ບົດຄວາມສຶກສາທີ 19
ເພງທີ 6 ທ້ອງຟ້າປະກາດສະຫງ່າລາສີຂອງພະເຈົ້າ
ຮຽນແບບທູດສະຫວັນທີ່ສັດຊື່
“ທູດສະຫວັນທັງໝົດ . . . ຂໍໃຫ້ສັນລະເສີນພະເຢໂຫວາ.”—ພສ. 103:20
ຈຸດສຳຄັນ
ບົດຮຽນທີ່ເຮົາໄດ້ຈາກຕົວຢ່າງຂອງທູດສະຫວັນທີ່ສັດຊື່.
1-2. (ກ) ມີຫຍັງແດ່ທີ່ເຮົາຕ່າງຈາກທູດສະຫວັນ? (ຂ) ມີຫຍັງແດ່ທີ່ເຮົາຄືກັບທູດສະຫວັນ?
ຕອນທີ່ເຮົາເຂົ້າມາໃນຄວາມຈິງ ເຮົາໄດ້ເປັນສ່ວນໜຶ່ງຂອງຄອບຄົວທີ່ມີແຕ່ຜູ້ນະມັດສະການພະເຢໂຫວາເຊິ່ງລວມເຖິງພີ່ນ້ອງຂອງເຮົາຢູ່ທົ່ວໂລກແລະທູດສະຫວັນຫຼາຍລ້ານອົງນຳ. (ດນອ. 7:9, 10) ເມື່ອເຮົາຄິດເຖິງທູດສະຫວັນ ເຮົາອາດຈະຄິດວ່າເຂົາເຈົ້າມີຫຼາຍຢ່າງທີ່ຕ່າງຈາກເຮົາ. ຕົວຢ່າງເຊັ່ນ: ທູດສະຫວັນມີຊີວິດຢູ່ດົນກວ່າເຮົາ. (ໂຢບ 38:4, 7) ເຂົາເຈົ້າມີລິດເດດຫຼາຍກວ່າເຮົາ. ເຂົາເຈົ້າບໍລິສຸດແລະດີຮອບດ້ານ ແຕ່ເຮົາເປັນຄົນບໍ່ສົມບູນແບບ.—ລກ. 9:26
2 ເຖິງວ່າເຮົາຈະມີຫຼາຍຢ່າງທີ່ຕ່າງຈາກທູດສະຫວັນ ແຕ່ເຮົາກໍມີຫຼາຍຢ່າງທີ່ຄືກັບເຂົາເຈົ້າ. ຕົວຢ່າງເຊັ່ນ: ເຮົາສາມາດສະແດງຄຸນລັກສະນະທີ່ດີຂອງພະເຢໂຫວາ ແລະເຮົາກໍມີອິດສະຫຼະໃນການຕັດສິນໃຈໃນເລື່ອງຕ່າງໆ. ນອກຈາກນັ້ນ ເຮົາແຕ່ລະຄົນມີຊື່ ມີນິດໄສ ແລະໄດ້ຮັບວຽກມອບໝາຍຈາກພະເຢໂຫວາໃນແບບທີ່ຕ່າງກັນ. ເຮົາຍັງຖືກສ້າງເພື່ອໃຫ້ມີຄວາມຕ້ອງການທີ່ຈະນະມັດສະການພະເຢໂຫວາພະເຈົ້າຜູ້ທີ່ສ້າງເຮົາ.—1ປຕ. 1:12
3. ເຮົາຈະຮຽນຫຍັງຈາກທູດສະຫວັນທີ່ສັດຊື່?
3 ຍ້ອນເຮົາມີຫຼາຍຢ່າງທີ່ຄືກັບທູດສະຫວັນ ຕົວຢ່າງທີ່ດີຂອງເຂົາເຈົ້າຈຶ່ງສາມາດໃຫ້ກຳລັງໃຈແລະສອນເຮົາຫຼາຍເລື່ອງ. ໃນບົດນີ້ ເຮົາຈະເບິ່ງວ່າເຮົາຈະຮຽນແບບທູດສະຫວັນທີ່ສັດຊື່ໄດ້ແນວໃດໃນເລື່ອງຄວາມຖ່ອມ ການຮັກຄົນອື່ນ ຄວາມອົດທົນ ແລະການພະຍາຍາມຮັກສາປະຊາຄົມໃຫ້ສະອາດຢູ່ສະເໝີ.
