ບົດທີ 2

ເປັນຫຍັງພວກເຮົາຈຶ່ງຖືກເອີ້ນວ່າພະຍານພະເຢໂຫວາ?

ຫຼາຍຄົນຄິດວ່າຊື່ພະຍານພະເຢໂຫວາແມ່ນຊື່ຂອງສາສະໜາໃໝ່. ແນວໃດກໍຕາມ ຫຼາຍກວ່າ 2.700 ປີມາແລ້ວ ຄຳພີໄບເບິນກ່າວເຖິງບັນດາຜູ້ຮັບໃຊ້ຂອງພະເຈົ້າທ່ຽງແທ້ພຽງແຕ່ອົງດຽວວ່າເປັນ “ພິຍານ” ຂອງພະອົງ. (ເອຊາອີ 43:10-12) ຈົນຮອດປີ 1931 ພວກເຮົາເປັນທີ່ຮັບຮູ້ໃນຊື່ນັກສຶກສາຄຳພີໄບເບິນ. ເປັນຫຍັງພວກເຮົາຈຶ່ງຮັບເອົາຊື່ພະຍານພະເຢໂຫວາ?

ຊື່ນີ້ຊີ້ບອກເຖິງພະເຈົ້າຂອງເຮົາ. ອີງຕາມສຳເນົາພະຄຳພີທີ່ເກົ່າແກ່ ຊື່ຂອງພະເຈົ້າ ເຢໂຫວາ ປາກົດຫຼາຍພັນຄັ້ງໃນຄຳພີໄບເບິນ. ໃນສະບັບແປຫຼາຍສະບັບ ຊື່ນີ້ຖືກປ່ຽນແທນດ້ວຍຄຳບອກຕຳແໜ່ງຕ່າງ ໆ ເຊັ່ນ ພະອົງເຈົ້າຫຼືພະເຈົ້າ. ຢ່າງໃດກໍຕາມ ພະເຈົ້າອົງທ່ຽງແທ້ໄດ້ເຮັດໃຫ້ໂມເຊຮູ້ຈັກກັບພະອົງດ້ວຍຊື່ເຢໂຫວາ ໂດຍກ່າວວ່າ: “ນາມຊື່ຂອງເຮົາແມ່ນດັ່ງນັ້ນຕະຫຼອດໄປເປັນນິດ.” (ອົບພະຍົບ 3:15) ໂດຍວິທີນີ້ ພະອົງແຍກຕົວເອງອອກຈາກພະປອມທັງຫຼາຍ. ພວກເຮົາພູມໃຈທີ່ໄດ້ຖືເອົາຊື່ອັນບໍລິສຸດຂອງພະເຈົ້າ.

ຊື່ນີ້ອະທິບາຍໜ້າທີ່ຂອງພວກເຮົາ. ຄົນໃນສະໄໝບູຮານເຊິ່ງນັບຕັ້ງແຕ່ຊາຍຜູ້ຊອບທຳທີ່ຊື່ວ່າອາເບນ ທີ່ໄດ້ເປັນພະຍານກ່ຽວກັບຄວາມເຊື່ອຂອງເຂົາເຈົ້າໃນພະເຢໂຫວາ. ຕະຫຼອດຫຼາຍສະຕະວັດ ໂນເອ ອັບລາຫາມ ຊາລາ ໂມເຊ ດາວິດ ແລະຄົນອື່ນ ໆ ໄດ້ເຂົ້າຮ່ວມກັບ “ຝູງພິຍານ” ຝູງໃຫຍ່ນີ້. (ເຫບເລີ 11:4–12:1) ເຊັ່ນດຽວກັບທີ່ຄົນຜູ້ໜຶ່ງອາດເປັນພະຍານໃຫ້ກັບຄົນບໍລິສຸດຄົນໜຶ່ງ ພວກເຮົາຕັ້ງໃຈທີ່ຈະເຮັດໃຫ້ຄວາມຈິງກ່ຽວກັບພະເຈົ້າເປັນທີ່ຮັບຮູ້.

ພວກເຮົາຮຽນເອົາແບບຢ່າງຂອງພະເຍຊູ. ຄຳພີໄບເບິນເອີ້ນພະເຍຊູວ່າເປັນ “ພິຍານອົງສັດຊື່ແລະຈິງ.” (ຄຳປາກົດ 3:14) ພະເຍຊູເອງເວົ້າວ່າພະອົງ “ໄດ້ກະທຳໃຫ້ນາມຊື່ຂອງພະເຈົ້າເປັນທີ່ຮູ້ຈັກ” ແລະສືບຕໍ່ “ເປັນພິຍານຝ່າຍຄວາມຈິງ” ກ່ຽວກັບພະເຈົ້າ. (ໂຢຮັນ 17:6; 18:37) ດ້ວຍເຫດນັ້ນ ຜູ້ຕິດຕາມທີ່ແທ້ຈິງຂອງພະເຍຊູຈຶ່ງຮັບເອົາຊື່ເຢໂຫວາແລະເຮັດໃຫ້ຊື່ນັ້ນເປັນທີ່ຮັບຮູ້. ນີ້ເປັນສິ່ງທີ່ພະຍານພະເຢໂຫວາກຳລັງພະຍາຍາມເຮັດ.

ເປັນຫຍັງນັກສຶກສາຄຳພີໄບເບິນຈຶ່ງຮັບເອົາຊື່ພະຍານພະເຢໂຫວາ?
ພະເຢໂຫວາມີພະຍານຢູ່ແຜ່ນດິນໂລກດົນປານໃດແລ້ວ?
ໃຜຄືພະຍານຜູ້ຍິ່ງໃຫຍ່ທີ່ສຸດຂອງພະເຢໂຫວາ?