ຂ່າວຄາວສະບັບທີສອງ
23 ໃນປີທີ 7* ປະໂລຫິດເຢໂຮຢາດາໄດ້ສະແດງຄວາມກ້າຫານແລະເຮັດສັນຍາກັບພວກຫົວໜ້າກອງຮ້ອຍບາງຄົນ.+ ພວກຫົວໜ້າເຫຼົ່ານັ້ນມີ: ອາຊາຣີຢາລູກຊາຍຂອງເຢໂຣຮາມ ອິດຊະມາເອນລູກຊາຍຂອງເຢໂຮຮານັນ ອາຊາຣີຢາລູກຊາຍຂອງໂອເບັດ ມາອາເສຢາລູກຊາຍຂອງອາດາຢາ ແລະເອລີຊາຟັດລູກຊາຍຂອງຊິກຣີ. 2 ຫຼັງຈາກນັ້ນ ພວກຫົວໜ້າກອງຮ້ອຍກໍເດີນທາງໄປທົ່ວຢູດາເພື່ອລວບລວມພວກເລວີ+ຈາກທຸກເມືອງໃນຢູດາແລະພວກຫົວໜ້າໃນຈຸ້ມເຈື້ອຕ່າງໆຂອງອິດສະຣາເອນ ແລ້ວພາເຂົາເຈົ້າມາເມືອງເຢຣູຊາເລັມ. 3 ເມື່ອມາຮອດແລ້ວ ທຸກຄົນກໍມາລວມກັນເພື່ອເຮັດສັນຍາ+ກັບກະສັດຢູ່ວິຫານຂອງພະເຈົ້າທ່ຽງແທ້. ເຢໂຮຢາດາເວົ້າກັບເຂົາເຈົ້າວ່າ:
“ລູກຊາຍຂອງກະສັດຈະໄດ້ປົກຄອງຄືກັບທີ່ພະເຢໂຫວາສັນຍາໄວ້ກ່ຽວກັບລູກຫຼານຂອງດາວິດ.+ 4 ພວກເຈົ້າຕ້ອງເຮັດແບບນີ້ ສຳລັບພວກປະໂລຫິດແລະພວກເລວີທີ່ຕ້ອງເຮັດວຽກໃນວັນຊະບາໂຕ+ໃຫ້ແບ່ງອອກເປັນ 3 ກຸ່ມນ້ອຍ. ກຸ່ມທີ 1 ໃຫ້ຍາມປະຕູ+ 5 ກຸ່ມທີ 2 ໃຫ້ຍາມວັງຂອງກະສັດ+ ແລະກຸ່ມທີ 3 ໃຫ້ຍາມປະຕູທີ່ຊື່ວ່າປະຕູຮາກຖານ. ສ່ວນຄົນອື່ນໆຈະຢູ່ເດີ່ນວິຫານຂອງພະເຢໂຫວາ.+ 6 ຢ່າໃຫ້ໃຜເຂົ້າໄປໃນວິຫານຂອງພະເຢໂຫວານອກຈາກພວກປະໂລຫິດແລະພວກເລວີທີ່ກຳລັງເຮັດວຽກຢູ່+ ຍ້ອນເຂົາເຈົ້າໄດ້ເຮັດໃຫ້ໂຕເອງສະອາດແລ້ວ.* ສ່ວນຄົນອື່ນໆໃຫ້ຢູ່ທາງນອກຕາມທີ່ພະເຢໂຫວາໄດ້ກຳນົດໄວ້. 7 ພວກເລວີຕ້ອງອ້ອມກະສັດໄວ້ທຸກດ້ານ ແຕ່ລະຄົນຕ້ອງຖືອາວຸດໄວ້. ຖ້າມີໃຜພະຍາຍາມບຸກເຂົ້າມາໃນວິຫານກໍໃຫ້ຂ້າໂລດ. ໃຫ້ພວກເຈົ້າຢູ່ກັບກະສັດຕະຫຼອດບໍ່ວ່າລາວຈະໄປໃສ.”
