ເລື່ອງຊີວິດຈິງ
ຂ້ອຍຍອມໃຫ້ພະເຢໂຫວາຊີ້ນຳຊີວິດຂ້ອຍ
ຕອນເປັນໄວລຸ້ນ ຂ້ອຍເລືອກທີ່ຈະມີອາຊີບແລະວຽກເຮັດງານທຳທີ່ດີ ແຕ່ພະເຢໂຫວາໄດ້ສະເໜີແນວທາງຊີວິດອີກແບບໜຶ່ງໃຫ້ຂ້ອຍ. ເພິ່ນເວົ້າກັບຂ້ອຍວ່າ: “ເຮົາຈະຊ່ວຍເຈົ້າໃຫ້ມີຄວາມເຂົ້າໃຈແລະຈະບອກທາງທີ່ເຈົ້າຄວນໄປ ເຮົາຈະແນະນຳເຈົ້າແລະເຝົ້າເບິ່ງເຈົ້າ.” (ເພງ. 32:8, ລ.ມ.) ເມື່ອຂ້ອຍເລືອກເຮັດຕາມແນວທາງທີ່ພະເຢໂຫວາສະເໜີໃຫ້ ເຮັດໃຫ້ຂ້ອຍມີໂອກາດທີ່ຈະຮັບໃຊ້ເພິ່ນແລະໄດ້ຮັບພອນຫຼາຍຢ່າງເຊິ່ງລວມເຖິງການຮັບໃຊ້ຢູ່ໃນອາຝຼິກກາເປັນເວລາ 52 ປີ.
ຍ້າຍຈາກແຜ່ນດິນດຳໄປຢູ່ໃນເຂດທີ່ອົບອຸ່ນຂອງທະວີບອາຝຼິກກາ
ຂ້ອຍເກີດໃນປີ 1935 ໃນເມືອງດາລາດສ໌ຕັນປະເທດອັງກິດໃນເຂດແຜ່ນດິນດຳ. ທີ່ເຂົາເຈົ້າເອີ້ນແບບນີ້ກໍຍ້ອນວ່າອາກາດແຖວນັ້ນມີແຕ່ຄວັນດຳທີ່ມາຈາກໂຮງຈັກໂຮງງານ. ຕອນທີ່ຂ້ອຍອາຍຸ 4 ປີ ພໍ່ແມ່ໄດ້ເລີ່ມສຶກສາຄຳພີໄບເບິນກັບພະຍານພະເຢໂຫວາ. ເມື່ອຂ້ອຍເລີ່ມເປັນໄວລຸ້ນ ຂ້ອຍກໍໝັ້ນໃຈວ່າສິ່ງທີ່ໄດ້ຮຽນຈາກຄຳພີໄບເບິນເປັນຄວາມຈິງແລະຂ້ອຍໄດ້ຮັບບັບເຕມາໃນປີ 1952 ເຊິ່ງຕອນນັ້ນຂ້ອຍອາຍຸ 16 ປີ.
ໃນເວລາດຽວກັນຂ້ອຍໄດ້ເລີ່ມຝຶກງານຢູ່ໂຮງງານໃຫຍ່ແຫ່ງໜຶ່ງທີ່ຜະລິດເຄື່ອງມືແລະອາໄຫຼ່ລົດໃຫຍ່ ແລະຍັງໄດ້ຝຶກເປັນເລຂາຂອງບໍລິສັດເຊິ່ງເປັນວຽກທີ່ຂ້ອຍມັກຫຼາຍ.
ຂ້ອຍຕ້ອງໄດ້ເຮັດການຕັດສິນໃຈທີ່ສຳຄັນເມື່ອຜູ້ດູແລເດີນທາງຂໍໃຫ້ຂ້ອຍນຳສ່ວນການສຶກສາຄຳພີໄບເບິນປະຈຳປະຊາຄົມໃນການປະຊຸມກາງອາທິດໃນປະຊາຄົມບ້ານເກີດຂອງຂ້ອຍຢູ່ໃນເມືອງວິເລນຮໍ. ການຕັດສິນໃຈນັ້ນຍາກຫຼາຍ ເພາະໃນຕອນນັ້ນຂ້ອຍສົມທົບກັບສອງປະຊາຄົມ. ໃນການປະຊຸມກາງອາທິດ ຂ້ອຍຈະເຂົ້າຮ່ວມປະຊຸມກັບປະຊາຄົມທີ່ຢູ່ໃກ້ບ່ອນເຮັດວຽກຂອງຂ້ອຍໃນເມືອງບຣອມຊະໂກຣບ ເຊິ່ງໄກຈາກບ້ານຂອງຂ້ອຍປະມານ 32 ກິໂລແມັດ. ແລະໃນທ້າຍອາທິດຂ້ອຍຈະກັບມາຫາພໍ່ແມ່ແລະເຂົ້າຮ່ວມປະຊຸມກັບປະຊາຄົມທີ່ຢູ່ໃນເມືອງວິເລນຮໍ.
