“ຂ້າພະເຈົ້າເຊື່ອວ່າ ລາວຈະຖືກປຸກໃຫ້ຟື້ນຂຶ້ນຈາກຕາຍ”
‘ສ່ຽວຂອງເຮົາໄດ້ຫຼັບຢູ່ ແຕ່ວ່າເຮົາໄປຈະປຸກເພິ່ນໃຫ້ຄືນ.’—ໂຢຮັນ 11:11
ເພງ: 142, 129
1. ມາທາໝັ້ນໃຈວ່າຈະເກີດຫຍັງຂຶ້ນກັບນ້ອງຊາຍຂອງລາວ? (ເບິ່ງຮູບທຳອິດ)
ມາທາເປັນທັງໝູ່ສະໜິດແລະສາວົກຂອງພະເຍຊູ ລາວກຳລັງເສຍໃຈຫຼາຍ. ລາຊະໂລນ້ອງຊາຍຂອງລາວຕາຍແລ້ວ. ມີອັນໃດຈະສາມາດປອບໃຈລາວໄດ້ບໍ? ມີແທ້. ພະເຍຊູສັນຍາກັບລາວວ່າ: “ນ້ອງຊາຍຂອງເຈົ້າຈະຄືນມາຈາກຕາຍ.” ເຖິງວ່າຄຳເວົ້າຂອງພະເຍຊູບໍ່ໄດ້ເຮັດໃຫ້ຄວາມເສຍໃຈຂອງມາທາໝົດໄປ ແຕ່ມາທາກໍເຊື່ອໃນຄຳສັນຍາຂອງພະເຍຊູ. ລາວເວົ້າວ່າ: “ຂ້າພະເຈົ້າເຊື່ອວ່າ ລາວຈະຖືກປຸກໃຫ້ຟື້ນຂຶ້ນຈາກຕາຍໃນວັນສຸດທ້າຍ.” (ໂຢຮັນ 11:20-24, ລ.ມ.) ມາທາໝັ້ນໃຈວ່າຈະມີການປຸກໃຫ້ຟື້ນຄືນມາຈາກຕາຍໃນອະນາຄົດ ແຕ່ພະເຍຊູກໍໄດ້ເຮັດການອັດສະຈັນໂດຍປຸກລາຊະໂລໃຫ້ຟື້ນຄືນມາໃນມື້ນັ້ນເລີຍ.
2. ເປັນຫຍັງເຈົ້າຈຶ່ງຢາກມີຄວາມໝັ້ນໃຈຄືກັບມາທາ?
2 ເຮົາບໍ່ມີເຫດຜົນທີ່ຈະຄາດໝາຍວ່າພະເຍຊູຫຼືພໍ່ຂອງເພິ່ນຈະປຸກຄົນທີ່ເຮົາຮັກທີ່ຕາຍໄປແລ້ວໃຫ້ຄືນມາໃນຕອນນີ້. ແຕ່ເຈົ້າໝັ້ນໃຈຄືກັບມາທາບໍວ່າໃນອະນາຄົດຄົນທີ່ເຈົ້າຮັກຈະຖືກປຸກໃຫ້ຟື້ນຄືນມາຈາກຕາຍ? ເຈົ້າອາດສູນເສຍຜົວຫຼືເມຍ ພໍ່ຫຼືແມ່ ປູ່ຍ່າຕານາຍ ຫຼືລູກສຸດທີ່ຮັກຂອງເຈົ້າໄປ. ເຈົ້າຄົງຄອຍຖ້າທີ່ຈະໄດ້ກອດ ໄດ້ລົມ ແລະໄດ້ຫົວກັບຄົນທີ່ເຈົ້າຮັກ. ເຈົ້າມີເຫດຜົນທີ່ດີຄືກັບມາທາທີ່ຈະເວົ້າວ່າ: ‘ຂ້ອຍເຊື່ອວ່າຄົນທີ່ຂ້ອຍຮັກຈະຖືກປຸກໃຫ້ຟື້ນຂຶ້ນຈາກຕາຍ.’ ເປັນເລື່ອງທີ່ດີທີ່ຄລິດສະຕຽນແຕ່ລະຄົນຈະນຶກເຖິງເຫດຜົນທີ່ເຮັດໃຫ້ເຮົາມີຄວາມໝັ້ນໃຈໃນເລື່ອງນີ້.
3, 4. ພະເຍຊູໄດ້ເຮັດຫຍັງ ແລະເລື່ອງນີ້ເຮັດໃຫ້ມາທາມີຄວາມໝັ້ນໃຈຫຼາຍຂຶ້ນແນວໃດ?
