ບົດທີ 01
ຄຳພີໄບເບິນຈະຊ່ວຍເຈົ້າໄດ້ແນວໃດ?
ເຮົາທຸກຄົນຢາກຮູ້ຫຼາຍຂຶ້ນໃນເລື່ອງຊີວິດ ຄວາມທຸກ ຄວາມຕາຍ ແລະອະນາຄົດ. ເຮົາຍັງກັງວົນກັບບັນຫາໃນແຕ່ລະມື້ນຳເຊັ່ນ ເຮັດແນວໃດຈຶ່ງຈະມີເງິນພໍໃຊ້ ຫຼືເຮັດແນວໃດຄອບຄົວຈຶ່ງຈະມີຄວາມສຸກ. ຫຼາຍຄົນເຫັນວ່າຄຳພີໄບເບິນບໍ່ພຽງແຕ່ຊ່ວຍໃຫ້ເຂົາເຈົ້າໄດ້ຮັບຄຳຕອບຂອງຄຳຖາມທີ່ສຳຄັນໃນຊີວິດເທົ່ານັ້ນ ແຕ່ຍັງໃຫ້ຄຳແນະນຳທີ່ໃຊ້ໄດ້ແທ້ໃນຊີວິດແຕ່ລະມື້ນຳ. ເຈົ້າຄິດວ່າຄຳພີໄບເບິນຈະຊ່ວຍເຈົ້າແລະຄົນທີ່ເຈົ້າຮູ້ຈັກໄດ້ບໍ?
1. ຄຳພີໄບເບິນຕອບຄຳຖາມຫຍັງແດ່?
ຄຳພີໄບເບິນຕອບຄຳຖາມທີ່ສຳຄັນເຫຼົ່ານີ້ເຊັ່ນ: ສິ່ງທີ່ມີຊີວິດເກີດຂຶ້ນມາໄດ້ແນວໃດ? ເຮົາເກີດມາເຮັດຫຍັງ? ເປັນຫຍັງຄົນດີຈຶ່ງເຈິຄວາມທຸກ? ຕາຍແລ້ວໄປໃສ? ເຮົາທຸກຄົນຢາກໃຫ້ມີຄວາມສະຫງົບສຸກ ແຕ່ເປັນຫຍັງຈຶ່ງມີສົງຄາມ? ໂລກນີ້ຈະເປັນແນວໃດໃນອະນາຄົດ? ຄຳພີໄບເບິນມີຄຳຕອບສຳລັບຄຳຖາມເຫຼົ່ານີ້ ແລະຫຼາຍລ້ານຄົນກໍໄດ້ຄຳຕອບທີ່ພໍໃຈຫຼາຍ.
2. ຄຳພີໄບເບິນຈະຊ່ວຍເຮົາໃຫ້ມີຊີວິດທີ່ມີຄວາມສຸກໃນແຕ່ລະມື້ໄດ້ແນວໃດ?
ຄຳພີໄບເບິນມີຄຳແນະນຳທີ່ດີໃຫ້ເຮົາໃນເລື່ອງຕ່າງໆ ເຊັ່ນ: ວິທີທີ່ຈະຊ່ວຍໃຫ້ຄອບຄົວມີຄວາມສຸກຫຼາຍຂຶ້ນ ວິທີຮັບມືກັບຄວາມເຄັ່ງຕຶງ ແລະວິທີທີ່ເຮົາຈະມີຄວາມສຸກກັບການເຮັດວຽກ. ເຮົາຈະມາລົມກັນວ່າຄຳພີໄບເບິນໃຫ້ຄຳແນະນຳກັບເຮົາແນວໃດໃນເລື່ອງເຫຼົ່ານີ້ແລະເລື່ອງອື່ນໆ. ແລ້ວເຈົ້າຈະເຫັນດີກັບຄຳເວົ້າທີ່ວ່າ: “ທຸກສິ່ງທີ່ຂຽນໄວ້ໃນພະຄຳພີ . . . ມີປະໂຫຍດ.”—2 ຕີໂມທຽວ 3:16
ປຶ້ມນີ້ບໍ່ໄດ້ມາແທນຄຳພີໄບເບິນ. ແຕ່ປຶ້ມນີ້ກະຕຸ້ນເຈົ້າໃຫ້ກວດເບິ່ງຄຳພີໄບເບິນດ້ວຍໂຕເອງ. ດັ່ງນັ້ນ ເຮົາຂໍໃຫ້ເຈົ້າເປີດຄຳພີໄບເບິນອ່ານໄປນຳຕອນທີ່ຮຽນປຶ້ມນີ້.
