ບົດທີ 6

ຄູຜູ້ຍິ່ງໃຫຍ່ຮັບໃຊ້ຄົນອື່ນ

ລູກດີໃຈບໍເມື່ອມີໃຜເຮັດສິ່ງດີໆໃຫ້ກັບລູກ?— ອັນທີ່ຈິງຄົນອື່ນກໍມັກຄືກັນເມື່ອມີຄົນເຮັດສິ່ງທີ່ດີໆໃຫ້ກັບເຂົາເຈົ້າ. ພວກເຮົາທຸກຄົນມັກ. ຄູຜູ້ຍິ່ງໃຫຍ່ຮູ້ເລື່ອງນັ້ນ ແລະພະອົງເຮັດສິ່ງຕ່າງໆເພື່ອຄົນອື່ນຢູ່ສະເໝີ. ພະອົງກ່າວວ່າ ‘ເຮົາບໍ່ໄດ້ມາເພື່ອໃຫ້ຄົນອື່ນຮັບໃຊ້ ແຕ່ເພື່ອຈະຮັບໃຊ້ຄົນອື່ນ.’—ມັດທາຍ 20:28.

Jesus observes two of his disciples arguing — ເຫຼົ່າສາວົກຂອງພະເຍຊູຖຽງກັນເລື່ອງຫຍັງ?

ດັ່ງນັ້ນ ຖ້າເຮົາຢາກເປັນຄືຄູຜູ້ຍິ່ງໃຫຍ່ ເຮົາຈະຕ້ອງເຮັດແນວໃດ?— ເຮົາຕ້ອງຮັບໃຊ້ຄົນອື່ນໆ. ເຮົາຕ້ອງເຮັດສິ່ງທີ່ດີໃຫ້ກັບເຂົາເຈົ້າ. ທີ່ຈິງຫຼາຍຄົນບໍ່ໄດ້ເຮັດແບບນີ້. ຄົນສ່ວນຫຼາຍຊ້ຳພັດຢາກໃຫ້ຄົນອື່ນຮັບໃຊ້ຕົນເອງຢູ່ສະເໝີ. ເທື່ອໜຶ່ງແມ່ນແຕ່ສາວົກຂອງພະເຍຊູກໍຍັງຮູ້ສຶກແບບນີ້. ແຕ່ລະຄົນຢາກເປັນຄົນທີ່ສຳຄັນທີ່ສຸດ.

ມື້ໜຶ່ງພະເຍຊູເດີນທາງໄປກັບເຫຼົ່າສາວົກຂອງພະອົງ. ຫຼັງຈາກເຂົາເຈົ້າເຂົ້າໄປໃນເມືອງກັບເອນາອູມທີ່ຢູ່ໃກ້ກັບທະເລຄາລິເລ ເຂົາເຈົ້າເຂົ້າໄປໃນເຮືອນຫຼັງໜຶ່ງ. ຢູ່ຫັ້ນພະເຍຊູໄດ້ຖາມເຫຼົ່າສາວົກວ່າ: “ເມື່ອມາໃນທາງນັ້ນທ່ານທັງຫຼາຍໄດ້ຖຽງກັນດ້ວຍຂໍ້ຄວາມໃດ?” ເຂົາເຈົ້າບໍ່ປາກເພາະຕອນມາຕາມທາງເຂົາເຈົ້າຖຽງກັນວ່າໃຜຈະເປັນໃຫຍ່ກວ່າຫມູ່.—ມາລະໂກ 9:33, 34.

ພະເຍຊູຮູ້ວ່າບໍ່ຖືກທີ່ສາວົກຄົນໃດຈະຄິດວ່າຕົນເປັນໃຫຍ່ທີ່ສຸດ. ດັ່ງທີ່ເຮົາໄດ້ຮຽນຈາກບົດທຳອິດຂອງປຶ້ມນີ້ ພະອົງໃຫ້ເດັກນ້ອຍໆຄົນໜຶ່ງມາຢືນຫວ່າງກາງສາວົກແລະບອກວ່າເຂົາເຈົ້າຄວນຈະຖ່ອມຕົວຄືກັບເດັກນ້ອຍໆຄົນນີ້. ແຕ່ເຂົາເຈົ້າກໍຍັງບໍ່ໄດ້ຖອດຖອນເອົາເປັນບົດຮຽນ. ດັ່ງນັ້ນ ບໍ່ດົນກ່ອນພະອົງເສຍຊີວິດ ພະເຍຊູໄດ້ສອນບົດຮຽນທີ່ເຂົາເຈົ້າຈະບໍ່ມີວັນລືມໄດ້ເລີຍ. ພະອົງສອນແນວໃດ?—

