ບົດທີ 13
ຜູ້ປະກາດລາຊະອານາຈັກສູ້ຄະດີໃນສານ
1, 2. (ກ) ພວກຫົວໜ້າສາສະໜາໄດ້ເຮັດຫຍັງເພື່ອຂັດຂວາງວຽກປະກາດ ແຕ່ພວກອັກຄະສາວົກມີທ່າທີແນວໃດ? (ຂ) ເປັນຫຍັງອັກຄະສາວົກບໍ່ເຊື່ອຟັງຄຳສັ່ງຫ້າມນັ້ນ?
ວັນເພນເຕກອດປີ ຄ.ສ. 33 ຫາກໍຜ່ານໄປໄດ້ບໍ່ດົນ. ປະຊາຄົມໃນເມືອງເຢຣຶຊາເລມກໍ່ຕັ້ງຂຶ້ນໄດ້ບໍ່ເທົ່າໃດອາທິດ ຊາຕານເຫັນວ່າຕອນນີ້ເປັນໂອກາດດີທີ່ຈະລົງມື. ມັນຕ້ອງການທຳລາຍປະຊາຄົມນັ້ນໃຫ້ສາບສູນກ່ອນທີ່ຈະເຕີບໂຕແລະເຂັ້ມແຂງ. ຊາຕານໃຊ້ກົນລະຍຸດຕ່າງໆແບບທີ່ພວກຫົວໜ້າສາສະໜາເຄີຍເຮັດມາແລ້ວ ເພື່ອຫ້າມບໍ່ໃຫ້ມີການປະກາດເລື່ອງລາຊະອານາຈັກ. ແຕ່ພວກອັກຄະສາວົກກໍປະກາດຕໍ່ໄປຢ່າງກ້າຫານ ເຊິ່ງເຮັດໃຫ້ຊາຍຍິງຫຼາຍຄົນໄດ້ມາເປັນ ‘ຜູ້ທີ່ເຊື່ອຖື . . . ພະອົງເຈົ້າ.’—ກິດ. 4:18, 33; 5:14
ພວກອັກຄະສາວົກມີຄວາມຍິນດີ “ເພາະຖືວ່າທີ່ເຂົາເຈົ້າໄດ້ຮັບຄວາມອັບປະຍົດເພື່ອນາມຊື່ຂອງພະເຍຊູນັ້ນສະແດງວ່າພະເຈົ້າພໍໃຈເຂົາເຈົ້າ”
2 ພວກຜູ້ຕໍ່ຕ້ານໃຈຮ້າຍແລະຈັບອັກຄະສາວົກທັງໝົດໄປຂັງຄຸກ. ແຕ່ໃນຄືນນັ້ນທູດສະຫວັນຂອງພະເຢໂຫວາກໍມາເປີດປະຕູຄຸກ ແລະຕອນເຊົ້າອັກຄະສາວົກເຫຼົ່ານັ້ນກໍອອກໄປປະກາດ! ເຂົາເຈົ້າຖືກຈັບອີກ ແຕ່ເທື່ອນີ້ຖືກນຳຕົວໄປພົບພວກຜູ້ປົກຄອງບ້ານເມືອງເຊິ່ງກ່າວຫາວ່າເຂົາເຈົ້າຝ່າຝືນກົດໝາຍທີ່ຫ້າມເລື່ອງການປະກາດ! ແຕ່ພວກອັກຄະສາວົກກໍເວົ້າຢ່າງກ້າຫານວ່າ: “ພວກຂ້າພະເຈົ້າຈຳຕ້ອງຟັງພະເຈົ້າຫຼາຍກວ່າຟັງມະນຸດ.” ພວກທີ່ມີອຳນາດໃຈຮ້າຍຫຼາຍຈົນຢາກ “ຂ້າ” ພວກອັກຄະສາວົກ. ແຕ່ໃນນາທີວິກິດນັ້ນຄາມາລຽນອາຈານສອນກົດໝາຍທີ່ຜູ້ຄົນນັບຖືກໍເຂົ້າມາ ລາວເຕືອນຜູ້ມີອຳນາດເຫຼົ່ານັ້ນວ່າ: “ຂໍໃຫ້ຄິດດີໆ . . . ຢ່າໄປຫຍຸ້ງກັບຄົນພວກນັ້ນເລີຍ ປ່ອຍພວກເຂົາໄປເຖາະ, ລ.ມ.” ແລະກໍເປັນເລື່ອງແປກທີ່ຜູ້ມີອຳນາດຍອມເຮັດຕາມຄຳແນະນຳຂອງຄາມາລຽນແລະປ່ອຍພວກອັກຄະສາວົກໄປ. ຫຼັງຈາກຖືກປ່ອຍຕົວແລ້ວ ຄົນທີ່ສັດຊື່ເຫຼົ່ານີ້ໄດ້ເຮັດຫຍັງ? ແທນທີ່ຈະຢ້ານຕາຍ ເຂົາເຈົ້າພັດ “ສັ່ງສອນແລະປ່າວປະກາດ [ຂ່າວດີເລື່ອງ] ພະເຍຊູຄລິດ . . . ທຸກວັນໆ.”—ກິດ. 5:17-21, 27-42; ສຸພາ. 21:1, 30
3, 4. (ກ) ຊາຕານໃຊ້ວິທີໃດມາດົນແລ້ວເພື່ອຕໍ່ຕ້ານຂັດຂວາງປະຊາຊົນຂອງພະເຈົ້າ? (ຂ) ເຮົາຈະຮຽນຫຍັງໃນບົດຄວາມນີ້ ແລະອີກ 2 ບົດຄວາມຕໍ່ໄປ?
3 ການພິຈາລະນາຄະດີໃນສານປີ ຄ.ສ. 33 ຖືວ່າເປັນຄັ້ງທຳອິດທີ່ເຈົ້າໜ້າທີ່ບ້ານເມືອງຕໍ່ຕ້ານຂັດຂວາງປະຊາຄົມຄລິດສະຕຽນ ແຕ່ນັ້ນບໍ່ແມ່ນຄັ້ງສຸດທ້າຍ. (ກິດ. 4:5-8; 16:20; 17:6, 7) ໃນສະໄໝຂອງເຮົາ ຊາຕານກໍຍັງໃຊ້ຜູ້ຕໍ່ຕ້ານການນະມັດສະການແທ້ໂດຍກະຕຸ້ນເຈົ້າໜ້າທີ່ໃຫ້ສັ່ງຫ້າມວຽກປະກາດ. ຜູ້ຕໍ່ຕ້ານກ່າວຫາວ່າປະຊາຊົນຂອງພະເຈົ້າລະເມີດກົດໝາຍເຊັ່ນ: ກໍ່ກວນຫຼືສ້າງຄວາມວຸ່ນວາຍໃຫ້ຄົນອື່ນ ເປັນພວກນັກປຸກລະດົມ ແລະເປັນຄົນເລາະຂາຍເຄື່ອງ ແຕ່ເມື່ອເຖິງເວລາທີ່ເໝາະສົມ ພີ່ນ້ອງຂອງເຮົາກໍສູ້ຄະດີເພື່ອພິສູດວ່າຂໍ້ກ່າວຫາເຫຼົ່ານັ້ນບໍ່ເປັນຄວາມຈິງ. ຜົນຂອງການສູ້ຄະດີເປັນແນວໃດ? ຄຳຕັດສິນຂອງສານເມື່ອຫຼາຍສິບປີກ່ອນໄດ້ສົ່ງຜົນຕໍ່ເຈົ້າແນວໃດໃນເວລານີ້? ໃຫ້ເຮົາມາພິຈາລະນາບາງຄະດີນຳກັນ ແລ້ວເບິ່ງວ່າຄະດີເຫຼົ່ານີ້ຊ່ວຍໃຫ້ “ການປະກາດຂ່າວດີເປັນທີ່ຍອມຮັບຕາມກົດໝາຍ” ແນວໃດ.—ຟີລິບ 1:7, ລ.ມ.
4 ໃນບົດຄວາມນີ້ຈະເວົ້າເຖິງວິທີທີ່ເຮົາປົກປ້ອງສິດເສລີພາບໃນການປະກາດ. ສ່ວນອີກ 2 ບົດຄວາມຕໍ່ໄປຈະເປັນເລື່ອງການຕໍ່ສູ້ທາງກົດໝາຍທີ່ເຮົາພະຍາຍາມເຮັດມາຕະຫຼອດເພື່ອຈະບໍ່ເປັນສ່ວນຂອງໂລກແລະໃຊ້ຊີວິດຕາມມາດຕະຖານທີ່ລາຊະອານາຈັກໄດ້ວາງໄວ້.
ບໍ່ໄດ້ສ້າງຄວາມເດືອດຮ້ອນແຕ່ສະໜັບສະໜູນລາຊະອານາຈັກຂອງພະເຈົ້າດ້ວຍຄວາມພັກດີ
5. ໃນທ້າຍທົດສະວັດ 1930 ເປັນຫຍັງຜູ້ປະກາດຈຶ່ງຖືກຈັບ ແລະຜູ້ທີ່ນຳໜ້າໃນອົງການຂອງພະເຈົ້າໄດ້ເຮັດແນວໃດ?
