ເຢເຣມີຢາ
41 ໃນເດືອນທີ 7 ອິດຊະມາເອນ+ລູກຊາຍຂອງເນທານີອາຫຼານຊາຍຂອງເອລີຊາມາ ເຊິ່ງເປັນລູກຫຼານຂອງກະສັດແລະເປັນໜຶ່ງໃນພວກຄົນສຳຄັນຂອງກະສັດໄດ້ພາຄົນຂອງລາວ 10 ຄົນມາຫາເກດາລີຢາລູກຊາຍຂອງອາຮີກາມຢູ່ເມືອງມິດຊະປາ.+ ຕອນທີ່ເຂົາເຈົ້າກິນເຂົ້ານຳກັນຢູ່ເມືອງມິດຊະປາ 2 ອິດຊະມາເອນລູກຊາຍຂອງເນທານີອາແລະຄົນຂອງລາວ 10 ຄົນໄດ້ລຸກຂຶ້ນແລະເອົາດາບຂ້າເກດາລີຢາລູກຊາຍຂອງອາຮີກາມຫຼານຊາຍຂອງຊາຟານ. ອິດຊະມາເອນຂ້າຄົນທີ່ກະສັດບາບີໂລນໄດ້ແຕ່ງຕັ້ງໃຫ້ເບິ່ງແຍງແຜ່ນດິນ. 3 ລາວຍັງໄດ້ຂ້າຄົນຢິວທັງໝົດກັບພວກທະຫານການເດອາທີ່ຢູ່ນຳເກດາລີຢາໃນເມືອງມິດຊະປາ.
4 ມື້ຕໍ່ມາຫຼັງຈາກທີ່ເກດາລີຢາຖືກຂ້າແລະຍັງບໍ່ມີໃຜຮູ້ 5 ມີຜູ້ຊາຍ 80 ຄົນມາຈາກເຊເຄັມ+ ຊີໂລ+ ແລະຊາມາເຣຍ.+ ເຂົາເຈົ້າແຖໜວດແຖເຄົາ ຈີກເສື້ອ ແລະປາດໂຕເອງ.+ ເຂົາເຈົ້າເອົາເຄື່ອງບູຊາທີ່ເຮັດຈາກເມັດເຂົ້າກັບກຳຍານ*+ມານຳເພື່ອຈະເອົາໄປໃຫ້ຢູ່ວິຫານຂອງພະເຢໂຫວາ. 6 ອິດຊະມາເອນລູກຊາຍຂອງເນທານີອາຈຶ່ງອອກຈາກເມືອງມິດຊະປາໄປຫາເຂົາເຈົ້າ ລາວທັງຍ່າງທັງຮ້ອງໄຫ້ໄປນຳ. ເມື່ອລາວເຈິເຂົາເຈົ້າແລ້ວ ລາວກໍບອກເຂົາເຈົ້າວ່າ: “ຂໍໃຫ້ພວກເຈົ້າໄປຫາເກດາລີຢາລູກຊາຍຂອງອາຮີກາມນຳກັນເດີ້.” 7 ແຕ່ເມື່ອເຂົາເຈົ້າເຂົ້າໄປໃນເມືອງ ອິດຊະມາເອນລູກຊາຍຂອງເນທານີອາກັບຄົນຂອງລາວກໍຂ້າເຂົາເຈົ້າແລະເອົາສົບໂຍນລົງນ້ຳສ້າງ.
8 ແຕ່ມີຜູ້ຊາຍ 10 ຄົນໄດ້ເວົ້າກັບອິດຊະມາເອນວ່າ: “ຂໍຢ່າຂ້າພວກເຮົາເລີຍເພາະພວກເຮົາໄດ້ເຊື່ອງເຂົ້າວີດ* ເຂົ້າບາເລ ນ້ຳມັນ ແລະນ້ຳເຜີ້ງໄວ້ໃນທົ່ງຫຍ້າ.” ອິດຊະມາເອນຈຶ່ງບໍ່ຂ້າຄົນເຫຼົ່ານີ້ຄືກັບທີ່ໄດ້ຂ້າອ້າຍນ້ອງຂອງເຂົາເຈົ້າ. 9 ແລ້ວອິດຊະມາເອນກໍໂຍນສົບທັງໝົດຂອງຄົນທີ່ລາວຂ້າລົງໃນນ້ຳສ້າງໃຫຍ່ ເຊິ່ງເປັນນ້ຳສ້າງທີ່ກະສັດອາຊາໄດ້ໃຫ້ຄົນຂຸດໄວ້ຕອນທີ່ລາວຕໍ່ສູ້ກັບບາອາຊາກະສັດຂອງອິດສະຣາເອນ.+ ອິດຊະມາເອນລູກຊາຍຂອງເນທານີອາໂຍນສົບຄົນທີ່ລາວຂ້າລົງໃນນ້ຳສ້າງນັ້ນຈົນເຕັມ.
