ບົດຄວາມສຶກສາທີ 14
ຜູ້ດູແລ ຂໍໃຫ້ຮຽນແບບອັກຄະສາວົກໂປໂລຕໍ່ໆໄປ
“ຂໍໃຫ້ຮຽນແບບຂ້ອຍ.”—1 ກຣ. 11:1
ເພງ 99 ພີ່ນ້ອງເປັນແສນເປັນລ້ານຄົນ
ໃຈຄວາມສຳຄັນa
1-2. ຕົວຢ່າງຂອງອັກຄະສາວົກໂປໂລຊ່ວຍຜູ້ດູແລໃນທຸກມື້ນີ້ແນວໃດ?
ອັກຄະສາວົກໂປໂລຮັກພີ່ນ້ອງຫຼາຍ ລາວຈຶ່ງເຮັດວຽກໜັກຫຼາຍຢ່າງເພື່ອຊ່ວຍເຫຼືອພີ່ນ້ອງ ນີ້ຈຶ່ງເຮັດໃຫ້ພີ່ນ້ອງຮັກລາວຫຼາຍ. (ກຈກ. 20:31) ມີເທື່ອໜຶ່ງ ເມື່ອພວກຜູ້ດູແລຮູ້ວ່າຈະບໍ່ໄດ້ເຈິໂປໂລອີກ ເຂົາເຈົ້າກໍໄດ້ “ພາກັນຮ້ອງໄຫ້.” (ກຈກ. 20:37) ຜູ້ດູແລໃນທຸກມື້ນີ້ກໍຄືກັນ ເຂົາເຈົ້າຮັກພີ່ນ້ອງຫຼາຍແລະເຮັດທຸກຢ່າງເພື່ອຊ່ວຍເຫຼືອພີ່ນ້ອງ. (ຟລປ. 2:16, 17) ແຕ່ບາງເທື່ອເຂົາເຈົ້າກໍມີບັນຫາຄືກັນ. ແລ້ວສິ່ງໃດຈະຊ່ວຍເຂົາເຈົ້າໄດ້?
2 ຜູ້ດູແລສາມາດຄິດເຖິງຕົວຢ່າງຂອງອັກຄະສາວົກໂປໂລ. (1 ກຣ. 11:1) ໂປໂລບໍ່ໄດ້ມີຄວາມສາມາດເໜືອມະນຸດ ລາວກໍເປັນຄົນທີ່ບໍ່ສົມບູນແບບຄືກັບພວກເຮົາເຊິ່ງບາງເທື່ອກໍຮູ້ສຶກຍາກທີ່ຈະເຮັດສິ່ງທີ່ຖືກຕ້ອງ ແລະມີບັນຫາຫຼາຍຢ່າງທີ່ເຮັດໃຫ້ໜັກໃຈ. (ຣມ. 7:18-20) ແຕ່ລາວກໍບໍ່ໄດ້ຍອມໃຫ້ສິ່ງນັ້ນມາເຮັດໃຫ້ລາວຮູ້ສຶກທໍ້ໃຈແລະສູນເສຍຄວາມຍິນດີໃນວຽກຮັບໃຊ້. ຖ້າຜູ້ດູແລໃນທຸກມື້ນີ້ຮຽນແບບຕົວຢ່າງຂອງໂປໂລ ເຂົາເຈົ້າກໍຈະສາມາດຮັບມືກັບບັນຫາຕ່າງໆທີ່ເຂົາເຈົ້າເຈິໄດ້ ແລະມີຄວາມສຸກຕໍ່ໆໄປໃນການຮັບໃຊ້ພະເຢໂຫວາ. ໃຫ້ເຮົາມາເບິ່ງວ່າເຂົາເຈົ້າຈະເຮັດແບບນັ້ນໄດ້ແນວໃດ?
3. ເຮົາຈະຮຽນຫຍັງໃນບົດຄວາມນີ້ ແລະບົດຄວາມນີ້ຈະຊ່ວຍເຮົາໃຫ້ເຮັດຫຍັງ?
3 ໃນບົດຄວາມນີ້ ເຮົາຈະມາເບິ່ງບັນຫາ 4 ຢ່າງທີ່ຍາກສຳລັບຜູ້ດູແລ ເຊິ່ງກໍຄື: (1) ເຮັດວຽກປະກາດແລະໜ້າທີ່ຮັບຜິດຊອບອື່ນໃຫ້ໄດ້ດີ. (2) ໃຫ້ກຳລັງໃຈພີ່ນ້ອງ. (3) ອົດທົນກັບຂໍ້ອ່ອນແອຂອງຕົວເອງ. ແລະ (4) ອົດທົນກັບຄວາມບໍ່ສົມບູນແບບຂອງຄົນອື່ນ. ແລະເຮົາຍັງຈະຮຽນວ່າ ໂປໂລຮັບມືກັບບັນຫາຕ່າງໆນີ້ແນວໃດ ແລະຜູ້ດູແລຈະຮຽນແບບຕົວຢ່າງຂອງລາວແນວໃດ.
