ໝວດ 8
ຊາວອິດສະລາແອນເຂົ້າສູ່ແຜ່ນດິນການາອານ
ໂຢຊວຍນຳພາຊາວອິດສະລາແອນໃນການພິຊິດແຜ່ນດິນການາອານ. ພະເຢໂຫວາປະທານກຳລັງແກ່ພວກຜູ້ຕັດສິນເພື່ອຊ່ອຍປະຊາຊົນຂອງພະອົງໃຫ້ພົ້ນຈາກການກົດຂີ່
ຫຼາຍຮ້ອຍປີກ່ອນທີ່ຊາວອິດສະລາແອນຈະເຂົ້າສູ່ແຜ່ນດິນການາອານ ພະເຢໂຫວາໄດ້ສັນຍາວ່າຈະປະທານແຜ່ນດິນນັ້ນໃຫ້ກັບລູກຫຼານຂອງອັບລາຫາມ. ຕອນນີ້ພາຍໃຕ້ການນຳພາຂອງໂຢຊວຍຊາວອິດສະລາແອນພ້ອມຈະຄອບຄອງແຜ່ນດິນນັ້ນຕາມທີ່ສັນຍາໄວ້ແລ້ວ.
ພະເຈົ້າຕັດສິນວ່າພວກການາອານສົມຄວນກັບການທຳລາຍລ້າງ. ພວກເຂົາໄດ້ເຮັດໃຫ້ແຜ່ນດິນນັ້ນເຕັມໄປດ້ວຍກິດປະຕິບັດທາງເພດທີ່ເສື່ອມຊາມຫຼາຍທີ່ສຸດ ພ້ອມທັງຄວາມປ່າເຖື່ອນແບບນອງເລືອດ. ດັ່ງນັ້ນແຜ່ນດິນການາອານທີ່ຊາວອິດສະລາແອນໄດ້ພິຊິດຈຶ່ງໄດ້ຖືກທຳລາຍຢ່າງສິ້ນເຊີງ.
ແນວໃດກໍຕາມ ກ່ອນເຂົ້າສູ່ແຜ່ນດິນນັ້ນໂຢຊວຍໄດ້ສົ່ງຄົນສອດແນມອອກໄປສອງຄົນ ເຊິ່ງໄດ້ພັກເຊົາກັບຜູ້ຍິງທີ່ຊື່ວ່າລາຫາບໃນເມືອງເຢລິໂກ. ລາວຕ້ອນຮັບຄົນສອດແນມໄວ້ໃນເຮືອນແລະປົກປ້ອງເຂົາເຈົ້າເຖິງແມ່ນຮູ້ວ່າເຂົາເຈົ້າເປັນຊາວອິດສະລາແອນ. ລາຫາບມີຄວາມເຊື່ອໃນພະເຈົ້າຂອງຊາວອິດສະລາແອນ ຍ້ອນເຄີຍໄດ້ຍິນເລື່ອງທີ່ພະເຢໂຫວາຊ່ອຍເຫຼືອປະຊາຊົນຂອງພະອົງ. ລາວໃຫ້ຄົນສອດແນມສາບານວ່າເຂົາເຈົ້າຈະບໍ່ຂ້າລາວແລະຄອບຄົວ.
ຕໍ່ມາ ເມື່ອຊາວອິດສະລາແອນເຂົ້າສູ່ແຜ່ນດິນການາອານແລະໂຈມຕີເມືອງເຢລິໂກ ພະເຢໂຫວາໄດ້ເຮັດໃຫ້ກຳແພງເມືອງເຢລິໂກພັງລົງຢ່າງອັດສະຈັນ. ກອງກຳລັງຂອງໂຢຊວຍແລ່ນເຂົ້າໄປແລະທຳລາຍເມືອງນັ້ນ ແຕ່ວ່າເຂົາເຈົ້າບໍ່ໄດ້ທຳລາຍລາຫາບແລະຄອບຄົວຂອງລາວ. ຫຼັງຈາກນັ້ນ ໃນການສູ້ຮົບຢ່າງໄວຫຼາຍເທື່ອເຊິ່ງໃຊ້ເວລາຫົກປີ ໂຢຊວຍໄດ້ພິຊິດດິນແດນສ່ວນຫຼາຍຂອງແຜ່ນດິນແຫ່ງຄຳສັນຍາ. ຕໍ່ມາຊາວອິດສະລາແອນຕະກູນຕ່າງໆໄດ້ຮັບສ່ວນແບ່ງໃນແຜ່ນດິນນັ້ນ.
