ເລື່ອງຊີວິດຈິງ
ພະເຢໂຫວາອວຍພອນຂ້ອຍຫຼາຍກວ່າທີ່ຂ້ອຍຄາດຄິດ
‘ຂ້ອຍໜ້າຈະເປັນໄພໂອເນຍ ແຕ່ຂ້ອຍກໍສົງໄສວ່າການເປັນໄພໂອເນຍມັນເປັນເລື່ອງທີ່ໜ້າຕື່ນເຕັ້ນແທ້ໆຫວາ. ຂ້ອຍມັກວຽກທີ່ເຮັດໃນເຢຍລະມັນຫຼາຍ ມັນເປັນວຽກບໍລິຫານຈັດສົ່ງອາຫານໄປບ່ອນຕ່າງໆໃນອາຝຼິກກາເຊັ່ນ: ດາເອັດສະລາມ ເອລິຊາເບດວິວ ແລະອັດສະມາຣາ. ຂ້ອຍບໍ່ເຄີຍຄິດເລີຍວ່າ ມື້ໜຶ່ງຈະໄດ້ມາຮັບໃຊ້ເຕັມເວລາຢູ່ປະເທດເຫຼົ່ານັ້ນ ແລະບ່ອນອື່ນໆທົ່ວອາຝຼິກກາ!’
ໃນທີ່ສຸດ ຂ້ອຍກໍເລີ່ມເປັນໄພໂອເນຍ ແລ້ວຊີວິດຂ້ອຍກໍປ່ຽນໄປໃນແບບທີ່ຂ້ອຍຄິດບໍ່ເຖິງ. (ເອເຟ. 3:20) ເຈົ້າອາດຈະສົງໄສວ່າສິ່ງນີ້ເກີດຂຶ້ນໄດ້ແນວໃດ. ດຽວຂ້ອຍຈະເລົ່າຕັ້ງແຕ່ຕອນທຳອິດໃຫ້ຟັງເດີ້.
ຂ້ອຍເກີດຢູ່ເມືອງແບັກແລັງ ປະເທດເຢຍລະມັນໃນປີ 1939 ບໍ່ເທົ່າໃດເດືອນຫຼັງຈາກທີ່ສົງຄາມໂລກຄັ້ງທີ II ເລີ່ມຕົ້ນຂຶ້ນ. ເມື່ອສົງຄາມໃກ້ຈະສິ້ນສຸດລົງໃນປີ 1945 ເມືອງແບັກແລັງກໍໄດ້ຖືກໂຈມຕີທາງອາກາດຢ່າງໜັກ. ມີເທື່ອໜຶ່ງທີ່ບ້ານເຮົາຖືກໂຈມຕີທາງອາກາດ ເຮືອນຂອງເຮົາໄດ້ຖືກລະເບີດ ແລະຄອບຄົວເຮົາໄດ້ແລ່ນເຂົ້າໄປບ່ອນລີ້ໄພ. ຫຼັງຈາກນັ້ນເພື່ອຄວາມປອດໄພ ພວກເຮົາກໍໜີໄປເມືອງແອຟູດເຊິ່ງເປັນບ້ານເກີດຂອງແມ່ຂ້ອຍ.
ກັບພໍ່ແມ່ແລະນ້ອງສາວໃນເຢຍລະມັນປະມານປີ 1950
ແມ່ຂອງຂ້ອຍເປັນຄົນທີ່ສະແຫວງຫາຄວາມຈິງ. ລາວເລີຍອ່ານປຶ້ມຫຼາຍຢ່າງທີ່ຂຽນໂດຍນັກປັດຊະຍາແລະຄົ້ນຄວ້າກ່ຽວກັບສາສະໜາຕ່າງໆ ແຕ່ກໍຍັງຮູ້ສຶກບໍ່ຈຸໃຈເທື່ອ. ປະມານປີ 1948 ມີພະຍານພະເຢໂຫວາສອງຄົນມາເຮືອນເຮົາ ແມ່ໄດ້ເຊີນເຂົາເຈົ້າເຂົ້າມາແລ້ວກໍຖາມຫຼາຍຢ່າງ. ບໍ່ຮອດຊົ່ວໂມງ ແມ່ກໍບອກຂ້ອຍກັບນ້ອງສາວວ່າ “ແມ່ພົບຄວາມຈິງແລ້ວ!” ບໍ່ດົນຫຼັງຈາກນັ້ນ ແມ່ ນ້ອງສາວແລະຂ້ອຍກໍເລີ່ມໄປປະຊຸມຢູ່ເມືອງແອຟູດ.
ໃນປີ 1950 ພວກເຮົາຍ້າຍກັບໄປເມືອງແບັກແລັງ ແລະກໍໄປປະຊຸມຢູ່ປະຊາຄົມຄອຍສະບາກ. ຫຼັງຈາກນັ້ນກໍຍ້າຍບ້ານອີກແຕ່ຍັງຢູ່ໃນແບັກແລັງ ພວກເຮົາເລີຍໄປປະຊຸມຢູ່ປະຊາຄົມແທມເປິນໂຮບ. ໃນທີ່ສຸດແມ່ຂ້ອຍກໍຮັບບັບເຕມາ ແຕ່ຂ້ອຍຍັງຮູ້ສຶກບໍ່ພ້ອມ. ເຈົ້າຢາກຮູ້ບໍວ່າຍ້ອນຫຍັງ?