ຍ້ອນຂ້ອຍຢາກຊ່ວຍເຫຼືອອົງການພະເຢໂຫວາ ຂ້ອຍຈຶ່ງຕອບຮັບຄຳເຊີນຂອງຜູ້ດູແລເດີນທາງເຖິງວ່າຂ້ອຍຈະຕ້ອງໄດ້ອອກຈາກວຽກທີ່ຂ້ອຍມັກກໍຕາມ. ການທີ່ຂ້ອຍຍອມໃຫ້ພະເຢໂຫວາຊີ້ນຳຊີວິດຂ້ອຍເຮັດໃຫ້ຂ້ອຍມີຊີວິດທີ່ມີຄວາມສຸກຫຼາຍ ແລະບໍ່ເສຍໃຈເລີຍທີ່ເລືອກທາງນີ້.
ຕອນທີ່ຂ້ອຍສົມທົບກັບປະຊາຄົມບຣອມຊະໂກຣບຂ້ອຍໄດ້ພົບພີ່ນ້ອງຍິງຄົນໜຶ່ງທີ່ງາມແລະມີຄວາມເຊື່ອເຂັ້ມແຂງ ລາວຊື່ວ່າແອນ. ເຮົາໄດ້ແຕ່ງດອງກັນໃນປີ 1957 ແລະໄດ້ຮັບໃຊ້ພະເຢໂຫວາຫຼາຍຮູບແບບ ເຊັ່ນ: ໄພໂອເນຍປະຈຳ ໄພໂອເນຍພິເສດ ຜູ້ດູແລເດີນທາງ ແລະຮັບໃຊ້ຢູ່ເບເທນ. ຂ້ອຍມີຄວາມສຸກຫຼາຍທີ່ໄດ້ໃຊ້ຊີວິດກັບແອນ.
ໃນປີ 1966 ພວກເຮົາໄດ້ຖືກເຊີນໃຫ້ເຂົ້າໂຮງຮຽນກິລຽດລຸ້ນທີ 42. ຫຼັງຈາກນັ້ນເຮົາກໍໄດ້ຮັບມອບໝາຍໃຫ້ໄປຮັບໃຊ້ຢູ່ປະເທດມາລາວີ ເຊິ່ງເຂດນັ້ນເປັນທີ່ຮູ້ຈັກກັນວ່າເປັນເຂດທີ່ອົບອຸ່ນຍ້ອນຜູ້ຄົນໃຈດີແລະເປັນມິດ. ແຕ່ເຮົາກໍບໍ່ຄິດວ່າຈະຢູ່ຫັ້ນໄດ້ບໍ່ດົນ.
ຮັບໃຊ້ຢູ່ມາລາວີໃນຍາມທີ່ລຳບາກ
ໃຊ້ລົດຈີບຄາຍເຊີໃນການເດີນທາງເຮັດວຽກຮັບໃຊ້ຢູ່ປະເທດມາລາວີ
ເຮົາມາຮອດມາລາວີໃນວັນທີ 1 ກຸມພາ 1967. ໃນເດືອນທຳອິດເຮົາໄດ້ໃຊ້ເວລາສ່ວນຫຼາຍກັບການຮຽນພາສາ ແລະຫຼັງຈາກນັ້ນເຮົາກໍໄດ້ເລີ່ມວຽກເປັນຜູ້ດູແລພາກ. ເຮົາຂີ່ລົດຈິບລຸ້ນຄາຍເຊີ (Jeep Kaiser) ເຊິ່ງບາງຄົນຄິດວ່າເປັນລົດທີ່ສາມາດບຸປ່າ ລຸຍຕົມແລະລຸຍນ້ຳໄດ້. ແຕ່ຄວາມຈິງແລ້ວເຮົາຂີ່ຂ້າມໄດ້ແຕ່ບ່ອນທີ່ນ້ຳຕື້ນເທົ່ານັ້ນ. ບາງເທື່ອເຮົາກໍໄດ້ພັກຢູ່ເຮືອນຫຼັງນ້ອຍໆທີ່ເຮັດດ້ວຍດິນໜຽວແລະມຸງດ້ວຍຫຍ້າ. ດັ່ງນັ້ນ ເຮົາຈຶ່ງໄດ້ເອົາແຜ່ນຢາງມາເສີມໃສ່ຫຼັງຄາເພື່ອບໍ່ໃຫ້ປຽກໃນຍາມຝົນ. ນີ້ເປັນການເລີ່ມຕົ້ນວຽກມິດຊັນນາຣີທີ່ບໍ່ຄ່ອຍຄັກປານໃດ ແຕ່ເຮົາກໍມັກວຽກນີ້.