ທູດສະຫວັນຖ່ອມໂຕ
4. (ກ) ທູດສະຫວັນສະແດງຄວາມຖ່ອມແນວໃດ? (ຂ) ເປັນຫຍັງທູດສະຫວັນຈຶ່ງຖ່ອມໂຕ? (ເພງສັນລະເສີນ 89:7)
4 ທູດສະຫວັນທີ່ສັດຊື່ຖ່ອມໂຕ. ເຖິງວ່າເຂົາເຈົ້າຈະມີປະສົບການຫຼາຍ ມີລິດເດດຫຼາຍ ແລະສະຫຼາດຫຼາຍ ແຕ່ເຂົາເຈົ້າກໍເຊື່ອຟັງຄຳສັ່ງຂອງພະເຢໂຫວາສະເໝີ. (ພສ. 103:20) ຕອນທີ່ໄດ້ຮັບວຽກມອບໝາຍ ເຂົາເຈົ້າບໍ່ໄດ້ອວດສິ່ງທີ່ເຮັດຫຼືໃຊ້ລິດເດດເພື່ອດຶງຄວາມສົນໃຈມາໃສ່ໂຕເອງ. ເຂົາເຈົ້າເຕັມໃຈເຮັດວຽກມອບໝາຍທຸກຢ່າງທີ່ໄດ້ຮັບຈາກພະເຢໂຫວາ ເຖິງວ່າຄົນອື່ນຈະບໍ່ຮູ້ຈັກຊື່ຂອງເຂົາເຈົ້າ.a (ປຖກ. 32:24, 29; 2ກສ. 19:35) ເຂົາເຈົ້າບໍ່ຍອມຮັບຄຳສັນລະເສີນທີ່ຄວນເປັນຂອງພະເຢໂຫວາ. ເປັນຫຍັງທູດສະຫວັນຈຶ່ງຖ່ອມໂຕຂະໜາດນີ້? ກໍຍ້ອນເຂົາເຈົ້າຮັກແລະນັບຖືພະເຢໂຫວາຫຼາຍ.—ອ່ານເພງສັນລະເສີນ 89:7
5. ທູດສະຫວັນອົງໜຶ່ງສະແດງຄວາມຖ່ອມແນວໃດຕອນທີ່ປັບຄວາມຄິດຂອງໂຢຮັນ? (ເບິ່ງຮູບນຳ)
5 ໃຫ້ເຮົາມາເບິ່ງເຫດການໜຶ່ງທີ່ເຮັດໃຫ້ເຫັນວ່າທູດສະຫວັນຖ່ອມໂຕ. ປະມານປີ 96 ທູດສະຫວັນອົງໜຶ່ງທີ່ເຮົາບໍ່ຮູ້ຈັກຊື່ໄດ້ມາຫາໂຢຮັນເພື່ອຊ່ວຍລາວໃຫ້ເຫັນນິມິດທີ່ໜ້າຕື່ນເຕັ້ນ. (ພນມ. 1:1) ໂຢຮັນເຮັດແນວໃດເມື່ອເຫັນນິມິດນີ້? ລາວໝູບລົງເພື່ອຈະກົ້ມກາບທູດສະຫວັນ. ທູດສະຫວັນທີ່ສັດຊື່ອົງນີ້ກໍຟ້າວຫ້າມລາວແລະບອກວ່າ: “ຢ່າ! ຢ່າເຮັດແນວນີ້! ໃຫ້ນະມັດສະການພະເຈົ້າເດີ້! ຂ້ອຍກໍເປັນທາດຄືກັບເຈົ້າແລະຄືກັບພີ່ນ້ອງຂອງເຈົ້າ.” (ພນມ. 19:10) ທູດສະຫວັນອົງນີ້ຖ່ອມໂຕແທ້ໆ! ລາວບໍ່ຢາກໄດ້ຮັບຄຳຍ້ອງຍໍສັນລະເສີນ ແຕ່ຟ້າວບອກໂຢຮັນໃຫ້ນະມັດສະການພະເຈົ້າ ແລະໃນເວລາດຽວກັນທູດສະຫວັນບໍ່ໄດ້ດູຖູກໂຢຮັນ. ເຖິງວ່າທູດສະຫວັນອົງນີ້ຈະຮັບໃຊ້ພະເຢໂຫວາມາດົນກວ່າແລະມີລິດເດດຫຼາຍກວ່າໂຢຮັນ ແຕ່ລາວຖ່ອມໂຕແລະບອກໂຢຮັນວ່າລາວເອງກໍເປັນທາດຄືກັບໂຢຮັນ. ເຖິງວ່າຕອນນັ້ນທູດສະຫວັນຕ້ອງປັບຄວາມຄິດຂອງໂຢຮັນ ແຕ່ລາວກໍບໍ່ໄດ້ເວົ້າແບບຮຸນແຮງ. ລາວເວົ້າແບບອ່ອນໂຍນແລະຮູ້ວ່າໂຢຮັນເຮັດແບບນີ້ຍ້ອນປະທັບໃຈໃນສິ່ງທີ່ໄດ້ເຫັນ.
