ບົດທີ 30
ພວກເຮົາພ້ອມແທ້ໆ ບໍສຳລັບການແຕ່ງດອງ?
ເຈົ້າໄດ້ພົບກັບຄົນທີ່ເຈົ້າຢາກແຕ່ງດອງນຳ ແລະເຈົ້າໄດ້ຄົບຫາກັນດົນພໍສົມຄວນຈົນຮູ້ວ່າເຈົ້າຕົກຢູ່ໃນຄວາມຮັກ. ວັນແຕ່ງດອງທີ່ມີຄວາມສຸກໃກ້ຈະມາຮອດແລ້ວ. ຫຼືວ່າຮອດແລ້ວບໍ? ການຕັດສິນໃຈຢ່າງໜຶ່ງທີ່ສຳຄັນທີ່ສຸດໃນຊີວິດເລີ່ມຕົ້ນຂຶ້ນ ເຈົ້າເລີ່ມສົງໄສວ່າ . . .
ພວກເຮົາພ້ອມແທ້ໆ ບໍສຳລັບການແຕ່ງດອງ?
ການມີຂໍ້ສົງໄສກ່ຽວກັບຊີວິດແຕ່ງດອງເປັນເລື່ອງທຳມະດາ ແມ່ນແຕ່ເມື່ອເຈົ້າຕົກຢູ່ໃນຄວາມຮັກ. ເນື່ອງຈາກຊີວິດແຕ່ງດອງທີ່ບໍ່ມີຄວາມສຸກມີຢູ່ມາກມາຍແລະອັດຕາການຢ່າຮ້າງນັບມື້ນັບສູງຂຶ້ນ ດັ່ງນັ້ນຈຶ່ງເຂົ້າໃຈໄດ້ວ່າເຈົ້າຕ້ອງການດຳເນີນດ້ວຍຄວາມລະມັດລະວັງໃນຂະນະທີ່ເຈົ້າຄິດພິຈາລະນາຂັ້ນຕອນໃນການປ່ຽນແປງຊີວິດ. ເຈົ້າຈະຮູ້ໄດ້ແນວໃດວ່າເຈົ້າພ້ອມແລ້ວສຳລັບການແຕ່ງດອງ ຕອນນີ້ຍິ່ງກວ່າທີ່ເຄີຍເປັນມາ ເຈົ້າຈຳເປັນຕ້ອງລຶບລ້າງເລື່ອງການຝັນຫວານໃດໆກໍຕາມທີ່ເຈົ້າອາດມີໃນເລື່ອງຊີວິດແຕ່ງດອງແລະປ່ຽນແທນເລື່ອງເຫຼົ່ານັ້ນຕາມຄວາມເປັນຈິງ. ຕົວຢ່າງເຊັ່ນ:
ຝັນຫວານທີ 1 “ເຮົາສາມາດຢູ່ນຳກັນໄດ້ໂດຍອາໄສແຕ່ຄວາມຮັກ.”
ຄວາມເປັນຈິງ ຄວາມຮັກຊຳລະຄ່າບິນຕ່າງໆບໍ່ໄດ້ທັງບໍ່ໄດ້ປົກອັດຄວາມຫຍຸ້ງຍາກທາງດ້ານການເງິນ. ທີ່ຈິງແລ້ວ ນັກຄົ້ນຄວ້າຄົ້ນພົບວ່າເລື່ອງເງິນເປັນບັນຫາຫຼັກຂອງຄວາມຂັດແຍ່ງໃນຊີວິດແຕ່ງດອງແລະໃນທີ່ສຸດກໍຢ່າຮ້າງກັນ. ການມີທັດສະນະທີ່ບໍ່ສົມດຸນໃນເລື່ອງເງິນສາມາດສ້າງຄວາມເສຍຫາຍທາງດ້ານຝ່າຍວິນຍານແລະດ້ານອາລົມ ແລະສາມາດຄ່ອຍໆທຳລາຍສາຍສຳພັນຂອງເຈົ້າກັບຄູ່ແຕ່ງດອງເທື່ອລະເລັກລະໜ້ອຍ. (1 ຕີໂມເຕ 6:9, 10) ບົດຮຽນທີ່ໄດ້ແມ່ນຫຍັງ? ຢ່າລໍຖ້າຈົນຮອດພາຍຫຼັງ ແຕ່ງດອງກັນແລ້ວຈຶ່ງລົມກັນເລື່ອງການບໍລິຫານເງິນ!
