ຖ້າຄູ່ຂອງເຈົ້າເບິ່ງສິ່ງລາມົກ ເຈົ້າຈະເຮັດແນວໃດ?
“ຂ້ອຍຮູ້ສຶກວ່າຜົວຂ້ອຍຫຼິ້ນຊູ້ຊ້ຳແລ້ວຊ້ຳອີກ.”
“ຂ້ອຍຮູ້ສຶກອາຍຫຼາຍ ຮູ້ສຶກວ່າໂຕເອງບໍ່ມີຄ່າ ແລະບໍ່ໜ້າດຶງດູດໃຈ.”
“ຂ້ອຍບໍ່ກ້າບອກໃຜເລີຍແລະບໍ່ຮູ້ວ່າຈະໄປເພິ່ງໃຜ.”
“ຂ້ອຍຮູ້ສຶກຄືກັບວ່າພະເຢໂຫວາບໍ່ຮັກຂ້ອຍແລ້ວ.”
ຄຳເວົ້າເຫຼົ່ານີ້ສະແດງໃຫ້ເຫັນເລີຍວ່າຜູ້ເປັນເມຍທຸກໃຈຫຼາຍສ່ຳໃດທີ່ຜົວເບິ່ງສິ່ງລາມົກ. ແຕ່ຖ້າຜົວເຮັດແບບນີ້ໄປດົນໆເປັນເວລາຫຼາຍເດືອນຫຼາຍປີເມຍກໍອາດຈະບໍ່ໄວ້ໃຈລາວອີກຕໍ່ໄປ. ເມຍຄົນໜຶ່ງບອກວ່າ “ຂ້ອຍຮູ້ສຶກວ່າບໍ່ໄດ້ຮູ້ຈັກຜົວແທ້ໆແລະມີຫຍັງອີກບໍທີ່ລາວລັກເຮັດໂດຍທີ່ຂ້ອຍບໍ່ຮູ້?”
ບົດຄວາມນີ້ຂຽນຂຶ້ນມາສຳລັບເມຍທີ່ຜົວເບິ່ງສິ່ງລາມົກa ເຊິ່ງມີຫຼັກການຕ່າງໆໃນຄຳພີໄບເບິນທີ່ໃຫ້ກຳລັງໃຈ ເຮັດໃຫ້ລາວໝັ້ນໃຈວ່າພະເຢໂຫວາຮັກແລະຢາກຊ່ວຍລາວແທ້ໆ. ບົດຄວາມນີ້ຍັງຈະຊ່ວຍລາວໃຫ້ມີຄວາມສະຫງົບໃຈແລະສະໜິດກັບພະເຢໂຫວາຕໍ່ໆໄປໄດ້.b
ຝ່າຍທີ່ບໍ່ໄດ້ເບິ່ງສິ່ງລາມົກຈະເຮັດແນວໃດ?
ເຖິງວ່າເຈົ້າຈະບໍ່ສາມາດຄວບຄຸມທຸກຢ່າງທີ່ຜົວເຈົ້າເຮັດ ແຕ່ກໍມີບາງຢ່າງທີ່ເຈົ້າເຮັດໄດ້ເພື່ອຈະອຸກໃຈໜ້ອຍລົງແລະມີຄວາມສະຫງົບໃຈຫຼາຍຂຶ້ນ. ໃຫ້ເຮົາມາເບິ່ງຄຳແນະນຳຕໍ່ໄປນີ້ນຳກັນ.
