ບົດທີ 37
ຄຳພີໄບເບິນບອກຫຍັງເລື່ອງການເຮັດວຽກແລະການຫາເງິນ?
ເຈົ້າເຄີຍຮູ້ສຶກຕຶງຄຽດແລະກັງວົນກ່ຽວກັບເລື່ອງວຽກຫຼືເລື່ອງເງິນບໍ? ອາດບໍ່ແມ່ນເລື່ອງງ່າຍທີ່ເຮົາຈະເບິ່ງແຍງໂຕເອງໃຫ້ມີສິ່ງຈຳເປັນແລະມີເວລານະມັດສະການພະເຢໂຫວານຳ. ແຕ່ຄຳພີໄບເບິນມີຄຳແນະນຳທີ່ດີຫຼາຍທີ່ຈະຊ່ວຍເຮົາໄດ້.
1. ຄຳພີໄບເບິນບອກຫຍັງກ່ຽວກັບການເຮັດວຽກ?
ພະເຈົ້າຢາກໃຫ້ເຮົາມີຄວາມສຸກກັບການເຮັດວຽກ. ຄຳພີໄບເບິນບອກວ່າ ‘ສຳລັບມະນຸດ ບໍ່ມີຫຍັງດີໄປກວ່າ . . . ການມີຄວາມສຸກກັບວຽກໜັກທີ່ໂຕເອງເຮັດ.’ (ປັນຍາຈານ 2:24) ພະເຢໂຫວາເປັນພະເຈົ້າທີ່ດຸໝັ່ນເຮັດວຽກ. ຖ້າເຮົາເປັນຄົນດຸໝັ່ນ ເຮົາກໍກຳລັງຮຽນແບບເພິ່ນ. ເມື່ອເຮັດແບບນັ້ນເຮົາກໍຈະເຮັດໃຫ້ເພິ່ນມີຄວາມສຸກແລະເຮົາເອງກໍຈະມີຄວາມສຸກຄືກັນ.
ການເຮັດວຽກເປັນເລື່ອງສຳຄັນ. ແຕ່ເຮົາຕ້ອງບໍ່ໃຫ້ເລື່ອງນີ້ສຳຄັນກວ່າການນະມັດສະການພະເຢໂຫວາ. (ໂຢຮັນ 6:27) ເພິ່ນສັນຍາວ່າຖ້າເຮົາໃຫ້ການນະມັດສະການເພິ່ນເປັນສິ່ງສຳຄັນທີ່ສຸດໃນຊີວິດ ເພິ່ນຈະເບິ່ງແຍງເຮົາໃຫ້ມີສິ່ງຈຳເປັນ.
2. ຄວາມຄິດທີ່ຖືກຕ້ອງກ່ຽວກັບເລື່ອງເງິນແມ່ນຫຍັງ?
ຄຳພີໄບເບິນບອກວ່າ “ເງິນປົກປ້ອງຄົນໄດ້” ແຕ່ກໍເຕືອນເຮົານຳວ່າຄວາມສຸກບໍ່ໄດ້ຂຶ້ນຢູ່ກັບເງິນເທົ່ານັ້ນ. (ປັນຍາຈານ 7:12) ນອກຈາກນັ້ນ ຄຳພີໄບເບິນຍັງບອກເຮົາອີກວ່າເຮົາຕ້ອງບໍ່ເປັນຄົນຮັກເງິນ ແຕ່ໃຫ້ “ພໍໃຈໃນສິ່ງທີ່ມີຢູ່.” (ອ່ານເຮັບເຣີ 13:5) ຖ້າເຮົາພໍໃຈໃນສິ່ງທີ່ມີຢູ່ ເຮົາຈະບໍ່ກັງວົນຫຼາຍເກີນໄປວ່າຈະມີເງິນພໍໃຊ້ບໍ. ເຮົາຈະບໍ່ເປັນໜີ້ຖ້າບໍ່ຈຳເປັນແທ້ໆ. (ສຸພາສິດ 22:7) ເຮົາຈະບໍ່ຫຼິ້ນການພະນັນຫຼືເຂົ້າໄປຫຍຸ້ງກ່ຽວກັບທຸລະກິດບາງຢ່າງທີ່ສັນຍາວ່າຈະເຮັດໃຫ້ລວຍໄວ.
