ເລື່ອງຊີວິດຈິງ
ຂ້ອຍໄດ້ຮັບປະໂຫຍດຈາກການຄົບຫາກັບຄົນມີປັນຍາ
ຂ້ອຍຈື່ໄດ້ ເມື່ອຫຼາຍປີມາແລ້ວ ເຊົ້າມື້ໜຶ່ງອາກາດໜາວຢູ່ເມືອງບຣຸກຄິງ ລັດເຊົາດາໂກຕາ ປະເທດອາເມຣິກາ. ຂ້ອຍຮູ້ສຶກເລີຍວ່າອີກບໍ່ດົນອາກາດຈະໜາວເຢັນປານນ້ຳກ້ອນ. ຂ້ອຍກັບຄົນຈຳນວນໜຶ່ງຢູ່ໃນຕູບທີ່ບໍ່ມີເຄື່ອງເຮັດຄວາມຮ້ອນ ແລະພວກເຮົາທຸກຄົນພາກັນໜາວສັ່ນ. ເຮົາຢືນຢູ່ໃກ້ໆອ່າງນ້ຳໃຫຍ່ແລະນ້ຳກໍເຢັນ! ຂ້ອຍຂໍເລົ່າໜ້ອຍໜຶ່ງກ່ຽວກັບຊີວິດຂອງຂ້ອຍເພື່ອເຈົ້າຈະເຂົ້າໃຈວ່າເປັນຫຍັງພວກເຮົາຈຶ່ງໄປຢູ່ຫັ້ນ.
ຄອບຄົວຂອງຂ້ອຍ
ລຸງອັນເຟດກັບພໍ່ຂອງຂ້ອຍ
ຂ້ອຍເກີດວັນທີ 7 ມີນາ 1936. ພໍ່ແມ່ຂ້ອຍມີລູກສີ່ຄົນ ແລະຂ້ອຍເປັນລູກຫຼ້າ. ເຮົາອາໄສຢູ່ຟາມນ້ອຍໆໃນພາກຕາເວັນອອກຂອງລັດເຊົາດາໂກຕາ. ການເຮັດສວນເປັນສິ່ງສຳຄັນໃນຊີວິດຄອບຄົວຂອງເຮົາ ແຕ່ກໍບໍ່ແມ່ນສິ່ງສຳຄັນທີ່ສຸດ. ພໍ່ແມ່ຂ້ອຍຮັບບັບເຕມາເປັນພະຍານພະເຢໂຫວາໃນປີ 1934. ເນື່ອງຈາກພໍ່ແມ່ໄດ້ອຸທິດຊີວິດໃຫ້ພະເຢໂຫວາ ດັ່ງນັ້ນ ການເຮັດຕາມຈຸດປະສົງຂອງພະອົງຈຶ່ງເປັນສິ່ງສຳຄັນທີ່ສຸດສຳລັບພວກເພິ່ນ. ພໍ່ຂ້ອຍຊື່ຄລາເຣນ ເພິ່ນເຮັດໜ້າທີ່ເປັນຜູ້ຮັບໃຊ້ປະຊາຄົມ (ປັດຈຸບັນເອີ້ນວ່າຜູ້ປະສານງານຄະນະຜູ້ເຖົ້າແກ່) ໃນປະຊາຄົມນ້ອຍໆຂອງເຮົາທີ່ຢູ່ເມືອງຄອນ ລັດເຊົາດາໂກຕາ ແລະຕໍ່ມາລຸງອັນເຟດໄດ້ເຮັດໜ້າທີ່ນີ້.