ເອົາຊະນະນິດໄສຂີ້ອາຍ
ຂ້ອຍບໍ່ຄ່ອຍກ້າວໜ້າປານໃດເພາະຂ້ອຍເປັນຄົນຂີ້ອາຍ. ເຖິງຂ້ອຍຈະໄປປະກາດ 2 ປີແລ້ວ ແຕ່ຂ້ອຍບໍ່ເຄີຍລົມກັບຜູ້ຄົນ. ແຕ່ຫຼາຍຢ່າງກໍປ່ຽນໄປເມື່ອຂ້ອຍໃຊ້ເວລາຢູ່ກັບພີ່ນ້ອງທີ່ກ້າຫານແລະອຸທິດຕົວໃຫ້ພະເຢໂຫວາ. ພີ່ນ້ອງບາງຄົນເຄີຍຢູ່ຄ້າຍກັກຂັງນາຊີແລະບາງຄົນເຄີຍຕິດຄຸກຢູ່ເຢຍລະມັນຕາເວັນອອກ. ສ່ວນຄົນອື່ນໆກໍຍອມສ່ຽງທີ່ຈະຖືກຈັບເພາະລັກເອົາໜັງສືເຂົ້າໃນໄປໃນເຢຍລະມັນຕາເວັນອອກ. ຕົວຢ່າງຂອງເຂົາເຈົ້າເຮັດໃຫ້ຂ້ອຍປະທັບໃຈຫຼາຍ ຂ້ອຍຄິດວ່າຖ້າເຂົາເຈົ້າຍ່ອມສ່ຽງທີ່ຈະຕິດຄຸກເພື່ອພະເຢໂຫວາແລະພີ່ນ້ອງ ຂ້ອຍກໍຄວນເຊົາອາຍໄດ້ແລ້ວ.
ຂ້ອຍເລີ່ມເອົາຊະນະນິດໄສຂີ້ອາຍຕອນທີ່ເຂົ້າຮ່ວມໂຄງການການປະກາດພິເສດໃນປີ 1955. ໃນຈົດໝາຍທີ່ພິມໃນໃບແຈ້ງຂ່າວa ພີ່ນ້ອງນາທານ ນໍ ປະກາດວ່າ ນີ້ເປັນໜຶ່ງໃນໂຄງການທີ່ໃຫຍ່ທີ່ສຸດທີ່ອົງການເຄີຍຈັດຂຶ້ນມາ. ລາວເວົ້າວ່າ ຖ້າຜູ້ປະກາດທຸກຄົນມີສ່ວນຮ່ວມໃນໂຄງການນີ້ “ມັນຈະເປັນເດືອນທີ່ດີທີ່ສຸດຂອງວຽກປະກາດເທົ່າທີ່ເຄີຍເຮັດມາ” ແລະມັນກໍເປັນແບບນັ້ນແທ້ໆ! ບໍ່ດົນຫຼັງຈາກການປະກາດພິເສດເທື່ອນັ້ນ ຂ້ອຍກໍອຸທິດຕົວໃຫ້ພະເຢໂຫວາ ແລະໃນປີ 1956 ຂ້ອຍກໍຮັບບັບເຕມາພ້ອມກັບພໍ່ແລະນ້ອງສາວຂອງຂ້ອຍ. ແຕ່ຫຼັງຈາກນັ້ນ ຂ້ອຍກໍມີເລື່ອງສຳຄັນທີ່ຕ້ອງຕັດສິນໃຈໃນຊີວິດ.
ຕະຫຼອດຫຼາຍປີທີ່ຜ່ານມາ ຂ້ອຍຮູ້ວ່າຂ້ອຍຄວນເລີ່ມເປັນໄພໂອເນຍ ແຕ່ກໍຄິດວ່າເອົາໄວ້ເທື່ອໜ້າຄ່ອຍເປັນກໍໄດ້. ທຳອິດ ຂ້ອຍຕັດສິນໃຈໄປຮຽນຢູ່ແບັກແລັງກ່ຽວກັບການສົ່ງອອກແລະນຳເຂົ້າສິນຄ້າຕ່າງປະເທດ. ຈາກນັ້ນ ຂ້ອຍກໍຢາກເຮັດວຽກຕາມທີ່ໄດ້ຮຽນມາເພື່ອຈະມີປະສົບການຫຼາຍໆແລ້ວຈຶ່ງເລີ່ມເປັນໄພໂອເນຍ. ໃນປີ 1961 ຂ້ອຍໄດ້ໄປເຮັດວຽກຢູ່ຮາມບວກເຊິ່ງເປັນເມືອງໃຫຍ່ທີ່ສຸດໃນບັນດາເມືອງທີ່ມີທ່າເຮືອໃນເຢຍລະມັນ ເມື່ອຂ້ອຍເຮັດວຽກນີ້ ຂ້ອຍກໍແຮ່ງມັກມັນຫຼາຍຂຶ້ນຈົນເລື່ອນການເປັນໄພໂອເນຍ. ແລ້ວຂ້ອຍຈະເຮັດແນວໃດ?