3 ພະເຍຊູປຸກລູກຊາຍຂອງຍິງໝ້າຍທີ່ຢູ່ໃກ້ເມືອງນາອີນແຂວງຄາລິເລ ແລະເພິ່ນຍັງໄດ້ປຸກລູກສາວຂອງຢາອີລຶດ ທຸກຄົນທີ່ຢູ່ໃນເຮືອນຂອງເດັກນ້ອຍນັ້ນ ‘ຮູ້ວ່າລາວໄດ້ຕາຍແລ້ວ.’ ແຕ່ພະເຍຊູຈັບມືຂອງລາວແລະເວົ້າວ່າ: ‘ລູກສາວເອີຍ ຈົ່ງລຸກຂຶ້ນເຖີ້ນ.’ ແລະເດັກນ້ອຍນັ້ນກໍລຸກຂຶ້ນທັນທີ. ເນື່ອງຈາກມາທາອາໄສຢູ່ໃກ້ເມືອງເຢຣຶຊາເລມ ລາວອາດບໍ່ໄດ້ເຫັນ 2 ເຫດການນີ້ ແຕ່ລາວອາດເຄີຍໄດ້ຍິນກ່ຽວກັບເລື່ອງເຫຼົ່ານີ້. (ລືກາ 7:11-17; 8:41, 42, 49-55) ທັງມາທາແລະມາລີນ້ອງສາວຂອງລາວຮູ້ວ່າພະເຍຊູສາມາດປິ່ນປົ່ວຄົນປ່ວຍໄດ້. ດັ່ງນັ້ນ ເຂົາເຈົ້າຈຶ່ງເຊື່ອວ່າ ຖ້າພະເຍຊູຢູ່ນຳ ລາຊະໂລຄົງຈະບໍ່ຕາຍ. ແຕ່ຕອນນີ້ລາຊະໂລຕາຍແລ້ວ ແລ້ວມາທາຍັງມີຄວາມຫວັງຫຍັງອີກບໍ? ຂໍສັງເກດທີ່ມາທາເວົ້າວ່າ: ລາຊະໂລຈະກັບມາມີຊີວິດອີກຄັ້ງໃນອະນາຄົດ ເຊິ່ງກໍຄື “ໃນວັນສຸດທ້າຍ.” ເປັນຫຍັງລາວຈຶ່ງໝັ້ນໃຈຂະໜາດນັ້ນ? ແລະເປັນຫຍັງເຈົ້າຈຶ່ງໝັ້ນໃຈໄດ້ວ່າການຟື້ນຄືນມາຈາກຕາຍອາດລວມເຖິງຄົນທີ່ເຈົ້າຮັກນຳ?
4 ມີເຫດຜົນທີ່ດີຫຼາຍຢ່າງທີ່ຈະເຊື່ອໃນເລື່ອງການຟື້ນຄືນມາຈາກຕາຍ. ເຮົາຈະມາພິຈາລະນາບາງເຫດການໃນເລື່ອງນີ້. ທີ່ຈິງ ເຈົ້າອາດພົບຫຼາຍແງ່ມຸມທີ່ຢູ່ໃນຄຳພີໄບເບິນເຊິ່ງເຈົ້າບໍ່ຄ່ອຍໄດ້ຄິດເຖິງປານໃດ. ແຕ່ມັນສາມາດຊ່ວຍເຈົ້າໃຫ້ມີຄວາມເຊື່ອເຂັ້ມແຂງຫຼາຍຂຶ້ນວ່າເຈົ້າຈະໄດ້ພົບກັບຄົນທີ່ເຈົ້າຮັກອີກຄັ້ງ.
ເຫດການທີ່ເຮັດໃຫ້ເຮົາມີຄວາມຫວັງ!
5. ເປັນຫຍັງມາທາຈຶ່ງໝັ້ນໃຈວ່າລາຊະໂລຈະຖືກປຸກໃຫ້ຟື້ນຄືນມາຈາກຕາຍ?
5 ຂໍໃຫ້ສັງເກດວ່າມາທາບໍ່ໄດ້ບອກວ່າ: ‘ຂ້າພະເຈົ້າຫວັງວ່າ ລາວຈະຖືກປຸກ.’ ແຕ່ລາວບອກວ່າ: “ຂ້າພະເຈົ້າເຊື່ອວ່າ ລາວຈະຖືກປຸກ.” ເປັນຫຍັງມາທາຈຶ່ງໝັ້ນໃຈຂະໜາດນັ້ນ? ຍ້ອນວ່າ ລາວໄດ້ຮູ້ກ່ຽວກັບການຟື້ນຄືນມາຈາກຕາຍທີ່ເກີດຂຶ້ນໃນອະດີດ. ບາງເທື່ອຕອນຍັງນ້ອຍລາວອາດໄດ້ຮຽນກ່ຽວກັບເລື່ອງນີ້ຕອນຢູ່ເຮືອນແລະຢູ່ທີ່ໂຮງທຳ. ໃຫ້ເຮົາມາເບິ່ງນຳກັນກ່ຽວກັບການຟື້ນຄືນມາຈາກຕາຍ 3 ເລື່ອງທີ່ບັນທຶກໄວ້ໃນຄຳພີໄບເບິນ.
6. ການອັດສະຈັນຫຍັງທີ່ມາທາຕ້ອງເຄີຍໄດ້ຍິນແນ່ນອນ?
