ບົດຄວາມສຶກສາທີ 50
ພະເຢໂຫວາຊ່ວຍເຈົ້າໃຫ້ໄດ້ຮັບການປົດປ່ອຍເປັນອິດສະຫຼະ
“ຈົ່ງປ່າວປະກາດອິດສະຫຼະພາບໃນປະເທດສຳລັບຄົນທັງປວງທີ່ຢູ່ໃນທີ່ນັ້ນ.”—ເລວີ. 25:10
ເພງ 22 ລັດຖະບານຂອງພະເຈົ້າກໍ່ຕັ້ງແລ້ວ—ຂໍໃຫ້ມາເຖີດ!
ໃຈຄວາມສຳຄັນa
1-2. (ກ) ປີທີ່ໜ້າຍິນດີແມ່ນຫຍັງ? (ເບິ່ງຂອບ “ປີທີ່ໜ້າຍິນດີແມ່ນຫຍັງ?”) (ຂ) ພະເຢຊູເວົ້າເລື່ອງຫຍັງໃນລູກາ 4:16-18?
ຫຼາຍປະເທດມີການຈັດງານສະເຫຼີມສະຫຼອງເມື່ອກະສັດຫຼືລາຊີນີປົກຄອງຄົບຮອບ 50 ປີ. ອາດຈະມີການສະຫຼອງໜຶ່ງມື້ ຫຼືເປັນອາທິດ ຫຼືອາດຈະດົນກວ່ານັ້ນ. ແຕ່ໃນທີ່ສຸດເມື່ອການສະຫຼອງນັ້ນຈົບລົງໄດ້ບໍ່ດົນ ຜູ້ຄົນກໍລືມ.
2 ຊາວອິດສະຣາເອນບູຮານກໍສະເຫຼີມສະຫຼອງຄົບຮອບທຸກໆ 50 ປີເຊິ່ງເປັນເທສະການທີ່ຍິ່ງໃຫຍ່ທີ່ໃຊ້ເວລາໝົດປີ. ການສະຫຼອງນີ້ເອີ້ນວ່າ: ‘ປີທີ່ໜ້າຍິນດີ’. ປີທີ່ໜ້າຍິນດີໃນສະໄໝບູຮານນີ້ເຮັດໃຫ້ຊາວອິດສະຣາເອນໄດ້ຮັບການປົດປ່ອຍໃຫ້ເປັນອິດສະຫຼະ. ແຕ່ເປັນຫຍັງປີທີ່ໜ້າຍິນດີນີ້ຈຶ່ງສຳຄັນກັບເຮົາໃນທຸກມື້ນີ້? ເພາະມັນເຕືອນເຮົາໃຫ້ຄິດເຖິງການຈັດກຽມອັນດີເລີດຂອງພະເຢໂຫວາເຊິ່ງຈະເຮັດໃຫ້ເຮົາໄດ້ຮັບການປົດປ່ອຍໃຫ້ເປັນອິດສະຫຼະຕະຫຼອດໄປ ແລະເຮົາສາມາດໄດ້ຮັບປະໂຫຍດຕັ້ງແຕ່ຕອນນີ້ ເຊິ່ງພະເຢຊູກໍໄດ້ເວົ້າເຖິງການປົດປ່ອຍນີ້ຄືກັນ.—ອ່ານລູກາ 4:16-18
ປີທີ່ໜ້າຍິນດີເຮັດໃຫ້ຊາວອິດສະຣາເອນມີຄວາມສຸກເພາະຄົນທີ່ເຄີຍເປັນທາດສາມາດໄດ້ດິນຄືນແລະໄດ້ຢູ່ກັບຄອບຄົວຂອງຕົວເອງ (ເບິ່ງຂໍ້ 3)b
3. ຕາມພວກເລວີ 25:8-12 ປີທີ່ໜ້າຍິນດີມີປະໂຫຍດຕໍ່ຊາວອິດສະຣາເອນແນວໃດ?
