[ຈາກຊ້າຍໄປຂວາ] ມາເຊໂລ ໂຢມາຣາ ແລະຮາຍເວີ. ເຂົາເຈົ້າຈັບປຶ້ມຄຳພີໄບເບິນສະບັບແປໂລກໃໝ່ອັກສອນເບວພາສາແອັດສະປາຍ
ເຂົາເຈົ້າເຫັນຄວາມຮັກຂອງພີ່ນ້ອງໃນປະຊາຄົມ
ໂຢມາຣາແລະນ້ອງຊາຍຂອງລາວ 2 ຄົນຊື່ ມາເຊໂລກັບຮາຍເວີອາໄສຢູ່ບ້ານນ້ອຍໆໃນກົວເຕມາລາ. ໂຢມາຣາເລີ່ມສຶກສາຄຳພີໄບເບິນກັບພະຍານພະເຢໂຫວາ ແລ້ວຕໍ່ມານ້ອງຊາຍຂອງລາວກໍເຂົ້າມາສຶກສາຄືກັນ. ແຕ່ທັງສາມຄົນນີ້ກໍມີຂໍ້ທ້າທາຍ ຍ້ອນເຂົາເຈົ້າເປັນຄົນຕາບອດແລະອ່ານອັກສອນເບວບໍ່ໄດ້. ດັ່ງນັ້ນ ພີ່ນ້ອງທີ່ມາສອນຄຳພີໄບເບິນຈຶ່ງໄດ້ອ່ານຂໍ້ຄຳພີແລະເນື້ອໃນຂອງປຶ້ມທີ່ຮຽນໃຫ້ເຂົາເຈົ້າຟັງ.
ນອກຈາກນັ້ນ ການໄປປະຊຸມກໍເປັນເລື່ອງຍາກສຳລັບເຂົາເຈົ້າ. ເພື່ອຈະໄປຫໍປະຊຸມທີ່ຢູ່ໃກ້ບ້ານຂອງເຂົາເຈົ້າທີ່ສຸດຕ້ອງໄດ້ໃຊ້ເວລາ 40 ນາທີ ແຕ່ເຂົາເຈົ້າບໍ່ສາມາດເດີນທາງໄປໄດ້ດ້ວຍໂຕເອງ. ພີ່ນ້ອງໃນປະຊາຄົມກໍເລີຍຊ່ວຍເຂົາເຈົ້າໃຫ້ມາຮ່ວມປະຊຸມທຸກເທື່ອ. ເມື່ອເຂົາເຈົ້າເລີ່ມເຮັດສ່ວນນັກຮຽນໃນການປະຊຸມກາງອາທິດ ພີ່ນ້ອງກໍຊ່ວຍເຂົາເຈົ້າໃຫ້ຈື່ສ່ວນທີ່ກຽມໄວ້.
ໃນເດືອນພຶດສະພາ ປີ 2019 ການປະຊຸມປະຈຳປະຊາຄົມໄດ້ຈັດຢູ່ແຖວບ້ານຂອງເຂົາເຈົ້າ. ຈາກນັ້ນ ກໍມີໄພໂອເນຍປະຈຳຄູ່ໜຶ່ງຍ້າຍມາຢູ່ແຖວບ້ານຂອງເຂົາເຈົ້າ. ເຖິງວ່າໄພໂອເນຍຄູ່ນີ້ຈະບໍ່ຮູ້ວິທີອ່ານແລະຂຽນອັກສອນເບວ ແຕ່ເຂົາເຈົ້າກໍຕັ້ງເປົ້າໝາຍທີ່ຈະສອນສາມເອື້ອຍນ້ອງນີ້ໃຫ້ຂຽນແລະອ່ານອັກສອນເບວໃຫ້ໄດ້. ເຂົາເຈົ້າຈຶ່ງໄປຮຽນຮູ້ກ່ຽວກັບອັກສອນເບວຢູ່ຫໍສະໝຸດເພື່ອຈະຮູ້ວິທີສອນ.
ມາເຊໂລອອກຄວາມຄິດເຫັນໃນການປະຊຸມປະຈຳປະຊາຄົມ
ບໍ່ເທົ່າໃດເດືອນຕໍ່ມາ ສາມເອື້ອຍນ້ອງນີ້ກໍອ່ານອັກສອນເບວໄດ້ງ່າຍໆແລະເຂົາເຈົ້າກໍກ້າວໜ້າທາງດ້ານຄວາມເຊື່ອຫຼາຍຂຶ້ນ.a ຕອນນີ້ທັງໂຢມາຣາ ມາເຊໂລ ແລະຮາຍເວີຮັບໃຊ້ເປັນໄພໂອເນຍປະຈຳ. ມາເຊໂລເປັນຜູ້ຊ່ວຍວຽກຮັບໃຊ້ນຳ. ຕະຫຼອດອາທິດ ເຂົາເຈົ້າໄດ້ຮັບໃຊ້ພະເຢໂຫວາຢ່າງຫ້າວຫັນ ນີ້ຈຶ່ງເຮັດໃຫ້ພີ່ນ້ອງຄົນອື່ນໆຢາກຮັບໃຊ້ພະເຢໂຫວາແບບນັ້ນຄືກັນ.
ສາມເອື້ອຍນ້ອງນີ້ເຫັນຄ່າການຊ່ວຍເຫຼືອດ້ວຍຄວາມຮັກຂອງພີ່ນ້ອງໃນປະຊາຄົມ. ໂຢມາຣາບອກວ່າ: “ຕັ້ງແຕ່ຕອນທຳອິດທີ່ໄດ້ເຈິກັນ ພະຍານພະເຢໂຫວາກໍສະແດງຄວາມຮັກແບບຄລິດສະຕຽນແທ້ຕໍ່ເຮົາ.” ມາເຊໂລບອກວ່າ: “ເຮົາມີໝູ່ໃນປະຊາຄົມທີ່ໜ້າຮັກຫຼາຍ ແລະເຮົາກໍເປັນຄອບຄົວດຽວກັນທົ່ວໂລກທີ່ຮັກກັນແລະກັນ.” ໂຢມາຣາແລະນ້ອງຊາຍຂອງລາວ 2 ຄົນລໍຖ້າມື້ທີ່ເຂົາເຈົ້າຈະໄດ້ເຫັນໂລກນີ້ກາຍເປັນອຸທິຍານ.—ເພງ. 37:10, 11; ອຊຢ. 35:5
a ປຶ້ມທີ່ມີຊື່ວ່າຮຽນອ່ານອັກສອນເບວ (Learn to Read Braille) ເປັນປຶ້ມທີ່ຊ່ວຍຄົນຕາບອດຫຼືພິການທາງສາຍຕາໃຫ້ຮຽນຮູ້ວິທີອ່ານແລະຂຽນອັກສອນເບວໄດ້.