ຂ້ອຍຢາກຂອບໃຈພະເຢໂຫວາທີ່ໃຊ້ພີ່ນ້ອງທີ່ໜ້າຮັກມາຊ່ວຍຂ້ອຍໃຫ້ເຂົ້າໃຈວ່າ ການຮັບໃຊ້ພະອົງເປັນສິ່ງສຳຄັນທີ່ສຸດໃນຊີວິດ. ໝູ່ຂອງຂ້ອຍຫຼາຍຄົນເລີ່ມເປັນໄພໂອເນຍແລະກໍເປັນຕົວຢ່າງທີ່ດີສຳລັບຂ້ອຍ. ນອກຈາກນັ້ນ ພີ່ນ້ອງເອຣິກມັນ ເຊິ່ງລອດຊີວິດຈາກຄ້າຍກັກຂັງກໍໃຫ້ກຳລັງໃຈຂ້ອຍທີ່ຈະວາງໃຈໃນພະເຢໂຫວາ. ລາວບອກວ່າຕອນຢູ່ໃນຄ້າຍກັກຂັງ ພີ່ນ້ອງທີ່ໄວ້ວາງໃຈຕົວເອງໃນທີ່ສຸດຄວາມເຊື່ອກໍອ່ອນແອ ແຕ່ຜູ້ທີ່ວາງໃຈພະເຢໂຫວາຈະຮັກສາຄວາມສັດຊື່ໄວ້ໄດ້ ແລະເປັນເສົາຫຼັກຂອງປະຊາຄົມ.
ຕອນທີ່ຂ້ອຍເລີ່ມເປັນໄພໂອເນຍໃນປີ 1963
ນອກຈາກນັ້ນ ພີ່ນ້ອງມາຕິນ ເພີດຊິງເກີເຊິ່ງຕໍ່ມາໄດ້ເປັນຄະນະກຳມະການປົກຄອງກໍໃຫ້ກຳລັງພີ່ນ້ອງຄົນອື່ນໆສະເໝີ ໂດຍບອກວ່າ: “ຄວາມກ້າຫານເປັນຄືກັບຊັບທີ່ມີຄ່າທີ່ສຸດທີ່ເຮົາຄວນເກັບໄວ້!” ຫຼັງຈາກທີ່ຄິດຕຶກຕອງກ່ຽວກັບຄຳເວົ້ານັ້ນ ຂ້ອຍກໍລາອອກຈາກວຽກ ແລະເລີ່ມເປັນໄພໂອເນຍໃນເດືອນມິຖຸນາ ປີ 1963. ນັ້ນເປັນການຕັດສິນໃຈທີ່ດີທີ່ສຸດໃນຊີວິດ! ສອງເດືອນຕໍ່ມາ ຂ້ອຍກໍໄດ້ຖືກເຊີນໃຫ້ເປັນໄພໂອເນຍພິເສດ ເຊິ່ງຕອນນັ້ນຂ້ອຍບໍ່ທັນໄດ້ຊອກວຽກເຮັດຊ້ຳ ແລະບໍ່ເທົ່າໃດປີ ພະເຢໂຫວາກໍເຮັດໃນສິ່ງທີ່ຂ້ອຍຄິດບໍ່ເຖິງ ຂ້ອຍຖືກເຊີນເຂົ້າໂຮງຮຽນກິລຽດ ລຸ້ນທີ 44.
ໄດ້ບົດຮຽນທີ່ລ້ຳຄ່າຢູ່ກິລຽດ
ສິ່ງສຳຄັນທີ່ສຸດຢ່າງໜຶ່ງທີ່ຂ້ອຍໄດ້ຮຽນຈາກພີ່ນ້ອງນາທານ ນໍ ແລະພີ່ນ້ອງໄລແມນ ສະວິງໂກກໍຄື “ຢ່າຍອມແພ້ຕໍ່ວຽກມອບໝາຍຂອງເຈົ້າໄວເກີນໄປ.” ເຂົາເຈົ້າສະໜັບສະໜຸນເຮົາໃຫ້ເຮັດວຽກຮັບໃຊ້ຕໍ່ໄປເຖິງວ່າຈະມີຄວາມຫຍຸ້ງຍາກກໍຕາມ. ພີ່ນ້ອງນໍ ຖາມວ່າ: “ເຈົ້າຈະເບິ່ງຫຍັງ? ຄວາມເປິເປື້ອນ ແມງໄມ້ແລະຄວາມທຸກຍາກເບາະ? ຫຼືເຈົ້າຈະເບິ່ງຕົ້ນໄມ້ ດອກໄມ້ ແລະໃບໜ້າທີ່ມີຄວາມສຸກ? ເຈົ້າຕ້ອງຮຽນຮູ້ທີ່ຈະຮັກຜູ້ຄົນ! ມື້ໜຶ່ງ ພີ່ນ້ອງສະວິງໂກອະທິບາຍດ້ວຍນ້ຳຕາຊຶມປໍ້ແລະສະອື້ນວ່າເປັນຫຍັງພີ່ນ້ອງບາງຄົນຈຶ່ງຍອມແພ້ຕໍ່ວຽກມອບໝາຍຢ່າງໄວວາ. ເຫດການນັ້ນມັນເຮັດໃຫ້ຂ້ອຍປະທັບໃຈຫຼາຍ ແລະຢາກຕັ້ງໃຈແນ່ວແນ່ທີ່ຈະບໍ່ເຮັດໃຫ້ພະເຍຊູແລະພີ່ນ້ອງທີ່ສັດຊື່ຕ້ອງຜິດຫວັງ.”—ມັດ. 25:40
ຂ້ອຍ ຄລັອດ ແລະຮາຍຣິກໃນວຽກມອບໝາຍມິດຊັນນາລີຢູ່ເມືອງລູບຸມບາຊີ ປະເທດກົງໂກໃນປີ 1967
