ຄຳນຳ
ເຈົ້າກ້າຫານຫຼາຍຂຶ້ນໄດ້!
1-3. ເມື່ອພະເຢຊູເວົ້າວ່າ “ລຸກຂຶ້ນ. ໄປ໋!” ເປັນຫຍັງຈຶ່ງສະແດງວ່າເພິ່ນກ້າຫານຫຼາຍ?
“ລຸກຂຶ້ນ. ໄປ໋!” ນີ້ເປັນຄຳເວົ້າທີ່ກ້າຫານທີ່ສຸດທີ່ມະນຸດຄົນໜຶ່ງເຄີຍເວົ້າມາ. ເຈົ້າອາດຈະແປກໃຈວ່າຄຳເວົ້ານີ້ສະແດງເຖິງຄວາມກ້າຫານໄດ້ແນວໃດ? ເພື່ອຈະຮູ້ຄຳຕອບໃຫ້ເຮົາມາເບິ່ງນຳກັນວ່ານີ້ແມ່ນຄຳເວົ້າຂອງຜູ້ໃດ ແລະເປັນຫຍັງລາວຈຶ່ງເວົ້າແນວນັ້ນ.—ມທ. 26:46
“ລຸກຂຶ້ນ. ໄປ໋!”—ມທ. 26:46
2 ນັ້ນແມ່ນຄຳເວົ້າຂອງພະເຢຊູຄລິດ ແລະເພິ່ນເວົ້າຄຳນີ້ກັບພວກລູກສິດຂອງເພິ່ນ. ທີ່ຈິງ ເພິ່ນເຄີຍເວົ້າຄຳນີ້ກັບເຂົາເຈົ້າມາແລ້ວ. (ຢຮ. 14:31) ແຕ່ເທື່ອນີ້ຕ່າງຈາກເທື່ອກ່ອນ. ເທື່ອນີ້ພະເຢຊູເວົ້າຢູ່ສວນເຄັດເຊມາເນນອກເມືອງເຢຣູຊາເລັມໃນຕອນເດິກໆຂອງມື້ທີ່ເດືອນເຕັມດວງ. ເພິ່ນຮູ້ວ່າມີພວກຄົນທີ່ຖືອາວຸດກຳລັງຊິມາຫາແລະຮູ້ວ່າເຂົາເຈົ້າຊິເຮັດຫຍັງກັບເພິ່ນ. ພະເຢຊູກຳລັງຈະເຈິການທົດສອບທີ່ໜັກທີ່ສຸດທີ່ມະນຸດຄົນໜຶ່ງເຄີຍເຈິ ແລະເພິ່ນຮູ້ວ່າເພິ່ນຈະເຈິການທົດສອບນີ້ພຽງແຕ່ຜູ້ດຽວ.
3 ພະເຢຊູບໍ່ໄດ້ພະຍາຍາມຈະໜີເອົາໂຕລອດ. ເພິ່ນຈະເອີ້ນພວກທູດສະຫວັນທີ່ມີລິດເດດໃຫ້ມາຊ່ວຍເພິ່ນກໍໄດ້ ແຕ່ເພິ່ນກໍບໍ່ເຮັດ. (ມທ. 26:53) ແທນທີ່ຈະເຮັດແບບນັ້ນ ເພິ່ນມີແຕ່ເວົ້າວ່າ: “ລຸກຂຶ້ນ. ໄປ໋!” ເພິ່ນຊິໄປໃສ? ເພິ່ນຊິໄປເຈິພວກທີ່ກຳລັງຈະມາຈັບເພິ່ນໄປທໍລະມານແລະຂ້າເພິ່ນ. ເປັນຫຍັງເພິ່ນຈຶ່ງເຕັມໃຈເຮັດແບບນັ້ນ? ກໍຍ້ອນເພິ່ນຮັກພະເຢໂຫວາແລະຮັກພວກລູກສິດຂອງເພິ່ນ.
4-5. ຄວາມກ້າຫານແບບພະເຢຊູເປັນຄວາມກ້າຫານແນວໃດ? ແລະເປັນຫຍັງເຮົາຕ້ອງມີຄວາມກ້າຫານແບບນັ້ນ?