3 ເຮົາຈະເຂົ້າໃຈຄວາມໝາຍຫຼາຍຂຶ້ນກ່ຽວກັບການປົດປ່ອຍໃຫ້ເປັນອິດສະຫຼະທີ່ພະເຢຊູເວົ້າເຖິງ ໂດຍພິຈາລະນາການຈັດກຽມຂອງພະເຢໂຫວາເລື່ອງປີທີ່ໜ້າຍິນດີທີ່ພະອົງໃຫ້ກັບຊາວອິດສະຣາເອນບູຮານ. ພະເຢໂຫວາບອກຊາວອິດສະຣາເອນວ່າ: “ຕັ້ງປີທີ 50 ນັ້ນໄວ້ເປັນບໍລິສຸດແລະຈົ່ງປ່າວປະກາດອິດສະຫຼະພາບໃນປະເທດສຳລັບຄົນທັງປວງທີ່ຢູ່ໃນທີ່ນັ້ນ. ປີນີ້ຈະເປັນປີຍິນດີສຳລັບພວກທ່ານ ຄົນທຸກຄົນຈົ່ງຄືນໄປອີກໃນດິນມູນແຫ່ງຕົນ ທຸກຄົນຈົ່ງຫຼົບໄປໃນຄອບຄົວແຫ່ງຕົນ.” (ອ່ານພວກເລວີ 25:8-12) ບົດຄວາມກ່ອນໜ້ານີ້ ເຮົາໄດ້ຮຽນຮູ້ວ່າວັນຊະບາໂຕມີປະໂຫຍດແນວໃດຕໍ່ຊາວອິດສະຣາເອນ. ແລ້ວປີທີ່ໜ້າຍິນດີນີ້ເດ ພວກເຂົາຈະໄດ້ຮັບປະໂຫຍດແນວໃດ? ສົມມຸດວ່າ ຄົນອິດສະຣາເອນຜູ້ໜຶ່ງມີໜີ້ສິນແລະຈຳເປັນຕ້ອງຂາຍດິນໄຊ້ໜີ້. ແຕ່ໃນປີທີ່ໜ້າຍິນດີນີ້ ລາວຈະໄດ້ດິນຄືນ. ດັ່ງນັ້ນ ລາວອາດຈະໄດ້ ‘ຄືນໄປຢູ່ໃນດິນມູນຂອງຕົນອີກ.’ ມູນມໍລະດົກທີ່ລາວຈະໃຫ້ກັບລູກຫຼານກໍຈະບໍ່ຕົກເປັນຂອງຄົນອື່ນ. ຫຼືຖ້າຄົນໜຶ່ງມີໜີ້ສິນຫຼາຍໂພດຈົນຕ້ອງຂາຍລູກແລະຕົວເອງໄປເປັນທາດເພື່ອໄຊ້ໜີ້ສິນ ໃນປີທີ່ໜ້າຍິນດີນີ້ ທາດຄົນນັ້ນກໍຈະກັບໄປຢູ່ກັບ ‘ຄອບຄົວຂອງຕົນ.’ ດັ່ງນັ້ນ ຈຶ່ງບໍ່ມີໃຜຕ້ອງເປັນທາດຕະຫຼອດຊີວິດໂດຍບໍ່ມີຄວາມຫວັງ! ພະເຢໂຫວາເປັນຫ່ວງປະຊາຊົນຂອງພະອົງຫຼາຍແທ້ໆ!
4-5. ເປັນຫຍັງຈຶ່ງສຳຄັນທີ່ເຮົາຈະຮຽນຮູ້ກ່ຽວກັບປີທີ່ໜ້າຍິນດີຂອງຊາວອິດສະຣາເອນບູຮານ?
4 ຜົນປະໂຫຍດອີກຢ່າງໜຶ່ງຂອງປີທີ່ໜ້າຍິນດີແມ່ນຫຍັງ? ພະເຢໂຫວາເວົ້າວ່າ: “ບໍ່ມີຄົນຈົນໃນທ່າມກາງພວກທ່ານ ເຫດວ່າພະເຢໂຫວາຈະອວຍພອນເປັນອັນບໍລິບູນໃຫ້ເຈົ້າ ໃນແຜ່ນດິນທີ່ພະເຢໂຫວາພະເຈົ້າຂອງເຈົ້າປະທານເປັນມູນໃຫ້ເຈົ້າມີໄວ້.” (ບັນຍັດ. 15:4) ນີ້ແຕກຕ່າງກັນຫຼາຍແທ້ໆກັບສິ່ງທີ່ເກີດຂຶ້ນໃນທຸກມື້ນີ້ ເຊັ່ນ: ຄົນລວຍກໍແຮ່ງລວຍຂຶ້ນ ຄົນທຸກກໍແຮ່ງທຸກລົງ!
