ບົດເຈັດ
ສິ່ງທີ່ເຮົາຮຽນຮູ້ຈາກການທີ່ພະເຈົ້າຍອມໃຫ້ມີຄວາມຊົ່ວ
1, 2. (ກ) ຖ້າພະເຢໂຫວາໄດ້ປະຫານຊີວິດຜູ້ກະບົດໃນສວນເອເດນທັນທີໂລດ ນັ້ນຈະສົ່ງຜົນກະທົບຕໍ່ເຮົາຢ່າງໃດ? (ຂ) ການຈັດຕຽມທີ່ພະເຢໂຫວາໄດ້ກະທຳດ້ວຍຄວາມຮັກເພື່ອພວກເຮົານັ້ນຄືຫຍັງ?
ຢາໂຄບບັນພະບຸລຸດຕົ້ນຕະກູນກ່າວວ່າ “ວັນປີທີ່ຜູ້ຂ້າມີຊີວິດຕັ້ງຢູ່ກໍໜ້ອຍແລະບໍ່ດີ.” (ຕົ້ນເດີມ 47:9) ໂຢບກໍບອກຄ້າຍກັນວ່າມະນຸດ “ຢູ່ບໍ່ຫຼາຍວັນແລະມີຄວາມວຸ່ນວາຍເຕັມທີ.” (ໂຢບ 14:1) ເຊັ່ນດຽວກັບເຂົາທັງສອງ ພວກເຮົາສ່ວນຫຼາຍກໍປະສົບກັບຄວາມຫຍຸ້ງຍາກ, ຄວາມບໍ່ຍຸຕິທຳ, ແມ່ນກະທັ່ງເລື່ອງເສົ້າສະຫຼົດໃຈຕ່າງໆ. ເຖິງຢ່າງນັ້ນກໍຕາມ ການທີ່ເຮົາໄດ້ເກີດມາກໍບໍ່ແມ່ນວ່າພະເຈົ້າບໍ່ຍຸຕິທຳ. ແມ່ນຢູ່ ເຮົາບໍ່ມີຈິດໃຈແລະຮ່າງກາຍທີ່ສົມບູນແລະບໍ່ມີບ້ານທີ່ເປັນອຸທິຍານແບບທີ່ອາດາມແລະເອວາມີໃນເບື້ອງຕົ້ນ ແຕ່ຖ້າພະເຢໂຫວາໄດ້ປະຫານຊີວິດເຂົາທັງສອງທັນທີທີ່ກະບົດເດ ສະພາບການຈະເປັນແນວໃດ? ຄົງຈະບໍ່ມີຄວາມເຈັບໄຂ້, ຄວາມໂສກເສົ້າ, ຫຼືຄວາມຕາຍ ທັງຈະບໍ່ມີເຜົ່າພັນມະນຸດ ແລະເຮົາເອງຄົງບໍ່ມີໂອກາດເກີດມາຊ້ຳ. ເຖິງວ່າລູກຫຼານເຫຼົ່ານີ້ໄດ້ຮັບຄວາມບໍ່ສົມບູນສືບທອດມາກໍຕາມ ດ້ວຍຄວາມເມດຕາ ພະເຈົ້າຍອມໃຫ້ອາດາມແລະເອວາມີເວລາອອກແມ່ແພ່ລູກ. ໂດຍທາງພະຄລິດ ພະເຢໂຫວາໄດ້ຈັດຕຽມການເພື່ອໃຫ້ເຮົາໄດ້ສິ່ງທີ່ອາດາມເຮັດສູນເສຍໄປນັ້ນກັບຄືນມາ ນັ້ນຄືຊີວິດຕະຫຼອດໄປເທິງແຜ່ນດິນໂລກທີ່ເປັນອຸທິຍານ.—ໂຢຮັນ 10:10; ໂລມ 5:12.
2 ຈັ່ງແມ່ນເປັນການຫນູນກຳລັງໃຈແທ້ໆທີ່ເຮົາສາມາດມຸ່ງຫວັງທີ່ຈະໄດ້ຊີວິດຕະຫຼອດໄປໃນໂລກໃໝ່ທ່າມກາງສະພາບແວດລ້ອມທີ່ເປັນອຸທິຍານ ເຊິ່ງເຮົາຈະບໍ່ມີຄວາມເຈັບໄຂ້, ຄວາມໂສກເສົ້າ, ຄວາມເຈັບປວດ, ຫຼືຄວາມຕາຍ ທັງຈະບໍ່ມີຄົນຊົ່ວຮ້າຍນຳອີກ! (ສຸພາສິດ 2:21, 22; ຄຳປາກົດ 21:4, 5) ເຖິງແນວນັ້ນກໍຕາມ ຈາກບັນທຶກໃນຄຳພີໄບເບິນ ເຮົາຮຽນຮູ້ວ່າບໍ່ພຽງແຕ່ຄວາມລອດຂອງເຮົາເທົ່ານັ້ນທີ່ມີຄວາມສຳຄັນຫຼາຍສຳລັບເຮົາແລະຕໍ່ພະເຢໂຫວາ ແຕ່ຍັງມີບາງສິ່ງທີ່ສຳຄັນຫຼາຍກວ່ານັ້ນອີກກ່ຽວຂ້ອງຢູ່ນຳ.
ເພື່ອເຫັນແກ່ນາມຊື່ອັນຍິ່ງໃຫຍ່ຂອງພະອົງ
3. ແມ່ນຫຍັງກ່ຽວຂ້ອງຢູ່ກັບຄວາມສຳເລັດແຫ່ງພະປະສົງຂອງພະເຢໂຫວາຕໍ່ແຜ່ນດິນໂລກແລະມະນຸດຊາດ?