6 ການຟື້ນຄືນມາຈາກຕາຍເທື່ອທຳອິດເກີດຂຶ້ນຕອນທີ່ພະເຢໂຫວາໃຫ້ອຳນາດແກ່ຜູ້ພະຍາກອນເອລີຢາໃນການເຮັດການອັດສະຈັນ. ມີແມ່ໝ້າຍທຸກຍາກຄົນໜຶ່ງອາໄສຢູ່ໃນເມືອງຊາເຣບຕາຂອງຊາວການາອານທີ່ຢູ່ທາງເໜືອຂອງອິດສະລາແອນ. ລາວໄດ້ສະແດງນ້ຳໃຈຕ້ອນຮັບເອລີຢາ ພະເຢໂຫວາຈຶ່ງເຮັດການອັດສະຈັນຕໍ່ລາວແລະຄອບຄົວ. ພະອົງເຮັດໃຫ້ແປ້ງແລະນ້ຳມັນໃນໄຫບໍ່ໝົດໄປເພື່ອທີ່ລາວກັບລູກຊາຍຈະມີຊີວິດຢູ່ຕໍ່ໄປໄດ້. (1 ກະສັດ 17:8-16) ຕໍ່ມາ ລູກຊາຍຂອງລາວປ່ວຍແລະຕາຍ ແຕ່ເອລີຢາມາຊ່ວຍລາວ. ຂະນະທີ່ກຳລັງຈັບເດັກນ້ອຍຄົນນັ້ນ ແລ້ວອະທິດຖານເຖິງພະເຢໂຫວາວ່າ: ‘ໂອ້ພະເຢໂຫວາພະເຈົ້າ ຂໍເຊີນໃຫ້ຈິດໃຈ [ຊີວິດ] ເດັກນ້ອຍນີ້ຄືນມາອີກໃນຕົວເຖີ້ນ.’ ແລະສິ່ງທີ່ລາວຂໍກໍເກີດຂຶ້ນຈິງ ພະເຢໂຫວາຟັງຄຳອະທິດຖານຂອງເອລີຢາ ແລະໃຫ້ເດັກນ້ອຍນັ້ນມີຊີວິດອີກຄັ້ງ. ນີ້ເປັນການຟື້ນຄືນມາຈາກຕາຍເທື່ອທຳອິດທີ່ບັນທຶກໄວ້ໃນຄຳພີໄບເບິນ. (ອ່ານ 1 ກະສັດ 17:17-24) ແນ່ນອນວ່າ ມາທາຕ້ອງເຄີຍໄດ້ຍິນເຫດການສຳຄັນນີ້.
7, 8. (ກ) ເອລີເຊໄດ້ເຮັດອັນໃດເພື່ອປອບໃຈແມ່ຜູ້ໂສກເສົ້າ? (ຂ) ການອັດສະຈັນທີ່ເອລີເຊເຮັດພິສູດອັນໃດກ່ຽວກັບພະເຢໂຫວາ?
7 ການຟື້ນຄືນມາຈາກຕາຍເທື່ອທີສອງທີ່ບັນທຶກໃນຄຳພີໄບເບິນ ເຮັດໂດຍຜູ້ພະຍາກອນເອລີເຊ. ໃນເມືອງຊຶເນມມີຍິງອິດສະລາແອນຄົນໜຶ່ງທີ່ບໍ່ມີລູກ. ແຕ່ຍ້ອນລາວມີນ້ຳໃຈຕ້ອນຮັບເອລີເຊ ພະເຢໂຫວາຈຶ່ງອວຍພອນໃຫ້ລາວກັບຜົວທີ່ອາຍຸຫຼາຍແລ້ວມີລູກຊາຍຄົນໜຶ່ງ. ບໍ່ເທົ່າໃດປີຕໍ່ມາເດັກນ້ອຍນັ້ນກໍຕາຍ. ລອງຄິດເບິ່ງວ່າຜູ້ເປັນແມ່ວ່າຈະເສຍໃຈຫຼາຍສ່ຳໃດ. ລາວໂສກເສົ້າຫຼາຍເຖິງຂະໜາດເດີນທາງ 30 ກິໂລແມັດເພື່ອໄປຫາເອລີເຊຢູ່ພູເຂົາກາເຣເມນ. ເອລີເຊຈຶ່ງໄດ້ສົ່ງເຄຫາຊີຜູ້ຮັບໃຊ້ຂອງລາວລ່ວງໜ້າໄປເມືອງຊຶເນມກ່ອນເພື່ອປຸກເດັກນ້ອຍຄົນນັ້ນ ແຕ່ເຄຫາຊີກໍບໍ່ສາມາດເຮັດໄດ້. ຫຼັງຈາກນັ້ນ ແມ່ຂອງເດັກນ້ອຍກັບເອລີເຊກໍມາຮອດເຮືອນ.—2 ກະສັດ 4:8-31