ຕອນທີ່ພວກເຮົາໄດ້ຮັບມອບໝາຍໃຫ້ໄປຮັບໃຊ້ຢູ່ເຂດອື່ນ ສະມາຊິກເບເທນບາງຄົນຢາກຮູ້ຈຶ່ງມາຖາມພວກເຮົາວ່າໄດ້ຮັບມອບໝາຍໃຫ້ໄປບ່ອນໃດແດ່. ເມື່ອໝູ່ຂອງຂ້ອຍບອກວ່າໄດ້ໄປບ່ອນໃດ ສະມາຊິກເບເທນກໍເວົ້າກ່ຽວກັບເລື່ອງດີໆຂອງປະເທດນັ້ນ ແຕ່ເມື່ອຮອດທີ່ຂ້ອຍເວົ້າ ຂ້ອຍບອກວ່າ: “ກົງໂກ (ກິນຊາຊາ).” ເຂົາເຈົ້າກໍຢຸດໄປບຶດໜຶ່ງແລ້ວບອກວ່າ: “ໂອ້ ກົງໂກພຸ້ນຫວາ ຂໍໃຫ້ພະເຢໂຫວາຊ່ວຍເດີ້!” ໃນຕອນນັ້ນ ກົງໂກ (ກິນຊາຊາ) ມີແຕ່ຂ່າວເລື່ອງສົງຄາມ ອາຊະຍາກຳ ແລະການລອບສັງຫານ. ແຕ່ເຖິງຈະເປັນແບບນັ້ນ ຂ້ອຍກໍພະຍາຍາມຄິດເຖິງສິ່ງທີ່ໄດ້ຮຽນໃນກິລຽດ. ບໍ່ດົນຫຼັງຈາກຈົບການຮຽນເດືອນກັນຍາ ປີ 1967 ຂ້ອຍກັບຮາຍຣິກ ເດັນບຸດໂຊ ແລະຄລອດ ລິນຊີກໍເດີນທາງໄປທີ່ກິນຊາຊາເມືອງຫຼວງຂອງກົງໂກ.
ການຝຶກອົບຮົມທີ່ດີເລີດສຳລັບມິດຊັນນາລີ
ເມື່ອມາຮອດກິນຊາຊາ ພວກເຮົາກໍໄດ້ຮຽນພາສາຝຣັ່ງ 3 ເດືອນ. ຈາກນັ້ນ ພວກເຮົາກໍຂີ່ຍົນໄປເມືອງລູບຸມບາຊີເຊິ່ງກ່ອນໜ້ານັ້ນມີຊື່ວ່າ ເອລິຊາເບດວິວ ທີ່ຢູ່ທາງໃຕ້ສຸດຂອງກົງໂກໃກ້ກັບຊາຍແດນຊຳບີ. ພວກເຮົາຍ້າຍໄປເຮືອນມິດຊັນນາລີທີ່ຢູ່ໃຈກາງເມືອງ.
ເນື່ອງຈາກເຂດໃນເມືອງລູບຸມບາຊີສ່ວນໃຫຍ່ຍັງບໍ່ມີໃຜໄປປະກາດ ພວກເຮົາກໍເລີຍຮູ້ສຶກຕື່ນເຕັ້ນທີ່ໄດ້ພົບຜູ້ຄົນທີ່ບໍ່ເຄີຍໄດ້ຍິນຂ່າວດີເລື່ອງລາຊະອານາຈັກຂອງພະເຈົ້າ. ບໍ່ດົນພວກເຮົາກໍມີນັກສຶກສາຫຼາຍຈົນສຶກສາບໍ່ໄຫວ. ພວກເຮົາຍັງໄດ້ປະກາດກັບຕຳຫຼວດ ແລະເຈົ້າໜ້າທີ່ຫຼາຍຄົນທີ່ເຮັດວຽກກັບລັດຖະບານ. ຫຼາຍຄົນນັບຖືຄຳພີໄບເບິນແລະວຽກຂອງເຮົາ. ຜູ້ຄົນສ່ວນຫຼາຍເວົ້າພາສາສະວາຮິລີ ຂ້ອຍກັບຄລອດກໍໄດ້ຮຽນພາສານັ້ນນຳ ແລະບໍ່ດົນ ພວກເຮົາກໍຖືກມອບໝາຍໃຫ້ໄປຢູ່ປະຊາຄົມພາສາສະວາຮິລີ.
ເຖິງວ່າພວກເຮົາຈະມີປະສົບການດີໆຫຼາຍຢ່າງ ແຕ່ກໍຍັງປະສົບບັນຫາ. ຫຼາຍເທື່ອເຮົາຕ້ອງເຈິກັບທະຫານເມົາເຫຼົ້າທີ່ມີປືນແລະພວກຕຳຫຼວດທີ່ມັກຫາເລື່ອງວ່າພວກເຮົາເຮັດຜິດ. ມີເທື່ອໜຶ່ງ ຕຳຫຼວດຫຼາຍຄົນຖືປືນເຂົ້າມາບຸກເຮືອນຂອງມິດຊັນນາລີຕອນທີ່ປະຊຸມຢູ່ ແລະພາພວກເຮົາໄປຫ້ອງການຕຳຫຼວດ ຈາກນັ້ນກໍບອກໃຫ້ນັ່ງຢູ່ພື້ນຈົນຮອດ 10 ໂມງແລງກ່ອນທີ່ຈະປ່ອຍໃຫ້ພວກເຮົາໄປ.