ບໍ່ຕ້ອງໂທດໂຕເອງ. ເມຍອາດຈະຮູ້ສຶກວ່າທີ່ຜົວເບິ່ງສິ່ງລາມົກເປັນຍ້ອນລາວ. ອາລິດຊ໌cຮູ້ສຶກວ່າລາວບໍ່ດີພໍແລະບໍ່ໜ້າດຶງດູດໃຈ. ລາວສົງໄສວ່າ “ເປັນຫຍັງຜົວຂ້ອຍຈຶ່ງມັກເບິ່ງຜູ້ຍິງຄົນອື່ນແທນທີ່ຈະເບິ່ງຂ້ອຍ?” ເມຍບາງຄົນໂທດໂຕເອງຍ້ອນເຂົາເຈົ້າຄິດວ່າທ່າທີທີ່ເຂົາເຈົ້າສະແດງອອກມານັ້ນເຮັດໃຫ້ສະຖານະການຮ້າຍກວ່າເກົ່າ. ເດັນນ້ຽວບອກວ່າ “ຍ້ອນຜົວຂ້ອຍລັກເບິ່ງສິ່ງລາມົກ ຂ້ອຍຈຶ່ງຮູ້ສຶກໃຈຮ້າຍແລະລະເບີດອາລົມອອກມາ ແລະນັ້ນແຮ່ງເຮັດໃຫ້ຊີວິດຄູ່ຂອງເຮົາມີບັນຫາຫຼາຍກວ່າເກົ່າ.”
ຖ້າເຈົ້າກຳລັງໂທດໂຕເອງຢູ່ ຂໍໃຫ້ຮູ້ໄວ້ວ່າພະເຢໂຫວາບໍ່ໄດ້ຄິດວ່າເຈົ້າຕ້ອງຮັບຜິດຊອບທີ່ຜົວເປັນແບບນັ້ນ. ຢາໂກໂບ 1:14 ບອກວ່າ: “ທຸກຄົນຖືກທົດລອງເມື່ອຄວາມຕ້ອງການຂອງຕົວເອງຊັກຈູງແລະລໍ້ລວງລາວ.” (ຣມ. 14:12; ຟລປ. 2:12) ດັ່ງນັ້ນ ບໍ່ຕ້ອງໂທດໂຕເອງ ພະເຢໂຫວາເຫັນຄ່າທີ່ເຈົ້າພັກດີຕໍ່ເພິ່ນ.—2 ຂຄ. 16:9
ນອກຈາກນັ້ນ ການທີ່ຜົວເບິ່ງສິ່ງລາມົກບໍ່ໄດ້ໝາຍຄວາມວ່າເມຍບໍ່ດີພໍຫຼືບໍ່ໜ້າດຶງດູດໃຈ. ຜູ້ຊ່ຽວຊານເວົ້າວ່າ ບໍ່ມີຜູ້ຍິງຄົນໃດຈະສະໜອງຄວາມຕ້ອງການທາງເພດໃຫ້ກັບຜູ້ທີ່ເບິ່ງສິ່ງລາມົກໃນແບບທີ່ລາວພໍໃຈໄດ້.
ບໍ່ຕ້ອງກັງວົນຫຼາຍເກີນໄປ. ພີ່ນ້ອງຄົນໜຶ່ງທີ່ຊື່ແຄັດເທີຣີນບອກວ່າ ລາວຄິດເຖິງແຕ່ເລື່ອງທີ່ຜົວເບິ່ງສິ່ງລາມົກແລະຄິດເຖິງເລື່ອງນັ້ນໝົດມື້ໝົດຄືນ. ຟຣານເຊັດສ໌ບອກວ່າ: “ຕອນທີ່ຂ້ອຍບໍ່ໄດ້ຢູ່ກັບຜົວ ຂ້ອຍຈະຮູ້ສຶກກັງວົນໃຈຫຼາຍເພາະບໍ່ຮູ້ວ່າລາວຢູ່ໃສແລະກຳລັງເຮັດຫຍັງຢູ່.” ບາງຄົນກໍຮູ້ສຶກອາຍຕອນທີ່ຢູ່ກັບພີ່ນ້ອງທີ່ຮູ້ເລື່ອງຂອງຜົວລາວ. ສ່ວນບາງຄົນກໍຮູ້ສຶກເຫງົາເພາະຄິດວ່າບໍ່ມີໃຜເຂົ້າໃຈສະພາບການຂອງລາວ.
