່ບໍ່ດີຕໍ່ກັບນັກຮຽນ. ເພິ່ນມັກດູຖູກພວກເຮົາ ເວົ້າໃຫ້ພວກເຮົາວ່າໂງ່ຈ້າ. ທຳອິດເພິ່ນເຮັດໃຫ້ຂ້ອຍຮ້ອງໄຫ້ ແຕ່ຂ້ອຍຮຽນຮູ້ທີ່ຈະບໍ່ໃສ່ໃຈກັບການດູຖູກຂອງເພິ່ນ. ຂ້ອຍຕັ້ງໃຈຮຽນແລະໝົກມຸ້ນກັບສິ່ງທີ່ເພິ່ນສອນ. ຜົນກໍຄື ເພິ່ນບໍ່ໄດ້ກໍ່ເລື່ອງຫຍຸ້ງຍາກໃຫ້ຂ້ອຍຫຼາຍ ແລະຂ້ອຍເປັນໜຶ່ງໃນບໍ່ເທົ່າໃດຄົນທີ່ໄດ້ຄະແນນດີ. ສອງປີຕໍ່ມາ ນາຍຄູຜູ້ນັ້ນກໍຖືກໄລ່ອອກ.”
ຮຽນຮູ້ວິທີທີ່ຈະຮັບມືກັບນາຍຄູທີ່ເອົາໃຈຍາກ ແລະເຈົ້າຈະໄດ້ຮັບທັກສະທີ່ມີຄ່າໃນຊີວິດ ເຊິ່ງເປັນທັກສະທີ່ຈະຊ່ວຍເຈົ້າໄດ້ດີເມື່ອຕ້ອງຮັບມືກັບຫົວໜ້າທີ່ເອົາໃຈຍາກ. ນອກຈາກນັ້ນ ເມື່ອເຈົ້າມີນາຍຄູທີ່ດີ ເຈົ້າຈະເຫັນຄຸນຄ່າຂອງເພິ່ນ.
ເບິ່ງຄືວ່າບໍ່ມີເວລາພຽງພໍບໍໃນມື້ໜຶ່ງ? ຈົ່ງຮຽນຮູ້ວິທີທີ່ຈະເຮັດໃຫ້ເວລາເປັນໝູ່ ບໍ່ແມ່ນເປັນສັດຕູ.
ຂໍ້ພະຄຳພີຫຼັກ
“ເຫດສັນນີ້ທ່ານທັງຫຼາຍຢາກໄດ້ໃຫ້ຄົນກະທຳສິ່ງໃດສຳລັບທ່ານ ທ່ານຈົ່ງກະທຳສິ່ງນັ້ນສຳລັບເຂົາທຸກປະການເໝືອນກັນດ້ວຍ.”—ມັດທາຍ 7:12.
ຄຳແນະນຳ
ຖ້າເຈົ້າຄິດວ່ານາຍຄູເປັນຕາເບື່ອໜ່າຍ ໃຫ້ສຸມໃຈໃສ່ຫົວເລື່ອງທີ່ເພິ່ນສອນ ບໍ່ແມ່ນຕົວເພິ່ນ. ໃຫ້ຈົດບັນທຶກ ຖາມຂໍ້ມູນເພີ່ມເຕີມດ້ວຍຄວາມນັບຖື ແລະໃຫ້ກະຕືລືລົ້ນໃນເລື່ອງທີ່ຮຽນ. ຄວາມກະຕືລືລົ້ນຂອງເຈົ້າສາມາດສົ່ງຜົນກະທົບຕໍ່ຄົນອື່ນໄດ້.
ເຈົ້າຮູ້ບໍ . . .?
ອາດເປັນໄປໄດ້ທີ່ນາຍຄູສອນບົດຮຽນເກົ່າເປັນຫຼາຍສິບເທື່ອຫຼືແມ່ນແຕ່ເປັນຫຼາຍຮ້ອຍເທື່ອໃຫ້ຫ້ອງອື່ນນຳ. ດັ່ງນັ້ນ ອາດເປັນເລື່ອງຍາກສຳລັບນາຍຄູທີ່ຈະຮັກສາລະດັບຄວາມກະຕືລືລົ້ນຕໍ່ວິຊານັ້ນແບບທີ່ເພິ່ນມີແຕ່ກ່ອນ.
ແຜນພາກປະຕິບັດ!
ເພື່ອຊ່ວຍເຮັດໃຫ້ຫ້ອງຮຽນທີ່ເປັນຕາເບື່ອເປັນຕາໜ້າສົນໃຈຂຶ້ນ ຂ້ອຍຈະ ․․․․․
ຖ້າຮູ້ສຶກວ່ານາຍຄູກຳລັງປະຕິບັດກັບຂ້ອຍແບບບໍ່ທ່ຽງທຳ ຂ້ອຍຈະ ․․․․․
ສິ່ງທີ່ຂ້ອຍຢາກຖາມພໍ່ (ແມ່) ກ່ຽວກັບເລື່ອງນີ້ແມ່ນ ․․․․․
ເຈົ້າຄິດວ່າແນວໃດ?
• ເປັນຫຍັງຈຶ່ງສຳຄັນທີ່ຈະສຸມໃຈໃສ່ຫົວເລື່ອງທີ່ສອນແທນທີ່ຈະສຸມໃຈໃສ່ນາຍຄູ?
• ທັດສະນະຂອງເຈົ້າທີ່ມີຕໍ່ກັບຫົວເລື່ອງທີ່ສອນອາດສົ່ງຜົນກະທົບແນວໃດຕໍ່ທັດສະນະຂອງນາຍຄູທີ່ມີຕໍ່ເຈົ້າ?
[ຈຸດເດັ່ນໜ້າ 146]
“ຂ້ອຍພະຍາຍາມຢ່າງໜັກທີ່ຈະເປັນມິດກັບນາຍຄູໝົດທຸກຄົນ. ຂ້ອຍຮູ້ຊື່ຂອງພວກເພິ່ນ ແລະຖ້າພໍ້ພວກເພິ່ນຢູ່ຕາມຫົນທາງ ຂ້ອຍໃຊ້ເວລາສອງສາມນາທີເວົ້າລົມກັບພວກເພິ່ນ.”—ນາງ ຄາເມັນ
[ຮູບພາບໜ້າ 145]
ນາຍຄູເປັນຄືກັບແຜ່ນຫີນທີ່ປູໄວ້ເປັນໄລຍະໆ ເຊິ່ງຊ່ວຍເຈົ້າໃຫ້ຂ້າມຜ່ານຈາກການບໍ່ມີຄວາມຮູ້ໄປສູ່ການມີຄວາມເຂົ້າໃຈ ແຕ່ເຈົ້າຕ້ອງເປັນຄົນຍ່າງຂ້າມເອງ