ພະເຢໂຫວາພິສູດໃຫ້ເຫັນວ່າ ພະອົງມີຄວາມສາມາດທີ່ຈະປຸກຄົນຕາຍໃຫ້ຟື້ນຄືນມາໄດ້
8 ເອລີເຊເຂົ້າໄປໃນເຮືອນແລະອະທິດຖານເຖິງພະເຢໂຫວາ ພະອົງຕອບຄຳອະທິດຖານຂອງເອລີເຊໂດຍໃຫ້ເດັກນ້ອຍຄົນນັ້ນມີຊີວິດອີກຄັ້ງຢ່າງອັດສະຈັນ. ເມື່ອຜູ້ເປັນແມ່ເຫັນລູກຊາຍຟື້ນຂຶ້ນມາ ລາວດີໃຈຫຼາຍແທ້ໆ! (ອ່ານ 2 ກະສັດ 4:32-37) ລາວອາດຄິດເຖິງຄຳອະທິດຖານຂອງອານາ. ອານາບໍ່ມີລູກຈົນກະທັ່ງພະເຢໂຫວາອວຍພອນລາວໃຫ້ມີລູກຊາຍເຊິ່ງກໍຄືຊາເມືອນ. ອານາສັນລະເສີນພະເຢໂຫວາເພາະ “ພະອົງເອົາມະນຸດລົງໄປໃນຫຼຸມສົບແລະເອົາຂຶ້ນມາໄດ້.” (1 ຊາເມືອນ 2:6, ລ.ມ.) ໂດຍການປຸກເດັກນ້ອຍທີ່ຢູ່ເມືອງຊຶເນມ ພະເຢໂຫວາພິສູດໃຫ້ເຫັນວ່າ ພະອົງມີຄວາມສາມາດທີ່ຈະປຸກຄົນຕາຍໃຫ້ຟື້ນຄືນມາໄດ້.
9. ຂໍໃຫ້ເລົ່າເລື່ອງການຟື້ນຄືນມາຈາກຕາຍຄັ້ງທີສາມທີ່ບັນທຶກໃນຄຳພີໄບເບິນ.
9 ອີກເຫດການໜຶ່ງທີ່ໜ້າງຶດງໍ້ແມ່ນເກີດຂຶ້ນຫຼັງຈາກທີ່ເອລີເຊຕາຍ. ລາວຮັບໃຊ້ເປັນຜູ້ພະຍາກອນຫຼາຍກວ່າ 50 ປີ ແລະລາວກໍ ‘ປ່ວຍໜັກແລະຕາຍ.’ ເມື່ອເວລາຜ່ານໄປ ສົບຂອງລາວກໍເຫຼືອແຕ່ກະດູກ. ມີມື້ໜຶ່ງ ຊາວອິດສະລາແອນບາງຄົນກຳລັງຝັງສົບຊາຍຄົນໜຶ່ງຢູ່ ເຂົາເຈົ້າເຫັນສັດຕູກຳລັງມາ ເພື່ອຈະໜີໃຫ້ໄວທີ່ສຸດເທົ່າທີ່ເປັນໄປໄດ້ ເຂົາເຈົ້າຈຶ່ງຖິ້ມສົບຊາຍຄົນນັ້ນລົງໄປໃນຂຸມຝັງສົບຂອງເອລີເຊ. ຄຳພີໄບເບິນບອກວ່າ: ‘ເມື່ອສົບນັ້ນໄປຊູນກະດູກທ່ານເອລີເຊ ສົບນັ້ນກໍໄດ້ຄືນມາຈາກຕາຍແລະໄດ້ລຸກຢືນຂຶ້ນ.’ (2 ກະສັດ 13:14, ລ.ມ., 20, 21) ເຫດການເຫຼົ່ານີ້ໄດ້ເຮັດໃຫ້ມາທາໝັ້ນໃຈວ່າພະເຈົ້າມີອຳນາດເໜືອຄວາມຕາຍ ແລະຍັງເຮັດໃຫ້ເຈົ້າໝັ້ນໃຈວ່າພະເຈົ້າມີອຳນາດທີ່ຍິ່ງໃຫຍ່ແລະບໍ່ມີຂີດຈຳກັດ.
ເຫດການທີ່ເກີດຂຶ້ນໃນສະໄໝອັກຄະສາວົກ
10. ເກີດຫຍັງຂຶ້ນກັບພີ່ນ້ອງຍິງຄລິດສະຕຽນຄົນໜຶ່ງ ແລ້ວເປໂຕຊ່ວຍລາວແນວໃດ?