ເປັນເລື່ອງທຳມະດາທີ່ຈະຮູ້ສຶກແບບນັ້ນ. ແຕ່ແທນທີ່ຈະຄິດເຖິງແຕ່ບັນຫາຂອງໂຕເອງ ໃຫ້ພະຍາຍາມຄິດເຖິງສິ່ງທີ່ຈະເສີມສ້າງສາຍສຳພັນຂອງເຈົ້າກັບພະເຢໂຫວາ. ຍ້ອນການເຮັດແບບນີ້ຈະຊ່ວຍເຈົ້າໃຫ້ເຂັ້ມແຂງຫຼາຍຂຶ້ນ.—ເພງ. 62:2; ອຟຊ. 6:10
ສິ່ງທີ່ອາດຈະຊ່ວຍເຈົ້າໃນເລື່ອງນີ້ໄດ້ກໍຄືການອ່ານແລະຄິດຕຶກຕ້ອງເລື່ອງຂອງຜູ້ຍິງທີ່ທຸກໃຈທີ່ຢູ່ໃນຄຳພີໄບເບິນ. ເຂົ້າເຈົ້າໄດ້ອະທິດຖານລະບາຍຄວາມຮູ້ສຶກກັບພະເຢໂຫວາ. ຫຼັງຈາກນັ້ນກໍຮູ້ສຶກສະບາຍໃຈຂຶ້ນເຖິງວ່າພະເຢໂຫວາບໍ່ໄດ້ເຮັດໃຫ້ບັນຫາຂອງເຂົາເຈົ້າໝົດໄປ. ໃຫ້ເຮົາມາເບິ່ງຕົວຢ່າງຂອງຮັນນາ. ລາວ “ທຸກໃຈຫຼາຍ” ແຕ່ເມື່ອລາວ “ອະທິດຖານຫາພະເຢໂຫວາດົນໆ” ຈາກນັ້ນ ລາວກໍຮູ້ສຶກສະບາຍໃຈຂຶ້ນເຖິງລາວບໍ່ຮູ້ວ່າສະພາບການຕໍ່ຈາກນັ້ນຈະເປັນແນວໃດ.—1 ຊມ. 1:10, 12, 18; 2 ກຣ. 1:3, 4
ທັງຜົວແລະເມຍອາດຕ້ອງຂໍຄວາມຊ່ວຍເຫຼືອຈາກຜູ້ດູແລ
ນອກຈາກນັ້ນ ໃຫ້ຂໍຄວາມຊ່ວຍເຫຼືອຈາກຜູ້ດູແລ. ເຂົາເຈົ້າ “ເປັນຄືກັບບ່ອນທີ່ບັງລົມເປັນຄືກັບບ່ອນທີ່ປົກປ້ອງຈາກພາຍຸຝົນ.” (ອຊຢ. 32:2) ຜູ້ດູແລອາດຈະແນະນຳພີ່ນ້ອງຍິງຄົນໜຶ່ງໃນປະຊາຄົມທີ່ເຈົ້າໄວ້ໃຈໄດ້ເຊິ່ງເຈົ້າສາມາດລະບາຍຄວາມຮູ້ສຶກກັບລາວໄດ້.—ສຸພາ. 17:17
ເຈົ້າຈະຊ່ວຍຜົວຂອງເຈົ້າໄດ້ບໍ?