5 ໃນທ້າຍທົດສະວັດ 1930 ເຈົ້າໜ້າທີ່ໃນເມືອງແລະລັດຕ່າງໆທົ່ວສະຫະລັດອາເມຣິກາພະຍາຍາມບັງຄັບພະຍານພະເຢໂຫວາໃຫ້ຍື່ນຂໍໃບອະນຸຍາດເພື່ອເຜີຍແຜ່ສາສະໜາ ແຕ່ພີ່ນ້ອງຂອງເຮົາບໍ່ຍອມເຮັດແບບນັ້ນ ຍ້ອນວ່າໃບອະນຸຍາດອາດຖືກຖອດຖອນໄດ້ແລະພີ່ນ້ອງກໍເຊື່ອວ່າບໍ່ມີລັດຖະບານໃດມີສິດຂັດຂວາງຄຳສັ່ງຂອງພະເຍຊູທີ່ໃຫ້ຄລິດສະຕຽນປະກາດຂ່າວສານເລື່ອງລາຊະອານາຈັກ. (ມໂກ. 13:10) ຜົນກໍຄື ຜູ້ປະກາດຫຼາຍຮ້ອຍຄົນຖືກຈັບ ຜູ້ທີ່ນຳໜ້າໃນອົງການຈຶ່ງຄິດຈະສູ້ຄະດີໃນສານ ເຂົາເຈົ້າຕ້ອງການສະແດງໃຫ້ເຫັນວ່າບາງລັດບາງເມືອງໄດ້ວາງຂໍ້ຈຳກັດຫຼາຍຢ່າງທີ່ຂັດຕໍ່ກົດໝາຍ ເຊິ່ງເປັນການເອົາປຽບສິດເສລີພາບຂອງພະຍານພະເຢໂຫວາໃນການເຮັດກິດຈະກຳທາງສາສະໜາ ແລະໃນປີ 1938 ກໍເກີດເລື່ອງຂຶ້ນ ເຊິ່ງກາຍເປັນຄະດີສຳຄັນທີ່ຕ້ອງຟ້ອງຮ້ອງກັນໃນສານ. ເປັນເລື່ອງຫຍັງ?
6, 7. ເກີດຫຍັງຂຶ້ນກັບຄອບຄົວແຄນທະເວວ?
6 ຕອນເຊົ້າວັນອັງຄານທີ 26 ເມສາ 1938 ນິວຕັນ ແຄນທະເວວ ອາຍຸ 60 ປີ ເອສະເທີເມຍຂອງລາວ ແລະລູກຂອງເຂົາເຈົ້າ ເຮັນຣີ ຣັດເຊວ ແລະເຈັດຊີ ຄອບຄົວໄພໂອເນຍພິເສດທັງ 5 ຄົນນີ້ກຽມຕົວທີ່ຈະໄປປະກາດໝົດມື້ໃນເມືອງນິວຮາເວນ ລັດຄອນເນດທິຄັດ. ທີ່ຈິງແລ້ວ ເຂົາເຈົ້າກຽມຕົວເພື່ອວ່າອາດຈະບໍ່ໄດ້ກັບມາເຮືອນໃນມື້ນັ້ນ. ຍ້ອນຫຍັງ? ຍ້ອນເຂົາເຈົ້າເຄີຍຖືກຕຳຫຼວດຈັບມາຫຼາຍເທື່ອແລ້ວ ເທື່ອນີ້ກໍອາດຈະຖືກຈັບອີກ ແຕ່ເລື່ອງນີ້ກໍບໍ່ໄດ້ເຮັດໃຫ້ຄອບຄົວແຄນທະເວວໝົດກຳລັງໃຈທີ່ຈະປະກາດຂ່າວສານເລື່ອງລາຊະອານາຈັກ. ເຂົາເຈົ້າໄປທີ່ນິວຮາເວນໂດຍໃຊ້ລົດ 2 ຄັນ. ນິວຕັນຂັບລົດຂອງຄອບຄົວທີ່ມີທັງຫີບສຽງແບບກະເປົ໋າຫິ້ວແລະປຶ້ມຈຳນວນຫຼາຍ ສ່ວນເຮັນຣີອາຍຸ 22 ປີຂັບລົດກະຈາຍສຽງ ແລ້ວກໍເປັນຄືກັບທີ່ຄິດໄວ້ແທ້ໆ ເມື່ອປະກາດໄດ້ບໍ່ດົນຕຳຫຼວດກໍມາຈັບເຂົາເຈົ້າ.
7 ຣັດເຊວອາຍຸ 18 ປີຖືກຈັບເປັນຄົນທຳອິດ ຕໍ່ມາກໍແມ່ນນິວຕັນກັບເອສະເທີ. ເຈັດຊີໜຸ່ມນ້ອຍອາຍຸ 16 ປີແນມເຫັນແຕ່ໄກຕອນທີ່ພໍ່ແມ່ກັບອ້າຍຖືກຕຳຫຼວດຄຸມຕົວໄປ. ສ່ວນເຮັນຣີກໍກຳລັງປະກາດຢູ່ອີກບ່ອນໜຶ່ງໃນເມືອງນັ້ນ ຕອນນີ້ຈຶ່ງເຫຼືອແຕ່ເຈັດຊີຄົນດຽວ ລາວຫິ້ວກະເປົ໋າເຄື່ອງຫຼິ້ນແຜ່ນສຽງແລ້ວກໍຍ່າງປະກາດຕໍ່ໄປ. ຜູ້ຊາຍຊາວກາໂຕລິກ 2 ຄົນອະນຸຍາດໃຫ້ເຈັດຊີເປີດເຄື່ອງຫຼິ້ນແຜ່ນສຽງທີ່ເປັນຄຳບັນລະຍາຍຂອງພີ່ນ້ອງຣັດເທີຝອດເຊິ່ງມີຫົວຂໍ້ວ່າ: “ພວກສັດຕູ” ເມື່ອເຂົາເຈົ້າໄດ້ຟັງຄຳບັນລະຍາຍນັ້ນກໍໃຈຮ້າຍຫຼາຍຈົນເກືອບຈະຊົກເຈັດຊີ ລາວຫຼົບໜີອອກໄປໄດ້ແຕ່ບໍ່ດົນຫຼັງຈາກນັ້ນລາວກໍຖືກຕຳຫຼວດຈັບ. ພີ່ນ້ອງນິວຕັນແລະລູກຖືກຕັ້ງຂໍ້ຫາ ຍົກເວັ້ນພີ່ນ້ອງເອສະເທີ ແຕ່ເຂົາເຈົ້າກໍໄດ້ຮັບການປະກັນຕົວອອກໄປໃນມື້ນັ້ນ.
8. ເປັນຫຍັງສານຈຶ່ງຕັດສິນວ່າເຈັດຊີ ແຄນທະເວວມີຄວາມຜິດໃນຂໍ້ຫາກໍ່ຄວາມວຸ່ນວາຍ?
8 ບໍ່ເທົ່າໃດເດືອນຫຼັງຈາກນັ້ນ ຄືເດືອນກັນຍາ ປີ 1938 ຄອບຄົວແຄນທະເວວຕ້ອງໄປຂຶ້ນສານໃນເມືອງນິວຮາເວນ. ຕອນນັ້ນນິວຕັນ ຣັດເຊວ ແລະເຈັດຊີຖືກຕັດສິນວ່າມີຄວາມຜິດໃນຂໍ້ຫາເກັບເງິນບໍລິຈາກໂດຍບໍ່ມີໃບອະນຸຍາດ. ທັງໆທີ່ອຸທອນຕໍ່ສານສູງສຸດຂອງລັດຄອນເນດທິຄັດ ແຕ່ເຈັດຊີຍັງຖືກຕັດສິນວ່າມີຄວາມຜິດໃນຂໍ້ຫາກໍ່ຄວາມວຸ່ນວາຍ. ຍ້ອນຫຍັງ? ຍ້ອນຊາວກາໂຕລິກ 2 ຄົນທີ່ຟັງຄຳບັນລະຍາຍຈາກເຄື່ອງຫຼິ້ນແຜ່ນສຽງໄດ້ໃຫ້ການຕໍ່ສານວ່າ ຄຳບັນລະຍາຍນັ້ນລົບຫຼູ່ສາສະໜາແລະຍົວະເຍົ້າເຂົາເຈົ້າໃຫ້ຄຽດແຄ້ນ. ເພື່ອແກ້ຂໍ້ກ່າວຫານັ້ນ ພີ່ນ້ອງທີ່ມີໜ້າທີ່ຮັບຜິດຊອບໃນອົງການຂອງເຮົາໄດ້ຍື່ນອຸທອນຕໍ່ສານສູງສຸດຂອງສະຫະລັດ.
9, 10. (ກ) ສານສູງສຸດຂອງປະເທດສະຫະລັດຕັດສິນຄະດີຂອງຄອບຄົວແຄນທະເວວແນວໃດ? (ຂ) ເຮົາຍັງໄດ້ຮັບປະໂຫຍດແນວໃດຈາກຄຳຕັດສິນນີ້?
