ບົດທີ 10
ເປັນຫຍັງໝູ່ຈຶ່ງເຮັດໃຫ້ຂ້ອຍເຈັບ?
“ແຄຣີ້ເປັນໝູ່ທີ່ຂ້ອຍສະໜິດຫຼາຍ. ຍ້ອນລາວບໍ່ມີລົດ ຂ້ອຍເລີຍໄປຮັບລາວທຸກມື້ຫຼັງເລີກວຽກ. ແຕ່ບໍ່ດົນ ຂ້ອຍກໍເລີ່ມຮູ້ສຶກວ່າລາວເປັນໝູ່ກັບຂ້ອຍຍ້ອນຜົນເປັນປະໂຫຍດເທົ່ານັ້ນ.
“ເມື່ອຂຶ້ນລົດ ລາວກໍມີແຕ່ລົມໂທລະສັບຫຼືບໍ່ກໍສົ່ງຂໍ້ຄວາມ. ລາວບໍ່ເຄີຍເວົ້າຂອບໃຈຂ້ອຍເລີຍ ແລະດຽວນີ້ກໍບໍ່ຊ່ວຍອອກຄ່ານ້ຳມັນແລ້ວ. ແຕ່ລະຢ່າງທີ່ລາວເວົ້າອອກມາມີແຕ່ແງ່ລົບ. ຂ້ອຍໃຈຮ້າຍໃຫ້ໂຕເອງຫຼາຍທີ່ຍອມທົນລາວມາດົນຂະໜາດນີ້!
“ມື້ໜຶ່ງຂ້ອຍອະທິບາຍກັບແຄຣີ້ດີໆວ່າຂ້ອຍບໍ່ສະດວກທີ່ຈະໄປຮັບລາວແລ້ວ. ຕັ້ງແຕ່ນັ້ນມາ ລາວກໍສະແດງທ່າທີວ່າບໍ່ຢາກຄົບຫາກັບຂ້ອຍ. ຂ້ອຍເລີຍໝັ້ນໃຈວ່າລາວເປັນໝູ່ກັບຂ້ອຍພຽງເພື່ອຜົນປະໂຫຍດຂອງລາວເທົ່ານັ້ນ. ຄິດເບິ່ງແລ້ວມັນກໍເຈັບແທ້ໆ!—ນິໂຄ
ເລື່ອງນີ້ເກີດຂຶ້ນໄດ້ກັບໝູ່ສະໜິດ. ສອງຄົນທີ່ໂຕຕິດກັນປານເຂົ້າໜົມຄູ່ ຢູ່ດີໆອາດຈະບໍ່ລົມນຳກັນເລີຍກໍໄດ້. ໝູ່ທີ່ຮັກກັນຫຼາຍກາຍເປັນຄືຄົນທີ່ບໍ່ຮູ້ຈັກກັນໄດ້ໄວຂະໜາດນີ້ໄດ້ແນວໃດ?
● ສຳລັບເຈເຣມີ ສິ່ງຕ່າງໆເບິ່ງຄືປ່ຽນໄປເມື່ອໝູ່ສະໜິດຂອງລາວຍ້າຍໄປຢູ່ບ່ອນອື່ນທີ່ໄກປະມານ 1.600 ກິໂລແມັດ. ເຈເຣມີບອກວ່າ: “ຫຼັງຈາກທີ່ໝູ່ຂ້ອຍຍ້າຍໄປ ລາວກໍບໍ່ເຄີຍໂທຫາຂ້ອຍເລີຍ. ຂ້ອຍຮູ້ສຶກເສຍໃຈຫຼາຍແທ້ໆ.”
