ບົດທີ 9
ໃນທີ່ສຸດກໍມີລູກຊາຍ!
ອັບຣາຮາມກັບຊາຣາແຕ່ງດອງກັນມາຫຼາຍປີແລ້ວ. ເຂົາເຈົ້າຖິ້ມບ້ານທີ່ສະດວກສະບາຍໃນເມືອງອູເຣມາອາໄສຢູ່ໃນເຕັ້ນ. ແຕ່ຊາຣາກໍບໍ່ເຄີຍຈົ່ມ ຍ້ອນລາວໄວ້ໃຈພະເຢໂຫວາ.
ຊາຣາຢາກມີລູກແທ້ໆ ລາວຈຶ່ງບອກອັບຣາຮາມວ່າ: ‘ຖ້າຮາກາຄົນຮັບໃຊ້ຂອງນ້ອງມີລູກ ລູກທີ່ເກີດມາກໍຈະເປັນຄືກັບລູກຂອງນ້ອງ.’ ຕໍ່ມາ ຮາກາກໍເກີດລູກຊາຍແລ້ວຕັ້ງຊື່ວ່າ ອິດຊະມາເອນ.
ຫຼາຍປີຕໍ່ມາ ເມື່ອອັບຣາຮາມໄດ້ 99 ປີ ແລະຊາຣາໄດ້ 89 ປີ ມີຜູ້ຊາຍສາມຄົນມາຢາມເຂົາເຈົ້າ. ອັບຣາຮາມເຊີນຜູ້ຊາຍທັງສາມຄົນມານັ່ງພັກຜ່ອນຢູ່ກ້ອງຕົ້ນໄມ້ແລະລ້ຽງເຂົ້າເຂົາເຈົ້ານຳ. ເຈົ້າຮູ້ບໍວ່າຜູ້ຊາຍສາມຄົນນີ້ແມ່ນໃຜ? ເຂົາເຈົ້າແມ່ນທູດສະຫວັນ! ທູດສະຫວັນບອກອັບຣາຮາມວ່າ: ‘ໃນຍາມນີ້ຂອງປີໜ້າ ເຈົ້າກັບເມຍຈະໄດ້ລູກຊາຍ.’ ຊາຣາຟັງເຂົາເຈົ້າລົມກັນຢູ່ໃນເຕັ້ນ ລາວໄດ້ຍິນທີ່ເຂົາເຈົ້າລົມກັນ ລາວກໍເລີຍຫົວຂວັນໂຕເອງແລະເວົ້າວ່າ: ‘ຂ້ອຍເຖົ້າປານນີ້ແລ້ວ ຊິມີລູກໄດ້ຢູ່ບໍ?’
ໜຶ່ງປີຕໍ່ມາ ຊາຣາກໍເກີດລູກຊາຍຄືກັບທີ່ທູດສະຫວັນຂອງພະເຢໂຫວາໄດ້ສັນຍາໄວ້. ອັບຣາຮາມຕັ້ງຊື່ລູກວ່າອີຊາກ ເຊິ່ງແປວ່າ “ຫົວຂວັນ.”
ເມື່ອອີຊາກອາຍຸປະມານ 5 ປີ ຊາຣາເຫັນອິດຊະມາເອນເຍາະເຍີ້ຍອີຊາກ. ຊາຣາຢາກປົກປ້ອງລູກຊາຍຂອງໂຕເອງ ລາວຈຶ່ງຂໍອັບຣາຮາມໃຫ້ໄລ່ຮາກາກັບອິດຊະມາເອນໄປຢູ່ບ່ອນອື່ນ. ຕອນທຳອິດອັບຣາຮາມບໍ່ພໍໃຈຫຼາຍ. ແຕ່ພະເຢໂຫວາກໍຢາກປົກປ້ອງອີຊາກຄືກັນ ເພິ່ນຈຶ່ງບອກອັບຣາຮາມວ່າ: ‘ໃຫ້ຟັງຊາຣາ. ເຮົາຈະເບິ່ງແຍງອິດຊະມາເອນເອງ. ແຕ່ຄຳສັນຍາຂອງເຮົາຈະເປັນຈິງທາງອີຊາກ.’
“ຍ້ອນຄວາມເຊື່ອ ຊາຣາສາມາດຖືພາໄດ້ເຖິງວ່າຕອນນັ້ນລາວເຖົ້າກາຍຍາມທີ່ຈະມີລູກແລ້ວ. ລາວເຊື່ອວ່າຜູ້ທີ່ສັນຍາຈະເຮັດຕາມທີ່ເພິ່ນເວົ້າ.”—ເຮັບເຣີ 11:11