ຄອບຄົວເຮົາໄປປະຊຸມແລະໄປຕາມບ້ານເຮືອນເປັນປະຈຳເພື່ອບອກຄົນອື່ນເລື່ອງຄວາມຫວັງທີ່ດີເລີດໃນອະນາຄົດເຊິ່ງຂຽນໄວ້ໃນຄຳໄບເບິນ. ຕົວຢ່າງຂອງພໍ່ແມ່ແລະການຝຶກສອນຂອງພວກເພິ່ນຊ່ວຍເຮົາໃຫ້ຮັກພະເຢໂຫວາ. ຂ້ອຍແລະເອື້ອຍໂດໂຣທີເປັນຜູ້ປະກາດຕອນພວກເຮົາອາຍຸ 6 ປີ. ໃນປີ 1943 ຂ້ອຍສະໝັກເຂົ້າໂຮງຮຽນການຮັບໃຊ້ຕາມລະບອບຂອງພະເຈົ້າ ເຊິ່ງໂຮງຮຽນນີ້ຫາກໍຕັ້ງຂຶ້ນໃໝ່ໆ.
ເປັນໄພໂອເນຍໃນປີ 1952
ການປະຊຸມພາກແລະການປະຊຸມໝວດເປັນສິ່ງສຳຄັນໃນຊີວິດຂອງຄອບຄົວເຮົາ. ຂ້ອຍຈື່ການປະຊຸມພາກໃນປີ 1949 ຢູ່ເມືອງຊູຟລໍ ລັດເຊົາດາໂກຕາ ພີ່ນ້ອງແກຣນ ຊູເຕີ ບັນລະຍາຍໃນຫົວຂໍ້ “ຊ້າເກີນກວ່າທີ່ເຈົ້າຄິດ!” ລາວເນັ້ນວ່າຄລິດສະຕຽນທຸກຄົນທີ່ອຸທິດຕົວແລ້ວຕ້ອງໃຊ້ຊີວິດເພື່ອປະກາດຂ່າວດີເລື່ອງລາຊະອານາຈັກຂອງພະເຈົ້າ. ຫຼັງຈາກນັ້ນ ຂ້ອຍກໍອຸທິດຊີວິດໃຫ້ພະເຢໂຫວາ ແລະຮັບບັບເຕມາໃນການປະຊຸມໝວດຄັ້ງຕໍ່ໄປຢູ່ເມືອງບຣຸກຄິງໃນວັນທີ 12 ພະຈິກ 1949. ນີ້ເປັນເຫດຜົນທີ່ຂ້ອຍຢູ່ໃນຕູບນັ້ນທີ່ໜາວເຢັນຫຼາຍ ດັ່ງທີ່ເລົ່າໃນຕອນຕົ້ນ. ພວກເຮົາສີ່ຄົນຖ້າຮັບບັບເຕມາໃນອ່າງໃຫຍ່ທີ່ເຮັດຈາກເຫຼັກ.
ຕໍ່ມາຂ້ອຍຕັດສິນໃຈວ່າຢາກເປັນໄພໂອເນຍ ແລະຂ້ອຍເລີ່ມເຮັດວຽກນີ້ໃນວັນທີ 1 ມັງກອນ 1952 ຕອນອາຍຸ 15 ປີ. ຄຳພີໄບເບິນບອກວ່າ: ‘ຜູ້ທີ່ທຽວໄປນຳພວກຄົນມີປັນຍາກໍເລີຍເປັນຄົນມີປັນຍາດ້ວຍ’ ແລະຫຼາຍຄົນໃນຄອບຄົວຂອງຂ້ອຍທີ່ເປັນຄົນມີປັນຍາໄດ້ສະໜັບສະໜູນທີ່ຂ້ອຍຕັດສິນໃຈເປັນໄພໂອເນຍ. (ສຸພາສິດ 13:20) ຂ້ອຍໄປປະກາດກັບລຸງຈູລຽດເລື້ອຍໆເຊິ່ງເພິ່ນອາຍຸ 60 ປີແລ້ວ. ເຖິງວ່າເພິ່ນອາຍຸຫຼາຍກວ່າຂ້ອຍ ແຕ່ເຮົາກໍມ່ວນໃນການປະກາດນຳກັນ. ຂ້ອຍຮຽນຮູ້ຫຼາຍຢ່າງຈາກເພິ່ນແລະຈາກປະສົບການຊີວິດຂອງເພິ່ນ. ບໍ່ດົນເອື້ອຍໂດໂຣທີກໍເປັນໄພໂອເນຍຄືກັນ.
