ບົດທີ 12
ເຈົ້າຈະເປັນໝູ່ກັບພະເຈົ້າໄດ້ແນວໃດ?
1, 2. ມີໃຜແດ່ທີ່ເປັນໝູ່ຂອງພະເຢໂຫວາ?
ເຈົ້າຢາກເປັນໝູ່ກັບຄົນແບບໃດ? ເຈົ້າຄືຊິຢາກເປັນໝູ່ກັບຄົນທີ່ເຈົ້າມັກ ຄົນທີ່ນິດໄສດີແລະເຂົ້າກັບເຈົ້າໄດ້.
2 ພະເຢໂຫວາພະເຈົ້າເລືອກບາງຄົນໃຫ້ເປັນໝູ່ກັບພະອົງ. ຕົວຢ່າງເຊັ່ນ: ອັບຣາຮາມເປັນໝູ່ຄົນໜຶ່ງຂອງພະເຢໂຫວາ. (ເອຊາອີ 41:8; ຢາໂກໂບ 2:23) ພະເຢໂຫວາຍັງມັກດາວິດນຳອີກ ພະອົງບອກວ່າລາວເປັນ ‘ຄົນທີ່ພະອົງພໍໃຈ.’ (ກິດຈະການ 13:22) ນອກຈາກນັ້ນ ພະເຢໂຫວາຍັງຖືວ່າຜູ້ພະຍາກອນດານີເອນເປັນໝູ່ທີ່ “ມີຄ່າຫຼາຍ” ສຳລັບພະອົງ.—ດານຽນ 9:23, ລ.ມ.
3. ເປັນຫຍັງອັບຣາຮາມ ດາວິດ ແລະດານີເອນຈຶ່ງເປັນໝູ່ຂອງພະເຢໂຫວາໄດ້?
3 ອັບຣາຮາມ ດາວິດ ແລະດານີເອນເປັນໝູ່ຂອງພະເຢໂຫວາໄດ້ແນວໃດ? ພະເຢໂຫວາເວົ້າກັບອັບຣາຮາມວ່າ: “ເຈົ້າໄດ້ເຊື່ອຟັງຄວາມເຮົາ.” (ຕົ້ນເດີມ 22:18) ນີ້ສະແດງວ່າພະເຢໂຫວາເປັນໝູ່ກັບຄົນທີ່ຖ່ອມຕົວແລະເຊື່ອຟັງພະອົງ. ແມ່ນແຕ່ຄົນໝົດຊາດກໍເປັນໝູ່ກັບພະອົງໄດ້ຄືກັນ. ພະເຢໂຫວາບອກຊາດອິດສະຣາເອນວ່າ: “ຈົ່ງຟັງຄວາມຂອງເຮົາແລະເຮົາຈະເປັນພະເຈົ້າຂອງພວກທ່ານແລະທ່ານທັງຫຼາຍຈະເປັນພວກ [“ປະຊາຊົນ,” ລ.ມ.] ຂອງເຮົາ.” (ເຢເຣມີ 7:23) ດັ່ງນັ້ນ ຖ້າເຈົ້າຢາກເປັນໝູ່ກັບພະເຢໂຫວາ ເຈົ້າຕ້ອງເຊື່ອຟັງພະອົງ.
ພະເຢໂຫວາຊ່ວຍເຫຼືອແລະປົກປ້ອງຄົນທີ່ເປັນໝູ່ຂອງພະອົງ
4, 5. ພະເຢໂຫວາຊ່ວຍເຫຼືອແລະປົກປ້ອງໝູ່ຂອງພະອົງແນວໃດ?
4 ຄຳພີໄບເບິນບອກວ່າພະເຢໂຫວາຊອກຫາວິທີ “ເພື່ອຈະໃຊ້ອຳນາດຂອງພະອົງຊ່ວຍເຫຼືອຄົນທີ່ຮັບໃຊ້ພະອົງສຸດຫົວໃຈ.” (2 ຂ່າວຄາວ 16:9, ລ.ມ.) ໃນຄຳເພງ 32:8 ພະເຢໂຫວາສັນຍາກັບຄົນທີ່ເປັນໝູ່ຂອງພະອົງວ່າ: “ເຮົາຈະສອນເຈົ້າ [“ເຮົາຈະຊ່ວຍເຈົ້າໃຫ້ມີຄວາມເຂົ້າໃຈ,” ລ.ມ.] ເຮົາຈະບອກທາງທີ່ເຈົ້າຕ້ອງທຽວໄປ. ເຮົາຈະເຕືອນສະຕິເຈົ້າດ້ວຍຕາຂອງເຮົາແຍງເບິ່ງເຈົ້າ.”