ຮຽນຮູ້ຫຼາຍຂຶ້ນ
ມາເບິ່ງວ່າຄຳພີໄບເບິນໄດ້ຊ່ວຍຜູ້ຄົນແນວໃດ ເຈົ້າຈະມ່ວນກັບການອ່ານຄຳພີໄບເບິນໄດ້ແນວໃດ ແລະເປັນຫຍັງຈຶ່ງຕ້ອງມີຄົນຊ່ວຍອະທິບາຍເພື່ອຈະເຂົ້າໃຈຄຳພີໄບເບິນຫຼາຍຂຶ້ນ.
3. ຄຳພີໄບເບິນມີຄຳແນະນຳໃຫ້ເຮົາ
ຄຳພີໄບເບິນເປັນຄືກັບແສງສະຫວ່າງສ່ອງທາງ ເຊິ່ງຊ່ວຍເຮົາໃຫ້ຮູ້ວິທີຕັດສິນໃຈຢ່າງສະຫຼາດແລະຮູ້ວ່າໃນອະນາຄົດຈະເປັນແນວໃດ.
ອ່ານເພງສັນລະເສີນ 119:105 ແລ້ວລົມກັນກ່ຽວກັບຄຳຖາມຕໍ່ໄປນີ້:
ຜູ້ຂຽນເພງສັນລະເສີນຂໍ້ນີ້ເບິ່ງວ່າຄຳພີໄບເບິນເປັນຄືກັບຫຍັງ?
ເຈົ້າຄິດວ່າຄຳພີໄບເບິນເປັນປຶ້ມແນວໃດ?
4. ຄຳພີໄບເບິນຕອບຄຳຖາມຂອງເຮົາໄດ້
ຜູ້ຍິງຄົນໜຶ່ງໄດ້ຄຳຕອບຈາກຄຳພີໄບເບິນສຳລັບຄຳຖາມທີ່ລາວສົງໄສມາຫຼາຍປີ. ເປີດວິດີໂອ ແລ້ວລົມກັນກ່ຽວກັບຄຳຖາມຕໍ່ໄປນີ້:
ໃນວິດີໂອ ຜູ້ຍິງຄົນນີ້ມີຄຳຖາມຫຍັງແດ່?
ການສຶກສາຄຳພີໄບເບິນໄດ້ຊ່ວຍລາວແນວໃດ?
ຄຳພີໄບເບິນບອກໃຫ້ເຮົາພະຍາຍາມຊອກຫາຄຳຕອບ. ອ່ານມັດທາຍ 7:7 ແລ້ວລົມກັນກ່ຽວກັບຄຳຖາມຕໍ່ໄປນີ້:
ມີຄຳຖາມຫຍັງແດ່ທີ່ເຈົ້າຢາກຮູ້ແຕ່ຍັງບໍ່ໄດ້ຄຳຕອບ?
5. ເຈົ້າຈະມ່ວນກັບການອ່ານຄຳພີໄບເບິນ
ຫຼາຍຄົນມ່ວນກັບການອ່ານຄຳພີໄບເບິນແລະກໍໄດ້ຮັບປະໂຫຍດນຳ. ເປີດວິດີໂອ ແລ້ວລົມກັນກ່ຽວກັບຄຳຖາມຕໍ່ໄປນີ້:
ໃນວິດີໂອ ໄວລຸ້ນຮູ້ສຶກແນວໃດກັບການອ່ານ?
ແຕ່ເປັນຫຍັງເຂົາເຈົ້າມັກອ່ານຄຳພີໄບເບິນ?
ຄຳພີໄບເບິນສອນເຮົາ ໃຫ້ກຳລັງໃຈເຮົາ ແລະໃຫ້ເຮົາມີຄວາມຫວັງ. ອ່ານໂຣມ 15:4 ແລ້ວລົມກັນກ່ຽວກັບຄຳຖາມຕໍ່ໄປນີ້:
ຖ້າຄຳພີໄບເບິນໃຫ້ຄວາມຫວັງແລະກຳລັງໃຈ ເຈົ້າຢາກຈະຮຽນຮູ້ຫຼາຍຂຶ້ນບໍ?