ເຈົ້າຈະຊ່ວຍຜົວໃຫ້ເຊົາເບິ່ງສິ່ງລາມົກໄດ້ບໍ? ເຈົ້າອາດຈະຊ່ວຍໄດ້. ຄຳພີໄບເບິນບອກວ່າເພື່ອຈະແກ້ໄຂບັນຫາຫຼືເອົາຊະນະສັດຕູທີ່ແຂງແຮງໄດ້ “ສອງຄົນກໍດີກວ່າຄົນດຽວ.” (ຜູ້ປ. 4:9-12, ລ.ມ.) ຜູ້ຊ່ຽວຊານຫຼາຍຄົນບອກວ່າ ຖ້າຜົວແລະເມຍຮ່ວມມືກັນ ເຂົາເຈົ້າຈະສາມາດຊ່ວຍຄູ່ຂອງໂຕເອງໃຫ້ເຊົາຕິດສິ່ງລາມົກໄດ້ແລະກັບມາໄວ້ໃຈກັນອີກ.
ແຕ່ການທີ່ຜົວຂອງເຈົ້າຈະເຊົາເບິ່ງສິ່ງລາມົກໄດ້ຫຼືບໍ່ກໍຂຶ້ນຢູ່ກັບວ່າລາວມີຄວາມຕັ້ງໃຈແລະຢາກເຊົານິດໄສນີ້ແທ້ໆບໍ? ລາວໄດ້ອະທິດຖານຂໍໃຫ້ພະເຢໂຫວາຊ່ວຍ ແລະຂໍຄວາມຊ່ວຍເຫຼືອຈາກຜູ້ດູແລບໍ? (2ກຣ. 4:7; ຢກບ. 5:14, 15) ລາວໄດ້ຫາວິທີເພື່ອບໍ່ໃຫ້ໂຕເອງຖືກລໍ້ໃຈໃຫ້ເຮັດຜິດອີກບໍ? ເຊັ່ນ: ລາວຄວບຄຸມແລະຈຳກັດການໃຊ້ຄອມພິວເຕີກັບມືຖື ແລະພະຍາຍາມບໍ່ໄປຢູ່ໃນສະຖານະການທີ່ລໍ້ໃຈໃຫ້ລາວກັບມາເບິ່ງສິ່ງລາມົກອີກ. (ສຸພາ. 27:12) ລາວເຕັມໃຈໃຫ້ເຈົ້າຊ່ວຍບໍ? ລາວສັດຊື່ຕໍ່ເຈົ້າທັງຄຳເວົ້າແລະການກະທຳບໍ? ຖ້າແມ່ນ ເຈົ້າອາດຈະຊ່ວຍລາວໄດ້.
ເຈົ້າຈະຊ່ວຍລາວໄດ້ແນວໃດ? ໃຫ້ເຮົາມາເບິ່ງຕົວຢ່າງຂອງຜົວເມຍຄູ່ໜຶ່ງທີ່ຊື່ເຟລີເຊຍກັບອີເທິນເຊິ່ງອີເທິນຕິດສິ່ງລາມົກມາຕັ້ງແຕ່ຍັງນ້ອຍ. ເຟລີເຊຍເຮັດໃຫ້ອີເທິນຮູ້ສຶກສະບາຍໃຈທີ່ຈະເຂົ້າມາລົມນຳໄດ້ຕະຫຼອດຕອນທີ່ອີເທິນມີຄວາມຮູ້ສຶກຢາກເບິ່ງສິ່ງລາມົກ. ອີເທິນເວົ້າວ່າ: “ຂ້ອຍເປີດໃຈລົມກັບເມຍໃນເລື່ອງນີ້. ລາວເຕັມໃຈຊ່ວຍຂ້ອຍບໍ່ໃຫ້ຖືກລໍ້ໃຈແລະພະຍາຍາມຖາມຂ້ອຍເລື້ອຍໆວ່າເປັນແນວໃດ? ນອກຈາກນັ້ນ ລາວຍັງຊ່ວຍຂ້ອຍໃຫ້ຄວບຄຸມການໃຊ້ອິນເຕີເນັດ.” ແນ່ນອນວ່າເຟລີເຊຍຄືຊິຮູ້ສຶກເສຍໃຈທີ່ອີເທິນຕິດສິ່ງລາມົກ. ແຕ່ລາວບອກວ່າ: “ເຖິງຂ້ອຍຈະໃຈຮ້າຍແລະເສຍໃຈຫຼາຍ ແຕ່ມັນກໍບໍ່ໄດ້ຊ່ວຍໃຫ້ອີເທິນເຊົານິດໄສນີ້. ຫຼັງຈາກທີ່ເຮົາລົມກັນກ່ຽວກັບເລື່ອງນີ້ ລາວກໍຕັ້ງໃຈທີ່ຈະຊ່ວຍຂ້ອຍໂດຍບໍ່ເບິ່ງສິ່ງລາມົກອີກ.”
ການລົມກັນແບບນີ້ບໍ່ພຽງແຕ່ຊ່ວຍຜົວໃຫ້ເຊົາເບິ່ງສິ່ງລາມົກ ແຕ່ຍັງຊ່ວຍເມຍໃຫ້ກັບມາໄວ້ໃຈຜົວອີກ. ທີ່ຈິງເມື່ອຜົວເປີດໃຈບອກເມຍທຸກເລື່ອງວ່າລາວມີຈຸດອ່ອນຫຍັງແດ່ ລາວໄປໃສແລະເຮັດຫຍັງຢູ່ ມັນກໍງ່າຍຂຶ້ນທີ່ເມຍຈະກັບມາໄວ້ໃຈລາວອີກ.
ແລ້ວເຈົ້າເຊື່ອບໍວ່າເຈົ້າຈະຊ່ວຍຜົວໄດ້? ຖ້າເຈົ້າເຊື່ອ ກໍໃຫ້ພວກເຈົ້າລອງອ່ານບົດຄວາມນີ້ນຳກັນ. ເປົ້າໝາຍຂອງລາວກໍຄືຕ້ອງເຊົາເບິ່ງສິ່ງລາມົກໃຫ້ໄດ້ ແລະເຮັດໃຫ້ເຈົ້າກັບມາໄວ້ໃຈລາວອີກ. ແທນທີ່ຈະໃຈຮ້າຍເມື່ອເວົ້າກ່ຽວກັບບັນຫາຂອງລາວ ໃຫ້ຊ່ວຍລາວເຂົ້າໃຈວ່າບັນຫານີ້ເຮັດໃຫ້ເຈົ້າຮູ້ສຶກແນວໃດ. ໃຫ້ພະຍາຍາມຊ່ວຍລາວເຊົານິດໄສນີ້ ແລະໃຫ້ໂອກາດລາວເຮັດໃຫ້ເຈົ້າກັບມາໄວ້ໃຈລາວອີກ. ເຈົ້າທັງສອງຕ້ອງຮູ້ວ່າເປັນຫຍັງຫຼາຍຄົນຈຶ່ງມັກເບິ່ງສິ່ງລາມົກ ແລະຈະເຊົາເບິ່ງສິ່ງລາມົກໄດ້ແນວໃດ.d
ຖ້າເຈົ້າຢ້ານວ່າຕອນທີ່ເຈົ້າກັບຄູ່ຂອງເຈົ້າລົມກັນແລ້ວຈະຖຽງກັນ ກໍໃຫ້ຂໍຜູ້ດູແລຄົນໜຶ່ງທີ່ເຈົ້າທັງສອງໄວ້ໃຈໃຫ້ມານັ່ງນຳຕອນທີ່ພວກເຈົ້າລົມກັນ. ຂໍໃຫ້ຈື່ໄວ້ວ່າເຖິງວ່າຄູ່ຂອງເຈົ້າຈະເຊົາເບິ່ງສິ່ງລາມົກແລ້ວ ແຕ່ອາດຍັງຕ້ອງໃຊ້ເວລາອີກໄລຍະໜຶ່ງເພື່ອເຈົ້າຈະກັບມາໄວ້ໃຈລາວອີກ. ແຕ່ຂໍເຈົ້າຢ່າຍອມແພ້. ໃຫ້ພະຍາຍາມສັງເກດເບິ່ງວ່າສາຍສຳພັນຂອງເຈົ້າກັບລາວດີຂຶ້ນທີລະເລັກທີລະນ້ອຍແນວໃດ ແລະໃຫ້ຫວັງຢູ່ສະເໝີວ່າເມື່ອເວລາຜ່ານໄປສິ່ງທີ່ເຈົ້າພະຍາຍາມເຮັດດ້ວຍຄວາມອົດທົນຈະເຮັດໃຫ້ເຈົ້າທັງສອງຄົນກັບມາຮັກກັນຄືເກົ່າ.—ຜູ້ປ. 7:8; 1ກຣ. 13:4
ຈະເຮັດແນວໃດຖ້າຜົວຍັງເຊົາເບິ່ງສິ່ງລາມົກບໍ່ໄດ້?
