ບົດທີ 92
ພະເຢຊູມາໃຫ້ພວກລູກສິດເຫັນອີກເທື່ອໜຶ່ງ
ບໍ່ດົນຫຼັງຈາກພະເຢຊູມາໃຫ້ພວກອັກຄະສາວົກເຫັນ ເປໂຕກໍຕັດສິນໃຈໄປຫາປາຢູ່ທະເລຄາລີເລ. ໂທມາ ຢາໂກໂບ ໂຢຮັນ ແລະອັກຄະສາວົກບາງຄົນກໍໄປນຳລາວ. ເຂົາເຈົ້າຫາປາໝົດຄືນ ແຕ່ກໍບໍ່ໄດ້ປາຈັກໂຕ.
ຕອນເຊົ້າໆ ເຂົາເຈົ້າເຫັນຜູ້ຊາຍຄົນໜຶ່ງຢືນຢູ່ແຄມຝັ່ງ ລາວເອີ້ນຖາມເຂົາເຈົ້າວ່າ: ‘ຫາປາໄດ້ບໍ?’ ເຂົາເຈົ້າຕອບລາວວ່າ: ‘ບໍ່ໄດ້ຈັກໂຕ!’ ຜູ້ຊາຍຄົນນັ້ນຈຶ່ງບອກວ່າ: “ຢ່ອນດາງລົງເບື້ອງຂວາເຮືອແມ້.” ເມື່ອເຂົາເຈົ້າຢ່ອນດາງລົງກໍໄດ້ປາບັກຫຼາຍໆຈົນດຶງຂຶ້ນເຮືອບໍ່ໄດ້. ແລ້ວໂຢຮັນກໍຮູ້ທັນທີວ່າຜູ້ຊາຍຄົນນັ້ນແມ່ນພະເຢຊູ ລາວເວົ້າວ່າ: “ນາຍຂອງເຮົາຕົ໋ວຫັ້ນ!” ເປໂຕໂດດລົງນ້ຳແລະລອຍໄປແຄມຝັ່ງທັນທີ ແລ້ວລູກສິດຄົນອື່ນໆກໍພາຍເຮືອນຳຫຼັງລາວໄປ.
ເມື່ອເຂົາເຈົ້າຂຶ້ນມາຮອດຝັ່ງແລ້ວ ເຂົາເຈົ້າກໍເຫັນເຂົ້າຈີ່ແລະປາປີ້ງຢູ່ກອງຖ່ານໄຟ. ພະເຢຊູບອກເຂົາເຈົ້າໃຫ້ເອົາປາທີ່ເຂົາເຈົ້າຫາໄດ້ມາປີ້ງຕື່ມນຳ ແລ້ວເພິ່ນກໍບອກເຂົາເຈົ້າວ່າ: “ມາກິນເຂົ້າເຊົ້າແມ້.”
ຫຼັງຈາກເຂົາເຈົ້າກິນເຂົ້າເຊົ້າແລ້ວໆ ພະເຢຊູຖາມເປໂຕວ່າ: ‘ເຈົ້າຮັກຂ້ອຍຫຼາຍກວ່າການຫາປາບໍ?’ ເປໂຕຕອບວ່າ: “ນາຍເອີ້ຍ ທ່ານກໍຮູ້ວ່າຂ້ອຍຮັກທ່ານ.” ພະເຢຊູສັ່ງລາວວ່າ: “ໃຫ້ເຈົ້າລ້ຽງແກະຂອງຂ້ອຍເດີ້.” ພະເຢຊູຖາມລາວເປັນເທື່ອທີສອງວ່າ: ‘ເປໂຕ ເຈົ້າຮັກຂ້ອຍບໍ?’ ເປໂຕຕອບວ່າ: “ນາຍເອີ້ຍ ທ່ານກໍຮູ້ວ່າຂ້ອຍຮັກທ່ານ.” ພະເຢຊູສັ່ງລາວວ່າ: “ໃຫ້ເຈົ້າເບິ່ງແຍງແກະໂຕນ້ອຍໆຂອງຂ້ອຍເດີ້.” ພະເຢຊູຖາມລາວອີກເປັນເທື່ອທີສາມ ເປໂຕທຸກໃຈຫຼາຍແລະຕອບວ່າ: “ນາຍເອີ້ຍ ທ່ານຮູ້ທຸກຢ່າງຢູ່ແລ້ວ ທ່ານກໍຮູ້ວ່າຂ້ອຍຮັກທ່ານ.” ພະເຢຊູສັ່ງລາວວ່າ: “ໃຫ້ເຈົ້າລ້ຽງແກະໂຕນ້ອຍໆຂອງຂ້ອຍເດີ້.” ແລ້ວເພິ່ນກໍບອກເປໂຕວ່າ: “ໃຫ້ເຈົ້າຕິດຕາມຂ້ອຍຕໍ່ໆໄປ.”
“ພະເຢຊູຈຶ່ງເວົ້າກັບເຂົາເຈົ້າວ່າ: ‘ມານຳຂ້ອຍແມ້ ຂ້ອຍຈະໃຫ້ພວກເຈົ້າໄປຊອກຫາຄົນແທນທີ່ຈະຫາປາ.’ ທັງສອງຄົນກໍປະດາງໄວ້ແລ້ວໄປນຳເພິ່ນທັນທີ.”—ມັດທາຍ 4:19, 20