ຜູ້ດູແລໝວດຊ່ວຍຂ້ອຍ
ຕອນຂ້ອຍຍັງນ້ອຍ ພໍ່ແມ່ໄດ້ເຊີນຜູ້ດູແລໝວດກັບເມຍໃຫ້ພັກນຳພວກເຮົາ. ພີ່ນ້ອງເຈສຊີແລະລິນ ຄານເວວເປັນຜົວເມຍຄູ່ໜຶ່ງທີ່ຊ່ວຍຂ້ອຍຫຼາຍ. ເຂົາເຈົ້າສົນໃຈແລະໃຫ້ກຳລັງໃຈຂ້ອຍ. ເມື່ອຮັບໃຊ້ໃນປະຊາຄົມທີ່ຢູ່ໃກ້ໆ ບາງເທື່ອເຂົາເຈົ້າກໍຊວນຂ້ອຍໄປປະກາດນຳກັນ. ຂ້ອຍມີຄວາມສຸກແທ້ໆທີ່ໃຊ້ເວລາກັບເຂົາເຈົ້າ! ຂ້ອຍຢາກເຮັດວຽກຫຼາຍຢ່າງຂອງພະເຢໂຫວາຄືກັບເຂົາເຈົ້າແລະທັງເປັນໄພໂອເນຍ.
ພີ່ນ້ອງບັດ ມິວເລີ ເປັນຜູ້ດູແລໝວດຄົນຕໍ່ໄປ. ຂ້ອຍອາຍຸໄດ້ 18 ປີ ເມື່ອພີ່ນ້ອງບັດແລະໂຈແອນເມຍຂອງເພິ່ນມາຮັບໃຊ້ໃນປະຊາຄົມຂອງເຮົາ. ຕອນນັ້ນຂ້ອຍຕ້ອງໄປລາຍງານຕົວກັບເຈົ້າໜ້າທີ່ເກນທະຫານ ເຊິ່ງແມ່ນຄະນະກຳມະການໜຶ່ງທີ່ຕັດສິນວ່າໃຜຕ້ອງໄປເປັນທະຫານ. ເຂົາເຈົ້າຢາກໃຫ້ຂ້ອຍເຮັດວຽກບາງຢ່າງທີ່ຂ້ອຍຮູ້ສຶກວ່າຂັດກັບຄຳສັ່ງຂອງພະເຍຊູກ່ຽວກັບເລື່ອງຄວາມເປັນກາງທາງການເມືອງ. ແຕ່ຍ້ອນວ່າຂ້ອຍຢາກປະກາດຂ່າວດີເລື່ອງລາຊະອານາຈັກຂອງພະເຈົ້າ. (ໂຢຮັນ 15:19) ດັ່ງນັ້ນ ຂ້ອຍຈຶ່ງຂໍໃຫ້ເຂົາເຈົ້າພິຈາລະນາວ່າຂ້ອຍເປັນຜູ້ເຜີຍແຜ່ສາສະໜາ.
ຂ້ອຍດີໃຈຫຼາຍເມື່ອພີ່ນ້ອງບັດບອກວ່າຈະໄປປະຊຸມກັບຄະນະກຳມະການນັ້ນກັບຂ້ອຍ. ເພິ່ນບໍ່ແມ່ນຄົນຂີ້ອາຍ ແລະຄົນກໍບໍ່ໄດ້ຢ້ານເພິ່ນ. ພີ່ນ້ອງບັດຍັງຮູ້ຈັກພະຄຳພີເປັນຢ່າງດີ. ການທີ່ເພິ່ນຢູ່ນຳເຮັດໃຫ້ຂ້ອຍກ້າຫານຫຼາຍຂຶ້ນ! ໃນທ້າຍລະດູຮ້ອນຂອງປີ 1954 ຜົນຈາກການປະຊຸມຄັ້ງນັ້ນກໍຄື ຄະນະກຳມະການຍອມຮັບຄຳຂໍຮ້ອງຂອງຂ້ອຍ. ຕອນນີ້ຂ້ອຍມີອິດສະຫຼະຫຼາຍຂຶ້ນເພື່ອຮັບໃຊ້ພະເຢໂຫວາ.
ຮູບກັບລົດຢູ່ຟາມ ຕອນເປັນສະມາຊິກຄອບຄົວເບເທນໃໝ່ໆ
ບໍ່ດົນຫຼັງຈາກນັ້ນ ຂ້ອຍກໍຖືກເຊີນໃຫ້ໄປຮັບໃຊ້ຢູ່ເບເທນ ເຊິ່ງຕອນນັ້ນເອີ້ນວ່າວັອດທາວເວີ ຟາມ ໃນເກາະສະເຕັດເຕນ ລັດນິວຢອກ. ຂ້ອຍຮັບໃຊ້ຢູ່ຫັ້ນປະມານສາມປີ. ຂ້ອຍໄດ້ປະສົບການທີ່ດີຫຼາຍຍ້ອນພົບກັບພີ່ນ້ອງຊາຍຍິງຫຼາຍຄົນທີ່ມີປັນຍາແລະໄດ້ເຮັດວຽກນຳເຂົາເຈົ້າ.
ຮັບໃຊ້ໃນເບເທນ
ພີ່ນ້ອງແຮຣີ ປີເຕີສັນກະຕືລືລົ້ນໃນວຽກປະກາດ
ຟາມຢູ່ເກາະສະເຕັດເຕນຍັງມີສະຖານີວິທະຍຸດັບເບິນຢູບີບີອຣາ (WBBR) ເຊິ່ງພະຍານພະເຢໂຫວາເປັນຜູ້ດຳເນີນລາຍການຈາກປີ 1924 ເຖິງປີ 1957. ມີສະມາຊິກຄອບຄົວເບເທນພຽງ 15 ຫາ 20 ຄົນເທົ່ານັ້ນທີ່ຖືກມອບໝາຍໃຫ້ຢູ່ຟາມ ແລະພວກເຮົາສ່ວນຫຼາຍຍັງໜຸ່ມແລະບໍ່ມີປະສົບການຫຼາຍ. ແຕ່ພີ່ນ້ອງສູງອາຍຸທີ່ຊື່ເອວດອນ ວູດເວີດ ເຊິ່ງເປັນຜູ້ຖືກເຈີມໄດ້ເຮັດວຽກກັບເຮົາ. ເພິ່ນເປັນຄືກັບພໍ່ຂອງເຮົາ ແລະໄດ້ສອນເຮົາຫຼາຍສິ່ງ. ບາງເທື່ອເມື່ອມີບັນຫາລະຫວ່າງພວກເຮົາ ພີ່ນ້ອງເອວດອນຈະເວົ້າວ່າ: “ມັນບໍ່ໜ້າເຊື່ອເລີຍທີ່ວຽກຂອງພະເຈົ້າຈະສຳເລັດໄດ້ຖ້າເບິ່ງຈາກຄົນທີ່ພະອົງໃຊ້ໃຫ້ເຮັດວຽກ.”
ຮູບກັບພີ່ນ້ອງເຟເດີຣິກຢູ່ດັບເບິນຢູບີບີອຣາ
ພີ່ນ້ອງເຟເດີຣິກ ດັບເບິນຢູ. ແຝນ ກໍຢູ່ກັບເຮົາເຊັ່ນກັນແລະໄດ້ຊ່ວຍເຮົາທຸກຄົນ. ເພິ່ນເປັນຄົນສະຫຼາດແລະຮູ້ຈັກຄຳພີໄບເບິນດີຫຼາຍ. ເພິ່ນສົນໃຈເຮົາແຕ່ລະຄົນ. ພໍ່ຄົວຂອງເຮົາແມ່ນພີ່ນ້ອງແຮຣີ ປີເຕີສັນ ເຮົາເອີ້ນລາວໂດຍໃຊ້ນາມສະກຸນເຊິ່ງງ່າຍກວ່າ ເພາະຊື່ແທ້ຂອງລາວແມ່ນປາປາຈີໂຣປູລອດສ. ພີ່ນ້ອງແຮຣີກໍເປັນຜູ້ຖືກເຈີມຄືກັນ ແລະລາວຮັກວຽກປະກາດ. ລາວເຮັດວຽກຢູ່ເບເທນໄດ້ດີແຕ່ກໍບໍ່ເຄີຍປ່ອຍປະລະເລີຍວຽກປະກາດ. ໃນແຕ່ລະເດືອນລາວແຈກຢາຍວາລະສານໄດ້ຫຼາຍຮ້ອຍສະບັບ. ລາວຍັງຮູ້ຈັກຄຳພີໄບເບິນດີແລະຊ່ວຍຕອບຄຳຖາມຂອງເຮົາຫຼາຍຂໍ້.