10 ພະຄຳພີພາກພາສາເກັຣກມີເລື່ອງກ່ຽວກັບຜູ້ຮັບໃຊ້ທີ່ສັດຊື່ຂອງພະເຈົ້າທີ່ປຸກຄົນໃຫ້ຟື້ນຄືນມາຈາກຕາຍ. ເຮົາໄດ້ເວົ້າເຖິງການຟື້ນຄືນມາຈາກຕາຍທີ່ພະເຍຊູໄດ້ເຮັດໃກ້ກັບເມືອງນາອີນແລະຢູ່ທີ່ເຮືອນຢາອີລຶດໄປແລ້ວ. ເວລາຕໍ່ມາ ອັກຄະສາວົກເປໂຕໄດ້ປຸກນາງກວາງທີ່ມີອີກຊື່ໜຶ່ງວ່າທາບີທາໃຫ້ຟື້ນຄືນມາຈາກຕາຍ. ເປໂຕເຂົ້າໄປໃນຫ້ອງທີ່ມີສົບຂອງນາງ ລາວອະທິດຖານແລະເວົ້າວ່າ: “ທາບີທາເອີຍ ຈົ່ງລຸກຂຶ້ນເຖີ້ນ.” ນາງກໍຟື້ນຄືນມາທັນທີ ແລ້ວເປໂຕ “ໄດ້ເອົານາງຜູ້ເປັນຄືນມານັ້ນ” ສົ່ງໃຫ້ພີ່ນ້ອງຄລິດສະຕຽນທີ່ຢູ່ທີ່ນັ້ນ. ເຫດການນີ້ໜ້າເຊື່ອຖືຫຼາຍຈົນເຮັດໃຫ້ຫຼາຍຄົນໃນເມືອງນັ້ນ “ເຂົ້າມາເປັນສາວົກຂອງຜູ້ເປັນນາຍ.” ສາວົກໃໝ່ເຫຼົ່ານີ້ສາມາດບອກຄົນອື່ນເລື່ອງຂ່າວດີກ່ຽວກັບພະເຍຊູແລະເປັນພະຍານບອກຄົນອື່ນໆວ່າພະເຢໂຫວາສາມາດປຸກຄົນໃຫ້ຟື້ນຄືນມາຈາກຕາຍໄດ້.—ກິດຈະການ 9:36-42, ລ.ມ.
11. ລືກາທີ່ເປັນໝໍບອກຫຍັງກ່ຽວກັບເອິຕີກ ແລະເຫດການນີ້ມີຜົນຕໍ່ຄົນອື່ນແນວໃດ?
11 ຍັງມີພະຍານອີກຫຼາຍຄົນທີ່ໄດ້ເຫັນການຟື້ນຄືນມາຈາກຕາຍ. ມີຄັ້ງໜຶ່ງ ອັກຄະສາວົກໂປໂລໄດ້ປະຊຸມຢູ່ຫ້ອງຊັ້ນເທິງຢູ່ເມືອງໂທອາດ ໃນປັດຈຸບັນແມ່ນຢູ່ທາງຕາເວັນຕົກສ່ຽງເໜືອຂອງປະເທດຕວກກີ. ໂປໂລບັນລະຍາຍຈົນຮອດທ່ຽງຄືນ. ມີຊາຍໜຸ່ມຄົນໜຶ່ງຊື່ເອິຕີກນັ່ງຟັງຢູ່ຂອບປ່ອງຢ້ຽມ ແຕ່ລາວເຫງົານອນແລ້ວຕົກລົງມາຈາກຊັ້ນສາມ. ລືກາອາດເປັນຜູ້ທຳອິດທີ່ມາເຖິງຊາຍໜຸ່ມຄົນນີ້. ເນື່ອງຈາກລືກາເປັນໝໍກໍເລີຍຮູ້ວ່າຊາຍໜຸ່ມຄົນນີ້ບໍ່ພຽງແຕ່ໄດ້ຮັບບາດເຈັບແລະສະຫຼົບໄປເທົ່ານັ້ນ ແຕ່ລາວຕາຍແລ້ວ! ໂປໂລກໍລົງມາຊັ້ນລຸ່ມແລະກອດເອິຕີກໄວ້ ຫຼາຍຄົນຕ້ອງແປກໃຈແທ້ໆເມື່ອໂປໂລບອກວ່າ: “ເຂົາມີຊີວິດແລ້ວ.” ການອັດສະຈັນຄັ້ງນີ້ສົ່ງຜົນຕໍ່ຄົນເຫຼົ່ານັ້ນຫຼາຍແທ້ໆທີ່ເຫັນເຫດການ. ການທີ່ຮູ້ວ່າເອິຕີກຕາຍແລະລາວໄດ້ຟື້ນຄືນມາເຮັດໃຫ້ເຂົາເຈົ້າ “ມີກຳລັງໃຈຂຶ້ນຫຼາຍ.”—ກິດຈະການ 20:7-12, ລ.ມ.
ຄວາມຫວັງທີ່ໜ້າເຊື່ອຖື
12, 13. ການຟື້ນຄືນມາຈາກຕາຍທີ່ເຮົາໄດ້ພິຈາລະນາໄປ ອາດເຮັດໃຫ້ເກີດຄຳຖາມຫຍັງແດ່?
