ບົດທີ 14
ສະໜັບສະໜູນລັດຖະບານຂອງພະເຈົ້າພຽງໜຶ່ງດຽວດ້ວຍຄວາມພັກດີ
1, 2. (ກ) ມີຫຼັກການຫຍັງທີ່ຊ່ວຍຊີ້ນຳລູກສິດຂອງພະເຍຊູຈົນເຖິງທຸກມື້ນີ້? (ຂ) ພວກສັດຕູພະຍາຍາມເອົາຊະນະເຮົາແນວໃດ ແລະຜົນເປັນແນວໃດ?
ພະເຍຊູຢືນຢູ່ຕໍ່ໜ້າພີລາດຜູ້ພິພາກສາທີ່ມີອຳນາດສູງສຸດໃນແຂວງຢູເດ. ພະເຍຊູອ້າງເຖິງຫຼັກການຂໍ້ໜຶ່ງທີ່ຊ່ວຍຊີ້ນຳລູກສິດແທ້ຂອງເພິ່ນຈົນມາຮອດທຸກມື້ນີ້ໂດຍກ່າວວ່າ: “ແຜ່ນດິນ [ລາຊະອານາຈັກ] ຂອງເຮົາບໍ່ເປັນແຕ່ໂລກນີ້. ຖ້າແຜ່ນດິນ [ລາຊະອານາຈັກ] ຂອງເຮົາເປັນແຕ່ໂລກນີ້ພວກຂ້າໃຊ້ຂອງເຮົາຈະໄດ້ເລວເສິກແລ້ວເພື່ອບໍ່ໃຫ້ເຮົາເປັນທີ່ມອບໄວ້ແກ່ພວກຢູເດ. ແຕ່ວ່າບັດນີ້ແຜ່ນດິນ [ລາຊະອານາຈັກ] ຂອງເຮົາບໍ່ເປັນແຕ່ທີ່ນີ້.” (ໂຢ. 18:36) ພີລາດປະຫານຊີວິດພະເຍຊູ ແຕ່ລາວກໍເປັນຜູ້ຊະນະໄດ້ພຽງບໍ່ເທົ່າໃດມື້ ເພາະພະເຍຊູຖືກປຸກໃຫ້ຟື້ນຄືນມາຈາກຕາຍ. ຈັກກະພັດທີ່ມີອຳນາດໃນຈັກກະວັດໂລມພະຍາຍາມກຳຈັດລູກສິດຂອງພະເຍຊູໃຫ້ໝົດໄປ ແຕ່ກໍເຮັດບໍ່ສຳເລັດ. ຄລິດສະຕຽນເຜີຍແຜ່ຂ່າວສານເລື່ອງລາຊະອານາຈັກໄປທົ່ວໂລກໃນຍຸກບູຮານນັ້ນ.—ໂກໂລ. 1:23
2 ຫຼັງຈາກທີ່ລາຊະອານາຈັກສ້າງຕັ້ງຂຶ້ນໃນປີ ຄ.ສ. 1914 ມີມະຫາອຳນາດທາງການທະຫານທີ່ເຂັ້ມແຂງທີ່ສຸດໃນປະຫວັດສາດທີ່ພະຍາຍາມກວາດລ້າງປະຊາຊົນຂອງພະເຈົ້າ ແຕ່ກໍບໍ່ມີມະຫາອຳນາດໃດເອົາຊະນະເຮົາໄດ້. ຫຼາຍລັດຖະບານແລະກຸ່ມຕ່າງໆທາງການເມືອງພະຍາຍາມບີບບັງຄັບເຮົາໃຫ້ເລືອກຝ່າຍໃດຝ່າຍໜຶ່ງເມື່ອເຂົາເຈົ້າຕໍ່ສູ້ກັນ ແຕ່ເຂົາເຈົ້າກໍບໍ່ສາມາດເຮັດໃຫ້ເຮົາແຕກແຍກກັນໄດ້. ໃນທຸກມື້ນີ້ເກືອບທຸກປະເທດມີປະຊາຊົນຂອງພະເຈົ້າອາໄສຢູ່ ແຕ່ພວກເຮົາກໍເປັນເອກະພາບກັນແລະເປັນສັງຄົມພີ່ນ້ອງໃນທົ່ວໂລກ ພວກເຮົາຍັງຮັກສາຄວາມເປັນກາງຢ່າງເຄັ່ງຄັດເພື່ອຈະບໍ່ເຂົ້າໄປຫຍຸ້ງກ່ຽວກັບການເມືອງຂອງໂລກນີ້. ເອກະພາບຂອງເຮົາເປັນຫຼັກຖານທີ່ຊັດເຈນວ່າລາຊະອານາຈັກຂອງພະເຈົ້າປົກຄອງແລ້ວ ແລະກະສັດເຍຊູຄລິດຍັງຊີ້ນຳ ຊຳຮະ ແລະປົກປ້ອງປະຊາຊົນຂອງເພິ່ນ. ໃຫ້ເຮົາມາເບິ່ງນຳກັນວ່າພະເຍຊູເຮັດສິ່ງເຫຼົ່ານັ້ນໄດ້ແນວໃດ ແລະຂໍໃຫ້ສັງເກດໄຊຊະນະທາງກົດໝາຍບາງຢ່າງທີ່ເພິ່ນໄດ້ຊ່ວຍເຮົາ ເຊິ່ງເຮັດໃຫ້ເຮົາມີຄວາມເຊື່ອທີ່ເຂັ້ມແຂງຂຶ້ນໃນຂະນະທີ່ເຮົາພະຍາຍາມຮັກສາຕົວບໍ່ໃຫ້ “ເປັນຝ່າຍໂລກ.”—ໂຢ. 17:14
ປະເດັນທີ່ກາຍເປັນເລື່ອງໃຫຍ່
3, 4. (ກ) ມີເຫດການຫຍັງເກີດຂຶ້ນຫຼັງຈາກລາຊະອານາຈັກສ້າງຕັ້ງຂຶ້ນໃນສະຫວັນ? (ຂ) ປະຊາຊົນຂອງພະເຈົ້າເຂົ້າໃຈປະເດັນເລື່ອງຄວາມເປັນກາງຢ່າງຊັດເຈນມາຕະຫຼອດບໍ? ຂໍໃຫ້ອະທິບາຍ
3 ສົງຄາມໃນສະຫວັນເກີດຂຶ້ນທັນທີຫຼັງຈາກທີ່ລາຊະອານາຈັກສ້າງຕັ້ງຂຶ້ນ ແລ້ວຊາຕານກໍຖືກຖິ້ມລົງມາໃນໂລກ. (ອ່ານຄຳປາກົດ 12:7-10, 12) ຈາກນັ້ນກໍມີສົງຄາມເກີດຂຶ້ນຢູ່ໃນໂລກນຳອີກ ສົງຄາມນີ້ໄດ້ທົດສອບຄວາມຕັ້ງໃຈຂອງປະຊາຊົນຂອງພະເຈົ້າ ແລ້ວກໍເຫັນໄດ້ຢ່າງຊັດເຈນວ່າເຂົາເຈົ້າຕັ້ງໃຈທີ່ຈະເຮັດຕາມຕົວຢ່າງຂອງພະເຍຊູແລະບໍ່ເປັນສ່ວນຂອງໂລກ ແຕ່ໃນຕອນທຳອິດເຂົາເຈົ້າຍັງບໍ່ເຂົ້າໃຈຊັດເຈນວ່າຈະຕ້ອງຢູ່ຫ່າງຈາກເລື່ອງການເມືອງຫຼາຍໜ້ອຍສ່ຳໃດ.
