ບົດທີ 12

ອັນໃດຈະຊ່ວຍໃຫ້ເຈົ້າຮຽນຄຳພີໄບເບິນຕໍ່ໄປ?

ສະບັບພິມ

ການຮຽນຄຳພີໄບເບິນມີປະໂຫຍດຫຼາຍ. ແຕ່ບາງເທື່ອມັນກໍບໍ່ງ່າຍ ເຈົ້າອາດຄິດວ່າຊິຮຽນຕໍ່ໄປໄຫວບໍ. ເຖິງວ່າເຈົ້າຕ້ອງເຈິກັບບັນຫາບາງຢ່າງ ແຕ່ເປັນຫຍັງການຮຽນຄຳພີໄບເບິນຕໍ່ໄປຈຶ່ງຄຸ້ມຄ່າ? ແລະອັນໃດຈະຊ່ວຍເຈົ້າບໍ່ໃຫ້ເຊົາຮຽນຄຳພີໄບເບິນ?

1. ເປັນຫຍັງການຮຽນຄຳພີໄບເບິນຈຶ່ງມີປະໂຫຍດຫຼາຍ?

“ຖ້ອຍຄຳຂອງພະເຈົ້າມີຊີວິດ ມີພະລັງຫຼາຍ.” (ເຮັບເຣີ 4:12) ຄຳພີໄບເບິນມີປະໂຫຍດຫຼາຍເພາະຊ່ວຍໃຫ້ຮູ້ວ່າພະເຈົ້າຄິດແລະຮູ້ສຶກແນວໃດກັບເຮົາ. ຖ້າເຈົ້າຮຽນຄຳພີໄບເບິນເຈົ້າຈະບໍ່ໄດ້ແຕ່ຄວາມຮູ້ເທົ່ານັ້ນ ແຕ່ເຈົ້າຈະຮູ້ຈັກວິທີເອົາຄວາມຮູ້ໄປໃຊ້ໃນຊີວິດນຳ. ນີ້ຈະເຮັດໃຫ້ເຈົ້າມີຊີວິດທີ່ດີຂຶ້ນໃນຕອນນີ້ແລະມີຄວາມຫວັງໃນອະນາຄົດ ແລະທີ່ສຳຄັນທີ່ສຸດແມ່ນ ເຈົ້າຈະໄດ້ເປັນໝູ່ກັບພະເຢໂຫວາ.

2. ເປັນຫຍັງເຮົາຕ້ອງຈື່ໄວ້ວ່າຄວາມຈິງໃນຄຳພີໄບເບິນມີຄ່າຫຼາຍ?

ຄວາມຈິງໃນຄຳພີໄບເບິນເປັນຄືກັບຊັບສົມບັດທີ່ມີຄ່າຫຼາຍ. ຄຳພີໄບເບິນຈຶ່ງບອກເຮົາໃຫ້ “ຊື້ຄວາມຈິງໄວ້ແລະຢ່າຂາຍເລີຍ.” (ສຸພາສິດ 23:23) ຖ້າເຮົາຈື່ໄວ້ວ່າຄວາມຈິງໃນຄຳພີໄບເບິນມີຄ່າຫຼາຍ ເຮົາກໍຈະບໍ່ຍອມໃຫ້ອັນໃດມາເຮັດໃຫ້ເຮົາເຊົາຮຽນຄຳພີໄບເບິນ.—ອ່ານສຸພາສິດ 2:4, 5

3. ພະເຢໂຫວາຊ່ວຍເຈົ້າແນວໃດໃຫ້ຮຽນຄຳພີໄບເບິນຕໍ່ໆໄປ?

ພະເຢໂຫວາສ້າງເຮົາມາແລະເປັນໝູ່ຂອງເຮົາ ເພິ່ນຈຶ່ງຢາກຊ່ວຍເຮົາໃຫ້ຮູ້ຈັກເພິ່ນ. ພະເຢໂຫວາໃຫ້ “ຄວາມຕ້ອງການແລະກຳລັງ” ກັບເຮົາໄດ້. (ອ່ານຟີລິບປອຍ 2:13) ພະເຢໂຫວາຊ່ວຍເຈົ້າໃຫ້ຢາກຮຽນຄຳພີໄບເບິນແລະເຮັດຕາມສິ່ງທີ່ໄດ້ຮຽນ. ເຖິງວ່າຈະມີຄົນບໍ່ມັກທີ່ເຈົ້າມາຮຽນຄຳພີໄບເບິນ ຫຼືເຈົ້າອາດຈະເຈິກັບບັນຫາບາງຢ່າງ ແຕ່ພະເຢໂຫວາຈະໃຫ້ກຳລັງເພື່ອເຈົ້າຈະບໍ່ເຊົາຮຽນຄຳພີໄບເບິນ. ດັ່ງນັ້ນ ໃຫ້ເຈົ້າອະທິດຖານເປັນປະຈຳຂໍພະເຢໂຫວາຊ່ວຍເຈົ້າໃຫ້ຮຽນຄຳພີໄບເບິນຕໍ່ໄປ.—1 ເທຊະໂລນິກ 5:17