ຄຳພີໄບເບິນກ່າວວ່າ: “ໃນພວກທ່ານ ຖ້າຜູ້ໃດຢາກກໍ່ສ້າງປ້ອມ ຜູ້ນັ້ນຈະບໍ່ນັ່ງລົງກ່ອນແລະຄຶດລາຄາແລະນັບເບິ່ງວ່າຈະມີເຂົ້າຂອງພໍໄດ້ກະທຳໃຫ້ສຸດແລ້ວຫຼື?”—ລືກາ 14:28.
ຄຳແນະນຳ ໃຫ້ລົມກັນໃນເລື່ອງການບໍລິຫານເງິນໃນອະນາຄົດກັບຜູ້ທີ່ຈະມາເປັນຄູ່ຂອງເຈົ້າຕັ້ງແຕ່ດຽວນີ້ ນັ້ນຄືກ່ອນ ແຕ່ງດອງກັນ. (ສຸພາສິດ 13:10) ຂໍໃຫ້ພິຈາລະນາຄຳຖາມຕ່າງໆດັ່ງຕໍ່ໄປນີ້ ເຮົາຈະຕັ້ງງົບປະມານສຳລັບລາຍຮັບຂອງເຮົາແນວໃດ? ເຮົາຈະເປີດບັນຊີເງິນຝາກທະນາຄານທີ່ມີຊື່ຮ່ວມກັນຫຼືແຍກເປັນຄົນລະບັນຊີ? ຜູ້ໃດຈະຊຳນານຫຼາຍກວ່າໃນການເກັບກຳຂໍ້ມູນທາງດ້ານການເງິນແລະເບິ່ງວ່າມີການຊຳລະຄ່າບິນຕ່າງໆ?a ຈຳນວນເງິນຫຼາຍປານໃດທີ່ເຮົາແຕ່ລະຄົນສາມາດໃຊ້ຈ່າຍໄດ້ໂດຍບໍ່ຕ້ອງປຶກສາກັບອີກຝ່າຍໜຶ່ງ? ຕອນນີ້ຮອດເວລາແລ້ວທີ່ຈະເລີ່ມຕົ້ນເຮັດວຽກຮ່ວມກັນເປັນທີມ!—ຜູ້ເທສະໜາປ່າວປະກາດ 4:9, 10.
ຝັນຫວານທີ 2 “ພວກເຮົາຈະເປັນຄູ່ແຕ່ງດອງທີ່ສົມບູນແບບເພາະພວກເຮົາເຫັນດີນຳກັນໃນທຸກເລື່ອງພວກເຮົາບໍ່ເຄີຍຂັດແຍ່ງກັນ!”
ຄວາມເປັນຈິງ ຖ້າເຈົ້າບໍ່ເຄີຍທີ່ຈະບໍ່ເຫັນດີນຳກັນ ອາດເປັນຍ້ອນວ່າພວກເຈົ້າສາມາດຫຼີກລ່ຽງປະເດັນຕ່າງໆຢ່າງລະມັດລະວັງທີ່ອາດກໍ່ໃຫ້ເກີດການຂັດແຍ່ງກັນ. ແຕ່ເມື່ອແຕ່ງດອງເຈົ້າຈຳເປັນຕ້ອງປຶກສາຫາລືກັນໃນເລື່ອງເຫຼົ່ານັ້ນ! ຄວາມຈິງກໍຄືວ່າ ບໍ່ມີຈັກເທື່ອ ທີ່ມະນຸດສອງຄົນເຊິ່ງບໍ່ສົມບູນແບບຈະກາຍເປັນຄູ່ແຕ່ງດອງທີ່ສົມບູນແບບ ດັ່ງນັ້ນຄວາມບໍ່ເຫັນດີນຳກັນໃນລະດັບໃດໜຶ່ງຈຶ່ງເປັນສິ່ງທີ່ຫຼີກລ່ຽງບໍ່ໄດ້. (ໂລມ 3:23; ຢາໂກໂບ 3:2) ເຈົ້າບໍ່ແມ່ນຈະຄິດພຽງແຕ່ວ່າພວກເຈົ້າເຫັນດີນຳກັນຫຼາຍສ່ຳໃດ ແຕ່ຍັງຕ້ອງຄິດວ່າຈະເປັນແນວໃດເມື່ອບໍ່ເຫັນດີນຳກັນ. ສາຍສົມລົດທີ່ໜຽວແໜ້ນປະກອບດ້ວຍຄົນສອງຄົນທີ່ເປີດໃຈຍອມຮັບເອົາຄວາມແຕກຕ່າງ ແລະຈາກນັ້ນກໍລົງມືຈັດການກັບບັນຫາແບບຜູ້ໃຫຍ່ແລະເຮັດຢ່າງສັນຕິ.