4 ຕົວຢ່າງເຊັ່ນ: ປຶ້ມຮຸ່ງອະລຸນແຫ່ງລັດສະໄໝພັນປີ (ພາສາອັງກິດ) ເຫຼັ້ມ 6a ພິມໃນປີ 1904 ສະໜັບສະໜູນຄລິດສະຕຽນໃຫ້ຫຼີກລ່ຽງການສູ້ຮົບໃນສົງຄາມ. ແຕ່ກໍໄດ້ອະທິບາຍວ່າຖ້າຄລິດສະຕຽນຄົນໃດຖືກເກນໃຫ້ໄປເປັນທະຫານ ລາວຄວນພະຍາຍາມຂໍເຮັດໜ້າທີ່ອື່ນທີ່ບໍ່ກ່ຽວຂ້ອງໂດຍກົງກັບການສູ້ຮົບ ແຕ່ຖ້າຫຼີກລ່ຽງບໍ່ໄດ້ແທ້ໆ ລາວກໍຕ້ອງລະວັງທີ່ຈະບໍ່ເຮັດຜິດໂດຍມີສ່ວນໃນການຂ້າຄົນ. ເຮີເບີດ ຊີເນຍເຊິ່ງຢູ່ໃນປະເທດອັງກິດ ແລະຮັບບັບເຕມາໃນປີ 1905 ເວົ້າເຖິງສະພາບການໃນສະໄໝນັ້ນວ່າ: “ພີ່ນ້ອງສັບສົນຫຼາຍ ແລະບໍ່ມີຄຳແນະນຳທີ່ຊັດເຈນວ່າການເປັນທະຫານໂດຍບໍ່ກ່ຽວຂ້ອງກັບການສູ້ຮົບໂດຍກົງເປັນສິ່ງທີ່ຖືກຕ້ອງຫຼືບໍ່.”
5. ຫໍສັງເກດການ 1 ກັນຍາ 1915 ຊ່ວຍປັບປ່ຽນຄວາມເຂົ້າໃຈຂອງເຮົາແນວໃດ?
5 ຫໍສັງເກດການ 1 ກັນຍາ 1915 ເລີ່ມປັບປ່ຽນຄວາມເຂົ້າໃຈໃນເລື່ອງນີ້. ວາລະສານສະບັບນີ້ເວົ້າເຖິງຄວາມເຂົ້າໃຈໃນເລື່ອງຕ່າງໆທີ່ມີຢູ່ໃນປຶ້ມຄູ່ມືການສຶກສາພະຄຳພີ ວ່າ: “ເຮົາອົດສົງໄສບໍ່ໄດ້ວ່າການເຂົ້າຮ່ວມກັບກອງທັບ ເຖິງແມ່ນຈະຢູ່ໃນໜ່ວຍທີ່ບໍ່ໄດ້ອອກໄປສູ້ຮົບ ຈະຖືວ່າເປັນການອະລຸ້ມອະລ່ວຍຕໍ່ຫຼັກການບໍ?” ແຕ່ຖ້າຄລິດສະຕຽນຖືກຂູ່ວ່າຈະຖືກຍິງໃຫ້ຕາຍຖ້າລາວບໍ່ຍອມໃສ່ຊຸດທະຫານຫຼືອອກໄປສູ້ຮົບເດ? ບົດຄວາມນັ້ນຕັ້ງຄຳຖາມວ່າ: “ອັນໃດຈະຮ້າຍແຮງກວ່າກັນລະຫວ່າງ ຕາຍຍ້ອນພັກດີຕໍ່ກະສັດແຫ່ງສັນຕິສຸກແລະບໍ່ຍອມຂັດຂືນຄຳສັ່ງຂອງເພິ່ນ ຫຼືຕາຍຍ້ອນສະໜັບສະໜູນແລະສູ້ຮົບໃນນາມຂອງກະສັດຝ່າຍໂລກ ເຊິ່ງເປັນການອະລຸ້ມອະລ່ວຍຕໍ່ຫຼັກຄຳສອນຂອງກະສັດທີ່ຢູ່ເທິງສະຫວັນ ໃນເມື່ອສຸດທ້າຍກໍຕ້ອງຕາຍຢູ່ດີ ເຮົາຄົງຢາກເລືອກແບບທຳອິດຄື ຕາຍຍ້ອນພັກດີຕໍ່ກະສັດຂອງເຮົາທີ່ຢູ່ເທິງສະຫວັນ.” ເຖິງແມ່ນບົດຄວາມນີ້ຈະມີຄຳກ່າວທີ່ໜັກແໜ້ນ ແຕ່ກໍລົງທ້າຍວ່າ: “ເຮົາບໍ່ໄດ້ຮຽກຮ້ອງໃຫ້ເຮັດແບບນີ້ ເຮົາພຽງແຕ່ສະເໜີ.”
6. ເຈົ້າໄດ້ຮຽນຮູ້ຫຍັງຈາກຕົວຢ່າງຂອງພີ່ນ້ອງເຮີເບີດ ຊີເນຍ?
6 ພີ່ນ້ອງບາງຄົນເຂົ້າໃຈທັນທີວ່າການເຂົ້າຮ່ວມກັບກອງທັບເປັນສິ່ງທີ່ຜິດແລະເຂົາເຈົ້າກໍພ້ອມທີ່ຈະປະເຊີນໜ້າບໍ່ວ່າຈະຕ້ອງປະສົບກັບສິ່ງໃດກໍຕາມ. ເຮີເບີດ ຊີເນຍທີ່ເວົ້າເຖິງໃນກ່ອນໜ້ານີ້ບອກວ່າ: “ສຳລັບຂ້ອຍແລ້ວ ມັນບໍ່ຕ່າງກັນເລີຍລະຫວ່າງການຂົນລູກປືນຂຶ້ນເຮືອ [ເຊິ່ງບໍ່ກ່ຽວຂ້ອງກັບການສູ້ຮົບໂດຍກົງ] ກັບການໃສ່ລູກປືນກຽມຍິງ.” (ລືກາ 16:10) ເນື່ອງຈາກພີ່ນ້ອງຊີເນຍບໍ່ຍອມເປັນທະຫານຍ້ອນຂັດຕໍ່ສະຕິຮູ້ສຶກຜິດຊອບ ລາວຈຶ່ງຖືກຂັງຄຸກພ້ອມກັບພີ່ນ້ອງອີກ 4 ຄົນແລະຄົນທີ່ນັບຖືສາສະໜາອື່ນໆ ນັກໂທດທັງໝົດທີ່ປະຕິເສດການເປັນທະຫານຍ້ອນຂັດກັບສະຕິຮູ້ສຶກຜິດຊອບມີ 16 ຄົນ. ເຂົາເຈົ້າຈຶ່ງຖືກຂັງຄຸກໃນເມືອງຣິກມອນປະເທດອັງກິດໄລຍະໜຶ່ງ. ຈາກນັ້ນ ພີ່ນ້ອງຊີເນຍກັບຄົນອື່ນໆກໍຖືກພາລົງເຮືອແບບລັບໆໄປທີ່ສະໝໍລະພູມໃນຝຣັ່ງ ເຂົາເຈົ້າຖືກຕັດສິນປະຫານຊີວິດດ້ວຍການຍິງເປົ້າ ແຕ່ໃນຂະນະທີ່ຢືນຮຽງກັນເປັນແຖວຕໍ່ໜ້າເພັດຊະຄາດ ກໍມີການປ່ຽນຄຳຕັດສິນໃຫ້ເຂົາເຈົ້າຕິດຄຸກເປັນເວລາ 10 ປີ.
