ບົດທີ 18
ຟຸ່ມໄມ້ທີ່ມີໄຟລຸກ
ໂມເຊອາໄສຢູ່ໃນແຜ່ນດິນມີດີອານ 40 ປີ ລາວໄດ້ແຕ່ງດອງແລະມີລູກຢູ່ຫັ້ນ. ມີມື້ໜຶ່ງຕອນທີ່ລາວລ້ຽງແກະຢູ່ໃກ້ໆພູຊີນາຍ ລາວກໍເຫັນບາງຢ່າງທີ່ເປັນຕາງຶດ. ລາວເຫັນຟຸ່ມໄມ້ທີ່ມີໄຟລຸກຢູ່ ແຕ່ມັນບໍ່ໄໝ້. ເມື່ອໂມເຊຍ່າງເຂົ້າໄປໃກ້ໆເພື່ອເບິ່ງວ່າເປັນຫຍັງມັນຈຶ່ງບໍ່ໄໝ້ ລາວກໍໄດ້ຍິນສຽງຈາກຟຸ່ມໄມ້ນັ້ນວ່າ: ‘ໂມເຊ! ຢ່າເຂົ້າມາໃກ້ຫຼາຍກວ່ານີ້. ປົດເກີບເຈົ້າອອກ ເພາະບ່ອນທີ່ເຈົ້າຢືນຢູ່ນີ້ເປັນບ່ອນບໍລິສຸດ.’ ນີ້ແມ່ນສຽງຂອງພະເຢໂຫວາທີ່ກຳລັງເວົ້າກັບໂມເຊຜ່ານທາງທູດສະຫວັນອົງໜຶ່ງ.
ໂມເຊຮູ້ສຶກຢ້ານ ລາວຈຶ່ງປິດໜ້າໂຕເອງໄວ້. ແລ້ວສຽງນັ້ນກໍເວົ້າຕໍ່ວ່າ: ‘ເຮົາເຫັນແລ້ວວ່າພວກອິດສະຣາເອນທຸກລຳບາກສ່ຳໃດ. ເຮົາຈະຊ່ວຍເຂົາເຈົ້າຈາກການເປັນທາດຂອງພວກເອຢິບ ແລະຈະພາເຂົາເຈົ້າໄປແຜ່ນດິນທີ່ອຸດົມສົມບູນ. ເຈົ້າຈະເປັນຜູ້ພາຄົນຂອງເຮົາອອກມາຈາກເອຢິບ.’ ໂມເຊຕ້ອງແປກໃຈຫຼາຍແທ້ໆທີ່ໄດ້ຍິນແບບນັ້ນ.
ໂມເຊຖາມວ່າ: ‘ຖ້າເຂົາເຈົ້າຖາມວ່າໃຜສົ່ງລູກມາ ລູກຊິຕອບເຂົາເຈົ້າແນວໃດ?’ ພະເຈົ້າຕອບວ່າ: ‘ໃຫ້ບອກເຂົາເຈົ້າວ່າພະເຢໂຫວາພະເຈົ້າຂອງອັບຣາຮາມ ພະເຈົ້າຂອງອີຊາກ ແລະພະເຈົ້າຂອງຢາໂຄບໄດ້ສົ່ງເຈົ້າມາ.’ ໂມເຊຖາມອີກວ່າ: ‘ແຕ່ລູກຊິເຮັດແນວໃດຖ້າເຂົາເຈົ້າບໍ່ເຊື່ອ?’ ພະເຢໂຫວາຈຶ່ງເຮັດໃຫ້ໂມເຊໝັ້ນໃຈວ່າເພິ່ນຈະຊ່ວຍລາວ. ເພິ່ນບອກໂມເຊໃຫ້ຖິ້ມໄມ້ຄ້ອນເທົ້າລົງດິນ ແລ້ວໄມ້ຄ້ອນເທົ້າກໍກາຍເປັນງູ. ເມື່ອໂມເຊດຶງຫາງງູຂຶ້ນມາ ມັນກໍກາຍເປັນໄມ້ຄ້ອນເທົ້າຄືເກົ່າ. ພະເຢໂຫວາບອກວ່າ: ‘ຖ້າເຈົ້າເຮັດແບບນີ້ ເຂົາເຈົ້າກໍຈະເຊື່ອວ່າເຮົາສົ່ງເຈົ້າມາ.’
ໂມເຊບອກວ່າ: ‘ລູກເປັນຄົນເວົ້າບໍ່ເກັ່ງ.’ ພະເຢໂຫວາຈຶ່ງສັນຍາກັບລາວວ່າ: ‘ເຮົາຈະບອກເຈົ້າວ່າຕ້ອງເວົ້າຫຍັງແດ່ ແລະເຮົາຈະໃຫ້ອາໂຣນອ້າຍຂອງເຈົ້າມາຊ່ວຍເຈົ້າ.’ ເມື່ອໂມເຊໝັ້ນໃຈແລ້ວວ່າພະເຢໂຫວາຢູ່ກັບລາວ ລາວກໍພາເມຍແລະລູກກັບໄປເອຢິບ.
“ບໍ່ຕ້ອງອຸກໃຈວ່າຈະເວົ້າຫຍັງຫຼືຈະເວົ້າແນວໃດ ເພາະຕອນນັ້ນພວກເຈົ້າຈະຮູ້ວ່າຕ້ອງເວົ້າຫຍັງ.”—ມັດທາຍ 10:19