9 ເລີ່ມແຕ່ວັນທີ 29 ມີນາ 1940 ຊາລ ອີ. ຮິວ ຫົວໜ້າຄະນະຜູ້ພິພາກສາພ້ອມກັບຜູ້ພິພາກສາອີກ 8 ຄົນໄດ້ຟັງຄຳໂຕ້ແຍ່ງຂອງພີ່ນ້ອງເຮເດນ ຄັບວິງຕັນເຊິ່ງເປັນທະນາຍຄວາມຝ່າຍພະຍານພະເຢໂຫວາ.a ເມື່ອໄອຍະການຝ່າຍລັດຄອນເນດທິຄັດພະຍາຍາມໂຕ້ແຍ່ງວ່າພະຍານພະເຢໂຫວາເປັນພວກທີ່ກໍ່ຄວາມບໍ່ສະຫງົບໃຫ້ບ້ານເມືອງ ຜູ້ພິພາກສາຄົນໜຶ່ງຈຶ່ງຖາມຂຶ້ນວ່າ: “ເປັນຄວາມຈິງບໍທີ່ວ່າ: ຂ່າວສານທີ່ພະຄລິດເຍຊູປະກາດເປັນເລື່ອງທີ່ຜູ້ຄົນໃນສະໄໝນັ້ນບໍ່ຄ່ອຍມັກ?” ໄອຍະການຕອບວ່າ: “ແມ່ນແລ້ວ ຖ້າຂ້ອຍຈື່ບໍ່ຜິດ ຄຳພີໄບເບິນຍັງບອກອີກວ່າເກີດຫຍັງຂຶ້ນກັບພະເຍຊູເມື່ອເພິ່ນປະກາດຂ່າວສານນັ້ນ.” ຄຳເວົ້ານີ້ມັດຕົວລາວ! ສິ່ງທີ່ໄອຍະການຄົນນັ້ນຫຼຸດປາກອອກມາສະແດງວ່າພະຍານພະເຢໂຫວາເປັນຝ່າຍດຽວກັບພະເຍຊູ ສ່ວນລັດກໍເປັນຝ່າຍດຽວກັບຄົນທີ່ກ່າວຫາພະເຍຊູ. ໃນວັນທີ 20 ພຶດສະພາ 1940 ສານໄດ້ປະກາດຄຳຕັດສິນຢ່າງເປັນເອກະພາບໃຫ້ພະຍານພະເຢໂຫວາຊະນະຄະດີ.
ເຮເດນ ຄັບວິງຕັນ (ຢືນຢູ່ເຄິ່ງກາງຂອງແຖວໜ້າ) ເກລນ ຮາວ (ຊ້າຍ) ແລະຄົນອື່ນໆຍ່າງອອກຈາກສານຫຼັງຈາກຊະນະຄະດີ
10 ຄຳຕັດສິນຂອງສານໃນຄັ້ງນັ້ນສຳຄັນແນວໃດ? ຄຳຕັດສິນນີ້ຊ່ວຍຄຸ້ມຄອງສິດເສລີພາບທາງດ້ານສາສະໜາ ບໍ່ໃຫ້ລັດຖະບານ ສະຫະພັນທະລັດ ຫຼືອົງການບໍລິຫານສ່ວນທ້ອງຖິ່ນມາຈຳກັດເສລີພາບທາງສາສະໜາໄດ້. ສານຍັງເຫັນວ່າການປະພຶດຂອງເຈັດຊີ “ບໍ່ໄດ້ . . . ເປັນອັນຕະລາຍຕໍ່ຄວາມສະຫງົບສຸກຂອງບ້ານເມືອງ.” ດັ່ງນັ້ນ ຄຳຕັດສິນນີ້ຈຶ່ງເປັນຄຳຮັບຮອງທີ່ຈະແຈ້ງວ່າພະຍານພະເຢໂຫວາບໍ່ໄດ້ເປັນພວກທີ່ກໍ່ຄວາມບໍ່ສະຫງົບ ນີ້ເປັນໄຊຊະນະຢ່າງເດັດຂາດທາງກົດໝາຍທີ່ປະຊາຊົນຂອງພະເຈົ້າໄດ້ຮັບ! ໄຊຊະນະໃນຄັ້ງນັ້ນຍັງມີຜົນດີຕໍ່ພວກເຮົາໃນທຸກມື້ນີ້ແນວໃດ? ພະຍານພະເຢໂຫວາຄົນໜຶ່ງທີ່ເປັນທະນາຍຄວາມເວົ້າວ່າ: “ພະຍານພະເຢໂຫວາໃນທຸກມື້ນີ້ປະກາດຂ່າວສານທີ່ໃຫ້ຄວາມຫວັງກັບເພື່ອນບ້ານໄດ້ກໍເພາະເຮົາໄດ້ຮັບສິດເສລີພາບທາງສາສະໜາ ເຮົາຈຶ່ງບໍ່ຕ້ອງຢ້ານວ່າຈະມີການຕັ້ງຂໍ້ຈຳກັດແບບບໍ່ເປັນທຳ.”
ບໍ່ແມ່ນນັກປຸກລະດົມ ແຕ່ເປັນຜູ້ປະກາດຄວາມຈິງ
ແຜ່ນພັບຄິວເບກກຽດຊັງພະເຈົ້າ ພະຄລິດ ແລະເສລີພາບ ນີ້ເປັນເລື່ອງໜ້າອາຍຂອງຄົນການາດາທັງປະເທດ
11. ພີ່ນ້ອງໃນການາດາໄດ້ແຈກຢາຍແຜ່ນພັບຫຍັງແລະຍ້ອນຫຍັງ?
11 ໃນລະຫວ່າງທົດສະວັດ 1940 ພະຍານພະເຢໂຫວາໃນປະເທດການາດາຖືກຕໍ່ຕ້ານຢ່າງຮຸນແຮງ. ດັ່ງນັ້ນ ໃນປີ 1946 ພີ່ນ້ອງໃນທີ່ນັ້ນໄດ້ພາກັນແຈກຢາຍແຜ່ນພັບເປັນເວລາ 16 ມື້ເພື່ອໃຫ້ຜູ້ຄົນໄດ້ຮັບຮູ້ວ່າລັດຖະບານເພີກເສີຍເລື່ອງສິດເສລີພາບທາງສາສະໜາ. ແຜ່ນພັບນັ້ນມີຊື່ວ່າ: ຄິວເບກກຽດຊັງພະເຈົ້າ ພະຄລິດ ແລະເສລີພາບ ນີ້ເປັນເລື່ອງໜ້າອາຍຂອງຄົນການາດາທັງປະເທດ (ພາສາອັງກິດ). ແຜ່ນພັບທີ່ມີ 4 ໜ້ານີ້ເປີດໂປງເລື່ອງທີ່ເກີດຂຶ້ນກັບພີ່ນ້ອງຂອງເຮົາໃນຄິວເບກຢ່າງລະອຽດ ເຊັ່ນ: ການກໍ່ຄວາມວຸ່ນວາຍທີ່ມີພວກນັກເທດນັກບວດຢູ່ເບື້ອງຫຼັງ ການກະທຳທີ່ປ່າເຖື່ອນຂອງຕຳຫຼວດ ແລະການສ້າງກຸ່ມທີ່ໃຊ້ຄວາມຮຸນແຮງ. ແຜ່ນພັບນັ້ນບອກວ່າ: “ການຈັບພະຍານພະເຢໂຫວາແບບຜິດກົດໝາຍຍັງມີຢູ່ເລື້ອຍໆ ພະຍານພະເຢໂຫວາໃນເມືອງມອນທຣີອໍແລະເຂດທີ່ຢູ່ອ້ອມແອ້ມຖືກຕັ້ງຂໍ້ກ່າວຫາປະມານ 800 ຂໍ້.”
12. (ກ) ຜູ້ຕໍ່ຕ້ານຕອບໂຕ້ການແຈກຢາຍແຜ່ນພັບຂອງເຮົາແນວໃດ? (ຂ) ພີ່ນ້ອງຂອງເຮົາຖືກດຳເນີນຄະດີໃນຂໍ້ຫາຫຍັງ? (ເບິ່ງໄຂເງື່ອນ)
12 ເພື່ອເປັນການຕອບໂຕ້ ມໍເຣັດ ດູເພລດຊິດ ນາຍົກລັດຖະມົນຕີລັດຄິວເບກຈຶ່ງຮ່ວມມືກັບວິນເລິເນີບເຊິ່ງມີຕຳແໜ່ງເປັນຮອງສັນຕະປາປາຂອງໂລມັນກາໂຕລິກ ເຂົາເຈົ້າປະກາດ “ສົງຄາມແບບບໍ່ມີຄວາມປານີ” ກັບພະຍານພະເຢໂຫວາ. ການດຳເນີນຄະດີຈຶ່ງເພີ່ມຂຶ້ນຢ່າງໄວວາຈາກ 800 ເປັນ 1.600 ຄະດີ. ພີ່ນ້ອງຍິງຄົນໜຶ່ງທີ່ເປັນໄພໂອເນຍເວົ້າວ່າ: “ເຮົາຖືກຕຳຫຼວດຈັບຈົນນັບບໍ່ຖ້ວນ.” ພະຍານພະເຢໂຫວາທີ່ຖືກຈັບໃນຕອນທີ່ແຈກແຜ່ນພັບກໍຖືກຟ້ອງວ່າມີຄວາມຜິດທາງອາຍາໃນຂໍ້ຫາແຈກສິ່ງພິມເຖື່ອນທີ່ “ໂຄສະນາປຸກລະດົມເພື່ອລົ້ມລ້າງລັດຖະບານ.”b
13. ໃຜເປັນກຸ່ມທຳອິດທີ່ຖືກດຳເນີນຄະດີໃນຂໍ້ຫາປຸກລະດົມແລະສານຊັ້ນຕົ້ນຕັດສິນແນວໃດ?
