ຮັບມືກັບຄວາມເຈັບປ່ວຍຊຳເຮື້ອ—ຄຳພີໄບເບິນຊ່ວຍໄດ້ບໍ?
ຄຳຕອບຈາກຄຳພີໄບເບິນ
ໄດ້. ພະເຈົ້າເປັນຫ່ວງຜູ້ຮັບໃຊ້ຂອງເພິ່ນທີ່ເຈັບປ່ວຍ. ຄຳພີໄບເບິນເວົ້າເຖິງຜູ້ຮັບໃຊ້ທີ່ສັດຊື່ວ່າ: “[ພະເຢໂຫວາ] ຈະເບິ່ງແຍງເມື່ອລາວນອນປ່ວຍຢູ່ເທິງຕຽງ.” (ຄຳເພງ 41:3, ລ.ມ.) ຖ້າເຈົ້າກຳລັງເຈັບປ່ວຍຊຳເຮື້ອ 3 ຂັ້ນຕອນຕໍ່ໄປນີ້ສາມາດຊ່ວຍເຈົ້າໃຫ້ຮັບມືໄດ້:
ອະທິດຖານຂໍກຳລັງເພື່ອຈະອົດທົນໄດ້. ເຈົ້າຈະໄດ້ຮັບ “ສັນຕິສຸກຂອງພະເຈົ້າທີ່ເກີນຄວາມເຂົ້າໃຈທຸກຢ່າງ” ເຊິ່ງຈະຊ່ວຍເຈົ້າໃຫ້ຫຼຸດຄວາມກັງວົນແລະອົດທົນຕໍ່ໄປໄດ້.—ຟີລິບປອຍ 4:6, 7
ຄິດໃນແງ່ບວກ. ຄຳພີໄບເບິນບອກວ່າ: “ໃຈຊື່ນບານເປັນຢາວິເສດ ແຕ່ໃຈຊອກຊ້ຳເຮັດໃຫ້ໝົດເຫື່ອແຮງ.” (ສຸພາສິດ 17:22, ລ.ມ.) ໃຫ້ພະຍາຍາມເປັນຄົນທີ່ບໍ່ເຄັ່ງຕຶງກັບທຸກເລື່ອງ ເພາະຈະຊ່ວຍເຈົ້າໃຫ້ຮູ້ສຶກດີຂຶ້ນໃນຍາມທີ່ທໍ້ໃຈແລະສົ່ງຜົນດີຕໍ່ສຸຂະພາບຂອງເຈົ້າ.
ເຊື່ອໝັ້ນໃນຄຳສັນຍາຂອງພະເຈົ້າ. ການມີຄວາມຫວັງທີ່ດີໃນເລື່ອງອະນາຄົດສາມາດຊ່ວຍເຈົ້າໃຫ້ມີຄວາມສຸກໄດ້ເຖິງວ່າຈະເຈັບປ່ວຍຊຳເຮື້ອ. (ໂຣມ 12:12) ຄຳພີໄບເບິນບອກລ່ວງໜ້າເຖິງເວລາທີ່ ‘ຈະບໍ່ມີໃຜເວົ້າວ່າ: “ຂ້ອຍປ່ວຍ.”’ (ເອຊາອີ 33:24, ລ.ມ.) ໃນຕອນນັ້ນພະເຈົ້າຈະປິ່ນປົວທຸກຄົນທີ່ເຈັບປ່ວຍຊຳເຮື້ອເຊິ່ງເກີນຄວາມສາມາດຂອງນັກວິທະຍາສາດສະໄໝໃໝ່. ຕົວຢ່າງເຊັ່ນ ຄຳພີໄບເບິນບອກວ່າຄົນເຖົ້າຈະກັບມາເປັນຄົນໜຸ່ມແລະມີສຸຂະພາບແຂງແຮງອີກເທື່ອໜຶ່ງ “ເນື້ອໜັງຂອງລາວເປັ່ງປັ່ງຍິ່ງກວ່າຕອນເປັນເດັກນ້ອຍ ແລະໃຫ້ລາວກັບມາມີເຫື່ອແຮງຄືຕອນເປັນໜຸ່ມ.”—ໂຢບ 33:25, ລ.ມ.
ຂໍ້ສັງເກດ: ເຖິງແມ່ນວ່າຈະຍອມຮັບຄວາມຊ່ວຍເຫຼືອທີ່ພະເຈົ້າຈັດກຽມໄວ້ ແຕ່ພະຍານພະເຢໂຫວາກໍຊອກຫາການປິ່ນປົວທາງການແພດເມື່ອເຈັບປ່ວຍຊຳເຮື້ອ. (ມາຣະໂກ 2:17) ເຮົາບໍ່ສະໜັບສະໜູນວິທີການປິ່ນປົວທາງການແພດແບບໃດແບບໜຶ່ງເປັນພິເສດ ເຮົາຄິດວ່າແຕ່ລະຄົນຄວນຕັດສິນໃຈເອງໃນເລື່ອງນີ້.