ໃນປີ 1969 ຂ້ອຍຖືກມອບໝາຍໃຫ້ເປັນຜູ້ດູແລໝວດ. ໃນການເດີນໝວດນັ້ນ ບາງເທື່ອຂ້ອຍຕ້ອງຍ່າງໄກຫຼາຍແລະຍ່າງຜ່ານທາງທີ່ເປັນຂີ້ຕົມແລະຫຍ້າສູງເຊິ່ງເປັນເລື່ອງປົກກະຕິໃນອາຝຼິກກາ. ຢູ່ເຮືອນຫຼັງໜຶ່ງ ມີໄກ່ໂຕແມ່ທີ່ມັກພາລູກຂອງມັນມານອນຢູ່ກ້ອງຕຽງຂອງຂ້ອຍຕອນຄ່ຳ ຂ້ອຍບໍ່ເຄີຍລືມເລີຍວ່າມັນປຸກຂ້ອຍດ້ວຍສຽງບັກດັງໆຕັ້ງແຕ່ເຊົ້າໆທ້ອງຟ້າກໍຍັງມືດຢູ່. ຂ້ອຍມີຄວາມສຸກຫຼາຍເມື່ອຄິດເຖິງຕອນທີ່ນັ່ງອ້ອມຮອບກອງໄຟແລະໄດ້ລົມກັບພີ່ນ້ອງເລື່ອງຄວາມຈິງໃນຄຳພີໄບເບິນ.
ບັນຫາທີ່ໃຫຍ່ທີ່ສຸດຢ່າງໜຶ່ງກໍຄື ການຮັບມືກັບຄົນທີ່ປອມຕົວມາເປັນພະຍານພະເຢໂຫວາເຊິ່ງແທ້ໆແລ້ວເຂົາເຈົ້າເປັນສະມາຊິກກຸ່ມຄິທາວາລະ.bບາງຄົນໃນກຸ່ມນີ້ໄດ້ຮັບບັບເຕມາແລະເຖິງຂັ້ນເປັນຜູ້ເຖົ້າແກ່ໃນປະຊາຄົມ ແຕ່ຄົນເຫຼົ່ານີ້ເປັນຄື “ກັບຫີນແກ້ງ” ເຂົາເຈົ້າບໍ່ສາມາດຫຼອກລວງພີ່ນ້ອງທີ່ສັດຊື່ຂອງເຮົາໄດ້. (ຢູເດ 12) ໃນທີ່ສຸດ ພະເຢໂຫວາກໍເຮັດໃຫ້ຄົນເຫຼົ່ານີ້ອອກໄປຈາກປະຊາຄົມ ຫຼັງຈາກນັ້ນ ກໍມີຜູ້ຄົນທີ່ເຂົ້າມາໃນຄວາມຈິງເພີ່ມຂຶ້ນຢ່າງໜ້າງຶດງໍ້.
ໃນປີ 1971 ຂ້ອຍໄດ້ຮັບມອບໝາຍໃຫ້ເຮັດວຽກຢູ່ສຳນັກງານສາຂາໃນກິນຊາຊາ ຂ້ອຍເບິ່ງແຍງວຽກຫຼາຍຢ່າງເຊັ່ນ: ຕອບຈົດໝາຍ ສັ່ງໜັງສື ແລະເລື່ອງອື່ນໆກ່ຽວກັບວຽກຮັບໃຊ້. ຢູ່ເບເທນ ຂ້ອຍຮຽນຮູ້ວິທີທີ່ຈະຈັດລະບຽບວຽກຮັບໃຊ້ໃນປະເທດທີ່ກວ້າງໃຫຍ່ເຊິ່ງມີພື້ນຖານໂຄງລ່າງບໍ່ຄ່ອຍດີປານໃດ. ຫຼາຍເທື່ອ ພວກເຮົາໄດ້ສົ່ງຈົດໝາຍທາງຍົນ ເຊິ່ງຕ້ອງໃຊ້ເວລາຫຼາຍເດືອນກວ່າຈະຮອດປະຊາຄົມຕ່າງໆ. ປົກກະຕິແລ້ວ ໄປສະນີຈະເອົາຈົດໝາຍຈາກຍົນໃສ່ໃນເຮືອ ແຕ່ເຮືອກໍຈະໄປຕິດຢູ່ກໍຜັກຕົບຫຼາຍອາທິດ. ເຖິງວ່າຈະມີບັນຫາເຫຼົ່ານີ້ແລະບັນຫາອື່ນໆ ແຕ່ວຽກກໍປະສົບຜົນສຳເລັດ.
ຂ້ອຍງຶດຂະໜາດທີ່ເຫັນພີ່ນ້ອງໃນກົງໂກສາມາດຈັດການປະຊຸມໃຫຍ່ໄດ້ເຖິງວ່າຈະບໍ່ມີເງິນຫຼາຍ. ເຂົາເຈົ້າໄດ້ຂຸດໂພນປວກເພື່ອຈະເຮັດເປັນເວທີ ໃຊ້ຫຍ້າເຮັດເປັນຝາກັ້ນແລະຍັງເອົາມາມ້ວນເຂົ້າກັນເພື່ອຈະເຮັດບ່ອນນັ່ງ. ເຂົາເຈົ້າຕັດໄມ້ໄຜ່ມາເຮັດເສົາ ເຮັດໂຕະແລະເອົາມາສານເປັນສາດເພື່ອມຸງຫຼັງຄາ. ເນື່ອງຈາກບໍ່ມີເຫຼັກຕະປູ ເຂົາເຈົ້າຈຶ່ງຕັດໄມ້ນ້ອຍມາເຮັດເປັນເຫຼັກຕະປູແທນ. ຂ້ອຍປະທັບໃຈຫຼາຍທີ່ເຫັນຄວາມຄິດສ້າງສັນຂອງພີ່ນ້ອງໃນການແກ້ໄຂບັນຫາ. ຂ້ອຍຮັກເຂົາເຈົ້າຫຼາຍ. ຂ້ອຍຄິດຮອດເຂົາເຈົ້າແທ້ໆຕອນທີ່ຕ້ອງຍ້າຍໄປວຽກມອບໝາຍໃໝ່!