ໃນເດືອນເມສາຂ້ອຍສັງເກດວ່າເລີ່ມມີບັນຫາເກີດຂຶ້ນພາຍໃນປະເທດ. ຂ້ອຍໄດ້ຍິນຄຳຖະແຫຼງການຂອງ ດຣ. ເຮຊະຕິງສ໌ ບານດາ ເຊິ່ງເປັນປະທານປະເທດຂອງມາລາວີ. ລາວເວົ້າວ່າພະຍານພະເຢໂຫວາໄດ້ສ້າງບັນຫາໃຫ້ກັບອຳນາດການປົກຄອງແລະບໍ່ເສຍພາສີອາກອນ. ແຕ່ນັ້ນບໍ່ແມ່ນຄວາມຈິງ. ບັນຫາທີ່ແທ້ຈິງກໍຄືຍ້ອນເຮົາຮັກສາຄວາມເປັນກາງແລະບໍ່ໄດ້ຊື້ບັດທີ່ສະແດງເຖິງການເລືອກຢູ່ພັກຝ່າຍໃດຝ່າຍໜຶ່ງ.
ໃນເດືອນກັນຍາເຮົາໄດ້ອ່ານໜັງສືພິມແລ້ວເຫັນວ່າ ປະທານປະເທດກ່າວຫາວ່າພະຍານພະເຢໂຫວາສ້າງບັນຫາຢູ່ທົ່ວປະເທດ. ໃນກອງປະຊຸມຂອງລັດຖະບານ ລາວໄດ້ຖະແຫຼງການວ່າກຳລັງຮ່າງມະຕິຕົກລົງສັ່ງຫ້າມພະຍານພະເຢໂຫວາ. ແລະການສັ່ງຫ້າມນີ້ໄດ້ມີຜົນທັນທີໃນວັນທີ 20 ຕຸລາ ປີ 1967. ບໍ່ດົນຕໍ່ຈາກນັ້ນ ຕຳຫຼວດຄຸ້ມຄອງຄົນຕ່າງປະເທດແລະຕຳຫຼວດກວດຄົນເຂົ້າ-ອອກເມືອງໄດ້ປິດສຳນັກງານສາຂາແລະສົ່ງມິດຊັນນາຣີອອກຈາກປະເທດ.
ຖືກຈັບແລະຖືກສົ່ງອອກຈາກປະເທດມາລາວີໃນປີ 1967 ພ້ອມກັບມິດຊັນນາຣີຄູ່ໜຶ່ງທີ່ຊື່ແຈັກແລະລິນດາ ໂຈແຮັນຊັນ
ຫຼັງຈາກທີ່ຖືກກັກຂັງຢູ່ໃນຄຸກໄດ້ 3 ມື້ ເຮົາໄດ້ຖືກສົ່ງໄປເກາະໂມຣິດເຊິ່ງເປັນເຂດທີ່ອັງກິດປົກຄອງ. ແຕ່ເກາະໂມຣິດບໍ່ໃຫ້ເຮົາຢູ່ໃນຖານະເປັນມິດຊັນນາຣີ ດັ່ງນັ້ນ ເຮົາຈຶ່ງໄດ້ຖືກມອບໝາຍໃຫ້ໄປປະເທດໂຣດິເຊຍ (ຕອນນີ້ເອີ້ນວ່າ ຊິມບາເວ). ເມື່ອມາຮອດບ່ອນນັ້ນ ຕຳຫຼວດກວດຄົນເຂົ້າ-ອອກເມືອງກໍໄດ້ເວົ້າໃຫ້ເຮົາວ່າ: “ພວກເຈົ້າຖືກໄລ່ອອກຈາກມາລາວີແລ້ວ ຢູ່ເກາະໂມຣິດກໍບໍ່ໃຫ້ພວກເຈົ້າເຂົ້າໄປ. ແລ້ວພວກເຈົ້າມານີ້ເຮັດຫຍັງ? ບໍ່ມີທາງໄປແລ້ວບໍ?” ແອນໄດ້ເລີ່ມຮ້ອງໄຫ້ຍ້ອນຮູ້ສຶກວ່າບໍ່ມີໃຜຕ້ອງການ. ໃນຕອນນັ້ນຂ້ອຍຮູ້ສຶກວ່າຢາກຖິ້ມທຸກສິ່ງແລ້ວກັບໄປອັງກິດ. ແຕ່ໃນທີ່ສຸດຕຳຫຼວດກວດຄົນເຂົ້າ-ອອກເມືອງກໍໄດ້ອະນຸຍາດໃຫ້ເຮົາພັກຄ້າງຄືນຢູ່ສຳນັກງານສາຂາຄືນໜຶ່ງໃນເງື່ອນໄຂທີ່ວ່າເຮົາຕ້ອງໄປລາຍງານຕົວຢູ່ຫ້ອງການຂອງເຂົາເຈົ້າໃນມື້ຕໍ່ໄປ. ເຮົາຮູ້ສຶກໝົດແຮງແລະທໍ້ໃຈ ແຕ່ເຮົາກໍໄດ້ຝາກທຸກສິ່ງໄວ້ກັບພະເຢໂຫວາ. ສິ່ງທີ່ບໍ່ໄດ້ຄາດຄິດກໍເກີດຂຶ້ນໃນຕອນສວາຍຂອງມື້ຕໍ່ມາ. ເຮົາໄດ້ຮັບອະນຸຍາດໃຫ້ຢູ່ໃນຊິມບາເວໃນຖານະເປັນນັກທ່ອງທ່ຽວ! ຂ້ອຍບໍ່ເຄີຍລືມຄວາມຮູ້ສຶກໃນມື້ນັ້ນເລີຍ ຂ້ອຍໝັ້ນໃຈວ່າ ພະເຢໂຫວາໄດ້ຊີ້ນຳຊີວິດພວກເຮົາແທ້ໆ.