ຄຳພີໄບເບິນກ່າວວ່າ: “ຢ່າເຂົ້າໄປນອນເມື່ອຍັງຮ້າຍຢູ່.”—ເອເຟດ 4:26, ສະບັບຄອນເທມໂພຣາຣີ ອິງລິດສ.
ຄຳແນະນຳ ຕຶກຕອງຢ່າງຖີ່ຖ້ວນເຖິງວິທີທີ່ເຈົ້າຮັບມືກັບຄວາມຂັດແຍ່ງກັນກັບພໍ່ແມ່ແລະອ້າຍເອື້ອຍນ້ອງຈົນຮອດດຽວນີ້. ໃຫ້ເຮັດຕາຕະລາງທີ່ຄ້າຍກັບຕາຕະລາງທີ່ຢູ່ໜ້າ 93 ຂອງປຶ້ມຫົວນີ້ ຫຼືໃນໜ້າ 221 ຂອງເຫຼັ້ມທີສອງ. ໃຫ້ບັນທຶກເຫດການທີ່ສະເພາະເຈາະຈົງທີ່ເປັນສາເຫດຂອງຄວາມບໍ່ເຫັນດີກັນ ແລະການຕອບສະໜອງແບບໃດທີ່ອາດດີກວ່າ. ຕົວຢ່າງເຊັ່ນ ຖ້າການຕອບສະໜອງທີ່ໃຈຮ້ອນຂອງເຈົ້າຕໍ່ກັບຂໍ້ຂັດແຍ່ງຄືການເຂົ້າໄປໃນຫ້ອງຂອງຕົນເອງດ້ວຍຄວາມຄຽດແລະອັດປະຕູແຮງໆດ້ວຍຄວາມໃຈຮ້າຍ ຂໍໃຫ້ຂຽນການຕອບສະໜອງໃນແບບທີ່ດີກວ່າ ນັ້ນຄືການຕອບສະໜອງທີ່ຈະໃຊ້ໄດ້ເພື່ອແກ້ບັນຫາແທນທີ່ຈະເຮັດໃຫ້ຮ້າຍແຮງກວ່າເກົ່າ. ຖ້າຕອນນີ້ເຈົ້າຮຽນຮູ້ທີ່ຈະຕອບສະໜອງໃນແບບທີ່ດີກວ່າຕໍ່ກັບຂໍ້ຂັດແຍ່ງ ເຈົ້າຈະຮຽນຮູ້ທັກສະທີ່ສຳຄັນຫຼາຍແທ້ໆທີ່ນຳໄປສູ່ຊີວິດແຕ່ງດອງທີ່ມີຄວາມສຸກ.
ຝັນຫວານທີ 3 “ເມື່ອຂ້ອຍແຕ່ງດອງແລ້ວ ຄວາມປາຖະໜາທາງເພດທຸກຢ່າງຂອງຂ້ອຍຈະໄດ້ຮັບການຕອບສະໜອງ.”
