ຊີວິດຄລິດສະຕຽນ

**ໃຊ້ ຊີວິດທີ່ມີຄວາມສຸກຕະຫຼອດໄປ! ໃນວຽກຮັບໃຊ້**

ເຮົາຮູ້ສຶກຕື່ນເຕັ້ນແທ້ໆທີ່ມີຈຸນລະສານແລະປຶ້ມໃໝ່ສຳລັບນຳການສຶກສາຄຳພີໄບເບິນ! ເຮົາອະທິດຖານຂໍພະເຢໂຫວາອວຍພອນຄວາມພະຍາຍາມຂອງເຮົາທີ່ຈະຊ່ວຍຫຼາຍຄົນໃຫ້ເຂົ້າມາເປັນລູກສິດ. (ມທ 28:18-20; 1ກຣ 3:6-9) ເຮົາຈະໃຊ້ເຄື່ອງມືໃໝ່ນີ້ແນວໃດ?

ເນື່ອງຈາກທັງຈຸນລະສານແລະປຶ້ມຊີວິດທີ່ມີຄວາມສຸກຕະຫຼອດໄປ! ເປັນຫຼັກສູດການຮຽນຄຳພີໄບເບິນແບບໂຕ້ຕອບ ເຊິ່ງເປັນການສຶກສາຮູບແບບໃໝ່ ຕອນທີ່ເຈົ້າກຽມແລະນຳການສຶກສາ ໃຫ້ເຮັດຕາມຄຳແນະນຳຕໍ່ໄປນີ້.a

ອ່ານເນື້ອໃນ ແລະລົມກັນກ່ຽວກັບຄຳຖາມ
ອ່ານຂໍ້ຄຳພີທີ່ກຳນົດໃຫ້ “ອ່ານ” ແລະຊ່ວຍນັກສຶກສາໃຫ້ຮູ້ວິທີເອົາໄປໃຊ້
ເປີດວິດີໂອ ແລ້ວລົມກັນໂດຍໃຊ້ຄຳຖາມທີ່ໃຫ້ໄວ້
ພະຍາຍາມສຶກສາໃຫ້ຈົບບົດໃນເທື່ອດຽວ

ໃນວຽກຮັບໃຊ້ ໃຫ້ລອງສະເໜີຈຸນລະສານນີ້ເພື່ອເບິ່ງວ່າເຈົ້າຂອງເຮືອນສົນໃຈບໍ. (ເບິ່ງຂອບ “ວິທີສະເໜີຈຸນລະສານຊີວິດທີ່ມີຄວາມສຸກຕະຫຼອດໄປ! ໃນການປະກາດ.”) ຖ້າສຶກສາຈຸນລະສານນີ້ຈົບແລ້ວແລະນັກສຶກສາຍັງຢາກສຶກສາຕໍ່ ໃຫ້ສະເໜີປຶ້ມຫົວໃຫຍ່ແລະເລີ່ມສຶກສາກັບລາວໃນບົດທີ 04. ຖ້າເຈົ້ານຳການສຶກສາກັບບາງຄົນໂດຍໃຊ້ປຶ້ມຮຽນໄບເບິນຫຼືປຶ້ມຮັກຂອງພະເຈົ້າຢູ່ ໃຫ້ປ່ຽນມາໃຊ້ປຶ້ມຊີວິດທີ່ມີຄວາມສຸກຕະຫຼອດໄປ! ແລະເບິ່ງວ່າຈະເລີ່ມຈາກບົດໃດ.

ຜົວເມຍຄູ່ດຽວກັນນີ້ໃຊ້ປຶ້ມ “ຊີວິດທີ່ມີຄວາມສຸກຕະຫຼອດໄປ!” ສຶກສາກັບຜູ້ຊາຍຄົນນັ້ນຢູ່ເຮືອນຂອງລາວ.