13 ໃນປີ 1947 ພີ່ນ້ອງອີເມ ບູເຊ ກັບຊີເຊນລູກສາວອາຍຸ 18 ປີແລະລູຊີອາຍຸ 11 ປີເປັນກຸ່ມທຳອິດທີ່ຖືກດຳເນີນຄະດີຍ້ອນຂໍ້ຫາປຸກລະດົມ. ເຂົາເຈົ້າແຈກແຜ່ນພັບຄິວເບກກຽດຊັງ ຢູ່ໃກ້ໆຟາມຂອງເຂົາເຈົ້າແຖວພູເຂົາທາງໃຕ້ຂອງເມືອງຄິວເບກ ແຕ່ລອງນຶກພາບເບິ່ງວ່າຈະເປັນໄປໄດ້ແນວໃດທີ່ຄອບຄົວນີ້ຈະເປັນຜູ້ກໍ່ຄວາມບໍ່ສະຫງົບສຸກ. ພີ່ນ້ອງບູເຊເປັນຄົນຖ່ອມຕົວ ໃຊ້ຊີວິດແບບຮຽບງ່າຍ ແລະເປັນຄົນສຸພາບຫຼາຍ ລາວອາໄສຢູ່ໃນຟາມນ້ອຍໆ ແລະດົນໆລາວຈຶ່ງຈະເຂົ້າໄປໃນເມືອງດ້ວຍລົດມ້າ ແຕ່ຄອບຄົວຂອງລາວຕ້ອງມາທົນກັບການກະທຳທີ່ໂຫດຮ້າຍຕາມທີ່ບອກໄວ້ໃນແຜ່ນພັບນັ້ນ. ຜູ້ພິພາກສາຊັ້ນຕົ້ນທີ່ກຽດຊັງພະຍານພະເຢໂຫວາ ນອກຈາກຈະບໍ່ຍອມພິຈາລະນາຫຼັກຖານທີ່ພິສູດວ່າຄອບຄົວບູເຊເປັນຜູ້ບໍລິສຸດແລ້ວ ລາວຍັງຍອມຮັບຄຳຟ້ອງທີ່ວ່າແຜ່ນພັບນັ້ນປຸກປັ່ນໃຫ້ເກີດຄວາມເປັນສັດຕູກັນ. ຄອບຄົວບູເຊຈຶ່ງມີຄວາມຜິດ ແລະນັ້ນສະແດງວ່າສຳລັບຜູ້ພິພາກສາຄົນນີ້ ການເວົ້າຄວາມຈິງມີຄວາມຜິດທາງອາຍາ! ອີເມກັບຊີເຊນຖືກຕັດສິນວ່າມີຄວາມຜິດໃນຂໍ້ຫາປຸກປັ່ນເພື່ອລົ້ມລ້າງລັດຖະບານ ແມ່ນແຕ່ລູຊີລູກສາວຄົນນ້ອຍຂອງລາວກໍຖືກຂັງຄຸກເຖິງ 2 ມື້. ພວກພີ່ນ້ອງຈຶ່ງຍື່ນອຸທອນຕໍ່ສານສູງສຸດໃນການາດາເຊິ່ງຮັບພິຈາລະນາຄະດີນີ້.
14. ພີ່ນ້ອງໃນຄິວເບກໄດ້ເຮັດຫຍັງຕະຫຼອດໄລຍະທີ່ມີການຕໍ່ຕ້ານຢ່າງຮຸນແຮງ?
14 ຂະນະດຽວກັນນັ້ນ ພີ່ນ້ອງຊາຍຍິງທີ່ກ້າຫານໃນຄິວເບກກໍຍັງປະກາດຂ່າວສານເລື່ອງລາຊະອານາຈັກຕໍ່ໆໄປ ເຖິງແມ່ນມີການຕໍ່ຕ້ານຢ່າງຮຸນແຮງແຕ່ກໍເກີດຜົນດີຢ່າງບໍ່ໜ້າເຊື່ອ. ຕະຫຼອດໄລຍະ 4 ປີຫຼັງຈາກທີ່ເລີ່ມແຈກແຜ່ນພັບໃນປີ 1946 ພະຍານພະເຢໂຫວາໃນຄິວເບກກໍເພີ່ມຂຶ້ນຈາກ 300 ຄົນເປັນ 1.000 ຄົນ!c
15, 16. (ກ) ສານສູງສຸດຂອງການາດາໄດ້ຕັດສິນຄະດີຂອງຄອບຄົວບູເຊແນວໃດ? (ຂ) ໄຊຊະນະໃນຄັ້ງນີ້ມີຜົນຕໍ່ພີ່ນ້ອງແລະປະຊາຊົນຄົນອື່ນໆແນວໃດ?
15 ໃນເດືອນມິຖຸນາ 1950 ສານສູງສຸດຂອງການາດາເຊິ່ງມີຄະນະຜູ້ພິພາກສາທັງໝົດ 9 ຄົນໄດ້ພິຈາລະນາຄະດີຂອງພີ່ນ້ອງອີເມ ບູເຊ ແລ້ວຫົກເດືອນຕໍ່ມາຄືໃນວັນທີ 18 ທັນວາ 1950 ສານໄດ້ຕັດສິນໃຫ້ເຮົາເປັນຝ່າຍຊະນະຄະດີ. ຍ້ອນຫຍັງ? ພີ່ນ້ອງເກລນ ຮາວເຊິ່ງເປັນທະນາຍຄວາມຝ່າຍພະຍານພະເຢໂຫວາອະທິບາຍວ່າ ສານສູງສຸດເຫັນດີກັບຂໍ້ໂຕ້ແຍ່ງຂອງທະນາຍຝ່າຍຈຳເລີຍທີ່ວ່າ: “ການປຸກລະດົມ” ຕ້ອງມີການຍົວະເຍົ້າໃຫ້ເກີດຄວາມຮຸນແຮງຫຼືກໍ່ຄວາມວຸ່ນວາຍເພື່ອຕໍ່ຕ້ານລັດຖະບານ ແຕ່ແຜ່ນພັບນັ້ນ “ບໍ່ມີຄຳເວົ້າທີ່ເປັນການຍົວະເຍົ້າ ແລະເສລີພາບໃນການເວົ້າກໍເປັນເລື່ອງທີ່ຖືກຕ້ອງຕາມກົດໝາຍ.” ພີ່ນ້ອງຮາວເວົ້າອີກວ່າ: “ຂ້ອຍເຫັນກັບຕາຕົວເອງເລີຍວ່າພະເຢໂຫວາຊ່ວຍເຮົາໃຫ້ຊະນະ.”d
16 ຄຳຕັດສິນຂອງສານສູງສຸດເປັນໄຊຊະນະທີ່ເດັດຂາດຂອງລາຊະອານາຈັກແທ້ໆ. ຄຳຕັດສິນນີ້ເປັນຕົວຢ່າງສຳລັບອີກ 122 ຄະດີທີ່ລໍຖ້າການຕັດສິນຢູ່ ເຮັດໃຫ້ພະຍານພະເຢໂຫວາໃນຄິວເບກທີ່ຖືກຟ້ອງດ້ວຍຂໍ້ຫາໂຄສະນາປຸກລະດົມເພື່ອລົ້ມລ້າງລັດຖະບານພົ້ນຈາກຂໍ້ກ່າວຫາທຸກປະການ. ຄຳຕັດສິນຂອງສານຍັງສະແດງວ່າ ຕອນນີ້ພົນລະເມືອງການາດາ ແລະເຄືອຈັກກະພົບຂອງອັງກິດທັງໝົດມີເສລີພາບໃນການສະແດງຄວາມຄິດເຫັນກ່ຽວກັບວິທີບໍລິຫານບ້ານເມືອງຂອງລັດຖະບານ. ໄຊຊະນະຄັ້ງນີ້ຍັງເປັນການລົ້ມລ້າງແຜນການຂອງຄລິດຕະຈັກແລະລັດຖະບານຄິວເບກທີ່ຕ້ອງການຈຳກັດເສລີພາບຂອງພະຍານພະເຢໂຫວາ.e
ບໍ່ແມ່ນຄົນເລາະຂາຍເຄື່ອງ ແຕ່ເປັນຜູ້ປະກາດເລື່ອງລາຊະອານາຈັກທີ່ດຸໝັ່ນ
17. ລັດຖະບານໃນບາງປະເທດພະຍາຍາມຄວບຄຸມວຽກປະກາດຂອງເຮົາແນວໃດ?