4 ເຮົາເວົ້າໄດ້ເລີຍວ່າພະເຢຊູເປັນຄົນທີ່ກ້າຫານທີ່ສຸດ. ເຈົ້າເປັນລູກສິດຄົນໜຶ່ງຂອງເພິ່ນບໍ? ຖ້າແມ່ນ ເຈົ້າກໍກ້າຫານຄືກັບເພິ່ນໄດ້ຄືກັນ. ຄລິດສະຕຽນແທ້ຕ້ອງມີຄວາມກ້າຫານ. ໃນທຸກມື້ນີ້ ເຮົາມີຊີວິດຢູ່ໃນໄລຍະທີ່ຫຍຸ້ງຍາກແລະອັນຕະລາຍຫຼາຍ ເຮົາຕ້ອງກ້າຫານຫຼາຍກວ່າແຕ່ກ່ອນ.
5 ຄວາມກ້າຫານແບບພະເຢຊູເປັນຄວາມກ້າຫານແນວໃດ? ບາງຄົນຄິດວ່າຄວາມກ້າຫານໝາຍເຖິງການບໍ່ຢ້ານຫຍັງເລີຍ ສ່ຽງອັນຕະລາຍໂດຍບໍ່ຈຳເປັນ ຫຼືຄິດວ່າບໍ່ມີຫຍັງເປັນອັນຕະລາຍ. ສ່ວນບາງຄົນກໍຄິດວ່າຄວາມກ້າຫານໝາຍເຖິງການໃຊ້ຄວາມຮຸນແຮງ. (ພສ. 11:5) ແຕ່ຄວາມກ້າຫານແບບພະເຢຊູບໍ່ໄດ້ເປັນແບບນັ້ນ. ຄົນທີ່ກ້າຫານແບບພະເຢຊູຈະກ້າເຮັດສິ່ງທີ່ພະເຈົ້າເຫັນວ່າຖືກຕ້ອງເຖິງວ່າຈະຍາກຫຼືຮູ້ສຶກຢ້ານສ່ຳໃດກໍຕາມ.
ເຈົ້າກ້າຫານແບບພະເຢຊູໄດ້
6. ຖ້າເຮົາຮູ້ສຶກວ່າຍັງບໍ່ມີຄວາມກ້າຫານພໍ ຄຳເວົ້າຂອງພະເຢຊູຈະໃຫ້ກຳລັງໃຈເຮົາແນວໃດ?
6 ເຈົ້າອາດຈະບໍ່ໝັ້ນໃຈວ່າຖ້າເຈົ້າຖືກທົດສອບ ເຈົ້າຈະກ້າຫານຄືກັບພະເຢຊູໄດ້ບໍ. ຖ້າເປັນແນວນັ້ນ ຂໍໃຫ້ຈື່ໄວ້ວ່າພະເຢຊູເປັນຄົນມີເຫດຜົນ ແລະເພິ່ນກໍຄືກັບພໍ່ຂອງເພິ່ນທີ່ບໍ່ໄດ້ຄາດໝາຍຈາກເຮົາຫຼາຍເກີນໄປ. (ພສ. 103:14; ຢຮ. 14:9) ຕົວຢ່າງເຊັ່ນ ໃນຄືນທີ່ຢູ່ສວນເຄັດເຊມາເນນັ້ນ ພະເຢຊູຂໍໃຫ້ພວກລູກສິດເຝົ້າລະວັງຢູ່ກັບເພິ່ນ ແຕ່ເຂົາເຈົ້າພັດນອນຫຼັບຊ້ຳ. ເຖິງຈະເປັນແນວນັ້ນ ເພິ່ນຍັງເວົ້າແບບເຫັນໃຈເຂົາເຈົ້າວ່າ: ‘ເຖິງວ່າໃຈສູ້ ແຕ່ຮ່າງກາຍກໍຍັງອ່ອນແອ.’ (ມທ. 26:41) ພະເຢຊູຮູ້ວ່າເຂົາເຈົ້າມີຂໍ້ອ່ອນແອ ແລະເພິ່ນກໍຮູ້ວ່າເຈົ້າກໍມີຂໍ້ອ່ອນແອຄືກັນ.
7-8. ພະເຢຊູເຮັດຫຍັງເພື່ອຊ່ວຍລູກສິດຂອງເພິ່ນໃຫ້ມີຄວາມໝັ້ນໃຈຫຼາຍຂຶ້ນ?