ຄວາມເປັນຈິງ ການແຕ່ງດອງບໍ່ໄດ້ ຮັບປະກັນວ່າເຈົ້າຈະມີເພດສຳພັນເມື່ອໃດກໍໄດ້ຕາມທີ່ເຈົ້າຕ້ອງການ. ຂໍໃຫ້ຈື່ໄວ້ວ່າຄູ່ແຕ່ງດອງຂອງເຈົ້າເປັນມະນຸດທີ່ມີຄວາມຮູ້ສຶກເຊິ່ງເປັນສິ່ງທີ່ຕ້ອງ ຄຳນຶງເຖິງ. ເວົ້າແບບກົງໆ ຈະມີໄລຍະເວລາທີ່ຄູ່ຂອງເຈົ້າບໍ່ມີຄວາມຮູ້ສຶກທີ່ຢາກໃກ້ຊິດກັນ. ການແຕ່ງດອງບໍ່ໄດ້ໃຫ້ສິດເຈົ້າທີ່ຈະຮຽກຮ້ອງເອົາວ່າຄວາມຕ້ອງການຂອງເຈົ້າຕ້ອງໄດ້ຮັບການຕອບສະໜອງ. (1 ໂກລິນໂທ 10:24) ຄວາມຈິງກໍຄື ການຄວບຄຸມຕົວເອງເປັນສິ່ງສຳຄັນທີ່ສຸດທັງໃນຊີວິດໂສດແລະ ຊີວິດແຕ່ງດອງ.—ຄາລາຊີ 5:22, 23.
ຄຳພີໄບເບິນກ່າວວ່າ: “ພວກທ່ານທຸກຄົນຕ້ອງຮູ້ຈັກຮັກສາເຄື່ອງອາການແຫ່ງຕົນຕັ້ງໄວ້ຢູ່ຕ່າງຫາກເປັນບໍລິສຸດແລະໃນຄວາມນັບຖື ບໍ່ໃຊ່ໃນຄວາມຕັນຫາຄຶດຢາກໄດ້ອັນຊົ່ວ.”—1 ເທຊະໂລນີກ 4:4, 5.
ຄຳແນະນຳ ໃຫ້ກວດເບິ່ງຄືນຢ່າງຖີ່ຖ້ວນໃນເລື່ອງຄວາມປາຖະໜາແລະທ່າອ່ຽງທາງເພດຂອງເຈົ້າ ແລະໃຫ້ຄິດເບິ່ງວ່າສິ່ງເຫຼົ່ານີ້ອາດສົ່ງຜົນກະທົບແນວໃດຕໍ່ຊີວິດແຕ່ງດອງໃນອະນາຄົດ. ຕົວຢ່າງເຊັ່ນ ເຈົ້າຕົກເປັນທາດຂອງນິດໄສທີ່ເຫັນແກ່ຕົວໃນເລື່ອງການຕອບສະໜອງຄວາມຕ້ອງການທາງເພດດ້ວຍຕົວເອງບໍ? ເຈົ້າມີນິດໄສເບິ່ງພາບລາມົກບໍ? ເຈົ້າມີຕາລ໋ອກແລ໋ກລັກເບິ່ງເພດກົງກັນຂ້າມດ້ວຍຄວາມລາຄະຕັນຫາບໍ? ຂໍໃຫ້ຖາມຕົວເອງວ່າ ‘ຖ້າຂ້ອຍມີບັນຫາໃນການຄວບຄຸມຄວາມປາຖະໜາທາງເພດຂອງຕົນເອງກ່ອນແຕ່ງດອງ ຂ້ອຍຈະສາມາດຄວບຄຸມມັນໄດ້ແນວໃດພາຍຫຼັງທີ່ແຕ່ງດອງແລ້ວ?’ (ມັດທາຍ 5:27, 28) ອີກເລື່ອງໜຶ່ງກໍຄື ເຈົ້າມີທ່າອ່ຽງທີ່ຈະມັກຄົບຫາແບບຫຼິ້ນໆແລະຄົບຫາຫຼາຍໆຄົນພ້ອມກັນ ແລະມີຊື່ສຽງວ່າເປັນເສືອຜູ້ຍິງຫຼືມັກກ້ຽວຫາຜູ້ທີ່ເປັນເພດກົງກັນຂ້າມບໍ? ຖ້າເປັນເຊັ່ນນັ້ນ ເຈົ້າຈະຈຳກັດທ່າອ່ຽງນັ້ນແນວໃດພາຍຫຼັງທີ່ແຕ່ງດອງແລ້ວ ເພາະຄວາມຮັກໄຄ່ຂອງເຈົ້າຕ້ອງເລັງໃສ່ພຽງຄົນດຽວ ນັ້ນຄືຄູ່ແຕ່ງດອງຂອງເຈົ້າ?—ສຸພາສິດ 5:15-17.
ຝັນຫວານທີ 4 “ການແຕ່ງດອງຈະເຮັດໃຫ້ຂ້ອຍມີຄວາມສຸກ.”
