ຕິດຕາມ
ບົດທີ 7
ພະຍາຍາມຕໍ່ໄປ
ຫຼັກການ: “ເຂົາເຈົ້າໄດ້ສອນແລະປະກາດຂ່າວດີເລື່ອງພະເຢຊູຜູ້ເປັນພະຄລິດທຸກໆມື້.”—ກຈກ. 5:42
ສິ່ງທີ່ໂປໂລເຮັດ
1. ເບິ່ງ ວິດີໂອ ຫຼືອ່ານກິດຈະການ 19:8-10. ແລ້ວຕອບຄຳຖາມຕໍ່ໄປນີ້:
ກ. ແທນທີ່ຈະຍອມແພ້ເມື່ອມີບາງຄົນຕໍ່ຕ້ານ ໂປໂລພະຍາຍາມຊ່ວຍເຫຼືອຄົນທີ່ສົນໃຈແນວໃດ?
ຂ. ໂປໂລກັບໄປສອນຜູ້ທີ່ສົນໃຈຫຼາຍເທື່ອບໍ ແລະເຮັດແບບນັ້ນດົນປານໃດ?
ເຮົາໄດ້ບົດຮຽນຫຍັງຈາກໂປໂລ?
2. ເຮົາຕ້ອງໃຊ້ເວລາແລະຄວາມພະຍາຍາມເພື່ອຈະກັບໄປຢາມຢ່າງມີປະສິດທິພາບແລະເລີ່ມການສຶກສາ.
ຮຽນແບບໂປໂລ
3. ເຕັມໃຈກັບໄປຢາມຄົນທີ່ເຈົ້າລົມນຳໃນເວລາທີ່ລາວສະດວກ. ໃຫ້ຖາມໂຕເອງວ່າ: ‘ຕອນໃດແລະຢູ່ໃສສະດວກທີ່ສຸດທີ່ຈະຕິດຕໍ່ລາວ? ຕອນໃດລາວຈະມີເວລາລົມນຳຂ້ອຍ?’ ເຕັມໃຈກັບໄປຢາມລາວ ເຖິງວ່າເວລານັ້ນຈະບໍ່ສະດວກສຳລັບເຈົ້າກໍຕາມ.
4. ຖາມລາວວ່າເຈົ້າຈະລົມນຳລາວໄດ້ອີກຕອນໃດ. ໃນຕອນທ້າຍທີ່ເຈົ້າລົມກັນແຕ່ລະເທື່ອ ໃຫ້ພະຍາຍາມຢືນຢັນເວລາທີ່ແນ່ນອນທີ່ເຈົ້າສາມາດລົມນຳລາວໄດ້ອີກເທື່ອໜຶ່ງ. ຢ່າລືມໄປຫາລາວໃນເວລາແລະສະຖານທີ່ທີ່ເຈົ້າຕົກລົງໄວ້.
5. ຢ່າໝົດຫວັງ. ຢ່າຟ້າວຄິດວ່າຄົນທີ່ເຈົ້າໄປຫາຫຼາຍເທື່ອແລ້ວບໍ່ເຈິຫຼືຄົນທີ່ຄາວຽກຕະຫຼອດຕອນທີ່ເຈົ້າໄປຫາ ເປັນຄົນທີ່ບໍ່ສົນໃຈ. (1 ກຣ. 13:4, 7) ພະຍາຍາມໄປຫາລາວຕໍ່ໆໄປ ແຕ່ໃຫ້ແນ່ໃຈວ່າເຈົ້າໃຊ້ເວລາແບບຄຸ້ມຄ່າ.—1 ກຣ. 9:26