ເຮັດວຽກປະກາດແລະໜ້າທີ່ຮັບຜິດຊອບອື່ນໃຫ້ໄດ້ດີ
4. ເປັນຫຍັງຈຶ່ງເປັນເລື່ອງຍາກສຳລັບຜູ້ດູແລທີ່ຈະປັນຕົວຢ່າງທີ່ດີໃນການປະກາດ?
4 ເປັນຫຍັງຈຶ່ງຍາກ? ນອກຈາກຜູ້ດູແລຈະນຳໜ້າໃນການປະກາດແລ້ວ ເຂົາເຈົ້າຍັງມີໜ້າທີ່ຮັບຜິດຊອບອື່ນໆອີກ. ຕົວຢ່າງເຊັ່ນ: ເຂົາເຈົ້າຍັງໄດ້ນຳສ່ວນໃນການປະຊຸມກາງອາທິດແລະນຳການສຶກສາຄຳພີໄບເບິນປະຈຳປະຊາຄົມ ແລະອາດຍັງຕ້ອງໃຫ້ຄຳບັນຍາຍອື່ນໆອີກ. ນອກຈາກນັ້ນ ເຂົາເຈົ້າຍັງໄດ້ຊ່ວຍຝຶກຜູ້ຊ່ວຍວຽກຮັບໃຊ້ແລະໃຫ້ກຳລັງໃຈພີ່ນ້ອງ. (1 ປຕ. 5:2) ຜູ້ດູແລບາງຄົນຍັງໄດ້ເຮັດວຽກສ້າງແລະບຳລຸງຮັກສາຫໍປະຊຸມແລະຕຶກອາຄານຕ່າງໆຂອງອົງການ. ເຖິງວ່າຜູ້ດູແລຈະມີໜ້າທີ່ຮັບຜິດຊອບຫຼາຍຢ່າງ ແຕ່ເຂົາເຈົ້າກໍມີວຽກຫຼັກຄືກັບພີ່ນ້ອງຄົນອື່ນໆ ນັ້ນກໍຄື ເປັນຜູ້ປະກາດຂ່າວດີ.—ມທ. 28:19, 20
5. ໂປໂລເປັນຕົວຢ່າງທີ່ດີແນວໃດໃນການປະກາດ?
5 ຕົວຢ່າງຂອງໂປໂລ. ເຄັດລັບທີ່ຊ່ວຍໃຫ້ໂປໂລເປັນຜູ້ປະກາດທີ່ດີກໍຄື ລາວເຮັດຕາມຄຳແນະນຳທີ່ຢູ່ໃນຟີລິບປອຍ 1:10 ທີ່ບອກວ່າ: “ເບິ່ງໃຫ້ອອກວ່າສິ່ງໃດສຳຄັນກວ່າ.” ເຖິງວ່າໂປໂລຈະມີວຽກມອບໝາຍຫຼາຍຢ່າງ ແຕ່ລາວກໍຖືວ່າວຽກປະກາດເປັນວຽກທີ່ສຳຄັນກວ່າໝູ່. ລາວໄດ້ປະກາດຢູ່ “ບ່ອນສາທາລະນະແລະຕາມບ້ານເຮືອນ.” (ກຈກ. 20:20) ລາວບໍ່ໄດ້ປະກາດສະເພາະມື້ໃດມື້ໜຶ່ງເທົ່ານັ້ນ ແຕ່ລາວໃຊ້ທຸກໂອກາດເພື່ອຈະປະກາດຂ່າວດີ. ຕົວຢ່າງເຊັ່ນ ຕອນທີ່ລາວຖ້າໝູ່ຢູ່ໃນເມືອງອາແຖນ ລາວໄດ້ປະກາດກັບຄົນກຸ່ມໜຶ່ງທີ່ມີຊື່ສຽງໃນສັງຄົມ ແລະກໍໄດ້ຮັບຜົນດີ. (ກຈກ. 17:16, 17, 34) ແມ່ນແຕ່ຕອນທີ່ລາວ “ຖືກກັກຂັງ” ລາວກໍໄດ້ປະກາດກັບຄົນທີ່ມາຢາມລາວແລະທະຫານທີ່ເຝົ້າລາວ.—ຟລປ. 1:13, 14; ກຈກ. 28:16-24
6. ໂປໂລໄດ້ຝຶກສອນພີ່ນ້ອງໃນເລື່ອງຫຍັງແດ່?