ຮັບໃຊ້ໃນເຂດມາລາວີຈາກປະເທດຊິມບາເວ
ໃນປີ 1968 ຂ້ອຍກັບແອນຢູ່ທີ່ເບເທນຊິມບາເວ
ຢູ່ສຳນັກງານສາຂາຊິມບາເວຂ້ອຍໄດ້ຖືກມອບໝາຍໃຫ້ເຮັດວຽກໃນພະແນກການຮັບໃຊ້ ເຊິ່ງເບິ່ງແຍງວຽກໃນປະເທດມາລາວີແລະໂມຊຳບິກ. ວຽກຂອງຂ້ອຍສ່ວນໜຶ່ງແມ່ນແປລາຍງານຕ່າງໆໃນພາສາມາລາວີຈາກຜູ້ດູແລໝວດ. ໃນຕອນແລງມື້ໜຶ່ງທີ່ຂ້ອຍເລີກວຽກຊ້າເພື່ອຈະແປລາຍງານໃຫ້ແລ້ວ ຂ້ອຍໄດ້ຮ້ອງໄຫ້ຍ້ອນໄດ້ອ່ານກ່ຽວກັບປະສົບການທີ່ພີ່ນ້ອງໃນມາລາວີເຈິa ເຂົາເຈົ້າຖືກຂົ່ມເຫງຢ່າງຮຸນແຮງ. ແຕ່ຂ້ອຍກໍໄດ້ຮັບກຳລັງໃຈຍ້ອນຄວາມພັກດີ ຄວາມເຊື່ອ ແລະຄວາມອົດທົນຂອງເຂົາເຈົ້າ.—2 ກຣ. 6:4, 5
ເຮົາໄດ້ເຮັດທຸກຢ່າງເພື່ອຈັດໃຫ້ພີ່ນ້ອງທີ່ຍັງຢູ່ໃນມາລາວີແລະພີ່ນ້ອງທີ່ໜີໄປຢູ່ໂມຊຳບິກໃຫ້ໄດ້ຮັບອາຫານທາງດ້ານຄວາມເຊື່ອ. ທີມແປພາສາຊິເຊວາເຊິ່ງເປັນພາສາທີ່ໃຊ້ຫຼາຍທີ່ສຸດໃນມາລາວີໄດ້ຍ້າຍໄປຢູ່ຟາມຂອງພີ່ນ້ອງຊາຍຄົນໜຶ່ງໃນຊິມບາເວ. ພີ່ນ້ອງຊາຍຄົນນີ້ໃຈດີຫຼາຍ ລາວໄດ້ສ້າງເຮືອນແລະຫ້ອງການໃຫ້ກັບທີມແປ. ຢູ່ຫັ້ນເຂົາເຈົ້າຍັງໄດ້ສືບຕໍ່ເຮັດວຽກທີ່ສຳຄັນ ນັ້ນກໍຄືການແປສິ່ງພິມຕ່າງໆທີ່ມາຈາກຄຳພີໄບເບິນ.
ແຕ່ລະປີມີການຈັດໃຫ້ຜູ້ດູແລໝວດທີ່ຢູ່ມາລາວີເຂົ້າຮ່ວມການປະຊຸມພາກໃນພາສາຊິເຊວາຢູ່ໃນຊິມບາເວ. ຕອນທີ່ຢູ່ຫັ້ນເຂົາເຈົ້າຈະໄດ້ຮັບໂຄງຮ່າງຄຳບັນຍາຍການປະຊຸມພາກນຳ ແລະເມື່ອເຂົາເຈົ້າກັບໄປທີ່ມາລາວີ ເຂົາເຈົ້າກໍໄດ້ເລົ່າສິ່ງທີ່ຮຽນໃນການປະຊຸມພາກໃຫ້ພີ່ນ້ອງຄົນອື່ນໆຟັງ. ມີປີໜຶ່ງທີ່ຜູ້ດູແລໝວດມາເຂົ້າຮ່ວມການປະຊຸມພາກຢູ່ຊິມບາເວ ພວກເຮົາໄດ້ຈັດໃຫ້ມີໂຮງຮຽນພະລາຊະກິດເພື່ອໃຫ້ກຳລັງໃຈເຂົາເຈົ້າ.