17 ຄືກັບຄລິດສະຕຽນຮຸ່ນທຳອິດ ຜູ້ຮັບໃຊ້ຂອງພະເຢໂຫວາໃນທຸກມື້ນີ້ “ບໍ່ເໝືອນຄົນຫຼາຍຄົນທີ່ເອົາພະຄຳຂອງພະເຈົ້າປອມປ່ຽນເສຍ” ເຊິ່ງໝາຍຄວາມວ່າເຂົາເຈົ້າບໍ່ແມ່ນຄົນທີ່ເລາະຂາຍຄຳສອນຂອງພະເຈົ້າ. (ອ່ານ 2 ໂກລິນ 2:17) ແຕ່ລັດຖະບານໃນບາງປະເທດຄວບຄຸມວຽກປະກາດໂດຍໃຊ້ກົດຂໍ້ບັງຄັບຕ່າງໆດ້ານການຄ້າ. ໃຫ້ເຮົາມາພິຈາລະນາ 2 ຄະດີທີ່ມີການຕັດສິນຊີ້ຂາດວ່າພະຍານພະເຢໂຫວາເປັນຄົນເລາະຂາຍເຄື່ອງຫຼືວ່າເປັນຜູ້ປະກາດຂ່າວດີກັນແທ້.
18, 19. ເຈົ້າໜ້າທີ່ລັດໃນປະເທດແດນມາກພະຍາຍາມຂັດຂວາງວຽກປະກາດແນວໃດ?
18 ແດນມາກ. ໃນວັນທີ 1 ຕຸລາ 1932 ເລີ່ມມີການບັງຄັບໃຊ້ກົດໝາຍຫ້າມບໍ່ໃຫ້ຂາຍສິ່ງພິມໃດໆໂດຍບໍ່ມີໃບອະນຸຍາດ. ແຕ່ພີ່ນ້ອງກໍບໍ່ຍອມໄປຍື່ນຂໍໃບອະນຸຍາດ. ມື້ຕໍ່ມາພີ່ນ້ອງ 5 ຄົນໄປປະກາດໃນເມືອງຣອດສະກິເລີ ເຊິ່ງຢູ່ຫ່າງຈາກເມືອງຫຼວງໂຄເປນຮາເກນໄປທາງທິດຕາເວັນຕົກປະມານ 30 ກວ່າກິໂລເມັດ. ເມື່ອຮອດຕອນຄ່ຳ ອູກຸດສ ເລມັນຜູ້ປະກາດຄົນໜຶ່ງໃນກຸ່ມນັ້ນກໍຫາຍຕົວໄປ ລາວຖືກຈັບຍ້ອນຂາຍເຄື່ອງໂດຍບໍ່ມີໃບອະນຸຍາດ.
19 ໃນວັນທີ 19 ທັນວາ 1932 ອູກຸດສ ເລມັນໄປຂຶ້ນສານແລະໃຫ້ການວ່າ ລາວໄປຢາມຜູ້ຄົນເພື່ອສະເໜີປຶ້ມກ່ຽວກັບຄຳພີໄບເບິນບໍ່ແມ່ນເລາະຂາຍເຄື່ອງ. ສານຊັ້ນຕົ້ນຕັດສິນໃຫ້ລາວເປັນຝ່າຍຊະນະແລະຍັງບອກວ່າ: “ຈຳເລີຍ . . . ບໍ່ໄດ້ຮັບກຳໄລຫຍັງເລີຍຫຼືສະແດງວ່າມີເຈຕະນາທີ່ຈະຄ້າຂາຍເພື່ອຫວັງຜົນກຳໄລ ແຕ່ສິ່ງທີ່ລາວເຮັດພັດເຮັດໃຫ້ລາວເສຍເງິນດ້ວຍຊ້ຳ.” ສານຕັດສິນໃຫ້ພະຍານພະເຢໂຫວາຊະນະຄະດີແລະບອກວ່າສິ່ງທີ່ເລມັນເຮັດ “ບໍ່ແມ່ນລັກສະນະຂອງການຄ້າ.” ແຕ່ພວກສັດຕູກໍບໍ່ລົ້ມເລີກຄວາມພະຍາຍາຍາມທີ່ຈະຂັດຂວາງວຽກປະກາດທົ່ວປະເທດ. (ເພງ. 94:20) ພະນັກງານໄອຍະການຍື່ນອຸທອນໄປຈົນເຖິງສານສູງສຸດ ແລ້ວພີ່ນ້ອງຂອງເຮົາເຮັດແນວໃດ?
20. ສານສູງສຸດຂອງແດນມາກໄດ້ປະກາດຄຳຕັດສິນແນວໃດແລະພີ່ນ້ອງຕອບຮັບແນວໃດ?
20 ປະມານໜຶ່ງອາທິດກ່ອນທີ່ສານສູງສຸດຈະພິຈາລະນາຄະດີນັ້ນ ພະຍານໃນທົ່ວປະເທດແດນມາກໄດ້ຮ່ວມແຮງຮ່ວມໃຈກັນອອກປະກາດຫຼາຍຂຶ້ນ. ໃນວັນອັງຄານທີ 3 ຕຸລາ 1933 ສານສູງສຸດມີຄຳພິພາກສາທີ່ຍື່ນຕາມສານຊັ້ນຕົ້ນວ່າ ອູກຸດສ ເລມັນບໍ່ໄດ້ເຮັດຜິດກົດໝາຍ. ຄຳຕັດສິນນີ້ໝາຍຄວາມວ່າພະຍານສາມາດປະກາດຕໍ່ໄປໄດ້ຢ່າງເສລີພາບ. ເພື່ອສະແດງຄວາມຂອບໃຈທີ່ພະເຢໂຫວາໄດ້ຊ່ວຍເຂົາເຈົ້າໃຫ້ຊະນະຄະດີ ພີ່ນ້ອງກໍຍິ່ງອອກປະກາດຫຼາຍຂຶ້ນ. ຕັ້ງແຕ່ມີຄຳຕັດສິນຂອງສານອອກມາ ພີ່ນ້ອງໃນປະເທດກໍປະກາດໄດ້ໂດຍບໍ່ມີການຂັດຂວາງຈາກລັດຖະບານ.
ພະຍານທີ່ກ້າຫານໃນປະເທດແດນມາກໃນທົດສະວັດ 1930
21, 22. ສານສູງສຸດໃນສະຫະລັດຕັດສິນຄະດີຂອງພີ່ນ້ອງເມີດອກແນວໃດ?
21 ສະຫະລັດ. ໃນວັນອາທິດທີ 25 ກຸມພາ 1940 ໄພໂອເນຍຄົນໜຶ່ງທີ່ຊື່ວ່າ ໂຣເບີດ ເມີດອກ ຈູເນຍແລະພະຍານອີກ 7 ຄົນໄດ້ຖືກຈັບໃນຂະນະທີ່ປະກາດໃນເມືອງເຈນເນັດ ເຊິ່ງຢູ່ໃກ້ກັບເມືອງພິດສເບິຣກ ລັດເພນຊິລເວເນຍ ເຂົາເຈົ້າຖືກຕັດສິນວ່າມີຄວາມຜິດຍ້ອນບໍ່ໄດ້ຂໍໃບອະນຸຍາດສຳລັບການສະເໜີປຶ້ມ. ເມື່ອມີການອຸທອນ ສານສູງສຸດຂອງສະຫະລັດກໍຮັບຄຳຟ້ອງເພື່ອພິຈາລະນາຄະດີ.
22 ໃນວັນທີ 3 ພຶດົສະພາ 1943 ສານສູງສຸດໄດ້ປະກາດຄຳຕັດສິນທີ່ເປັນການຄຸ້ມຄອງພະຍານພະເຢໂຫວາ ສານຖືວ່າຂໍ້ຮຽກຮ້ອງທີ່ໃຫ້ຈ່າຍເງິນເພື່ອຂໍໃບອະນຸຍາດສຳລັບການແຈກຢາຍສິ່ງພິມທາງສາສະໜາເປັນເລື່ອງທີ່ຂັດຕໍ່ລັດຖະທຳມະນູນ. ສານສູງສຸດເຖິງກັບສັ່ງໃຫ້ຍົກເລີກບັນຍັດຂໍ້ນີ້ ເນື່ອງຈາກຂໍ້ນີ້ເປັນ “ການຈຳກັດເສລີພາບໃນການສະເໜີຂ່າວສານແລະເສລີພາບໃນການເຮັດກິດຈະກຳທາງສາສະໜາ.” ເມື່ອອ່ານຄຳຕັດສິນຂອງຜູ້ພິພາກສາສຽງສ່ວນຫຼາຍ ວິນລຽມ ໂອ. ດັກລາດສ ຜູ້ພິພາກສາຄົນໜຶ່ງໄດ້ເວົ້າວ່າ: ກິດຈະກຳຂອງພະຍານພະເຢໂຫວາ “ເປັນຫຼາຍກວ່າການປະກາດ ຫຼາຍກວ່າການຈຳໜ່າຍຈ່າຍແຈກປຶ້ມກ່ຽວກັບສາສະໜາ ແຕ່ລວມເຖິງທັງສອງຢ່າງນັ້ນ.” ລາວເວົ້າຕໍ່ອີກວ່າ: “ການເຮັດກິດຈະກຳທາງສາສະໜາແບບນີ້ຖືວ່າມີກຽດເທົ່າກັບ . . . ການນະມັດສະການແລະການເທດໃນໂບດ.”