ຄວາມເປັນຈິງ ປົກກະຕິແລ້ວເມື່ອເປັນຄົນໂສດທີ່ບໍ່ມີຄວາມສຸກກັບຊີວິດ ເມື່ອແຕ່ງດອງແລ້ວກໍຈະເປັນຄົນທີ່ບໍ່ມີຄວາມສຸກກັບຊີວິດຄືກັນ. ເພາະເຫດໃດ? ເພາະວ່າຄວາມສຸກຂຶ້ນກັບວິທີທີ່ຄົນເຮົາເບິ່ງຊີວິດຫຼາຍກວ່າວິທີທີ່ຄົນເຮົາເບິ່ງສະພາບການທີ່ຢູ່ອ້ອມຂ້າງຕົວ. (ສຸພາສິດ 15:15) ຜູ້ທີ່ມີທ່າອ່ຽງທີ່ຈະເບິ່ງທຸກຢ່າງໃນຊີວິດໃນແງ່ລົບເລັງໃສ່ໃນສິ່ງທີ່ຂາດຫາຍໄປໃນສາຍສຳພັນແທນທີ່ຈະເລັງໃສ່ໃນສິ່ງທີ່ມີຢູ່ແລ້ວ. ມັນຈະດີກວ່າຫຼາຍທີ່ຈະພັດທະນາແລະຮັກສາທັດສະນະໃນແງ່ບວກຕອນທີ່ຍັງເປັນໂສດ. ສະນັ້ນ ເມື່ອແຕ່ງດອງແລ້ວເຈົ້າຈະເຮັດໃຫ້ຄຸນສົມບັດທີ່ດີທີ່ສຸດຂອງຕົນເອງແລະຂອງຄູ່ແຕ່ງດອງສະແດງອອກມາ.
ຄຳພີໄບເບິນກ່າວວ່າ: “ສິ່ງຂອງທີ່ຕາເຫັນກໍດີກວ່າຄວາມຄຶດຢາກໄດ້ຢ່າງນີ້ຢ່າງນັ້ນ.”—ຜູ້ເທສະໜາປ່າວປະກາດ 6:9.
ຄຳແນະນຳ ບາງເທື່ອການມີທັດສະນະໃນແງ່ລົບມາຈາກການຄາດຫວັງທີ່ບໍ່ກົງກັບຄວາມເປັນຈິງ. ໃນເຈ້ຍຕ່າງຫາກ ໃຫ້ຂຽນຄວາມຄາດຫວັງສອງຫຼືສາມຢ່າງທີ່ເຈົ້າມີໃນຊີວິດແຕ່ງດອງ. ໃຫ້ອ່ານຄວາມຄາດຫວັງນັ້ນ ແລະຈາກນັ້ນໃຫ້ຖາມຕົວເອງວ່າ: ‘ຄວາມຄາດຫວັງຂອງຂ້ອຍອີງໃສ່ຄວາມເພີ້ຝັນຫຼາຍກວ່າຄວາມເປັນຈິງບໍ? ຄວາມຄາດຫວັງຂອງຂ້ອຍໄດ້ຮັບອິດທິພົນຈາກສື່ມວນຊົນ ບາງເທື່ອຈາກພາບພະຍົນຫຼືປຶ້ມເລື່ອງຄວາມຮັກທີ່ຝັນຫວານບໍ? ຄວາມຄາດຫວັງຕ່າງໆຂອງຂ້ອຍເລັງໃສ່ສິ່ງທີ່ການແຕ່ງດອງຈະສະໜອງໃຫ້ຂ້ອຍ ບາງເທື່ອເພື່ອແກ້ໄຂຄວາມເປົ່າປ່ຽວຂັ້ນຮ້າຍແຮງຂອງຂ້ອຍ ສະໜອງຄວາມຕ້ອງການທາງເພດໃຫ້ຂ້ອຍ ຍົກລະດັບສະຖານະພາບຂອງຂ້ອຍ ທ່າມກາງໝູ່ເພື່ອນໄວດຽວກັນບໍ?’ ຖ້າເປັນເຊັ່ນນັ້ນເຈົ້າຈຳເປັນຕ້ອງປ່ຽນຄວາມຄິດທີ່ວ່າຄິດເຖິງແຕ່ “ຕົວເອງ” ໄປເປັນການຄິດເຖິງ “ຄູ່” ຂອງເຈົ້ານຳ. ເພື່ອຊ່ວຍເຈົ້າໃຫ້ເຮັດເຊັ່ນນັ້ນ ໃຫ້ຂຽນຄວາມຄາດຫວັງສອງຫຼືສາມຢ່າງໃນຊີວິດແຕ່ງດອງທີ່ກ່ຽວຂ້ອງກັບເຈົ້າແລະ ຄູ່ຂອງເຈົ້າໃນອະນາຄົດ.