ໃຫ້ຄຳບັນຍາຍໃນພາສາຊິເຊວາໃນການປະຊຸມພາກພາສາຊິເຊວາກັບພາສາໂຊນາໃນຊິມບາເວ
ໃນເດືອນກຸມພາປີ 1975 ຂ້ອຍໄດ້ໄປຢ້ຽມຢາມພີ່ນ້ອງທີ່ອອກຈາກມາລາວີແລ້ວໄປຕັ້ງຄ້າຍຢູ່ໂມຊຳບິກ. ພີ່ນ້ອງເຫຼົ່ານີ້ໄດ້ເຮັດຕາມຄຳແນະນຳຫຼ້າສຸດຂອງອົງການ ເຊິ່ງລວມເຖິງການຈັດໃຫ້ມີຄະນະຜູ້ດູແລ. ຜູ້ດູແລຄົນໃໝ່ຈະຖືກມອບໝາຍໃຫ້ເຮັດຫຼາຍຢ່າງທີ່ເສີມຄວາມເຊື່ອ ເຊັ່ນ: ໃຫ້ຄຳບັນຍາຍສາທາລະນະ ພິຈາລະນາຂໍ້ພະຄຳພີປະຈຳວັນ ນຳການສຶກສາຫໍສັງເກດການ ແລະເຂົາເຈົ້າຍັງຖືກມອບໝາຍໃຫ້ຈັດການປະຊຸມໃຫຍ່ນຳ. ເຂົາເຈົ້າຈະຈັດຄ້າຍໃຫ້ເປັນຄືກັບການປະຊຸມໃຫຍ່ໂດຍໃຫ້ມີພະແນກອະນາໄມ ພະແນກແຈກຢາຍອາຫານ ແລະພະແນກຮັກສາຄວາມປອດໄພ. ພີ່ນ້ອງທີ່ສັດຊື່ເຫຼົ່ານີ້ໄດ້ຮັບພອນຫຼາຍຢ່າງຈາກພະເຢໂຫວາ! ແລະຂ້ອຍກໍຮູ້ສຶກໄດ້ຮັບກຳລັງໃຈຫຼາຍຫຼັງຈາກທີ່ໄປຢ້ຽມຢາມເຂົາເຈົ້າ.
ໃນທ້າຍຊຸມປີ 1970 ສຳນັກງານສາຂາຊຳບີໄດ້ເລີ່ມເບິ່ງແຍງວຽກໃນປະເທດມາລາວີ. ແຕ່ຂ້ອຍກໍຍັງຄິດຮອດພີ່ນ້ອງໃນມາລາວີຢູ່ເລື້ອຍໆແລະອະທິດຖານເພື່ອເຂົາເຈົ້າຄືກັບພີ່ນ້ອງຄົນອື່ນໆເຮັດ. ເນື່ອງຈາກຂ້ອຍເປັນສະມາຊິກຄະນະກຳມະການສາຂາຂອງຊິມບາເວ ມີຫຼາຍໂອກາດທີ່ຂ້ອຍໄດ້ພົບກັບຕົວແທນຈາກສຳນັກງານໃຫຍ່ແລະພີ່ນ້ອງທີ່ມີໜ້າທີ່ຮັບຜິດຊອບຈາກປະເທດມາລາວີ ອາຝຼິກກາໃຕ້ ແລະຊຳບີ. ແຕ່ລະເທື່ອທີ່ເຮົາພົບກັນ ເຮົາມັກຈະຖາມຄຳຖາມແບບດຽວກັນວ່າ: “ເຮົາຈະເຮັດຫຍັງໄດ້ແດ່ເພື່ອຊ່ວຍພີ່ນ້ອງໃນມາລາວີຫຼາຍຂຶ້ນ?”
ເມື່ອເວລາຜ່ານໄປ ການຂົ່ມເຫງກໍຫຼຸດລົງ. ພີ່ນ້ອງທີ່ໜີອອກຈາກມາລາວີກໍໄດ້ກັບມາ. ສ່ວນພີ່ນ້ອງທີ່ຍັງຢູ່ໃນມາລາວີກໍຮູ້ສຶກໂລ່ງໃຈທີ່ບໍ່ໄດ້ຖືກຂົ່ມເຫງໜັກຄືແຕ່ກ່ອນ. ປະເທດຕ່າງໆທີ່ຢູ່ອ້ອມຂ້າງມາລາວີໄດ້ອະນຸຍາດໃຫ້ພະຍານພະເຢໂຫວາສາມາດປະກາດ ປະຊຸມ ແລະໄດ້ຍົກເລີກຂໍ້ຈຳກັດຕ່າງໆ. ແລະປະເທດໂມຊຳບິກກໍໄດ້ເຮັດແບບນັ້ນຄືກັນໃນປີ 1991. ເຮົາກໍເລີຍຄິດວ່າ ປານໃດພະຍານພະເຢໂຫວາທີ່ຢູ່ໃນມາລາວີຈະມີອິດສະຫຼະຄືກັບປະເທດອື່ນໆ?
