ບົດຄວາມສຶກສາທີ 11
ໃຫ້ມີ “ລັກສະນະນິດໄສໃໝ່” ຕໍ່ໆໄປຫຼັງຈາກຮັບບັບເຕມາ
“ປູກຝັງລັກສະນະນິດໄສໃໝ່.”—ກລຊ. 3:10
ເພງ 49 ເຮັດໃຫ້ພະເຢໂຫວາພໍໃຈ
ໃຈຄວາມສຳຄັນa
1. ສິ່ງທີ່ມີຜົນຕໍ່ເຮົາຫຼາຍທີ່ສຸດແມ່ນຫຍັງ?
ບໍ່ວ່າເຮົາຫາກໍຮັບບັບເຕມາຫຼືຮັບບັບເຕມາມາຫຼາຍປີແລ້ວ ເຮົາທຸກຄົນກໍຢາກມີຄຸນລັກສະນະທີ່ດີທີ່ພະເຢໂຫວາມັກ. ແຕ່ເພື່ອຈະເປັນແບບນັ້ນໄດ້ ເຮົາຕ້ອງຄວບຄຸມຄວາມຄິດຂອງຕົວເອງ. ຍ້ອນຫຍັງ? ຍ້ອນຄວາມຄິດມີຜົນຕໍ່ໂຕເຮົາຫຼາຍທີ່ສຸດ. ຖ້າເຮົາຄິດແຕ່ເລື່ອງທີ່ບໍ່ດີຢູ່ຕະຫຼອດ ເຮົາກໍຈະເວົ້າແລະເຮັດສິ່ງທີ່ບໍ່ດີ. (ອຟຊ. 4:17-19) ກົງກັນຂ້າມ ຖ້າເຮົາຄິດແຕ່ເລື່ອງດີໆ ເຮົາກໍຈະເວົ້າແລະເຮັດໃນແບບທີ່ເຮັດໃຫ້ພະເຢໂຫວາພໍໃຈ.—ຄລຕ. 5:16
2. ເຮົາຈະຕອບຄຳຖາມຫຍັງໃນບົດຄວາມນີ້?
2 ໃນບົດຄວາມກ່ອນ ເຮົາໄດ້ຮຽນແລ້ວວ່າເຮົາບໍ່ສາມາດກຳຈັດຄວາມຄິດທີ່ບໍ່ດີທັງໝົດອອກໄປໄດ້. ແຕ່ເຮົາສາມາດເລືອກໄດ້ວ່າຈະເຮັດຕາມຄວາມຄິດນັ້ນຫຼືບໍ່. ດັ່ງນັ້ນ ກ່ອນທີ່ເຮົາຈະຮັບບັບເຕມາ ເຮົາຕ້ອງເຊົາເວົ້າແລະເຊົາເຮັດສິ່ງທີ່ພະເຢໂຫວາກຽດຊັງ ເພາະນີ້ເປັນຂັ້ນຕອນທຳອິດແລະເປັນສິ່ງສຳຄັນທີ່ສຸດໃນການຖິ້ມລັກສະນະນິດໄສເກົ່າ. ແຕ່ເພື່ອຈະເຮັດໃຫ້ພະເຢໂຫວາພໍໃຈ ເຮົາຍັງຕ້ອງເຮັດຕາມຄຳສັ່ງທີ່ບອກວ່າ: ໃຫ້ “ປູກຝັງລັກສະນະນິດໄສໃໝ່.” (ກລຊ. 3:10) ໃນບົດຄວາມນີ້ ເຮົາຈະຕອບຄຳຖາມທີ່ວ່າ “ລັກສະນະນິດໄສໃໝ່” ແມ່ນຫຍັງ? ເຮົາຈະມີລັກສະນະນິດໄສໃໝ່ໄດ້ແນວໃດ? ແລະເຮົາຈະມີລັກສະນະນິດໄສໃໝ່ຕໍ່ໆໄປໄດ້ແນວໃດ?
“ລັກສະນະນິດໄສໃໝ່” ແມ່ນຫຍັງ?
3. ຕາມຄາລາເຕຍ 5:22, 23 “ລັກສະນະນິດໄສໃໝ່” ແມ່ນຫຍັງ ແລະຜູ້ທີ່ມີລັກສະນະນິດໄສໃໝ່ຈະເປັນແນວໃດ?
3 “ລັກສະນະນິດໄສໃໝ່” ແມ່ນການຮຽນແບບພະເຢໂຫວາທັງດ້ານຄວາມຄິດແລະການກະທຳ. ຄົນທີ່ມີລັກສະນະນິດໄສໃໝ່ນີ້ຈະສະແດງຜົນທີ່ເກີດຈາກພະລັງຂອງພະເຈົ້າ ແລະຍອມໃຫ້ພະລັງນັ້ນມີຜົນຕໍ່ຄວາມຄິດ ຄວາມຮູ້ສຶກ ແລະການກະທຳຂອງລາວ. (ອ່ານຄາລາເຕຍ 5:22, 23) ຕົວຢ່າງເຊັ່ນ: ລາວຈະຮັກພະເຢໂຫວາແລະຮັກປະຊາຊົນຂອງເພິ່ນ. (ມທ. 22:36-39) ລາວຍັງຈະມີຄວາມຍິນດີເຖິງວ່າຈະເຈິຄວາມລຳບາກ. (ຢກບ. 1:2-4) ລາວຈະເປັນຄົນສ້າງສັນຕິສຸກ. (ມທ. 5:9) ລາວຈະອົດທົນແລະກະລຸນາຕໍ່ຄົນອື່ນ. (ກລຊ. 3:13) ລາວຈະມັກຄວາມດີແລະເຮັດສິ່ງທີ່ດີ. (ລກ. 6:35) ລາວຈະສະແດງໃຫ້ເຫັນວ່າລາວມີຄວາມເຊື່ອໃນພະເຈົ້າ. (ຢກບ. 2:18) ລາວຍັງຈະອ່ອນໂຍນຕໍ່ຄົນທີ່ຍົວະໃຫ້ລາວໃຈຮ້າຍ ແລະລາວຈະຄວບຄຸມຕົວເອງເມື່ອຖືກລໍ້ໃຈ.—1 ກຣ. 9:25, 27; ຕຕ. 3:2
4. ເພື່ອຈະມີລັກສະນະນິດໄສໃໝ່ ເຮົາຈະສະແດງຄຸນລັກສະນະທີ່ເວົ້າໃນຄາລາເຕຍ 5:22, 23 ເທື່ອລະຢ່າງບໍ? ຂໍໃຫ້ອະທິບາຍ.
4 ເພື່ອຈະມີລັກສະນະນິດໄສໃໝ່ ເຮົາຕ້ອງສະແດງຄຸນລັກສະນະທັງໝົດທີ່ເວົ້າໃນຄາລາເຕຍ 5:22, 23 ແລະໃນຂໍ້ພະຄຳພີອື່ນ.b ເຮົາບໍ່ສາມາດສະແດງຄຸນລັກສະນະເຫຼົ່ານີ້ເທື່ອລະຢ່າງຄືກັບທີ່ໃສ່ເຄື່ອງນຸ່ງເທື່ອລະຜືນ ເພາະຄຸນລັກສະນະເຫຼົ່ານີ້ກ່ຽວຂ້ອງກັນທັງໝົດ ດັ່ງນັ້ນເຮົາຕ້ອງສະແດງຄຸນລັກສະນະເຫຼົ່ານີ້ພ້ອມກັນ. ຕົວຢ່າງເຊັ່ນ: ຖ້າເຈົ້າຮັກຄົນອື່ນແທ້ ເຈົ້າກໍຈະອົດທົນແລະກະລຸນາຕໍ່ລາວ. ແລະຖ້າເຈົ້າເປັນຄົນດີແທ້ ເຈົ້າກໍຕ້ອງອ່ອນໂຍນແລະຄວບຄຸມຕົວເອງ.
ເຮົາຈະມີລັກສະນະນິດໄສໃໝ່ແນວໃດ?
ແຮ່ງເຮົາພະຍາຍາມຄິດຄືກັບພະເຢຊູຫຼາຍເທົ່າໃດ ເຮົາກໍແຮ່ງຈະເຮັດຄືກັບເພິ່ນໄດ້ຫຼາຍຂຶ້ນ. (ເບິ່ງຂໍ້ 5, 8, 10, 12, 14)
5. ການ “ມີຄວາມຄິດຂອງພະຄລິດ” ໝາຍຄວາມວ່າແນວໃດ ແລະເປັນຫຍັງເຮົາຄວນຮຽນເລື່ອງຊີວິດຂອງພະເຢຊູ? (1 ໂກຣິນໂທ 2:16)
5 ອ່ານ 1 ໂກຣິນໂທ 2:16. ເພື່ອຈະມີລັກສະນະນິດໄສໃໝ່ ເຮົາຕ້ອງ “ມີຄວາມຄິດຂອງພະຄລິດ.” ນີ້ໝາຍຄວາມວ່າ ເຮົາຕ້ອງພະຍາຍາມຄິດຄືກັບພະເຢຊູແລະຮຽນແບບເພິ່ນ. ພະເຢຊູສະແດງຜົນທີ່ເກີດຈາກພະລັງຂອງພະເຈົ້າໄດ້ຢ່າງສົມບູນແບບ ເພິ່ນຈຶ່ງສະທ້ອນຄຸນລັກສະນະແບບພະເຢໂຫວາໄດ້ຢ່າງຄົບຖ້ວນ. (ຮຣ. 1:3) ດັ່ງນັ້ນ ຖ້າເຮົາຄິດຄືພະເຢຊູຫຼາຍເທົ່າໃດ ເຮົາກໍແຮ່ງຈະເຮັດຄືກັບເພິ່ນແລະສາມາດສະທ້ອນຄຸນລັກສະນະນິດໄສຄ້າຍຄືກັບເພິ່ນໄດ້ຫຼາຍຂຶ້ນ.—ຟລປ. 2:5
6. ເມື່ອເຮົາພະຍາຍາມທີ່ຈະມີລັກສະນະນິດໄສໃໝ່ ເຮົາຄວນຈື່ຫຍັງໄວ້?
