ເຈົ້າຮູ້ບໍ?
ພໍ່ບ້ານໃນສະໄໝຄຳພີໄບເບິນມີໜ້າທີ່ຫຍັງ?
ໃນສະໄໝຄຳພີໄບເບິນ ພໍ່ບ້ານມີໜ້າທີ່ເບິ່ງແຍງເຮືອນຫຼືຊັບສົມບັດຂອງເຈົ້ານາຍ. ຄຳພາສາເຫບເລີແລະພາສາເກັຣກແປຄຳວ່າ “ພໍ່ບ້ານ” ບາງເທື່ອກໍໝາຍເຖິງຜູ້ເບິ່ງແຍງເຮືອນຫຼືຜູ້ຈັດການບ້ານ.
ຕອນທີ່ໂຢເຊບລູກຊາຍຂອງຢາໂຄບເປັນທາດໃນເອຢິບ ໂຢເຊບໄດ້ກາຍມາເປັນພໍ່ບ້ານທີ່ແຍງເຮືອນຂອງເຈົ້ານາຍທີ່ເປັນຄົນເອຢິບ. ທີ່ຈິງ ເຈົ້ານາຍໄດ້ “ມອບຂອງທັງປວງແຫ່ງຕົນໄວ້ໃນມືທ້າວໂຢເຊບ.” (ຕົ້ນ. 39:2-6) ຕໍ່ມາ ເມື່ອໂຢເຊບໄດ້ເປັນຜູ້ປົກຄອງທີ່ມີອຳນາດຫຼາຍໃນເອຢິບ ລາວກໍ່ໄດ້ແຕ່ງຕັ້ງພໍ່ບ້ານຄົນໜຶ່ງໃຫ້ເບິ່ງແຍງເຮືອນຂອງລາວ.—ຕົ້ນ. 44:4
ໃນສະໄໝພະເຍຊູ ເຈົ້າຂອງທີ່ດິນມັກຈະອາໄສຢູ່ໃນເມືອງເຊິ່ງໄກຈາກຟາມຂອງພວກເຂົາ. ດັ່ງນັ້ນ ເຈົ້າຂອງທີ່ດິນຈຶ່ງແຕ່ງຕັ້ງພໍ່ບ້ານໃຫ້ເບິ່ງແຍງຄົນທີ່ເຮັດວຽກໃນຟາມນັ້ນ.
ຄົນທີ່ຈະມາເປັນພໍ່ບ້ານຕ້ອງມີຄຸນສົມບັດຫຍັງແດ່? ນັກຂຽນຊາວໂລມໃນສະຕະວັດທຳອິດທີ່ຊື່ ຄໍລູເມວລາບອກວ່າ ທາດທີ່ຖືກແຕ່ງຕັ້ງໃຫ້ເປັນຜູ້ເບິ່ງແຍງເຮືອນຫຼືພໍ່ບ້ານຄວນຈະເປັນ “ຄົນທີ່ມີປະສົບການ” ທີ່ເຄີຍເຮັດວຽກຢູ່ຟາມມາກ່ອນ ແລະລາວຄວນຈະເປັນຄົນທີ່ “ສາມາດຄວບຄຸມຄົນງານໃຫ້ເຮັດຕາມທີ່ຕ້ອງການໄດ້ ແຕ່ບໍ່ໄດ້ເຮັດແບບໂຫດຮ້າຍ.” ນັກຂຽນຄົນນີ້ຍັງບອກອີກວ່າ ສິ່ງສຳຄັນທີ່ສຸດສຳລັບຄົນທີ່ເປັນພໍ່ບ້ານຄື ລາວບໍ່ຄວນຄິດວ່າລາວຮູ້ທຸກຢ່າງ ແຕ່ລາວຄວນຈະເປັນຄົນທີ່ກະຕືລືລົ້ນຢາກຮຽນຮູ້ສິ່ງໃໝ່ໆສະເໝີ.
ຄຳພີໄບເບິນໃຊ້ຕົວຢ່າງຂອງພໍ່ບ້ານຫຼືຄົນຮັບໃຊ້ເພື່ອປຽບທຽບກັບສິ່ງທີ່ເກີດຂຶ້ນໃນປະຊາຄົມຄລິດສະຕຽນ. ຕົວຢ່າງ: ອັກຄະສາວົກເປໂຕບອກຄລິດສະຕຽນ “ໃຫ້ໃຊ້ຄວາມສາມາດຕາມຂະໜາດທີ່ໄດ້ຮັບມາເພື່ອຮັບໃຊ້ກັນໃນຖານະຄົນຮັບໃຊ້ທີ່ດີ.”—1 ເປ. 4:10, ລ.ມ.
ພະເຍຊູເອງກໍໃຊ້ຕົວຢ່າງຂອງພໍ່ບ້ານຫຼືຜູ້ຈັດການໃນຕົວຢ່າງປຽບທຽບໃນພະທຳລືກາ 16:1-8. ນອກຈາກນັ້ນ ໃນຄຳພະຍາກອນກ່ຽວກັບສັນຍານການປະທັບເປັນກະສັດຂອງພະເຍຊູ ເພິ່ນໄດ້ສັນຍາກັບລູກສິດວ່າຈະແຕ່ງຕັ້ງ “ທາດທີ່ສັດຊື່ແລະສຸຂຸມ” ຫຼື “ຄົນຮັບໃຊ້ທີ່ສັດຊື່ແລະສຸຂຸມ” ເຊິ່ງເອີ້ນອີກຢ່າງໜຶ່ງວ່າ “ພໍ່ບ້ານ.” ວຽກມອບໝາຍຫຼັກຂອງພວກເຂົາຄື ແຈກຢາຍອາຫານເຊິ່ງເປັນຄວາມຮູ້ທີ່ເສີມຄວາມເຊື່ອທີ່ລູກສິດຂອງພະຄລິດຈຳເປັນຕ້ອງໄດ້ຮັບໃນໄລຍະສະໄໝສຸດທ້າຍ. (ມັດ. 24:45-47, ລ.ມ.; ລືກາ 12:42, ລ.ມ.) ເຮົາຮູ້ສຶກຂອບໃຈຫຼາຍແທ້ໆທີ່ເຮົາໄດ້ຮັບປຶ້ມແລະສື່ຕ່າງໆທີ່ຄົນຮັບໃຊ້ທີ່ສັດຊື່ແລະສຸຂຸມຈັດກຽມໃຫ້ພວກເຮົາທົ່ວໂລກ.