ກັບໄປທີ່ມາລາວີ
ໃນທີ່ສຸດ ສະພາບການທາງດ້ານການເມືອງຂອງປະເທດມາລາວີກໍປ່ຽນໄປ. ໃນປີ 1993 ອຳນາດການປົກຄອງໄດ້ຍົກເລີກການສັ່ງຫ້າມພະຍານພະເຢໂຫວາ. ຫຼັງຈາກນັ້ນບໍ່ດົນ ຂ້ອຍກໍໄດ້ລົມກັບມິດຊັນນາຣີຄົນໜຶ່ງ ແລ້ວລາວຖາມຂ້ອຍວ່າ: “ເຈົ້າຈະກັບໄປມາລາວີບໍ?” ຕອນນັ້ນຂ້ອຍອາຍຸ 59 ປີແລ້ວ. ຂ້ອຍຈຶ່ງຕອບລາວວ່າ: “ຂ້ອຍຄືຊິບໍ່ໄດ້ກັບໄປດອກ ເພາະຂ້ອຍອາຍຸຫຼາຍແລ້ວ.” ແຕ່ໃນມື້ດຽວກັນນັ້ນ ເຮົາກໍໄດ້ຮັບຈົດໝາຍຈາກຄະນະກຳມະການປົກຄອງທີ່ເຊີນເຮົາໃຫ້ກັບໄປມາລາວີ.
ເປັນການຕັດສິນໃຈທີ່ຍາກຫຼາຍທີ່ຈະກັບໄປມາລາວີ ຍ້ອນວ່າເຮົາມັກວຽກມອບໝາຍຢູ່ຊິມບາເວ. ເຮົາມີຄວາມສຸກກັບການເຮັດວຽກຢູ່ນີ້ແລະມີໝູ່ທີ່ດີຫຼາຍຄົນ. ຄະນະກຳມະການປົກຄອງກໍໃຈດີກັບເຮົາຫຼາຍ ເຂົາເຈົ້າບອກວ່າຖ້າເຮົາຢາກຢູ່ຊິມບາເວຕໍ່ກໍຢູ່ໄດ້. ດັ່ງນັ້ນ ມັນຈຶ່ງງ່າຍທີ່ເຮົາຈະຢູ່ຊິມບາເວຕໍ່ໄປ. ແຕ່ຂ້ອຍຄິດເຖິງເລື່ອງຂອງອັບຣາຮາມກັບຊາຣາທີ່ອອກຈາກບ້ານທີ່ສະດວກສະບາຍຕອນທີ່ອາຍຸຫຼາຍແລ້ວເພື່ອທີ່ຈະເຊື່ອຟັງການຊີ້ນຳຈາກພະເຢໂຫວາ.—ປຖກ. 12:1-5
ເຮົາເລືອກທີ່ຈະເຮັດຕາມການຊີ້ນຳຈາກອົງການຂອງພະເຢໂຫວາແລະກັບໄປທີ່ມາລາວີໃນວັນທີ 1 ກຸມພາ 1995 ເຊິ່ງຄົບຮອບ 28 ປີທີ່ເຮົາມາທີ່ມາລາວີເທື່ອທຳອິດ. ແລະມີການຈັດຕັ້ງຄະນະກຳມະການສາຂາຂຶ້ນທີ່ມາລາວີ ເຊິ່ງມີຂ້ອຍກັບພີ່ນ້ອງຊາຍອີກສອງຄົນ. ແລະຫຼັງຈາກນັ້ນບໍ່ດົນເຮົາກໍເຮັດວຽກຫຼາຍຢ່າງເພື່ອໃຫ້ພະຍານພະເຢໂຫວາກັບມາເຮັດກິດຈະກຳຕ່າງໆໄດ້ຄືເກົ່າ.
ພະເຢໂຫວາເຮັດໃຫ້ເຕີບໃຫຍ່
ຈັ່ງແມ່ນເປັນພະພອນແທ້ໆທີ່ໄດ້ເຫັນພະເຢໂຫວາເຮັດໃຫ້ວຽກງານຂອງເພິ່ນເຕີບໃຫຍ່ຢ່າງໄວວາ! ຈຳນວນຜູ້ປະກາດໄດ້ເພີ່ມຂຶ້ນໄວຫຼາຍຈາກ 30.000 ຄົນໃນປີ 1993 ໄປເປັນ 42.000 ຄົນໃນປີ 1998.b ຄະນະກຳມະການປົກຄອງໄດ້ອະນຸມັດແຜນການຊື້ທີ່ດິນເພື່ອສ້າງຕັ້ງສຳນັກງານສາຂາໃໝ່ເພື່ອເບິ່ງແຍງວຽກໃນເຂດນີ້. ເຮົາໄດ້ຊື້ທີ່ດິນ 12 ເຮັກຕາໃນເມືອງລີລອງເວ ແລະຂ້ອຍຖືກແຕ່ງຕັ້ງໃຫ້ເປັນສະມາຊິກຄະນະກຳມະການການກໍ່ສ້າງ.