5 ຊາຕານສັດຕູທີ່ມີອຳນາດຫຼາຍຢາກໃຫ້ເຮົາເຊົາເປັນໝູ່ກັບພະເຢໂຫວາ ແຕ່ພະອົງຈະປົກປ້ອງເຮົາ ພະອົງຢາກຊ່ວຍເຮົາ. (ອ່ານຄຳເພງ 55:22) ຖ້າເຮົາເປັນໝູ່ຂອງພະເຢໂຫວາ ຮັບໃຊ້ພະອົງຢ່າງສຸດຫົວໃຈ ແລະສັດຊື່ພັກດີຕໍ່ພະອົງສະເໝີເຖິງວ່າຈະມີບັນຫາຫຍຸ້ງຍາກສ່ຳໃດກໍຕາມ ເຮົາກໍຈະໝັ້ນໃຈໃນພະເຢໂຫວາຄືກັບທີ່ຜູ້ຂຽນຄຳເພງໝັ້ນໃຈ. ລາວບອກວ່າ: ‘ຂ້ານ້ອຍຈະບໍ່ຫວັ່ນໄຫວຍ້ອນພະອົງຢູ່ຂ້າງ [ມື] ຂວາຂ້ານ້ອຍ.’ (ຄຳເພງ 16:8; 63:8) ຊາຕານເຮັດແນວໃດເພື່ອໃຫ້ເຮົາເຊົາເປັນໝູ່ກັບພະເຈົ້າ?
ຄຳກ່າວຫາຂອງຊາຕານ
6. ຊາຕານກ່າວຫາມະນຸດແນວໃດ?
6 ໃນບົດທີ 11 ຊາຕານທ້າທາຍພະເຢໂຫວາແລະໃສ່ຮ້າຍພະອົງວ່າເວົ້າຕົວະ ມັນບອກວ່າບໍ່ຍຸຕິທຳເລີຍທີ່ພະເຢໂຫວາບໍ່ຍອມໃຫ້ອາດາມກັບເອວາຕັດສິນໃຈເອງວ່າສິ່ງໃດຖືກສິ່ງໃດຜິດ. ປຶ້ມໂຢບຍັງບອກເຮົາວ່າຊາຕານກ່າວຫາຄົນທີ່ຢາກເປັນໝູ່ກັບພະເຈົ້ານຳອີກວ່າ ພວກເຂົາຮັບໃຊ້ພະອົງກໍຍ້ອນຢາກໄດ້ຜົນປະໂຫຍດ ບໍ່ແມ່ນຍ້ອນພວກເຂົາຮັກພະອົງ. ຊາຕານຍັງອ້າງວ່າມັນສາມາດເຮັດໃຫ້ຜູ້ໃດກໍໄດ້ເຊົາເປັນໝູ່ກັບພະເຈົ້າ. ໃຫ້ມາເບິ່ງວ່າເຮົາຮຽນຫຍັງໄດ້ຈາກຕົວຢ່າງຂອງໂຢບ ແລະພະເຢໂຫວາປົກປ້ອງໂຢບແນວໃດ.
7, 8. (ກ) ໂຢບແມ່ນໃຜ? (ຂ) ຊາຕານເວົ້າໃຫ້ໂຢບແນວໃດ?
7 ໂຢບແມ່ນໃຜ? ໂຢບແມ່ນໝູ່ແທ້ຂອງພະເຢໂຫວາ. ລາວເປັນຄົນດີຄົນໜຶ່ງ ຜູ້ຊາຍຄົນນີ້ເຄີຍມີຊີວິດຢູ່ປະມານ 3.600 ປີມາແລ້ວ. ພະເຢໂຫວາບອກວ່າ ຕອນນັ້ນບໍ່ມີຜູ້ໃດໃນໂລກທີ່ເປັນຄືກັບລາວ. ໂຢບເຄົາລົບແລະເຊື່ອຟັງພະເຈົ້າ ແລະຍັງກຽດຊັງສິ່ງທີ່ຊົ່ວນຳອີກ.—ໂຢບ 1:8
8 ຊາຕານກ່າວຫາໂຢບວ່າຮັບໃຊ້ພະເຈົ້າກໍຍ້ອນຫວັງຜົນປະໂຫຍດ. ຊາຕານເວົ້າກັບພະເຢໂຫວາວ່າ: “ພະອົງປົກປ້ອງຕົວເຂົາ ຄອບຄົວຂອງເຂົາ ແລະທຸກສິ່ງທີ່ເຂົາມີບໍ່ແມ່ນບໍ? ເຂົາເຮັດຫຍັງພະອົງກໍອວຍພອນ ແລະຝູງສັດຂອງເຂົາກໍເພີ່ມຂຶ້ນຈົນເຕັມແຜ່ນດິນ. ແຕ່ລອງເຮັດໃຫ້ເຂົາສູນເສຍທຸກສິ່ງທຸກຢ່າງເບິ່ງແມ້ ເຂົາຈະແຊ່ງດ່າພະອົງແນ່ນອນ.”—ໂຢບ 1:10, 11, ລ.ມ.
9. ພະເຢໂຫວາຍອມໃຫ້ຊາຕານເຮັດຫຍັງ?
9 ຊາຕານກ່າວຫາໂຢບວ່າຮັບໃຊ້ພະເຢໂຫວາຍ້ອນຢາກໄດ້ບາງສິ່ງບາງຢ່າງຈາກພະອົງເທົ່ານັ້ນ. ຊາຕານຍັງເວົ້າອີກວ່າມັນສາມາດເຮັດໃຫ້ໂຢບເຊົາຮັບໃຊ້ພະເຢໂຫວາໄດ້. ເຖິງວ່າພະເຢໂຫວາບໍ່ເຫັນດີນຳ ແຕ່ພະອົງກໍຍອມໃຫ້ມັນທົດສອບໂຢບເພື່ອພິສູດວ່າໂຢບເປັນໝູ່ກັບພະອົງຍ້ອນລາວຮັກພະອົງແທ້ໆ.
ຊາຕານໂຈມຕີໂຢບ
10. ຊາຕານໂຈມຕີໂຢບເຖິງຂັ້ນໃດ ແລະສິ່ງເຫຼົ່ານີ້ເຮັດໃຫ້ໂຢບເຊົາສັດຊື່ພັກດີຕໍ່ພະເຈົ້າບໍ?
10 ທຳອິດ ຊາຕານໂຈມຕີໂຢບໂດຍເຮັດໃຫ້ລາວສູນເສຍຝູງສັດທັງໝົດ. ຈາກນັ້ນ ຊາຕານເຮັດໃຫ້ຄົນຮັບໃຊ້ເກືອບທັງໝົດຂອງໂຢບຕາຍ. ໂຢບບໍ່ເຫຼືອຫຍັງເລີຍ. ສຸດທ້າຍ ຊາຕານເຮັດໃຫ້ລູກທັງ 10 ຄົນຂອງໂຢບຕາຍໃນພາຍຸ. ແຕ່ໂຢບກໍຍັງສັດຊື່ພັກດີຕໍ່ພະເຢໂຫວາ. ຄຳພີໄບເບິນບອກວ່າ “ເຖິງຈະເຈິເຫດການທັງໝົດນີ້ ໂຢບກໍບໍ່ໄດ້ເຮັດບາບຫຼືກ່າວຫາວ່າພະເຈົ້າເຮັດຜິດເລີຍ.”—ໂຢບ 1:12-19, 22, ລ.ມ.
ພະເຢໂຫວາອວຍພອນໂຢບຍ້ອນລາວຮັກແລະສັດຊື່ພັກດີຕໍ່ພະອົງ
11. (ກ) ຊາຕານເຮັດຫຍັງໃຫ້ໂຢບອີກ? (ຂ) ໂຢບຍັງສັດຊື່ພັກດີຕໍ່ພະເຈົ້າບໍ?
11 ຊາຕານຍັງບໍ່ຍອມຢຸດ. ມັນທ້າທາຍພະເຈົ້າໂດຍບອກວ່າ: “ລອງທຳຮ້າຍຕົວເຂົາເບິ່ງແມ້ ເຂົາຈະແຊ່ງດ່າພະອົງແນ່ນອນ.” ຊາຕານເຮັດໃຫ້ໂຢບເຈັບປ່ວຍເປັນພະຍາດທີ່ເຈັບປວດທໍລະມານຫຼາຍ. (ໂຢບ 2:5, 7, ລ.ມ.) ແຕ່ໂຢບກໍຍັງສັດຊື່ພັກດີຕໍ່ພະເຢໂຫວາຢູ່. ລາວເວົ້າວ່າ: “ຂ້ອຍຈະຊື່ສັດຕໍ່ພະເຈົ້າຈົນວັນຕາຍ!”—ໂຢບ 27:5, ລ.ມ.
12. ໂຢບເຮັດຫຍັງທີ່ພິສູດວ່າຊາຕານເວົ້າຕົວະ?
12 ໂຢບບໍ່ຮູ້ຫຍັງເລີຍກ່ຽວກັບເລື່ອງທີ່ຊາຕານກ່າວຫາ ແລະບໍ່ຮູ້ຊ້ຳວ່າເປັນຫຍັງລາວຕ້ອງເຈິຄວາມທຸກຫຼາຍຂະໜາດນີ້. ລາວຄິດວ່າພະເຢໂຫວາເຮັດໃຫ້ລາວຕ້ອງເຈິກັບເລື່ອງຮ້າຍໆເຫຼົ່ານີ້. (ໂຢບ 6:4; 16:11-14) ແຕ່ເຖິງຢ່າງນັ້ນ ໂຢບກໍຍັງສັດຊື່ພັກດີຕໍ່ພະເຢໂຫວາ. ນີ້ເຮັດໃຫ້ເຫັນຊັດເຈນເລີຍວ່າໂຢບເປັນໝູ່ກັບພະເຈົ້າກໍຍ້ອນລາວຮັກພະອົງ ບໍ່ແມ່ນຍ້ອນຫວັງຜົນປະໂຫຍດ. ດັ່ງນັ້ນ ທັງໝົດທີ່ຊາຕານໃສ່ຮ້າຍໂຢບຈຶ່ງເປັນເລື່ອງຕົວະ!
13. ຜົນເປັນແນວໃດເມື່ອໂຢບສັດຊື່ພັກດີຕໍ່ພະເຈົ້າ?
13 ເຖິງແມ່ນໂຢບບໍ່ຮູ້ວ່າເກີດຫຍັງຂຶ້ນໃນສະຫວັນ ແຕ່ລາວກໍຍັງສັດຊື່ພັກດີຕໍ່ພະເຈົ້າແລະພິສູດວ່າຊາຕານຊົ່ວຮ້າຍ. ດັ່ງນັ້ນ ພະເຢໂຫວາຈຶ່ງອວຍພອນໂຢບໝູ່ທີ່ພັກດີຂອງພະອົງ.—ໂຢບ 42:12-17
ຊາຕານໃສ່ຮ້າຍເຈົ້າຄືກັນ
14, 15. ຊາຕານກ່າວຫາທຸກຄົນວ່າແນວໃດ?