3. ເຮົາຈະໃຊ້ເງິນຂອງເຮົາເພື່ອຊ່ວຍເຫຼືອຄົນອື່ນໄດ້ແນວໃດ?
ພະເຢໂຫວາເປັນພະເຈົ້າທີ່ໃຈກວ້າງ ຖ້າເຮົາ “ເປັນຄົນໃຈກວ້າງແລະຮູ້ຈັກແບ່ງປັນ” ເຮົາກໍກຳລັງຮຽນແບບເພິ່ນ. (1 ຕີໂມທຽວ 6:18) ເຮົາສາມາດໃຊ້ເງິນທີ່ມີເພື່ອຊ່ວຍຄ່າໃຊ້ຈ່າຍໃນປະຊາຄົມແລະຊ່ວຍເຫຼືອຄົນທີ່ເດືອດຮ້ອນໂດຍສະເພາະພີ່ນ້ອງຄລິດສະຕຽນ. ສຳລັບພະເຢໂຫວາ ບໍ່ວ່າເຮົາຈະໃຫ້ໄດ້ຫຼາຍຫຼືໜ້ອຍກໍບໍ່ແມ່ນສິ່ງສຳຄັນທີ່ສຸດ. ຖ້າເຮົາໃຫ້ຈາກໃຈ ເຮົາກໍເຮັດໃຫ້ເພິ່ນມີຄວາມສຸກແລະເຮົາເອງກໍຈະມີຄວາມສຸກຄືກັນ.—ອ່ານກິດຈະການ 20:35
ຮຽນຮູ້ຫຼາຍຂຶ້ນ
ມາເບິ່ງນຳກັນວ່າ ມີປະໂຫຍດຫຍັງແດ່ຖ້າເຮົາມີຄວາມຄິດທີ່ຖືກຕ້ອງກ່ຽວກັບການເຮັດວຽກແລະພໍໃຈໃນສິ່ງທີ່ມີຢູ່.
4. ຍົກຍ້ອງພະເຢໂຫວາຈາກການເຮັດວຽກຂອງເຈົ້າ
ສາຍສຳພັນຂອງເຮົາກັບພະເຢໂຫວາຄວນສົ່ງຜົນຕໍ່ຄວາມຄິດຂອງເຮົາໃນເລື່ອງວຽກ. ເປີດວິດີໂອ ແລ້ວລົມກັນກ່ຽວກັບຄຳຖາມຕໍ່ໄປນີ້:
ຈາກວິດີໂອ ເຈົ້າປະທັບໃຈຫຍັງກ່ຽວກັບການປະພຶດຂອງເຈສັນໃນບ່ອນເຮັດວຽກແລະຄວາມຄິດຂອງລາວຕໍ່ການເຮັດວຽກ?
ລາວເຮັດແນວໃດເພື່ອຈະຈັດເວລາໃນການເຮັດວຽກໄດ້ຢ່າງເໝາະສົມ?
ອ່ານໂກໂລຊາຍ 3:23, 24 ແລ້ວລົມກັນກ່ຽວກັບຄຳຖາມຕໍ່ໄປນີ້:
ເປັນຫຍັງຈຶ່ງສຳຄັນທີ່ເຮົາຕ້ອງດຸໝັ່ນເຮັດວຽກ?