6 ໂປໂລໃຊ້ເວລາຂອງຕົວເອງໃຫ້ເປັນປະໂຫຍດຫຼາຍທີ່ສຸດ. ລາວມັກຈະຊວນພີ່ນ້ອງອື່ນໆໄປຮັບໃຊ້ກັບລາວ. ຕົວຢ່າງເຊັ່ນ: ໃນການເດີນທາງໄປປະກາດຢູ່ຕ່າງປະເທດຮອບທຳອິດ ລາວໄດ້ຊວນໂຢຮັນເຊິ່ງມີອີກຊື່ໜຶ່ງວ່າມາຣະໂກໄປນຳ ແລະຮອບທີສອງ ລາວໄດ້ຊວນຕີໂມທຽວໄປນຳ. (ກຈກ. 12:25; 16:1-4) ໃນເວລານັ້ນໂປໂລໄດ້ຝຶກສອນພີ່ນ້ອງຊາຍເຫຼົ່ານີ້ໃຫ້ຮູ້ວິທີກໍ່ຕັ້ງປະຊາຄົມ ໃຫ້ກຳລັງໃຈພີ່ນ້ອງ ແລະໃຫ້ເປັນຜູ້ສອນທີ່ດີ.—1 ກຣ. 4:17
ໃຫ້ຮຽນແບບໂປໂລໂດຍພ້ອມສະເໝີທີ່ຈະປະກາດຂ່າວດີ (ເບິ່ງຂໍ້ 7)c
7. ຜູ້ດູແລຈະເຮັດຕາມຕົວຢ່າງຂອງໂປໂລທີ່ຢູ່ໃນເອເຟໂຊ 6:14, 15 ແນວໃດ?
7 ຜູ້ດູແລໄດ້ບົດຮຽນຫຍັງ? ຜູ້ດູແລສາມາດຮຽນແບບຕົວຢ່າງຂອງໂປໂລໂດຍບໍ່ພຽງແຕ່ປະກາດຕາມບ້ານເຮືອນເທົ່ານັ້ນ ແຕ່ຍັງພ້ອມທີ່ຈະປະກາດຢູ່ບ່ອນອື່ນເມື່ອມີໂອກາດ. (ອ່ານເອເຟໂຊ 6:14, 15) ຕົວຢ່າງເຊັ່ນ ເຂົາເຈົ້າຈະປະກາດຕອນທີ່ໄປຊື້ເຄື່ອງຫຼືປະກາດຢູ່ບ່ອນເຮັດວຽກ. ຫຼືຕອນທີ່ໄປຊ່ວຍວຽກໃນໂຄງການກໍ່ສ້າງຂອງອົງການ ເຂົາເຈົ້າສາມາດປະກາດຂ່າວດີກັບຄົນທີ່ຢູ່ແຖວນັ້ນແລະຄົນທີ່ມາຂາຍເຄື່ອງ. ຜູ້ດູແລຍັງສາມາດຮຽນແບບໂປໂລໂດຍໃຊ້ເວລາຕອນທີ່ໄປປະກາດຝຶກສອນຄົນອື່ນ ເຊິ່ງລວມເຖິງຝຶກສອນຜູ້ຊ່ວຍວຽກຮັບໃຊ້ນຳ.
8. ບາງເທື່ອຜູ້ດູແລອາດຕ້ອງເຮັດຫຍັງ?
8 ຜູ້ດູແລບໍ່ຄວນຫຍຸ້ງຢູ່ກັບວຽກປະຊາຄົມຫຼືວຽກໃນໝວດຫຼາຍເກີນໄປຈົນບໍ່ມີເວລາເຮັດວຽກປະກາດ. ເພື່ອຈະເຮັດວຽກທັງສອງຢ່າງນີ້ໄດ້ດີ ເຂົາເຈົ້າອາດຈະບໍ່ຮັບເອົາວຽກເພີ່ມ. ເຂົາເຈົ້າຄວນຈະອະທິດຖານແລະຄິດດີໆວ່າ ຖ້າຮັບເອົາວຽກນີ້ ເຂົາເຈົ້າຈະເຮັດວຽກທີ່ສຳຄັນກວ່າໄດ້ບໍ ເຊັ່ນ ນຳການນະມັດສະການປະຈຳຄອບຄົວ ມີສ່ວນຮ່ວມເຕັມທີໃນວຽກປະກາດ ຫຼືຝຶກສອນລູກໃນການປະກາດ. ບາງຄົນອາດຮູ້ສຶກວ່າຍາກທີ່ຈະປະຕິເສດບໍ່ຮັບເອົາວຽກມອບໝາຍຫຼາຍຂຶ້ນ ແຕ່ເຂົາເຈົ້າສາມາດໝັ້ນໃຈໄດ້ວ່າພະເຢໂຫວາເຂົ້າໃຈວ່າເຂົາເຈົ້າຢາກເຮັດວຽກທຸກຢ່າງໃຫ້ອອກມາດີທີ່ສຸດ.
ໃຫ້ກຳລັງໃຈພີ່ນ້ອງ
9. ຜູ້ດູແລທີ່ມີວຽກຫຼາຍເຈິກັບບັນຫາຫຍັງ?