ຮຽນຮູ້ຫຼາຍຂຶ້ນ

ເຖິງວ່າເຈົ້າຈະບໍ່ຄ່ອຍມີເວລາຫຼືມີຄົນບໍ່ຢາກໃຫ້ເຈົ້າຮຽນຄຳພີໄບເບິນ ແຕ່ເຈົ້າຈະເຮັດແນວໃດເພື່ອຈະຮຽນຄຳພີໄບເບິນຕໍ່ໆໄປ. ແລ້ວພະເຢໂຫວາຈະຊ່ວຍເຈົ້າໃຫ້ເຮັດແບບນັ້ນໄດ້ແນວໃດ.

4. ເຮັດໃຫ້ການຮຽນຄຳພີໄບເບິນເປັນເລື່ອງສຳຄັນ

ບາງເທື່ອເຮົາອາດຈະມີຫຼາຍຢ່າງທີ່ຕ້ອງເຮັດຈົນເຮົາຮູ້ສຶກວ່າບໍ່ມີເວລາຮຽນຄຳພີໄບເບິນ.ອັນໃດຈະຊ່ວຍເຈົ້າໄດ້? ອ່ານຟີລິບປອຍ 1:10 ແລ້ວລົມກັນກ່ຽວກັບຄຳຖາມຕໍ່ໄປນີ້:

ມີຫຍັງແດ່ທີ່ເຈົ້າຄິດວ່າເປັນເລື່ອງ “ສຳຄັນ” ສຳລັບເຈົ້າ?
ເຈົ້າຄິດວ່າຈະເຮັດໃຫ້ການຮຽນຄຳພີໄບເບິນເປັນເລື່ອງທີ່ສຳຄັນໄດ້ບໍ? ເຈົ້າຈະເຮັດແບບນັ້ນໄດ້ແນວໃດ?

ກ. ຮູບ: ການເອົາກ້ອນຫີນແລະດິນຊາຍໃສ່ລົງໄປໃນຖັງ. 1. ກອງດິນຊາຍແລະກອງກ້ອນຫີນ. 2. ຖັງທີ່ມີດິນຊາຍ. 3. ກ້ອນຫີນຢອງຢູ່ເທິງດິນຊາຍແລະໃສ່ລົງໄປໃນຖັງຕື່ມອີກບໍ່ໄດ້.

ຂ. ຮູບ: 1. ກອງດິນຊາຍແລະກອງກ້ອນຫີນອັນດຽວກັນ. 2. ຖັງອັນດຽວກັນທີ່ໃສ່ດ້ວຍກ້ອນຫີນລົງໄປ. 3. ກ້ອນຫີນກັບດິນຊາຍໃສ່ໄດ້ເຕັມຖັງພໍດີ. ມີແຕ່ກອງດິນຊາຍນ້ອຍໆທີ່ເຫຼືອຢູ່ນອກຖັງ.

ກ. ຖ້າເຈົ້າໃສ່ດິນຊາຍລົງໄປໃນຖັງກ່ອນແລ້ວຈຶ່ງໃສ່ກ້ອນຫີນ ເຈົ້າກໍຈະໃສ່ກ້ອນຫີນທັງໝົດລົງໄປບໍ່ໄດ້
ຂ. ແຕ່ຖ້າເຈົ້າໃສ່ກ້ອນຫີນລົງໄປໃນຖັງກ່ອນ ເຈົ້າກໍຈະມີບ່ອນພຽງພໍສຳລັບໃສ່ດິນຊາຍລົງໄປນຳ.ຄ້າຍຄືກັນ ຖ້າເຈົ້າເຮັດເລື່ອງທີ່ “ສຳຄັນ” ກ່ອນ ເຈົ້າກໍຈະມີເວລາພໍທີ່ຈະເຮັດເລື່ອງອື່ນໆນຳ