6 ເປັນໄປໄດ້ບໍທີ່ເຮົາຈະຮຽນແບບຕົວຢ່າງຂອງພະເຢຊູ? ເຮົາອາດຈະຄິດວ່າ: ‘ພະເຢຊູເປັນຄົນສົມບູນແບບ. ຂ້ອຍຄືຊິເຮັດແບບເພິ່ນບໍ່ໄດ້ດອກ!’ ຖ້າເຮົາຮູ້ສຶກແບບນັ້ນ ຂໍໃຫ້ຈື່ເລື່ອງຕໍ່ໄປນີ້: (1) ເຮົາຖືກສ້າງຕາມແບບຂອງພະເຢໂຫວາແລະພະເຢຊູ. ດັ່ງນັ້ນ ຖ້າເຮົາເລືອກທີ່ຈະຮຽນແບບພວກເພິ່ນ ເຮົາກໍຈະເຮັດໄດ້ໃນລະດັບໜຶ່ງ. (ຕົ້ນ. 1:26) (2) ພະລັງບໍລິສຸດເປັນພະລັງທີ່ມີລິດເດດຫຼາຍທີ່ສຸດໃນເອກະພົບ. ພະລັງນີ້ຈະຊ່ວຍເຮົາໃຫ້ເຮັດສິ່ງທີ່ເຮົາຄິດວ່າເຮັດບໍ່ໄດ້. (3) ພະເຢໂຫວາບໍ່ໄດ້ຄາດໝາຍໃຫ້ເຮົາສະແດງຜົນຂອງພະລັງບໍລິສຸດຢ່າງສົມບູນແບບໃນຕອນນີ້ ເພາະເພິ່ນໄດ້ໃຫ້ເວລາຕັ້ງ 1.000 ປີເພື່ອຄົນທີ່ມີຊີວິດຕະຫຼອດໄປໃນໂລກຈະກາຍເປັນຄົນສົມບູນແບບ. (ພນມ. 20:1-3) ດັ່ງນັ້ນ ສິ່ງທີ່ພະເຢໂຫວາຢາກໃຫ້ເຮົາເຮັດໃນຕອນນີ້ກໍຄື ຂໍຄວາມຊ່ວຍເຫຼືອຈາກເພິ່ນແລະເຮັດສ່ວນຂອງເຮົາໃຫ້ດີທີ່ສຸດ.
7. ເຮົາຈະຮຽນຫຍັງຕໍ່ໄປໃນບົດຄວາມນີ້?
7 ແລ້ວເຮົາຈະຮຽນແບບພະເຢຊູແນວໃດ? ເຮົາຈະມາເບິ່ງຄຸນລັກສະນະ 4 ຢ່າງ ເຊິ່ງເປັນຜົນທີ່ເກີດຈາກພະລັງຂອງພະເຈົ້າ ແລະເບິ່ງວ່າເຮົາຈະໄດ້ບົດຮຽນຫຍັງຈາກວິທີທີ່ພະເຢຊູສະແດງຄຸນລັກສະນະເຫຼົ່ານີ້. ນອກຈາກນັ້ນ ເຮົາຍັງຈະເບິ່ງຄຳຖາມທີ່ຊ່ວຍເຮົາໃຫ້ກວດເບິ່ງຕົວເອງວ່າ ເຮົາສະແດງລັກສະນະນິດໄສໃໝ່ໄດ້ດີສ່ຳໃດແລ້ວ?
8. ພະເຢຊູໄດ້ສະແດງຄວາມຮັກແນວໃດ?