9 ເປັນຫຍັງຈຶ່ງຍາກ? ໃນສະໄໝສຸດທ້າຍນີ້ປະຊາຊົນຂອງພະເຢໂຫວາເຈິກັບບັນຫາຫຼາຍຢ່າງ. ດັ່ງນັ້ນ ເຂົາເຈົ້າຈຶ່ງຕ້ອງການກຳລັງໃຈ ຄວາມຊ່ວຍເຫຼືອ ແລະການປອບໂຍນ. ແລະບາງເທື່ອ ບາງຄົນຕ້ອງໄດ້ຮັບຄວາມຊ່ວຍເຫຼືອເພື່ອບໍ່ໃຫ້ເຮັດຜິດ. (1 ທຊ. 5:14) ແມ່ນຢູ່ວ່າຜູ້ດູແລບໍ່ສາມາດແກ້ໄຂບັນຫາທຸກຢ່າງທີ່ພີ່ນ້ອງເຈິ ແຕ່ພະເຢໂຫວາກໍຢາກໃຫ້ເຂົາເຈົ້າເຮັດທຸກຢ່າງທີ່ເຮັດໄດ້ເພື່ອໃຫ້ກຳລັງໃຈແລະປົກປ້ອງພີ່ນ້ອງ. ແລ້ວຜູ້ດູແລຈະເຮັດແນວໃດເພື່ອຈະມີເວລາຊ່ວຍເຫຼືອພີ່ນ້ອງ?
ຊົມເຊີຍແລະໃຫ້ກຳລັງໃຈຄົນອື່ນ (ເບິ່ງຂໍ້ 10, 12)d
10. ຕາມ 1 ເທຊະໂລນິກ 2:7 ໂປໂລໄດ້ປະຕິບັດກັບພີ່ນ້ອງແນວໃດ?
10 ຕົວຢ່າງຂອງໂປໂລ. ໂປໂລຊອກຫາວິທີທີ່ຈະຊົມເຊີຍແລະໃຫ້ກຳລັງໃຈພີ່ນ້ອງ. ຜູ້ດູແລກໍຄວນຮຽນແບບໂປໂລໂດຍປະຕິບັດກັບພີ່ນ້ອງດ້ວຍຄວາມຮັກແລະຄວາມອ່ອນໂຍນ. (ອ່ານ 1 ເທຊະໂລນິກ 2:7) ໂປໂລໄດ້ເຮັດໃຫ້ພີ່ນ້ອງໝັ້ນໃຈວ່າພະເຢໂຫວາກັບລາວຮັກເຂົາເຈົ້າ. (2 ກຣ. 2:4; ອຟຊ. 2:4, 5) ລາວຍັງໄດ້ປະຕິບັດກັບພີ່ນ້ອງເປັນຄືກັບໝູ່ແລະໃຊ້ເວລາຢູ່ກັບເຂົາເຈົ້າ. ນອກຈາກນັ້ນ ລາວຍັງສະແດງໃຫ້ພີ່ນ້ອງເຫັນວ່າລາວໝັ້ນໃຈໃນຕົວເຂົາເຈົ້າໂດຍເວົ້າຢ່າງເປີດໃຈກັບເຂົາເຈົ້າກ່ຽວກັບຄວາມຢ້ານແລະຂໍ້ບົກພ່ອງຂອງຕົວເອງ. (2 ກຣ. 7:5; 1 ຕມ. 1:15) ແຕ່ລາວກໍບໍ່ໄດ້ເວົ້າແຕ່ບັນຫາຂອງຕົວເອງ ລາວຍັງໄດ້ຟັງພີ່ນ້ອງເພາະລາວຢາກຊ່ວຍເຂົາເຈົ້າ.
11. ເປັນຫຍັງໂປໂລຈຶ່ງໃຫ້ຄຳແນະນຳກັບພີ່ນ້ອງ?
11 ບາງເທື່ອໂປໂລຈຳເປັນຕ້ອງໄດ້ໃຫ້ຄຳແນະນຳກັບພີ່ນ້ອງ. ແຕ່ລາວກໍບໍ່ເຄີຍໃຫ້ຄຳແນະນຳກັບພີ່ນ້ອງຍ້ອນຮູ້ສຶກໃຈຮ້າຍ. ລາວໃຫ້ຄຳແນະນຳກັບເຂົາເຈົ້າຍ້ອນວ່າຮັກແລະຢາກປົກປ້ອງເຂົາເຈົ້າຈາກສິ່ງອັນຕະລາຍ. ລາວພະຍາຍາມໃຫ້ຄຳແນະນຳທີ່ເຂົ້າໃຈງ່າຍແລະຍັງເປັນຫ່ວງວ່າພີ່ນ້ອງຈະຮັບຄຳແນະນຳນັ້ນໄດ້ຫຼືບໍ່. ຕົວຢ່າງເຊັ່ນ: ຕອນທີ່ລາວຂຽນຈົດໝາຍເຖິງພີ່ນ້ອງໃນເມືອງໂກຣິນໂທ ລາວໄດ້ໃຫ້ຄຳແນະນຳທີ່ໜັກແໜ້ນກັບເຂົາເຈົ້າ. ແຕ່ຫຼັງຈາກທີ່ລາວຂຽນຈົດໝາຍໄປໃຫ້ເຂົາເຈົ້າແລ້ວ ລາວກໍໄດ້ສົ່ງຕິໂຕໄປຫາເຂົາເຈົ້າ ເພາະລາວຢາກຮູ້ວ່າພີ່ນ້ອງຄິດແນວໃດກ່ຽວກັບຈົດໝາຍຂອງລາວ.—2 ກຣ. 7:6, 7
12. ຜູ້ດູແລຈະໃຫ້ກຳລັງໃຈພີ່ນ້ອງແນວໃດ?