14 ເຮົາໄດ້ບົດຮຽນສຳຄັນຈາກສິ່ງທີ່ເກີດຂຶ້ນກັບໂຢບ. ໃນທຸກມື້ນີ້ຊາຕານກ່າວຫາວ່າເຮົາຮັບໃຊ້ພະເຢໂຫວາກໍຍ້ອນຫວັງຜົນປະໂຫຍດຈາກພະອົງ. ໃນໂຢບ 2:4 (ລ.ມ.) ຊາຕານອ້າງວ່າ: “ມະນຸດຍອມສະລະໄດ້ທຸກຢ່າງເພື່ອໃຫ້ຕົວເອງມີຊີວິດລອດ.” ດັ່ງນັ້ນ ຊາຕານບໍ່ໄດ້ກ່າວຫາໂຢບຄົນດຽວ ແຕ່ມັນກ່າວຫາທຸກຄົນລວມທັງເຈົ້ານຳວ່າເປັນຄົນເຫັນແກ່ຕົວ. ຫຼາຍຮ້ອຍປີຫຼັງຈາກທີ່ໂຢບຕາຍໄປແລ້ວ ຊາຕານກໍຍັງກ່າວຫາພະເຢໂຫວາແລະຄົນທີ່ຮັບໃຊ້ພະອົງ. ດັ່ງນັ້ນ ພະເຢໂຫວາຈຶ່ງບອກໃນສຸພາສິດ 27:11 ວ່າ: “ລູກຊາຍເອີຍຈົ່ງເປັນຄົນປັນຍາ ແລະຈົ່ງໃຫ້ໃຈຂ້ອຍຊື່ນບານເພື່ອຂ້ອຍອາດຈະຕອບຄົນທີ່ປະຈານຂາຍໜ້າ [ຫຼືໃສ່ຮ້າຍ] ຂ້ອຍໄດ້.”
15 ເຈົ້າເລືອກເຊື່ອຟັງພະເຢໂຫວາແລະເປັນໝູ່ທີ່ພັກດີຂອງພະອົງໄດ້ ຖ້າເຮັດແບບນັ້ນເຈົ້າກໍຈະພິສູດວ່າຊາຕານເວົ້າຕົວະ. ເຖິງວ່າເຈົ້າຕ້ອງປ່ຽນແປງຊີວິດຂະໜາດໃຫຍ່ເພື່ອຈະເປັນໝູ່ກັບພະເຈົ້າ ແຕ່ການເຮັດແບບນັ້ນກໍຖືວ່າຄຸ້ມຄ່າແລະເປັນການຕັດສິນໃຈທີ່ດີທີ່ສຸດໃນຊີວິດ. ການຕັດສິນໃຈນີ້ສຳຄັນຫຼາຍ ຍ້ອນຊາຕານອ້າງວ່າເຈົ້າຈະບໍ່ສັດຊື່ຕໍ່ພະເຈົ້າຖ້າຊີວິດເຈົ້າມີບັນຫາ. ມັນພະຍາຍາມໃຊ້ເລ່ຫຼ່ຽມເພື່ອເຮັດໃຫ້ເຮົາບໍ່ສັດຊື່ຕໍ່ພະເຈົ້າ. ມັນເຮັດແນວໃດ?
16. (ກ) ຊາຕານໃຊ້ວິທີໃດແດ່ເພື່ອເຮັດໃຫ້ຜູ້ຄົນເຊົາຮັບໃຊ້ພະເຢໂຫວາ? (ຂ) ຊາຕານອາດໃຊ້ວິທີໃດກັບເຈົ້າເພື່ອໃຫ້ເຊົາຮັບໃຊ້ພະເຢໂຫວາ?
16 ຊາຕານໃຊ້ຫຼາຍວິທີເພື່ອເຮັດໃຫ້ເຮົາເຊົາເປັນໝູ່ກັບພະເຈົ້າ. ມັນໂຈມຕີເຮົາຄືກັບ “ໂຕສິງທີ່ຮ້ອງແຜດສຽງກຳລັງຍ່າງໄປຍ່າງມາເພື່ອຊອກຫາຄົນທີ່ມັນຈະກັດກິນໄດ້.” (1 ເປໂຕ 5:8) ດັ່ງນັ້ນ ຢ່າແປກໃຈຖ້າໝູ່ເພື່ອນ ຄົນໃນຄອບຄົວ ຫຼືຜູ້ໃດກໍຕາມພະຍາຍາມຫ້າມບໍ່ໃຫ້ເຈົ້າຮຽນຄຳພີໄບເບິນແລະເຮັດຕາມສິ່ງທີ່ຄຳພີໄບເບິນສອນ. ເມື່ອເຈິແບບນີ້ເຈົ້າອາດຮູ້ສຶກຄືກັບວ່າກຳລັງຖືກໂຈມຕີ.a (ໂຢຮັນ 15:19, 20) ນອກຈາກນັ້ນ ຊາຕານຍັງປອມຕົວເປັນ “ທູດຂອງຄວາມສະຫວ່າງ.” ມັນພະຍາຍາມເຮັດໃຫ້ເຮົາບໍ່ເຊື່ອຟັງພະເຢໂຫວາໂດຍຕົວະເຮົາໃຫ້ເຮັດຕາມຄຳສອນຂອງມັນແທນທີ່ຈະເຮັດຕາມຄຳສອນຂອງພະເຢໂຫວາ. (2 ໂກຣິນໂທ 11:14) ອີກວິທີໜຶ່ງທີ່ຊາຕານໃຊ້ເພື່ອເຮັດໃຫ້ເຮົາເຊົາຮັບໃຊ້ພະເຢໂຫວາກໍຄື ເຮັດໃຫ້ເຮົາຄິດວ່າເຮົາບໍ່ດີພໍທີ່ຈະຮັບໃຊ້ພະອົງ.—ສຸພາສິດ 24:10
ເຊື່ອຟັງພະເຢໂຫວາ
17. ສິ່ງໃດຈະຊ່ວຍເຮົາໃຫ້ເຊື່ອຟັງພະເຢໂຫວາ?