ທູດສະຫວັນອົງໜຶ່ງສະແດງຄວາມຖ່ອມຕອນທີ່ປັບຄວາມຄິດຂອງໂຢຮັນ (ເບິ່ງຂໍ້ 5)
6. ເຮົາຈະຮຽນແບບຄວາມຖ່ອມຂອງທູດສະຫວັນໄດ້ແນວໃດ?
6 ເຮົາຈະຮຽນແບບທູດສະຫວັນແນວໃດໃນເລື່ອງຄວາມຖ່ອມ? ຕອນທີ່ເຮົາໄດ້ຮັບວຽກມອບໝາຍ ເຮົາບໍ່ຢາກອວດຄົນອື່ນວ່າເຮົາກຳລັງເຮັດວຽກຫຍັງຫຼືເຮັດໃຫ້ຄົນອື່ນເຫັນວ່າວຽກນັ້ນແລ້ວຍ້ອນເຮົາ. (1ກຣ. 4:7) ນອກຈາກນັ້ນ ຖ້າເຮົາຮັບໃຊ້ພະເຢໂຫວາມາດົນແລ້ວຫຼືໄດ້ຮັບສິດທິພິເສດບາງຢ່າງ ເຮົາບໍ່ຄວນຄິດວ່າໂຕເອງເໜືອກວ່າຄົນອື່ນ. ທີ່ຈິງແລ້ວ ແຮ່ງເຮົາມີໜ້າທີ່ຮັບຜິດຊອບຫຼາຍເທົ່າໃດ ເຮົາກໍແຮ່ງຕ້ອງເບິ່ງວ່າໂຕເອງເປັນຄົນທີ່ຕ່ຳຕ້ອຍຫຼາຍເທົ່ານັ້ນ. (ລກ. 9:48) ເຮົາຢາກເປັນຄືກັບທູດສະຫວັນທີ່ເຕັມໃຈຮັບໃຊ້ຄົນອື່ນ ບໍ່ແມ່ນເຮັດໃຫ້ຄົນອື່ນຄິດວ່າເຮົາເປັນຄົນທີ່ສຳຄັນ.
7. ເຮົາຈະສະແດງຄວາມຖ່ອມໄດ້ແນວໃດຕອນທີ່ເຮົາຕ້ອງໃຫ້ຄຳແນະນຳຫຼືຕັກເຕືອນຄົນອື່ນ?
7 ເຮົາຍັງສະແດງຄວາມຖ່ອມໄດ້ຕອນທີ່ຕ້ອງໃຫ້ຄຳແນະນຳຫຼືຕັກເຕືອນຄົນອື່ນບໍ່ວ່າຜູ້ນັ້ນຈະເປັນພີ່ນ້ອງຫຼືເປັນລູກຂອງເຮົາ. ເຮົາສາມາດຮຽນແບບທູດສະຫວັນທີ່ປັບຄວາມຄິດຂອງໂຢຮັນແບບກະລຸນາ. ເມື່ອເຮົາຕ້ອງໃຫ້ຄຳແນະນຳຄົນອື່ນແບບໜັກແໜ້ນ ເຮົາບໍ່ຄວນເຮັດໃຫ້ລາວຮູ້ສຶກທໍ້ໃຈ. ຖ້າເຮົາບໍ່ຄິດວ່າໂຕເອງເປັນຄົນສຳຄັນຫຼືເໜືອກວ່າຄົນອື່ນ ເຮົາກໍຈະໃຫ້ຄຳແນະນຳຈາກຄຳພີໄບເບິນແບບທີ່ສະແດງຄວາມນັບຖືແລະເຫັນອົກເຫັນໃຈຄົນອື່ນ.—ກລຊ. 4:6
ທູດສະຫວັນຮັກມະນຸດ
8. (ກ) ຕາມລູກາ 15:10 ທູດສະຫວັນສະແດງໃຫ້ເຫັນແນວໃດວ່າເຂົາເຈົ້າຮັກມະນຸດ? (ຂ) ທູດສະຫວັນຊ່ວຍເຮົາແນວໃດໃນວຽກປະກາດ? (ເບິ່ງຮູບໜ້າປົກນຳ)