● ເຄີຣິນສັງເກດເຫັນວ່າໝູ່ສະໜິດທີ່ຄົບກັນມາຫ້າປີເລີ່ມມີນິດໄສປ່ຽນໄປ. ເຄີຣິນບອກວ່າ: “ສິ່ງທີ່ລາວເວົ້າແລະຄິດເຮັດໃຫ້ຂ້ອຍເປັນຫ່ວງຫຼາຍແທ້ໆ. ອັນໃດທີ່ຂ້ອຍຄິດວ່າດີຫຼືສຳຄັນ ລາວພັດວິພາກວິຈານຫຼືເວົ້າໃນແງ່ລົບ. ເມື່ອຂ້ອຍພະຍາຍາມປັບຄວາມເຂົ້າໃຈກັບລາວ ລາວກໍໂທດວ່າມັນເປັນຄວາມຜິດຂ້ອຍ ບອກວ່າຂ້ອຍເປັນໝູ່ທີ່ບໍ່ຈິງໃຈແລະຄິດວ່າໂຕເອງຖືກສະເໝີ ແລ້ວກໍບອກວ່າການທີ່ເຮົາເປັນໝູ່ກັນບໍ່ມີປະໂຫຍດຫຍັງດອກ!”
● ສຳລັບກຼໍເຣຍ ຢູ່ດີໆໝູ່ສະໜິດກໍເຊົາຫຼິ້ນນຳລາວໂດຍທີ່ບໍ່ເວົ້າຫຍັງເລີຍ. ກຼໍເຣຍບອກວ່າ: “ຕອນທຳອິດ ເຮົາສະໜິດກັນຫຼາຍແລະເປັນຄືເອື້ອຍນ້ອງກັນແທ້ໆ. ແຕ່ຢູ່ດີໆ ລາວກໍຄ່ອຍໆຫ່າງແລະບໍ່ຍອມໄປໃສມາໃສກັບຂ້ອຍ ລາວຈະອ້າງເຫດຜົນແນວນັ້ນແນວນີ້ຕະຫຼອດ.”
● ລໍຣາກັບດາເຣຍເລີ່ມມີບັນຫາກັນຕອນທີ່ດາເຣຍຍາດແຟນລໍຣາ. ລໍຣາບອກວ່າ: “ດາເຣຍລົມໂທລະສັບກັບລາວເປັນຊົ່ວໂມງທັງໆທີ່ລາວເປັນແຟນຂ້ອຍ. ຂ້ອຍຖືກໝູ່ສະໜິດຫັກຫຼັງ ແລະໃນເວລາດຽວກັນ ຂ້ອຍກໍສູນເສຍຄົນທີ່ຂ້ອຍຄິດວ່າຈະແຕ່ງດອງນຳ!”
ບັນຫາແມ່ນຫຍັງ?
ທຸກຄົນເຮັດຜິດພາດກັນໄດ້. ບາງເທື່ອໝູ່ກໍເວົ້າຫຼືເຮັດບາງຢ່າງທີ່ເຮັດໃຫ້ເຈົ້າເຈັບໃຈ ແລະເຈົ້າເອງກໍເຄີຍເຮັດໃຫ້ໝູ່ເຈັບໃຈຄືກັນ. (ປັນຍາຈານ 7:22) ຜູ້ຍິງຄົນໜຶ່ງຊື່ລີຊ໋າບອກວ່າ: “ເຮົາທຸກຄົນບໍ່ສົມບູນແບບ ແລະບາງເທື່ອເຮົາກໍເຮັດໃຫ້ຄົນອື່ນບໍ່ພໍໃຈ.” ຖ້າເປັນເລື່ອງເລັກໆນ້ອຍໆທີ່ເກີດຈາກຄວາມເຂົ້າໃຈຜິດ ພຽງແຕ່ລົມກັນກໍສາມາດປັບຄວາມເຂົ້າໃຈກັນໄດ້.
ແຕ່ຖ້າເຈົ້າເລີ່ມຮູ້ສຶກວ່າພວກເຈົ້າບໍ່ສະໜິດກັນຄືແຕ່ກ່ອນແລະມີເລື່ອງທີ່ຜິດໃຈກັນຕະຫຼອດ ກໍຂໍຈື່ໄວ້ວ່າເມື່ອເຈົ້າໃຫຍ່ຂຶ້ນ ຄວາມສົນໃຈຂອງເຈົ້າກໍຈະປ່ຽນໄປ ແລະໝູ່ຂອງເຈົ້າກໍເປັນແບບນັ້ນຄືກັນ. ແລ້ວເຈົ້າຈະເຮັດແນວໃດຖ້າຮູ້ສຶກວ່າເຈົ້າກັບໝູ່ກຳລັງຫ່າງເຫີນກັນ?