ການຝັນຫວານເລື່ອງຊີວິດແຕ່ງດອງທີ່ຢູ່ຂ້າງເທິງນັ້ນສາມາດສົ່ງຜົນກະທົບໃນທາງທີ່ບໍ່ດີຕໍ່ກັບຄວາມສຸກຂອງເຈົ້າໃນຊີວິດແຕ່ງດອງ. ດັ່ງນັ້ນ ຈົ່ງພະຍາຍາມທີ່ຈະກຳຈັດຄວາມຄິດເຊັ່ນນັ້ນແລະປ່ຽນແທນດ້ວຍທັດສະນະທີ່ເປັນຈິງ. ໃນໜ້າທີ 216 ແລະ 217 ສາມາດຊ່ວຍເຈົ້າແລະຜູ້ທີ່ຈະມາເປັນຄູ່ຂອງເຈົ້າໃນອະນາຄົດໃນຂະນະທີ່ພວກເຈົ້າກຳລັງຄອຍຖ້າໃນສິ່ງທີ່ເປັນພະພອນຢ່າງໜຶ່ງທີ່ຍິ່ງໃຫຍ່ທີ່ສຸດໃນຊີວິດ ນັ້ນຄືຊີວິດແຕ່ງດອງທີ່ມີຄວາມສຸກ!—ພະບັນຍັດ 24:5; ສຸພາສິດ 5:18.
ການຍຸດຕິສາຍສຳພັນເປັນຄືກັບການຕາຍສ່ວນໜຶ່ງແລ້ວ. ເຈົ້າຈະຮັບມືແນວໃດກັບຜົນທີ່ຕາມມາ?
[ຂໍ້ຄວາມໄຂເງື່ອນ]
a ມີການສະແດງໃຫ້ເຫັນວ່າ ‘ເມຍທີ່ດີ’ ທີ່ກ່າວເຖິງໃນພະທຳສຸພາສິດ 31:10-28 ເບິ່ງແຍງຄວາມຮັບຜິດຊອບຫຼາຍຢ່າງທີ່ສຳຄັນເຊິ່ງຄ້ຳຊູເລື່ອງການເງິນຂອງຄອບຄົວໂດຍກົງ. ຂໍໃຫ້ເບິ່ງຂໍ້ທີ 13, 14, 16, 18 ແລະ 24.
ຂໍ້ພະຄຳພີຫຼັກ
“ຜູ້ຊາຍຈະລາພໍ່ແມ່ແຫ່ງຕົນແລະຈະຕິດພັນຢູ່ກັບເມຍແຫ່ງຕົນແລະເຂົາທັງສອງຈະເປັນເນື້ອໜັງອັນດຽວກັນ.”—ຕົ້ນເດີມ 2:24.
ຄຳແນະນຳ
ໃຫ້ລົມກັບຄູ່ຜົວເມຍທີ່ສູງອາຍຸ ແລະຂໍຄຳແນະນຳຈາກພວກເພິ່ນເພື່ອວ່າຄູ່ຜົວເມຍໃໝ່ຈະມີຊີວິດແຕ່ງດອງທີ່ປະສົບຜົນສຳເລັດ.—ສຸພາສິດ 27:17.
ເຈົ້າຮູ້ບໍ . . .?
ໃນຊີວິດແຕ່ງດອງທີ່ປະສົບຜົນສຳເລັດ ຜົວແລະເມຍຖືວ່າເຂົາເຈົ້າເປັນໝູ່ກັນ ສື່ຄວາມກັນຈະແຈ້ງ ຮູ້ວິທີແກ້ໄຂຂໍ້ຂັດແຍ່ງ ແລະຖືວ່າສາຍສຳພັນຂອງເຂົາເຈົ້າເປັນການຜູກພັນຕະຫຼອດໄປ.