ພໍດີຂະນະທີ່ເຂົາເຈົ້າທຸກຄົນຊຸມເຂົ້ານຳກັນຢູ່ ພະເຍຊູໄດ້ລຸກຈາກໂຕະແລະແກ້ເສື້ອຊັ້ນນອກອອກ. ພະອົງຈັບເອົາຜ້າເຊັດໂຕມາຄຽນແອວແລ້ວຈຶ່ງເອົາຊາມໃບໜຶ່ງມາໃສ່ນ້ຳ. ສາວົກຂອງພະອົງຄົງຈະສົງໄສວ່າພະອົງເຮັດຫຍັງຢູ່. ຂະນະທີ່ເຂົາເຈົ້າຄອຍເບິ່ງຢູ່ ພະເຍຊູຍ່າງເຂົ້າໄປຫາເຂົາເຈົ້າແລ້ວກົ້ມຕົວລົງລ້າງຕີນໃຫ້ເຂົາເຈົ້າ. ແລ້ວຈຶ່ງເອົາຜ້າເຊັດຕີນເຂົາເຈົ້າໃຫ້ແຫ້ງ. ລູກລອງຄິດເບິ່ງດູ! ຈະເປັນແນວໃດຖ້າລູກຢູ່ຫັ້ນ? ລູກຈະຮູ້ສຶກແນວໃດ?—

Jesus washes his disciples’ feet — ພະເຍຊູສອນບົດຮຽນຫຍັງໃຫ້ເຫຼົ່າສາວົກຂອງພະອົງ?

ສາວົກຂອງພະອົງຮູ້ສຶກວ່າບໍ່ສົມຄວນທີ່ຄູຜູ້ຍິ່ງໃຫຍ່ຮັບໃຊ້ເຂົາເຈົ້າແບບນີ້. ເຂົາເຈົ້າຮູ້ສຶກອາຍ. ທີ່ຈິງ ເປໂຕບໍ່ຍອມໃຫ້ພະເຍຊູຮັບໃຊ້ລາວໃນແບບຕ່ຳຕ້ອຍເຊັ່ນນີ້. ແຕ່ພະເຍຊູກ່າວວ່າເປັນສິ່ງສຳຄັນທີ່ພະອົງເຮັດເຊັ່ນນີ້.

ຕາມປົກກະຕິເຮົາບໍ່ໄດ້ລ້າງຕີນໃຫ້ກັນໃນສະໄໝນີ້. ແຕ່ນັ້ນເປັນສິ່ງທີ່ເຄີຍເຮັດໃນສະໄໝທີ່ພະເຍຊູຢູ່ເທິງແຜ່ນດິນໂລກ. ລູກຮູ້ບໍວ່າເປັນຫຍັງ?— ທຳມະດາໃນດິນແດນທີ່ພະເຍຊູແລະສາວົກຂອງພະອົງຢູ່ນັ້ນຜູ້ຄົນໃສ່ເກີບແຕະ. ດັ່ງນັ້ນ ເມື່ອເຂົາເຈົ້າຍ່າງຕາມທາງທີ່ມີຝຸ່ນ ຕີນເຂົາເຈົ້າຈຶ່ງເປື້ອນຝຸ່ນ. ການລ້າງຝຸ່ນອອກຈາກຕີນຂອງຜູ້ທີ່ມາຢາມຈຶ່ງເປັນເລື່ອງທີ່ກະລຸນາ.

ແຕ່ເທື່ອນີ້ບໍ່ມີສາວົກຂອງພະເຍຊູຄົນໃດສະເໜີຕົວທີ່ຈະລ້າງຕີນໃຫ້ຄົນອື່ນ. ດັ່ງນັ້ນພະເຍຊູຈຶ່ງເຮັດເອງ. ໂດຍການເຮັດເຊັ່ນນີ້ພະເຍຊູໄດ້ສອນບົດຮຽນທີ່ສຳຄັນໃຫ້ກັບສາວົກຂອງພະອົງ. ເຂົາເຈົ້າຕ້ອງໄດ້ຮຽນຮູ້ບົດຮຽນນີ້. ແລະນັ້ນເປັນບົດຮຽນທີ່ເຮົາໃນປັດຈຸບັນກໍຕ້ອງຮຽນຮູ້ຄືກັນ.

ລູກຮູ້ບໍວ່າບົດຮຽນນັ້ນແມ່ນຫຍັງ?— ຫຼັງຈາກພະເຍຊູໃສ່ເສື້ອຊັ້ນນອກແລ້ວກັບໄປນັ່ງທີ່ໂຕະອີກ ພະອົງອະທິບາຍວ່າ: “ການນີ້ທີ່ເຮົາໄດ້ກະທຳແກ່ທ່ານທັງຫຼາຍ ທ່ານທັງຫຼາຍເຂົ້າໃຈຫຼື? ທ່ານທັງຫຼາຍເອີ້ນເຮົາວ່າ ‘ພະອາຈານ’ ແລະ ‘ພະອົງເຈົ້າ’ ແລະທ່ານທັງຫຼາຍເວົ້າຈິງເພາະເຮົາເປັນສັນນັ້ນ. ເຫດສັນນີ້ຖ້າເຮົາຜູ້ເປັນພະອົງເຈົ້າແລະພະອາຈານໄດ້ລ້າງຕີນຂອງທ່ານທັງຫຼາຍ ທ່ານທັງຫຼາຍຕ້ອງລ້າງຕີນກັນແລະກັນທັງມວນ.”—ໂຢຮັນ 13:2-14.

A child brings a pot to two women preparing food — ລູກສາມາດເຮັດຫຍັງເພື່ອຊ່ອຍຄົນອື່ນໆ?

ໃນເລື່ອງນີ້ຄູຜູ້ຍິ່ງໃຫຍ່ສະແດງວ່າພະອົງຕ້ອງການໃຫ້ສາວົກຂອງພະອົງຮັບໃຊ້ກັນແລະກັນ. ພະອົງບໍ່ຕ້ອງການໃຫ້ເຂົາເຈົ້າຄິດເຖິງແຕ່ຕົວເອງ. ພະເຍຊູບໍ່ຕ້ອງການໃຫ້ເຂົາເຈົ້າຄິດວ່າຕົນເອງສຳຄັນຫຼາຍຈົນຄົນອື່ນຈະຕ້ອງຮັບໃຊ້ຕົນສະເໝີ. ພະອົງຕ້ອງການໃຫ້ເຂົາເຈົ້າເຕັມໃຈທີ່ຈະຮັບໃຊ້ຄົນອື່ນ.

ນັ້ນເປັນບົດຮຽນທີ່ດີແມ່ນບໍ?— ລູກຈະເປັນຄືຄູຜູ້ຍິ່ງໃຫຍ່ແລະຮັບໃຊ້ຄົນອື່ນບໍ?— ເຮົາທຸກຄົນເຮັດສິ່ງຕ່າງໆໃຫ້ກັບຄົນອື່ນໄດ້. ການກະທຳເຊັ່ນນີ້ຈະເຮັດໃຫ້ເຂົາເຈົ້າມີຄວາມສຸກ. ແຕ່ສຳຄັນທີ່ສຸດ ສິ່ງນັ້ນຈະເຮັດໃຫ້ພະເຍຊູແລະພໍ່ຂອງພະອົງມີຄວາມສຸກ.

Children help their mother clean the house

ການຮັບໃຊ້ຄົນອື່ນບໍ່ແມ່ນເລື່ອງຍາກ. ຖ້າລູກສັງເກດລູກກໍຈະເຫັນວ່າມີຫຼາຍໆສິ່ງທີ່ລູກຈະເຮັດໃຫ້ຄົນອື່ນໄດ້. ຄິດເບິ່ງດູວ່າລູກຈະຊ່ອຍແມ່ເຮັດຫຍັງໄດ້ແດ່? ລູກກໍຮູ້ວ່າແມ່ເຮັດຫຼາຍສິ່ງສຳລັບລູກແລະຄົນອື່ນໃນຄອບຄົວ. ລູກຈະຊ່ອຍແມ່ໄດ້ບໍ?— ລອງຖາມແມ່ເບິ່ງ?

ລູກອາດຈະກຽມພາເຂົ້າກ່ອນຄອບຄົວຈະກິນເຂົ້າຫຼືເມື່ອກິນອີ່ມແລ້ວລູກອາດຈະເອົາຖ້ວຍເອົາບ່ວງທີ່ໃຊ້ແລ້ວໄປລ້າງ. ເດັກນ້ອຍລາງຄົນເອົາຂີ້ເຫຍື້ອອອກໄປຖິ້ມທຸກມື້. ບໍ່ວ່າອັນໃດກໍຕາມທີ່ລູກເຮັດໄດ້ ຍ່ອມຈະເປັນການຮັບໃຊ້ຄົນອື່ນຄືກັບທີ່ພະເຍຊູໄດ້ເຮັດ.