ວິທີຟື້ນຟູມິດຕະພາບ
ເຈົ້າເຄີຍເຮັດໃຫ້ເສື້ອທີ່ເຈົ້າມັກຫຼາຍທີ່ສຸດຂາດບໍ? ແລ້ວເຈົ້າເຮັດແນວໃດ? ໂຍນມັນຖິ້ມບໍ ຫຼືຫາວິທີແປງມັນ? ກໍຂຶ້ນຢູ່ກັບວ່າມັນຂາດຫຼາຍໜ້ອຍສ່ຳໃດແລະເຈົ້າຢາກໃສ່ມັນຕໍ່ໄປບໍ່. ຖ້າຍັງຢາກໃສ່ ເຈົ້າຄືຊິພະຍາຍາມແປງມັນໃຫ້ໄດ້. ຮອຍແຕກລະຫວ່າງເຈົ້າກັບໝູ່ກໍເປັນແບບນັ້ນຄືກັນ. ເຈົ້າຈະຟື້ນຟູມັນຫຼືບໍ່ກໍຂຶ້ນຢູ່ກັບວ່າບັນຫາເກີດຈາກຫຍັງແລະເຈົ້າຍັງຢາກເປັນໝູ່ກັບລາວຕໍ່ໄປບໍ່.a
ຕົວຢ່າງເຊັ່ນ ຖ້າໝູ່ຂອງເຈົ້າເວົ້າຫຼືເຮັດບາງສິ່ງທີ່ເຮັດໃຫ້ເຈົ້າຮູ້ສຶກເຈັບໃຈ ເຈົ້າອາດເບິ່ງຂ້າມບັນຫານັ້ນໄດ້ໂດຍເຮັດຕາມຄຳແນະນຳໃນເພງສັນລະເສີນ 4:4 ທີ່ວ່າ: “ໃຫ້ຄິດໃນໃຈຢູ່ເທິງບ່ອນນອນແລະບໍ່ຕ້ອງເວົ້າຫຍັງ.” ດັ່ງນັ້ນ ກ່ອນຈະເຊົາເປັນໝູ່ກັນ ກໍໃຫ້ຄິດຮອບຄອບກ່ອນ. ລາວຕັ້ງໃຈເຮັດແບບນັ້ນບໍ? ຖ້າເຈົ້າບໍ່ແນ່ໃຈ ເຈົ້າກໍບໍ່ຟ້າວຕັດສິນວ່າໝູ່ຂອງເຈົ້າມີເຈຕະນາບໍ່ດີ. ສ່ວນໃຫຍ່ແລ້ວ ເຈົ້າອາດຈະປ່ອຍໃຫ້ເລື່ອງນັ້ນຜ່ານໄປເພາະ “ຄວາມຮັກເຮັດໃຫ້ຄົນເຮົາເຕັມໃຈຍົກໂທດໃຫ້ຄົນອື່ນ” ໄດ້.—1 ເປໂຕ 4:8
ເຈົ້າອາດຄິດນຳວ່າເຈົ້າເອງກໍມີສ່ວນທີ່ເຮັດໃຫ້ເກີດບັນຫາຄືກັນບໍ. ຕົວຢ່າງເຊັ່ນ ຖ້າເຈົ້າເອົາເລື່ອງທີ່ບໍ່ຄວນເລົ່າໄປເວົ້າໃຫ້ໝູ່ຟັງ ແລ້ວໝູ່ເອົາໄປເວົ້າຕໍ່. ລອງຄິດເບິ່ງວ່າໜ້າຈະເປັນຄວາມຜິດຂອງໃຜ? ຫຼືຖ້າເຈົ້າເປັນຄົນເວົ້າຫຼາຍໂພດແລະເວົ້າແນວໂງ່ໆອອກມາແລ້ວໝູ່ເຍາະເຍີ້ຍເຈົ້າ ເຈົ້າຄິດວ່າໜ້າຈະເປັນຄວາມຜິດຂອງໃຜ? (ສຸພາສິດ 15:2) ດັ່ງນັ້ນ ໃຫ້ຖາມໂຕເອງວ່າ ‘ຂ້ອຍຕ້ອງປ່ຽນແປງໂຕເອງແນວໃດເພື່ອທີ່ໝູ່ຈະບໍ່ເຮັດແບບນັ້ນກັບຂ້ອຍ?’