ພີ່ນ້ອງໄກ ພຽດ ເຊິ່ງເປັນສະມາຊິກຄະນະກຳມະການປົກຄອງໄດ້ໃຫ້ຄຳບັນຍາຍອຸທິດສຳນັກງານສາຂາແຫ່ງໃໝ່ນີ້. ມີພີ່ນ້ອງທ້ອງຖິ່ນຫຼາຍກວ່າ 2.000 ຄົນເຂົ້າຮ່ວມເຊິ່ງສ່ວນຫຼາຍເປັນພີ່ນ້ອງທີ່ຮັບບັບເຕມາຫຼາຍກວ່າ 40 ປີແລ້ວ. ພີ່ນ້ອງຊາຍຍິງທີ່ສັດຊື່ເຫຼົ່ານີ້ໄດ້ອົດທົນກັບການຂົ່ມເຫງທີ່ໜັກຫຼາຍແທ້ໆຕອນທີ່ຖືກສັ່ງຫ້າມ. ເຖິງວ່າພີ່ນ້ອງເຫຼົ່ານີ້ຈະທຸກຍາກທາງດ້ານວັດຖຸ ແຕ່ເຂົາເຈົ້າກໍລ່ຳລວຍທາງດ້ານຄວາມເຊື່ອ. ແລະຕອນນີ້ເຂົາເຈົ້າຮູ້ສຶກດີໃຈຫຼາຍທີ່ໄດ້ມາຢ້ຽມຊົມເບເທນແຫ່ງໃໝ່ ແລະບໍ່ວ່າເຂົາເຈົ້າຈະໄປບ່ອນໃດຂອງເບເທນ ເຂົາເຈົ້າກໍຈະຮ້ອງເພງລາຊະອານາຈັກປະສານສຽງແບບຄົນອາຝຼິກກາ. ເຫດການເຫຼົ່ານີ້ເຮັດໃຫ້ຂ້ອຍຮູ້ສຶກປະທັບໃຈຫຼາຍທີ່ສຸດເທົ່າທີ່ຂ້ອຍເຄີຍເຫັນ. ສິ່ງເຫຼົ່ານີ້ສະແດງໃຫ້ເຫັນວ່າພະເຢໂຫວາອວຍພອນພີ່ນ້ອງທີ່ອົດທົນກັບຄວາມຍາກລຳບາກດ້ວຍຄວາມສັດຊື່.
ຫຼັງຈາກສ້າງສຳນັກງານສາຂາແລ້ວໆ ຂ້ອຍຮູ້ສຶກດີໃຈຫຼາຍທີ່ຖືກເຊີນໃຫ້ໄປບັນຍາຍອຸທິດຫໍປະຊຸມໃນບ່ອນຕ່າງໆ. ປະຊາຄົມຕ່າງໆໃນມາລາວີໄດ້ຮັບປະໂຫຍດຫຼາຍທີ່ອົງການສ້າງຫໍປະຊຸມແລ້ວໄວໃນບ່ອນທີ່ພີ່ນ້ອງບໍ່ຄ່ອຍມີເງິນ. ກ່ອນໜ້ານີ້ມີບາງປະຊາຄົມປະຊຸມກັນໃນເຮືອນຫຼັງນ້ອຍໆທີ່ເຮັດຈາກຕົ້ນວິກ. ເຂົາເຈົ້າຈະເອົາຫຍ້າມາມຸງຫຼັງຄາແລະເອົາດິນໜຽວມາເຮັດເປັນຕັ່ງຍາວ. ແລະເຖິງວ່າຕອນນີ້ເຂົາເຈົ້າຈະມີຫໍປະຊຸມຫຼັງງາມໆທີ່ເຮັດດ້ວຍດິນຈີ່ ແຕ່ເຂົາເຈົ້າກໍຍັງມັກນັ່ງຕັ່ງຍາວທີ່ເຮັດດ້ວຍດິນໜຽວຢູ່ ເພາະມັນເບິ່ງຄືວ່າຍັງມີບ່ອນວ່າງໄວ້ໃຫ້ອີກຄົນໜຶ່ງສະເໝີ!