“ຂ້ອຍໄດ້ເຂົ້າໃຈວ່າປະຊາຊົນຂອງພະເຈົ້າຕ້ອງມີສັນຕິສຸກກັບທຸກຄົນ ເຖິງແມ່ນວ່າກຳລັງຢູ່ໃນໄລຍະສົງຄາມ”—ຊີມອນ ຄຣາເກີ (ເບິ່ງຂໍ້ 7)
7. ເມື່ອສົງຄາມໂລກຄັ້ງທີ 2 ເກີດຂຶ້ນ ປະຊາຊົນຂອງພະເຢໂຫວາກໍເຂົ້າໃຈເລື່ອງຫຍັງຫຼາຍຂຶ້ນ?
7 ເມື່ອສົງຄາມໂລກຄັ້ງທີ 2 ເກີດຂຶ້ນ ປະຊາຊົນຂອງພະເຢໂຫວາໂດຍລວມກໍເຂົ້າໃຈຊັດເຈນວ່າຄວາມເປັນກາງໝາຍເຖິງຫຍັງແລະຮູ້ວ່າຕ້ອງເຮັດແນວໃດຖ້າຕ້ອງການຮຽນແບບພະເຍຊູ. (ມັດ. 26:51-53; ໂຢ. 17:14-16; 1 ເປ. 2:21) ຕົວຢ່າງເຊັ່ນ: ຫໍສັງເກດການ 1 ພະຈິກ 1939 ລົງບົດຄວາມທີ່ສຳຄັນເລື່ອງ “ຄວາມເປັນກາງ” ເຊິ່ງກ່າວວ່າ: ປະຊາຊົນຂອງພະເຢໂຫວາ “ຕ້ອງຮັກສາຄວາມເປັນກາງຢ່າງເຄັ່ງຄັດໃນລະຫວ່າງທີ່ຊາດຕ່າງໆສູ້ຮົບກັນ.” ຊີມອນ ຄຣາເກີ ເຊິ່ງພາຍຫຼັງໄດ້ຮັບໃຊ້ໃນສຳນັກງານທີ່ບຸກລິນ ນິວຢອກ ເວົ້າເຖິງບົດຄວາມນີ້ວ່າ: “ຂ້ອຍໄດ້ເຂົ້າໃຈວ່າປະຊາຊົນຂອງພະເຈົ້າຕ້ອງມີສັນຕິສຸກກັບທຸກຄົນ ເຖິງແມ່ນວ່າກຳລັງຢູ່ໃນໄລຍະສົງຄາມ.” ແຕ່ຄວາມຮູ້ຂອງພະເຈົ້າກໍອອກມາຖືກເວລາພໍດີ ແລະຍັງຊ່ວຍກຽມປະຊາຊົນຂອງພະອົງໃຫ້ພ້ອມທີ່ຈະປະເຊີນໜ້າກັບການທົດສອບຄວາມພັກດີຕໍ່ລາຊະອານາຈັກ ເຖິງແມ່ນຈະຖືກໂຈມຕີຢ່າງໜັກໜ່ວງໃນແບບທີ່ບໍ່ເຄີຍເກີດຂຶ້ນມາກ່ອນ.
ຖືກຂົ່ມຂູ່ໂດຍ “ແມ່ນ້ຳ” ແຫ່ງການຕໍ່ຕ້ານ
8, 9. ຄຳພະຍາກອນຂອງອັກຄະສາວົກໂຢຮັນເກີດຂຶ້ນແທ້ແນວໃດ?
8 ອັກຄະສາວົກໂຢຮັນພະຍາກອນວ່າຫຼັງຈາກລາຊະອານາຈັກສ້າງຕັ້ງຂຶ້ນໃນປີ 1914 ມັງກອນໃຫຍ່ຫຼືຊາຕານພະຍາມານໄດ້ທຳລາຍຄົນທີ່ສະໜັບສະໜູນລາຊະອານາຈັກຂອງພະເຈົ້າ ໂດຍພົ່ນນ້ຳອອກມາຈາກປາກຂອງມັນຕາມພາບໃນນິມິດ.b (ອ່ານຄຳປາກົດ 12:9, 15) ຄຳພະຍາກອນຂອງໂຢຮັນເກີດຂຶ້ນແທ້ແນວໃດ? ຕັ້ງແຕ່ທົດສະວັດ 1920 ເປັນຕົ້ນມາ ຄື້ນແຫ່ງການຕໍ່ຕ້ານກໍຖະຫຼົ່ມໃສ່ປະຊາຊົນຂອງພະເຈົ້າ. ໃນໄລຍະສົງຄາມໂລກຄັ້ງທີ 2 ພີ່ນ້ອງຄຣາເກີກັບອີກຫຼາຍຄົນໃນອາເມຣິກາເໜືອຕິດຄຸກຍ້ອນວ່າພັກດີຕໍ່ລາຊະອານາຈັກຂອງພະເຈົ້າ. ທີ່ຈິງແລ້ວ ນັກໂທດທີ່ປະຕິເສດການສູ້ຮົບເພາະຄວາມເຊື່ອທາງສາສະໜາໃນລະຫວ່າງສົງຄາມນັ້ນ ມີພະຍານພະເຢໂຫວາເຖິງ 2 ໃນ 3 ຄົນຂອງຈຳນວນນັກໂທດທັງໝົດ ແລະເຂົາເຈົ້າກໍຖືກກັກຂັງໃນຄຸກກາງທີ່ປະເທດສະຫະລັດ.