ການເຮັດວຽກເປັນເລື່ອງສຳຄັນ. ແຕ່ເຮົາຕ້ອງບໍ່ໃຫ້ເລື່ອງນີ້ສຳຄັນຫຼາຍກວ່າການນະມັດສະການພະເຢໂຫວາ
5. ຖ້າເຮົາພໍໃຈໃນສິ່ງທີ່ມີຢູ່ ເຮົາຈະໄດ້ຮັບປະໂຫຍດ
ຫຼາຍຄົນພະຍາຍາມຈະຫາເງິນໃຫ້ໄດ້ຫຼາຍໆ. ແຕ່ຄຳພີໄບເບິນບໍ່ໄດ້ແນະນຳໃຫ້ເຮົາເຮັດແບບນັ້ນ. ອ່ານ 1 ຕີໂມທຽວ 6:6-8 ແລ້ວລົມກັນກ່ຽວກັບຄຳຖາມຕໍ່ໄປນີ້:
ຄຳພີໄບເບິນແນະນຳເຮົາໃຫ້ເຮັດຫຍັງ?
ເຖິງວ່າເຮົາຈະບໍ່ຄ່ອຍມີເງິນ ແຕ່ເຮົາກໍມີຄວາມສຸກໄດ້. ເປີດວິດີໂອ ແລ້ວລົມກັນກ່ຽວກັບຄຳຖາມຕໍ່ໄປນີ້.
ເຖິງວ່າຈະບໍ່ຄ່ອຍມີເງິນ ແຕ່ອັນໃດເຮັດໃຫ້ຫຼາຍຄອບຄົວມີຄວາມສຸກ?
ຈະເປັນແນວໃດຖ້າເຮົາມີເງິນຫຼາຍຢູ່ແລ້ວ ແຕ່ກໍຍັງຢາກມີຫຼາຍຂຶ້ນອີກ? ພະເຢຊູເລົ່າເລື່ອງໜຶ່ງທີ່ເຮັດໃຫ້ເຫັນວ່າຄວາມຄິດແບບນີ້ເປັນອັນຕະລາຍ. ອ່ານລູກາ 12:15-21 ແລ້ວລົມກັນກ່ຽວກັບຄຳຖາມຕໍ່ໄປນີ້:
ເຈົ້າຮຽນຫຍັງໄດ້ຈາກເລື່ອງທີ່ພະເຢຊູເລົ່າ?—ເບິ່ງຂໍ້ 15
ອ່ານແລະປຽບທຽບ ສຸພາສິດ 10:22 ກັບ 1 ຕີໂມທຽວ 6:10. ແລ້ວລົມກັນກ່ຽວກັບຄຳຖາມຕໍ່ໄປນີ້:
ເຈົ້າຄິດວ່າລະຫວ່າງການໄດ້ສະໜິດກັບພະເຢໂຫວາກັບການມີເງິນຫຼາຍໆ ອັນໃດສຳຄັນກວ່າກັນ? ເປັນຫຍັງເຈົ້າຈຶ່ງຄິດແບບນັ້ນ?
ການຢາກໄດ້ເງິນຫຼາຍໆແລະບໍ່ຮູ້ຈັກພໍ ຈະເຮັດໃຫ້ມີບັນຫາຫຍັງແດ່?
6. ພະເຢໂຫວາຈະເບິ່ງແຍງເຮົາໃຫ້ມີສິ່ງຈຳເປັນ
ເມື່ອເຮົາມີບັນຫາເລື່ອງວຽກຫຼືເລື່ອງເງິນ ຕອນນັ້ນແຫຼະທີ່ເຮົາຈະຮູ້ວ່າເຮົາໄວ້ວາງໃຈພະເຢໂຫວາແທ້ໆຫຼືບໍ່. ເປີດວິດີໂອເພື່ອເບິ່ງວ່າເຮົາຈະເຮັດຫຍັງໄດ້ເມື່ອເຮົາຕ້ອງເຈິກັບບັນຫາເຫຼົ່ານັ້ນ ແລ້ວລົມກັນກ່ຽວກັບຄຳຖາມຕໍ່ໄປນີ້:
ຈາກວິດີໂອ ພີ່ນ້ອງຊາຍຄົນໜຶ່ງຕ້ອງເຈິກັບບັນຫາຫຍັງແດ່?
ລາວເຮັດຫຍັງເພື່ອຈະຮັບມືກັບບັນຫາໄດ້?
ອ່ານມັດທາຍ 6:25-34 ແລ້ວລົມກັນກ່ຽວກັບຄຳຖາມຕໍ່ໄປນີ້:
ຖ້າເຮົາໃຫ້ການນະມັດສະການພະເຢໂຫວາເປັນສິ່ງສຳຄັນທີ່ສຸດໃນຊີວິດ ເພິ່ນສັນຍາວ່າຈະເຮັດຫຍັງເພື່ອເຮົາ?
ບາງຄົນເວົ້າວ່າ: “ໄປປະຊຸມທຸກເທື່ອບໍ່ໄດ້ດອກ. ຄົນເຮົາຕ້ອງທຳມາຫາກິນ.”
ຂໍ້ຄຳພີໃດທີ່ເຮັດໃຫ້ເຈົ້າໝັ້ນໃຈວ່າ ດີທີ່ສຸດທີ່ຈະໃຫ້ການນະມັດສະການພະເຢໂຫວາເປັນສິ່ງສຳຄັນທີ່ສຸດໃນຊີວິດ?
ສະຫຼຸບ
ວຽກອາຊີບແລະເງິນເປັນສິ່ງສຳຄັນ ແຕ່ເຮົາບໍ່ຄວນໃຫ້ສິ່ງເຫຼົ່ານີ້ສຳຄັນຫຼາຍກວ່າການຮັບໃຊ້ພະເຢໂຫວາ.
ຄຳຖາມທົບທວນ
ອັນໃດຈະຊ່ວຍເຮົາໃຫ້ມີຄວາມຄິດທີ່ຖືກຕ້ອງໃນເລື່ອງວຽກ?
ຖ້າເຮົາພໍໃຈໃນສິ່ງທີ່ມີຢູ່ ເຮົາຈະໄດ້ຮັບປະໂຫຍດແນວໃດ?
ເຈົ້າຈະເຮັດໃຫ້ເຫັນແນວໃດວ່າ ເຈົ້າໄວ້ໃຈຄຳສັນຍາຂອງພະເຢໂຫວາທີ່ຈະເບິ່ງແຍງຄົນຂອງເພິ່ນ?
ເບິ່ງເພີ່ມເຕີມ
ຄຳພີໄບເບິນບອກບໍວ່າເງິນເປັນສິ່ງທີ່ບໍ່ດີ.
“ເງິນເປັນຮາກເຫງົ້າຂອງຄວາມຊົ່ວທຸກຊະນິດບໍ?” (ບົດຄວາມໃນເວັບໄຊ)
ພະເຈົ້າມັກການໃຫ້ແບບໃດ.
“ຄຳພີໄບເບິນເວົ້າແນວໃດກ່ຽວກັບການໃຫ້?” (ບົດຄວາມໃນເວັບໄຊ)
ການພະນັນເປັນເລື່ອງທີ່ບໍ່ມີພິດມີໄພຫຍັງບໍ?
“ທັດສະນະຂອງຄຳພີໄບເບິນ—ການພະນັນ” (ຕື່ນເຖີດ! ເດືອນມີນາ ປີ 2015)
ອັນໃດເຮັດໃຫ້ຜູ້ຊາຍຄົນໜຶ່ງທີ່ເປັນນັກພະນັນແລະຂີ້ລັກປ່ຽນແປງໂຕເອງໄດ້.
“ຂ້ອຍມັກແຂ່ງມ້າເປັນຊີວິດຈິດໃຈ” (ຫໍສັງເກດການ 1 ພະຈິກ 2011)