ແຜນພາກປະຕິບັດ!
ຈຸດພິເສດທີ່ຂ້ອຍຈະແກ້ໄຂໃນຕອນນີ້ເພື່ອຊ່ວຍເສີມສ້າງສາຍສຳພັນຂອງຂ້ອຍກັບຄູ່ຄອງໃນອະນາຄົດແມ່ນ ․․․․․
ສິ່ງທີ່ຂ້ອຍຢາກຖາມພໍ່ (ແມ່) ກ່ຽວກັບເລື່ອງນີ້ແມ່ນ ․․․․․
ເຈົ້າຄິດວ່າແນວໃດ?
• ໃນບາງດິນແດນ ຊີວິດແຕ່ງດອງຈຳນວນຫຼາຍຈົບລົງດ້ວຍການຢ່າຮ້າງ. ເຈົ້າຄິດວ່າເປັນຫຍັງຈຶ່ງເປັນແນວນັ້ນ?
• ມີອັນຕະລາຍອັນໃດທີ່ແຕ່ງດອງກັນພຽງເພື່ອຫຼີກໜີຊີວິດໃນເຮືອນທີ່ບໍ່ມີຄວາມສຸກ?
• ເປັນຫຍັງຈຶ່ງເປັນສິ່ງສຳຄັນທີ່ຈະປະຕິບັດຕາມຫຼັກການຕ່າງໆໃນຄຳພີໄບເບິນໃນເລື່ອງຊີວິດແຕ່ງດອງໃນອະນາຄົດ?
[ຈຸດເດັ່ນໜ້າ 220]
“ການແຕ່ງດອງເປັນບາດກ້າວທີ່ສຳຄັນ. ເປັນສິ່ງສຳຄັນບໍ່ແມ່ນພຽງແຕ່ຮູ້ວ່າເຈົ້າກຳລັງກ້າວເຂົ້າໄປສູ່ສິ່ງໃດແຕ່ວ່າເຈົ້າກຳລັງກ້າວເຂົ້າໄປກັບຜູ້ໃດ.”—ນາງ ອໍດຣາ
[ກອບ/ຮູບພາບໜ້າ 216, 217]
ແບບສອບຖາມ
ເຈົ້າພ້ອມແລ້ວບໍທີ່ຈະແຕ່ງດອງ?
ຂໍໃຫ້ພິຈາລະນາຄຳຖາມຕ່າງໆທີ່ຢູ່ໃນສອງໜ້າຕໍ່ໄປນີ້. ເຈົ້າອາດແມ່ນແຕ່ໃຊ້ສິ່ງທີ່ຢູ່ໃນໜ້າເຫຼົ່ານັ້ນເພື່ອເປັນພື້ນຖານສຳລັບການສົນທະນາລະຫວ່າງເຈົ້າແລະຜູ້ທີ່ຈະເປັນຄູ່ຂອງເຈົ້າໃນອະນາຄົດ. ຢ່າລືມທີ່ຈະເບິ່ງຂໍ້ພະຄຳພີຕ່າງໆທີ່ອ້າງເຖິງ.
ເລື່ອງການເງິນ
◻ ທັດສະນະຂອງເຈົ້າເປັນແນວໃດຕໍ່ກັບເລື່ອງເງິນ?—ເຫບເລີ 13:5, 6.
◻ ໃນທາງໃດແດ່ທີ່ເຈົ້າໄດ້ສະແດງໃຫ້ເຫັນວ່າຕົວເອງມີຄວາມຮັບຜິດຊອບທາງດ້ານການເງິນແລ້ວ?—ມັດທາຍ 6:19-21.
◻ ໃນຂະນະນີ້ເຈົ້າຕິດໜີ້ຢູ່ບໍ? ຖ້າແມ່ນ ມີຂັ້ນຕອນຫຍັງແດ່ທີ່ເຈົ້າກຳລັງເຮັດເພື່ອໄຊ້ໜີ້ນັ້ນ?—ສຸພາສິດ 22:7.
◻ ຄ່າໃຊ້ຈ່າຍສຳລັບການແຕ່ງດອງຈະໝົດເທົ່າໃດ? ຖ້າຕ້ອງຕິດໜີ້ ຈະຕິດໜີ້ຫຼາຍສຳໃດຈຶ່ງຈະສົມເຫດສົມຜົນ?—ລືກາ 14:28.