9 ຊາຕານພະຍາມານແລະພັກພວກຂອງມັນຕັ້ງໃຈຈະທຳລາຍຄວາມສັດຊື່ຂອງປະຊາຊົນທຸກຄົນທີ່ຢູ່ພາຍໃຕ້ການປົກຄອງຂອງພະເຈົ້າບໍ່ວ່າເຂົາເຈົ້າຈະຢູ່ໃສກໍຕາມ. ພະຍານພະເຢໂຫວາທົ່ວອາຝຼິກກາ ເອີຣົບ ແລະສະຫະລັດໄດ້ຖືກນຳຕົວໄປຂຶ້ນສານຫຼືປະເຊີນໜ້າກັບຄະນະກຳມະການພິຈາລະນາວ່າຈະໄດ້ຮັບໂທດຫຼາຍໜ້ອຍສ່ຳໃດ. ແຕ່ຍ້ອນຕັ້ງໃຈແນ່ວແນ່ທີ່ຈະຮັກສາຄວາມເປັນກາງ ເຂົາເຈົ້າຈຶ່ງຕິດຄຸກຫຼືຖືກທຸບຕີຈົນພິການ ປະຊາຊົນຂອງພະເຈົ້າໃນປະເທດເຢຍລະມັນຖືກກົດດັນຢ່າງໜັກໜ່ວງຍ້ອນບໍ່ຍອມກ່າວຄຳສັນລະເສີນຮິດເລີຫຼືຮ່ວມເຮັດສົງຄາມ. ພະຍານປະມານ 6.000 ຄົນຖືກຂັງຕາມຄ້າຍກັກກັນຕ່າງໆໃນຍຸກນາຊີ ແລະພະຍານທີ່ເປັນຄົນເຢຍລະມັນແລະຄົນຊາດອື່ນໆຫຼາຍກວ່າ 1.600 ຄົນຕ້ອງຕາຍດ້ວຍນ້ຳມືຂອງພວກຜູ້ຄຸມຂັງທີ່ໂຫດຫ້ຽມ. ເຖິງຢ່າງນັ້ນກໍຕາມ ຊາຕານກໍບໍ່ສາມາດກໍ່ຄວາມເສຍຫາຍຖາວອນຕໍ່ປະຊາຊົນຂອງພະເຈົ້າໄດ້.—ມໂກ. 8:34, 35
‘ແຜ່ນດິນ’ ກືນ “ແມ່ນ້ຳ” ລົງໄປ
10. ‘ແຜ່ນດິນ’ ໝາຍເຖິງຫຍັງ? ແລະ ‘ແຜ່ນດິນ’ ແຊກແຊງການຂົ່ມເຫງເພື່ອຊ່ວຍປະຊາຊົນຂອງພະເຈົ້າແນວໃດ?
10 ຄຳພະຍາກອນທີ່ອັກຄະສາວົກໂຢຮັນບັນທຶກໄວ້ວ່າ: ‘ແຜ່ນດິນ’ ເຊິ່ງໝາຍເຖິງກຸ່ມຄົນຫຼືຜູ້ມີອຳນາດທີ່ມີເຫດມີຜົນ ຈະກືນ “ແມ່ນ້ຳ” ແຫ່ງການກົດຂີ່ຂົ່ມເຫງ ດັ່ງນັ້ນຄົນເຫຼົ່ານີ້ຈຶ່ງເປັນເຄື່ອງມືທີ່ພະເຈົ້າໃຊ້ເພື່ອຊ່ວຍເຫຼືອປະຊາຊົນຂອງພະອົງ. ແຕ່ຄຳພະຍາກອນເລື່ອງນີ້ເກີດຂຶ້ນແລ້ວບໍ? ໃນໄລຍະຫຼາຍສິບປີຫຼັງຈາກສົງຄາມໂລກຄັ້ງທີ 2 ‘ແຜ່ນດິນ’ ມັກຈະເຂົ້າມາແຊກແຊງເພື່ອຊ່ວຍຜູ້ທີ່ສະໜັບສະໜູນລັດຖະບານເມຊີດ້ວຍຄວາມພັກດີ. (ອ່ານຄຳປາກົດ 12:16) ຕົວຢ່າງເຊັ່ນ: ສານທີ່ມີອຳນາດຫຼາຍແຫ່ງໄດ້ຄຸ້ມຄອງສິດຂອງພະຍານພະເຢໂຫວາທີ່ປະຕິເສດການເປັນທະຫານຫຼືການເຂົ້າຮ່ວມພິທີສະແດງຄວາມຮັກຊາດ. ກ່ອນອື່ນໃຫ້ເຮົາມາເບິ່ງຄະດີໃຫຍ່ໆບາງຄະດີທີ່ກ່ຽວຂ້ອງກັບການເປັນທະຫານເຊິ່ງພະເຢໂຫວາໄດ້ຊ່ວຍປະຊາຊົນຂອງພະອົງໃຫ້ເປັນຝ່າຍຊະນະ.—ເພງ. 68:20
11, 12. ພີ່ນ້ອງຊິເຄເຣລາແລະພີ່ນ້ອງຕຣີເມນອດຕ້ອງຂຶ້ນສານຍ້ອນສາເຫດຫຍັງ? ແລະຜົນເປັນແນວໃດ?
11 ສະຫະລັດ. ແອນໂທນີ ຊິເຄເຣລາເກີດໃນຄອບຄົວພະຍານແລະມີພີ່ນ້ອງທັງໝົດ 6 ຄົນ. ລາວຮັບບັບເຕມາຕອນອາຍຸ 15 ປີ ເມື່ອອາຍຸ 21 ປີລາວກໍໄປລາຍງານໂຕທີ່ກອງທະຫານ ລາວຂໍຍົກເວັ້ນການເປັນທະຫານໂດຍລະບຸເຫດຜົນວ່າເປັນຜູ້ເຜີຍແຜ່ສາສະໜາ. ອີກ 2 ປີຕໍ່ມາຄືປີ 1950 ລາວຂໍຍົກເວັ້ນເຫດຜົນເກົ່າແລະລະບຸເຫດຜົນໃໝ່ວ່າປະຕິເສດການເປັນທະຫານເພາະຂັດກັບສະຕິຮູ້ສຶກຜິດຊອບ. ເຖິງແມ່ນລາຍງານຂອງສຳນັກງານສືບສວນສອບສວນກາງຂອງສະຫະລັດບໍ່ໄດ້ຄັດຄ້ານ ແຕ່ກະຊວງຍຸຕິທຳພັດປະຕິເສດຄຳຮ້ອງຂອງລາວ. ຫຼັງຈາກທີ່ສູ້ຄະດີໃນຫຼາຍສານ ສານສູງສຸດຂອງປະເທດສະຫະລັດກໍໄດ້ພິຈາລະນາຄະດີຂອງພີ່ນ້ອງຊິເຄເຣລາແລະປ່ຽນຄຳພິພາກສາຂອງສານຊັ້ນຕົ້ນ ໂດຍໃຫ້ພີ່ນ້ອງຊິເຄເຣລາພົ້ນຜິດ ຄຳຕັດສິນນີ້ຖືວ່າເປັນເຫດການທີ່ສຳຄັນສຳລັບປະຊາຊົນຄົນອື່ນໆໃນສະຫະລັດເຊິ່ງປະຕິເສດການເປັນທະຫານເພາະຂັດຕໍ່ສະຕິຮູ້ສຶກຜິດຊອບ.