ຮຽນຮູ້ຈາກພີ່ນ້ອງຍິງທີ່ສະຫຼາດ
ໃນຟາມ ເຮົາກຽມຜັກແລະໝາກໄມ້ ແລ້ວກໍເອົາໃສ່ໃນກະປ໋ອງ. ເຮົາເຮັດຜັກແລະໝາກໄມ້ປະມານ 45.000 ກະປ໋ອງຕໍ່ປີສຳລັບຄອບຄົວເບເທນ. ຂ້ອຍເຮັດວຽກກັບພີ່ນ້ອງເອັດຕາ ຮູດ ເຊິ່ງເປັນພີ່ນ້ອງຍິງທີ່ສະຫຼາດຫຼາຍ. ລາວຄິດຄົ້ນສູດເພື່ອໃຊ້ໃນການກຽມຜັກແລະໝາກໄມ້. ພີ່ນ້ອງຍິງໃນທ້ອງຖິ່ນມາຊ່ວຍວຽກພວກເຮົາ ແລະພີ່ນ້ອງເອັດຕາຈະເປັນຄົນຈັດວຽກໃຫ້ເຂົາເຈົ້າ. ເຖິງວ່າພີ່ນ້ອງເອັດຕາຮູ້ດີກ່ຽວກັບຂະບວນການອັດກະປ໋ອງ ແຕ່ລາວກໍສະແດງຄວາມນັບຖືສະເໝີຕໍ່ພີ່ນ້ອງຊາຍທີ່ເບິ່ງແຍງຟາມ. ລາວວາງຕົວຢ່າງທີ່ດີສຳລັບເຮົາທຸກຄົນ.
ຮູບກັບແອງເຈລາແລະ ພີ່ນ້ອງເອັດຕາ ຮູດ
ແອງເຈລາ ໂຣມາໂນ ເປັນພີ່ນ້ອງຍິງໜຸ່ມທີ່ມາຊ່ວຍວຽກໃນຟາມ. ພີ່ນ້ອງເອັດຕາຊ່ວຍລາວໃຫ້ເຂົ້າມາໃນຄວາມຈິງ. ແອງເຈລາແລະຂ້ອຍແຕ່ງດອງກັນໃນເດືອນເມສາ 1958 ແລະເຮົາມີຄວາມສຸກໃນການຮັບໃຊ້ພະເຢໂຫວາຮ່ວມກັນເປັນເວລາ 58 ປີ. ຕະຫຼອດຫຼາຍປີທີ່ຜ່ານມາ ຄວາມຊື່ສັດທີ່ແອງເຈລາມີຕໍ່ພະເຢໂຫວາໄດ້ເຮັດໃຫ້ຊີວິດຄູ່ຂອງເຮົາໝັ້ນຄົງ. ລາວເປັນຄົນສະຫຼາດແລະຂ້ອຍສາມາດໄວ້ວາງໃຈລາວໄດ້ຢ່າງແທ້ຈິງ ບໍ່ວ່າເຮົາຈະມີບັນຫາຫຍຸ້ງຍາກສ່ຳໃດກໍຕາມ.