ຂ້ອຍຮູ້ສຶກດີໃຈຫຼາຍແທ້ໆທີ່ເຫັນວ່າພະເຢໂຫວາຊ່ວຍເຫຼືອພີ່ນ້ອງໃຫ້ມີຄວາມເຊື່ອທີ່ເຂັ້ມແຂງ. ຂ້ອຍຮູ້ສຶກປະທັບໃຈຫຼາຍທີ່ເຫັນພີ່ນ້ອງຊາຍໃນອາຝຼິກກາທີ່ຍັງໜຸ່ມເຕັມໃຈຊ່ວຍວຽກອົງການຫຼາຍຂຶ້ນ. ເມື່ອໄດ້ຮັບການຝຶກອົບຮົມແລະເຮັດວຽກ ເຂົາເຈົ້າກໍຮຽນຮູ້ສິ່ງຕ່າງໆໄດ້ໄວຫຼາຍ. ນີ້ຈຶ່ງເຮັດໃຫ້ເຂົາເຈົ້າມີໜ້າທີ່ຮັບຜິດຊອບຫຼາຍຂຶ້ນໃນເບເທນແລະໃນປະຊາຄົມ. ໃນປະຊາຄົມຕ່າງໆມີຜູ້ດູແລໝວດທີ່ຖືກແຕ່ງຕັ້ງໃໝ່ແລະສ່ວນຫຼາຍເຂົາເຈົ້າກໍແຕ່ງດອງແລ້ວ. ເຖິງວ່າຄົນສ່ວນຫຼາຍຫຼືແມ່ນແຕ່ຄົນໃນຄອບຄົວຈະຄາດໝາຍໃຫ້ຜູ້ທີ່ແຕ່ງດອງແລ້ວມີລູກ ແຕ່ເຂົາເຈົ້າກໍຕັດສິນໃຈບໍ່ຟ້າວເອົາລູກເພື່ອຈະຮັບໃຊ້ພະເຢໂຫວາຫຼາຍຂຶ້ນ.
ມີຄວາມສຸກທີ່ໄດ້ເລືອກທາງນີ້
ຂ້ອຍກັບແອນຢູ່ທີ່ເບເທນອັງກິດ
ຫຼັງຈາກຮັບໃຊ້ຢູ່ອາຝຼິກກາໄດ້ 52 ປີ ຂ້ອຍກໍເລີ່ມມີບັນຫາສຸຂະພາບຍ້ອນອາຍຸຫຼາຍແລ້ວ. ຄະນະກຳມະການປົກຄອງຈຶ່ງໄດ້ອະນຸມັດຄຳສະເໜີຂອງຄະນະກຳມະການສາຂາທີ່ໃຫ້ພວກເຮົາກັບໄປອັງກິດ. ພວກເຮົາຮູ້ສຶກເສຍໃຈທີ່ຕ້ອງໄດ້ອອກຈາກວຽກມອບໝາຍທີ່ເຮົາມັກ ແຕ່ຄອບຄົວເບເທນຢູ່ອັງກິດກໍເບິ່ງແຍງເຮົາເປັນຢ່າງດີ.
ຂ້ອຍໝັ້ນໃຈວ່າການຍອມໃຫ້ພະເຢໂຫວາຊີ້ນຳຊີວິດຂ້ອຍເປັນການຕັດສິນໃຈທີ່ດີທີ່ສຸດ. ຖ້າຂ້ອຍເລືອກແນວທາງຊີວິດດ້ວຍຕົວເອງ ກໍບໍ່ຮູ້ວ່າຊີວິດຈະເປັນແນວໃດ. ພະເຢໂຫວາຮູ້ວ່າຂ້ອຍຕ້ອງເຮັດຫຍັງເພື່ອຈະ “ເຮັດໃຫ້ຊີວິດຂ້ອຍລາບລື່ນ.” (ສຸພາ. 3:5, 6, ລ.ມ.) ຕອນເປັນໄວລຸ້ນ ຂ້ອຍຮູ້ສຶກຕື່ນເຕັ້ນທີ່ໄດ້ຮຽນຮູ້ລາຍລະອຽດຕ່າງໆຂອງວຽກໃນບໍລິສັດໃຫຍ່. ແຕ່ການເຮັດວຽກໃນອົງການຂອງພະເຢໂຫວາເຊິ່ງເປັນອົງການລະດັບໂລກ ໄດ້ເຮັດໃຫ້ຂ້ອຍຮູ້ສຶກຕື່ນເຕັ້ນແລະມີຄວາມສຸກຫຼາຍກວ່າອີກ. ສຳລັບຂ້ອຍແລ້ວ ການຮັບໃຊ້ພະເຢໂຫວາເປັນວຽກທີ່ເຮັດໃຫ້ມີຄວາມສຸກ ແລະຂ້ອຍຈະເຮັດວຽກນີ້ຕໍ່ໄປ!
a ເບິ່ງປະຫວັດຂອງພະຍານພະເຢໂຫວາໃນປະເທດມາລາວີໃນປຶ້ມປະຈຳປີຂອງພະຍານພະເຢໂຫວາ ປີ 1999 ໜ້າ 148-223 (ພາສາອັງກິດ)
b ປັດຈຸບັນນີ້ມີຜູ້ປະກາດຫຼາຍກວ່າ 100.000 ຄົນໃນປະເທດມາລາວີ.