12 ເກັຣກ. ໃນປີ 1983 ຢາໂຄວອດ ຕຣີເມນອດຖືກຕັດສິນວ່າມີຄວາມຜິດໃນຂໍ້ຫາຂັດຄຳສັ່ງທີ່ໃຫ້ໃສ່ຊຸດທະຫານ ລາວຈຶ່ງຖືກຂັງຄຸກ. ຫຼັງຈາກທີ່ໄດ້ຮັບການປ່ອຍຕົວ ລາວໄດ້ໄປສະໝັກວຽກເປັນພະນັກງານບັນຊີແຕ່ບໍ່ມີໃຜຮັບຍ້ອນວ່າລາວມີປະຫວັດເຄີຍເປັນອາດຊະຍາກອນ ລາວຈຶ່ງຍື່ນຄຳຮ້ອງຕໍ່ສານ ເມື່ອບໍ່ຊະນະຄະດີໃນສານຕ່າງໆຂອງປະເທດເກັຣກ ຕຣີເມນອດຈຶ່ງຍື່ນຄຳຮ້ອງຕໍ່ສານສິດທິມະນຸດແຫ່ງເອີຣົບ (ECHR). ໃນປີ 2000 ສະພາໃຫຍ່ຂອງສານສິດທິມະນຸດແຫ່ງເອີຣົບ ເຊິ່ງມີຄະນະລູກຂຸນທີ່ເປັນຜູ້ພິພາກສາທັງໝົດ 17 ຄົນໄດ້ຕັດສິນໃຫ້ລາວເປັນຝ່າຍຊະນະ ຄຳຕັດສິນນີ້ເປັນບັນທັດຖານສຳລັບການຫ້າມບໍ່ໃຫ້ເລືອກປະຕິບັດ ກ່ອນຈະມີຄຳຕັດສິນນີ້ ພີ່ນ້ອງໃນເກັຣກຫຼາຍກວ່າ 3.500 ຄົນມີປະຫວັດອາດຊະຍາກອນເພາະຕິດຄຸກເນື່ອງຈາກຮັກສາຄວາມເປັນກາງ. ຫຼັງຈາກທີ່ມີຄຳຕັດສິນໃຫ້ຕຣີເມນອດເປັນຝ່າຍຊະນະ ປະເທດເກັຣກໄດ້ມີການປັບປຸງຮ່າງກົດໝາຍໃໝ່ເພື່ອລົບລ້າງປະຫວັດອາດຊະຍາກອນຂອງພີ່ນ້ອງສຳລັບທຸກຂໍ້ກ່າວຫາ ແລະພຽງບໍ່ເທົ່າໃດປີກ່ອນໜ້ານັ້ນ ໄດ້ມີການປັບປຸງຮ່າງກົດໝາຍໃໝ່ເພື່ອໃຫ້ສິດປະຊາຊົນຊາວເກັຣກທຸກຄົນເລືອກເຮັດວຽກບໍລິການສັງຄົມແທນການເປັນທະຫານເຊິ່ງກົດໝາຍນີ້ກໍໄດ້ຮັບການຢືນຢັນອີກຄັ້ງເມື່ອປະເທດເກັຣກແກ້ໄຂລັດຖະທຳມະນູນ.
“ກ່ອນເຂົ້າຫ້ອງພິຈາລະນາຄະດີ ຂ້ອຍອະທິດຖານເຖິງພະເຢໂຫວາສຸດຫົວໃຈ ແລ້ວຂ້ອຍກໍຮູ້ສຶກວ່າພະອົງຊ່ວຍຂ້ອຍໃຫ້ມີໃຈສະຫງົບ.”—ອິວາຍໂລ ສະເຕຟານ໋ອບ (ເບິ່ງຂໍ້ 13)
13, 14. ເຈົ້າໄດ້ຮຽນຫຍັງຈາກຄະດີຂອງອິວາຍໂລ ສະເຕຟານ໋ອບແລະວາຮັນ ບາຍັດຍັນ?
13 ບຸນກາຣີ. ໃນປີ 1994 ອິວາຍໂລ ສະເຕຟານ໋ອບ ຊາຍໜຸ່ມອາຍຸ 19 ປີຖືກເກນໄປເປັນທະຫານ. ລາວປະຕິເສດການເຂົ້າຮ່ວມກັບກອງທັບແລະປະຕິເສດວຽກບໍລິການອື່ນໆທີ່ກອງທັບຄວບຄຸມເບິ່ງແຍງຢູ່. ລາວຖືກຕັດສິນໃຫ້ຕິດຄຸກ 18 ເດືອນ ແຕ່ລາວໄດ້ຍື່ນອຸທອນໂດຍອ້າງເຖິງສິດທິໃນການເຮັດຕາມສະຕິຮູ້ສຶກຜິດຊອບ. ໃນທີ່ສຸດ ຄະດີຂອງລາວກໍໄປເຖິງສານສິດທິມະນຸດແຫ່ງເອີຣົບ. ໃນປີ 2001 ກ່ອນຈະເຖິງວັນທີ່ມີການພິຈາລະນາຄະດີນີ້ ສະເຕຟານ໋ອບໄດ້ຮັບຂໍ້ສະເໜີເພື່ອເຮັດຂໍ້ຕົກລົງທີ່ເປັນປະໂຫຍດ ລັດຖະບານບຸນກາຣີບໍ່ພຽງແຕ່ຍົກເວັ້ນໂທດໃຫ້ສະເຕຟານ໋ອບ ແຕ່ລວມເຖິງປະຊາຊົນຊາວບຸນກາຣີທຸກຄົນທີ່ບໍ່ຍອມເປັນທະຫານແຕ່ເຕັມໃຈເຮັດວຽກບໍລິການສັງຄົມແທນ.c
14 ອາກເມນີ. ວາຮັນ ບາຍັດຍັນອາຍຸເຖິງເກນທີ່ຈະຕ້ອງເປັນທະຫານໃນປີ 2001 ລາວປະຕິເສດການເປັນທະຫານເພາະຂັດກັບສະຕິຮູ້ສຶກຜິດຊອບ.d ແຕ່ລາວບໍ່ຊະນະຄະດີໃນສານຕ່າງໆຂອງປະເທດອາກເມນີ ລາວຖືກຕັດສິນໃຫ້ຕິດຄຸກ 2 ປີເຄິ່ງແລະເລີ່ມຕິດຄຸກຕັ້ງແຕ່ເດືອນກັນຍາ 2002 ແຕ່ກໍຖືກປ່ອຍໂຕຫຼັງຈາກຮັບໂທດພຽງແຕ່ 10 ເດືອນເຄິ່ງ. ໃນລະຫວ່າງນັ້ນລາວໄດ້ຍື່ນອຸທອນເຖິງສານສິດທິມະນຸດແຫ່ງເອີຣົບ ແລະສານກໍຮັບພິຈາລະນາຄະດີ. ແຕ່ໃນວັນທີ 27 ຕຸລາ 2009 ສານຕັດສິນໃຫ້ລາວບໍ່ຊະນະຄະດີ. ຄຳຕັດສິນນັ້ນເບິ່ງຄືວ່າຍິ່ງເຮັດໃຫ້ພີ່ນ້ອງຄົນອື່ນໆໃນອາກເມນີທີ່ກຳລັງຈະຖືກເກນໄປເປັນທະຫານຮູ້ສຶກກັງວົນ ແຕ່ສະພາໃຫຍ່ຂອງສານສິດທິມະນຸດແຫ່ງເອີຣົບໄດ້ທົບທວນຄຳຕັດສິນນີ້ໃໝ່. ໃນວັນທີ 7 ກໍລະກົດ 2011 ສານນັ້ນກໍຕັດສິນໃຫ້ວາຮັນ ບາຍັດຍັນຊະນະຄະດີ. ນີ້ເປັນຄັ້ງທຳອິດທີ່ສານສິດທິມະນຸດແຫ່ງເອີຣົບຍອມຮັບວ່າການປະຕິເສດການເປັນທະຫານເພາະຂັດຕໍ່ສະຕິຮູ້ສຶກຜິດຊອບທີ່ໄດ້ຮັບການຝຶກຕາມຄວາມເຊື່ອທາງສາສະໜາ ຄວນໄດ້ຮັບການຄຸ້ມຄອງພາຍໃຕ້ສິດເສລີພາບທາງຄວາມຄິດ ເສລີພາບທີ່ຈະເຮັດຕາມສະຕິຮູ້ສຶກຜິດຊອບ ແລະເສລີພາບທາງສາສະໜາ. ຄຳຕັດສິນນັ້ນບໍ່ພຽງແຕ່ປົກປ້ອງສິດທິຂອງພະຍານພະເຢໂຫວາ ແຕ່ຂອງປະຊາຊົນຫຼາຍຮ້ອຍລ້ານຄົນໃນປະເທດຕ່າງໆທີ່ເປັນສະມາຊິກສະພາເອີຣົບນຳອີກ.e
ສານສິດທິມະນຸດແຫ່ງເອີຣົບຕັດສິນປ່ອຍຕົວພີ່ນ້ອງຊາຍໃນປະເທດອາກເມນີອອກຈາກຄຸກ
ເລື່ອງພິທີສະແດງຄວາມຮັກຊາດ
15. ເປັນຫຍັງປະຊາຊົນຂອງພະເຢໂຫວາຈຶ່ງປະຕິເສດທີ່ຈະບໍ່ເຂົ້າຮ່ວມພິທີສະແດງຄວາມຮັກຊາດ?