5 ເນື່ອງຈາກເຮົາເປັນຄລິດສະຕຽນເຮົາບໍ່ໄດ້ຢູ່ພາຍໃຕ້ກົດໝາຍຂອງໂມເຊ ເຮົາຈຶ່ງບໍ່ຕ້ອງເຮັດຕາມກົດໝາຍຂອງປີທີ່ໜ້າຍິນດີເຊິ່ງກ່ຽວກັບການເປັນທາດ ການຍົກໜີ້ສິນ ແລະການຄືນທີ່ດິນ. (ຣມ. 7:4; 10:4; ອຟຊ. 2:15) ແຕ່ເປັນເລື່ອງສຳຄັນທີ່ເຮົາຈະຮຽນຮູ້ກ່ຽວກັບປີທີ່ໜ້າຍິນດີ. ຍ້ອນຫຍັງ? ຍ້ອນເຮົາໄດ້ຮັບການປົດປ່ອຍໃຫ້ເປັນອິດສະຫຼະຄືກັນ ເຮົາກໍຄວນຈະສົນໃຈໃນສິ່ງທີ່ພະເຢໂຫວາຈັດກຽມໃຫ້ຊາວອິດສະຣາເອນບູຮານ.
ພະເຢຊູປະກາດເລື່ອງການປົດປ່ອຍໃຫ້ເປັນອິດສະຫຼະ
6. ມະນຸດຕ້ອງໄດ້ຮັບການປົດປ່ອຍໃຫ້ເປັນອິດສະຫຼະຈາກຫຍັງ?
6 ເຮົາທຸກຄົນຕ້ອງໄດ້ຮັບການປົດປ່ອຍໃຫ້ເປັນອິດສະຫຼະຍ້ອນເຮົາເປັນທາດຂອງບາບທີ່ໂຫດຮ້າຍຫຼາຍ. ຜົນຂອງບາບເຮັດໃຫ້ເຮົາເຖົ້າແກ່ ເຈັບປ່ວຍ ແລະກໍຕາຍ. ຫຼາຍຄົນເຫັນຫຼັກຖານເລື່ອງນີ້ຈະແຈ້ງຕອນທີ່ແຍງແວ່ນຫຼືຕອນທີ່ໄປຫາໝໍເມື່ອເຈັບປ່ວຍ. ນອກຈາກນັ້ນ ເຮົາຍັງຮູ້ສຶກທໍ້ໃຈເມື່ອເຮົາເຮັດບາບ. ອັກຄະສາວົກໂປໂລຍອມຮັບວ່າ ລາວ “ຕົກຢູ່ໃຕ້ບັງຄັບກົດຂອງບາບທີ່ຢູ່ໃນຮ່າງກາຍ” ແລະຍັງບອກອີກວ່າ: “ຂ້ອຍຈັ່ງແມ່ນເປັນຕາໜ້າສົມເພດ ຜູ້ໃດຈະຊ່ວຍຂ້ອຍໃຫ້ພົ້ນຈາກຮ່າງກາຍທີ່ຕ້ອງຕາຍໄດ້ນີ້?”—ຣມ. 7:23, 24
7. ເອຊາອີໄດ້ບອກລ່ວງໜ້າເຖິງການປົດປ່ອຍແນວໃດ?
7 ເຮົາດີໃຈຫຼາຍແທ້ໆທີ່ພະເຈົ້າໄດ້ຈັດກຽມວິທີທີ່ຈະປົດປ່ອຍເຮົາໃຫ້ເປັນອິດສະຫຼະຈາກບາບ. ພະເຢຊູມີບົດບາດສຳຄັນເລື່ອງນີ້. ຫຼາຍກວ່າ 700 ປີກ່ອນທີ່ພະເຢຊູຈະມາແຜ່ນດິນໂລກ ຜູ້ພະຍາກອນເອຊາອີໄດ້ບອກລ່ວງໜ້າເຖິງການປົດປ່ອຍທີ່ຍິ່ງໃຫຍ່ໃນອະນາຄົດທີ່ດີກວ່າປີທີ່ໜ້າຍິນດີໃນສະໄໝຊາວອິດສະຣາເອນ. ລາວຂຽນວ່າ: “ພະເຢໂຫວາພະເຈົ້າຜູ້ຍິ່ງໃຫຍ່ສູງສຸດໃຫ້ພະລັງຂອງພະອົງກັບຂ້ອຍ ພະເຢໂຫວາແຕ່ງຕັ້ງຂ້ອຍໃຫ້ປະກາດຂ່າວດີກັບຄົນອ່ອນນ້ອມ ໃຫ້ຮັກສາຄົນທີ່ມີຫົວໃຈຊອກຊ້ຳ ໃຫ້ປະກາດເລື່ອງການປົດປ່ອຍແກ່ພວກຊະເລີຍ.” (ເອຊາ. 61:1, ລ.ມ.) ຄຳພະຍາກອນນີ້ໝາຍເຖິງໃຜ?
8. ຄຳພະຍາກອນຂອງເອຊາອີກ່ຽວກັບການປົດປ່ອຍໝາຍເຖິງໃຜ?
8 ຄຳພະຍາກອນສຳຄັນກ່ຽວກັບການປົດປ່ອຍໃຫ້ເປັນອິດສະຫຼະນີ້ເລີ່ມສຳເລັດເປັນຈິງຫຼັງຈາກພະເຢຊູເລີ່ມເຮັດວຽກຮັບໃຊ້. ຕອນໄປບ່ອນປະຊຸມຂອງຊາວຢິວຢູ່ນາຊາເຣັດເມືອງທີ່ເພິ່ນເກີດ ເພິ່ນອ່ານຄຳພະຍາກອນຂອງເອຊາອີຫຼາຍຂໍ້ໃຫ້ຊາວຢິວທີ່ມາເຕົ້າໂຮມກັນຟັງ ແລະບອກວ່າຄຳພະຍາກອນນີ້ໝາຍເຖິງຕົວເພິ່ນເອງ ເພິ່ນອ່ານວ່າ: “ພະເຢໂຫວາໃຫ້ພະລັງຂອງພະອົງກັບຂ້ອຍ ພະອົງແຕ່ງຕັ້ງຂ້ອຍໃຫ້ປະກາດຂ່າວດີແກ່ຄົນທຸກຍາກ ໃຫ້ປະກາດເລື່ອງການປົດປ່ອຍແກ່ພວກຊະເລີຍ ໃຫ້ບອກຄົນຕາບອດວ່າລາວຈະເຫັນຮຸ່ງ ໃຫ້ປົດປ່ອຍຄົນທີ່ຖືກກົດຂີ່ ແລະໃຫ້ປະກາດວ່າເຖິງເວລາໄດ້ຮັບພອນຈາກພະເຢໂຫວາແລ້ວ.” (ລກ. 4:16-19) ພະເຢຊູເຮັດໃຫ້ຄຳພະຍາກອນນີ້ສຳເລັດເປັນຈິງແນວໃດ?
ຄົນກຸ່ມທຳອິດທີ່ໄດ້ຮັບການປົດປ່ອຍໃຫ້ເປັນອິດສະຫຼະ
ພະເຢຊູປະກາດເລື່ອງການປົດປ່ອຍໃນບ່ອນປະຊຸມຂອງຊາວຢິວຢູ່ເມືອງນາຊາເຣັດ (ເບິ່ງຂໍ້ 8-9)
9. ຫຼາຍຄົນໃນສະໄໝພະເຢຊູຢາກໄດ້ອິດສະຫຼະແບບໃດ?
9 ການປົດປ່ອຍໃຫ້ເປັນອິດສະຫຼະທີ່ເອຊາອີບອກລ່ວງໜ້າແລະທີ່ພະເຢຊູອ່ານນັ້ນເລີ່ມຕົ້ນຂຶ້ນໃນສະໄໝຂອງເພິ່ນ. ເຮົາເຊື່ອເລື່ອງນີ້ຍ້ອນພະເຢຊູເອງບອກວ່າ: “ມື້ນີ້ ເລື່ອງທີ່ຂ້ອຍອ່ານຈາກພະຄຳພີຂໍ້ນີ້ກໍເປັນຈິງແລ້ວ.” (ລກ. 4:21) ຫຼາຍຄົນທີ່ໄດ້ຍິນພະເຢຊູອ່ານຕອນນັ້ນຄົງຫວັງວ່າຈະມີການປ່ຽນແປງທາງການເມືອງ ເພາະພວກເຂົາຢາກເປັນອິດສະຫຼະຈາກການປົກຄອງຂອງໂຣມ. ພວກເຂົາອາດຄິດຄືກັບຜູ້ຊາຍສອງຄົນທີ່ບອກວ່າ: “ພວກເຮົາເຄີຍຫວັງວ່າເພິ່ນຈະມາປົດປ່ອຍຄົນອິດສະຣາເອນໃຫ້ເປັນອິດສະຫຼະ.” (ລກ. 24:13, 21) ແຕ່ເຮົາຮູ້ວ່າພະເຢຊູບໍ່ໄດ້ບອກໃຫ້ພວກລູກສິດຕໍ່ຕ້ານການປົກຄອງທີ່ກົດຂີ່ຂອງໂຣມ ແທນທີ່ຈະເປັນແບບນັ້ນ ເພິ່ນໄດ້ບອກພວກລູກສິດວ່າ “ສິ່ງໃດທີ່ເປັນຂອງເຊຊາກໍໃຫ້ແກ່ເຊຊາ.” (ມທ. 22:21) ແລ້ວພະເຢຊູປົດປ່ອຍຜູ້ຄົນໃຫ້ເປັນອິດສະຫຼະຈາກຫຍັງ?
10. ພະເຢຊູປົດປ່ອຍມະນຸດໃຫ້ເປັນອິດສະຫຼະຈາກຫຍັງ?
10 ພະເຢຊູລູກຊາຍຂອງພະເຈົ້າປົດປ່ອຍຜູ້ຄົນໃຫ້ເປັນອິດສະຫຼະໃນ 2 ວິທີຄື: ວິທີທຳອິດ ເພິ່ນປົດປ່ອຍຜູ້ຄົນໃຫ້ເປັນອິດສະຫຼະຈາກຄຳສອນຜິດໆຂອງຜູ້ນຳສາສະໜາ. ຊາວຢິວຫຼາຍຄົນໃນສະໄໝນັ້ນເປັນທາດຂອງທຳນຽມແລະຄວາມເຊື່ອທີ່ຜິດໆ. (ມທ. 5:31-37; 15:1-11) ຜູ້ນຳສາສະໜາອ້າງວ່າກຳລັງຊ່ວຍຄົນອື່ນໃຫ້ຮັບໃຊ້ພະເຈົ້າ ແຕ່ຕົວເອງພັດບໍ່ໄດ້ເຮັດສິ່ງທີ່ຖືກຕ້ອງ ພວກເຂົາເປັນຄືກັບຄົນຕາບອດ. ນອກຈາກນັ້ນ ພວກເຂົາໄດ້ປະຕິເສດເມຊີອາແລະຄວາມຈິງທີ່ເພິ່ນສອນ ພວກເຂົາບໍ່ໄດ້ຮູ້ຈັກພະເຈົ້າ ນີ້ເຮັດໃຫ້ພວກເຂົາເປັນຄືກັບຄົນຕາບອດແລະບໍ່ໄດ້ຮັບການໃຫ້ອະໄພບາບ. (ຢຮ. 9:1, 14-16, 35-41) ເນື່ອງຈາກພະເຢຊູສອນຄວາມຈິງແລະເປັນຕົວຢ່າງທີ່ດີ ເພິ່ນຈຶ່ງເຮັດໃຫ້ຄົນຖ່ອມຕົວຮູ້ວ່າພວກເຂົາສາມາດໄດ້ຮັບການປົດປ່ອຍໃຫ້ເປັນອິດສະຫຼະຈາກຄຳສອນທີ່ຜິດໆ.—ມຣກ. 1:22; 2:23–3:5
11. ວິທີທີສອງທີ່ພະເຢຊູປົດປ່ອຍຜູ້ຄົນໃຫ້ເປັນອິດສະຫຼະແມ່ນຫຍັງ?
11 ວິທີທີສອງ ພະເຢຊູປົດປ່ອຍຜູ້ຄົນໃຫ້ເປັນອິດສະຫຼະຈາກການເປັນທາດຂອງບາບ. ເນື່ອງຈາກພະເຢຊູສະລະຊີວິດເປັນຄ່າໄຖ່ ພະເຢໂຫວາຈຶ່ງໃຫ້ອະໄພບາບຄົນທີ່ຍອມຮັບຄ່າໄຖ່ແລະສະແດງຄວາມເຊື່ອ. (ຮຣ. 10:12-18) ພະເຢຊູບອກວ່າ: “ຖ້າລູກຂອງພະເຈົ້າປົດປ່ອຍພວກເຈົ້າໃຫ້ເປັນອິດສະຫຼະ ພວກເຈົ້າກໍຈະເປັນອິດສະຫຼະແທ້ໆ.” (ຢຮ. 8:36) ອິດສະຫຼະນີ້ດີກວ່າອິດສະຫຼະທີ່ຊາວອິດສະຣາເອນໄດ້ຮັບໃນປີທີ່ໜ້າຍິນດີ! ຕົວຢ່າງເຊັ່ນ: ຄົນທີ່ເປັນອິດສະຫຼະໃນປີທີ່ໜ້າຍິນດີອາດຕົກເປັນທາດອີກ ແລະມື້ໜຶ່ງພວກເຂົາກໍຕ້ອງຕາຍ ແຕ່ອິດສະຫຼະທີ່ໄດ້ຮັບຈາກພະເຢຊູຈະມີຜົນຕະຫຼອດໄປ.
12. ໃຜເປັນຄົນກຸ່ມທຳອິດທີ່ໄດ້ຮັບປະໂຫຍດຈາກການປົດປ່ອຍໃຫ້ເປັນອິດສະຫຼະທີ່ພະເຢຊູບອກ?
12 ໃນວັນເພັນເຕກອດປີ ຄ.ສ 33 ພະເຢໂຫວາເຈີມພວກອັກຄະສາວົກແລະຊາຍຍິງທີ່ສັດຊື່ດ້ວຍພະລັງບໍລິສຸດ. ພະອົງຮັບເອົາພວກເຂົາໃຫ້ເປັນລູກເພື່ອໃນອະນາຄົດພວກເຂົາຈະຖືກປຸກໄປສະຫວັນແລະໄປຮ່ວມປົກຄອງກັບພະເຢຊູ. (ຣມ. 8:2, 15-17) ນີ້ເປັນຄົນກຸ່ມທຳອິດທີ່ໄດ້ຮັບປະໂຫຍດຈາກການປົດປ່ອຍໃຫ້ເປັນອິດສະຫຼະທີ່ພະເຢຊູປະກາດໃນບ່ອນປະຊຸມຂອງຊາວຢິວຢູ່ເມືອງນາຊາເຣັດ. ພວກເຂົາບໍ່ຕ້ອງເປັນທາດຂອງຄຳສອນທີ່ຜິດໆຂອງພວກຜູ້ນຳສາສະໜາແລະທຳນຽມທີ່ບໍ່ຖືກຕ້ອງຕາມຫຼັກພະຄຳພີ. ນອກຈາກນັ້ນ ພະເຢໂຫວາຍັງເບິ່ງວ່າພວກເຂົາເປັນອິດສະຫຼະຈາກບາບທີ່ເຮັດໃຫ້ຕ້ອງຕາຍ. ປີທີ່ໜ້າຍິນດີຂອງຄລິດສະຕຽນເລີ່ມໃນປີ ຄ.ສ 33 ເມື່ອລູກສິດຂອງພະຄລິດໄດ້ຮັບການເຈີມ ແລະຈະສິ້ນສຸດໃນຕອນຈົບຂອງສະໄໝພັນປີທີ່ພະເຢຊູປົກຄອງ. ແລ້ວຈະມີສິ່ງດີໆຫຍັງແດ່ທີ່ຈະເກີດຂຶ້ນຕັ້ງແຕ່ຕອນນີ້ຈົນເຖິງຕອນຈົບຂອງສະໄໝພັນປີ?
ຫຼາຍລ້ານຄົນຈະໄດ້ຮັບການປົດປ່ອຍໃຫ້ເປັນອິດສະຫຼະ
13-14. ນອກຈາກຜູ້ຖືກເຈີມແລ້ວ ມີໃຜອີກທີ່ໄດ້ຮັບການປົດປ່ອຍໃຫ້ເປັນອິດສະຫຼະທີ່ພະເຢຊູບອກ?
13 ໃນທຸກມື້ນີ້ຫຼາຍລ້ານຄົນຈາກທຸກປະເທດທົ່ວໂລກທີ່ຈິງໃຈໄດ້ເຂົ້າມາເປັນສ່ວນຂອງ “ແກະອື່ນ.” (ຢຮ. 10:16) ພະເຢໂຫວາບໍ່ໄດ້ເລືອກພວກເຂົາໃຫ້ໄປປົກຄອງຮ່ວມກັບພະເຢຊູເທິງສະຫວັນ. ແຕ່ຄຳພີໄບເບິນບອກວ່າ ພວກເຂົາຈະມີໂອກາດມີຊີວິດຕະຫຼອດໄປໃນໂລກ. ເຈົ້າກໍມີຄວາມຫວັງແບບນັ້ນແມ່ນບໍ?