3 ຊື່ຂອງພະເຈົ້າກ່ຽວຂ້ອງກັບຄວາມສຳເລັດເປັນຈິງແຫ່ງພະປະສົງຂອງພະອົງຕໍ່ແຜ່ນດິນໂລກແລະຕໍ່ມະນຸດຊາດ. ຊື່ເຢໂຫວານັ້ນໝາຍຄວາມວ່າ “ຜູ້ທີ່ບັນດານໃຫ້ເປັນ.” ດັ່ງນັ້ນ ນາມຊື່ຂອງພະອົງໝາຍລວມເຖິງຊື່ສຽງຂອງພະອົງໃນຖານະເປັນຜູ້ມີສິດທິສູງສຸດໃນການປົກຄອງເອກະພົບ, ເປັນຜູ້ທີ່ບັນລຸຕາມພະປະສົງຂອງຕົນສະເໝີ, ແລະເປັນພະເຈົ້າແຫ່ງຄວາມຈິງ. ຍ້ອນຕຳແໜ່ງຂອງພະເຢໂຫວາ ສັນຕິພາບແລະຄວາມຢູ່ເຢັນເປັນສຸກຂອງທົ່ວເອກະພົບຈຶ່ງຂຶ້ນຢູ່ກັບການໃຫ້ຄວາມນັບຖືຕໍ່ນາມຊື່ຂອງພະອົງແລະທຸກສິ່ງທີ່ລວມຢູ່ນຳຊື່ນັ້ນຢ່າງເຕັມທີ ແລະຍັງຂຶ້ນຢູ່ກັບການທີ່ທຸກຄົນເຊື່ອຟັງພະອົງນຳອີກ.
4. ພະປະສົງຂອງພະເຢໂຫວາສຳລັບແຜ່ນດິນໂລກລວມເຖິງສິ່ງໃດແດ່?
4 ພາຍຫຼັງທີ່ໄດ້ສ້າງອາດາມແລະເອວາ ພະເຢໂຫວາໄດ້ມອບໝາຍວຽກໃຫ້ເຂົາເຈົ້າເຮັດ. ພະອົງບອກຢ່າງຊັດເຈນວ່າພະປະສົງຂອງພະອົງບໍ່ແມ່ນພຽງແຕ່ໃຫ້ຄຸ້ມຄອງເບິ່ງແຍງທົ່ວແຜ່ນດິນໂລກ ໂດຍການຂະຫຍາຍເຂດອຸທິຍານໃຫ້ກວ້າງອອກໄປເທົ່ານັ້ນ ແຕ່ຍັງຕ້ອງການໃຫ້ແຜ່ນດິນໂລກເຕັມໄປດ້ວຍລູກຫຼານຂອງເຂົາເຈົ້ານຳອີກ. (ຕົ້ນເດີມ 1:28) ພະປະສົງນີ້ຈະລົ້ມແຫຼວຍ້ອນບາບຂອງເຂົາເຈົ້າບໍ? ຫາກພະອົງບໍ່ສາມາດກະທຳໃຫ້ພະປະສົງສຳລັບແຜ່ນດິນໂລກແລະມະນຸດຊາດບັນລຸຜົນສຳເລັດ ນັ້ນຈະນຳເອົາຄຳຕຳໜິມາສູ່ນາມຊື່ຂອງພະເຢໂຫວາຜູ້ມີລິດເດດຍິ່ງໃຫຍ່ຫຼາຍສ່ຳໃດ!
5. (ກ) ຫາກວ່າມະນຸດຄູ່ທຳອິດກິນໝາກຈາກຕົ້ນໄມ້ແຫ່ງຄວາມຮູ້ເລື່ອງຄວາມດີແລະຄວາມຊົ່ວແລ້ວ ເຂົາເຈົ້າຈະຕາຍໃນຕອນໃດ? (ຂ) ພະເຢໂຫວາກະທຳໃຫ້ຄຳກ່າວໃນຕົ້ນເດີມ 2:17 ສຳເລັດເປັນຈິງແນວໃດ ໃນຂະນະທີ່ຄຳນຶງເຖິງພະປະສົງຂອງພະອົງຕໍ່ແຜ່ນດິນໂລກ?
5 ພະເຢໂຫວາໄດ້ເຕືອນອາດາມແລະເອວາວ່າ ຖ້າເຂົາເຈົ້າບໍ່ເຊື່ອຟັງແລະກິນໝາກຂອງຕົ້ນໄມ້ແຫ່ງຄວາມຮູ້ເລື່ອງຄວາມດີແລະຄວາມຊົ່ວນັ້ນ ເຂົາເຈົ້າຈະຕາຍ “ໃນວັນ” ທີ່ເຂົາເຈົ້າກິນ. (ຕົ້ນເດີມ 2:17) ເປັນຈິງຕາມຄຳກ່າວຂອງພະອົງ ພະເຢໂຫວາໄດ້ເອີ້ນທັງສອງມາໃຫ້ການໃນວັນທີ່ເຂົາເຈົ້າເຮັດບາບແລະໄດ້ຕັດສິນລົງໂທດໃຫ້ຕາຍ. ຈາກທັດສະນະຂອງພະເຈົ້າ ອາດາມແລະເອວາໄດ້ຕາຍໃນວັນນັ້ນໂລດ. ຢ່າງໃດກໍຕາມ ເພື່ອຈະໃຫ້ພະປະສົງຂອງພະອົງກ່ຽວກັບແຜ່ນດິນໂລກນີ້ບັນລຸຜົນສຳເລັດ ພະເຢໂຫວາໄດ້ປ່ອຍໃຫ້ເຂົາທັງສອງກຳເນີດລູກກ່ອນທີ່ເຂົາເຈົ້າຈະຕາຍ. ເນື່ອງຈາກພະເຈົ້າສາມາດຖືວ່າ 1,000 ປີທໍ່ກັບວັນດຽວ ເມື່ອອາດາມສິ້ນຊີວິດຕອນອາຍຸ 930 ປີ ລາວຈຶ່ງຕາຍຢູ່ພາຍໃນ “ວັນ” ດຽວເທົ່ານັ້ນ. (2 ເປໂຕ 3:8; ຕົ້ນເດີມ 5:3-5) ດັ່ງນັ້ນ ສັດຈະທຳຂອງພະເຢໂຫວາຈຶ່ງໄດ້ຮັບການເຊີດຊູຍ້ອນມີການລົງໂທດຕາມເວລາທີ່ກຳນົດໄວ້ ແລະພະປະສົງທີ່ພະອົງມີຕໍ່ແຜ່ນດິນໂລກກໍຈະບໍ່ລົ້ມແຫຼວຍ້ອນການຕາຍຂອງເຂົາເຈົ້າ. ຢ່າງໃດກໍຕາມ ຄົນທີ່ບໍ່ສົມບູນກັບຄົນຊົ່ວຈະຖືກປ່ອຍໃຫ້ມີຊີວິດຢູ່ໄລຍະໜຶ່ງ.