15 ປະຊາຊົນຂອງພະເຢໂຫວາທີ່ພັກດີຕໍ່ລັດຖະບານເມຊີ ບໍ່ພຽງແຕ່ປະຕິເສດການເປັນທະຫານເທົ່ານັ້ນ ແຕ່ຍັງປະຕິເສດຢ່າງສຸພາບທີ່ຈະບໍ່ຮ່ວມພິທີສະແດງຄວາມຮັກຊາດນຳອີກ. ໂດຍສະເພາະຕັ້ງແຕ່ສົງຄາມໂລກຄັ້ງທີ 2 ເລີ່ມຂຶ້ນ ກະແສຮັກຊາດກໍແຜ່ໄປທົ່ວໂລກ. ປະຊາຊົນໃນຫຼາຍປະເທດຕ້ອງສາບານວ່າຈະຈົງຮັກພັກດີຕໍ່ປະເທດຊາດບ້ານເກີດຂອງຕົນ. ເຂົາເຈົ້າຕ້ອງກ່າວຖ້ອຍຄຳປະຕິຍານ ຮ້ອງເພງຊາດ ແລະເຄົາລົບທຸງຊາດ ແຕ່ເຮົາໄດ້ອຸທິດຊີວິດເພື່ອພະເຢໂຫວາພຽງຜູ້ດຽວເທົ່ານັ້ນ. (ອົບ. 20:4, 5) ຜົນກໍຄື ເຮົາຖືກຂົ່ມເຫງຢ່າງໜັກ ເຖິງຈະເປັນແບບນັ້ນ ພະເຢໂຫວາກໍໃຫ້ ‘ແຜ່ນດິນ’ ແຍກອອກແລ້ວກືນແມ່ນ້ຳແຫ່ງການຂົ່ມເຫງລົງໄປ. ຂໍໃຫ້ເຮົາສັງເກດຄະດີທີ່ໜ້າງຶດງໍ້ບາງຄະດີທີ່ພະເຢໂຫວາຊ່ວຍເຮົາໃຫ້ໄດ້ຮັບໄຊຊະນະໂດຍທາງພະຄລິດ.—ເພງ. 3:8
16, 17. ລິລຽນແລະວິນລຽມ ໂກໄບທັດຕ້ອງຕໍ່ສູ້ຄະດີເລື່ອງຫຍັງ ແລະເຈົ້າໄດ້ຮຽນຮູ້ຫຍັງຈາກເລື່ອງນີ້?
16 ສະຫະລັດ. ໃນປີ 1940 ສານສູງສຸດຂອງປະເທດສະຫະລັດໄດ້ລົງມະຕິດ້ວຍຄະແນນສຽງ 8 ຕໍ່ 1 ໃຫ້ພະຍານພະເຢໂຫວາບໍ່ຊະນະຄະດີລະຫວ່າງໂຮງຮຽນປະຖົມກັບໂກໄບທິດ. ໃນຄະດີນີ້ລິລຽນ ໂກໄບທັດf ອາຍຸ 12 ປີກັບວິນລຽມນ້ອງຊາຍຂອງລາວອາຍຸ 10 ປີບໍ່ຍອມເຄົາລົບທຸງຊາດແລະກ່າວຄຳປະຕິຍານເພາະເຂົາເຈົ້າຕ້ອງການພັກດີຕໍ່ພະເຢໂຫວາ ຜົນກໍຄືເຂົາເຈົ້າຖືກໄລ່ອອກຈາກໂຮງຮຽນ. ມີການຕໍ່ສູ້ຄະດີໄປຈົນຮອດສານສູງສຸດແລະສານກໍຕັດສິນວ່າໂຮງຮຽນໄດ້ເຮັດສິ່ງທີ່ຖືກຕ້ອງຕາມລັດຖະທຳມະນູນເພາະເປັນການຮັກສາ “ຄວາມສາມັກຄີຂອງຄົນພາຍໃນຊາດ.” ຄຳຕັດສິນນັ້ນເປັນຈຸດເລີ່ມຕົ້ນຂອງໄຟແຫ່ງການຂົ່ມເຫງ. ນອກຈາກນັ້ນ ເດັກນ້ອຍທີ່ເປັນພະຍານອີກຫຼາຍຄົນກໍຖືກໄລ່ອອກຈາກໂຮງຮຽນ ພະຍານບາງຄົນຖືກໄລ່ອອກຈາກວຽກແລະຫຼາຍຄົນຖືກລຸມຕີ. ປຶ້ມເຫຼັ້ມໜຶ່ງຊື່ (The Lustre of Our Country) ບອກວ່າ: “ການຂົ່ມເຫງພວກພະຍານພະເຢໂຫວາຕັ້ງແຕ່ປີ 1941-1943 ເປັນການກົດຂີ່ທາງສາສະໜາທີ່ເລີ່ມຂຶ້ນຢ່າງໄວວາແລະຮຸນແຮງທີ່ສຸດຂອງປະເທດອາເມຣິກາໃນສະຕະວັດທີ 20.”