8 ທູດສະຫວັນບໍ່ໄດ້ຢູ່ໄກຈາກມະນຸດ ຫຼືບໍ່ໄດ້ຄິດວ່າມະນຸດບໍ່ສຳຄັນ. ເຂົາເຈົ້າຮັກມະນຸດຫຼາຍ. ເຂົາເຈົ້າດີໃຈເມື່ອເຫັນຄົນທີ່ເຮັດຜິດຮ້າຍແຮງກັບໃຈ ຫຼືຄົນທີ່ເຊົາຮັບໃຊ້ພະເຢໂຫວາກັບມາຫາເພິ່ນ. ເຂົາເຈົ້າກໍດີໃຈຄືກັນເມື່ອຜູ້ໃດຜູ້ໜຶ່ງຮຽນຮູ້ກ່ຽວກັບພະເຢໂຫວາແລະປ່ຽນແປງໂຕເອງເພື່ອເຂົ້າມາຮັບໃຊ້ເພິ່ນ. (ອ່ານລູກາ 15:10) ທູດສະຫວັນຍັງຊ່ວຍເຮົາເມື່ອເຮັດວຽກປະກາດ. (ພນມ. 14:6) ເຖິງວ່າທູດສະຫວັນບໍ່ໄດ້ປະກາດກັບຄົນໂດຍກົງ ແຕ່ເຂົາເຈົ້າອາດຊີ້ນຳເຮົາໃຫ້ໄປຫາຄົນທີ່ຢາກຮຽນຮູ້ກ່ຽວກັບພະເຢໂຫວາ. ເຖິງຈະເປັນແນວນັ້ນ ເຮົາກໍບໍ່ສາມາດເວົ້າໄດ້ທຸກເທື່ອວ່າທູດສະຫວັນຊີ້ນຳເຮົາໃຫ້ໄປຫາຜູ້ໃດຜູ້ໜຶ່ງ. ເຮົາຮູ້ວ່າພະເຢໂຫວາສາມາດໃຊ້ຫຼາຍວິທີເພື່ອຊັກນຳຄົນໃຫ້ເຂົ້າມາຫາເພິ່ນ ເຊັ່ນ: ເພິ່ນໃຊ້ພະລັງບໍລິສຸດເພື່ອຊ່ວຍຄົນທີ່ຢາກຮຽນຮູ້ກ່ຽວກັບເພິ່ນ ຫຼືຊີ້ນຳຜູ້ຮັບໃຊ້ຂອງເພິ່ນໃຫ້ໄປເຈິຄົນເຫຼົ່ານັ້ນ. (ກຈກ. 16:6, 7) ແຕ່ພະເຢໂຫວາກໍໃຊ້ທູດສະຫວັນໃຫ້ຊ່ວຍເຮົາໃນວຽກປະກາດ. ດັ່ງນັ້ນ ເມື່ອເຮົາໄປປະກາດຂ່າວດີ ເຮົາໝັ້ນໃຈໄດ້ວ່າທູດສະຫວັນຈະຊ່ວຍເຮົາແນ່ນອນ.—ເບິ່ງຂອບ “ຄຳອະທິດຖານຂອງເຂົາເຈົ້າໄດ້ຮັບຄຳຕອບ”
ຜົວເມຍຄູ່ໜຶ່ງຫາກໍປະກາດສາທາລະນະແລ້ວ. ຕອນທີ່ຍ່າງເມືອເຮືອນ ພີ່ນ້ອງຍິງເຫັນຜູ້ຍິງຄົນໜຶ່ງທີ່ເບິ່ງຄືໂສກເສົ້າ. ພີ່ນ້ອງຍິງຮູ້ວ່າທູດສະຫວັນສາມາດຊີ້ນຳເຮົາໃຫ້ໄປຫາຄົນທີ່ກຳລັງຊອກຫາຈຸດມຸ່ງໝາຍຂອງຊີວິດ ລາວຈຶ່ງຍ່າງເຂົ້າໄປລົມແລະປອບໃຈຜູ້ຍິງຄົນນັ້ນ. (ເບິ່ງຂໍ້ 8)
9. ເຮົາຈະຮຽນແບບທູດສະຫວັນໄດ້ແນວໃດໃນການສະແດງຄວາມຮັກຕໍ່ຄົນອື່ນ?