12 ຜູ້ດູແລໄດ້ບົດຮຽນຫຍັງ? ຜູ້ດູແລສາມາດຮຽນແບບຕົວຢ່າງຂອງໂປໂລໂດຍໃຊ້ເວລາຢູ່ກັບພີ່ນ້ອງ. ວິທີໜຶ່ງທີ່ຈະເຮັດແບບນັ້ນໄດ້ກໍຄື ມາປະຊຸມກ່ອນເວລາເພື່ອຈະລົມກັບພີ່ນ້ອງ. ເພາະການເຮັດແບບນີ້ພຽງບໍ່ເທົ່າໃດນາທີກໍເປັນການໃຫ້ກຳລັງໃຈພີ່ນ້ອງແລ້ວ. (ຣມ. 1:12; ອຟຊ. 5:16) ຜູ້ດູແລທີ່ຮຽນແບບຕົວຢ່າງຂອງໂປໂລຍັງຈະໃຊ້ພະຄຳພີເພື່ອໃຫ້ກຳລັງໃຈພີ່ນ້ອງ ແລະເຮັດໃຫ້ພີ່ນ້ອງໝັ້ນໃຈວ່າພະເຢໂຫວາຮັກເຂົາເຈົ້າ. ນອກຈາກນັ້ນ ຜູ້ດູແລຍັງສະແດງຄວາມຮັກຕໍ່ພີ່ນ້ອງໂດຍພະຍາຍາມຕິດຕໍ່ກັບເຂົາເຈົ້າເລື້ອຍໆ ແລະຊົມເຊີຍເຂົາເຈົ້າເມື່ອເຫັນວ່າເໝາະສົມ. ແລະເມື່ອຈະໃຫ້ຄຳແນະນຳ ຜູ້ດູແລຕ້ອງໃຫ້ຄຳແນະນຳທີ່ມາຈາກຄຳພີໄບເບິນ ເວົ້າສະເພາະເຈາະຈົງ ແຕ່ເວົ້າດ້ວຍຄວາມອ່ອນໂຍນ ເພາະຜູ້ດູແລເປັນຫ່ວງຄວາມຮູ້ສຶກຂອງພີ່ນ້ອງວ່າເຂົາເຈົ້າຈະຮັບຄຳແນະນຳນັ້ນໄດ້ບໍ.—ຄລຕ. 6:1
ອົດທົນກັບຂໍ້ອ່ອນແອຂອງຕົວເອງ
13. ຂໍ້ອ່ອນແອມີຜົນຕໍ່ຜູ້ດູແລແນວໃດ?
13 ເປັນຫຍັງຈຶ່ງຍາກ? ຜູ້ດູແລກໍເປັນຄົນບໍ່ສົມບູນແບບຄືກັບຄົນອື່ນທົ່ວໄປທີ່ເຮັດຜິດພາດໄດ້. (ຣມ. 3:23) ບາງເທື່ອເຂົາເຈົ້າກໍຮູ້ສຶກວ່າຍາກທີ່ຈະເບິ່ງຂໍ້ອ່ອນແອຂອງຕົວເອງຢ່າງເໝາະສົມ. ບາງຄົນອາດຈະຄິດເຖິງແຕ່ຄວາມຜິດພາດຂອງຕົວເອງຫຼາຍເກີນໄປຈົນເຮັດໃຫ້ທໍ້ໃຈ. ສ່ວນບາງຄົນອາດຈະບໍ່ສົນໃຈຄວາມຜິດພາດຂອງຕົວເອງແລະບໍ່ຢາກປ່ຽນແປງຕົວເອງເລີຍ.
14. ຕາມຟີລິບປອຍ 4:13 ຄວາມຖ່ອມຊ່ວຍໂປໂລໃຫ້ອົດທົນກັບຂໍ້ອ່ອນແອຂອງຕົວເອງແນວໃດ?