12 ການຟື້ນຄືນມາຈາກຕາຍທີ່ເຮົາໄດ້ພິຈາລະນາໄປແລ້ວເຮັດໃຫ້ເຮົາໝັ້ນໃຈຄືກັບມາທາ. ເຮົາໝັ້ນໃຈວ່າຜູ້ໃຫ້ຊີວິດສາມາດເຮັດໃຫ້ຄົນທີ່ຕາຍໄປແລ້ວກັບມາມີຊີວິດອີກໄດ້. ໜ້າສົນໃຈທີ່ຜູ້ຮັບໃຊ້ທີ່ສັດຊື່ຂອງພະເຈົ້າ ເຊັ່ນ: ເອລີຢາ ພະເຍຊູ ຫຼືເປໂຕມີສ່ວນຮ່ວມໃນເຫດການທີ່ປຸກຄົນໃຫ້ຟື້ນຄືນມາຈາກຕາຍ. ເຫດການເຫຼົ່ານີ້ເກີດຂຶ້ນໃນສະໄໝທີ່ພະເຢໂຫວາຍັງເຮັດການອັດສະຈັນຢູ່. ແລ້ວຈະວ່າແນວໃດສຳລັບຄົນທີ່ຕາຍໃນສະໄໝທີ່ພະເຢໂຫວາບໍ່ໄດ້ເຮັດການອັດສະຈັນແລ້ວ? ຊາຍຍິງທີ່ສັດຊື່ສາມາດໝັ້ນໃຈໄດ້ບໍວ່າພະເຈົ້າຈະປຸກຄົນຕາຍໃນອະນາຄົດ? ເຂົາເຈົ້າສາມາດໝັ້ນໃຈຄືກັບມາທາໄດ້ບໍທີ່ບອກວ່າ: “ຂ້າພະເຈົ້າເຊື່ອວ່າ ລາວຈະຖືກປຸກໃຫ້ຟື້ນຂຶ້ນຈາກຕາຍໃນວັນສຸດທ້າຍ”? ເປັນຫຍັງມາທາຈຶ່ງເຊື່ອວ່າຈະມີການຟື້ນຄືນມາຈາກຕາຍໃນອະນາຄົດ ແລະເຈົ້າເດ ອັນໃດເຮັດໃຫ້ເຈົ້າເຊື່ອ?
13 ມີການບັນທຶກໃນຄຳພີໄບເບິນວ່າຜູ້ຮັບໃຊ້ທີ່ສັດຊື່ຂອງພະເຢໂຫວາໝັ້ນໃຈວ່າຈະມີການຟື້ນຄືນມາຈາກຕາຍໃນອະນາຄົດ. ໃຫ້ເຮົາມາເບິ່ງບາງເລື່ອງນຳກັນ.
14. ເມື່ອອ່ານເລື່ອງຂອງອັບລາຫາມ ເຮົາໄດ້ຮຽນຮູ້ອັນໃດກ່ຽວກັບການຟື້ນຄືນມາຈາກຕາຍ?
14 ຂໍໃຫ້ຄິດເຖິງສິ່ງທີ່ພະເຢໂຫວາບອກກັບອັບລາຫາມໃຫ້ເຮັດຕໍ່ອີຊາກ ເຊິ່ງເປັນລູກຊາຍທີ່ລາວຄອຍຖ້າມາດົນ ພະອົງບອກວ່າ: “ເຈົ້າຈົ່ງເອົາລູກຊາຍຂອງເຈົ້າ ລູກໂທນຂອງເຈົ້າ ທີ່ຮັກຂອງເຈົ້າ ທ້າວອີຊາກ ແລະໄປໃນແຜ່ນດິນໂມລີຢາແລະທີ່ນັ້ນຈົ່ງເອົາທ້າວອີຊາກຖວາຍເປັນເຄື່ອງບູຊາເຜົາ.” (ຕົ້ນເດີມ 22:2) ເຈົ້າຄິດວ່າອັບລາຫາມຈະຮູ້ສຶກແນວໃດເມື່ອໄດ້ຍິນຄຳສັ່ງນັ້ນ? ພະເຢໂຫວາສັນຍາກັບອັບລາຫາມວ່າ ທຸກຊາດຈະໄດ້ຮັບພອນໂດຍທາງເຊື້ອສາຍຂອງລາວ. (ຕົ້ນເດີມ 13:14-16; 18:18; ໂລມ 4:17, 18) ແລະພະອົງຍັງບອກວ່າພອນນີ້ຈະມາ “ທາງອີຊາກ.” (ຕົ້ນເດີມ 21:12, ທ.ປ.) ແຕ່ເລື່ອງນີ້ຈະເກີດຂຶ້ນໄດ້ແນວໃດຖ້າອັບລາຫາມຖວາຍອີຊາກເປັນເຄື່ອງບູຊາ? ໂປໂລໄດ້ຮັບການດົນໃຈໃຫ້ອະທິບາຍວ່າ ອັບລາຫາມເຊື່ອວ່າພະເຈົ້າຈະປຸກອີຊາກໃຫ້ຟື້ນຄືນມາຈາກຕາຍ. (ອ່ານເຫບເລີ 11:17-19) ແນວໃດກໍຕາມ ໃນຄຳພີໄບເບິນບໍ່ໄດ້ບອກວ່າອັບລາຫາມຄິດວ່າອີຊາກຈະຖືກປຸກທັນທີ ພາຍໃນບໍ່ເທົ່າໃດຊົ່ວໂມງ ພາຍໃນມື້ນັ້ນ ຫຼືພາຍໃນອາທິດນັ້ນ. ອັບລາຫາມບໍ່ຮູ້ວ່າລູກຊາຍຂອງລາວຈະຖືກປຸກໃຫ້ຟື້ນຄືນມາຈາກຕາຍເມື່ອໃດ. ແຕ່ລາວເຊື່ອວ່າພະເຢໂຫວາຈະປຸກອີຊາກໃຫ້ຟື້ນຄືນມາຈາກຕາຍຢ່າງແນ່ນອນ.