23. ເປັນຫຍັງການຊະນະຄະດີໃນປີ 1943 ຈຶ່ງສຳຄັນສຳລັບພວກເຮົາໃນທຸກມື້ນີ້?
23 ຄຳຕັດສິນຂອງສານນີ້ເປັນໄຊຊະນະທາງກົດໝາຍຄັ້ງສຳຄັນສຳລັບປະຊາຊົນຂອງພະເຈົ້າ ແລະເປັນການຮັບຮອງວ່າເຮົາບໍ່ແມ່ນຄົນເລາະຂາຍເຄື່ອງແຕ່ເປັນຄລິດສະຕຽນທີ່ປະກາດຂ່າວດີ. ໃນມື້ທີ່ໜ້າຈົດຈຳໃນປີ 1943 ນັ້ນ ພະຍານພະເຢໂຫວາໄດ້ຊະນະຄະດີໃນສານສູງສຸດ 12 ໃນ 13 ຄະດີລວມທັງຄະດີຂອງເມີດອກນຳອີກ. ຄຳຕັດສິນເຫຼົ່ານີ້ເປັນຕົວຢ່າງທີ່ມີນ້ຳໜັກຫຼາຍແທ້ໆສຳລັບຄະດີອື່ນໆທີ່ພວກຜູ້ຕໍ່ຕ້ານພະຍາຍາມຂັດຄ້ານ ເພື່ອບໍ່ໃຫ້ເຮົາມີສິດໃນການປະກາດຂ່າວສານເລື່ອງລາຊະອານາຈັກທັງໃນທີ່ສາທາລະນະແລະຕາມບ້ານເຮືອນ.
“ພວກຂ້າພະເຈົ້າຈຳຕ້ອງຟັງພະເຈົ້າຫຼາຍກວ່າຟັງມະນຸດ”
24. ເຮົາເຮັດແນວໃດເມື່ອລັດຖະບານສັ່ງຫ້າມວຽກປະກາດ?
24 ພວກເຮົາທີ່ເປັນຜູ້ຮັບໃຊ້ຂອງພະເຢໂຫວາຮູ້ສຶກຂອບໃຈແທ້ໆທີ່ລັດຖະບານຕ່າງໆຍອມໃຫ້ເຮົາມີສິດທິຕາມກົດໝາຍ ເຮັດໃຫ້ເຮົາປະກາດຂ່າວສານເລື່ອງລາຊະອານາຈັກໄດ້ຢ່າງເສລີພາບ. ແຕ່ເມື່ອລັດຖະບານຂອງປະເທດໃດຫ້າມວຽກປະກາດ ເຮົາກໍພຽງແຕ່ປັບປ່ຽນວິທີເພື່ອໃຫ້ເຮັດວຽກຕໍ່ໄປໄດ້. ເຮົາເຮັດຄືກັບພວກອັກຄະສາວົກທີ່ “ຕ້ອງຟັງພະເຈົ້າຫຼາຍກວ່າຟັງມະນຸດ.” (ກິດ. 5:29; ມັດ. 28:19, 20) ໃນຂະນະດຽວກັນ ເຮົາກໍອຸທອນຕໍ່ສານເພື່ອຂໍໃຫ້ຍົກເລີກຄຳສັ່ງຫ້າມເຮັດກິດຈະກຳຂອງເຮົາ. ໃຫ້ເຮົາມາເບິ່ງນຳກັນ 2 ຕົວຢ່າງ.
25, 26. ມີເຫດການຫຍັງໃນປະເທດນີກາຣາກົວທີ່ເຮັດໃຫ້ພີ່ນ້ອງຍື່ນຄຳຮ້ອງຕໍ່ສານສູງສຸດ ແລະຜົນເປັນແນວໃດ?
25 ນີກາຣາກົວ. ໃນວັນທີ 19 ພະຈິກ 1952 ດໍໂນແວນ ມັນສະເຕີມານເຊິ່ງເປັນມິດຊັນນາລີແລະຜູ້ຮັບໃຊ້ໃນສາຂາ ໄດ້ເຂົ້າໄປທີ່ສຳນັກງານກວດຄົນເຂົ້າເມືອງໃນມານາກົວ ເມືອງຫຼວງຂອງນີກາຣາກົວ. ລາວຖືກເອີ້ນໃຫ້ໄປພົບຫົວໜ້າສຳນັກງານນີ້ເຊິ່ງກໍຄື ຮ້ອຍຕຳຫຼວດເອກອານອນໂດ ກາເຊຍ ຕຳຫຼວດຄົນນີ້ເວົ້າກັບດໍໂນແວນວ່າ ພະຍານພະເຢໂຫວາໃນນີກາຣາກົວ “ຖືກຫ້າມບໍ່ໃຫ້ເຜີຍແຜ່ຫຼັກຄຳສອນແລະບໍ່ໃຫ້ເຮັດກິດຈະກຳທາງສາສະໜາອີກຕໍ່ໄປ.” ເມື່ອດໍໂນແວນຖາມວ່າຍ້ອນຫຍັງ? ຮ້ອຍຕຳຫຼວດເອກກາເຊຍຈຶ່ງອະທິບາຍວ່າກະຊວງບໍ່ອະນຸຍາດໃຫ້ປະກາດແລະພະຍານພະເຢໂຫວາຍັງຖືກກ່າວຫາວ່າເປັນຄອມມູນິດ. ແລ້ວແມ່ນໃຜທີ່ເປັນຄົນກ່າວຫາ? ພວກນັກເທດຂອງຄລິດຕະຈັກໂລມັນກາໂຕລິກນັ້ນເອງ.
ພີ່ນ້ອງໃນປະເທດນີກາຣາກົວໃນໄລຍະທີ່ຖືກສັ່ງຫ້າມ
26 ພີ່ນ້ອງມັນສະເຕີມານໄດ້ຍື່ນອຸທອນທັນທີຕໍ່ລັດຖະບານແລະກະຊວງກ່ຽວກັບສາສະໜາລວມທັງປະທານາທິບໍດີອານັດຊະເຕຊິໂຢ ໂຊໂມຊາ ກາເຊຍ ແຕ່ກໍບໍ່ໄດ້ຊ່ວຍໃຫ້ຫຍັງດີຂຶ້ນເລີຍ. ພວກພີ່ນ້ອງຈຶ່ງປັບປ່ຽນວິທີການບາງຢ່າງເຊັ່ນ: ປິດຫໍປະຊຸມ ພົບກັນເປັນກຸ່ມນ້ອຍໆ ເຂົາເຈົ້າຍັງປະກາດຂ່າວສານເລື່ອງລາຊະອານາຈັກຕໍ່ໆໄປ ພຽງແຕ່ບໍ່ປະກາດຢູ່ຕາມຫົນທາງ. ເຂົາເຈົ້າຍື່ນອຸທອນຕໍ່ສານສູງສຸດຂອງນີກາຣາກົວຂໍໃຫ້ຍົກເລີກຄຳສັ່ງຫ້າມວຽກປະກາດ. ໜັງສືພິມລາຍງານຂ່າວຢ່າງອຶກກະທຶກກ່ຽວກັບຄຳສັ່ງຫ້າມແລະເນື້ອໃນຄຳຮ້ອງຂອງພະຍານພະເຢໂຫວາ ແລະສານສູງສຸດຍັງຮັບພິຈາລະນາຄະດີນີ້. ຜົນເປັນແນວໃດ? ໃນວັນທີ 19 ມິຖຸນາ 1953 ສານສູງສຸດໄດ້ຕີພິມຄຳຕັດສິນຢ່າງເປັນເອກະສັນໃຫ້ພະຍານເປັນຝ່າຍຊະນະ. ສານເຫັນວ່າຄຳສັ່ງຫ້າມນັ້ນຂັດຕໍ່ລັດຖະທຳມະນູນທີ່ຮັບຮອງເສລີພາບໃນການສະແດງອອກ ເສລີພາບໃນການເຮັດຕາມສະຕິຮູ້ສຶກຜິດຊອບ ແລະເສລີພາບໃນການສະແດງຄວາມເຊື່ອທາງສາສະໜາ. ສານຍັງສັ່ງໃຫ້ລັດຖະບານນີກາຣາກົວຟື້ນຟູຄວາມສຳພັນກັບພະຍານພະເຢໂຫວານຳອີກ.
27. ເປັນຫຍັງຊາວນີກາຣາກົວຮູ້ສຶກແປກໃຈຫຼາຍເມື່ອສານສູງສຸດຕັດສິນໃຫ້ພະຍານເປັນຝ່າຍຊະນະ ແລະພີ່ນ້ອງເບິ່ງໄຊຊະນະຄັ້ງນີ້ແນວໃດ?