ວຽກມິດຊັນນາລີແລະວຽກດູແລໝວດ
ເມື່ອພີ່ນ້ອງຂາຍອຸປະກອນຕ່າງໆຂອງສະຖານີວິທະຍຸດັບເບິນຢູບີບີອຣາຢູ່ເກາະສະເຕັດເຕນໃນປີ 1957 ຂ້ອຍໄດ້ໄປຮັບໃຊ້ຢູ່ເບເທນບຣຸກລິນໄລຍະໜຶ່ງ. ຈາກນັ້ນຂ້ອຍກັບແອງເຈລາກໍແຕ່ງດອງກັນ ດັ່ງນັ້ນ ຂ້ອຍຈຶ່ງອອກຈາກເບເທນ. ເຮົາເປັນໄພໂອເນຍຢູ່ເກາະສະເຕັດເຕນສາມປີ. ບາງຄັ້ງ ຂ້ອຍກໍເຮັດວຽກໃຫ້ເຈົ້າຂອງໃໝ່ຂອງສະຖານີວິທະຍຸ ເຊິ່ງມີຊື່ວ່າດັບເບິນຢູພີໂອດັບເບິນຢູ (WPOW).
ຂ້ອຍກັບແອງເຈລາໃຊ້ຊີວິດແບບຮຽບງ່າຍຕໍ່ໄປເພື່ອເຮົາຈະມີອິດສະຫຼະແລະຮັບໃຊ້ໃນບ່ອນທີ່ມີຄວາມຈຳເປັນ. ຍ້ອນແນວນັ້ນ ໃນປີ 1961 ເຮົາຈຶ່ງຕອບຮັບຄຳເຊີນທີ່ໃຫ້ຮັບໃຊ້ເປັນໄພໂອເນຍພິເສດໃນເມືອງຟໍສ ລັດເນເບຣດສະກາ. ແຕ່ຫຼັງຈາກໄປຮອດຫັ້ນໄດ້ບໍ່ດົນ ເຮົາກໍຖືກເຊີນໄປເມືອງເຊົາແລນຊິງ ໃນລັດນິວຢອກເພື່ອເຂົ້າໂຮງຮຽນພະລາຊະກິດເປັນເວລາໜຶ່ງເດືອນ. ເຮົາມ່ວນກັບການຝຶກອົບຮົມນັ້ນ ແລະກໍຄິດວ່າຫຼັງຈາກຈົບແລ້ວເຮົາຈະກັບໄປລັດເນເບຣດສະກາ. ເຮົາຕື່ນເຕັ້ນຫຼາຍເມື່ອໄດ້ວຽກມອບໝາຍໃໝ່. ເຮົາກຳລັງຈະໄປຮັບໃຊ້ເປັນມິດຊັນນາລີຢູ່ກຳປູເຈຍ! ໃນປະເທດທີ່ງົດງາມນີ້ເຊິ່ງຕັ້ງຢູ່ເຂດອາຊີຕາເວັນອອກສຽງໃຕ້ ເຮົາໄດ້ເຫັນ ໄດ້ຍິນ ແລະໄດ້ລອງຊີມສິ່ງຕ່າງໆທີ່ໃໝ່ສຳລັບເຮົາ. ເຮົາຢາກບອກຜູ້ຄົນໃນປະເທດນັ້ນກ່ຽວກັບຂ່າວດີເລື່ອງລາຊະອານາຈັກ.
ຮູບກັບແອງເຈລາໃນປີ 1975 ກ່ອນສຳພາດທາງໂທລະທັດ
ແຕ່ໃນຕອນນັ້ນສະພາບທາງການເມືອງຢູ່ກຳປູເຈຍໄດ້ປ່ຽນໄປ ແລະເຮົາຕ້ອງໄປພາກໃຕ້ຂອງຫວຽດນາມ. ຫຼັງຈາກສອງປີຜ່ານໄປຂ້ອຍກໍເຈັບປ່ວຍໜັກ ແລະໜ້າເສົ້າທີ່ເຮົາຕ້ອງກັບໄປອາເມຣິກາ. ຂ້ອຍຕ້ອງໃຊ້ເວລາໄລຍະໜຶ່ງເພື່ອພັກຟື້ນ ແລະເມື່ອດີຂຶ້ນແລ້ວ ເຮົາກໍເລີ່ມວຽກໄພໂອເນຍອີກຄັ້ງໜຶ່ງ.
