ບົດທີ 101
ໂປໂລຖືກສົ່ງໄປເມືອງໂຣມ
ການເດີນທາງໄປປະກາດຮອບທີ 3 ຂອງໂປໂລໄດ້ມາສິ້ນສຸດຢູ່ເມືອງເຢຣູຊາເລັມ ແລະລາວກໍຖືກຈັບເຂົ້າຄຸກຢູ່ຫັ້ນ. ມີຄືນມື້ໜຶ່ງ ພະເຢຊູເວົ້າກັບໂປໂລໃນນິມິດວ່າ: ‘ເຈົ້າຈະໄປເມືອງໂຣມແລະປະກາດຢູ່ຫັ້ນ.’ ໂປໂລຖືກພາອອກຈາກເມືອງເຢຣູຊາເລັມໄປເຂົ້າຄຸກຢູ່ເມືອງກາຍຊາເຣຍ 2 ປີ. ຕອນທີ່ໂປໂລຖືກພິຈາລະນາຄະດີຕໍ່ໜ້າເຟຊະໂຕທີ່ເປັນເຈົ້າແຂວງ ໂປໂລເວົ້າວ່າ: ‘ຂໍສົ່ງຂ້ອຍໄປເມືອງໂຣມເພື່ອໃຫ້ກາຍຊາຕັດສິນຄະດີ.’ ເຟຊະໂຕບອກວ່າ: ‘ເມື່ອເຈົ້າອຸທອນຕໍ່ກາຍຊາ ເຈົ້າກໍຕ້ອງໄປຫາກາຍຊາ.’ ເຂົາເຈົ້າສົ່ງໂປໂລຂຶ້ນເຮືອລຳໜຶ່ງທີ່ຈະໄປເມືອງໂຣມ ແລະມີພີ່ນ້ອງຄລິດສະຕຽນ 2 ຄົນຊື່ລູກາກັບອາຣິດຕາໂຂເດີນທາງໄປນຳໂປໂລ.
ຕອນທີ່ຢູ່ໃນທະເລ ເຂົາເຈົ້າເຈິພາຍຸໃຫຍ່ຫຼາຍມື້. ທຸກຄົນທີ່ຢູ່ໃນເຮືອຄິດວ່າເຂົາເຈົ້າຈະຕ້ອງຕາຍແທ້ໆ ແຕ່ໂປໂລບອກວ່າ: ‘ທຸກຄົນ ມື້ຄືນນີ້ທູດສະຫວັນມາບອກຂ້ອຍທາງຄວາມຝັນວ່າ: “ໂປໂລ ບໍ່ຕ້ອງຢ້ານ. ເຈົ້າຈະຕ້ອງໄປເມືອງໂຣມ ແລະທຸກຄົນທີ່ຢູ່ກັບເຈົ້າໃນເຮືອຈະປອດໄພ.” ສະນັ້ນ ບໍ່ຕ້ອງຢ້ານເດີ້! ພວກເຮົາຈະບໍ່ຕາຍ!’
ພາຍຸພັດໃສ່ບັກແຮງໆເປັນເວລາ 14 ມື້ ໃນທີ່ສຸດເຂົາເຈົ້າກໍແນມເຫັນເກາະເມລີເຕ. ເຮືອໄດ້ໄປຄາຢູ່ຫາດແລະແຕກເປັນປ່ຽງໆ. ແຕ່ທັງ 276 ຄົນທີ່ຢູ່ເຮືອກໍຂຶ້ນຝັ່ງໄດ້ຢ່າງປອດໄພ. ບາງຄົນລອຍນ້ຳໄປ ແລະບາງຄົນກໍເກາະຊິ້ນສ່ວນຂອງເຮືອໄປ. ຄົນທີ່ຢູ່ເກາະເມລີເຕຊ່ວຍເຫຼືອເຂົາເຈົ້າແລະດັງໄຟໃຫ້ເຂົາເຈົ້າອຸ່ນ.
3 ເດືອນຕໍ່ມາ ທະຫານໄດ້ພາໂປໂລຂຶ້ນເຮືອອີກລຳໜຶ່ງໄປເມືອງໂຣມ. ມີພີ່ນ້ອງຄລິດສະຕຽນຫຼາຍຄົນມາຫາໂປໂລຢູ່ຫັ້ນ. ເມື່ອໂປໂລເຫັນພີ່ນ້ອງ ລາວກໍຂອບໃຈພະເຢໂຫວາແລະຮູ້ສຶກມີກຳລັງໃຈຂຶ້ນ. ເຖິງວ່າໂປໂລຈະເປັນນັກໂທດ ແຕ່ລາວກໍໄດ້ຮັບອະນຸຍາດໃຫ້ພັກຢູ່ເຮືອນເຊົ່າໂດຍໃຫ້ມີທະຫານຄົນໜຶ່ງມາເຝົ້າ. ໃນໄລຍະ 2 ປີທີ່ໂປໂລຢູ່ໃນເຮືອນນັ້ນ ກໍມີຄົນມາຫາລາວ. ລາວໄດ້ປະກາດເລື່ອງການປົກຄອງຂອງພະເຈົ້າແລະສອນເລື່ອງພະເຢຊູໃຫ້ເຂົາເຈົ້າຟັງ. ໂປໂລຍັງຂຽນຈົດໝາຍຫາຫຼາຍປະຊາຄົມໃນເຂດອາຊີໄມເນີແລະແຂວງຢູດາຍນຳ. ພະເຢໂຫວາໄດ້ໃຊ້ໂປໂລໃຫ້ໄປປະກາດໃນຫຼາຍປະເທດແທ້ໆ.
“ພວກເຮົາພະຍາຍາມເຮັດທຸກຢ່າງເພື່ອໃຫ້ເຫັນວ່າພວກເຮົາເປັນຜູ້ຮັບໃຊ້ຂອງພະເຈົ້າ. ພວກເຮົາອົດທົນກັບຫຼາຍເລື່ອງ ທັງຄວາມທຸກລຳບາກ ຄວາມຂັດສົນ ແລະຄວາມຫຍຸ້ງຍາກ.”—2 ໂກຣິນໂທ 6:4