14 ຕົວຢ່າງຂອງໂປໂລ. ໂປໂລຮູ້ວ່າລາວບໍ່ສາມາດອົດທົນກັບຂໍ້ອ່ອນແອໄດ້ດ້ວຍຕົວເອງ ລາວຕ້ອງໝາຍເພິ່ງກຳລັງຈາກພະເຈົ້າ. ແຕ່ກ່ອນ ໂປໂລເປັນຄົນທີ່ແຂງກະດ້າງແລະຂົ່ມເຫງຄລິດສະຕຽນຢ່າງໜັກ. ຕໍ່ມາ ລາວກໍຮູ້ວ່າສິ່ງທີ່ລາວເຄີຍເຮັດນັ້ນມັນຜິດ ແລະລາວກໍຢາກປ່ຽນແປງຄວາມຄິດແລະນິດໄສຂອງຕົວເອງ. (1 ຕມ. 1:12-16) ດ້ວຍຄວາມຊ່ວຍເຫຼືອຈາກພະເຢໂຫວາ ຈຶ່ງເຮັດໃຫ້ໂປໂລເປັນຜູ້ດູແລທີ່ຖ່ອມໃຈ ເຫັນອົກເຫັນໃຈ ແລະຮັກຄົນອື່ນ. ລາວເຄີຍເຮັດຜິດພາດຫຼາຍຢ່າງ ແຕ່ລາວກໍບໍ່ໄດ້ຈົມຢູ່ກັບຄວາມຜິດພາດນັ້ນຫຼາຍຈົນເກີນໄປ ເພາະລາວໝັ້ນໃຈວ່າພະເຢໂຫວາຈະໃຫ້ອະໄພລາວ. (ຣມ. 7:21-25) ລາວບໍ່ໄດ້ຄາດໝາຍວ່າຕົວເອງຈະເປັນຄົນສົມບູນແບບ. ແຕ່ລາວຖ່ອມໃຈຂໍຄວາມຊ່ວຍເຫຼືອຈາກພະເຢໂຫວາໃຫ້ຊ່ວຍລາວປັບປຸງລັກສະນະນິດໄສແບບຄລິດສະຕຽນ ແລະເຮັດວຽກທີ່ໄດ້ຮັບມອບໝາຍໃຫ້ສຳເລັດ.—1 ກຣ. 9:27; ອ່ານຟີລິບປອຍ 4:13
ໃຫ້ພະຍາຍາມອົດທົນກັບຂໍ້ອ່ອນແອຂອງຕົວເອງ (ເບິ່ງຂໍ້ 14-15)e
15. ຜູ້ດູແລຈະເຮັດແນວໃດເມື່ອຮູ້ວ່າຕົວເອງມີຂໍ້ຜິດພາດ?
15 ຜູ້ດູແລໄດ້ບົດຮຽນຫຍັງ? ຜູ້ດູແລບໍ່ໄດ້ຖືກແຕ່ງຕັ້ງຍ້ອນວ່າເຂົາເຈົ້າເປັນຄົນສົມບູນແບບ. ເຖິງຈະບໍ່ໄດ້ເປັນແບບນັ້ນ ແຕ່ພະເຢໂຫວາກໍຄາດໝາຍໃຫ້ເຂົາເຈົ້າໃຫ້ຍອມຮັບຂໍ້ຜິດພາດຂອງຕົວເອງ ແລະປັບປຸງຕົວເອງໃຫ້ມີລັກສະນະນິດໄສແບບຄລິດສະຕຽນ. (ອຟຊ. 4:23, 24) ດັ່ງນັ້ນ ຜູ້ດູແລຄວນໃຊ້ຄຳພີໄບເບິນກວດເບິ່ງຕົວເອງວ່າມີຫຍັງແດ່ທີ່ຕ້ອງໄດ້ປ່ຽນແປງ. ຖ້າເຂົາເຈົ້າເຮັດແບບນັ້ນ ພະເຢໂຫວາກໍຈະຊ່ວຍເຂົາເຈົ້າໃຫ້ມີຄວາມສຸກແລະເປັນຜູ້ດູແລທີ່ດີໄດ້.—ຢກບ. 1:25
ອົດທົນກັບຄວາມບໍ່ສົມບູນແບບຂອງຄົນອື່ນ
16. ຈະເປັນແນວໃດຖ້າຜູ້ດູແລເບິ່ງແຕ່ຄວາມຜິດພາດຂອງພີ່ນ້ອງ?
16 ເປັນຫຍັງຈຶ່ງຍາກ? ເມື່ອຜູ້ດູແລຕິດຕໍ່ພົວພັນກັບພີ່ນ້ອງເລື້ອຍໆ ອາດເປັນເລື່ອງງ່າຍທີ່ຈະເຫັນຄວາມບໍ່ສົມບູນແບບຂອງພີ່ນ້ອງ. ຖ້າບໍ່ລະວັງ ຜູ້ດູແລອາດຈະຮູ້ສຶກຫງຸດຫງິດ ຄຽດໃຫ້ພີ່ນ້ອງ ຫຼືເຖິງຂັ້ນວິພາກວິຈານພີ່ນ້ອງ. ໂປໂລຈຶ່ງໄດ້ເຕືອນພີ່ນ້ອງຄລິດສະຕຽນວ່າຊາຕານຢາກໃຫ້ເຂົາເຈົ້າເຮັດແບບນັ້ນ.—2 ກຣ. 2:10, 11
17. ໂປໂລເບິ່ງພີ່ນ້ອງແນວໃດ?
17 ຕົວຢ່າງຂອງໂປໂລ. ໂປໂລເບິ່ງພີ່ນ້ອງໃນແງ່ດີຕະຫຼອດ. ລາວໄຈ້ແຍກໄດ້ວ່າເຖິງພີ່ນ້ອງຈະເຮັດບໍ່ດີແຕ່ກໍບໍ່ໄດ້ໝາຍຄວາມວ່າເຂົາເຈົ້າເປັນຄົນຊົ່ວ. ລາວຮູ້ວ່າເຂົາເຈົ້າຈະເຮັດຜິດພາດ ແລະບາງເທື່ອອາດຈະເຮັດໃຫ້ລາວເສຍໃຈ. ແຕ່ລາວກໍຍັງຮັກພີ່ນ້ອງແລະເບິ່ງຈຸດດີຂອງເຂົາເຈົ້າ. ດັ່ງນັ້ນ ເມື່ອພີ່ນ້ອງເຮັດຜິດ ລາວກໍເບິ່ງວ່າພີ່ນ້ອງຢາກເຮັດສິ່ງທີ່ດີ ພຽງແຕ່ຕ້ອງມີຄົນມາຊ່ວຍໃຫ້ເຂົາເຈົ້າເຮັດສິ່ງນັ້ນໄດ້.
