ບົດທີ 24
ເຂົາເຈົ້າບໍ່ເຮັດຕາມທີ່ສັນຍາໄວ້
ພະເຢໂຫວາບອກໂມເຊວ່າ: ‘ໃຫ້ເຈົ້າຂຶ້ນມາຫາເຮົາຢູ່ເທິງພູ ເຮົາຊິຂຽນກົດໝາຍໃສ່ແຜ່ນຫີນໃຫ້ເຈົ້າ.’ ໂມເຊກໍຂຶ້ນໄປເທິງພູແລະຢູ່ຫັ້ນ 40 ມື້ 40 ຄືນ. ຕອນທີ່ລາວຢູ່ຫັ້ນ ພະເຢໂຫວາກໍໄດ້ຂຽນກົດໝາຍ 10 ຂໍ້ໃສ່ແຜ່ນຫີນ 2 ແຜ່ນໃຫ້ໂມເຊ.
ຜ່ານໄປໄລຍະໜຶ່ງ ພວກອິດສະຣາເອນກໍຄິດວ່າໂມເຊຖິ້ມເຂົາເຈົ້າແລ້ວ ເຂົາເຈົ້າຈຶ່ງບອກອາໂຣນວ່າ: ‘ພວກເຮົາຢາກມີຜູ້ຊີ້ນຳ! ສ້າງພະເຈົ້າໃຫ້ພວກເຮົາແດ່!’ ອາໂຣນຈຶ່ງບອກເຂົາເຈົ້າວ່າ: ‘ເອົາຄຳຂອງພວກເຈົ້າມາໃຫ້ຂ້ອຍ.’ ແລ້ວລາວກໍເອົາຄຳໄປຫຼໍ່ເຮັດຮູບງົວນ້ອຍ. ປະຊາຊົນພາກັນເວົ້າວ່າ: ‘ນີ້ແມ່ນພະເຈົ້າຂອງພວກເຮົາ ຜູ້ທີ່ພາພວກເຮົາອອກມາຈາກເອຢິບ!’ ເຂົາເຈົ້າເລີ່ມນະມັດສະການຮູບງົວນ້ອຍຄຳແລະຈັດງານລ້ຽງສະຫຼອງ. ເຂົາເຈົ້າເຮັດແບບນີ້ຜິດບໍ? ຜິດແທ້. ເພາະເຂົາເຈົ້າສັນຍາກັບພະເຢໂຫວາແລ້ວວ່າຈະນະມັດສະການເພິ່ນຜູ້ດຽວເທົ່ານັ້ນ ແຕ່ເຂົາເຈົ້າພັດບໍ່ເຮັດຕາມທີ່ສັນຍາໄວ້.
ພະເຢໂຫວາເຫັນສິ່ງທີ່ເກີດຂຶ້ນ ເພິ່ນຈຶ່ງບອກໂມເຊວ່າ: ‘ໃຫ້ເຈົ້າລົງໄປຫາປະຊາຊົນ. ຕອນນີ້ເຂົາເຈົ້າບໍ່ເຊື່ອຟັງເຮົາແລະກຳລັງນະມັດສະການພະເຈົ້າປອມຢູ່.’ ແລ້ວໂມເຊກໍລົງຈາກພູແລະເອົາແຜ່ນຫີນ 2 ແຜ່ນລົງໄປນຳ.
ເມື່ອໂມເຊລົງມາໃກ້ຊິຮອດຄ້າຍພັກ ລາວກໍໄດ້ຍິນສຽງປະຊາຊົນຮ້ອງເພງ. ເມື່ອມາຮອດ ລາວກໍເຫັນເຂົາເຈົ້າກຳລັງຟ້ອນເຕັ້ນແລະກົ້ມກາບຮູບງົວນ້ອຍຄຳ. ໂມເຊໃຈຮ້າຍແຮງ ລາວຈຶ່ງດຶກແຜ່ນຫີນ 2 ແຜ່ນລົງພື້ນຈົນແຕກຊະເປັນປ່ຽງນ້ອຍໆ. ລາວທຳລາຍຮູບງົວນ້ອຍນັ້ນທັນທີ ແລ້ວກໍຖາມອາໂຣນວ່າ: ‘ຄົນພວກນີ້ເຮັດຫຍັງໃຫ້ເຈົ້າ ເຈົ້າຈຶ່ງເຮັດຜິດຮ້າຍແຮງໄດ້ປານນີ້?’ ອາໂຣນຕອບວ່າ: ‘ບໍ່ຕ້ອງໃຈຮ້າຍ ເຈົ້າກໍຮູ້ຢູ່ວ່າຄົນພວກນີ້ເປັນແນວໃດ. ເຂົາເຈົ້າຢາກໄດ້ພະເຈົ້າ ຂ້ອຍກໍເລີຍເອົາຄຳໂຍນລົງໃສ່ໄຟ ແລ້ວມັນກໍເປັນຮູບງົວນ້ອຍຄືກັບທີ່ເຈົ້າເຫັນນີ້ແຫຼະ!’ ອາໂຣນບໍ່ຄວນເຮັດແບບນັ້ນ. ແລ້ວໂມເຊກໍກັບຂຶ້ນໄປເທິງພູເພື່ອອ້ອນວອນພະເຢໂຫວາຍົກໂທດໃຫ້ປະຊາຊົນ.
ພະເຢໂຫວາຍົກໂທດໃຫ້ຜູ້ທີ່ເຕັມໃຈເຊື່ອຟັງເພິ່ນ. ເຈົ້າເຫັນບໍວ່າເປັນເລື່ອງສຳຄັນຫຼາຍສ່ຳໃດທີ່ພວກອິດສະຣາເອນຈະຕິດຕາມໂມເຊຜູ້ນຳຂອງເຂົາເຈົ້າ?
“ຖ້າເຈົ້າສັນຍາຫຍັງກັບພະເຈົ້າກໍໃຫ້ເຈົ້າຟ້າວເຮັດຕາມ ຍ້ອນເພິ່ນບໍ່ພໍໃຈຄົນໂງ່ທີ່ບໍ່ເຮັດຕາມສັນຍາ. ເຈົ້າສັນຍາຫຍັງໄວ້ກໍໃຫ້ເຮັດຕາມນັ້ນ.”—ປັນຍາຈານ 5:4