9 ເຮົາຈະຮຽນແບບທູດສະຫວັນແນວໃດໃນເລື່ອງການສະແດງຄວາມຮັກຕໍ່ຄົນອື່ນ? ຕອນທີ່ເຮົາໄດ້ຍິນຄຳປະກາດວ່າບາງຄົນຖືກຮັບກັບເຂົ້າມາໃນປະຊາຄົມ ເຮົາກໍດີໃຈຄືກັບທີ່ທູດສະຫວັນດີໃຈ. ເຮົາຢາກຕ້ອນຮັບພີ່ນ້ອງຜູ້ນັ້ນແລະເຮັດໃຫ້ລາວໝັ້ນໃຈວ່າເຮົາຮັກລາວ ແລະເຮົາດີໃຈທີ່ລາວກັບມາຮັບໃຊ້ພະເຢໂຫວາອີກເທື່ອໜຶ່ງ. (ລກ. 15:4-7; 2ກຣ. 2:6-8) ນອກຈາກນັ້ນ ເຮົາຍັງຮຽນແບບທູດສະຫວັນໂດຍເຮັດວຽກປະກາດຢ່າງເຕັມທີ. (ປຍຈ. 11:6) ຄືກັບທີ່ທູດສະຫວັນຊ່ວຍເຮົາຕອນທີ່ເຮົາເຮັດວຽກປະກາດ ເຮົາກໍສາມາດຊອກວິທີຕ່າງໆເພື່ອຊ່ວຍພີ່ນ້ອງໃນການປະກາດ. ຕົວຢ່າງເຊັ່ນ: ເຮົາວາງແຜນໄປປະກາດກັບພີ່ນ້ອງທີ່ຫາກໍເປັນຜູ້ປະກາດໃໝ່ໄດ້ບໍ? ຫຼືເຮົາຈະຊ່ວຍພີ່ນ້ອງທີ່ສູງອາຍຸຫຼືພີ່ນ້ອງທີ່ມີບັນຫາສຸຂະພາບໃຫ້ໄປປະກາດກັບເຮົາໄດ້ບໍ?
10. ເຮົາຮຽນຫຍັງຈາກເລື່ອງຂອງຊາຣາ?
10 ເຮົາຈະເຮັດແນວໃດຖ້າສະພາບການຂອງເຮົາເຮັດໃຫ້ບໍ່ສາມາດຮັບໃຊ້ພະເຢໂຫວາໄດ້ຫຼາຍຄືກັບທີ່ຢາກເຮັດ? ເຮົາສາມາດຊອກວິທີໃໝ່ເພື່ອເຮັດວຽກປະກາດກັບທູດສະຫວັນ. ໃຫ້ເບິ່ງເລື່ອງຂອງຊາຣາbພີ່ນ້ອງຍິງຢູ່ອິນເດຍ. ຫຼັງຈາກເປັນໄພໂອເນຍປະມານ 20 ປີ ລາວກໍເຈັບປ່ວຍໜັກຈົນຕ້ອງນອນຄາຕຽງ. ຍ້ອນແນວນີ້ ລາວຈຶ່ງເສຍໃຈຫຼາຍ. ແຕ່ຊາຣາຄ່ອຍໆມີຄວາມຄິດໃນແງ່ບວກອີກເທື່ອໜຶ່ງຍ້ອນພີ່ນ້ອງຮ່ວມຄວາມເຊື່ອຊ່ວຍລາວ ແລະຍ້ອນລາວອ່ານຄຳພີໄບເບິນເປັນປະຈຳ. ຕອນນີ້ຊາຣາຕ້ອງປ່ຽນວິທີເຮັດວຽກປະກາດ. ລາວບໍ່ສາມາດລຸກຂຶ້ນມານັ່ງຂຽນຈົດໝາຍໄດ້ ລາວຈຶ່ງຕ້ອງປະກາດທາງໂທລະສັບເທົ່ານັ້ນ. ຊາຣາໂທໄປຫາຄົນທີ່ລາວໄປຢາມ ແລະເຂົາເຈົ້າກໍແນະນຳລາວໃຫ້ຕິດຕໍ່ຫາຄົນທີ່ອາດສົນໃຈຢາກຮຽນຄຳພີໄບເບິນ. ຜົນເປັນແນວໃດ? ພາຍໃນສອງສາມເດືອນ ຊາຣາມີນັກສຶກສາຮອດ 70 ຄົນ ແລະລາວບໍ່ສາມາດສຶກສາກັບໝົດທຸກຄົນໄດ້ ລາວຈຶ່ງຂໍໃຫ້ຄົນອື່ນໃນປະຊາຄົມສຶກສາກັບບາງຄົນ. ຕອນນີ້ນັກສຶກສາຂອງລາວຫຼາຍຄົນເຂົ້າຮ່ວມການປະຊຸມ. ທູດສະຫວັນຕ້ອງມີຄວາມສຸກຫຼາຍແທ້ໆທີ່ໄດ້ເຮັດວຽກນຳກັນກັບພີ່ນ້ອງແບບຊາຣາທີ່ພະຍາຍາມເຕັມທີໃນການເຮັດວຽກປະກາດ!
ທູດສະຫວັນສະແດງຄວາມອົດທົນ
11. ທູດສະຫວັນທີ່ສັດຊື່ເປັນຕົວຢ່າງທີ່ດີແນວໃດໃນເລື່ອງຄວາມອົດທົນ?