An older boy helps his younger brother make his bed

ລູກມີນ້ອງຊາຍແລະນ້ອງສາວແມ່ນບໍທີ່ລູກຈະຮັບໃຊ້ໄດ້? ຈື່ໄວ້ວ່າພະເຍຊູຄູຜູ້ຍິ່ງໃຫຍ່ກໍຍັງຮັບໃຊ້ສາວົກຂອງພະອົງ. ໂດຍການຮັບໃຊ້ນ້ອງຊາຍແລະນ້ອງສາວ ລູກຈະເປັນຜູ້ທີ່ຮຽນແບບພະເຍຊູ. ລູກເຮັດສິ່ງໃດໃຫ້ກັບນ້ອງໄດ້ແດ່?— ບາງທີລູກອາດສອນເຂົາເຈົ້າໃຫ້ມ້ຽນເຄື່ອງຫຼິ້ນເມື່ອເຊົາຫຼິ້ນແລ້ວຫຼືອາດຈະຊ່ອຍແຕ່ງຕົວໃຫ້ເຂົາເຈົ້າຫຼືບາງທີລູກອາດຊ່ອຍເຂົາເຈົ້າເກັບມ້ຽນບ່ອນນອນກໍໄດ້. ອັນໃດອີກທີ່ລູກຄິດວ່າຈະເຮັດໃຫ້ກັບນ້ອງໄດ້?— ເຂົາເຈົ້າຈະຮັກລູກເພາະລູກເຮັດສິ່ງເຫຼົ່ານັ້ນຄືກັບທີ່ພວກສາວົກຂອງພະເຍຊູຮັກພະອົງ.

ຢູ່ທີ່ໂຮງຮຽນກໍຄືກັນລູກສາມາດຮັບໃຊ້ຄົນອື່ນໆໄດ້. ອາດຈະຮັບໃຊ້ຫມູ່ຫ້ອງດຽວກັນຫຼືນາຍຄູຂອງລູກ. ຖ້າມີໃຜເຮັດປຶ້ມຕົກ ການເກັບປຶ້ມໃຫ້ເຂົາເຈົ້າສະແດງວ່າລູກມີນ້ຳໃຈ. ລູກອາດຈະລຶບກະດານດຳຫຼືເຮັດສິ່ງອື່ນໆໃຫ້ກັບນາຍຄູ. ແມ່ນແຕ່ເປີດປະຕູແລະຈັບໄວ້ເພື່ອໃຫ້ຄົນເຂົ້າແລະອອກກໍເປັນການດີ.

A boy cleans the blackboard for his teacher; a girl brings groceries to a woman in a wheelchair

ບາງເທື່ອລູກຈະສັງເກດວ່າຄົນອື່ນມັກຈະບໍ່ຂອບໃຈເມື່ອເຮົາຮັບໃຊ້ເຂົາເຈົ້າ. ລູກຄິດວ່າເຮົາຄວນເຊົາເຮັດການດີເພາະເລື່ອງນີ້ບໍ?— ບໍ່ຄວນເຊົາ! ຫຼາຍຄົນບໍ່ໄດ້ຂອບໃຈພະເຍຊູສຳລັບການດີທີ່ພະອົງໄດ້ເຮັດ. ແຕ່ນັ້ນບໍ່ໄດ້ເຮັດໃຫ້ພະອົງເຊົາເຮັດສິ່ງທີ່ດີ.

ດັ່ງນັ້ນ ຢ່າຊູ່ເຊົາຮັບໃຊ້ຜູ້ອື່ນ. ໃຫ້ເຮົາຄິດເຖິງພະເຍຊູຄູສອນຜູ້ຍິ່ງໃຫຍ່ ແລະພະຍາຍາມເຮັດຕາມຕົວຢ່າງຂອງພະອົງຢູ່ເລື້ອຍ.

ອ່ານຂໍ້ພະຄຳພີເພີ່ມເຕີມເລື່ອງການຊ່ອຍຜູ້ອື່ນຢູ່: ສຸພາສິດ 3:27, 28; ໂລມ 15:1, 2; ແລະຄາລາຊີ 6:2.