8 ຍ້ອນພະເຢຊູຮັກພະເຢໂຫວາຫຼາຍ ເພິ່ນຈຶ່ງໄດ້ເສຍສະລະຕົວເອງເພື່ອພະເຢໂຫວາແລະເພື່ອເຮົາ. (ຢຮ. 14:31; 15:13) ວິທີທີ່ພະເຢຊູໃຊ້ຊີວິດໃນໂລກນີ້ສະແດງໃຫ້ເຫັນວ່າເພິ່ນຮັກມະນຸດຫຼາຍ ເພາະໃນແຕ່ລະມື້ເພິ່ນໄດ້ສະແດງຄວາມຮັກແລະຄວາມເຫັນອົກເຫັນໃຈຕໍ່ຄົນອື່ນເຖິງວ່າບາງຄົນຈະຕໍ່ຕ້ານເພິ່ນກໍຕາມ. ແລະອີກວິທີໜຶ່ງທີ່ເພິ່ນສະແດງຄວາມຮັກຕໍ່ຄົນອື່ນກໍຄື ປະກາດເລື່ອງການປົກຄອງຂອງພະເຈົ້າ. (ລກ. 4:43, 44) ນອກຈາກນັ້ນ ພະເຢຊູຍັງຍອມທົນທຸກທໍລະມານແລະຍອມຕາຍດ້ວຍນ້ຳມືຂອງຄົນທີ່ຜິດບາບ. ນີ້ຈຶ່ງເປີດໂອກາດໃຫ້ພວກເຮົາທຸກຄົນມີຄວາມຫວັງທີ່ຈະມີຊີວິດຕະຫຼອດໄປ.
9. ເຮົາຈະຮຽນແບບພະເຢຊູແນວໃດໃນການສະແດງຄວາມຮັກ?
9 ເຮົາອຸທິດຕົວແລະຮັບບັບເຕມາກໍຍ້ອນວ່າເຮົາຮັກພະເຢໂຫວາ. ຄືກັບພະເຢຊູ ເຮົາຄວນສະແດງຄວາມຮັກຕໍ່ພະເຢໂຫວາໂດຍວິທີທີ່ເຮົາປະຕິບັດກັບຄົນອື່ນ. ອັກຄະສາວົກໂຢຮັນບອກວ່າ: “ຄົນທີ່ບໍ່ຮັກພີ່ນ້ອງທີ່ລາວເບິ່ງເຫັນຈະຮັກພະເຈົ້າທີ່ລາວເບິ່ງບໍ່ເຫັນໄດ້ແນວໃດ.” (1 ໂຢຮັນ 4:20) ດັ່ງນັ້ນ ເຮົາຄວນຈະຖາມຕົວເອງວ່າ: ‘ຂ້ອຍຮັກຄົນອື່ນຫຼາຍຂຶ້ນບໍ? ຂ້ອຍເຫັນອົກເຫັນໃຈຄົນອື່ນບໍເຖິງວ່າເຂົາເຈົ້າຈະເຮັດບໍ່ດີກັບຂ້ອຍ? ຄວາມຮັກກະຕຸ້ນຂ້ອຍໃຫ້ໃຊ້ເວລາແລະກຳລັງເພື່ອຊ່ວຍຄົນອື່ນໃຫ້ຮູ້ຈັກພະເຢໂຫວາບໍ? ຂ້ອຍເຕັມໃຈທີ່ຈະເຮັດແບບນີ້ບໍເຖິງວ່າຄົນອື່ນຈະບໍ່ເຫັນຄ່າສິ່ງທີ່ຂ້ອຍເຮັດແລະເຖິງຂັ້ນຕໍ່ຕ້ານຂ້ອຍ? ຂ້ອຍໄດ້ຈັດເວລາຫຼາຍຂຶ້ນເພື່ອຈະສອນຄົນໃຫ້ເຂົ້າມາເປັນລູກສິດບໍ?’—ອຟຊ. 5:15, 16
10. ພະເຢຊູເປັນຄົນທີ່ສ້າງສັນຕິສຸກແນວໃດ?
10 ພະເຢຊູເປັນຄົນທີ່ສ້າງສັນຕິສຸກ. ເມື່ອມີຄົນເຮັດບໍ່ດີໃສ່ເພິ່ນ ເພິ່ນກໍບໍ່ໄດ້ເຮັດສິ່ງທີ່ບໍ່ດີໃສ່ເຂົາເຈົ້າຄືນ. ແທນທີ່ຈະເຮັດແບບນັ້ນ ເພິ່ນເປັນຝ່າຍລິເລີ່ມສ້າງສັນຕິສຸກແລະກະຕຸ້ນຄົນອື່ນໃຫ້ຄືນດີກັນ. ຕົວຢ່າງເຊັ່ນ ພະເຢຊູສອນວ່າຖ້າເຂົາເຈົ້າຢາກໃຫ້ພະເຢໂຫວາຍອມຮັບການນະມັດສະການ ເຂົາເຈົ້າຕ້ອງໄປຄືນດີກັບພີ່ນ້ອງກ່ອນ. (ມທ. 5:9, 23, 24) ແລະຫຼາຍເທື່ອທີ່ພວກອັກຄະສາວົກຖຽງກັນວ່າໃຜຊິເປັນໃຫຍ່ ພະເຢຊູກໍມາຊ່ວຍແກ້ໄຂຂໍ້ຂັດແຍ່ງໃນເລື່ອງນີ້.—ລກ. 9:46-48; 22:24-27
11. ເຮົາຈະເປັນຄົນສ້າງສັນຕິສຸກໄດ້ແນວໃດ?