17 ແຕ່ສັດຕູຂອງພະເຈົ້າກໍດີໃຈກັບໄຊຊະນະນີ້ໄດ້ບໍ່ດົນ. ໃນປີ 1943 ສານສູງສຸດໄດ້ພິຈາລະນາອີກຄະດີໜຶ່ງທີ່ຄ້າຍໆກັບຄະດີໂກໄບທິດ ຄືຄະດີລະຫວ່າງຄະນະກຳມະການສຶກສາແຫ່ງລັດເວດສເວີຈີເນຍກັບບາເນດ. ຕອນນີ້ສານຕັດສິນໃຫ້ພະຍານພະເຢໂຫວາເປັນຝ່າຍຊະນະ. ນີ້ເປັນເທື່ອທຳອິດໃນປະຫວັດສາດຂອງປະເທດສະຫະລັດທີ່ສານສູງສຸດໄດ້ປ່ຽນຄຳຕັດສິນຂອງຕົນເອງໃນເວລາທີ່ສັ້ນຂະໜາດນັ້ນ. ຫຼັງຈາກທີ່ມີການປະກາດຄຳຕັດສິນນີ້ ການຂົ່ມເຫງປະຊາຊົນຂອງພະເຢໂຫວາແບບເຊິ່ງໆໜ້າໃນປະເທດສະຫະລັດກໍຫຼຸດລົງຢ່າງໄວວາ ໃນເວລາດຽວກັນກໍເຮັດໃຫ້ປະຊາຊົນທຸກຄົນໃນປະເທດສະຫະລັດໝັ້ນໃຈໃນສິດທິຂອງຕົນຫຼາຍຂຶ້ນ.
18, 19. ສິ່ງໃດທີ່ໄດ້ຊ່ວຍໃຫ້ພາໂບຣ ບາຣອດເຂັ້ມແຂງ ແລະຜູ້ຮັບໃຊ້ຄົນອື່ນໆຂອງພະເຢໂຫວາຈະຮຽນແບບລາວໄດ້ແນວໃດ?
18 ອາກຊັງຕີນ. ພາໂບຣແລະຮູໂກ ບາຣອດ ສອງອ້າຍນ້ອງອາຍຸ 8 ປີແລະ 7 ປີຖືກໄລ່ອອກຈາກໂຮງຮຽນໃນປີ 1976 ເພາະວ່າບໍ່ຍອມເຂົ້າຮ່ວມພິທີເຄົາລົບທຸງຊາດ. ມີຢູ່ມື້ໜຶ່ງ ຜູ້ອຳນວຍການໂຮງຮຽນໄດ້ຍູ້ແລະຕົບຫົວພາໂບຣ ແລະຍັງລົງໂທດເຂົາເຈົ້າໂດຍການກັກໂຕໄວ້ 1 ຊົ່ວໂມງຫຼັງຈາກເລີກໂຮງຮຽນ ແລະພະຍາຍາມບັງຄັບເຂົາເຈົ້າໃຫ້ເຄົາລົບທຸງຊາດ. ເມື່ອເວົ້າເຖິງການລົງໂທດທີ່ເກີນກວ່າເຫດຄັ້ງນັ້ນ ພາໂບຣເວົ້າວ່າ: “ຖ້າພະເຢໂຫວາບໍ່ຊ່ວຍ ຂ້ອຍກໍຄົງບໍ່ມີທາງທົນກັບແຮງກົດດັນແລະຮັກສາຄວາມພັກດີຕໍ່ພະອົງໄດ້.”
19 ເມື່ອຄະດີໄປເຖິງສານ ຜູ້ພິພາກສາສະໜັບສະໜູນການຕັດສິນໃຈຂອງໂຮງຮຽນທີ່ໄລ່ເດັກນ້ອຍອອກ. ແຕ່ມີການອຸທອນຄະດີຂອງພາໂບຣແລະຮູໂກເຖິງສານສູງສຸດຂອງອາກຊັງຕີນ. ຕໍ່ມາໃນປີ 1979 ສານໄດ້ປ່ຽນຄຳພິພາກສາຂອງສານຊັ້ນຕົ້ນ ໂດຍກ່າວວ່າ: “ການລົງໂທດແບບນີ້ [ການໄລ່ອອກຈາກໂຮງຮຽນ] ຂັດຕໍ່ສິດທິໃນການຮຽນຮູ້ຕາມລັດຖະທຳມະນູນ (ມາດຕາ 14) ແລະລັດມີໜ້າທີ່ເບິ່ງແຍງເລື່ອງການສຶກສາຂັ້ນພື້ນຖານ (ມາດຕາ 5).” ໄຊຊະນະໃນຄັ້ງນີ້ເປັນຜົນດີຕໍ່ເດັກນ້ອຍທີ່ເປັນພະຍານພະເຢໂຫວາປະມານ 1.000 ຄົນ. ເຮັດໃຫ້ບາງຄົນບໍ່ຕ້ອງຖືກໄລ່ອອກຈາກໂຮງຮຽນ ສ່ວນຄົນອື່ນໆລວມທັງພາໂບຣແລະຮູໂກກໍໄດ້ກັບເຂົ້າໄປຮຽນຢູ່ໃນໂຮງຮຽນຂອງລັດຖະບານອີກ.
ເດັກນ້ອຍທີ່ເປັນພະຍານຫຼາຍຄົນຮັກສາຄວາມສັດຊື່ເຖິງແມ່ນຖືກທົດສອບ
20, 21. ຄະດີຂອງໂຣເອນກັບເອມິລີ ເອມບຣາລິແນັກ ຊ່ວຍໃຫ້ເຈົ້າມີຄວາມເຊື່ອທີ່ເຂັ້ມແຂງຂຶ້ນແນວໃດ?
20 ຟີລິບປິນ. ໃນປີ 1990 ໂຣເອນ ເອມບຣາລິແນັກ ອາຍຸ 9 ປີກັບເອມິລີເອື້ອຍຂອງລາວອາຍຸ 10 ປີແລະນັກຮຽນຄົນອື່ນໆທີ່ເປັນພະຍານພະເຢໂຫວາອີກປະມານ 66 ຄົນຖືກໄລ່ອອກຈາກໂຮງຮຽນຍ້ອນບໍ່ເຄົາລົບທຸງຊາດ. ໂຣເອນ ລີໂອນາໂດພໍ່ຂອງເດັກນ້ອຍສອງຄົນພະຍາຍາມອະທິບາຍເຫດຜົນຕ່າງໆກັບອາຈານແຕ່ກໍບໍ່ຊ່ວຍຫຍັງເລີຍ. ເມື່ອເຫດການຮຸນແຮງຂຶ້ນເລື້ອຍໆລີໂອນາໂດຈຶ່ງຍື່ນອຸທອນຕໍ່ສານສູງສຸດທັງໆທີ່ລາວບໍ່ມີເງິນແລະບໍ່ມີທະນາຍຄົນໃດຊ່ວຍເວົ້າຄວາມໃຫ້ລາວ. ຄອບຄົວນີ້ໄດ້ອະທິດຖານແລ້ວອະທິດຖານອີກເພື່ອຂໍໃຫ້ພະເຢໂຫວາຊີ້ນຳ. ໃນລະຫວ່າງນັ້ນ ເດັກນ້ອຍກໍຖືກຂົ່ມເຫງແລະຖືກເຍາະເຍີ້ຍ. ລີໂອນາໂດຄິດວ່າລາວຄົງບໍ່ມີທາງຊະນະຄະດີແນ່ນອນເພາະລາວບໍ່ມີຄວາມຮູ້ເລື່ອງກົດໝາຍເລີຍ.