8 ພວກເລວີກັບພວກຢູດາທຸກຄົນກໍເຮັດຕາມທີ່ປະໂລຫິດເຢໂຮຢາດາສັ່ງ. ເຂົາເຈົ້າໄດ້ພາຄົນຂອງໂຕເອງທັງຜູ້ທີ່ຍາມແລະຜູ້ທີ່ບໍ່ໄດ້ຍາມໃນວັນຊະບາໂຕ+ນັ້ນມາລວມກັນ ຍ້ອນປະໂລຫິດເຢໂຮຢາດາຍັງບໍ່ໄດ້ສັ່ງໃຫ້ເຂົາເຈົ້າເຊົາເຮັດວຽກເທື່ອ. 9 ແລ້ວປະໂລຫິດເຢໂຮຢາດາກໍເອົາຫອກ ໂລ້ນ້ອຍ*ກັບໂລ້ມົນຫຼາຍອັນຂອງກະສັດດາວິດ+ທີ່ຢູ່ໃນວິຫານຂອງພະເຈົ້າທ່ຽງແທ້+ມາໃຫ້ພວກຫົວໜ້າກອງຮ້ອຍ.+ 10 ລາວໃຫ້ທຸກຄົນຖືອາວຸດແລະຢືນອ້ອມກະສັດໄວ້ ຕັ້ງແຕ່ເບື້ອງຂວາຈົນຮອດເບື້ອງຊ້າຍຂອງວິຫານ. ບາງຄົນຢືນຢູ່ທາງຂ້າງແທ່ນບູຊາແລະບາງຄົນຢືນຢູ່ທາງຂ້າງວິຫານ. 11 ຈາກນັ້ນ ເຂົາເຈົ້າກໍພາລູກຊາຍຂອງກະສັດ+ອອກມາ ເອົາມົງກຸດສຸບໃສ່ຫົວລາວ ແລ້ວເອົາມ້ວນໜັງສືກົດໝາຍຂອງພະເຈົ້າ+ໃຫ້ລາວ.* ເຢໂຮຢາດາກັບພວກລູກຊາຍໄດ້ເອົານ້ຳມັນເທໃສ່ຫົວລາວແລະແຕ່ງຕັ້ງລາວໃຫ້ເປັນກະສັດ. ແລ້ວທຸກຄົນກໍພາກັນຮ້ອງວ່າ: “ຂໍໃຫ້ກະສັດມີອາຍຸຍືນຍາວ.”+
12 ເມື່ອອາທາລີຢາໄດ້ຍິນສຽງຄົນແລ່ນແລະຮ້ອງສັນລະເສີນກະສັດ ລາວຈຶ່ງຟ້າວໄປວິຫານຂອງພະເຢໂຫວາ.+ 13 ອາທາລີຢາເຫັນກະສັດຢືນຢູ່ຂ້າງເສົາຂອງໂຕເອງທີ່ຢູ່ທາງເຂົ້າວິຫານ ພວກເຈົ້ານາຍ+ກັບຄົນເປົ່າແກກໍຢູ່ນຳກະສັດ. ປະຊາຊົນທຸກຄົນກໍດີໃຈ+ ຄົນທີ່ເປົ່າແກກໍເປົ່າແກ ແລະພວກນັກຮ້ອງທີ່ຫຼິ້ນເຄື່ອງດົນຕີໄດ້ໃຫ້ສັນຍານເພື່ອທຸກຄົນຈະສະຫຼອງນຳກັນ. ອາທາລີຢາຈຶ່ງຈີກເສື້ອຂອງໂຕເອງແລະຮ້ອງວ່າ: “ພວກກະບົດ! ພວກກະບົດ!” 14 ແຕ່ປະໂລຫິດເຢໂຮຢາດາສັ່ງພວກຫົວໜ້າກອງຮ້ອຍທີ່ເບິ່ງແຍງພວກທະຫານວ່າ: “ຈັບລາວອອກໄປນອກ! ຖ້າໃຜນຳລາວໄປໃຫ້ຂ້າຜູ້ນັ້ນຖິ້ມ!” ປະໂລຫິດໄດ້ສັ່ງໄວ້ວ່າ: “ຢ່າຂ້າລາວໃນວິຫານຂອງພະເຢໂຫວາ.” 15 ເຂົາເຈົ້າຈຶ່ງຈັບອາທາລີຢາໄປປະຕູມ້າທີ່ຢູ່ເດີ່ນໃນວັງຂອງກະສັດ ແລ້ວກໍຂ້າລາວທັນທີ.
