ຄຳຖາມທີ 7
ຖ້າຖືກກົດດັນໃຫ້ມີເຊັກຈະເຮັດແນວໃດ?
ເຈົ້າ ຈະເຮັດແນວໃດ?
ໃຫ້ນຶກພາບເຫດການນີ້: ເຮເຕີຄົບກັບໄມໄດ້ພຽງສອງເດືອນ ແຕ່ລາວຮູ້ສຶກຄືກັບວ່າຮູ້ຈັກໄມມາດົນແລ້ວ. ທັງສອງສົ່ງຂໍ້ຄວາມຫາກັນຕະຫຼອດ ໂທລົມກັນແຕ່ລະເທື່ອເປັນຊົ່ວໂມງ ແລະເຖິງຂັ້ນຮູ້ໃຈກັນວ່າອີກຝ່າຍໜຶ່ງຈະເວົ້າຫຍັງ! ແຕ່ຕອນນີ້ ໄມຕ້ອງການຫຼາຍກວ່າການລົມກັນ.
ໃນລະຫວ່າງສອງເດືອນທີ່ຜ່ານມາ ໄມກັບເຮເຕີບໍ່ໄດ້ເຮັດຫຍັງເກີນເລີຍນອກຈາກຈັບມືແລະຈູບກັນ. ເຮເຕີບໍ່ຢາກເຮັດເກີນຂອບເຂດຫຼາຍກວ່ານັ້ນ ແຕ່ອີກໃຈໜຶ່ງກໍບໍ່ຢາກເສຍໄມໄປ. ບໍ່ເຄີຍມີໃຜເຮັດໃຫ້ລາວຮູ້ສຶກດີຫຼືເປັນຄົນພິເສດແບບນີ້. ລາວບອກກັບຕົວເອງວ່າ: ‘ເຮົາສອງຄົນຮັກກັນ . . . ’
ຖ້າເຈົ້າເປັນຜູ້ໃຫຍ່ພໍທີ່ຈະມີແຟນແລະຕົກຢູ່ໃນສະຖານະການແບບເຮເຕີ ເຈົ້າຈະເຮັດແນວໃດຕໍ່ໄປ?
ຢຸດແລະຄິດ!
ການມີເຊັກເປັນຂອງຂວັນຈາກພະເຈົ້າສຳລັບຄົນທີ່ແຕ່ງດອງແລ້ວ. ຖ້າມີເຊັກກ່ອນແຕ່ງດອງກໍຖືວ່າໃຊ້ຂອງຂວັນນີ້ຢ່າງຜິດໆ ຄືກັບການເອົາເສື້ອງາມໆທີ່ຄົນໜຶ່ງໃຫ້ເຈົ້າເປັນຂອງຂວັນແລ້ວເຈົ້າເອົາໄປເຊັດຂີ້ຝຸ່ນ
ຖ້າເຈົ້າຝືນກົດທຳມະຊາດ ເຊັ່ນ: ກົດເລື່ອງແຮງດຶງດູດ ເຈົ້າກໍຈະໄດ້ຮັບຜົນເສຍຫາຍ. ຄ້າຍຄືກັນຖ້າເຈົ້າຝືນກົດສິນລະທຳ ເຊັ່ນ: ກົດຂໍ້ໜຶ່ງທີ່ບອກວ່າ: ‘ໃຫ້ເວັ້ນຈາກການຜິດສິນລະທຳທາງເພດ.’—1 ເທຊະໂລນີກ 4:3, ທ.ປ.
ຈະເປັນແນວໃດຖ້າບໍ່ເຊື່ອຟັງກົດຂໍ້ນີ້? ຄຳພີໄບເບິນບອກວ່າ: ‘ຄົນທີ່ເຮັດຜິດສິນລະທຳທາງເພດກໍເຮັດບາບຕໍ່ຮ່າງກາຍຂອງຕົວເອງ.’ (1 ໂກລິນໂທ 6:18, ລ.ມ.) ຂໍ້ນີ້ເປັນຈິງແນວໃດ?
ນັກຄົ້ນຄວ້າພົບວ່າໄວໜຸ່ມຫຼາຍຄົນທີ່ມີເຊັກກ່ອນແຕ່ງດອງຈະປະສົບກັບບັນຫາທີ່ຕາມມາເຊັ່ນ:
ບໍ່ມີຄວາມສຸກ. ໄວໜຸ່ມສ່ວນຫຼາຍທີ່ມີເຊັກກ່ອນແຕ່ງດອງບອກວ່າ ເຂົາເຈົ້າຮູ້ສຶກເສຍໃຈໃນພາຍຫຼັງ.
ບໍ່ໄວ້ໃຈກັນ. ຫຼັງຈາກທີ່ມີເຊັກກັນແລ້ວ ແຕ່ລະຝ່າຍຈະເລີ່ມສົງໄສວ່າ ‘ລາວເຄີຍນອນກັບໃຜມາແດ່ແລ້ວ?’
ບໍ່ເປັນຄືຝັນໄວ້. ເລິກໆແລ້ວ ຜູ້ຍິງສ່ວນຫຼາຍຢາກມີຜູ້ໃດຜູ້ໜຶ່ງປົກປ້ອງເຂົາເຈົ້າ ບໍ່ແມ່ນສວຍປະໂຫຍດຈາກເຂົາເຈົ້າ. ເມື່ອໄດ້ເສຍກັນແລ້ວ ຜູ້ຊາຍສ່ວນຫຼາຍຈະສົນໃຈຜູ້ຍິງຄົນນັ້ນໜ້ອຍລົງ.
ສະຫຼຸບ: ຖ້າເຈົ້າຍອມມີເຊັກກ່ອນແຕ່ງດອງ ເຈົ້າກໍລົດຄຸນຄ່າຂອງຕົວເອງລົງ. (ໂລມ 1:24) ຮ່າງກາຍຂອງເຈົ້າມີຄ່າເກີນກວ່າທີ່ຈະເຮັດແບບນັ້ນ!
ຈົ່ງສະແດງໃຫ້ເຫັນວ່າເຈົ້າເຂັ້ມແຂງພໍທີ່ຈະ ‘ເວັ້ນຈາກການຜິດສິນລະທຳທາງເພດ.’ (1 ເທຊະໂລນີກ 4:3, ທ.ປ.) ຖ້າໃນມື້ໜຶ່ງເຈົ້າໄດ້ແຕ່ງດອງ ເຈົ້າກໍມີເຊັກໄດ້. ເຈົ້າຈະມີຄວາມສຸກໄດ້ຢ່າງເຕັມທີ ໂດຍບໍ່ຕ້ອງຮູ້ສຶກກັງວົນ ເສຍໃຈ ແລະບໍ່ໝັ້ນຄົງເຊິ່ງມັກເກີດຂຶ້ນກັບຄົນທີ່ມີເຊັກກ່ອນແຕ່ງດອງ.—ສຸພາສິດ 7:22, 23; 1 ໂກລິນໂທ 7:3
ເຈົ້າຄິດແນວໃດ?
ຄົນທີ່ຮັກເຈົ້າແທ້ໆຈະເຮັດສິ່ງທີ່ເປັນອັນຕະລາຍຕໍ່ຮ່າງກາຍແລະອາລົມຂອງເຈົ້າບໍ?
ຄົນທີ່ຫ່ວງໃຍເຈົ້າແທ້ໆຈະຊວນເຈົ້າໃຫ້ເຮັດສິ່ງທີ່ເສຍຫາຍຕໍ່ສາຍສຳພັນກັບພະເຈົ້າບໍ?—ເຫບເລີ 13:4