21 ແຕ່ສຸດທ້າຍກໍມີທະນາຍຄົນໜຶ່ງຊື່ເຟລິໂນ ການານໄດ້ເຂົ້າມາຊ່ວຍເຫຼືອ ລາວເຄີຍເຮັດວຽກໃຫ້ກັບບໍລິສັດທີ່ປຶກສາທາງດ້ານກົດໝາຍທີ່ມີຊື່ສຽງທີ່ສຸດແຫ່ງໜຶ່ງຂອງປະເທດ. ຕໍ່ມາລາວໄດ້ລາອອກຈາກບໍລິສັດແລະມາເປັນພະຍານພະເຢໂຫວາ ເມື່ອສານສູງສຸດພິຈາລະນາຄະດີນີ້ກໍຕັດສິນຢ່າງເປັນເອກກະສັນໃຫ້ພະຍານພະເຢໂຫວາເປັນຝ່າຍຊະນະ ແລະໃຫ້ຄຳສັ່ງທີ່ໄລ່ອອກຈາກໂຮງຮຽນເປັນໂມຄະ. ຜູ້ທີ່ພະຍາຍາມກົດດັນໃຫ້ປະຊາຊົນຂອງພະເຈົ້າປະຖິ້ມຄວາມສັດຊື່ພັກດີກໍເຮັດບໍ່ສຳເລັດອີກຄືເກົ່າ.
ຄວາມເປັນກາງເຮັດໃຫ້ເກີດເອກະພາບ
22, 23. (ກ) ເປັນຫຍັງປະຊາຊົນຂອງພະເຢໂຫວາຈຶ່ງຊະນະຄະດີທີ່ສຳຄັນໆຫຼາຍຂະໜາດນີ້? (ຂ) ສັງຄົມພີ່ນ້ອງທີ່ມີຄວາມສະຫງົບສຸກໃນທົ່ວໂລກເປັນຫຼັກຖານເຖິງເລື່ອງຫຍັງ?
22 ເປັນຫຍັງປະຊາຊົນຂອງພະເຢໂຫວາຈຶ່ງຊະນະຄະດີທີ່ສຳຄັນໆຫຼາຍຂະໜາດນີ້? ເຮົາບໍ່ແມ່ນຜູ້ມີອິດທິພົນທາງການເມືອງ ແຕ່ໃນຫຼາຍປະເທດແລະຫຼາຍສານ ຜູ້ພິພາກສາທີ່ຮັກຄວາມຍຸຕິທຳໄດ້ປົກປ້ອງເຮົາຈາກການໂຈມຕີຂອງພວກສັດຕູທີ່ພະຍາຍາມທຳຮ້າຍເຮົາ ແລະຍັງວາງແບບຢ່າງໄວ້ໃນເລື່ອງການໃຊ້ກົດໝາຍລັດຖະທຳມະນູນແລະຊ່ວຍເຫຼືອເຮົາ. (ອ່ານຄຳປາກົດ 6:2) ເປັນຫຍັງເຮົາຕ້ອງຕໍ່ສູ້ທາງກົດໝາຍ? ເຮົາບໍ່ໄດ້ຄິດທີ່ຈະປະຕິຮູບກົດໝາຍ ແຕ່ເປົ້າໝາຍຂອງເຮົາຄືເພື່ອຮັບໃຊ້ກະສັດເຍຊູຕໍ່ໆໄປໂດຍບໍ່ໃຫ້ສິ່ງໃດມາເປັນອຸປະສັກ.—ກິດ. 4:29
23 ໃນໂລກທີ່ແຕກແຍກຍ້ອນການຕໍ່ສູ້ຍາດຊີງອຳນາດທາງການເມືອງແລະອິດທິພົນຂອງຄວາມກຽດຊັງທີ່ຝັງຮາກເລິກ ກະສັດເຍຊູຄລິດໄດ້ອວຍພອນໃຫ້ຜູ້ທີ່ຕິດຕາມເພິ່ນໃນທົ່ວໂລກທີ່ຍັງຢືນຢັດຮັກສາຄວາມເປັນກາງ. ຊາຕານບໍ່ຊະນະເຮົາເພາະມັນບໍ່ສາມາດເຮັດໃຫ້ເຮົາແຕກແຍກກັນໄດ້. ລາຊະອານາຈັກຂອງພະເຈົ້າລວບລວມຫຼາຍລ້ານຄົນທີ່ບໍ່ຕ້ອງການ “ເຝິກຫັດຮຽນທຳເສິກຕໍ່ໄປ” ໃຫ້ເຂົ້າມາເປັນສັງຄົມພີ່ນ້ອງທົ່ວໂລກທີ່ມີຄວາມສຸກ ເຊິ່ງເປັນເລື່ອງທີ່ໜ້າອັດສະຈັນແທ້ໆແລະເປັນຫຼັກຖານທີ່ບໍ່ມີໃຜໂຕ້ແຍ່ງໄດ້ວ່າ ລາຊະອານາຈັກຂອງພະເຈົ້າປົກຄອງແລ້ວ!—ເອຊາ. 2:4
a ປຶ້ມຊຸດນີ້ມີອີກຊື່ໜຶ່ງຄືການສ້າງຂຶ້ນໃໝ່. ເຊິ່ງຕໍ່ມາປ່ຽນຊື່ເປັນຄູ່ມືການສຶກສາຄຳພີໄບເບິນ.
b ເບິ່ງຄຳອະທິບາຍກ່ຽວກັບຄຳພະຍາກອນເລື່ອງນີ້ໃນປຶ້ມພະທຳວິວອນ—ໃກ້ຈະເຖິງຈຸດສຸດຍອດ! ບົດ 27 ໜ້າ 184-186 (ພາສາໄທ).
c ຂໍ້ຕົກລົງນັ້ນຍັງຮຽກຮ້ອງໃຫ້ລັດຖະບານບຸນກາຣີຍອມໃຫ້ທຸກຄົນທີ່ປະຕິເສດການເປັນທະຫານເພາະຂັດຕໍ່ສະຕິຮູ້ສຶກຜິດຊອບສາມາດເລືອກເຮັດວຽກທີ່ຢູ່ພາຍໃຕ້ການເບິ່ງແຍງຂອງປະຊາຊົນແທນໄດ້.
d ອ່ານລາຍລະອຽດເພີ່ມເຕີມກ່ຽວກັບເລື່ອງນີ້ໄດ້ໃນຫໍສັງເກດການ 1 ພະຈິກ 2012 ໜ້າ 29-31 (ພາສາໄທ)
e ຕະຫຼອດ 20 ປີທີ່ຜ່ານມາລັດຖະບານອາກເມນີໄດ້ຈັບຊາຍໜຸ່ມທີ່ເປັນພະຍານຫຼາຍກວ່າ 450 ຄົນເຂົ້າຄຸກ ແລະກຸ່ມສຸດທ້າຍກໍໄດ້ຮັບການປ່ອຍຕົວໃນເດືອນພະຈິກ 2013
f ບັນທຶກຂອງສານໄດ້ມີການສະກົດນາມສະກຸນຜິດ