6, 7. (ກ) ອີງຕາມອົບພະຍົບ 9:15, 16 ດ້ວຍເຫດໃດພະເຢໂຫວາຈຶ່ງປ່ອຍໃຫ້ຄົນຊົ່ວມີຊີວິດຢູ່ຕໍ່ໄປໄລຍະໜຶ່ງ? (ຂ) ໃນກໍລະນີຂອງຟາໂລ ລິດເດດຂອງພະເຢໂຫວາປາກົດໃຫ້ເຫັນຢ່າງໃດ ແລະຊື່ຂອງພະອົງເປັນທີ່ຮູ້ຈັກໄດ້ແນວໃດ? (ຄ) ເມື່ອລະບົບຊົ່ວປັດຈຸບັນນີ້ສິ້ນສຸດລົງ ຜົນຈະເປັນຢ່າງໃດ?
6 ສິ່ງທີ່ພະເຢໂຫວາກ່າວແກ່ຜູ້ປົກຄອງແຫ່ງປະເທດເອຢີບໃນສະໄໝຂອງໂມເຊໃຫ້ຄວາມເຂົ້າໃຈຕື່ມອີກເຖິງເຫດຜົນທີ່ພະເຈົ້າໄດ້ປ່ອຍໃຫ້ຄົນຊົ່ວມີຊີວິດຢູ່ຕໍ່ໄປ. ເມື່ອຟາໂລບໍ່ຍອມໃຫ້ລູກຫຼານຍິດສະລາເອນອອກຈາກປະເທດເອຢີບ ພະເຢໂຫວາບໍ່ໄດ້ທຳລາຍລາວທັນທີໂລດ. ພະເຢໂຫວາໄດ້ສຳແດງໃຫ້ເຫັນອຳນາດຂອງພະອົງໃນວິທີທີ່ອັດສະຈັນ ໂດຍການນຳເອົາໄພພິບັດສິບປະການມາສູ່ແຜ່ນດິນນັ້ນ. ເມື່ອເຕືອນໃຫ້ຮູ້ເຖິງໄພພິບັດປະການທີເຈັດນັ້ນ ພະເຢໂຫວາບອກຟາໂລວ່າ ພະອົງສາມາດກວາດລ້າງຟາໂລແລະລາດສະດອນຂອງລາວໃຫ້ໝົດໄປຈາກແຜ່ນດິນໂລກໄດ້ຢ່າງງ່າຍດາຍ. ເຖິງຢ່າງນັ້ນກໍຕາມ ພະເຢໂຫວາພັດກ່າວວ່າ “ຍ້ອນນີ້ເຮົາໄດ້ໃຫ້ທ່ານຍັງເປັນຢູ່ ເພື່ອເຮົາຈະໄດ້ກະທຳໃຫ້ທ່ານເຫັນລິດເດດຂອງເຮົາແລະເພື່ອນາມຊື່ຂອງເຮົາເປັນທີ່ປະກາດລືໄປທົ່ວແຜ່ນດິນໂລກ.”—ອົບພະຍົບ 9:15, 16.
7 ເມື່ອພະເຢໂຫວາໄດ້ຊ່ວຍຊົນຊາດຍິດສະລາເອນອອກຈາກປະເທດເອຢີບ ນາມຊື່ຂອງພະອົງຈຶ່ງເປັນທີ່ຮູ້ຈັກກັນຢ່າງກວ້າງຂວາງແທ້ໆ. (ໂຢຊວຍ 2:1, 9-11) ຕອນນີ້ ຫຼາຍກວ່າ 3,500 ປີໄດ້ຜ່ານໄປແລ້ວ ແຕ່ສິ່ງທີ່ພະອົງກະທຳໃນຕອນນັ້ນຍັງຈື່ຈຳກັນໄດ້. ບໍ່ພຽງແຕ່ຊື່ສະເພາະຂອງພະເຢໂຫວາເທົ່ານັ້ນທີ່ໄດ້ຮັບການປະກາດອອກໄປ ແຕ່ຄວາມຈິງກ່ຽວກັບຜູ້ທີ່ໃຊ້ຊື່ນັ້ນກໍໄດ້ຮັບການປະກາດອອກໄປອີກ. ເລື່ອງນີ້ໄດ້ສ້າງຊື່ສຽງໃຫ້ພະເຢໂຫວາໃນຖານະເປັນພະເຈົ້າທີ່ຮັກສາຄຳສັນຍາແລະດຳເນີນການເພື່ອປະໂຫຍດຂອງເຫຼົ່າຜູ້ຮັບໃຊ້ພະອົງ. (ໂຢຊວຍ 23:14) ສິ່ງທີ່ພະອົງກະທຳໃນຕອນນັ້ນສະແດງໃຫ້ເຫັນວ່າ ຍ້ອນລິດເດດອັນຍິ່ງໃຫຍ່ຂອງພະອົງ ຈຶ່ງບໍ່ມີສິ່ງໃດສາມາດກີດຂວາງພະປະສົງຂອງພະອົງໄວ້ໄດ້. (ເອຊາອີ 14:24, 27) ເພາະສະນັ້ນ ເຮົາຈຶ່ງໝັ້ນໃຈໄດ້ວ່າ ອີກບໍ່ດົນພະອົງຈະທຳລາຍລະບົບຊົ່ວທັງສິ້ນຂອງຊາຕານ ເພາະເຫັນແກ່ເຫຼົ່າຜູ້ຮັບໃຊ້ທີ່ສັດຊື່ຂອງພະອົງ. ການສະແດງລິດອຳນາດນັ້ນແລະສະຫງ່າລາສີທີ່ການກະທຳນັ້ນນຳມາສູ່ຊື່ຂອງພະເຢໂຫວາຈະບໍ່ມີວັນລືມໄດ້ ແລະຜົນປະໂຫຍດຕ່າງໆກໍຈະບໍ່ມີຈົບສິ້ນ.—ເອເຊກຽນ 38:23; ຄຳປາກົດ 19:1, 2.