27 ຊາວນີກາຣາກົວແປກໃຈຫຼາຍທີ່ສານສູງສຸດຕັດສິນໃຫ້ພະຍານເປັນຝ່າຍຊະນະຄະດີ. ກ່ອນໜ້ານັ້ນ ພວກນັກເທດມີອິດທິພົນຫຼາຍຈົນສານບໍ່ຢາກມີເລື່ອງຂັດແຍ່ງກັບເຂົາເຈົ້າ. ເຈົ້າໜ້າທີ່ຂອງລັດຖະບານກໍມີອຳນາດຫຼາຍຈົນສານເກືອບບໍ່ກ້າຕັດສິນຄະດີແບບທີ່ສວນທາງກັບເຂົາເຈົ້າ ພີ່ນ້ອງຈຶ່ງໝັ້ນໃຈວ່າທີ່ເຂົາເຈົ້າຊະນະໃນຄັ້ງນັ້ນກໍເພາະກະສັດເຍຊູໄດ້ປົກປ້ອງແລະເພາະເຂົາເຈົ້າບໍ່ເຄີຍຢຸດປະກາດ.—ກິດ. 1:8
28, 29. ກາງທົດສະວັດ 1980 ມີເຫດການຫຍັງເກີດຂຶ້ນທີ່ປະເທດຊາອີ?
28 ຊາອີ. ກາງທົດສະວັດ 1980 ມີພະຍານພະເຢໂຫວາປະມານ 35.000 ຄົນໃນປະເທດຊາອີ ປັດຈຸບັນຄືສາທາລະນະລັດປະຊາທິປະໄຕກົງໂກ. ສາຂາໄດ້ຕັດສິນໃຈສ້າງອາຄານໃໝ່ຫຼາຍຫຼັງເພື່ອຮອງຮັບວຽກທີ່ມີຫຼາຍຂຶ້ນເລື້ອຍໆ. ໃນເດືອນທັນວາ 1985 ມີການປະຊຸມນານາຊາດທີ່ເມືອງຫຼວງທີ່ຊື່ວ່າກິນຊາຊາ ມີຜູ້ເຂົ້າຮ່ວມການປະຊຸມຈາກສະຖານທີ່ຕ່າງໆໃນທົ່ວໂລກ 32.000 ຄົນນັ່ງຢູ່ເຕັມສະໜາມກິລາຂອງເມືອງນີ້. ແຕ່ຫຼັງຈາກນັ້ນສະພາບການກໍເລີ່ມປ່ຽນໄປ ເກີດຫຍັງຂຶ້ນກັບພະຍານພະເຢໂຫວາໃນທີ່ນັ້ນ?
29 ພີ່ນ້ອງມາເຊວ ຟິລໂທ ມິດຊັນນາລີຈາກຄິວເບກປະເທດການາດາເຊິ່ງເຄີຍຖືກຂົ່ມເຫງໃນຍຸກດູເພລດຊິດປົກຄອງ ແລະຕອນນັ້ນໄດ້ຮັບໃຊ້ໃນຊາອີ ເລົ່າເຖິງເຫດການທີ່ເກີດຂຶ້ນວ່າ: “ວັນທີ 12 ມີນາ 1986 ພີ່ນ້ອງທີ່ມີໜ້າທີ່ຮັບຜິດຊອບໄດ້ຮັບຈົດໝາຍແຈ້ງວ່າສະມາຄົມຂອງພະຍານພະເຢໂຫວາໃນຊາອີເປັນສະມາຄົມທີ່ຜິດກົດໝາຍ.” ຄຳສັ່ງຫ້າມນີ້ລົງນາມໂດຍໂມບູຕູ ເຊເຊ ເຊໂກເຊິ່ງເປັນປະທານາທິບໍດີຂອງຊາອີ.
30. ບັນຫາໃຫຍ່ທີ່ຄະນະກຳມະການສາຂາຕ້ອງຕັດສິນໃຈແມ່ນຫຍັງ ແລະເຂົາເຈົ້າຕັດສິນໃຈແນວໃດ?
30 ມື້ຕໍ່ມາ ສະຖານີວິທະຍຸແຫ່ງຊາດລາຍງານວ່າ: “ເຮົາຈະບໍ່ໄດ້ຍິນຫຍັງກ່ຽວກັບພະຍານພະເຢໂຫວາໃນ [ຊາອີ] ອີກຕໍ່ໄປ.” ແລ້ວການຂົ່ມເຫງກໍເກີດຂຶ້ນທັນທີ. ຫໍປະຊຸມຖືກທຳລາຍ ພີ່ນ້ອງຂອງເຮົາຖືກປຸ້ນ ຖືກຈັບ ຖືກຂັງຄຸກ ແລະຖືກຕີ ແມ່ນແຕ່ເດັກນ້ອຍທີ່ເປັນພະຍານກໍຖືກຂັງຄຸກ. ໃນວັນທີ 12 ຕຸລາ 1988 ລັດຖະບານໄດ້ຍຶດຊັບສິນຂອງອົງການ ກອງກຳລັງຮັກສາຄວາມໝັ້ນຄົງໄດ້ເຂົ້າຍຶດສາຂາ. ພີ່ນ້ອງທີ່ມີໜ້າທີ່ຮັບຜິດຊອບໄດ້ຍື່ນຄຳຮ້ອງຕໍ່ປະທານາທິບໍດີໂມບູຕູ ແຕ່ລາວບໍ່ຮັບຄຳຮ້ອງ. ເມື່ອເຖິງຕອນນີ້ຄະນະກຳມະການສາຂາຈຶ່ງມີບັນຫາໃຫຍ່ຫຼາຍທີ່ຕ້ອງຕັດສິນໃຈວ່າ: “ເຮົາຄວນຍື່ນອຸທອນຕໍ່ສານສູງສຸດ ຫຼືຖ້າເບິ່ງສະຖານະການໄປກ່ອນ?” ທິໂມທີ ໂຮມ ມິດຊັນນາລີແລະຜູ້ປະສານງານສາຂາໃນຊາອີຕອນນັ້ນໄດ້ເລົ່າວ່າ: “ເຮົາຂໍການຊີ້ນຳແລະສະຕິປັນຍາຈາກພະເຢໂຫວາ.” ຫຼັງຈາກຄິດຢ່າງຮອບຄອບແລະອະທິດຖານຈາກໃຈຈິງ ຄະນະກຳມະການຈຶ່ງເຫັນດີວ່າຍັງບໍ່ເຖິງເວລາທີ່ເຮົາຈະດຳເນີນການທາງກົດໝາຍ. ແທນທີ່ຈະເຮັດແບບນັ້ນ ເຮົາຫັນມາເອົາໃຈໃສ່ເບິ່ງແຍງພີ່ນ້ອງແລະຫາວິທີອື່ນໆທີ່ເຮັດໃຫ້ເຮົາປະກາດຕໍ່ໄປໄດ້.
“ໃນລະຫວ່າງທີ່ມີການຮ້ອງຟ້ອງຄະດີນີ້ເຮົາເຫັນວ່າພະເຢໂຫວາສາມາດປ່ຽນສະຖານະການຕ່າງໆໄດ້”
31, 32. ຄຳຕັດສິນຂອງສານສູງສຸດໃນປະເທດຊາອີໜ້າງຶດງໍ້ແນວໃດ ແລະຄຳຕັດສິນນີ້ມີຜົນຕໍ່ພີ່ນ້ອງແນວໃດ?
31 ຫຼາຍປີຜ່ານໄປ. ມີການຕໍ່ຕ້ານພະຍານໜ້ອຍລົງ ແລະການນັບຖືສິດທິມະນຸດໃນປະເທດນີ້ກໍມີຫຼາຍຂຶ້ນ. ສຳນັກງານສາຂາຈຶ່ງຕັດສິນໃຈວ່າເຖິງເວລາແລ້ວທີ່ຈະຮ້ອງຂໍຕໍ່ສານສູງສຸດຂອງຊາອີໃຫ້ຍົກເລີກຄຳສັ່ງຫ້າມ. ໜ້າງຶດງໍ້ແທ້ໆທີ່ສານສູງສຸດຍອມພິຈະລະນາຄະດີ. ເມື່ອເຖິງວັນທີ 8 ມັງກອນ 1993 ເຊິ່ງເປັນເວລາເກືອບ 7 ປີຫຼັງຈາກມີຄຳສັ່ງຫ້າມທີ່ລົງນາມໂດຍປະທານາທິບໍດີ ສານໄດ້ຕັດສິນວ່າການຕໍ່ຕ້ານທີ່ລັດຖະບານໄດ້ເຮັດກັບພະຍານເປັນການກະທຳທີ່ຜິດກົດໝາຍ ແລະຕ້ອງຍົກເລີກຄຳສັ່ງຫ້າມນັ້ນ. ຄິດເບິ່ງແມ ນີ້ໝາຍຄວາມວ່າພວກຜູ້ພິພາກສາຍົກເລີກຄຳສັ່ງຂອງປະທານາທິບໍດີເຖິງແມ່ນວ່າຕ້ອງສ່ຽງຕໍ່ຊີວິດຂອງເຂົາເຈົ້າ! ແຕ່ພີ່ນ້ອງໂຮມບອກວ່າ: “ໃນລະຫວ່າງທີ່ມີການຟ້ອງຮ້ອງຄະດີນີ້ເຮົາເຫັນວ່າພະເຢໂຫວາສາມາດປ່ຽນສະຖານະການຕ່າງໆໄດ້.” (ດາ. 2:21) ໄຊຊະນະໃນຄັ້ງນີ້ເຮັດໃຫ້ພີ່ນ້ອງມີຄວາມເຊື່ອເຂັ້ມແຂງຫຼາຍຂຶ້ນ ເຂົາເຈົ້າຮູ້ສຶກວ່າກະສັດເຍຊູຊີ້ນຳປະຊາຊົນຂອງເພິ່ນໃຫ້ຮູ້ວ່າຈະໃຊ້ກົດໝາຍເມື່ອໃດແລະແນວໃດ.