11 ເພື່ອຈະເປັນຄົນສ້າງສັນຕິສຸກ ເຮົາຕ້ອງບໍ່ພຽງແຕ່ບໍ່ກໍ່ເລື່ອງ ແຕ່ເຮົາຕ້ອງເປັນຝ່າຍສ້າງສັນຕິກັບຄົນອື່ນ. ແລະຖ້າເຮົາເຫັນວ່າພີ່ນ້ອງມີບັນຫາກັນ ເຮົາກໍຄວນຈະພະຍາຍາມຊ່ວຍເຂົາເຈົ້າໃຫ້ຄືນດີກັນ. (ຟລປ. 4:2, 3; ຢກບ. 3:17, 18) ເຮົາອາດຈະຖາມຕົວເອງວ່າ: ‘ຂ້ອຍເຕັມໃຈເສຍສະລະຫຍັງແດ່ເພື່ອຈະຄືນດີກັບຄົນອື່ນ? ຖ້າພີ່ນ້ອງເຮັດໃຫ້ຂ້ອຍຄຽດ ຂ້ອຍຍັງຈະຄຽດໃຫ້ເຂົາເຈົ້າຕໍ່ໄປບໍ? ຂ້ອຍຖ້າໃຫ້ຄົນອື່ນມາຄືນດີກັບຂ້ອຍກ່ອນບໍ ຫຼືຂ້ອຍຈະເປັນຝ່າຍໄປຄືນດີກັບເຂົາເຈົ້າກ່ອນເຖິງເບິ່ງຄືວ່າເຂົາເຈົ້າຈະເປັນຕົ້ນເຫດຂອງບັນຫາ? ເມື່ອເຫັນວ່າເໝາະສົມຂ້ອຍໄດ້ຊ່ວຍພີ່ນ້ອງຄົນອື່ນໃຫ້ຄືນດີກັນບໍ?’
12. ພະເຢຊູສະແດງຄວາມກະລຸນາຕໍ່ຄົນອື່ນແນວໃດ?
12 ພະເຢຊູເປັນຄົນກະລຸນາ. (ມທ. 11:28-30) ເພິ່ນສະແດງຄຸນລັກສະນະນີ້ໂດຍເປັນຄົນອ່ອນໂຍນແລະມີເຫດຜົນ ແມ່ນແຕ່ໃນສະພາບການທີ່ຍາກກໍຕາມ. ຕົວຢ່າງເຊັ່ນ: ເມື່ອຜູ້ຍິງຄົນໂຟນີເຊຍມາຂໍໃຫ້ພະເຢຊູປິ່ນປົວລູກລາວ ຕອນທຳອິດເພິ່ນບໍ່ໄດ້ເຮັດຕາມສິ່ງທີ່ລາວຮ້ອງຂໍ ແຕ່ຕໍ່ມາເພິ່ນກໍສະແດງຄວາມກະລຸນາໂດຍປິ່ນປົວລູກຂອງລາວຍ້ອນລາວມີຄວາມເຊື່ອ. (ມທ. 15:22-28) ເຖິງວ່າພະເຢຊູຈະເປັນຄົນກະລຸນາ ແຕ່ເມື່ອຜູ້ທີ່ເພິ່ນຮັກເຮັດສິ່ງທີ່ບໍ່ເໝາະສົມ ເພິ່ນກໍບໍ່ໄດ້ປ່ອຍເລື່ອງນັ້ນໄວ້ ແຕ່ເພິ່ນໄດ້ໃຫ້ຄຳແນະນຳເຂົາເຈົ້າຢ່າງໜັກແໜ້ນ. ຕົວຢ່າງເຊັ່ນ: ເມື່ອເປໂຕບອກພະເຢຊູໃຫ້ເຮັດບາງຢ່າງເຊິ່ງບໍ່ໄດ້ເປັນໄປຕາມຄວາມຕ້ອງການຂອງພະເຢໂຫວາ ພະເຢຊູກໍປັບຄວາມຄິດຂອງລາວຕໍ່ໜ້າລູກສິດຄົນອື່ນໆ. (ມຣກ. 8:32, 33) ທີ່ພະເຢຊູເຮັດແບບນີ້ ບໍ່ແມ່ນຍ້ອນຢາກເຮັດໃຫ້ເປໂຕອັບອາຍ ແຕ່ເພິ່ນຢາກຝຶກເປໂຕແລະເຕືອນພວກລູກສິດຄົນອື່ນໆບໍ່ໃຫ້ເຮັດເກີນສິດ. ເຖິງວ່າເປໂຕຈະຮູ້ສຶກອັບອາຍ ແຕ່ລາວກໍໄດ້ຮັບປະໂຫຍດຈາກຄຳແນະນຳຂອງພະເຢຊູ.