ຖ້າຜົວຂອງເຈົ້າກັບໄປເບິ່ງສິ່ງລາມົກອີກ ນີ້ໝາຍຄວາມວ່າລາວບໍ່ໄດ້ກັບໃຈແທ້ໆຫຼືລາວບໍ່ສາມາດປ່ຽນນິດໄສນີ້ໄດ້ເລີຍບໍ? ບໍ່ແມ່ນແບບນັ້ນ. ຖ້າລາວຕິດສິ່ງລາມົກ ລາວອາດຕ້ອງຕໍ່ສູ້ກັບຄວາມຕ້ອງການນີ້ຕະຫຼອດຊີວິດ. ບາງຄົນເຊົານິດໄສນີ້ໄປຫຼາຍປີແລ້ວ ແຕ່ອາດກັບມາເບິ່ງອີກ. ດັ່ງນັ້ນ ເພື່ອລາວຈະບໍ່ກັບໄປເບິ່ງສິ່ງລາມົກອີກ ລາວຕ້ອງຕັ້ງໃຈແລະເຂັ້ມງວດກັບໂຕເອງຫຼາຍກວ່າເກົ່າເຖິງວ່າລາວບໍ່ໄດ້ເບິ່ງສິ່ງລາມົກມາດົນແລ້ວ. (ສຸພາ. 28:14; ມທ. 5:29; 1ກຣ. 10:12) ລາວຕ້ອງ “ປ່ຽນແປງຄວາມຄິດຈິດໃຈໃໝ່” ແລະຮຽນຮູ້ທີ່ຈະ “ຊັງສິ່ງຊົ່ວ” ນັ້ນກໍຄືສິ່ງລາມົກເຊິ່ງລວມເຖິງການກະທຳທີ່ບໍ່ສະອາດອື່ນໆເຊັ່ນ ການສະໜອງຄວາມຕ້ອງການທາງເພດດ້ວຍໂຕເອງ. (ອຟຊ. 4:23; ເພງ. 97:10, ລ.ມ.; ຣມ. 12:9) ລາວພ້ອມຈະເຮັດສິ່ງທັງໝົດນີ້ບໍ? ຖ້າລາວພ້ອມ ລາວກໍອາດຈະປ່ຽນນິດໄສນີ້ໄດ້.e
ໃຫ້ພະຍາຍາມຄິດເຖິງສາຍສຳພັນຂອງເຈົ້າກັບພະເຢໂຫວາ
ແຕ່ຈະເຮັດແນວໃດຖ້າຜົວຂອງເຈົ້າບໍ່ຢາກເຊົາເບິ່ງສິ່ງລາມົກ? ເຈົ້າຄືຊິຜິດຫວັງ ໃຈຮ້າຍ ແລະຮູ້ສຶກວ່າຖືກຫັກຫຼັງ. ໃຫ້ຝາກບັນຫາຂອງເຈົ້າໄວ້ກັບພະເຢໂຫວາ. ການເຮັດແບບນີ້ຈະຊ່ວຍເຈົ້າໃຫ້ສະຫງົບໃຈໄດ້. (1ປຕ. 5:7) ໃຫ້ພະຍາຍາມໃກ້ຊິດກັບພະເຢໂຫວາໂດຍອະທິດຖານ ສຶກສາສ່ວນຕົວ ແລະຄິດຕຶກຕອງ. ເມື່ອເຮັດແບບນີ້ເຈົ້າກໍໝັ້ນໃຈໄດ້ເລີຍວ່າພະເຢໂຫວາຈະໃກ້ຊິດກັບເຈົ້າຄືກັນ. ຄືກັບທີ່ບອກໄວ້ໃນເອຊາຢາ 57:15 ທີ່ວ່າ: ເພິ່ນຈະ “ຢູ່ກັບຄົນທີ່ທຸກໃຈແລະຄົນທີ່ຕ່ຳຕ້ອຍ” ແລະຢາກຊ່ວຍເຂົາເຈົ້າໃຫ້ກັບມາມີຄວາມສຸກອີກ. ໃຫ້ເຈົ້າພະຍາຍາມສະແດງຄຸນລັກສະນະແບບຄລິດສະຕຽນໃຫ້ຫຼາຍທີ່ສຸດເທົ່າທີ່ຈະເປັນໄປໄດ້. ໃຫ້ຂໍຄວາມຊ່ວຍເຫຼືອຈາກຜູ້ດູແລ ແລະໃຫ້ຫວັງຢູ່ສະເໝີວ່າຈັກມື້ໜຶ່ງຜົວຂອງເຈົ້າຈະປ່ຽນນິດໄສນີ້ໄດ້.—ຣມ. 2:4; 2ປຕ. 3:9
a ບົດຄວາມນີ້ເວົ້າເຖິງກໍລະນີທີ່ຜົວເປັນຝ່າຍເບິ່ງສິ່ງລາມົກ. ແຕ່ຫຼັກການຫຼາຍຂໍ້ໃນບົດຄວາມນີ້ກໍຊ່ວຍຜົວໄດ້ຄືກັນໃນກໍລະນີທີ່ເມຍເປັນຝ່າຍເບິ່ງສິ່ງລາມົກ.
c ຊື່ສົມມຸດ.
d ຂໍ້ມູນເພີ່ມເຕີມທີ່ຈະຊ່ວຍໃນເລື່ອງນີ້ໃຫ້ເບິ່ງປຶ້ມຕ່າງໆຂອງອົງການແລະໃນເວັບໄຊ jw.org ເຊັ່ນ: ບົດຄວາມ “ສື່ລາມົກທຳລາຍຊີວິດຄູ່ຂອງເຈົ້າໄດ້” ໃນເວັບໄຊ jw.org. ບົດຄວາມ “ສິ່ງລໍ້ໃຈ ເຈົ້າສູ້ໄດ້ ຖ້າໃຈແກ່ງ!” ໃນຫໍສັງເກດການ 1 ເມສາ 2014 ໜ້າ 10-12 ແລະບົດຄວາມ “ສື່ລາມົກ—ໄຮ້ພິດໄພຫຼືມີອັນຕະລາຍ? ໃນຫໍສັງເກດການ 1 ສິງຫາ 2013 ໜ້າ 3-7. (ພາສາໄທ)
e ເນື່ອງຈາກສິ່ງລາມົກເປັນສິ່ງທີ່ຕິດໄດ້. ດັ່ງນັ້ນ ນອກຈາກຈະຂໍຄວາມຊ່ວຍເຫຼືອຈາກຜູ້ດູແລແລ້ວ ຜົວເມຍບາງຄູ່ອາດຕັດສິນໃຈໄປຂໍຄວາມຊ່ວຍເຫຼືອຈາກຜູ້ຊ່ຽວຊານກ່ຽວກັບດ້ານນີ້ຕື່ມ.