‘ພະປັນຍາຂອງພະເຈົ້າກໍເລິກມາກເທົ່າໃດ’
8. ໂປໂລກະຕຸ້ນໃຫ້ເຮົາພິຈາລະນາປັດໄຈໃດແດ່?
8 ໃນຈົດໝາຍທີ່ອັກຄະສາວົກໂປໂລຂຽນເຖິງຊາວໂລມ ລາວໄດ້ຕັ້ງຄຳຖາມວ່າ “ມີຄວາມບໍ່ຊອບທຳໃນພະເຈົ້າຫຼື?” ລາວເອງໄດ້ຕອບຄຳຖາມນັ້ນຢ່າງໜັກແໜ້ນວ່າ “ຢ່າໃຫ້ເປັນຢ່າງນັ້ນ.” ແລ້ວໄດ້ເນັ້ນເຖິງຄວາມເມດຕາຂອງພະເຈົ້າແລະອ້າງເຖິງສິ່ງທີ່ພະເຢໂຫວາກ່າວກ່ຽວກັບການປ່ອຍໃຫ້ຟາໂລມີຊີວິດຢູ່ອີກໄລຍະໜຶ່ງ. ນອກນັ້ນໂປໂລຍັງສະແດງໃຫ້ເຫັນວ່າ ມະນຸດເຮົາປຽບຄືກັບດິນດາກໃນມືຂອງຊ່າງປັ້ນໝໍ້. ຈາກນັ້ນລາວກ່າວວ່າ “ເມື່ອຢາກໄດ້ສຳແດງຄວາມຄຽດ ແລະໃຫ້ລິດເດດຂອງພະອົງປາກົດ ກໍໄດ້ອົດກັ້ນໄວ້ຊ້ານານແກ່ຜູ້ນັ້ນທີ່ເປັນເຄື່ອງສຳລັບໃສ່ຄວາມຄຽດທີ່ຈັດແຈ່ງໄວ້ໃຫ້ຈິບຫາຍ. ແລະເພື່ອຈະໄດ້ສຳແດງຊັບສົມບັດແຫ່ງລັດສະໝີ [ລັດສະໝີອັນອຸດົມ] ຂອງພະອົງ ແກ່ຜູ້ນັ້ນທີ່ເປັນເຄື່ອງສຳລັບໃສ່ຄວາມອີ່ດູທີ່ພະອົງໄດ້ຈັດແຈ່ງໄວ້ກ່ອນສຳລັບລັດສະໝີ. ແມ່ນເຮົາທັງຫຼາຍທີ່ພະອົງໄດ້ເອີ້ນໄວ້ແລ້ວ ບໍ່ໃຊ່ອອກມາຈາກພວກຢູເດພວກດຽວ ແຕ່ວ່າອອກມາຈາກພວກຕ່າງປະເທດດ້ວຍ.”—ໂລມ 9:14-24
9. (ກ) “ເຄື່ອງສຳລັບໃສ່ຄວາມຄຽດທີ່ຈັດແຈ່ງໄວ້ໃຫ້ຈິບຫາຍ” ນັ້ນແມ່ນໃຜ? (ຂ) ເປັນຫຍັງພະເຢໂຫວາຈຶ່ງສະແດງຄວາມອົດກັ້ນທົນນານຢ່າງໃຫຍ່ຫຼວງຕໍ່ຄົນເຫຼົ່ານັ້ນທີ່ຕໍ່ຕ້ານພະອົງ ແລະໃນທີ່ສຸດຈະເປັນປະໂຫຍດຕໍ່ຜູ້ທີ່ຮັກພະອົງຢ່າງໃດ?
9 ນັບຕັ້ງແຕ່ການກະບົດໃນສວນເອເດນ ຜູ້ທີ່ຕໍ່ຕ້ານພະເຢໂຫວາແລະກົດໝາຍຂອງພະອົງໄດ້ກາຍເປັນ “ເຄື່ອງສຳລັບໃສ່ຄວາມຄຽດທີ່ຈັດແຈ່ງໄວ້ໃຫ້ຈິບຫາຍ.” ສະນັ້ນ ນັບຕັ້ງແຕ່ນັ້ນມາ ພະເຢໂຫວາຈຶ່ງໄດ້ສະແດງຄວາມອົດກັ້ນທົນນານ. ຄົນຊົ່ວໄດ້ເຍາະເຍີ້ຍແນວທາງຂອງພະອົງ ກົດຂີ່ຂົ່ມເຫງພວກຜູ້ຮັບໃຊ້ຂອງພະອົງ ແລ້ວຊ້ຳບໍ່ຫນຳຍັງປະຫານພະບຸດຂອງພະອົງນຳອີກ. ໂດຍການສະແດງຄວາມອົດກັ້ນທົນນານຢ່າງໃຫຍ່ຫຼວງ ພະເຢໂຫວາຈຶ່ງໃຫ້ເວລາພຽງພໍເພື່ອສິ່ງທັງປວງທີ່ພະອົງໄດ້ສ້າງ ຈະໄດ້ເຫັນຄວາມຫາຍະນະຢ່າງເຕັມທີເຊິ່ງເກີດຈາກການກະບົດຕໍ່ພະເຈົ້າແລະຈາກການປົກຄອງຂອງມະນຸດທີ່ບໍ່ໝາຍເພິ່ງພະອົງ. ໃນຂະນະດຽວກັນ ການຕາຍຂອງພະເຍຊູພັດໄດ້ເປີດໂອກາດໃຫ້ມີຄວາມລອດແກ່ມະນຸດຊາດທີ່ເຊື່ອຟັງ ແລະ “ເພື່ອຈະໄດ້ກະທຳໃຫ້ການຂອງພະຍາມານຈິບຫາຍເສຍ.”—1 ໂຢຮັນ 3:8; ເຫບເລີ 2:14, 15.