ໃນເດືອນມີນາ 1965 ເຮົາເລີ່ມຮັບໃຊ້ປະຊາຄົມຕ່າງໆໃນວຽກດູແລໝວດ. ເປັນເວລາ 33 ປີທີ່ຂ້ອຍກັບແອງເຈລາມີຄວາມສຸກກັບວຽກດູແລໝວດແລະການຊ່ວຍວຽກຢູ່ປະຊຸມພາກ. ຂ້ອຍມ່ວນກັບວຽກນີ້ ເພາະການປະຊຸມພາກເປັນເວລາທີ່ໜ້າຕື່ນເຕັ້ນສະເໝີສຳລັບຂ້ອຍ. ເປັນເວລາຫຼາຍປີທີ່ເຮົາໄດ້ຢ້ຽມຢາມປະຊາຄົມຕ່າງໆຢູ່ໃນເມືອງນິວຢອກແລະທີ່ຢູ່ອ້ອມແອ້ມເມືອງນີ້ ແລະຫຼາຍຄັ້ງກໍໄດ້ຈັດການປະຊຸມພາກຢູ່ສະໜາມກິລາແຢງກີ້.
ກັບໄປເບເທນແລະໂຮງຮຽນເພື່ອການຮັບໃຊ້ຕາມລະບອບການຂອງພະເຈົ້າ
ຫຼາຍປີທີ່ຜ່ານມາ ມີຫຼາຍຄັ້ງທີ່ຂ້ອຍແລະແອງເຈລາໄດ້ຮັບວຽກມອບໝາຍໃໝ່ແລະວຽກມອບໝາຍທີ່ຍາກ. ໃນປີ 1995 ຂ້ອຍຖືກຂໍໃຫ້ສອນໃນໂຮງຮຽນຝຶກອົບຮົມເພື່ອວຽກຮັບໃຊ້. ສາມປີຕໍ່ມາ ເຮົາຖືກເຊີນໃຫ້ເຂົ້າເບເທນ. ຫຼັງຈາກ 40 ປີຜ່ານໄປ ຂ້ອຍດີໃຈທີ່ໄດ້ກັບມາເບເທນອີກ ເຊິ່ງເປັນບ່ອນທີ່ຂ້ອຍເລີ່ມຮັບໃຊ້ແບບເຕັມເວລາປະເພດພິເສດ. ບາງຄັ້ງ ຂ້ອຍເຮັດວຽກໃນພະແນກການຮັບໃຊ້ແລະເປັນອາຈານສອນໃນໂຮງຮຽນຕ່າງໆຂອງອົງການ. ໃນປີ 2007 ຄະນະກຳມະການປົກຄອງໄດ້ຕັ້ງພະແນກໂຮງຮຽນຕາມລະບອບຂອງພະເຈົ້າເພື່ອເບິ່ງແຍງທຸກໆໂຮງຮຽນທີ່ສອນໃນເບເທນ ແລະເປັນເວລາຫຼາຍປີທີ່ຂ້ອຍເຮັດວຽກເປັນຜູ້ດູແລ.