13. ເຮົາຈະສະແດງຄວາມກະລຸນາຕໍ່ຄົນອື່ນແນວໃດ?
13 ເພື່ອເຮົາຈະສະແດງຄວາມກະລຸນາຕໍ່ຄົນທີ່ເຮົາຮັກ ບາງເທື່ອເຮົາອາດຈະຕ້ອງໃຫ້ຄຳແນະນຳເຂົາເຈົ້າແບບກົງໆ. ແຕ່ຕອນທີ່ເຮົາເຮັດແບບນັ້ນ ຂໍໃຫ້ເຮົາຮຽນແບບພະເຢຊູໂດຍໃຫ້ຄຳແນະນຳຈາກຄຳພີໄບເບິນ ໃຫ້ເປັນຄົນອ່ອນໂຍນ ເບິ່ງເຂົາເຈົ້າໃນແງ່ດີ ແລະໝັ້ນໃຈວ່າເຂົາເຈົ້າຈະເຮັດຕາມສິ່ງທີ່ເຮົາບອກຍ້ອນເຂົາເຈົ້າຮັກພະເຢໂຫວາແລະຮັກເຮົາ. ໃຫ້ຖາມຕົວເອງວ່າ: ‘ເມື່ອຄົນທີ່ຂ້ອຍຮັກເຮັດສິ່ງທີ່ບໍ່ຖືກຕ້ອງ ຂ້ອຍກ້າບອກເຂົາເຈົ້າບໍ? ຖ້າຂ້ອຍຕ້ອງໃຫ້ຄຳແນະນຳ ຂ້ອຍໄດ້ເວົ້າດີໆນຳເຂົາເຈົ້າບໍຫຼືຂ້ອຍເວົ້າແບບໃຈຮ້າຍ? ຂ້ອຍໃຫ້ຄຳແນະນຳຍ້ອນຫຍັງ? ຂ້ອຍໃຫ້ຍ້ອນບໍ່ພໍໃຈລາວບໍ ຫຼືຍ້ອນຢາກຊ່ວຍລາວ?’
14. ພະເຢຊູສະແດງໃຫ້ເຫັນແນວໃດວ່າເພິ່ນເປັນຄົນດີ?
14 ພະເຢຊູບໍ່ພຽງແຕ່ຮູ້ວ່າອັນໃດເປັນສິ່ງທີ່ດີ ແຕ່ເພິ່ນໄດ້ເຮັດສິ່ງທີ່ດີນຳ. ຍ້ອນເພິ່ນຮັກພະເຢໂຫວາ ເພິ່ນຈຶ່ງເຮັດສິ່ງທີ່ດີດ້ວຍແຮງກະຕຸ້ນທີ່ຖືກຕ້ອງ. ຄົນດີຈະເຮັດສິ່ງທີ່ດີເພື່ອຄົນອື່ນ ແລະຊອກຫາວິທີເພື່ອຊ່ວຍເຫຼືອເຂົາເຈົ້າ. ແຕ່ການເຮັດສິ່ງທີ່ດີຍັງບໍ່ພໍ ເພາະເຮົາຕ້ອງເຮັດສິ່ງທີ່ດີດ້ວຍແຮງກະຕຸ້ນທີ່ຖືກຕ້ອງນຳ. ບາງຄົນອາດຈະຖາມວ່າ: ‘ເປັນໄປໄດ້ບໍທີ່ຈະເຮັດສິ່ງທີ່ດີດ້ວຍແຮງກະຕຸ້ນທີ່ບໍ່ຖືກຕ້ອງ?’ ເປັນໄປໄດ້. ຕົວຢ່າງເຊັ່ນ: ພະເຢຊູບອກວ່າພະເຢໂຫວາບໍ່ພໍໃຈຜູ້ທີ່ຊ່ວຍເຫຼືອຄົນທຸກຍ້ອນຢາກໄດ້ໜ້າໄດ້ຕາ ເພາະເຖິງວ່າເຂົາເຈົ້າຈະເຮັດສິ່ງທີ່ດີ ແຕ່ເຂົາເຈົ້າກໍເຮັດດ້ວຍແຮງກະຕຸ້ນທີ່ບໍ່ຖືກຕ້ອງ.—ມທ. 6:1-4
15. ເຮົາຈະສະແດງໃຫ້ເຫັນແນວໃດວ່າເຮົາເປັນຄົນດີ?