10. ເຫດໃດພະເຢໂຫວາຈຶ່ງອົດກັ້ນຕໍ່ຄົນຊົ່ວຕະຫຼອດໄລຍະເວລາ 1,900 ປີທີ່ຜ່ານມາ?
10 ນັບຕັ້ງແຕ່ພະເຍຊູໄດ້ກັບຄືນມາຈາກຕາຍຫຼາຍກວ່າ 1,900 ປີມາແລ້ວ ພະເຢໂຫວາເອງໄດ້ອົດກັ້ນມາຕະຫຼອດຕໍ່ “ເຄື່ອງສຳລັບໃສ່ຄວາມຄຽດ” ເພື່ອຈະຢັ້ງການທຳລາຍພວກເຂົາເຈົ້າ. ເພາະເຫດໃດ? ເຫດຜົນຢ່າງໜຶ່ງກໍຄື ພະອົງໄດ້ກຽມຜູ້ທີ່ຈະຮ່ວມສົມທົບກັບພະເຍຊູຄລິດໃນລາຊະອານາຈັກທາງພາກສະຫວັນ. ຄົນເຫຼົ່ານີ້ມີຈຳນວນ 144,000 ຄົນ ເຊິ່ງອັກຄະສາວົກໂປໂລກ່າວວ່າເປັນ “ເຄື່ອງສຳລັບໃສ່ຄວາມອີ່ດູ.” ຊາວຢິວລາງຄົນເປັນກຸ່ມທຳອິດທີ່ໄດ້ຮັບເຊີນໃຫ້ມາເປັນກຸ່ມຊົນທາງພາກສະຫວັນ. ຕໍ່ຈາກນັ້ນ ພະເຈົ້າໄດ້ເຊີນຄົນຈາກຊາດອື່ນໆແລະພະເຢໂຫວາກໍບໍ່ໄດ້ບັງຄັບຄົນເຫຼົ່ານີ້ໃຫ້ມາຮັບໃຊ້ພະອົງ. ເຖິງແນວນັ້ນກໍຕາມ ພະເຢໂຫວາໄດ້ມອບສິດທິພິເສດແກ່ຜູ້ທີ່ຮູ້ຄຸນຄ່າເຊິ່ງຍອມຮັບເອົາການຈັດຕຽມອັນປ່ຽມດ້ວຍຄວາມຮັກຂອງພະອົງໃຫ້ປົກຄອງຮ່ວມກັບພະບຸດໃນລາຊະອານາຈັກທາງພາກສະຫວັນ. ຕອນນີ້ການກຽມກຸ່ມຊົນທາງພາກສະຫວັນກໍເກືອບຈະສຳເລັດແລ້ວ.—ລືກາ 22:29; ຄຳປາກົດ 14:1-4.
11. (ກ) ໃນຕອນນີ້ ຄົນກຸ່ມໃດກຳລັງໄດ້ຮັບປະໂຫຍດຈາກຄວາມອົດກັ້ນທົນນານຂອງພະເຢໂຫວາ? (ຂ) ຄົນທີ່ຕາຍໄປແລ້ວຈະໄດ້ຮັບປະໂຫຍດຢ່າງໃດ?
11 ສ່ວນຄົນທີ່ຈະອາໄສຢູ່ເທິງແຜ່ນດິນໂລກນີ້ເດ? ຄວາມອົດກັ້ນທົນນານຂອງພະເຢໂຫວາຍັງເປີດໂອກາດທີ່ຈະຮິບໂຮມເອົາ “ຝູງຄົນເປັນອັນມາກ” ຈາກທຸກຊາດເຂົ້າມານຳອີກ. ເວລານີ້ກໍມີຫຼາຍລ້ານຄົນແລ້ວ. ພະເຢໂຫວາສັນຍາວ່າ ກຸ່ມຊົນດັ່ງກ່າວນີ້ຈະລອດຈາກອະວະສານຂອງລະບົບນີ້ແລະມີຄວາມຫວັງທີ່ຈະມີຊີວິດຕະຫຼອດໄປເທິງແຜ່ນດິນໂລກທີ່ເປັນອຸທິຍານ. (ຄຳປາກົດ 7:9, 10; ຄຳເພງ 37:29; ໂຢຮັນ 10:16) ໃນເວລາທີ່ພະເຈົ້າກຳນົດໄວ້ ຄົນຈຳນວນຫຼວງຫຼາຍທີ່ຕາຍໄປແລ້ວຈະໄດ້ຮັບການປຸກໃຫ້ກັບຄືນມາຈາກຕາຍເພື່ອຈະໄດ້ເປັນພົນລະເມືອງໃນໂລກນີ້ພາຍໃຕ້ການປົກຄອງຂອງລາຊະອານາຈັກທາງພາກສະຫວັນ. ດັ່ງນັ້ນ ພະຄຳຂອງພະເຈົ້າຈຶ່ງໄດ້ບອກໄວ້ລ່ວງໜ້າໃນກິດຈະການ 24:15 ວ່າ “ຄົນທັງປວງ ທັງຜູ້ຊອບທຳແລະຜູ້ບໍ່ຊອບທຳຈະຄືນມາຈາກຕາຍ.”—ໂຢຮັນ 5:28, 29.
12. (ກ) ເຮົາໄດ້ຮຽນຮູ້ສິ່ງໃດກ່ຽວກັບພະເຢໂຫວາຈາກການທີ່ພະອົງອົດທົນຕໍ່ຄວາມຊົ່ວ? (ຂ) ເຮົາເອງຮູ້ສຶກຢ່າງໃດກ່ຽວກັບວິທີທີ່ພະເຢໂຫວາຈັດການກັບເລື່ອງເຫຼົ່ານີ້?