17 ຖ້າເຮົາຢາກພິສູດວ່າຊາຕານເວົ້າຕົວະ ເຮົາຕ້ອງເຊື່ອຟັງພະເຢໂຫວາ. ສິ່ງໃດຈະຊ່ວຍເຮົາໃຫ້ເຊື່ອຟັງພະອົງ? ຄຳພີໄບເບິນບອກວ່າ: “ເຈົ້າຕ້ອງຮັກພະເຢໂຫວາພະເຈົ້າຂອງເຈົ້າສຸດຫົວໃຈ ສຸດຊີວິດ ສຸດຄວາມຄິດ ແລະສຸດກຳລັງ.” (ມາຣະໂກ 12:30) ເຮົາເຊື່ອຟັງພະເຢໂຫວາຍ້ອນເຮົາຮັກພະອົງ. ເມື່ອເຮົາຮັກພະເຢໂຫວາຫຼາຍຂຶ້ນເລື້ອຍໆ ເຮົາກໍຢາກຈະເຮັດທຸກສິ່ງທີ່ພະອົງບອກ. ອັກຄະສາວົກໂຢຮັນຂຽນວ່າ: “ການຮັກພະເຈົ້າໝາຍເຖິງການເຊື່ອຟັງຄຳສັ່ງຂອງພະອົງ ແລະຄຳສັ່ງຂອງພະອົງບໍ່ຍາກເກີນໄປ.”—1 ໂຢຮັນ 5:3
18, 19. (ກ) ມີຫຍັງແດ່ທີ່ພະເຢໂຫວາບອກວ່າເປັນສິ່ງທີ່ຜິດ? (ຂ) ເຮົາຮູ້ໄດ້ແນວໃດວ່າພະເຢໂຫວາບໍ່ເຄີຍບອກໃຫ້ເຮົາເຮັດໃນສິ່ງທີ່ເຮົາເຮັດບໍ່ໄດ້?
18 ມີຫຍັງແດ່ທີ່ພະເຢໂຫວາບອກວ່າເປັນສິ່ງທີ່ຜິດ? ໃຫ້ເບິ່ງບາງຕົວຢ່າງໃນຂອບ “ກຽດຊັງສິ່ງທີ່ພະເຢໂຫວາກຽດຊັງ.” ທຳອິດ ເຈົ້າອາດຄິດວ່າບາງສິ່ງທີ່ພະເຢໂຫວາກຽດຊັງບໍ່ແມ່ນເລື່ອງທີ່ຮ້າຍແຮງປານໃດ ແຕ່ຖ້າເຈົ້າອ່ານຄຳພີໄບເບິນແລະຄິດຄັກໆ ເຈົ້າຈະຮູ້ວ່າແທ້ໆແລ້ວການເຊື່ອຟັງກົດໝາຍຂອງພະເຢໂຫວາເປັນເລື່ອງທີ່ສະຫຼາດ. ນອກຈາກນັ້ນ ອາດມີບາງຢ່າງທີ່ເຈົ້າຮູ້ສຶກວ່າຕ້ອງປ່ຽນແປງ ເຖິງວ່າບາງຄັ້ງຈະເປັນເລື່ອງຍາກ ແຕ່ຖ້າເຈົ້າປ່ຽນ ເຈົ້າຈະເປັນໝູ່ທີ່ພັກດີຂອງພະເຈົ້າ ເຈົ້າຈະສະບາຍໃຈແລະມີຄວາມສຸກ. (ເອຊາອີ 48:17, 18) ແລ້ວເຮົາຈະຮູ້ໄດ້ແນວໃດວ່າເຮົາສາມາດປ່ຽນແປງຕົວເອງໄດ້?