ເບິ່ງວິດີໂອຍິນດີຕ້ອນຮັບສູ່ການຮຽນຄຳພີໄບເບິນ ແລ້ວຕອບຄຳຖາມຕໍ່ໄປນີ້:

ນັກສຶກສາຈະໄດ້ຮຽນຫຍັງຈາກປຶ້ມໃໝ່ນີ້?
ເປັນຫຍັງເຈົ້າຄວນເປີດວິດີໂອນີ້ໃຫ້ນັກສຶກສາໃໝ່ເບິ່ງ?
ເຈົ້າຄວນສະໜັບສະໜູນໃຫ້ນັກສຶກສາຕັ້ງເປົ້າໝາຍຫຍັງແດ່ແລະເຮັດຕາມເປົ້າໝາຍນັ້ນໃຫ້ໄດ້?—ເບິ່ງຕາຕະລາງ “ຈຸດສຳຄັນແລະສິ່ງທີ່ເຈົ້າເຮັດໄດ້ໃນແຕ່ລະຕອນ”

a ຂໍ້ສັງເກດ: ເຖິງວ່າສ່ວນ “ເບິ່ງເພີ່ມເຕີມ” ຈະເປັນສ່ວນທີ່ສຶກສາຫຼືບໍ່ສຶກສາກໍໄດ້ ແຕ່ຕອນທີ່ເຈົ້າກຽມໃຫ້ໃຊ້ເວລາອ່ານແລະເບິ່ງວິດີໂອເຫຼົ່ານັ້ນ ເພື່ອຈະຮູ້ວ່າອັນໃດທີ່ເໝາະກັບນັກສຶກສາແລະຊ່ວຍລາວໄດ້ແທ້ໆ. ສິ່ງພິມນີ້ໃນຮູບແບບເອເລັກໂຕຣນິກມີລິ້ງເພື່ອເປີດວິດີໂອແລະຂໍ້ມູນເພີ່ມເຕີມ.

ຈຸດສຳຄັນແລະສິ່ງທີ່ເຈົ້າເຮັດໄດ້ໃນແຕ່ລະຕອນ
	ບົດ	ຈຸດສຳຄັນ	ສິ່ງທີ່ນັກສຶກສາເຮັດໄດ້
1	01-12	ຄຳພີໄບເບິນມີປະໂຫຍດແນວໃດຕໍ່ເຈົ້າແລະເຈົ້າຈະຮູ້ຈັກຜູ້ແຕ່ງຄຳພີໄບເບິນໄດ້ແນວໃດ?	ສະໜັບສະໜູນນັກສຶກສາໃຫ້ອ່ານຄຳພີໄບເບິນ ກຽມການສຶກສາ ແລະເຂົ້າຮ່ວມປະຊຸມ
2	13-33	ພະເຈົ້າຈະເຮັດຫຍັງເພື່ອເຮົາແລະເພິ່ນຍອມຮັບການນະມັດສະການແບບໃດ?	ກະຕຸ້ນນັກສຶກສາໃຫ້ບອກຄວາມຈິງກັບຄົນອື່ນແລະເປັນຜູ້ປະກາດ
3	34-47	ພະເຈົ້າຢາກໃຫ້ຄົນທີ່ນະມັດສະການເພິ່ນເຮັດຫຍັງແດ່?	ກະຕຸ້ນນັກສຶກສາອຸທິດຕົວໃຫ້ພະເຢໂຫວາແລະຮັບບັບເຕມາ
4	48-60	ເຮັດແນວໃດໃຫ້ພະເຈົ້າຮັກເຮົາສະເໝີ?	ສອນນັກສຶກສາໃຫ້ແຍກອອກວ່າອັນໃດຖືກອັນໃດຜິດແລະສະໜິດກັບພະເຈົ້າຫຼາຍຂຶ້ນ

**ວິທີສະເໜີຈຸນລະສານຊີວິດທີ່ມີຄວາມສຸກຕະຫຼອດໄປ! ໃນການປະກາດ**

ດ້ານຫຼັງຂອງຈຸນລະສານນີ້ມີຄຳຖາມທີ່ກະຕຸ້ນຄວາມສົນໃຈຄືກັບແຜ່ນພັບ. ໃຫ້ເຮັດຕາມຄຳແນະນຳຕໍ່ໄປນີ້:

ຖາມຄຳຖາມທີ່ມີຄຳຕອບໃຫ້ເລືອກ
ອ່ານຄຳຕອບຈາກຄຳພີໄບເບິນໃນຄຳເພງ 37:29
ລົມກັນໃນຫົວຂໍ້ “ສິ່ງທີ່ເຈົ້າຈະໄດ້.” ຖ້າມີເວລາ ໃຫ້ອ່ານຂໍ້ຄຳພີແລະເວົ້າເຖິງຮູບພາບ
ຊວນໃຫ້ຕອບຄຳຖາມຢູ່ທາງລຸ່ມ ແລະເລີ່ມສຶກສາບົດທຳອິດ