7 ພະເຢຊູສະແດງຄວາມໝັ້ນໃຈໃນລູກສິດຂອງເພິ່ນ. ຂໍໃຫ້ນຶກພາບຕອນທີ່ພະເຢຊູເວົ້າກັບເຂົາເຈົ້າວ່າ: “ຂໍໃຫ້ກ້າຫານ. ຂ້ອຍຊະນະໂລກແລ້ວ!” ນ້ຳສຽງຂອງເພິ່ນຄືຊິເຮັດໃຫ້ພວກລູກສິດມີຄວາມໝັ້ນໃຈຫຼາຍຂຶ້ນ. (ຢຮ. 16:33) ເພິ່ນຮູ້ວ່າເຂົາເຈົ້າຈະເຮັດຕາມຕົວຢ່າງຂອງເພິ່ນໄດ້ ແລະເຂົາເຈົ້າກໍເຮັດໄດ້ແທ້ໆ. ມີຫຼາຍເທື່ອທີ່ພະເຢຊູໃຊ້ຄຳວ່າ “ຂໍໃຫ້ກ້າຫານ” ຫຼືຄຳຄ້າຍໆກັນນີ້ວ່າ “ບໍ່ຕ້ອງຢ້ານ” ເພື່ອຊ່ວຍຄົນອື່ນໃຫ້ໝັ້ນໃຈແລະກ້າຫານຫຼາຍຂຶ້ນ. ຕົວຢ່າງເຊັ່ນ ເພິ່ນບອກຜູ້ຊາຍທີ່ເປັນອຳມະພາດວ່າບໍ່ຕ້ອງຢ້ານຍ້ອນບາບຂອງລາວໄດ້ຮັບການຍົກໂທດແລ້ວ. (ມທ. 9:2) ເພິ່ນເວົ້າກັບຜູ້ຍິງຄົນໜຶ່ງວ່າບໍ່ຕ້ອງຢ້ານຫຼັງຈາກທີ່ລາວແຕະຍອຍເສື້ອຂອງເພິ່ນ. (ມທ. 9:20-22) ເພິ່ນບອກພວກລູກສິດວ່າບໍ່ຕ້ອງຢ້ານຕອນທີ່ເຂົາເຈົ້າກຳລັງເຈິພາຍຸທີ່ແຮງໆ. (ມທ. 14:27) ພະເຢຊູເວົ້າກັບໂປໂລຈາກສະຫວັນວ່າໃຫ້ກ້າຫານຕອນທີ່ລາວກຳລັງຈະຖືກພວກທີ່ໃຈຮ້າຍຂ້າ.—ກຈກ. 23:9-11
8 ໃນທຸກມື້ນີ້ ພະເຢຊູກະສັດຂອງເຈົ້າກໍກຳລັງເວົ້າກັບເຈົ້າແບບນັ້ນຄືກັນ. ເພິ່ນຢາກໃຫ້ເຈົ້າ “ກ້າຫານ” ແລະເພິ່ນຮູ້ວ່າເຈົ້າຕ້ອງເຮັດໄດ້. ພະເຢໂຫວາພໍ່ຂອງເພິ່ນຈະໃຫ້ເຈົ້າມີທຸກສິ່ງທີ່ຈຳເປັນເພື່ອເຈົ້າຈະກ້າຫານໄດ້.
ຄຳພີໄບເບິນຈະຊ່ວຍເຮົາໃຫ້ກ້າຫານຫຼາຍຂຶ້ນໄດ້ແນວໃດ?
9. ຄຳພີໄບເບິນຊ່ວຍເຮົາໃຫ້ກ້າຫານຫຼາຍຂຶ້ນໄດ້ແນວໃດ?