ໃນບໍ່ເທົ່າໃດປີມານີ້ ມີການປ່ຽນແປງຫຼາຍຢ່າງໃນໂຮງຮຽນຕ່າງໆຢູ່ເບເທນ. ໂຮງຮຽນສຳລັບຜູ້ເຖົ້າແກ່ໃນປະຊາຄົມເລີ່ມຕັ້ງຂຶ້ນໃນປີ 2008 ແລະໄລຍະສອງປີຕໍ່ຈາກນັ້ນມີຜູ້ເຖົ້າແກ່ຫຼາຍກວ່າ 12.000 ຄົນໄດ້ຮັບການສອນໃນເບເທນຢູ່ແພັດເທີສັນແລະບຣຸກລິນ. ໃນຕອນນີ້ໂຮງຮຽນນີ້ຍັງຈັດຂຶ້ນຢູ່ບ່ອນອື່ນນຳອີກ. ໃນປີ 2010 ໂຮງຮຽນຝຶກອົບຮົມເພື່ອວຽກຮັບໃຊ້ໄດ້ປ່ຽນຊື່ເປັນໂຮງຮຽນພະຄຳພີສຳລັບຊາຍໂສດ ແລະມີການຕັ້ງໂຮງຮຽນໃໝ່ຂຶ້ນທີ່ຊື່ວ່າໂຮງຮຽນພະຄຳພີສຳລັບຄູ່ສົມລົດ.
ໃນເດືອນກັນຍາ 2014 ທັງສອງໂຮງຮຽນນີ້ຖືກລວມເຂົ້າກັນເປັນໂຮງຮຽນຜູ້ປະກາດລາຊະອານາຈັກ. ນັກຮຽນໃນໂຮງຮຽນນີ້ອາດຈະເປັນຄູ່ສົມລົດ ຊາຍໂສດ ຫຼືຍິງໂສດ. ພີ່ນ້ອງຫຼາຍຄົນຢູ່ທົ່ວໂລກຕື່ນເຕັ້ນທີ່ໄດ້ຍິນວ່າຈະມີໂຮງຮຽນນີ້ໃນປະເທດຂອງເຂົາເຈົ້າເຊັ່ນກັນ. ເປັນເລື່ອງໜ້າຕື່ນເຕັ້ນທີ່ເຫັນວ່າຫຼາຍຄົນຈະມີໂອກາດຫຼາຍຂຶ້ນເພື່ອເຂົ້າຮ່ວມໃນໂຮງຮຽນເຫຼົ່ານີ້. ຂ້ອຍດີໃຈຫຼາຍທີ່ໄດ້ພົບກັບຫຼາຍຄົນເຊິ່ງໄດ້ປ່ຽນແປງຊີວິດເພື່ອຈະສາມາດໄດ້ຮັບການຝຶກອົບຮົມນີ້.
ເມື່ອຄິດເຖິງຊີວິດຂອງຂ້ອຍກ່ອນຮັບບັບເຕມາໃນຕູບທີ່ໜາວເຢັນນັ້ນຈົນເຖິງຕອນນີ້ ຂ້ອຍຂອບໃຈພະເຢໂຫວາທີ່ໃຫ້ຂ້ອຍໄດ້ພົບກັບຄົນທີ່ມີປັນຍາ. ເຂົາເຈົ້າຊ່ວຍຂ້ອຍໃຫ້ຮູ້ຈັກແລະຮັບໃຊ້ພະເຢໂຫວາໄດ້ດີຂຶ້ນ. ບາງຄົນໜຸ່ມກວ່າຂ້ອຍແລະບາງຄົນແກ່ກວ່າຂ້ອຍ. ນອກຈາກນັ້ນ ຫຼາຍຄົນມາຈາກວັດທະນະທຳທີ່ຕ່າງຈາກຂ້ອຍ ແຕ່ຈາກການກະທຳແລະທັດສະນະຂອງເຂົາເຈົ້າ ຂ້ອຍເຫັນໄດ້ວ່າຄົນເຫຼົ່ານີ້ຮັກພະເຢໂຫວາຢ່າງແທ້ຈິງ. ຂ້ອຍຂອບໃຈຫຼາຍທີ່ມີໝູ່ຫຼາຍຄົນໃນທ່າມກາງປະຊາຊົນຂອງພະເຢໂຫວາແລະເຂົາເຈົ້າກໍເປັນຄົນມີປັນຍາ ເຊິ່ງຂ້ອຍສາມາດຮຽນຮູ້ຈາກເຂົາເຈົ້າ.
ຂ້ອຍມີຄວາມສຸກກັບການພົບນັກຮຽນຈາກທົ່ວໂລກ