12 ໃນເລື່ອງທັງໝົດທີ່ກ່າວມານີ້ມີສິ່ງໃດທີ່ບໍ່ຍຸຕິທຳບໍ? ບໍ່ມີເລີຍ ເພາະໂດຍການຢັ້ງມືໄວ້ຈາກການທຳລາຍຄົນຊົ່ວຫຼື “ເຄື່ອງສຳລັບໃສ່ຄວາມຄຽດ” ພະເຈົ້າກຳລັງສະແດງຄວາມເມດຕາຕໍ່ຄົນອື່ນໆເຊິ່ງແມ່ນສອດຄ່ອງກັບພະປະສົງຂອງພະອົງ. ເລື່ອງນີ້ສະແດງວ່າພະອົງມີຄວາມເມດຕາ ແລະປະກອບດ້ວຍຄວາມຮັກຫຼາຍແທ້ໆ. ນອກຈາກນັ້ນ ການມີເວລາສັງເກດເຫັນພະປະສົງຂອງພະອົງທີ່ຄ່ອຍໆເຜີຍອອກມາ ຍັງເຮັດໃຫ້ເຮົາໄດ້ຮຽນຮູ້ຫຼາຍສິ່ງກ່ຽວກັບພະເຢໂຫວາ. ບຸກຄະລິກພາບຂອງພະອົງທີ່ປາກົດອອກມາເຊິ່ງເຮັດໃຫ້ເຮົາຮູ້ສຶກປະທັບໃຈນັ້ນແມ່ນ ຄວາມຍຸຕິທຳ, ຄວາມເມດຕາ, ຄວາມອົດກັ້ນທົນນານ, ແລະສະຕິປັນຍາທີ່ຄວບຄຸມຫຼາຍດ້ານຂອງພະອົງ. ຄວາມສະຫຼາດສຸຂຸມຂອງພະເຢໂຫວາໃນການຈັດການກັບປະເດັນກ່ຽວກັບສິດທິສູງສຸດໃນການປົກຄອງເອກະພົບ ຈະເປັນຫຼັກຖານທີ່ຄົງໄວ້ຕະຫຼອດການເຖິງຄວາມຈິງທີ່ວ່າ ການປົກຄອງຂອງພະອົງແມ່ນດີທີ່ສຸດ. ເຮົາສາມາດເວົ້າແບບດຽວກັບອັກຄະສາວົກໂປໂລທີ່ວ່າ “ຊັບສົມບັດແຫ່ງພະປັນຍາ ແລະຄວາມຮູ້ຂອງພະເຈົ້າກໍເລິກມາກເທົ່າໃດ ການຕັດສິນຂອງພະອົງກໍເຫຼືອທີ່ຈະເຂົ້າໃຈໄດ້ມາກເທົ່າໃດ ທາງທັງຫຼາຍຂອງພະອົງກໍເຫຼືອທີ່ຈະສືບເສາະມາກເທົ່າໃດ.”—ໂລມ 11:33.
ໂອກາດຕ່າງໆທີ່ເຮົາຈະສະແດງຄວາມເຫຼື້ອມໃສສັດທາ
13. ເມື່ອເຮົາເອງຕ້ອງປະສົບກັບຄວາມທຸກ ສິ່ງນັ້ນເປີດໂອກາດໃຫ້ເຮົາເຮັດຫຍັງ ແລະແມ່ນຫຍັງຈະຊ່ວຍເຮົາໃຫ້ປະຕິບັດຢ່າງສຸຂຸມ?
13 ຫຼາຍຄົນທີ່ຮັບໃຊ້ພະເຈົ້າຕ້ອງປະສົບກັບຄວາມທຸກເປັນສ່ວນຕົວ. ຄວາມທຸກຂອງພວກເຂົາເຈົ້າຍັງຈະມີຕໍ່ໄປເພາະວ່າພະເຈົ້າຍັງບໍ່ທັນທຳລາຍຄົນຊົ່ວ ແລະຍັງບໍ່ທັນຟື້ນຟູຊີວິດມະນຸດຊາດຕາມທີ່ໄດ້ບອກໄວ້ລ່ວງໜ້າ. ນັ້ນຈະເຮັດໃຫ້ພວກເຮົາມີໃຈຄຽດຂົມບໍ? ຫຼືເຮົາຈະຖືສະພາບການນັ້ນວ່າເປັນໂອກາດທີ່ຈະມີສ່ວນໃນການພິສູດວ່າພະຍາມານເປັນຜູ້ຕົວະບໍ? ເຮົາຈະໄດ້ຮັບການເສີມກຳລັງໃຫ້ເຮັດເຊັ່ນນັ້ນຫາກເຮົາຄຳນຶງເຖິງຄຳກ່າວທີ່ວ່າ “ລູກຊາຍເອີຍ ຈົ່ງເປັນຄົນປັນຍາ ແລະຈົ່ງໃຫ້ໃຈຂ້ອຍຊື່ນບານເພື່ອຂ້ອຍອາດຈະຕອບຄົນທີ່ປະຈານຂາຍໜ້າຂ້ອຍໄດ້.” (ສຸພາສິດ 27:11) ຊາຕານຜູ້ຕຳໜິພະເຢໂຫວາກ່າວຫາວ່າ ຫາກຄົນເຮົາປະສົບຄວາມສູນເສຍທາງວັດຖຸຫຼືເຈັບປ່ວຍທາງກາຍ ເຮົາກໍຈະຕຳໜິພະເຈົ້າ ຈົນກະທັ່ງປ້ອຍດ່າພະອົງນຳອີກ. (ໂຢບ 1:9-11; 2:4, 5) ເຮົາເຮັດໃຫ້ພະເຢໂຫວາຍິນດີເມື່ອເຮົາສະແດງໃຫ້ເຫັນວ່າຄຳກ່າວຫາຂອງຊາຕານບໍ່ເປັນຄວາມຈິງໃນກໍລະນີຂອງເຮົາ ໂດຍການຮັກສາຄວາມພັກດີຕໍ່ພະອົງໃນຍາມທີ່ຕ້ອງປະເຊີນຄວາມຍາກລຳບາກ.
14. ເມື່ອປະສົບການທົດລອງຕ່າງໆ ຖ້າເຮົາໄວ້ວາງໃຈໃນພະເຢໂຫວາ ເຮົາຈະໄດ້ຮັບປະໂຫຍດອັນໃດ?