10 ອິດຊະມາເອນຈັບຄົນທັງໝົດທີ່ເຫຼືອຢູ່ໃນເມືອງມິດຊະປາໄປ+ ເຊິ່ງກໍຄືພວກລູກສາວຂອງກະສັດແລະຄົນອື່ນໆທີ່ເຫຼືອຢູ່ເມືອງມິດຊະປາ. ຄົນເຫຼົ່ານີ້ແມ່ນຄົນທີ່ເນບູຊາຣາດານຫົວໜ້າທະຫານປ້ອງກັນໂຕກະສັດປະໄວ້ໃຫ້ເກດາລີຢາລູກຊາຍຂອງອາຮີກາມເບິ່ງແຍງ.+ ອິດຊະມາເອນລູກຊາຍຂອງເນທານີອາຈັບເຂົາເຈົ້າໄປເປັນຊະເລີຍແລະລາວໄດ້ຂ້າມໄປເຂດຂອງພວກອຳໂມນ.+
11 ເມື່ອໂຢຮານານ+ລູກຊາຍຂອງກາເຣອາກັບພວກຫົວໜ້າກອງທັບຄົນອື່ນໆໄດ້ຍິນວ່າອິດຊະມາເອນລູກຊາຍຂອງເນທານີອາໄດ້ເຮັດຊົ່ວຫຍັງແດ່ 12 ເຂົາເຈົ້າກໍພາຄົນທັງໝົດຂອງເຂົາເຈົ້າໄປຕໍ່ສູ້ກັບອິດຊະມາເອນລູກຊາຍຂອງເນທານີອາ. ເຂົາເຈົ້າເຈິລາວຢູ່ແຄມນ້ຳໃຫຍ່*ໃນກິເບໂອນ.
13 ທຸກຄົນທີ່ຖືກອິດຊະມາເອນຈັບມາດີໃຈຫຼາຍເມື່ອເຫັນໂຢຮານານລູກຊາຍຂອງກາເຣອາກັບພວກຫົວໜ້າກອງທັບ. 14 ແລ້ວເຂົາເຈົ້າທັງໝົດທີ່ອິດຊະມາເອນຈັບມາຈາກເມືອງມິດຊະປາ+ກໍກັບໄປພ້ອມໂຢຮານານລູກຊາຍຂອງກາເຣອາ. 15 ແຕ່ອິດຊະມາເອນລູກຊາຍຂອງເນທານີອາກັບຄົນຂອງລາວອີກ 8 ຄົນໜີໂຢຮານານໄປໄດ້ແລະໄປເຂດຂອງພວກອຳໂມນ.
16 ໂຢຮານານລູກຊາຍຂອງກາເຣອາກັບພວກຫົວໜ້າທີ່ມານຳລາວກໍພາຄົນທີ່ເຫຼືອຢູ່ເມືອງມິດຊະປາໄປນຳເຂົາເຈົ້າ. ຄົນເຫຼົ່ານີ້ແມ່ນຄົນທີ່ເຂົາເຈົ້າຊ່ວຍຈາກອິດຊະມາເອນລູກຊາຍຂອງເນທານີອາຫຼັງຈາກທີ່ລາວຂ້າເກດາລີຢາ+ລູກຊາຍຂອງອາຮີກາມ. ເຂົາເຈົ້າພາພວກທະຫານ ຜູ້ຊາຍ ຜູ້ຍິງ ເດັກນ້ອຍ ແລະພວກຂ້າລາຊະການກັບມາຈາກກິເບໂອນ. 17 ເຂົາເຈົ້າໄປພັກຢູ່ບ່ອນພັກຂອງກິມຮາມທີ່ຢູ່ໃກ້ກັບເບັດເລເຮັມ+ແລະຕັ້ງໃຈວ່າຈະໄປເອຢິບ+ 18 ເພາະເຂົາເຈົ້າຢາກໜີພວກການເດອາ. ເຂົາເຈົ້າຢ້ານພວກການເດອາ ຍ້ອນອິດຊະມາເອນລູກຊາຍຂອງເນທານີອາໄດ້ຂ້າເກດາລີຢາລູກຊາຍຂອງອາຮີກາມ ເຊິ່ງເປັນຄົນທີ່ກະສັດບາບີໂລນແຕ່ງຕັ້ງໃຫ້ເບິ່ງແຍງແຜ່ນດິນ.+