“ເຮົາມາປັບຄວາມເຂົ້າໃຈກັນດີບໍ?”
ຖ້າເຈົ້າຮູ້ສຶກວ່າລືມເລື່ອງນີ້ໄປບໍ່ໄດ້ ກໍໃຫ້ໄປລົມກັບໝູ່. ແຕ່ຈື່ໄວ້ວ່າຢ່າໄປລົມຕອນທີ່ເຈົ້າຍັງໃຈຮ້າຍຢູ່. ຄຳພີໄບເບິນບອກວ່າ: “ຄົນທີ່ໃຈຮ້າຍງ່າຍຍົວະໃຫ້ຜິດຖຽງກັນ ແຕ່ຄົນທີ່ບໍ່ໃຈຮ້າຍງ່າຍເຮັດໃຫ້ເຊົາຜິດຖຽງກັນ.” (ສຸພາສິດ 15:18) ດັ່ງນັ້ນ ໃຫ້ລໍຖ້າຈົນກວ່າເຈົ້າຈະໃຈເຢັນກ່ອນແລ້ວຈຶ່ງໄປລົມກັບລາວ.
ເມື່ອເຈົ້າໄປລົມກັບໝູ່ ຈື່ໄວ້ວ່າເປົ້າໝາຍຂອງເຈົ້າບໍ່ແມ່ນການ “ເຮັດຊົ່ວໃສ່ເຂົາເຈົ້າຄືນ.” (ໂຣມ 12:17) ແຕ່ເປັນການແກ້ໄຂບັນຫາແລະຄືນດີກັນ. (ເພງສັນລະເສີນ 34:14) ດັ່ງນັ້ນ ໃຫ້ເວົ້າຈາກໃຈແລະກົງໄປກົງມາ. ເຈົ້າອາດເວົ້າວ່າ: “ເຮົາກໍຫຼິ້ນນຳກັນມາດົນແລ້ວ. ເຮົາມາປັບຄວາມເຂົ້າໃຈກັນດີບໍ?” ເມື່ອເຈົ້າຮູ້ສາເຫດຂອງບັນຫາແລ້ວ ມັນກໍງ່າຍຂຶ້ນທີ່ຈະແກ້ໄຂບັນຫານັ້ນ. ຖ້າເຈົ້າພະຍາຍາມຄືນດີກັບໝູ່ແລ້ວ ແຕ່ລາວບໍ່ຍອມ ເຈົ້າກໍສະບາຍໃຈໄດ້ເພາະເຈົ້າເຮັດເຕັມທີແລ້ວ.
ຂໍໃຫ້ໝັ້ນໃຈວ່າ ເຖິງມີ “ບາງຄົນພ້ອມທີ່ຈະທຳລາຍໝູ່ຂອງໂຕເອງ” ແຕ່ກໍຍັງມີ “ໝູ່ທີ່ຮັກແພງກັນຫຼາຍກວ່າອ້າຍນ້ອງແທ້ໆ.” (ສຸພາສິດ 18:24) ຢ່າລືມວ່າແມ່ນແຕ່ໝູ່ທີ່ຮັກແລະສະໜິດກັນຫຼາຍກໍອາດຜິດໃຈກັນເປັນບາງເທື່ອ. ເມື່ອເກີດເລື່ອງແບບນັ້ນ ກໍໃຫ້ພະຍາຍາມເຮັດທຸກຢ່າງທີ່ເຮັດໄດ້ເພື່ອຈະຟື້ນຟູສາຍສຳພັນກັບໝູ່. ຖ້າເຮັດແບບນັ້ນກໍສະແດງວ່າເຈົ້າກຳລັງຈະເປັນຜູ້ໃຫຍ່.