16 ຈາກນັ້ນ ເຢໂຮຢາດາ ປະຊາຊົນ ແລະກະສັດກໍສັນຍາວ່າ ເຂົາເຈົ້າຈະເປັນປະຊາຊົນຂອງພະເຢໂຫວາຕະຫຼອດໄປ.+ 17 ຫຼັງຈາກນັ້ນ ປະຊາຊົນທັງໝົດກໍໄປວິຫານຂອງພະບາອານ. ເຂົາເຈົ້າທຸບວິຫານນັ້ນ+ ທຸບແທ່ນບູຊາຕ່າງໆຂອງພະບາອານ ທຸບຮູບປັ້ນທັງໝົດຂອງພະບາອານຈົນມຸ່ນ+ ແລະຂ້າມັດຕານທີ່ເປັນປະໂລຫິດຂອງພະບາອານ+ຕໍ່ໜ້າແທ່ນບູຊາເຫຼົ່ານັ້ນ. 18 ແລ້ວເຢໂຮຢາດາໄດ້ໃຫ້ພວກປະໂລຫິດກັບພວກເລວີເຮັດວຽກເບິ່ງແຍງວິຫານຂອງພະເຢໂຫວາຢ່າງມີຄວາມສຸກແລະຮ້ອງເພງຕາມທີ່ດາວິດໄດ້ສັ່ງໄວ້. ດາວິດເຄີຍແບ່ງພວກປະໂລຫິດແລະພວກເລວີເຫຼົ່ານີ້ເປັນກຸ່ມເພື່ອໃຫ້ເບິ່ງແຍງວິຫານຂອງພະເຢໂຫວາແລະເຜົາເຄື່ອງບູຊາໃຫ້ພະເຢໂຫວາ+ຕາມທີ່ຂຽນໄວ້ໃນກົດໝາຍຂອງໂມເຊ.+ 19 ເຢໂຮຢາດາໄດ້ໃຫ້ຄົນຍາມປະຕູ+ທຸກບ່ອນຢູ່ວິຫານຂອງພະເຢໂຫວາເພື່ອຄົນທີ່ບໍ່ສະອາດຈະເຂົ້າໄປໃນວິຫານບໍ່ໄດ້. 20 ເຢໂຮຢາດາໃຫ້ພວກຫົວໜ້າກອງຮ້ອຍ+ ພວກເຈົ້ານາຍ ພວກຜູ້ປົກຄອງ ແລະປະຊາຊົນທັງໝົດພາກະສັດອອກຈາກວິຫານຂອງພະເຢໂຫວາໄປວັງຂອງກະສັດໂດຍເຂົ້າໄປທາງປະຕູທາງເທິງ. ຈາກນັ້ນ ເຂົາເຈົ້າໄດ້ໃຫ້ກະສັດນັ່ງຢູ່ເທິງບັນລັງ.+ 21 ປະຊາຊົນທຸກຄົນມີຄວາມສຸກແລະບ້ານເມືອງກໍສະຫງົບສຸກຍ້ອນວ່າອາທາລີຢາຖືກຂ້າແລ້ວ.