ພະຍານພະເຢໂຫວາໃນສາທາລະນະລັດປະຊາທິປະໄຕກົງໂກ ດີໃຈຫຼາຍທີ່ເຂົາເຈົ້າມີເສລີພາບໃນການນະມັດສະການພະເຢໂຫວາ
32 ເມື່ອຍົກເລີກການສັ່ງຫ້າມແລ້ວ ສຳນັກງານສາຂາກໍໄດ້ຮັບອະນຸຍາດໃຫ້ມິດຊັນນາລີສ້າງສຳນັກງານໃໝ່ອີກບ່ອນໜຶ່ງ ແລະນຳເຂົ້າສັບພະໜັງສືຕ່າງໆກ່ຽວກັບຄຳພີໄບເບິນ.f ຜູ້ຮັບໃຊ້ຂອງພະເຈົ້າໃນທົ່ວໂລກຮູ້ສຶກຍິນດີແທ້ໆທີ່ເຫັນວ່າພະເຢໂຫວາປົກປ້ອງປະຊາຊົນຂອງພະອົງໃຫ້ມີຄວາມເຊື່ອທີ່ເຂັ້ມແຂງ!—ເອຊາ. 52:10
“ພະເຢໂຫວາເປັນຜູ້ຊ່ວຍເຫຼືອຂ້ອຍ”
33. ເຮົາໄດ້ຮຽນຮູ້ຫຍັງເມື່ອທົບທວນຄະດີເຫຼົ່ານີ້?
33 ການທົບທວນເລື່ອງການສູ້ຄະດີເຫຼົ່ານີ້ພິສູດໃຫ້ເຫັນວ່າພະເຍຊູຮັກສາຄຳສັນຍາທີ່ວ່າ: “ເຮົາຈະປະທານປາກແລະສະຕິປັນຍາໃຫ້ແກ່ທ່ານທັງຫຼາຍທີ່ສັດຕູທັງປວງຂອງທ່ານຈະອາດຕອບແລະຕໍ່ສູ້ບໍ່ໄດ້.” (ອ່ານລືກາ 21:12-15) ໃນທຸກມື້ນີ້ ບາງຄັ້ງພະເຢໂຫວາກໍໃຊ້ຄົນອື່ນໆເຊິ່ງເປັນຄືກັບຄາມາລຽນໃຫ້ປົກປ້ອງປະຊາຊົນຂອງພະອົງ ຫຼືອາດກະຕຸ້ນຜູ້ພິພາກສາແລະນັກກົດໝາຍໃຫ້ຮັກສາຄວາມຍຸຕິທຳ. ພະເຢໂຫວາເຮັດໃຫ້ອາວຸດຂອງພວກຜູ້ຕໍ່ຕ້ານໃຊ້ການບໍ່ໄດ້. (ອ່ານເອຊາອີ 54:17) ການຕໍ່ຕ້ານບໍ່ອາດຢຸດວຽກຂອງພະເຈົ້າໄດ້.
34. ເປັນຫຍັງໄຊຊະນະທາງກົດໝາຍຈຶ່ງໜ້າງຶດງໍ້ແທ້ໆ? (ເບິ່ງຂອບ “ໄຊຊະນະໃນສານສູງທີ່ຊ່ວຍໃຫ້ວຽກປະກາດກ້າວໜ້າ”)
34 ເປັນຫຍັງໄຊຊະນະທາງດ້ານກົດໝາຍຈຶ່ງເປັນຕາງຶດງໍ້ແທ້ໆ? ລອງຄິດເບິ່ງ ພະຍານພະເຢໂຫວາບໍ່ແມ່ນຄົນເດັ່ນດັງ ບໍ່ແມ່ນຜູ້ມີອິດທິພົນ ເຮົາບໍ່ລົງຄະແນນສຽງເລືອກຕັ້ງ ບໍ່ໄປຟັງນັກການເມືອງຫາສຽງ ບໍ່ໄດ້ຂໍຮ້ອງໃຫ້ນັກການເມືອງຊ່ວຍເຫຼືອ ແລະພະຍານທີ່ຂຶ້ນສານສ່ວນຫຼາຍຖືກເບິ່ງວ່າເປັນຄົນທີ່: “ບໍ່ມີການສຶກສາ.” (ກິດ. 4:13, ລ.ມ.) ໃນສາຍຕາຂອງມະນຸດ ເກືອບຈະບໍ່ມີຫຍັງທີ່ເປັນແຮງຈູງໃຈທີ່ເຮັດໃຫ້ສານຢາກຕັດສິນໃຫ້ເຮົາເປັນຝ່າຍຊະນະ ແລະຍັງເຮັດໃຫ້ເຮົາມີເລື່ອງບາດໝາງກັບພວກຜູ້ຕໍ່ຕ້ານທັງໃນວົງການສາສະໜາແລະການເມືອງດ້ວຍຊ້ຳ ແຕ່ສານຍັງຕັດສິນໃຫ້ເຮົາຊະນະຄະດີຫຼາຍຕໍ່ຫຼາຍຄັ້ງ! ໄຊຊະນະທາງກົດໝາຍພິສູດວ່າເຮົາເປັນ “ສາວົກພະຄລິດ” ທີ່ ‘ຢູ່ໃນສາຍຕາຂອງພະເຈົ້າສະເໝີ.’ (2 ໂກ. 2:17, ລ.ມ.) ເຮົາຈຶ່ງໝັ້ນໃຈຄືກັບອັກຄະສາວົກໂປໂລທີ່ເວົ້າວ່າ: “ພະເຢໂຫວາເປັນຜູ້ຊ່ວຍເຫຼືອຂ້ອຍ ຂ້ອຍຈະບໍ່ຢ້ານສິ່ງໃດ.”—ເຫບ. 13:6, ລ.ມ.
a ຄະດີລະຫວ່າງແຄນທະເວວກັບລັດຄອນເນດທິຄັດເປັນຄະດີທຳອິດໃນ 43 ຄະດີທີ່ພີ່ນ້ອງເຮເດນ ຄັບວິງຕັນຍື່ນອຸທອນຕໍ່ສານສູງສຸດຂອງສະຫະລັດ ເພື່ອປົກປ້ອງພີ່ນ້ອງຂອງເຮົາ. ລາວເສຍຊີວິດໃນປີ 1978. ໂດໂຣທີ ເມຍຂອງລາວຮັບໃຊ້ຢ່າງສັດຊື່ຈົນເສຍຊີວິດໃນປີ 2015 ດ້ວຍອາຍຸ 92 ປີ.
b ຂໍ້ຫານີ້ອາໄສກົດໝາຍທີ່ອອກໃນປີ 1606 ເຊິ່ງອະນຸຍາດໃຫ້ລູກຂຸນເວົ້າເຖິງຄວາມຜິດຂອງບຸກຄົນໃດໜຶ່ງທີ່ລາວເຫັນວ່າໄດ້ເວົ້າປຸກປັ່ນໃຫ້ເກີດຄວາມເປັນສັດຕູກັນເຖິງແມ່ນສິ່ງນັ້ນຈະເປັນຄວາມຈິງກໍຕາມ.
c ໃນປີ 1950 ມີຜູ້ຮັບໃຊ້ເຕັມເວລາ164 ຄົນໃນຄິວເບກ ເຊິ່ງລວມເຖິງນັກຮຽນກິລຽດ 63 ຄົນທີ່ເຕັມໃຈໄປເຮັດວຽກຢູ່ທີ່ນັ້ນທັງໆ ທີ່ຮູ້ວ່າຈະປະສົບກັບການຕໍ່ຕ້ານຢ່າງຮຸນແຮງໃນວັນຂ້າງໜ້າ.
d ພີ່ນ້ອງດັບເບິນຢູ. ເກລນ ຮາວເປັນທະນາຍຄວາມທີ່ກ້າຫານຫຼາຍ ລາວສູ້ຄະດີເປັນຮ້ອຍໆຄະດີເພື່ອພະຍານພະເຢໂຫວາໃນການາດາແລະປະເທດອື່ນໆຕັ້ງແຕ່ປີ 1943-2003.
e ລາຍລະອຽດເພີ່ມເຕີມກ່ຽວກັບຄະດີນີ້ຢູ່ໃນບົດຄວາມ “ການຮົບນັ້ນບໍ່ແມ່ນເລື່ອງຂອງທ່ານ ແຕ່ເປັນຂອງພະເຈົ້າ” ໃນຕື່ນເຖີດ! 22 ເມສາ 2000 ໜ້າ 18-24 (ພາສາອັງກິດ)
f ໃນທີ່ສຸດກອງກຳລັງຮັກສາຄວາມໝັ້ນຄົງກໍຖອນກຳລັງອອກຈາກສາຂາ ແຕ່ສາຂາໄດ້ສ້າງສຳນັກງານໃໝ່ໃນພື້ນທີ່ອື່ນແລ້ວ.