ຮັບໃຊ້ຢູ່ເກນຢາ
ໃນປີ 1974 ຂ້ອຍຍ້າຍໄປເຮັດວຽກຢູ່ສຳນັກງານສາຂາໃນເມືອງແນໂຣບີ ປະເທດເກນຢາ. ມີຫຼາຍຢ່າງທີ່ເຮົາຕ້ອງເຮັດເພາະສາຂາເກນຢາເບິ່ງແຍງວຽກປະກາດໃນອີກ 10 ປະເທດ ແລະບາງປະເທດວຽກຂອງເຮົາກໍຖືກສັ່ງຫ້າມ. ຂ້ອຍຖືກສົ່ງໄປຢາມປະເທດທີ່ຖືກສັ່ງຫ້າມເລື້ອຍໆ ໂດຍສະເພາະແມ່ນປະເທດເອທິໂອປີເຊິ່ງໃນຕອນນັ້ນພີ່ນ້ອງຖືກຂົ່ມເຫງແລະລຳບາກຫຼາຍ. ຫຼາຍຄົນຖືກຂົ່ມເຫງຢ່າງໂຫດຮ້າຍ ຖືກຈັບຂັງຄຸກ ບາງຄົນກໍຖືກຂ້າ ແຕ່ເຂົາເຈົ້າກໍອົດທົນຢ່າງສັດຊື່ເພາະເຂົາເຈົ້າມີສາຍສຳພັນທີ່ໃກ້ຊິດກັບພະເຢໂຫວາແລະຮັກຄົນອື່ນ.
ໃນປີ 1980 ຂ້ອຍມີຄວາມສຸກຫຼາຍທີ່ໄດ້ແຕ່ງດອງກັບເກວ ແມັດເທີສັນ. ລາວເປັນຄົນການາດາ ແລະລາວກໍຢູ່ຫ້ອງດຽວກັນກັບຂ້ອຍໃນໂຮງຮຽນກິລຽດ ພວກເຮົາຂຽນຈົດໝາຍຕິດຕໍ່ຫາກັນ. ເກວຖືກມອບໝາຍໃຫ້ໄປເປັນມິດຊັນນາລີຢູ່ປະເທດໂບລີວີ. ຫຼັງຈາກ 12 ປີຜ່ານໄປ ພວກເຮົາກໍມາພົບກັນອີກຢູ່ເມືອງນິວຢອກ ແລະບໍ່ດົນຫຼັງຈາກທີ່ເຮົາແຕ່ງດອງຢູ່ເກນຢາ. ຂ້ອຍຮູ້ສຶກພູມໃຈໃນຕົວເກວຫຼາຍ ເພາະລາວມັກຄິດເຖິງສິ່ງທີ່ພະເຢໂຫວາເຮັດເພື່ອລາວສະເໝີ ແລະພໍໃຈໃນສິ່ງທີ່ຕົວເອງມີ. ຕອນນີ້ລາວຍັງເປັນຄູ່ຊີວິດທີ່ໜ້າຮັກ ສະໜັບສະໜຸນຂ້ອຍສະເໝີ ແລະມີຄ່າສຳລັບຂ້ອຍແທ້ໆ.
ໃນປີ 1986 ຂ້ອຍກັບເກວໄດ້ຮັບມອບໝາຍໃຫ້ເຮັດວຽກເປັນຜູ້ດູແລເດີນທາງ ແລະໃນຕອນນັ້ນ ຂ້ອຍກໍເປັນຄະນະກຳມະການສາຂານຳ. ວຽກຂອງຜູ້ດູແລເດີນທາງເຮັດໃຫ້ເຮົາໄດ້ເດີນທາງໄປຫຼາຍປະເທດທີ່ຢູ່ພາຍໃຕ້ການເບິ່ງແຍງຂອງສາຂາປະເທດເກນຢາ.
ບັນລະຍາຍຢູ່ການປະຊຸມໃຫຍ່ໃນເມືອງອັດສະມາຣາໃນປີ 1992
ຂ້ອຍມີຄວາມສຸກຫຼາຍເມື່ອຄິດເຖິງຕອນທີ່ກຽມການປະຊຸມໃຫຍ່ໃນປີ 1992 ຢູ່ເມືອງອັດມາຣາ (ຢູ່ເອຣີເຕຣ) ໃນຕອນນັ້ນ ວຽກຂອງເຮົາຍັງບໍ່ຖືກສັ່ງຫ້າມ. ພວກເຮົາຊອກບ່ອນປະຊຸມໄດ້ແຕ່ສາງເກັບເຂົ້າບ່ອນໜຶ່ງ ເມື່ອເບິ່ງຈາກທາງນອກແລ້ວມັນຂີ້ຮ້າຍ ແຕ່ເບິ່ງທາງໃນກໍແຮ່ງຂີ້ຮ້າຍກວ່າ. ພໍຮອດມື້ປະຊຸມ ຂ້ອຍຮູ້ສຶກງຶດອີ່ຫຼີທີ່ພີ່ນ້ອງໄດ້ປ່ຽນບ່ອນນັ້ນໃຫ້ສະອາດງາມຕາ ແລະເໝາະສົມທີ່ຈະນະມັດສະການພະເຢໂຫວາແທ້ໆ. ພີ່ນ້ອງຫຼາຍຄົນຊ່ວຍກັນເອົາຜ້າມາຕົບແຕ່ງສະຖານທີ່ ແລະມີວິທີບັງສິ່ງຕ່າງໆທີ່ບໍ່ງາມໄວ້ໃຫ້ຮຽບຮ້ອຍ. ພວກເຮົາປະຊຸມກັນຢ່າງມີຄວາມສຸກແລະຮູ້ສຶກຕື່ນເຕັ້ນທີ່ມີຜູ້ເຂົ້າຮ່ວມການປະຊຸມ 1.279 ຄົນ.
ຕອນທີ່ເຮັດວຽກເປັນຜູ້ດູແລໝວດ ເຮົາຕ້ອງປັບຕົວຫຼາຍຢ່າງເພາະບ່ອນພັກໃນແຕ່ລະອາທິດບໍ່ຄືກັນ. ບາງເທື່ອເຮົາໄດ້ພັກຢູ່ເຮືອນຫຼັງໃຫຍ່ທີ່ຫຼູຫຼາຕິດທະເລ ບາງເທື່ອເຮົາກໍພັກຢູ່ຕູບກຳມະກອນ ແລະຫ້ອງນ້ຳກໍຢູ່ໄກຫຼາຍກວ່າ 100 ແມັດ. ແຕ່ບໍ່ວ່າເຮົາຈະຮັບໃຊ້ຢູ່ບ່ອນໃດ ສິ່ງທີ່ຈື່ໄດ້ດີແລະມີຄວາມສຸກກໍຄື ການໄປຮັບໃຊ້ໝົດມື້ກັບໄພໂອເນຍແລະຜູ້ປະກາດທີ່ກະຕືລືລົ້ນ. ຕໍ່ມາເຮົາກໍໄດ້ຮັບວຽກມອບໝາຍໃໝ່ອີກ ແລ້ວເຮົາກໍຕ້ອງລາຈາກໝູ່ທີ່ຮັກເຫຼົ່ານີ້ ພວກເຮົາຄິດຮອດເຂົາເຈົ້າຫຼາຍແທ້ໆ.
ໄດ້ຮັບພອນຢ່າງຫຼວງຫຼາຍໃນເອທິໂອປີ
ໃນໄລຍະທ້າຍປີ 1980 ຫາຕົ້ນປີ 1990 ວຽກຂອງເຮົາໃນຫຼາຍໆປະເທດທີ່ຢູ່ພາຍໃຕ້ການເບິ່ງແຍງຂອງຂອງສາຂາເກນຢາໄດ້ຮັບການຮັບຮອງຢ່າງຖືກຕ້ອງຕາມກົດໝາຍ. ຜົນກໍຄື ມີການຕັ້ງສຳນັກງານສາຂາ ແລະສຳນັກງານປະເທດຂຶ້ນຢູ່ຫຼາຍບ່ອນ. ໃນປີ 1993 ເຮົາສອງຄົນໄດ້ຮັບມອບໝາຍໃຫ້ໄປຮັບໃຊ້ຢູ່ສາຂາໃນເມືອງອັດດິດ ອາເບບາ ປະເທດເອທິໂອປີເຊິ່ງເຮົາຕ້ອງເຮັດວຽກຢ່າງລັບໆຢູ່ຫຼາຍສິບປີ ແຕ່ດຽວນີ້ວຽກຂອງເຮົາຢູ່ບ່ອນນັ້ນໃນຮັບການຮັບຮອງຕາມກົດໝາຍແລ້ວ.
ເຮັດວຽກເດີນໝວດຢູ່ເຂດຊົນນະບົດຂອງເອທິໂອປີໃນປີ 1996
ພະເຢໂຫວາອວຍພອນວຽກງານໃນເອທິໂອປີ. ພີ່ນ້ອງຫຼາຍຄົນຮັບໃຊ້ເປັນໄພໂອເນຍ ແຕ່ລະປີນັບຕັ້ງແຕ່ປີ 2012 ມີຜູ້ປະກາດຫຼາຍກວ່າ 20 ເປີເຊັນທີ່ຮັບໃຊ້ເປັນໄພໂອເນຍປະຈຳ. ນອກຈາກນັ້ນ ຍັງມີການຈັດໂຮງຮຽນຂອງອົງການໃນຫຼາຍບ່ອນເພື່ອຝຶກອົບຮົມພີ່ນ້ອງ ແລະມີການກໍ່ສ້າງຫໍປະຊຸມຫຼາຍກວ່າ 120 ແຫ່ງ. ໃນປີ 2004 ຄອບຄົວເບເທນໄດ້ຍ້າຍໄປຢູ່ບ່ອນໃໝ່ ແລະໃນບ່ອນໃໝ່ນັ້ນກໍມີການສ້າງຫໍປະຊຸມໃຫຍ່ນຳ ນີ້ສະແດງວ່າພະເຢໂຫວາອວຍພອນແທ້ໆ.