18. ເຈົ້າໄດ້ບົດຮຽນຫຍັງຈາກວິທີທີ່ໂປໂລຊ່ວຍຢູໂອເດຍແລະຊີນຕີເຂ? (ຟີລິບປອຍ 4:1-3)
18 ໃຫ້ເຮົາມາເບິ່ງວ່າໂປໂລໄດ້ຊ່ວຍພີ່ນ້ອງຍິງສອງຄົນທີ່ຢູ່ໃນເມືອງຟີລິບປອຍແນວໃດ. (ອ່ານຟີລິບປອຍ 4:1-3) ຢູໂອເດຍແລະຊີນຕີເຂຍອມໃຫ້ຄວາມມັກສ່ວນຕົວມາເຮັດໃຫ້ເຂົາເຈົ້າຜິດກັນ. ແຕ່ໂປໂລຮູ້ວ່າພີ່ນ້ອງຍິງສອງຄົນນີ້ຮັບໃຊ້ພະເຢໂຫວາຢ່າງສັດຊື່ມາຫຼາຍປີ ແລະກໍຮູ້ວ່າພະເຢໂຫວາຮັກເຂົາເຈົ້າ. ດັ່ງນັ້ນ ລາວຈຶ່ງເບິ່ງແຕ່ຈຸດດີຂອງພີ່ນ້ອງສອງຄົນນີ້ ແລະບໍ່ໄດ້ຫງຸດຫງິດຫຼືວິພາກວິຈານເຂົາເຈົ້າ. ຍ້ອນແນວນີ້ລາວຈຶ່ງໄດ້ກະຕຸ້ນເຂົາເຈົ້າໃຫ້ມາຄືນດີກັນ. ການທີ່ໂປໂລເຮັດແບບນີ້ເຮັດໃຫ້ລາວມີຄວາມສຸກແລະຮັກສາສາຍສຳພັນທີ່ດີກັບພີ່ນ້ອງໃນປະຊາຄົມ.
ພະຍາຍາມບໍ່ວິພາກວິຈານຄົນອື່ນ (ເບິ່ງຂໍ້ 19)f
19. (ກ) ຜູ້ດູແລຈະເບິ່ງພີ່ນ້ອງໃນແງ່ບວກໄດ້ແນວໃດ? (ຂ) ເຈົ້າໄດ້ບົດຮຽນຫຍັງຈາກຮູບພາບທີ່ຜູ້ດູແລອະນາໄມຫໍປະຊຸມ?
19 ຜູ້ດູແລໄດ້ບົດຮຽນຫຍັງ? ຜູ້ດູແລຄວນເບິ່ງຈຸດດີຂອງພີ່ນ້ອງ. ເຖິງວ່າເຂົາເຈົ້າຈະບໍ່ສົມບູນແບບ ແຕ່ເຂົາເຈົ້າກໍມີຈຸດດີທີ່ເຮົາສາມາດຊົມເຊີຍໄດ້. (ຟລປ. 2:3) ກະແມ່ນຢູ່ວ່າບາງເທື່ອຜູ້ດູແລອາດຕ້ອງໃຫ້ຄຳແນະນຳກັບພີ່ນ້ອງ ແຕ່ກໍຂໍໃຫ້ເຮັດຄືກັບໂປໂລໂດຍພະຍາຍາມເບິ່ງຂ້າມຄຳເວົ້າແລະການກະທຳທີ່ບໍ່ດີຂອງພີ່ນ້ອງ. ແລະເບິ່ງວ່າເຂົາເຈົ້າຮັກພະເຢໂຫວາແລະຮັບໃຊ້ເພິ່ນດ້ວຍຄວາມອົດທົນແລະຍັງສາມາດເຮັດສິ່ງທີ່ດີຕໍ່ໄປໄດ້. ຜູ້ດູແລທີ່ເບິ່ງຈຸດດີໃນຕົວຂອງພີ່ນ້ອງຈະສ້າງບັນຍາກາດທີ່ອົບອຸ່ນແລະເຮັດໃຫ້ພີ່ນ້ອງໃນປະຊາຄົມຮັກແພງກັນຫຼາຍຂຶ້ນ.
ໃຫ້ຮຽນແບບໂປໂລຕໍ່ໆໄປ
20. ຜູ້ດູແລຍັງໄດ້ຮັບປະໂຫຍດຈາກຕົວຢ່າງຂອງໂປໂລແນວໃດ?