19 ພະເຢໂຫວາບໍ່ເຄີຍບອກໃຫ້ເຮົາເຮັດໃນສິ່ງທີ່ເຮົາເຮັດບໍ່ໄດ້. (ພະບັນຍັດ 30:11-14) ພະອົງເປັນໝູ່ແທ້ ແລະພະອົງຮູ້ຈັກຕົວເຮົາດີກວ່າທີ່ເຮົາຮູ້ຈັກຕົວເອງດ້ວຍຊ້ຳ. ພະອົງຮູ້ວ່າເຮົາມີຈຸດດີຫຼືຈຸດອ່ອນຢູ່ບ່ອນໃດ. (ຄຳເພງ 103:14) ອັກຄະສາວົກໂປໂລໃຫ້ກຳລັງໃຈເຮົາວ່າ: “ພະເຈົ້າສັດຊື່ ພະອົງຈະບໍ່ປ່ອຍໃຫ້ພວກເຈົ້າຖືກລໍ້ໃຈຈົນອົດທົນບໍ່ໄດ້ ແລະເມື່ອພວກເຈົ້າຖືກລໍ້ໃຈ ພະອົງຈະຊ່ວຍພວກເຈົ້າໃຫ້ມີທາງອອກເພື່ອຈະອົດທົນໄດ້.” (1 ໂກຣິນໂທ 10:13) ເຮົາໝັ້ນໃຈໄດ້ວ່າພະເຢໂຫວາຈະໃຫ້ກຳລັງເຮົາສະເໝີເພື່ອເຮັດສິ່ງທີ່ຖືກຕ້ອງ. ພະອົງຈະໃຫ້ “ກຳລັງທີ່ຫຼາຍກວ່າປົກກະຕິ” ເພື່ອຊ່ວຍເຈົ້າໃຫ້ອົດທົນເມື່ອເຈິກັບສະຖານະການທີ່ກົດດັນ. (2 ໂກຣິນໂທ 4:7) ຫຼັງຈາກທີ່ໂປໂລໄດ້ຮັບຄວາມຊ່ວຍເຫຼືອຈາກພະເຢໂຫວາຫຼາຍຄັ້ງ ລາວເວົ້າໄດ້ເຕັມປາກວ່າ: “ຂ້ອຍມີກຳລັງອົດທົນໄດ້ທຸກສິ່ງຍ້ອນພະອົງໃຫ້ກຳລັງແກ່ຂ້ອຍ.”—ຟີລິບປອຍ 4:13
ຮຽນຮູ້ທີ່ຈະຮັກສິ່ງທີ່ພະເຈົ້າຮັກ
20. ນິດໄສແລະຄຸນລັກສະນະອັນໃດຂອງພະເຢໂຫວາທີ່ເຮົາຄວນຮຽນແບບ ແລະເປັນຫຍັງເຮົາຕ້ອງເຮັດແບບນັ້ນ?
20 ຖ້າເຮົາຢາກເປັນໝູ່ກັບພະເຢໂຫວາ ເຮົາຕ້ອງເຊົາເຮັດສິ່ງທີ່ພະເຢໂຫວາບອກວ່າຜິດ ແຕ່ສ່ຳນັ້ນຍັງບໍ່ພໍ. (ໂຣມ 12:9) ໝູ່ຂອງພະເຈົ້າຕ້ອງຮັກສິ່ງທີ່ພະອົງຮັກນຳອີກ. ເລື່ອງນີ້ອະທິບາຍໄວ້ໃນຄຳເພງ 15:1-5 (ອ່ານ). ນອກຈາກນັ້ນ ໝູ່ຂອງພະເຢໂຫວາຍັງຕ້ອງຮຽນແບບນິດໄສແລະຄຸນລັກສະນະຂອງພະອົງ ແລະສະແດງ “ຄວາມຮັກ ຄວາມຍິນດີ ສັນຕິສຸກ ຄວາມອົດທົນອົດກັ້ນ ຄວາມກະລຸນາ ຄວາມດີ ຄວາມເຊື່ອ ຄວາມອ່ອນໂຍນ ແລະການຄວບຄຸມຕົວເອງ.”—ຄາລາເຕຍ 5:22, 23
21. ເຈົ້າຈະມີລັກສະນະນິດໄສທີ່ດີແບບທີ່ພະເຈົ້າມັກໄດ້ແນວໃດ?