15. ໂຢບຊາຍຜູ້ສັດຊື່ມີຄວາມຫວັງໃນເລື່ອງໃດ?
15 ໂຢບຊາຍຜູ້ສັດຊື່ຮູ້ວ່າຈະມີການຟື້ນຄືນມາຈາກຕາຍໃນອະນາຄົດ. ລາວຮູ້ວ່າຖ້າຕົ້ນໄມ້ຖືກຕັດ ມັນຈະສາມາດປົ່ງຂຶ້ນມາເອງໄດ້ແລະເປັນຕົ້ນໄມ້ຕົ້ນໃໝ່ ແຕ່ມະນຸດບໍ່ສາມາດເຮັດແບບນັ້ນໄດ້. (ໂຢບ 14:7-12; 19:25-27) ຖ້າມະນຸດຕາຍ ເຂົາເຈົ້າບໍ່ສາມາດເຮັດໃຫ້ຕົວເອງຟື້ນຂຶ້ນມາມີຊີວິດໄດ້. (2 ຊາເມືອນ 12:23; ຄຳເພງ 89:48) ແຕ່ນີ້ບໍ່ໄດ້ໝາຍຄວາມວ່າພະເຈົ້າຈະປຸກຄົນໃຫ້ຟື້ນຄືນມາຈາກຕາຍບໍ່ໄດ້. ທີ່ຈິງ ໂຢບເຊື່ອວ່າລາວຢູ່ໃນຄວາມຊົງຈຳຂອງພະເຢໂຫວາ. (ອ່ານໂຢບ 14:13-15) ໂຢບບໍ່ຮູ້ວ່າສິ່ງນີ້ຈະເກີດຂຶ້ນເມື່ອໃດໃນອະນາຄົດ ແຕ່ລາວກໍເຊື່ອໝັ້ນຢ່າງເຕັມທີວ່າຜູ້ທີ່ສ້າງມະນຸດສາມາດຈື່ລາວແລະຈະປຸກລາວໃຫ້ມີຊີວິດອີກແນ່ນອນ.
16. ທູດສະຫວັນໃຫ້ກຳລັງໃຈດານຽນແນວໃດ?
16 ຂໍໃຫ້ຄິດເຖິງດານຽນຊາຍຜູ້ສັດຊື່ອີກຄົນໜຶ່ງ. ລາວຮັບໃຊ້ພະເຢໂຫວາດ້ວຍຄວາມພັກດີຕະຫຼອດຊີວິດຂອງລາວ ແລະພະເຢໂຫວາກໍຊ່ວຍເຫຼືອລາວ. ມີຄັ້ງໜຶ່ງ ທູດສະຫວັນເອີ້ນດານຽນວ່າເປັນ “ຄົນທີ່ພະເຈົ້າຖືວ່າມີຄ່າຫຼາຍ” ແລະບອກລາວວ່າ “ໃຈເຢັນໆ” ແລະຈົ່ງ “ເຂັ້ມແຂງໄວ້.”—ດານຽນ 9:22, 23; 10:11, 18, 19, ລ.ມ.
17, 18. ພະເຢໂຫວາສັນຍາຫຍັງກັບດານຽນ?
17 ເມື່ອດານຽນອາຍຸໄດ້ຮ້ອຍກວ່າປີແລະໃກ້ຈະຕາຍ ລາວອາດຄິດເຖິງສິ່ງທີ່ຈະເກີດຂຶ້ນກັບລາວ. ດານຽນຫວັງວ່າຈະກັບມາມີຊີວິດອີກຄັ້ງໜຶ່ງບໍ? ແນ່ນອນ! ຕອນທ້າຍຂອງພະທຳດານຽນໄດ້ເວົ້າເຖິງຄຳສັນຍາທີ່ພະເຢໂຫວາໃຫ້ກັບລາວວ່າ: “ສ່ວນເຈົ້າ ຂໍໃຫ້ໝັ້ນຄົງຈົນເຖິງທີ່ສຸດ ເຈົ້າຈະໄດ້ພັກຜ່ອນ.” (ດານຽນ 12:13, ລ.ມ.) ດານຽນຮູ້ວ່າການຕາຍເປັນຄືກັບການພັກຜ່ອນແລະເປັນບ່ອນທີ່ “ບໍ່ມີກິດຈະການ ບໍ່ມີຄວາມຄຶດ ບໍ່ມີວິຊາຄວາມຮູ້ ບໍ່ມີຄວາມປັນຍາ” ເຊິ່ງເປັນບ່ອນທີ່ລາວຈະໄດ້ໄປອີກບໍ່ດົນ. (ຜູ້ເທສະໜາປ່າວປະກາດ 9:10) ແຕ່ນີ້ບໍ່ແມ່ນຈຸດຈົບຂອງຊີວິດດານຽນ. ພະເຢໂຫວາໃຫ້ຄຳສັນຍາທີ່ດີເລີດໃນອະນາຄົດກັບລາວ.