11 ທູດສະຫວັນທີ່ສັດຊື່ເປັນຕົວຢ່າງທີ່ດີແທ້ໆໃນເລື່ອງຄວາມອົດທົນ. ເຂົາເຈົ້າອົດທົນມາຫຼາຍພັນປີກັບຄວາມບໍ່ຍຸຕິທຳແລະຄວາມຊົ່ວ. ເຂົາເຈົ້າເຫັນຊາຕານແລະທູດສະຫວັນຫຼາຍອົງທີ່ເຄີຍຮັບໃຊ້ນຳກັນບໍ່ເຊື່ອຟັງພະເຢໂຫວາ. (ປຖກ. 3:1; 6:1, 2; ຢດ. 6) ຄຳພີໄບເບິນບອກວ່າ ທູດສະຫວັນທີ່ສັດຊື່ອົງໜຶ່ງເຄີຍຖືກທູດສະຫວັນຊົ່ວທີ່ມີລິດເດດຫຼາຍຂັດຂວາງເປັນເວລາຫຼາຍມື້. (ດນອ. 10:13) ນອກຈາກນັ້ນ ຕັ້ງແຕ່ສະໄໝຂອງອາດາມກັບເອວາ ທູດສະຫວັນໄດ້ເຫັນວ່າມີຄົນຈຳນວນໜ້ອຍເທົ່ານັ້ນທີ່ຍັງນະມັດສະການພະເຢໂຫວາຢ່າງສັດຊື່. ເຖິງວ່າຈະເຈິກັບເລື່ອງເຫຼົ່ານີ້ ທູດສະຫວັນທີ່ສັດຊື່ກໍຍັງຮັບໃຊ້ພະເຢໂຫວາຕໍ່ໄປຢ່າງກະຕືລືລົ້ນແລະຢ່າງມີຄວາມສຸກຍ້ອນເຂົາເຈົ້າຮູ້ວ່າເມື່ອຮອດເວລາທີ່ພະເຢໂຫວາກຳນົດໄວ້ ເພິ່ນຈະກຳຈັດຄວາມບໍ່ຍຸຕິທຳທຸກຢ່າງໃຫ້ໝົດໄປ.
12. ສິ່ງໃດຈະຊ່ວຍເຮົາໃຫ້ອົດທົນໄດ້?
12 ເຮົາຈະຮຽນແບບທູດສະຫວັນແນວໃດໃນເລື່ອງຄວາມອົດທົນ? ຄືກັບທູດສະຫວັນ ເຮົາອາດເຫັນຄວາມບໍ່ຍຸຕິທຳຫຼືເຈິການຕໍ່ຕ້ານ ແຕ່ເຮົາໝັ້ນໃຈໄດ້ວ່າເມື່ອຮອດເວລາທີ່ພະເຢໂຫວາກຳນົດໄວ້ ເພິ່ນຈະກຳຈັດຄວາມຊົ່ວທຸກຢ່າງໃຫ້ໝົດໄປ. ຄືກັບທູດສະຫວັນທີ່ສັດຊື່ ເຮົາຕ້ອງບໍ່ “ເຊົາເຮັດດີ.” (ຄລຕ. 6:9) ພະເຢໂຫວາສັນຍາວ່າຈະຊ່ວຍເຮົາໃຫ້ອົດທົນໄດ້. (1ກຣ. 10:13) ເຮົາສາມາດອະທິດຖານຂໍພະລັງບໍລິສຸດຈາກພະເຢໂຫວາ ເຊິ່ງພະລັງບໍລິສຸດນີ້ຈະຊ່ວຍເຮົາໃຫ້ອົດທົນແລະມີຄວາມຍິນດີ. (ຄລຕ. 5:22; ກລຊ. 1:11) ຖ້າເຈົ້າເຈິການຕໍ່ຕ້ານເດ? ໃຫ້ໄວ້ວາງໃຈພະເຢໂຫວາເຕັມທີແລະບໍ່ຕ້ອງຢ້ານ. ເພິ່ນຈະຊ່ວຍເຈົ້າສະເໝີແລະເຮັດໃຫ້ເຈົ້າເຂັ້ມແຂງ.—ຮຣ. 13:6
ທູດສະຫວັນຊ່ວຍຮັກສາປະຊາຄົມໃຫ້ສະອາດຢູ່ສະເໝີ
13. ໃນສະໄໝສຸດທ້າຍ ທູດສະຫວັນໄດ້ຮັບວຽກມອບໝາຍຫຍັງທີ່ພິເສດ? (ມັດທາຍ 13:47-49)
13 ໃນສະໄໝສຸດທ້າຍນີ້ ພະເຢໂຫວາໄດ້ມອບໝາຍວຽກພິເສດແບບໜຶ່ງໃຫ້ທູດສະຫວັນເຮັດ. (ອ່ານມັດທາຍ 13:47-49) ໃນທຸກມື້ນີ້ມີຫຼາຍລ້ານຄົນຢູ່ທົ່ວໂລກສົນໃຈເລື່ອງຂ່າວດີ ເຊິ່ງໃນຈຳນວນນີ້ມີຫຼາຍຄົນໄດ້ປ່ຽນແປງໂຕເອງເພື່ອໃຊ້ຊີວິດສອດຄ່ອງກັບມາດຕະຖານຂອງພະເຢໂຫວາແລະເຮັດຕາມທີ່ເພິ່ນຕ້ອງການ. ແຕ່ບາງຄົນກໍບໍ່ໄດ້ເຮັດແບບນີ້. ພະເຢໂຫວາໄດ້ມອບໝາຍໃຫ້ທູດສະຫວັນ “ແຍກຄົນຊົ່ວອອກຈາກຄົນດີ” ເຊິ່ງໝາຍຄວາມວ່າເຂົາເຈົ້າໄດ້ຮັບມອບໝາຍໃຫ້ຊ່ວຍຮັກສາປະຊາຄົມໃຫ້ສະອາດຢູ່ສະເໝີ. ແຕ່ນີ້ບໍ່ໄດ້ໝາຍຄວາມວ່າບໍ່ມີຄວາມຫວັງຫຍັງເລີຍສຳລັບຄົນທີ່ເຊົາສຶກສາຫຼືເຊົາເປັນພະຍານພະເຢໂຫວາ ແລະກໍບໍ່ໄດ້ໝາຍຄວາມວ່າຈະບໍ່ມີບັນຫາຫຍັງເລີຍໃນປະຊາຄົມ. ເຮົາໝັ້ນໃຈວ່າທູດສະຫວັນພະຍາຍາມເຕັມທີທີ່ຈະຮັກສາປະຊາຄົມໃຫ້ສະອາດຢູ່ສະເໝີ.
14-15. ເຮົາຈະຮຽນແບບທູດສະຫວັນແນວໃດທີ່ໃຫ້ຄວາມສຳຄັນຕໍ່ການຮັກສາປະຊາຄົມໃຫ້ສະອາດ? (ເບິ່ງຮູບນຳ)
14 ເຮົາຈະຮຽນແບບທູດສະຫວັນແນວໃດທີ່ໃຫ້ຄວາມສຳຄັນຕໍ່ການຮັກສາປະຊາຄົມໃຫ້ສະອາດ? ເຮົາຕ້ອງພະຍາຍາມເຕັມທີທີ່ຈະປົກປ້ອງສາຍສຳພັນທີ່ເຮົາມີກັບພະເຢໂຫວາໃຫ້ເຂັ້ມແຂງຢູ່ສະເໝີ. ເຮົາເຮັດແບບນີ້ໄດ້ໂດຍເລືອກເປັນໝູ່ກັບຄົນທີ່ຮັກພະເຢໂຫວາແລະບໍ່ເຮັດສິ່ງທີ່ທຳລາຍສາຍສຳພັນຂອງເຮົາກັບພະເຢໂຫວາ. ຖ້າເຮົາເຮັດແບບນັ້ນ ເຮົາກໍຈະຊ່ວຍຮັກສາປະຊາຄົມໃຫ້ສະອາດຢູ່ສະເໝີ. (ພສ. 101:3) ນອກຈາກນັ້ນ ເຮົາຍັງສາມາດຊ່ວຍພີ່ນ້ອງຮ່ວມຄວາມເຊື່ອໃຫ້ສັດຊື່ຕໍ່ພະເຢໂຫວາຕໍ່ໆໄປໄດ້. ຕົວຢ່າງເຊັ່ນ: ເຮົາຄວນເຮັດແນວໃດຖ້າຮູ້ວ່າພີ່ນ້ອງຜູ້ໜຶ່ງເຮັດຜິດຮ້າຍແຮງ? ຍ້ອນເຮົາຮັກພີ່ນ້ອງຜູ້ນັ້ນ ເຮົາຈະບອກລາວໃຫ້ໄປລົມກັບຜູ້ເບິ່ງແຍງ. ຖ້າລາວບໍ່ໄປ ເຮົາກໍຕ້ອງໄປບອກຜູ້ເບິ່ງແຍງເອງ. ເຮົາຢາກໃຫ້ພີ່ນ້ອງທີ່ມີຄວາມເຊື່ອອ່ອນແອໄດ້ຮັບຄວາມຊ່ວຍເຫຼືອໄວທີ່ສຸດ!—ຢກບ. 5:14, 15
15 ເຮົາເສຍໃຈທີ່ພີ່ນ້ອງບາງຄົນເຮັດຜິດຮ້າຍແຮງແລະຕ້ອງຖືກຕັດອອກຈາກປະຊາຄົມ. ຖ້າເປັນແບບນັ້ນ ເຮົາຕ້ອງ “ເຊົາຄົບຫາ” ກັບເຂົາເຈົ້າ.c (1ກຣ. 5:9-13) ການເຮັດແບບນີ້ຊ່ວຍຮັກສາປະຊາຄົມໃຫ້ສະອາດ. ການທີ່ເຮົາບໍ່ຄົບຫາກັບເຂົາເຈົ້າ ທີ່ຈິງແລ້ວເຮົາກຳລັງສະແດງຄວາມຮັກຕໍ່ເຂົາເຈົ້າ ເພາະມັນອາດກະຕຸ້ນເຂົາເຈົ້າໃຫ້ຢາກກັບມາຫາພະເຢໂຫວາ. ຖ້າເຂົາເຈົ້າກັບມາຫາພະເຢໂຫວາ ເຮົາກໍຈະດີໃຈຄືກັບທີ່ພະເຢໂຫວາແລະທູດສະຫວັນດີໃຈ.—ລກ. 15:7
ເຮົາຄວນເຮັດແນວໃດຖ້າຮູ້ວ່າພີ່ນ້ອງຄົນໜຶ່ງເຮັດຜິດຮ້າຍແຮງ? (ເບິ່ງຂໍ້ 14)d
16. ເຈົ້າຕັ້ງໃຈທີ່ຈະຮຽນແບບທູດສະຫວັນໃນເລື່ອງໃດແດ່?
16 ເຮົາມີສິດທິພິເສດແທ້ໆທີ່ພະເຢໂຫວາໃຫ້ເຮົາໄດ້ຮຽນຮູ້ກ່ຽວກັບທູດສະຫວັນແລະໄດ້ເຮັດວຽກນຳກັນກັບເຂົາເຈົ້າ! ຂໍໃຫ້ເຮົາຮຽນແບບຄຸນລັກສະນະທີ່ດີຂອງເຂົາເຈົ້າ ເຊັ່ນ: ຄວາມຖ່ອມ ການຮັກຄົນອື່ນ ຄວາມອົດທົນ ແລະການໃຫ້ຄວາມສຳຄັນຕໍ່ການຮັກສາປະຊາຄົມໃຫ້ສະອາດຢູ່ສະເໝີ. ຖ້າເຮົາຮຽນແບບທູດສະຫວັນທີ່ສັດຊື່ ເຮົາກໍຈະໄດ້ເປັນສ່ວນໜຶ່ງໃນຄອບຄົວຂອງພະເຢໂຫວາຕະຫຼອດໄປ.
ເພງທີ 123 ເຊື່ອຟັງກົດລະບຽບຂອງອົງການພະເຈົ້າຢ່າງພັກດີ
a ມີທູດສະຫວັນຫຼາຍຮ້ອຍລ້ານອົງ ແຕ່ໃນຄຳພີໄບເບິນເວົ້າເຖິງຊື່ທູດສະຫວັນແຕ່ 2 ອົງ ນັ້ນແມ່ນມີກາເອນກັບຄັບຣີເອນ.—ດນອ. 12:1; ລກ. 1:19
b ຊື່ສົມມຸດ.
c ຕາມລາຍງານຈາກຄະນະກຳມະການປົກຄອງປີ 2024 ຕອນ 2 ຖ້າຄົນທີ່ຖືກຕັດອອກຈາກປະຊາຄົມມາຮ່ວມການປະຊຸມ ເຮົາສາມາດໃຊ້ໃຈຮູ້ຜິດຮູ້ຖືກຂອງເຮົາຕັດສິນໃຈວ່າຈະທັກທາຍສັ້ນໆແລະຕ້ອນຮັບລາວຫຼືບໍ່.
d ຄຳອະທິບາຍຮູບ: ພີ່ນ້ອງຍິງຄົນໜຶ່ງບອກໝູ່ຂອງລາວວ່າຕ້ອງໄປບອກຜູ້ເບິ່ງແຍງກ່ຽວກັບຄວາມຜິດທີ່ລາວໄດ້ເຮັດ ແຕ່ໝູ່ຂອງລາວບໍ່ໄປ. ພີ່ນ້ອງຍິງຄົນນີ້ຈຶ່ງໄປບອກຜູ້ເບິ່ງແຍງເອງ.