ເມື່ອການຮັບໃຊ້ພະເຈົ້າຢ່າງຍາວນານຂອງໂຢຊວຍໃກ້ຈະສິ້ນສຸດລົງ ລາວໄດ້ເອີ້ນປະຊາຊົນໃຫ້ມາເຕົ້າໂຮມກັນ. ລາວທົບທວນເຖິງສິ່ງທີ່ພະເຢໂຫວາປະຕິບັດກັບບັນພະບຸລຸດຂອງເຂົາເຈົ້າແລະສະໜັບສະຫນູນໃຫ້ເຂົາເຈົ້າຮັບໃຊ້ພະເຢໂຫວາ. ແນວໃດກໍຕາມ ຫຼັງຈາກທີ່ໂຢຊວຍແລະເພື່ອນຮ່ວມຮັບໃຊ້ຕາຍແລ້ວ ຊາວອິດສະລາແອນໄດ້ປະຖິ້ມພະເຢໂຫວາເພື່ອໄປຮັບໃຊ້ພະປອມ. ເປັນເວລາປະມານ 300 ປີທີ່ຊາດນີ້ບໍ່ໄດ້ຍຶດໝັ້ນປະຕິບັດຕໍ່ກັບກົດໝາຍຂອງພະເຢໂຫວາຢ່າງຕໍ່ເນື່ອງ. ໃນລະຫວ່າງນັ້ນພະເຢໂຫວາໄດ້ຍອມໃຫ້ສັດຕູເຊັ່ນພວກຟີລີດຕີນຂົ່ມເຫງເຂົາເຈົ້າ. ແຕ່ວ່າເມື່ອຊາວອິດສະລາແອນຂໍຮ້ອງໃຫ້ພະເຢໂຫວາຊ່ອຍເຫຼືອ ພະອົງໄດ້ແຕ່ງຕັ້ງຜູ້ຕັດສິນທັງໝົດ 12 ຄົນເພື່ອຊ່ອຍເຫຼືອເຂົາເຈົ້າ.
ໄລຍະເວລາຂອງພວກຜູ້ຕັດສິນທີ່ບັນທຶກໄວ້ໃນພະທຳຜູ້ຕັດສິນເລີ່ມຈາກທ່ານໂອດນຽນແລະຜູ້ສຸດທ້າຍແມ່ນທ່ານຊາມຊອນ ເຊິ່ງເປັນຜູ້ຊາຍທີ່ມີຮ່າງກາຍແຂງແຮງທີ່ສຸດເທົ່າທີ່ເຄີຍມີຊີວິດຢູ່. ຄວາມຈິງຫຼັກໆທີ່ສະແດງໃຫ້ເຫັນຊ້ຳແລ້ວຊ້ຳອີກໃນບັນທຶກທີ່ໜ້າຕື່ນເຕັ້ນຢູ່ພະທຳຜູ້ຕັດສິນໃນຄຳພີໄບເບິນແມ່ນການເຊື່ອຟັງພະເຢໂຫວາຈະໄດ້ພະພອນ ການບໍ່ເຊື່ອຟັງຈະນຳໄປສູ່ຄວາມຈິບຫາຍ.
—ຂໍ້ມູນມາຈາກໂຢຊວຍ; ຜູ້ຕັດສິນ; ພວກເລວີ 18:24, 25.