ເຄັດລັບທີ 7 ການມີຮາກຖານທີ່ໝັ້ນຄົງ
ເລື່ອງນີ້ໝາຍຄວາມວ່າແນວໃດ? ຄອບຄົວບໍ່ສາມາດເຂັ້ມແຂງໄດ້ເອງ ເຊັ່ນດຽວກັບເຮືອນທີ່ບໍ່ສາມາດຕັ້ງຢູ່ໄດ້ເອງເປັນເວລາຫຼາຍສິບປີ. ເພື່ອໂຄງສ້າງຂອງເຮືອນຈະແຂງແຮງກໍຕ້ອງມີຮາກຖານທີ່ໝັ້ນຄົງ ຄອບຄົວທີ່ເຂັ້ມແຂງກໍເປັນແບບດຽວກັນນັ້ນ. ຄອບຄົວທີ່ປະສົບຄວາມສຳເລັດຖືກສ້າງຂຶ້ນບົນຮາກຖານຂອງຄຳແນະນຳທີ່ໃຊ້ການໄດ້ແທ້.
ເປັນຫຍັງເລື່ອງນີ້ຈຶ່ງສຳຄັນ? ມີຄຳແນະນຳມາກມາຍໃນເລື່ອງຊີວິດຄອບຄົວຈາກປຶ້ມ ວາລະສານ ແລະລາຍການໂທລະພາບ. ບາງຄົນທີ່ໃຫ້ຄຳປຶກສາເລື່ອງຊີວິດຄອບຄົວອາດແນະນຳຄູ່ຜົວເມຍທີ່ມີບັນຫາໃຫ້ຢູ່ນຳກັນຕໍ່ໄປ ແຕ່ບາງຄົນກໍໃຫ້ຢ່າຮ້າງກັນ. ຜູ້ຊ່ຽວຊານບາງຄົນໄດ້ປ່ຽນຄວາມຄຶດຂອງຕົນໃນເລື່ອງນີ້. ຕົວຢ່າງເຊັ່ນ ໃນປີ 1914 ນັກບຳບັດຄົນໜຶ່ງທີ່ມີຊື່ສຽງເຊິ່ງຊ່ຽວຊານເລື່ອງບັນຫາຂອງໄວຮຸ່ນຂຽນວ່າ ຕອນທີ່ລາວເລີ່ມຕົ້ນອາຊີບນີ້ ລາວຮູ້ສຶກວ່າ “ຖ້າເດັກນ້ອຍຢູ່ກັບພໍ່ຫຼືແມ່ທີ່ມີຄວາມສຸກກໍດີກວ່າຢູ່ກັບທັງພໍ່ແມ່ທີ່ມີຄວາມທຸກ. ຂ້ອຍເຄີຍຄຶດວ່າການຢ່າຮ້າງເປັນທາງເລືອກທີ່ດີກວ່າການອົດຢູ່ກັບຊີວິດຄູ່ທີ່ຂາດຄວາມສຸກ.” ແຕ່ຫຼັງຈາກຜ່ານປະສົບການນີ້ມາເກືອບຊາວປີ ລາວກໍປ່ຽນຄວາມຄຶດ. ລາວບອກວ່າ: “ການຢ່າຮ້າງທຳລາຍຈິດໃຈຂອງເດັກນ້ອຍຫຼາຍຄົນ.”
ຄວາມຄິດເຫັນມັກຈະປ່ຽນແປງ ແຕ່ຄຳແນະນຳທີ່ດີທີ່ສຸດຕ້ອງສະແດງໃຫ້ເຫັນຫຼັກການທີ່ມາຈາກຄຳພີໄບເບິນ. ເມື່ອອ່ານບົດຄວາມຊຸດນີ້ ທ່ານອາດຈະສັງເກດເຫັນວ່າມີຫຼັກການຈາກຄຳພີໄບເບິນພິມໄວ້ຢູ່ທາງເທິງ. ຫຼັກການດັ່ງກ່າວໄດ້ຊ່ວຍຫຼາຍຄອບຄົວໃຫ້ປະສົບຄວາມສຳເລັດຢ່າງແທ້ຈິງ. ເຊັ່ນດຽວກັບທຸກຄອບຄົວ ຄອບຄົວເຫຼົ່ານັ້ນກໍມີບັນຫາ ແຕ່ຕ່າງກັນຢູ່ບ່ອນວ່າຄຳພີໄບເບິນໄດ້ຊ່ວຍເຂົາເຈົ້າໃຫ້ມີຮາກຖານທີ່ໝັ້ນຄົງໃນເລື່ອງຊີວິດຄອບຄົວ. ທ່ານສາມາດຄາດໝາຍວ່າຄຳພີໄບເບິນຈະເປັນແບບນັ້ນແທ້ ເພາະພະເຢໂຫວາຜູ້ປະພັນຄຳພີໄບເບິນເປັນຜູ້ຈັດຕັ້ງຄອບຄົວ.—2 ຕີໂມເຕ 3:16, 17
ລອງວິທີຕໍ່ໄປນີ້. ໃຫ້ຂຽນຂໍ້ພະຄຳພີທີ່ກ່າວເຖິງໃນແຕ່ລະເຄັດລັບ ແລະຂຽນຂໍ້ພະຄຳພີອື່ນໆທີ່ໄດ້ຊ່ວຍທ່ານ. ໃຫ້ເກັບຂໍ້ພະຄຳພີເຫຼົ່ານັ້ນໄວ້ໃນບ່ອນທີ່ເຫັນໄດ້ງ່າຍແລະເອົາມາອ່ານເລື້ອຍໆ.
ຕັ້ງໃຈຢ່າງເດັດຂາດ. ໃຫ້ຕັ້ງໃຈທີ່ຈະນຳໃຊ້ຫຼັກການໃນຄຳພີໄບເບິນໃນຊີວິດຄອບຄົວຂອງທ່ານ.
[ພາບໜ້າ 8, 9]
ໂດຍອາໄສຮາກຖານທີ່ໝັ້ນຄົງຈາກຄຳພີໄບເບິນ ຄອບຄົວຂອງເຮົາສາມາດຕ້ານທານແຮງລົມພາຍຸໄດ້