15 ຖ້າເຮົາຢາກເປັນຄົນດີແທ້ໆ ເຮົາຕ້ອງບໍ່ເຮັດສິ່ງທີ່ດີດ້ວຍເຫດຜົນທີ່ເຫັນແກ່ຕົວ. ດັ່ງນັ້ນ ເຮົາອາດຈະຖາມຕົວເອງວ່າ: ‘ເຖິງຂ້ອຍຈະຮູ້ວ່າອັນໃດເປັນສິ່ງທີ່ດີ ແຕ່ຂ້ອຍໄດ້ເຮັດສິ່ງທີ່ດີນັ້ນບໍ? ແລະຂ້ອຍເຮັດສິ່ງທີ່ດີຍ້ອນຫຍັງ?’
ເຮົາຈະມີລັກສະນະນິດໄສໃໝ່ຕໍ່ໆໄປໄດ້ແນວໃດ?
16. ໃນແຕ່ລະມື້ເຮົາຄວນເຮັດຫຍັງ ແລະຍ້ອນຫຍັງ?
16 ເຮົາບໍ່ຄວນຄິດວ່າເມື່ອເຮົາຮັບບັບເຕມາແລ້ວ ເຮົາຈະມີລັກສະນະນິດໄສໃໝ່ຄົບທຸກຢ່າງແລະບໍ່ຈຳເປັນຕ້ອງປ່ຽນແປງຕົວເອງອີກຕໍ່ໄປ. ຄືກັບເຄື່ອງນຸ່ງທີ່ເຮົາມັກ ເຮົາກໍຢາກຈະຮັກສາໄວ້ໃຫ້ງາມຢູ່ຕະຫຼອດ ລັກສະນະນິດໄສໃໝ່ທີ່ເຮົາມີກໍຄືກັນ ເຮົາຢາກຈະຮັກສາໄວ້ໃຫ້ດີຢູ່ສະເໝີ. ແລະວິທີໜຶ່ງທີ່ເຮົາຈະເຮັດແບບນັ້ນໄດ້ກໍຄື ສະແດງຜົນທີ່ເກີດຈາກພະລັງຂອງພະເຈົ້າທຸກມື້. ຍ້ອນຫຍັງ? ຍ້ອນພະເຢໂຫວາເປັນພະເຈົ້າທີ່ມັກເຮັດສິ່ງຕ່າງໆ ແລະພະລັງບໍລິສຸດຂອງເພິ່ນກໍເຮັດວຽກຢູ່ຕະຫຼອດ. (ຕົ້ນ. 1:2) ດັ່ງນັ້ນ ການທີ່ເຮົາລົງມືເຮັດແລະສະແດງຄຸນລັກສະນະນີ້ຈຶ່ງສຳຄັນຫຼາຍ. ຄືກັບທີ່ຢາໂກໂບບອກວ່າ: “ຄວາມເຊື່ອທີ່ບໍ່ມີການກະທຳກໍຕາຍແລ້ວ.” (ຢກບ. 2:26) ແລະຄຸນລັກສະນະອື່ນໆກໍຄືກັນ ຖ້າເຮົາບໍ່ໄດ້ສະແດງຄຸນລັກສະນະນັ້ນມັນກໍຕາຍຄືກັນ. ດັ່ງນັ້ນ ແຮ່ງເຮົາສະແດງຜົນທີ່ເກີດຈາກພະລັງຂອງພະເຈົ້າຫຼາຍເທົ່າໃດ ພະລັງນັ້ນກໍຈະຊ່ວຍເຮົາໄດ້ຫຼາຍຂຶ້ນ ແລະເຮົາກໍຈະມີລັກສະນະນິດໄສໃໝ່ຕໍ່ໆໄປໄດ້.
17. ເຮົາຄວນເຮັດແນວໃດຖ້າເຮົາບໍ່ໄດ້ສະແດງຜົນທີ່ເກີດຈາກພະລັງຂອງພະເຈົ້າ?
17 ແມ່ນແຕ່ຄລິດສະຕຽນທີ່ຮັບບັບເຕມາມາຫຼາຍປີແລ້ວກໍຍັງບໍ່ໄດ້ສະແດງຜົນທີ່ເກີດຈາກພະລັງຂອງພະເຈົ້າໃນບາງເທື່ອ. ແຕ່ຂໍໃຫ້ເຮົາຢ່າຟ້າວທໍ້ໃຈ ແລະໃຫ້ປັບປຸງຕົວເອງຕໍ່ໆໄປ. ຂໍໃຫ້ຄິດເຖິງຕົວຢ່າງນີ້. ສົມມຸດວ່າເສື້ອທີ່ເຈົ້າມັກມັນຂາດ ເຈົ້າຈະຖິ້ມມັນເລີຍບໍ? ຄືຊິບໍ່. ແຕ່ເຈົ້າຈະພະຍາຍາມຫຍິບບ່ອນທີ່ມັນຂາດ ແລະລະວັງທີ່ຈະບໍ່ໃຫ້ມັນຂາດອີກ. ຄ້າຍຄືກັນ ຖ້າບາງເທື່ອເຈົ້າບໍ່ໄດ້ອົດທົນ ບໍ່ໄດ້ເຮັດດີ ຫຼືບໍ່ໄດ້ສະແດງຄວາມຮັກຕໍ່ຄົນອື່ນ ກໍຂໍໃຫ້ເຈົ້າຢ່າທໍ້ໃຈ ແຕ່ໃຫ້ໄປຂໍໂທດຜູ້ນັ້ນຢ່າງຈິງໃຈ ເພາະນີ້ເປັນສິ່ງສຳຄັນທີ່ຈະຄືນດີກັນ. ແລະຂໍໃຫ້ເຈົ້າປັບປຸງຕົວເອງໃຫ້ດີຂຶ້ນຕໍ່ໆໄປ.