14 ຕອນນີ້ເຈົ້າໄດ້ຮັບປະໂຫຍດບາງຢ່າງແບບດຽວກັນກັບຜູ້ຖືກເຈີມ ໂດຍສະແດງຄວາມເຊື່ອໃນຄ່າໄຖ່ຂອງພະເຢຊູ ເຈົ້າຈຶ່ງສາມາດຂໍພະເຢໂຫວາໃຫ້ອະໄພບາບເຈົ້າໄດ້. ຍ້ອນແນວນັ້ນເຈົ້າຈຶ່ງມີຖານະທີ່ດີຕໍ່ພະເຢໂຫວາແລະບໍ່ມີຫຍັງມາລົບກວນໃຈຮູ້ຜິດຮູ້ຖືກຂອງເຈົ້າ. (ອຟຊ. 1:7; ພນມ. 7:14, 15) ນອກຈາກນັ້ນ ໃຫ້ຄິດເຖິງພອນຕ່າງໆທີ່ເຈົ້າໄດ້ຮັບຍ້ອນໄດ້ຫຼຸດພົ້ນຈາກຄຳສອນປອມ. ພະເຢຊູບອກວ່າ: “ພວກເຈົ້າຈະຮູ້ຈັກຄວາມຈິງ ແລ້ວຄວາມຈິງຈະເຮັດໃຫ້ພວກເຈົ້າເປັນອິດສະຫຼະ.” (ຢຮ. 8:32) ຈັ່ງແມ່ນເຮົາມີຄວາມສຸກແທ້ໆທີ່ມີອິດສະຫຼະແບບນີ້!
15. ເຮົາຈະໄດ້ຮັບພອນແລະອິດສະຫຼະຫຍັງແດ່ໃນອະນາຄົດ?
15 ເຈົ້າຈະມີອິດສະຫຼະຫຼາຍກວ່ານີ້ອີກໃນອະນາຄົດ. ອີກບໍ່ດົນ ພະເຢຊູຈະທຳລາຍສາສະໜາປອມແລະການປົກຄອງຂອງມະນຸດທີ່ສໍ້ໂກງ. ພະເຢໂຫວາພະເຈົ້າຈະປົກປ້ອງຄຸ້ມຄອງ “ຄົນຝູງໃຫຍ່” ທີ່ຮັບໃຊ້ພະອົງ ແລະພະອົງຈະໃຫ້ພວກເຂົາມີຄວາມສຸກກັບພອນຕ່າງໆຢ່າງຫຼວງຫຼາຍໃນໂລກທີ່ເປັນອຸທິຍານ. (ພນມ. 7:9, 14) ຄົນຈຳນວນຫຼາຍຈະຖືກປຸກໃຫ້ມີຊີວິດອີກແລະໄດ້ຮັບການປົດປ່ອຍໃຫ້ເປັນອິດສະຫຼະຈາກຜົນເສຍຫາຍທຸກຢ່າງທີ່ມາຈາກບາບຂອງອາດາມ.—ກຈກ. 24:15
16. ມະນຸດຈະມີອິດສະຫຼະທີ່ດີເລີດແນວໃດໃນອະນາຄົດ?
16 ໃນໄລຍະສະໄໝພັນປີທີ່ພະເຢຊູປົກຄອງ ເພິ່ນແລະຜູ້ທີ່ປົກຄອງຮ່ວມກັບເພິ່ນຈະຊ່ວຍມະນຸດໃຫ້ເປັນຄົນສົມບູນແບບທາງຮ່າງກາຍແລະຈິດໃຈ ແລະມີສາຍສຳພັນທີ່ດີກັບພະເຈົ້າ. ໃນຕອນນັ້ນຈະມີການຟື້ນຟູແລະປົດປ່ອຍໃຫ້ເປັນອິດສະຫຼະຄືກັບປີທີ່ໜ້າຍິນດີຂອງຊາວອິດສະຣາເອນ. ທຸກຄົນໃນໂລກທີ່ຮັບໃຊ້ພະເຢໂຫວາຢ່າງສັດຊື່ພັກດີຈະເປັນມະນຸດທີ່ສົມບູນແບບແລະບໍ່ມີບາບອີກເລີຍ.