◻ ຫຼັງຈາກທີ່ແຕ່ງດອງແລ້ວ ທັງເຈົ້າແລະຄູ່ຂອງເຈົ້າຈຳເປັນຕ້ອງເຮັດວຽກບໍ? ຖ້າຕ້ອງເຮັດ ເຈົ້າຈະເຮັດແນວໃດກັບຕາຕະລາງທີ່ແຕກຕ່າງກັນແລະຄວາມຈຳເປັນໃນການເດີນທາງໄປມາ?—ສຸພາສິດ 15:22.
◻ ເຈົ້າແລະຄູ່ຂອງເຈົ້າຈະຢູ່ໃສ? ຄ່າເຊົ່າເຮືອນ ຄ່າຂອງກິນ ຄ່າເຄື່ອງນຸ່ງ ແລະຄ່າໃຊ້ຈ່າຍອື່ນໆຈະຕົກເປັນເງິນຫຼາຍປານໃດ ແລະຈະຈ່າຍຄ່າໃຊ້ຈ່າຍນັ້ນແນວໃດ?—ສຸພາສິດ 24:27.
ເລື່ອງຄອບຄົວ
◻ ເຈົ້າເຂົ້າກັນໄດ້ດີສ່ຳໃດກັບພໍ່ແມ່ແລະອ້າຍເອື້ອຍນ້ອງ?—ອົບພະຍົບ 20:12; ໂລມ 12:18.
◻ ໃນຂະນະນີ້ເຈົ້າແກ້ໄຂຂໍ້ຂັດແຍ່ງຢູ່ເຮືອນແນວໃດ?—ໂກໂລດ 3:13.
◻ ຖ້າເຈົ້າເປັນຍິງສາວ ໃນທາງໃດແດ່ທີ່ເຈົ້າສະແດງຕົວວ່າເປັນຄົນ “ສະຫງົບສະຫງ່ຽມແລະອ່ອນໂຍນ”?—1 ເປໂຕ 3:4, ລ.ມ.
◻ ເຈົ້າວາງແຜນວ່າຈະເອົາລູກບໍ? (ຄຳເພງ 127:3) ຖ້າບໍ່ເອົາ ເຈົ້າຈະໃຊ້ການຄຸມກຳເນີດແບບໃດ?
◻ ຖ້າເຈົ້າເປັນຊາຍໜຸ່ມ ເຈົ້າຈະວາງແຜນແນວໃດໃນການນຳໜ້າເພື່ອຈັດຕຽມສິ່ງຝ່າຍວິນຍານສຳລັບຄອບຄົວ?—ມັດທາຍ 5:3.
ນິດໄສສະເພາະຕົວ
◻ ໃນທາງໃດແດ່ທີ່ເຈົ້າສະແດງໃຫ້ເຫັນວ່າຕົວເອງເປັນຄົນດຸໝັ່ນ?—ສຸພາສິດ 6:9-11; 31:17, 19, 21, 22, 27.
◻ ເຈົ້າສະແດງນ້ຳໃຈເສຍສະລະຕົວເອງຄືແນວໃດ?—ຟີລິບ 2:4.
◻ ຖ້າເຈົ້າເປັນຊາຍໜຸ່ມ ໃນທາງໃດແດ່ທີ່ເຈົ້າສະແດງໃຫ້ເຫັນວ່າເຈົ້າສາມາດໃຊ້ສິດອຳນາດໃນແບບທີ່ພະຄລິດໃຊ້?—ເອເຟດ 5:25, 28, 29.
◻ ຖ້າເຈົ້າເປັນຍິງສາວ ມີຂໍ້ພິສູດຫຍັງແດ່ທີ່ວ່າເຈົ້າຍອມຢູ່ໃຕ້ອຳນາດ?—ເອເຟດ 5:22-24.
[ຮູບພາບໜ້າ 219]
ຢ່າຟ້າວຟັ່ງກ້າວເຂົ້າສູ່ຊີວິດແຕ່ງດອງຄືກັບການຢ່າຟ້າວໂດດລົງ “ນ້ຳ” ເມື່ອທຳອິດບໍ່ຮູ້ວ່າມີຫຍັງຢູ່ໃນນ້ຳນັ້ນ