6. ຖ້າມີຄົນຊ່ວຍອະທິບາຍ ເຈົ້າກໍຈະເຂົ້າໃຈຄຳພີໄບເບິນໄດ້ຫຼາຍຂຶ້ນ
ຫຼາຍຄົນອ່ານຄຳພີໄບເບິນດ້ວຍໂຕເອງໄດ້ ແຕ່ການມີຄົນຊ່ວຍອະທິບາຍກໍເຮັດໃຫ້ເຂົາເຈົ້າເຂົ້າໃຈຫຼາຍຂຶ້ນ. ອ່ານກິດຈະການ 8:26-31 ແລ້ວລົມກັນກ່ຽວກັບຄຳຖາມຕໍ່ໄປນີ້:
ເຮົາຈະເຂົ້າໃຈຄຳພີໄບເບິນໄດ້ແນວໃດ?—ເບິ່ງຂໍ້ 30 ແລະ 31
ຜູ້ຊາຍເອທິໂອເປຍຢາກໃຫ້ມີຄົນຊ່ວຍອະທິບາຍເພື່ອຈະເຂົ້າໃຈຄຳພີໄບເບິນ. ໃນທຸກມື້ນີ້ຫຼາຍຄົນກໍເຂົ້າໃຈຄຳພີໄບເບິນຫຼາຍຂຶ້ນເມື່ອມີຄົນຊ່ວຍອະທິບາຍ
ບາງຄົນເວົ້າວ່າ: “ຮຽນຄຳພີໄບເບິນໄປເຮັດຫຍັງເສຍເວລາລ້າໆ.”
ເຈົ້າຄິດແນວໃດ? ເປັນຫຍັງຈຶ່ງຄິດແບບນັ້ນ?
ສະຫຼຸບ
ຄຳພີໄບເບິນມີຄຳແນະນຳທີ່ໃຊ້ໄດ້ແທ້ໃນຊີວິດປະຈຳວັນ ຕອບຄຳຖາມທີ່ສຳຄັນຫຼາຍເລື່ອງ ຊ່ວຍໃຫ້ມີຄວາມຫວັງແລະກຳລັງໃຈ.
ຄຳຖາມທົບທວນ
ຄຳພີໄບເບິນມີຄຳແນະນຳເລື່ອງຫຍັງແດ່?
ຄຳພີໄບເບິນຕອບຄຳຖາມຫຍັງແດ່?
ເຈົ້າຢາກຮູ້ເລື່ອງຫຍັງແດ່ຈາກຄຳພີໄບເບິນ?
ເບິ່ງເພີ່ມເຕີມ
ເບິ່ງວ່າເປັນຫຍັງຄຳແນະນຳໃນຄຳພີໄບເບິນຍັງໃຊ້ໄດ້ແທ້ໃນທຸກມື້ນີ້.
“ຄຳສອນໃນຄຳພີໄບເບິນ—ຄວາມຮູ້ທີ່ບໍ່ເຄີຍຫຼ້າສະໄໝ” (ຫໍສັງເກດການ ສະບັບທີ 1 ປີ 2018)
ເບິ່ງວ່າຄຳພີໄບເບິນຊ່ວຍຄົນທີ່ເຄີຍຂາດຄວາມໝັ້ນໃຈແລະຮູ້ສຶກວ່າໂຕເອງບໍ່ມີຄ່າຕັ້ງແຕ່ຍັງນ້ອຍແນວໃດ.
ເບິ່ງວ່າຄຳພີໄບເບິນມີຄຳແນະນຳຫຍັງແດ່ທີ່ໃຊ້ໄດ້ແທ້ໃນຄອບຄົວ.
“12 ເຄັດລັບທີ່ເຮັດໃຫ້ຄອບຄົວມີຄວາມສຸກ” (ຕື່ນເຖີດ! ສະບັບທີ 2 ປີ 2018. ບໍ່ມີໃນພາສາລາວ)
ຄຳພີໄບເບິນຊ່ວຍໃຫ້ຮູ້ຄວາມຈິງວ່າໃຜແມ່ນຜູ້ປົກຄອງໂລກ.