9 ພະເຢໂຫວາໃຫ້ມີຕົວຢ່າງຂອງຫຼາຍຄົນໃນຄຳພີໄບເບິນທີ່ຊ່ວຍເຮົາໃຫ້ກ້າຫານຫຼາຍຂຶ້ນໄດ້. ໃນນັ້ນມີເລື່ອງຊີວິດຈິງຂອງຊາຍຍິງຫຼາຍຄົນທີ່ມີອາຍຸແຕກຕ່າງກັນແລະມີສະພາບການບໍ່ຄືກັນ. ແນ່ນອນວ່າເຂົາເຈົ້າທຸກຄົນ “ເປັນຄົນທຳມະດາຄືກັບພວກເຮົາ.” (ຢາໂກໂບ 5:17) ເຂົາເຈົ້າກໍຄືກັບພວກເຮົາທີ່ເປັນຄົນບໍ່ສົມບູນແບບ ມີຂໍ້ອ່ອນແອ ແລະຮູ້ສຶກຢ້ານ. ເຂົາເຈົ້າຍັງເຈິກັບອຸປະສັກແລະບັນຫາຫຼາຍຢ່າງ ຫຼືເຖິງຂັ້ນສ່ຽງຊີວິດດ້ວຍຊ້ຳ. ແຕ່ເຂົາເຈົ້າກໍລວບລວມຄວາມກ້າຫານແລະເອົາຊະນະມັນໄດ້ຄືກັບພະເຢຊູ. ຕົວຢ່າງຂອງເຂົາເຈົ້າຊ່ວຍເຮົາໃນທຸກມື້ນີ້ໃຫ້ກ້າຫານຫຼາຍຂຶ້ນໄດ້.
10-11. ປຶ້ມນີ້ຈະຊ່ວຍເຈົ້າແນວໃດ? ແລະເຈົ້າຈະໃຊ້ປຶ້ມນີ້ແນວໃດ? (ເບິ່ງຂອບ “ວິທີໃຊ້ປຶ້ມນີ້ເພື່ອສຶກສາສ່ວນໂຕແລະນະມັດສະການປະຈຳຄອບຄົວ”)
10 ໃນປຶ້ມນີ້ມີ 54 ບົດ ເຊິ່ງອອກແບບມາເພື່ອຊ່ວຍເຈົ້າໃຫ້ກ້າຫານຫຼາຍຂຶ້ນ. ໃນແຕ່ລະບົດເຈົ້າຈະໄດ້ຮຽນຮູ້ວ່າພະເຢໂຫວາໄດ້ຊ່ວຍຄົນທີ່ບໍ່ສົມບູນແບບຄືກັບເຈົ້າໃຫ້ກ້າຫານຫຼາຍຂຶ້ນໄດ້ແນວໃດ. ຂໍໃຫ້ເຈົ້າອ່ານເນື້ອໃນທີ່ສະຫຼຸບມາຈາກຄຳພີໄບເບິນ ແລ້ວໃຫ້ເບິ່ງສ່ວນຄົ້ນຄວ້າຫຼາຍຂຶ້ນ ແລະຄົ້ນຄວ້າກ່ຽວກັບພູມຫຼັງຂອງແຕ່ລະຄົນຕື່ມອີກ. ເມື່ອເຈົ້າເຮັດແບບນັ້ນ ເຈົ້າກໍຈະຮູ້ຈັກຊາຍຍິງທີ່ກ້າຫານເຫຼົ່ານີ້ຫຼາຍຂຶ້ນກວ່າເກົ່າ.
11 ຂໍໃຫ້ຕົວຢ່າງຂອງຄົນເຫຼົ່ານີ້ຊ່ວຍເຈົ້າໃຫ້ກ້າຫານຫຼາຍຂຶ້ນເພື່ອເຈົ້າຈະອົດທົນກັບຄວາມຍາກລຳບາກ “ໃນສະໄໝສຸດທ້າຍ” ນີ້ໄດ້. (2ຕມ. 3:1) ໃນແຕ່ລະມື້ທີ່ຜ່ານໄປ ຂໍໃຫ້ຄິດເຖິງຄຳສັນຍາຂອງພະເຢໂຫວາທີ່ບອກວ່າ: “ເຮົາຈະບໍ່ປະບໍ່ຖິ້ມເຈົ້າ ເຮົາຈະຊ່ວຍເຈົ້າຕະຫຼອດ.” ຄືກັບທີ່ໂປໂລເວົ້າ ຄຳສັນຍານີ້ຈະຊ່ວຍເຈົ້າໃຫ້ “ມີຄວາມກ້າແລະເວົ້າໄດ້ວ່າ: ‘ພະເຢໂຫວາເປັນຜູ້ຊ່ວຍເຫຼືອຂ້ອຍ ຂ້ອຍຈະບໍ່ຢ້ານຫຍັງ.’ ”—ຮຣ. 13:5, 6