ບົດທີ 54
ພະເຢໂຫວາອົດທົນກັບໂຢນາ
ຄົນຢູ່ເມືອງນີເນເວໃນປະເທດອັດຊີເຣຍເປັນຄົນຊົ່ວຫຼາຍ. ພະເຢໂຫວາຈຶ່ງບອກຜູ້ພະຍາກອນໂຢນາໄປເຕືອນເຂົາເຈົ້າໃຫ້ເຊົາເຮັດຊົ່ວ ແຕ່ໂຢນາພັດໜີຂຶ້ນເຮືອໄປເມືອງຕາຊິດທີ່ຢູ່ຄົນລະທິດກັບເມືອງນີເນເວ.
ຕອນທີ່ເຮືອແລ່ນຢູ່ກາງທະເລ ຢູ່ບໍ່ຢູ່ກໍເກີດມີພາຍຸພັດບັກແຮງໆ. ພວກລູກເຮືອພາກັນຢ້ານແທ້ຢ້ານວ່າ ເຂົາເຈົ້າຈຶ່ງອະທິດຖານຫາພະເຈົ້າຂອງໂຕເອງແລະພາກັນເວົ້າວ່າ: ‘ເປັນຫຍັງຈຶ່ງເກີດເລື່ອງແບບນີ້?’ ໃນທີ່ສຸດ ໂຢນາກໍບອກເຂົາເຈົ້າວ່າ: ‘ເປັນຄວາມຜິດຂອງຂ້ອຍເອງ ຍ້ອນຂ້ອຍໜີວຽກທີ່ພະເຢໂຫວາບອກໃຫ້ເຮັດ. ໃຫ້ໂຍນຂ້ອຍລົງທະເລ ແລ້ວພາຍຸຈະສະຫງົບ.’ ພວກລູກເຮືອບໍ່ຢາກເຮັດແບບນັ້ນ ແຕ່ໂຢນາກໍຍັງຢືນຢັນຄຳເກົ່າ. ເມື່ອເຂົາເຈົ້າໂຍນໂຢນາລົງທະເລ ພາຍຸກໍສະຫງົບອີ່ຫຼີ.
ໂຢນາຄິດວ່າລາວກຳລັງຈະຕາຍແລ້ວ. ຕອນທີ່ລາວຄ່ອຍໆຈົມລົງໃນທະເລ ລາວໄດ້ອະທິດຖານຫາພະເຢໂຫວາ. ແລ້ວພະເຢໂຫວາກໍສົ່ງປາໂຕບັກໃຫຍ່ໆມາກືນໂຢນາ ແຕ່ໂຢນາບໍ່ຕາຍ. ຕອນທີ່ຢູ່ໃນທ້ອງປາ ລາວອະທິດຖານວ່າ: ‘ລູກສັນຍາວ່າລູກຈະເຊື່ອຟັງພະອົງສະເໝີ.’ ພະເຢໂຫວາປົກປ້ອງໂຢນາໃຫ້ຢູ່ໃນທ້ອງປາຢ່າງປອດໄພ 3 ມື້ ແລ້ວເພິ່ນກໍໃຫ້ປາໃຫຍ່ໂຕນັ້ນຄາຍລາວອອກມາໄວ້ແຄມຝັ່ງ.
ການທີ່ພະເຢໂຫວາຊ່ວຍຊີວິດໂຢນາ ນີ້ໝາຍຄວາມວ່າລາວຈະບໍ່ຕ້ອງໄປເມືອງນີເນເວບໍ? ບໍ່ແມ່ນແນວນັ້ນ. ພະເຢໂຫວາບອກໂຢນາໃຫ້ໄປເມືອງນັ້ນອີກ. ແຕ່ເທື່ອນີ້ໂຢນາເຮັດຕາມທີ່ພະເຢໂຫວາບອກ. ລາວໄປເມືອງນີເນເວແລະປະກາດກັບຄົນຊົ່ວເຫຼົ່ານັ້ນວ່າ: “ຍັງແຕ່ 40 ມື້ ເມືອງນີເນເວຈະຖືກທຳລາຍ.” ແລ້ວສິ່ງທີ່ບໍ່ຄາດຄິດກໍເກີດຂຶ້ນ. ຄົນໃນເມືອງນີເນເວຟັງລາວແລະປ່ຽນແປງໂຕເອງ. ກະສັດຂອງເມືອງນີເນເວສັ່ງປະຊາຊົນວ່າ: ‘ໃຫ້ຮ້ອງຫາພະເຈົ້າແລະເຊົາເຮັດຊົ່ວ. ບາງເທື່ອພະເຈົ້າທ່ຽງແທ້ອາດປ່ຽນໃຈບໍ່ທຳລາຍພວກເຮົາ.’ ເມື່ອພະເຢໂຫວາເຫັນວ່າເຂົາເຈົ້າເຊົາເຮັດຊົ່ວ ເພິ່ນຈຶ່ງບໍ່ທຳລາຍເມືອງນີ້.
ໂຢນາໃຈຮ້າຍຫຼາຍທີ່ເມືອງນີ້ບໍ່ຖືກທຳລາຍ. ລອງຄິດເບິ່ງ ລາວບໍ່ໄດ້ເມດຕາຄົນໃນເມືອງນີເນເວເລີຍ ທັງໆທີ່ພະເຢໂຫວາເມດຕາລາວແລະອົດທົນກັບລາວ. ໂຢນາອອກໄປນອກເມືອງແລະນັ່ງໜ້າບູດຢູ່ກ້ອງຮົ່ມຕົ້ນໝາກນ້ຳເຕົ້າ. ເມື່ອຕົ້ນໝາກນ້ຳເຕົ້າຕາຍ ລາວກໍໃຈຮ້າຍເອົາແທ້ເອົາວ່າ. ພະເຢໂຫວາຈຶ່ງເວົ້າກັບລາວວ່າ: ‘ເຈົ້າຄືເສຍດາຍຕົ້ນໝາກນ້ຳເຕົ້າຫຼາຍກວ່າເສຍດາຍຄົນໃນເມືອງນີເນເວ ທັງໆທີ່ເຮົາໄດ້ເມດຕາເຂົາເຈົ້າແລະບໍ່ທຳລາຍເຂົາເຈົ້າ.’ ພະເຢໂຫວາຢາກສອນໂຢນາວ່າຊີວິດຄົນໃນເມືອງນີເນເວສຳຄັນກວ່າຕົ້ນໄມ້.
“ພະເຢໂຫວາ . . . ອົດທົນກັບພວກເຈົ້າຍ້ອນບໍ່ຢາກໃຫ້ຜູ້ໃດຕ້ອງຖືກທຳລາຍ ແຕ່ຢາກໃຫ້ທຸກຄົນກັບໃຈ.”—2 ເປໂຕ 3:9