ບົດຮຽນ 3
ລາຫາບມີຄວາມເຊື່ອໃນພະເຢໂຫວາ
ສົມມຸດວ່າເຮົາອາໄສຢູ່ເມືອງເຢລິໂກທີ່ຕັ້ງຢູ່ໃນແຜ່ນດິນການາອານ. ປະຊາຊົນໃນເມືອງນີ້ບໍ່ໄດ້ນະມັດສະການພະເຢໂຫວາ. ຜູ້ຍິງທີ່ຊື່ລາຫາບກໍອາໄສຢູ່ໃນເມືອງນີ້.
ຕອນທີ່ລາຫາບຍັງນ້ອຍ ລາວໄດ້ຍິນເລື່ອງທີ່ພະເຢໂຫວາໃຊ້ໂມເຊໃຫ້ແຍກນ້ຳທະເລແດງອອກຈາກກັນແລະນຳພາຊາວອິດສະລາແອນອອກຈາກເອຢິບ. ລາວຍັງໄດ້ຍິນເລື່ອງທີ່ພະເຢໂຫວາຊ່ວຍເຂົາເຈົ້າໃຫ້ເອົາຊະນະພວກສັດຕູໃນສົງຄາມຕ່າງໆ. ບັດນີ້ລາວໄດ້ຍິນວ່າຊາວອິດສະລາແອນມາຕັ້ງຄ້າຍຢູ່ໃກ້ໆເມືອງເຢລິໂກ!
ລາຫາບປົກປ້ອງພວກຜູ້ສອດແນມເພາະລາວເຊື່ອໃນພະເຢໂຫວາ
ຕອນແລງມື້ໜຶ່ງ ຊາຍອິດສະລາແອນສອງຄົນໄດ້ລັກເຂົ້າໄປເບິ່ງເມືອງເຢລິໂກ ເຂົາເຈົ້າຈຶ່ງພາກັນໄປເຮືອນຂອງລາຫາບ. ລາຫາບຊວນເຂົາເຈົ້າເຂົ້າມາໃນເຮືອນແລະໃຫ້ພັກເຊົາຢູ່ນຳລາວ. ໃນຕອນກາງຄືນ ກະສັດໄດ້ຮູ້ວ່າຜູ້ສອດແນມຢູ່ໃນເມືອງແລະໄປທີ່ເຮືອນຂອງລາຫາບ. ກະສັດຈຶ່ງສົ່ງທະຫານໃຫ້ໄປຈັບເຂົາເຈົ້າ. ລາຫາບໄດ້ເຊື່ອງຜູ້ຊາຍສອງຄົນນັ້ນໄວ້ຢູ່ເທິງດາດຟ້າ ແລະເວົ້າກັບທະຫານວ່າ: ‘ຜູ້ສອດແນມໄດ້ມານີ້ແທ້ ແຕ່ອອກຈາກເມືອງໄປແລ້ວ. ຖ້ານຳໄປຕອນນີ້ພວກທ່ານຈະທັນເຂົາເຈົ້າ!’ ລູກບອກໄດ້ບໍວ່າເປັນຫຍັງລາຫາບຈຶ່ງຊ່ວຍຊີວິດຜູ້ສອດແນມ?— ເພາະລາຫາບມີຄວາມເຊື່ອໃນພະເຢໂຫວາແລະຮູ້ວ່າພະອົງຈະມອບແຜ່ນດິນການາອານໃຫ້ແກ່ຊາວອິດສະລາແອນ.
ກ່ອນທີ່ຜູ້ສອດແນມຈະອອກຈາກເຮືອນຂອງລາຫາບ ເຂົາເຈົ້າຈຶ່ງສັນຍາວ່າລາຫາບແລະຄອບຄົວຈະປອດໄພເມື່ອເມືອງເຢລິໂກຖືກທຳລາຍ. ລູກຮູ້ບໍວ່າເຂົາເຈົ້າບອກລາຫາບໃຫ້ເຮັດຫຍັງ?— ເຂົາເຈົ້າບອກວ່າ: ‘ໃຫ້ເອົາສາຍເຊືອກສີແດງເສັ້ນນີ້ຢ່ອນລົງທາງປ່ອງຢ້ຽມ. ຖ້າເຮັດຕາມ ທຸກຄົນໃນຄອບຄົວຂອງເຈົ້າຈະປອດໄພ.’ ລາຫາບກໍເຮັດຕາມນັ້ນ. ລູກຄຶດວ່າມີຫຍັງເກີດຂຶ້ນຕໍ່ຈາກນັ້ນ?—
ພະເຢໂຫວາຊ່ວຍຊີວິດຂອງລາຫາບແລະຄົນໃນຄອບຄົວຂອງລາວ
ບໍ່ເທົ່າໃດມື້ຕໍ່ຈາກນັ້ນ ຊາວອິດສະລາແອນໄດ້ຍ່າງອ້ອມເມືອງເຢລິໂກຢ່າງງຽບໆ. ເຂົາເຈົ້າຍ່າງອ້ອມເມືອງເປັນເວລາຫົກມື້ ມື້ລະຮອບ ແຕ່ໃນມື້ທີເຈັດເຂົາເຈົ້າໄດ້ຍ່າງອ້ອມເມືອງຮອດເຈັດຮອບ. ຈາກນັ້ນທຸກຄົນກໍພາກັນຮ້ອງສຽງດັງໆ. ພະເຢໂຫວາເຮັດໃຫ້ກຳແພງອ້ອມເມືອງເຈື່ອນລົງ. ແຕ່ເຮືອນທີ່ມີສາຍເຊືອກສີແດງຢ່ອນລົງທາງປ່ອງຢ້ຽມບໍ່ໄດ້ຖືກທຳລາຍ! ລູກເຫັນໃນຮູບບໍ?— ລາຫາບແລະຄອບຄົວປອດໄພ!
ລູກໄດ້ຮຽນຮູ້ຫຍັງຈາກເລື່ອງຂອງລາຫາບ?— ລາຫາບມີຄວາມເຊື່ອໃນພະເຢໂຫວາເພາະລາວໄດ້ຮຽນຮູ້ຈາກສິ່ງຕ່າງໆທີ່ໜ້າງຶດງໍ້ທີ່ພະອົງໄດ້ເຮັດ. ລູກກໍເຊັ່ນກັນກຳລັງຮຽນຮູ້ກ່ຽວກັບສິ່ງທີ່ໜ້າງຶດງໍ້ຫຼາຍຢ່າງທີ່ພະເຢໂຫວາໄດ້ເຮັດ. ລູກມີຄວາມເຊື່ອໃນພະເຢໂຫວາແບບລາຫາບບໍ?— ພໍ່ (ແມ່) ຮູ້ວ່າລູກມີຄວາມເຊື່ອແບບນັ້ນ!