18 ທູດສະຫວັນຂອງພະເຢໂຫວາບອກກັບດານຽນວ່າ: “ເຈົ້າຈະລຸກຂຶ້ນມາຮັບສ່ວນແບ່ງຂອງເຈົ້າເມື່ອເຖິງເວລາ.” ດານຽນບໍ່ຮູ້ວ່າເລື່ອງນີ້ຈະເກີດຂຶ້ນເມື່ອໃດ. ແຕ່ລາວຮູ້ວ່າລາວຈະຕາຍແລະໄດ້ພັກຜ່ອນ. ເມື່ອດານຽນໄດ້ຍິນຄຳສັນຍາທີ່ວ່າ: “ເຈົ້າຈະລຸກຂຶ້ນມາຮັບສ່ວນແບ່ງຂອງເຈົ້າ.” ດານຽນກໍເຂົ້າໃຈທັນທີວ່າລາວຈະຄືນມາມີຊີວິດອີກຄັ້ງໃນອະນາຄົດ “ເມື່ອເຖິງເວລາ” ເຊິ່ງຈະເກີດຂຶ້ນອີກດົນຫຼັງຈາກທີ່ລາວຕາຍ.
ຄືກັບມາທາເຮົາສາມາດໝັ້ນໃຈໄດ້ວ່າການຟື້ນຄືນມາຈາກຕາຍຈະເກີດຂຶ້ນແທ້ (ເບິ່ງຂໍ້ 19, 20)
19, 20. (ກ) ເລື່ອງຕ່າງໆກ່ຽວກັບການຟື້ນຄືນຈາກຕາຍທີ່ເຮົາໄດ້ພິຈາລະນາກ່ຽວຂ້ອງແນວໃດກັບສິ່ງທີ່ມາທາເວົ້າກັບພະເຍຊູ? (ຂ) ເຮົາຈະພິຈາລະນາເລື່ອງຫຍັງໃນບົດຄວາມຕໍ່ໄປ
19 ເຫັນໄດ້ແຈ້ງວ່າມາທາມີເຫດຜົນທີ່ດີທີ່ຈະໝັ້ນໃຈວ່າລາຊະໂລເຊິ່ງເປັນຜູ້ຮັບໃຊ້ທີ່ສັດຊື່ຈະ “ຖືກປຸກໃຫ້ຟື້ນຂຶ້ນຈາກຕາຍໃນວັນສຸດທ້າຍ.” ຄຳສັນຍາທີ່ພະເຢໂຫວາໃຫ້ກັບດານຽນແລະຄວາມເຊື່ອທີ່ເຂັ້ມແຂງຂອງມາທາເລື່ອງການຟື້ນຄືນມາຈາກຕາຍໃນອະນາຄົດຄວນເຮັດໃຫ້ເຮົາໝັ້ນໃຈວ່າຈະມີການຟື້ນຄືນມາຈາກຕາຍແທ້ໆ.
20 ເຮົາໄດ້ຮຽນຮູ້ກ່ຽວກັບເລື່ອງການຟື້ນຄືນມາຈາກຕາຍທີ່ໄດ້ເກີດຂຶ້ນແທ້ໃນອະດີດ. ເຫດການເຫຼົ່ານີ້ໄດ້ຢືນຢັນວ່າຄົນທີ່ຕາຍໄປແລ້ວຈະສາມາດກັບມາມີຊີວິດອີກ. ເຮົາຍັງເຫັນອີກວ່າຊາຍຍິງທີ່ຮັບໃຊ້ພະເຢໂຫວາຢ່າງສັດຊື່ຄາດໝາຍວ່າຈະມີການຟື້ນຄືນມາຈາກຕາຍໃນອະນາຄົດ. ແຕ່ມີຫຼັກຖານຫຍັງບໍທີ່ສາມາດພິສູດວ່າຈະຍັງມີການຟື້ນຄືນມາຈາກຕາຍເຖິງວ່າຄຳສັນຍານັ້ນຈະຜ່ານໄປດົນແລ້ວ? ຖ້າມີ ເລື່ອງນີ້ຈະເຮັດໃຫ້ເຮົາໝັ້ນໃຈຫຼາຍຂຶ້ນເມື່ອເຮົາຄອຍຖ້າການຟື້ນຄືນມາຈາກຕາຍໃນອະນາຄົດ. ເຫດການນີ້ຈະເກີດຂຶ້ນເມື່ອໃດ? ເຮົາຈະພິຈາລະນາເລື່ອງນີ້ໃນບົດຄວາມຕໍ່ໄປ.