14 ຖ້າເຮົາໄວ້ວາງໃຈໃນພະເຢໂຫວາເມື່ອເຮົາປະສົບການທົດລອງ ເຮົາຈຶ່ງຈະສາມາດພັດທະນາຄຸນລັກສະນະທີ່ດີເລີດໄດ້. ຕົວຢ່າງເຊັ່ນ ຄວາມຍາກລຳບາກຕ່າງໆເຊິ່ງພະເຍຊູໄດ້ອົດທົນນັ້ນກໍເຮັດໃຫ້ພະອົງໄດ້ “ຮຽນຮູ້ເຊື່ອຟັງ” ໃນວິທີທີ່ພະອົງບໍ່ເຄີຍຮູ້ມາກ່ອນ. ເຮົາເອງສາມາດປູກຝັງຄວາມອົດກັ້ນທົນນານ, ຄວາມອົດທົນ, ແລະຄວາມຮູ້ຄຸນຄ່າຢ່າງເລິກເຊິ່ງຕໍ່ແນວທາງອັນຊອບທຳຂອງພະເຢໂຫວາໄດ້ເມື່ອມີການທົດລອງເກີດຂຶ້ນ.—ເຫບເລີ 5:8, 9, ທ.ປ.; 12:11; ຢາໂກໂບ 1:2-4.
15. ເມື່ອເຮົາພຽນອົດທົນຕໍ່ຄວາມຍາກລຳບາກ ຄົນອື່ນໆອາດຈະໄດ້ຮັບປະໂຫຍດຢ່າງໃດ?
15 ຄົນອື່ນໆຈະສັງເກດເຫັນສິ່ງທີ່ເຮົາເຮັດ. ເນື່ອງຈາກສິ່ງທີ່ເຮົາອົດທົນເພາະເຫັນແກ່ຄວາມຊອບທຳນັ້ນ ແລ້ວຕໍ່ໄປບາງຄົນອາດຈະຮູ້ຈັກຜູ້ທີ່ເປັນຄລິດສະຕຽນແທ້ໃນທຸກມື້ນີ້. ດັ່ງນັ້ນ ເມື່ອເຂົ້າມາຮ່ວມນະມັດສະການກັບພວກເຮົາ ເຂົາເຈົ້າອາດຈະເຂົ້າມາຢູ່ໃນເສັ້ນທາງທີ່ຈະໄດ້ຮັບພະພອນໃນການມີຊີວິດຕະຫຼອດໄປ. (ມັດທາຍ 25:34-36, 40, 46) ພະເຢໂຫວາແລະພະບຸດຂອງພະອົງຕ້ອງການໃຫ້ຄົນເຮົາມີໂອກາດຮັບພອນເຊັ່ນນັ້ນ.
16. ທັດສະນະຂອງເຮົາຕໍ່ຄວາມຍາກລຳບາກທີ່ເຮົາປະສົບມີສ່ວນກ່ຽວຂ້ອງກັບເລື່ອງຄວາມເປັນເອກະພາບຢ່າງໃດ?
16 ເປັນການດີສ່ຳໃດເມື່ອເຮົາຖືວ່າສະພາບການທີ່ຍາກລຳບາກເຊັ່ນນັ້ນເປັນໂອກາດທີ່ເຮົາຈະສະແດງຄວາມເຫຼື້ອມໃສຕໍ່ພະເຢໂຫວາ ທັງຍັງມີສ່ວນຮ່ວມໃນການເຮັດໃຫ້ພະປະສົງຂອງພະອົງສຳເລັດ! ການເຮັດເຊັ່ນນັ້ນ ກໍຍັງເປັນຫຼັກຖານວ່າເຮົາກຳລັງມຸ່ງໄປສູ່ຄວາມເປັນເອກະພາບກັບພະເຈົ້າແລະພະຄລິດຢ່າງແທ້ຈິງ. ພະເຍຊູອະທິດຖານຕໍ່ພະເຢໂຫວາເພື່ອປະໂຫຍດຂອງຄລິດສະຕຽນແທ້ທຸກຄົນໂດຍກ່າວວ່າ “ຂ້າພະເຈົ້າຂໍສຳລັບຄົນທັງຫຼາຍນີ້ [ສາວົກທີ່ໃກ້ຊິດກັບພະອົງ] ບໍ່ໃຊ່ເທົ່ານັ້ນ ແຕ່ວ່າສຳລັບຄົນທັງຫຼາຍທີ່ເຊື່ອໃນຂ້າພະເຈົ້າດ້ວຍຖ້ອຍຄຳຂອງເຂົາທັງມວນ. ເພື່ອເຂົາທັງປວງຈະເປັນອັນໜຶ່ງເໝືອນດັ່ງພະບິດາຢູ່ໃນຂ້າພະເຈົ້າ ແລະຂ້າພະເຈົ້າຢູ່ໃນພະບິດາ ເພື່ອເຂົາຈະເປັນອັນໜຶ່ງໃນເຮົາທັງສອງດ້ວຍ.”—ໂຢຮັນ 17:20, 21.
17. ຖ້າເຮົາພັກດີຕໍ່ພະເຢໂຫວາ ເຮົາຈະໝັ້ນໃຈໄດ້ໃນເລື່ອງໃດ?
17 ຖ້າເຮົາພັກດີຕໍ່ພະເຢໂຫວາ ພະອົງຈະປະທານລາງວັນຢ່າງເຫຼືອລົ້ນແກ່ເຮົາ. ພະຄຳຂອງພະອົງບອກວ່າ “ທ່ານທັງຫຼາຍຈົ່ງຕັ້ງໝັ້ນຄົງຢູ່ ຢ່າສະເທືອນສະທ້ານ ຈົ່ງກະທຳການຂອງພະອົງເຈົ້າໃຫ້ບໍລິບູນທຸກເວລາ ທ່ານທັງຫຼາຍຮູ້ວ່າການຂອງທ່ານຝ່າຍພະອົງເຈົ້າບໍ່ເປັນການເປົ່າໆ.” (1 ໂກລິນໂທ 15:58) ພະຄຳຂອງພະອົງຍັງກ່າວວ່າ “ພະເຈົ້າບໍ່ເປັນບໍ່ຊອບທຳຈະລືມກິດຈະການຂອງທ່ານທັງຫຼາຍ ແລະຄວາມຮັກທີ່ທ່ານທັງຫຼາຍໄດ້ສຳແດງສຳລັບນາມຊື່ຂອງພະອົງ.” (ເຫບເລີ 6:10) ຢາໂກໂບ 5:11 ບອກວ່າ “ຈົ່ງເບິ່ງ ເຮົາທັງຫຼາຍເຄີຍຖືຄົນທັງຫຼາຍທີ່ອົດທົນວ່າເປັນສຸກຫຼາຍ ທ່ານທັງຫຼາຍໄດ້ຍິນຂ່າວເຖິງຄວາມອົດທົນຂອງທ່ານໂຢບ ແລະໄດ້ເຫັນການທີ່ສຸດຂອງພະອົງເຈົ້າ [“ຜົນທີ່ພະເຢໂຫວາປະທານແລ້ວ,” ລ.ມ.] ວ່າພະອົງເຈົ້າເຕັມດ້ວຍຄວາມອີ່ດູແລະດ້ວຍຄວາມເມດຕາ.” ຜົນທີ່ໂຢບໄດ້ຮັບເປັນແນວໃດ? “ພະເຢໂຫວາໄດ້ອວຍພອນໃຫ້ທ່ານໂຢບໃນທີ່ສຸດດີກວ່າໃນຕົ້ນເດີມຂອງທ່ານ.” (ໂຢບ 42:10-16) ແມ່ນແລ້ວ ພະເຢໂຫວາເປັນຜູ້ “ປະທານບຳເໜັດໃຫ້ແກ່ຄົນທັງຫຼາຍທີ່ປົງໃຈຊອກຫາພະອົງ.” (ເຫບເລີ 11:6) ຖືເປັນບຳເໜັດທີ່ວິເສດແທ້ໆເຊິ່ງເຮົາມຸ່ງຫວັງຈະໄດ້ຊີວິດຕະຫຼອດໄປເທິງແຜ່ນດິນໂລກທີ່ເປັນອຸທິຍານ!
18. ໃນທີ່ສຸດຄວາມຊົງຈຳອັນທຸກໃຈທີ່ເຮົາອາດມີຢູ່ຈະເປັນຢ່າງໃດ?
18 ການປົກຄອງຂອງພະເຈົ້າຈະແກ້ໄຂຄວາມເສຍຫາຍທີ່ເກີດກັບຄອບຄົວມະນຸດທັງສິ້ນຕະຫຼອດຫຼາຍພັນປີທີ່ຜ່ານມາ. ຄວາມຍິນດີໃນຕອນນັ້ນຈະມີຫຼາຍກວ່າຄວາມທຸກຍາກໃດໆທີ່ເກີດກັບເຮົາໃນຕອນນີ້. ຄວາມຊົງຈຳອັນເຈັບປວດເລື່ອງຄວາມທຸກທັງກາຍທຸກທັງໃຈໃນອະດີດຈະບໍ່ມາລົບກວນເຮົາອີກ. ຊີວິດປະຈຳວັນຂອງຄົນໃນໂລກໃໝ່ຈະເຕັມໄປດ້ວຍຄວາມຄິດແລະກິດຈະກຳທີ່ເສີມສ້າງເຊິ່ງຈະຄ່ອຍໆລຶບຄວາມຊົງຈຳທີ່ທຸກໃຈອອກໄປ. ດ້ວຍເຫດນັ້ນ ພະເຢໂຫວາຈຶ່ງໄດ້ກ່າວວ່າ “ເຮົາເນລະມິດສ້າງຟ້າທັງຫຼາຍໃໝ່ [ການປົກຄອງໃໝ່ແຫ່ງລາຊະອານາຈັກທາງພາກສະຫວັນເໜືອມະນຸດຊາດ] ກັບແຜ່ນດິນໂລກໃໝ່ [ສັງຄົມມະນຸດທີ່ຊອບທຳ] ແລະເຂົາຈະບໍ່ຈື່ຟ້າກັບດິນເດີມແລະສິ່ງນັ້ນຈະບໍ່ຂຶ້ນໃນໃຈ. ແຕ່ຈົ່ງຊົມຊື່ນຍິນດີແລະຈົ່ງຊື່ນໃຈສືບໆໄປເປັນນິດດ້ວຍສິ່ງຂອງທີ່ເຮົາເນລະມິດສ້າງ.” ແມ່ນແລ້ວ ໃນໂລກໃໝ່ຂອງພະເຢໂຫວາ ຄົນຊອບທຳຈະກ່າວວ່າ “ບັນດາແຜ່ນດິນໂລກກໍສຸກສະຫງັດງຽບ ເຂົາຕື່ນດ້ວຍລຳເພງຊະນະ.”—ເອຊາອີ 14:7; 65:17, 18.
ການພິຈາລະນາທົບທວນ
• ໃນຂະນະທີ່ປ່ອຍໃຫ້ຄວາມຊົ່ວມີຢູ່ຕໍ່ໄປ ພະເຢໂຫວາໄດ້ສະແດງຄວາມນັບຖືຢ່າງສູງຕໍ່ນາມຊື່ຂອງພະອົງເອງຢ່າງໃດ?
• ການທີ່ພະເຈົ້າອົດກັ້ນຕໍ່ “ເຄື່ອງສຳລັບໃສ່ຄວາມຄຽດ” ເຮັດໃຫ້ຄວາມເມດຕາຂອງພະອົງແພ່ມາເຖິງພວກເຮົາແນວໃດ?
• ເຮົາຄວນຈະພະຍາຍາມເບິ່ງສະພາບການຕ່າງໆທີ່ເຮົາຕ້ອງອົດທົນເອົານັ້ນຢ່າງໃດ?
[ຮູບພາບໜ້າ 67]
“ພະເຢໂຫວາໄດ້ອວຍພອນໃຫ້ທ່ານໂຢບໃນທີ່ສຸດດີກວ່າໃນຕົ້ນເດີມຂອງທ່ານ”