ຫຼາຍປີທີ່ຜ່ານມາ ຂ້ອຍກັບເກວມີຄວາມສຸກຫຼາຍທີ່ໄດ້ສະໜິດກັບພີ່ນ້ອງໃນເອທິໂອປີ. ເຮົາຮັກເຂົາເຈົ້າແທ້ໆເພາະເຂົາເຈົ້າໃຈດີແລະໜ້າຮັກ. ຕອນນີ້ເຮົາກຳລັງມີບັນຫາສຸຂະພາບ ຈຶ່ງເຮັດໃຫ້ເຮົາທັງສອງຖືກມອບໝາຍໄປຢູ່ສາຂາເອີຣົບກາງ. ໃນບ່ອນນັ້ນເຮົາໄດ້ຮັບການເບິ່ງແຍງເປັນຢ່າງດີ ແຕ່ເຮົາກໍຍັງຄິດຮອດພີ່ນ້ອງທີ່ຮັກໃນເອທິໂອປີສະເໝີ.
ພະເຢໂຫວາເຮັດໃຫ້ເຕີບໃຫຍ່
ເຮົາໄດ້ເຫັນດ້ວຍຕົວເອງວ່າພະເຢໂຫວາເຮັດໃຫ້ວຽກຂອງພະອົງເຕີບໃຫຍ່ແລະກ້າວໜ້າແນວໃດ. (1 ໂກ. 3:6, 9) ຕົວຢ່າງເຊັ່ນ ຕອນທີ່ຂ້ອຍເລີ່ມປະກາດກັບຄົນຣູອັນດາທີ່ເປັນກຳມະກອນໃນເຂດທີ່ຂຸດຄົ້ນທອງແດງຢູ່ກົງໂກ ຕອນນັ້ນບໍ່ມີຜູ້ປະກາດໃນຣູອັນດາເລີຍ ແຕ່ຕອນນີ້ມີຜູ້ປະກາດຫຼາຍກວ່າ 30.000 ຄົນ. ນອກຈາກນັ້ນ ໃນປີ 1967 ມີຜູ້ປະກາດຢູ່ກົງໂກ (ກິນຊາຊາ) ປະມານ 6.000 ຄົນ ແຕ່ຕອນນີ້ມີປະມານ 230.000 ຄົນ ແລະໃນປີ 2018 ມີຜູ້ເຂົ້າຮ່ວມການປະຊຸມອະນຸສອນຫຼາຍກວ່າ 1 ລ້ານຄົນ. ໃນຫຼາຍໆປະເທດທີ່ເຄີຍຢູ່ພາຍໃຕ້ການເບິ່ງແຍງຂອງສາຂາເກນຢາ ມີຈຳນວນຜູ້ປະກາດເພີ່ມຂຶ້ນຫຼາຍກວ່າ 100.000 ຄົນ.
ຫຼາຍກວ່າ 50 ປີທີ່ຜ່ານມາ ພະເຢໂຫວາໃຊ້ພີ່ນ້ອງຫຼາຍຄົນຊ່ວຍຂ້ອຍໃຫ້ເລີ່ມຮັບໃຊ້ເຕັມເວລາ. ເຖິງວ່າຕອນນີ້ຂ້ອຍຍັງຂີ້ອາຍຢູ່ ແຕ່ຂ້ອຍກໍໄດ້ຮຽນຮູ້ທີ່ຈະໄວ້ວາງໃຈພະເຢໂຫວາ. ປະສົບການໃນອາຝຼິກກາຊ່ວຍຂ້ອຍໃຫ້ຝຶກຄວາມອົດທົນແລະພໍໃຈກັບສິ່ງທີ່ຕົວເອງມີ. ຂ້ອຍກັບເກວຊົມເຊີຍພີ່ນ້ອງທີ່ໜ້າຮັກເຫຼົ່ານັ້ນເຊິ່ງໄດ້ສະແດງນ້ຳໃຈຕ້ອນຮັບແຂກ ອົດທົນກັບບັນຫາ ແລະໄວ້ວາງໃຈພະເຢໂຫວາ. ຂ້ອຍຮູ້ສຶກຂອບໃຈຄວາມກະລຸນາທີ່ຍິ່ງໃຫຍ່ຂອງພະເຢໂຫວາແທ້ໆ. ພະອົງອວຍພອນຂ້ອຍຫຼາຍກວ່າທີ່ຂ້ອຍຄາດຄິດ.—ເພງ. 37:4
a ຕໍ່ມາເອີ້ນວ່າພະລາຊະກິດຂອງເຮົາ ປັດຈຸບັນແມ່ນຊີວິດຄລິດສະຕຽນແລະວຽກຮັບໃຊ້—ຄູ່ມືການປະຊຸມ.
b “ຄິທາວາລະ” ເປັນພາສາສະວາຮິລີເຊິ່ງໝາຍເຖິງ “ຄອບງຳ ຊີ້ນຳຫຼືປົກຄອງ.” ຈຸດປະສົງຂອງກຸ່ມນີ້ຄືຫວັງຜົນທາງການເມືອງ ເຂົາເຈົ້າຕ້ອງການແຍກຕົວໃຫ້ເປັນອິດສະຫຼະຈາກແບນຊິກ. ກຸ່ມຄິທາວາລະໄດ້ສຶກສາໜັງສືຕ່າງໆຂອງພະຍານພະເຢໂຫວາ ແລະບິດເບືອນຄຳສອນໃນຄຳພີໄບເບິນເພື່ອສະໜັບສະໜຸນຄວາມຄິດທາງການເມືອງ ທຳນຽມທີ່ກ່ຽວຂ້ອງກັບຜີ ແລະການໃຊ້ຊີວິດແບບຜິດສິນລະທຳ.