ການຮຽນຄຳພີໄບເບິນຈະຊ່ວຍໃຫ້ເຮົາຮູ້ຈັກພະເຈົ້າແລະນະມັດສະການເພິ່ນ ຖ້າເຮົາເຮັດແບບນັ້ນເຮົາກໍຈະມີຄວາມສຸກແທ້ໆ. ອ່ານມັດທາຍ 5:3 ແລ້ວລົມກັນກ່ຽວກັບຄຳຖາມຕໍ່ໄປນີ້:

ຖ້າເຮົາໃຫ້ການຮຽນຄຳພີໄບເບິນເປັນເລື່ອງທີ່ສຳຄັນ ເຮົາຈະໄດ້ຮັບປະໂຫຍດຫຍັງ?

5. ອົດທົນເມື່ອຖືກກົດດັນ

ອາດຈະມີບາງຄົນບໍ່ມັກທີ່ເຈົ້າຮຽນຄຳພີໄບເບິນແລະຢາກໃຫ້ເຈົ້າເຊົາຮຽນ.ໃຫ້ເຮົາມາເບິ່ງຕົວຢ່າງຂອງຟຣານເຊດສ໌ໂກ. ເປີດວິດີໂອ ແລ້ວລົມກັນກ່ຽວກັບຄຳຖາມຕໍ່ໄປນີ້:

ວິດີໂອ: ໄດ້ຮັບລາງວັນເພາະອົດທົນ (5:22)

ສາກໜຶ່ງຈາກວິດີໂອ ‘ໄດ້ຮັບລາງວັນເພາະອົດທົນ.’ ຟຣານເຊດສ໌ໂກຍ່າງໜີຈາກໝູ່ສະໜິດຂອງລາວຫຼັງຈາກບອກເຂົາເຈົ້າວ່າລາວຈະບໍ່ຄົບຫາກັບເຂົາເຈົ້າອີກຕໍ່ໄປ.

ໃນວິດີໂອ ໝູ່ແລະຄອບຄົວຂອງຟຣານເຊດສ໌ໂກຮູ້ສຶກແນວໃດແລະເຮັດຫຍັງແດ່ເມື່ອຮູ້ວ່າລາວກຳລັງຮຽນຄຳພີໄບເບິນ?
ຄວາມອົດທົນຂອງຟຣານເຊດສ໌ໂກເຮັດໃຫ້ມີເລື່ອງດີໆຫຍັງເກີດຂຶ້ນ?

ອ່ານ 2 ຕີໂມທຽວ 2:24, 25 ແລ້ວລົມກັນກ່ຽວກັບຄຳຖາມຕໍ່ໄປນີ້:

ຄອບຄົວແລະໝູ່ຂອງເຈົ້າຮູ້ສຶກແນວໃດທີ່ເຈົ້າມາຮຽນຄຳພີໄບເບິນ?
ຕາມຂໍ້ຄຳພີນີ້ ຖ້າມີຄົນບໍ່ມັກທີ່ເຈົ້າມາຮຽນຄຳພີໄບເບິນເຈົ້າຈະເວົ້າແນວໃດກັບເຂົາເຈົ້າ? ເປັນຫຍັງຈຶ່ງເວົ້າແນວນັ້ນ?

6. ຂໍຄວາມຊ່ວຍເຫຼືອຈາກພະເຢໂຫວາ

ຖ້າເຈົ້າສະໜິດກັບພະເຢໂຫວາຫຼາຍຂຶ້ນ ເຈົ້າກໍຈະແຮ່ງຢາກເຮັດໃຫ້ເພິ່ນພໍໃຈ. ແຕ່ບາງເທື່ອເຈົ້າອາດຈະຮູ້ສຶກຍາກທີ່ຈະເຮັດຕາມສິ່ງທີ່ພະເຢໂຫວາບອກ.ຖ້າເຈົ້າຮູ້ສຶກແນວນັ້ນ ກໍຢ່າຟ້າວຍອມແພ້. ພະເຢໂຫວາຈະຊ່ວຍເຈົ້າ. ເປີດວິດີໂອ ແລ້ວລົມກັນກ່ຽວກັບຄຳຖາມຕໍ່ໄປນີ້: