ບົດທີ 24
ວຽກງານທົ່ວໂລກຂອງພວກເຮົາໄດ້ຮັບການຊຸກຍູ້ທາງດ້ານການເງິນຄືແນວໃດ?
ເນປານ
ໂຕໂກ
ອັງກິດ
ທຸກ ໆ ປີອົງການຂອງພວກເຮົາຜະລິດແລະແຈກຢາຍຄຳພີໄບເບິນອອກຫຼາຍຮ້ອຍລ້ານເຫຼັ້ມພ້ອມທັງວາລະສານອື່ນ ໆ ໂດຍບໍ່ໄດ້ຄິດລາຄາ. ພວກເຮົາສ້າງແລະບຳລຸງຮັກສາຫໍປະຊຸມແລະສຳນັກງານສາຂາ. ພວກເຮົາດູແລເບິ່ງແຍງສະມາຊິກເບເທນແລະມິຊັນນາລີຫຼາຍພັນຄົນ ແລະພວກເຮົາສະໜອງເຄື່ອງຊ່ວຍເຫຼືອໃນຍາມທີ່ມີໄພພິບັດ. ດັ່ງນັ້ນ ທ່ານອາດສົງໄສວ່າ ‘ທັງໝົດນີ້ໄດ້ຮັບການຊຸກຍູ້ທາງດ້ານການເງິນຄືແນວໃດ?’
ພວກເຮົາບໍ່ໄດ້ເສຍໜຶ່ງສ່ວນສິບຂອງລາຍໄດ້ ເສຍຄ່າສະມາຊິກ ຫຼືແຜ່ເງິນ. ເຖິງແມ່ນວ່າພວກເຮົາມີຄ່າໃຊ້ຈ່າຍສູງຫຼາຍໃນການສົ່ງເສີມວຽກງານການປະກາດ ແຕ່ພວກເຮົາບໍ່ໄດ້ຮຽກຮ້ອງເອົາເງິນ. ຫຼາຍກວ່າໜຶ່ງສະຕະວັດມາແລ້ວ ວາລະສານຫໍສັງເກດການ ສະບັບທີສອງກ່າວວ່າ ພວກເຮົາເຊື່ອວ່າພະເຢໂຫວາເປັນຜູ້ຊຸກຍູ້ພວກເຮົາ ແລະພວກເຮົາ “ຈະບໍ່ເຄີຍຂໍຮ້ອງຫຼືຮຽກຮ້ອງມະນຸດເພື່ອໃຫ້ການສະໜັບສະໜູນ” ແລະພວກເຮົາກໍບໍ່ເຄີຍເຮັດ.—ມັດທາຍ 10:8
ວຽກງານຂອງພວກເຮົາໄດ້ຮັບການຊຸກຍູ້ໂດຍເງິນບໍລິຈາກດ້ວຍໃຈສະໝັກ. ຫຼາຍຄົນຮູ້ຄຸນຄ່າວຽກງານການສຶກສາຄຳພີໄບເບິນຂອງພວກເຮົາແລະບໍລິຈາກເງິນເພື່ອວຽກນີ້. ພະຍານພະເຢໂຫວາເອງຍິນດີບໍລິຈາກເວລາ ກຳລັງວັງຊາ ເງິນຄຳ ແລະຊັບພະຍາກອນອື່ນ ໆ ໃນການເຮັດຕາມໃຈປະສົງຂອງພະເຈົ້າຢູ່ທົ່ວໂລກ. (1 ຂ່າວຄາວ 29:9) ຢູ່ຫໍປະຊຸມແລະການປະຊຸມໃຫຍ່ ແລະການປະຊຸມພາກມີກ່ອງບໍລິຈາກສຳລັບຄົນທີ່ຢາກບໍລິຈາກ ແລະບາງຄົນກໍບໍລິຈາກຜ່ານທາງເວັບໄຊ jw.org. ສ່ວນໃຫຍ່ຂອງເງິນທີ່ບໍລິຈາກແມ່ນມາຈາກຄົນທີ່ບໍ່ໄດ້ຮັ່ງມີ ເຊິ່ງຄ້າຍຄືກັນກັບຍິງໝ້າຍຜູ້ຂັດສົນແທ້ ໆ ທີ່ພະເຍຊູກ່າວເຖິງທີ່ເອົາເງິນສອງຫຼຽນເຊິ່ງມີມູນຄ່າໜ້ອຍດຽວປ່ອນໃສ່ກ່ອງບໍລິຈາກຢູ່ວິຫານ. (ລືກາ 21:1-4) ສະນັ້ນ ໃຜກໍຕາມສາມາດ “ມ້ຽນໄວ້” ເພື່ອໃຫ້ “ຕາມທີ່ໄດ້ຄຶດໝາຍໄວ້ໃນໃຈ.”—1 ໂກລິນໂທ 16:2; 2 ໂກລິນໂທ 9:7
ພວກເຮົາເຊື່ອວ່າພະເຢໂຫວາຈະສືບຕໍ່ກະຕຸ້ນຫົວໃຈຜູ້ທີ່ຕ້ອງການ ‘ນັບຖືພະອົງໂດຍສິ່ງຕ່າງ ໆ ທີ່ມີຄ່າ’ ໃນການສົ່ງເສີມວຽກງານລາຊະອານາຈັກເພື່ອໃຫ້ໃຈປະສົງຂອງພະອົງຈະສຳເລັດເປັນຈິງ.—ສຸພາສິດ 3:9
ອັນໃດທີ່ເຮັດໃຫ້ອົງການຂອງພວກເຮົາແຕກຕ່າງຈາກສາສະໜາອື່ນ ໆ?
ມີການໃຊ້ເງິນບໍລິຈາກແນວໃດ?