ເຮົາເກີດມາເຮັດຫຍັງ?
ຄຳຕອບຈາກຄຳພີໄບເບິນ
ເຮົາອາດຖາມຄຳຖາມກ່ຽວກັບຄວາມໝາຍຂອງຊີວິດໃນວິທີຕ່າງໆເຊັ່ນ ບາງຄົນອາດຖາມວ່າ ຂ້ອຍເກີດມາເຮັດຫຍັງ? ຫຼືຊີວິດຂ້ອຍມີຈຸດມຸ່ງໝາຍບໍ? ຄຳພີໄບເບິນບອກວ່າຈຸດມຸ່ງໝາຍໃນຊີວິດຄື ການເປັນໝູ່ກັບພະເຈົ້າ. ຂໍພິຈາລະນາຄວາມຈິງພື້ນຖານຕໍ່ໄປນີ້ໃນຄຳພີໄບເບິນ.
ພະເຈົ້າເປັນຜູ້ສ້າງ. ຄຳພີໄບເບິນບອກວ່າ: “ພະເຈົ້າຄືພະອົງເອງທີ່ໄດ້ສ້າງເຮົາທັງຫຼາຍ ເຮົາບໍ່ໄດ້ສ້າງຕົວເອງຂຶ້ນມາ.”—ຄຳເພງ 100:3, ສະບັບຄິງເຈມສ໌; ພະນິມິດ 4:11
ທຸກສິ່ງທີ່ພະເຈົ້າສ້າງມີຈຸດມຸ່ງໝາຍ ເຊິ່ງລວມທັງຄົນເຮົານຳ.—ເອຊາຢາ 45:18
ພະເຈົ້າສ້າງເຮົາໃຫ້ຮູ້ສຶກວ່າ “ຈຳເປັນຕ້ອງເພິ່ງພະເຈົ້າ” ເຊິ່ງກໍລວມເຖິງການຢາກຮູ້ຄວາມໝາຍຂອງຊີວິດ. (ມັດທາຍ 5:3) ແລະພະເຈົ້າຍັງຢາກໃຫ້ເຮົາຕອບສະໜອງຄວາມຢາກຮູ້ນັ້ນ.—ຄຳເພງ 145:16
ເຮົາຈະ “ເພິ່ງພະເຈົ້າ” ໄດ້ໂດຍການເປັນໝູ່ກັບພະເຈົ້າ. ສຳລັບບາງຄົນ ການເປັນໝູ່ກັບພະເຈົ້າອາດເບິ່ງຄືວ່າເປັນເລື່ອງເຫຼືອເຊື່ອຫຼືເປັນໄປບໍ່ໄດ້ ແຕ່ຄຳພີໄບເບິນໃຫ້ກຳລັງໃຈເຮົາວ່າ: “ໃຫ້ເຂົ້າໄປໃກ້ຊິດກັບພະເຈົ້າ ແລ້ວພະອົງຈະເຂົ້າມາໃກ້ຊິດກັບພວກເຈົ້າ.”—ຢາໂກໂບ 4:8; 2:23
ເພື່ອຈະເປັນໝູ່ກັບພະເຈົ້າໄດ້ ເຮົາຕ້ອງໃຊ້ຊີວິດໃຫ້ສອດຄ່ອງກັບຄວາມຕ້ອງການຂອງເພິ່ນ. ແລ້ວຄວາມຕ້ອງການຂອງເພິ່ນແມ່ນຫຍັງ? ຜູ້ເທສະໜາປ່າວປະກາດ 12:13 ບອກວ່າ: “ໃຫ້ຢ້ານຢຳພະເຈົ້າທ່ຽງແທ້ແລະເຮັດຕາມຄຳສັ່ງຂອງເພິ່ນ ຍ້ອນນີ້ແມ່ນໜ້າທີ່ທັງໝົດຂອງມະນຸດ.”—ສະບັບແປໂລກໃໝ່
ໃນອະນາຄົດ ເມື່ອພະເຈົ້າກຳຈັດຄວາມທຸກໃຫ້ໝົດໄປແລະໃຫ້ຊີວິດຕະຫຼອດໄປກັບໝູ່ຂອງເພິ່ນເຊິ່ງກໍຄືຄົນທີ່ນະມັດສະການເພິ່ນ ໃນຕອນນັ້ນ ເຮົາຈະໄດ້ຊື່ນຊົມກັບຄວາມຕ້ອງການຂອງພະເຈົ້າທີ່ມີຕັ້ງແຕ່ທຳອິດຢ່າງເຕັມທີ.—ຄຳເພງ 37:10, 11