ໃນໂລກໃໝ່ພວກເຮົາຈະເຮັດວຽກທີ່ມີປະໂຫຍດແລະເຮັດໃຫ້ມີຄວາມສຸກ. (ເບິ່ງຂໍ້ 17)
17. ຕາມເອຊາອີ 65:21-23 ບອກວ່າປະຊາຊົນຂອງພະເຈົ້າຈະເປັນແນວໃນອະນາຄົດ? (ເບິ່ງຮູບໜ້າປົກ)
17 ອ່ານເອຊາອີ 65:21-23. ຄຳພະຍາກອນນີ້ບອກວ່າຊີວິດຢູ່ໃນໂລກຈະເປັນແນວໃດໃນອະນາຄົດ. ເມື່ອຢູ່ໃນໂລກໃໝ່ເຮົາຈະບໍ່ຕ້ອງເຮັດຫຍັງເລີຍບໍ? ບໍ່ແມ່ນ. ຄຳພີໄບເບິນບອກວ່າ ໃນຕອນນັ້ນປະຊາຊົນຂອງພະເຈົ້າຈະເຮັດວຽກທີ່ມີປະໂຫຍດແລະເຮັດໃຫ້ມີຄວາມສຸກ. ໃນຕອນສິ້ນສຸດຂອງສະໄໝພັນປີທີ່ພະເຢຊູປົກຄອງ ເຮົາສາມາດໝັ້ນໃຈໄດ້ວ່າຕອນນັ້ນ “ສິ່ງທີ່ພະເຈົ້າສ້າງຈະໄດ້ຮັບການປົດປ່ອຍຈາກການເປັນທາດຂອງຄວາມເນົ່າເປື່ອຍ ແລະມີເສລີພາບທີ່ງົດງາມແບບທີ່ລູກຂອງພະເຈົ້າມີ.”—ຣມ. 8:21
18. ເປັນຫຍັງເຮົາໝັ້ນໃຈໄດ້ວ່າຈະມີອະນາຄົດທີ່ມີຄວາມສຸກ?
18 ຄືກັບທີ່ພະເຢໂຫວາໄດ້ຈັດກຽມໃຫ້ຊາວອິດສະຣາເອນມີຄວາມສົມດຸນໃນການເຮັດວຽກແລະການພັກຜ່ອນ ພະອົງກໍຈະເຮັດແບບນັ້ນຄືກັນໃນສະໄໝການປົກຄອງພັນປີຂອງພະຄລິດ. ຢູ່ທີ່ນັ້ນເຮົາໝັ້ນໃຈວ່າເຮົາຈະມີເວລາສຳລັບນະມັດສະການພະເຈົ້າ. ການນະມັດສະການພະເຈົ້າເປັນສິ່ງສຳຄັນທີ່ຈະເຮັດໃຫ້ເຮົາມີຄວາມສຸກໃນຕອນນີ້ ແລະຈະເປັນແນວນັ້ນໃນໂລກໃໝ່ທີ່ກຳລັງຈະມາເຖິງ. ເຮົາມີເຫດຜົນທີ່ຈະໝັ້ນໃຈວ່າ ທຸກຄົນທີ່ສັດຊື່ຈະມີຄວາມສຸກໃນສະໄໝການປົກຄອງໜຶ່ງພັນປີຂອງພະຄລິດ ເພາະຕອນນັ້ນທຸກຄົນຈະມີວຽກເຮັດທີ່ອີ່ມໃຈພໍໃຈແລະໄດ້ຮັບໃຊ້ພະເຈົ້າ.
ເພງ 142 ຍຶດໝັ້ນກັບຄວາມຫວັງຂອງເຮົາ
a ພະເຢໂຫວາຊ່ວຍໃຫ້ຊາວອິດສະຣາເອນບູຮານໄດ້ຮັບການປົດປ່ອຍໃຫ້ເປັນອິດສະຫຼະໂດຍໃຫ້ມີປີທີ່ໜ້າຍິນດີ. ຄລິດສະຕຽນບໍ່ໄດ້ຢູ່ພາຍໃຕ້ກົດໝາຍຂອງໂມເຊ ແຕ່ປີທີ່ໜ້າຍິນດີກໍມີຄວາມສຳຄັນສຳລັບເຮົາ. ໃນບົດຄວາມນີ້ ເຮົາຈະເບິ່ງວ່າປີທີ່ໜ້າຍິນດີໃນສະໄໝອິດສະຣາເອນບູຮານເຮັດໃຫ້ເຮົາຄິດເຖິງສິ່ງທີ່ພະເຢໂຫວາຈັດກຽມໃຫ້ເຮົາແນວໃດ ແລະເຮົາຈະໄດ້ປະໂຫຍດຫຍັງແດ່.
b ຄຳອະທິບາຍຮູບພາບ: ໃນລະຫວ່າງປີທີ່ໜ້າຍິນດີ ຜູ້ຊາຍທີ່ເຄີຍເປັນທາດໄດ້ຮັບການປົດປ່ອຍໃຫ້ເປັນອິດສະຫຼະ ພວກເຂົາສາມາດໄດ້ດິນຄືນແລະໄດ້ຢູ່ກັບຄອບຄົວຂອງຕົວເອງ.