21 ເຈົ້າຈະມີລັກສະນະນິດໄສທີ່ດີແບບນັ້ນໄດ້ແນວໃດ? ເຈົ້າຕ້ອງຮຽນຮູ້ວ່າມີຫຍັງແດ່ທີ່ພະເຢໂຫວາມັກໂດຍອ່ານແລະຮຽນຄຳພີໄບເບິນເປັນປະຈຳ. (ເອຊາອີ 30:20, 21) ຖ້າເຈົ້າເຮັດແບບນັ້ນ ເຈົ້າກໍຈະຮັກພະເຢໂຫວາຫຼາຍຂຶ້ນເລື້ອຍໆ ແລ້ວເຈົ້າກໍຈະຢາກເຊື່ອຟັງແລະເຮັດຕາມພະອົງຫຼາຍຂຶ້ນ.
22. ຈະມີຜົນດີຫຍັງຖ້າເຈົ້າເຊື່ອຟັງພະເຢໂຫວາ?
22 ເຈົ້າອາດຕ້ອງປ່ຽນແປງບາງສິ່ງບາງຢ່າງ ການປ່ຽນແປງນັ້ນອາດສົມທຽບໄດ້ກັບການແກ້ເຄື່ອງນຸ່ງຊຸດເກົ່າອອກແລ້ວໃສ່ຊຸດໃໝ່. ຄຳພີໄບເບິນບອກວ່າ ເຈົ້າຕ້ອງ “ຖິ້ມລັກສະນະນິດໄສເກົ່າ” ແລະໃສ່ “ລັກສະນະນິດໄສໃໝ່.” (ໂກໂລຊາຍ 3:9, 10) ເຖິງວ່າການປ່ຽນແປງແລະການເຊື່ອຟັງພະເຢໂຫວາອາດບໍ່ແມ່ນເລື່ອງງ່າຍ ແຕ່ພະອົງສັນຍາວ່າເຮົາຈະໄດ້ຮັບ “ຜົນດີມາກມາຍ.” (ຄຳເພງ 19:11, ລ.ມ.) ຂໍໃຫ້ເຈົ້າເລືອກເຊື່ອຟັງພະເຢໂຫວາແລະພິສູດວ່າຊາຕານເວົ້າຕົວະ. ເລືອກຮັບໃຊ້ພະເຢໂຫວາຍ້ອນຮັກພະອົງ ບໍ່ແມ່ນຍ້ອນຫວັງລາງວັນທີ່ຈະໄດ້ໃນອະນາຄົດ. ແລ້ວເຈົ້າກໍຈະໄດ້ເປັນໝູ່ແທ້ຂອງພະເຈົ້າ!
a ຖ້າມີຄົນມາຫ້າມເຈົ້າບໍ່ໃຫ້ຮຽນຄຳພີໄບເບິນ ນີ້ບໍ່ໄດ້ໝາຍຄວາມວ່າຊາຕານໃຊ້ຄົນນັ້ນມາ. ແຕ່ເນື່ອງຈາກຊາຕານເປັນ “ພະເຈົ້າຂອງໂລກນີ້” ແລະ “ໂລກທັງໝົດຢູ່ໃນອຳນາດຊາຕານ.” ດັ່ງນັ້ນ ບໍ່ແມ່ນເລື່ອງແປກຖ້າມີຄົນພະຍາຍາມເຮັດໃຫ້ເຮົາເຊົາຮັບໃຊ້ພະເຢໂຫວາ.—2 ໂກຣິນໂທ 4:4; 1 ໂຢຮັນ 5:19