18. ເຮົາສາມາດໝັ້ນໃຈໃນເລື່ອງຫຍັງ?
18 ເຮົາຮູ້ສຶກຂອບໃຈຫຼາຍແທ້ໆທີ່ມີຕົວຢ່າງຂອງພະເຢຊູ! ແຮ່ງເຮົາພະຍາຍາມຄິດຄືກັບພະເຢຊູຫຼາຍເທົ່າໃດ ເຮົາກໍແຮ່ງຈະເຮັດຄືກັບເພິ່ນໄດ້ຫຼາຍຂຶ້ນ. ແລະເມື່ອເຮົາເຮັດຄືກັບພະເຢຊູຫຼາຍເທົ່າໃດ ເຮົາກໍແຮ່ງຈະມີລັກສະນະນິດໄສໃໝ່ໄດ້. ໃນບົດຄວາມນີ້ ເຮົາໄດ້ຮຽນຄຸນລັກສະນະ 4 ຢ່າງເຊິ່ງເປັນຜົນທີ່ເກີດຈາກພະລັງຂອງພະເຈົ້າ. ດັ່ງນັ້ນ ຈຶ່ງເປັນສິ່ງທີ່ດີທີ່ເຮົາຈະຮຽນຮູ້ຄຸນລັກສະນະອື່ນໆອີກ ແລະຄິດເບິ່ງວ່າເຮົາໄດ້ສະແດງຄຸນລັກສະນະນັ້ນໃນຊີວິດຂອງເຮົາບໍ? ເຮົາສາມາດຮຽນຮູ້ຄຸນລັກສະນະເຫຼົ່ານີ້ຫຼາຍຂຶ້ນໄດ້ຈາກຄູ່ມືຄົ້ນຄວ້າສຳລັບພະຍານພະເຢໂຫວາ ເລື່ອງ “ຊີວິດຄລິດສະຕຽນ” ແລະໄປທີ່ “ຜົນຂອງພະລັງບໍລິສຸດ.”c ຖ້າເຮົາພະຍາຍາມເຮັດແບບນີ້ ເຮົາກໍໝັ້ນໃຈໄດ້ເລີຍວ່າພະເຢໂຫວາຈະຊ່ວຍເຮົາໃຫ້ມີລັກສະນະນິດໄສໃໝ່ແລະມີລັກສະນະນີ້ຕໍ່ໆໄປໄດ້.
ເພງ 127 ຂ້ອຍຄວນເປັນຄົນແບບໃດ?
a ບໍ່ວ່າເຮົາຈະຖືກລ້ຽງມາແນວໃດ ເຮົາກໍສາມາດມີ “ລັກສະນະນິດໄສໃໝ່” ໄດ້. ແຕ່ເພື່ອຈະເຮັດແບບນັ້ນ ເຮົາຕ້ອງປັບຄວາມຄິດຂອງຕົວເອງຢູ່ຕະຫຼອດເພື່ອຈະເປັນຄືກັບພະເຢຊູ. ໃນບົດຄວາມນີ້ເຮົາຈະໄດ້ຮຽນກ່ຽວກັບສິ່ງທີ່ພະເຢຊູຄິດແລະເຮັດ ແລະເບິ່ງວ່າເຮົາຈະຮຽນແບບເພິ່ນຕໍ່ໆໄປໄດ້ແນວໃດຫຼັງຈາກທີ່ຮັບບັບເຕມາແລ້ວ.
b ຄາລາເຕຍ 5:22, 23 ບໍ່ໄດ້ເວົ້າເຖິງຄຸນລັກສະນະທຸກຢ່າງເຊິ່ງເປັນຜົນທີ່ເກີດຈາກພະລັງຂອງພະເຈົ້າ. ເພື່ອຈະຮູ້ເລື່ອງນີ້ຫຼາຍຂຶ້ນ ຂໍໃຫ້ເບິ່ງ “ຄຳຖາມຈາກຜູ້ອ່ານ” ໃນຫໍສັງເກດການ ເດືອນມິຖຸນາ 2020.
c (ພາສາໄທ)