20 ຜູ້ດູແລຍັງຈະໄດ້ຮັບປະໂຫຍດຈາກການສຶກສາເລື່ອງຂອງໂປໂລ. ຕົວຢ່າງເຊັ່ນ: ເຈົ້າອາດຈະອ່ານປຶ້ມປະກາດເລື່ອງລາຊາອານາຈັກຂອງພະເຈົ້າຢ່າງຖີ່ຖ້ວນ (ພາສາໄທ) ບົດ 12 ຂໍ້ 17-20 ຫຼືເບິ່ງໃນດັດຊະນີສັບພະໜັງສືຂອງວັອດສ໌ທາວເວີ (Watch Tower Publications Index)b ຕອນທີ່ອ່ານຂໍ້ມູນເຫຼົ່ານີ້ ຂໍໃຫ້ຖາມຕົວເອງວ່າ: ‘ຕົວຢ່າງຂອງໂປໂລຊ່ວຍຂ້ອຍແນວໃດໃຫ້ມີຄວາມສຸກຕໍ່ໆໄປໃນການເຮັດໜ້າທີ່ເປັນຜູ້ດູແລ?’
21. ຜູ້ດູແລສາມາດໝັ້ນໃຈໃນເລື່ອງຫຍັງ?
21 ຜູ້ດູແລ ຂໍໃຫ້ຈື່ໄວ້ວ່າພະເຢໂຫວາບໍ່ເຄີຍຂໍໃຫ້ເຈົ້າເປັນຄົນສົມບູນແບບ. ແຕ່ເພິ່ນຂໍໃຫ້ເຈົ້າເປັນຄົນສັດຊື່. (1 ກຣ. 4:2) ພະເຢໂຫວາເຫັນຄ່າວຽກງານແລະຄວາມສັດຊື່ຂອງໂປໂລ. ດັ່ງນັ້ນ ເຈົ້າກໍສາມາດໝັ້ນໃຈໄດ້ວ່າພະເຢໂຫວາເຫັນຄ່າວຽກທີ່ເຈົ້າເຮັດໃນການຮັບໃຊ້ເພິ່ນ. ເພິ່ນຈະ “ບໍ່ລືມວຽກທີ່ພວກເຈົ້າເຮັດແລະຄວາມຮັກທີ່ພວກເຈົ້າມີຕໍ່ຊື່ຂອງພະອົງ ນັ້ນແມ່ນທີ່ພວກເຈົ້າຮັບໃຊ້ພວກຜູ້ບໍລິສຸດແລະຍັງຮັບໃຊ້ຢູ່.”—ຮຣ. 6:10
ເພງ 87 ເຊີນມາຮັບຄວາມສົດຊື່ນຈາກການປະຊຸມ
a ເຮົາຮູ້ສຶກຂອບໃຈຫຼາຍແທ້ໆທີ່ຜູ້ດູແລເຮັດວຽກໜັກເພື່ອຊ່ວຍເຫຼືອເຮົາ. ໃນບົດຄວາມນີ້ ເຮົາຈະມາເບິ່ງບັນຫາ 4 ຢ່າງທີ່ຍາກສຳລັບຜູ້ດູແລ ແລະເຮົາຍັງຈະເບິ່ງວ່າຕົວຢ່າງຂອງອັກຄະສາວົກໂປໂລຊ່ວຍຜູ້ດູແລໃນທຸກມື້ນີ້ແນວໃດເມື່ອເຈິບັນຫາເຫຼົ່ານັ້ນ. ນອກຈາກນັ້ນ ບົດຄວາມນີ້ເຮົາຍັງຈະຊ່ວຍເຮົາໃຫ້ເຫັນອົກເຫັນໃຈ ແລະກະຕຸ້ນເຮົາໃຫ້ຊ່ວຍເຫຼືອຜູ້ດູແລຕໍ່ໆໄປ.
b ເບິ່ງດັດຊະນີສັບພະໜັງສືຂອງວັອດສ໌ທາວເວີ (Watch Tower Publications Index) ພາສາອັງກິດໃນຫົວຂໍ້ “Paul” ແລະໄປທີ່ຫົວຂໍ້ຍ່ອຍ “example for elders.”
c ຄຳອະທິບາຍຮູບພາບ: ພີ່ນ້ອງຊາຍປະກາດກັບໝູ່ທີ່ເຮັດວຽກນຳກັນຫຼັງຈາກທີ່ເລີກວຽກແລ້ວ.
d ຄຳອະທິບາຍຮູບພາບ: ຜູ້ດູແລໃຫ້ກຳລັງໃຈພີ່ນ້ອງທີ່ມັກແຍກຕົວຢູ່ຜູ້ດຽວ.
e ຄຳອະທິບາຍຮູບພາບ: ຜູ້ດູແລໃຫ້ຄຳແນະນຳກັບພີ່ນ້ອງທີ່ຄຽດໃຫ້ຄົນອື່ນ.
f ຄຳອະທິບາຍຮູບພາບ: ຜູ້ດູແລບໍ່ໄດ້ເວົ້າໃຫ້ພີ່ນ້ອງຊາຍທີ່ບໍ່ໄດ້ເອົາໃຈໃສ່ຕໍ່ການອະນາໄມຫໍປະຊຸມ.