ອ່ານເພີ່ມເຕີມກ່ຽວກັບຫົວຂໍ້ນີ້ໃນເຫຼັ້ມທີ 1 ບົດທີ 8
ໝູ່ບາງຄົນອາດມັກແຊັດຢູ່ອິນເຕີເນັດຫຼາຍຊົ່ວໂມງ. ເປັນຫຍັງເຂົາເຈົ້າຈຶ່ງຕິດຂະໜາດນັ້ນ?
[ຂໍ້ຄວາມໄຂເງື່ອນ]
a ເຈົ້າອາດບໍ່ຢາກເປັນໝູ່ສະໜິດກັບບາງຄົນອີກຕໍ່ໄປ ໂດຍສະເພາະຖ້າລາວເຮັດໂຕບໍ່ສົມກັບການເປັນຄລິດສະຕຽນ.—1 ໂກຣິນໂທ 5:11; 15:33
ຂໍ້ຄຳພີຫຼັກ
“ໃຫ້ພວກເຈົ້າພະຍາຍາມຫຼາຍທີ່ສຸດເພື່ອຈະສ້າງຄວາມສະຫງົບສຸກກັບທຸກຄົນ.”—ໂຣມ 12:18
ຄຳແນະນຳ
ຢ່າຟ້າວສະຫຼຸບ ລໍຖ້າໃຫ້ໝູ່ຂອງເຈົ້າເລົ່າຈົບກ່ອນ.—ສຸພາສິດ 18:13
ເຈົ້າຮູ້ບໍ . . . ?
ໝູ່ທີ່ດີຕ້ອງຍອມໃຫ້ອີກຝ່າຍມີເວລາສ່ວນໂຕ. (ສຸພາສິດ 25:17) ກົງກັນຂ້າມ ຖ້າເຈົ້າບໍ່ຍອມໃຫ້ໝູ່ມີເວລາສ່ວນໂຕຫຼືສົນໃຈຢ່າງອື່ນ ລາວກໍອາດຈະອຶດອັດແລະບໍ່ຢາກຫຼິ້ນນຳເຈົ້າເລີຍ.
ແຜນພາກປະຕິບັດ!
ຖ້າຂ້ອຍຕ້ອງເຂົ້າໄປລົມກັບໝູ່ເລື່ອງທີ່ລາວເຮັດໃຫ້ຂ້ອຍເຈັບໃຈ ຂ້ອຍອາດຈະເລີ່ມເວົ້າວ່າ ․․․․․
ເຖິງວ່າໝູ່ຈະເຮັດໃຫ້ຂ້ອຍບໍ່ພໍໃຈ ຂ້ອຍກໍຈະພະຍາຍາມແກ້ໄຂບັນຫາຢ່າງສັນຕິໂດຍ ․․․․․
ສິ່ງທີ່ຂ້ອຍຢາກຖາມພໍ່ແມ່ກ່ຽວກັບເລື່ອງນີ້ແມ່ນ ․․․․․
ເຈົ້າຄິດແນວໃດ?
● ເປັນຫຍັງບາງຄົນຈຶ່ງເຊົາເປັນໝູ່ກັນ?
● ບັນຫາແບບໃດທີ່ເຈົ້າເບິ່ງຂ້າມໄດ້ ແລະບັນຫາແບບໃດທີ່ເຈົ້າເບິ່ງຂ້າມບໍ່ໄດ້ແລ້ວຕ້ອງໄປລົມກັບໝູ່ທີ່ເຮັດໃຫ້ເຈົ້າເຈັບໃຈ?
● ເມື່ອໝູ່ເຮັດໃຫ້ເຈົ້າເຈັບໃຈ ເຈົ້າໄດ້ຮຽນຮູ້ຫຍັງແດ່ຈາກເຫດການນັ້ນ?
● ເຈົ້າຈະລະວັງບໍ່ໃຫ້ເກີດເຫດການທີ່ໝູ່ຈະເຮັດໃຫ້ເຈົ້າເຈັບໃຈໄດ້ແນວໃດ?
[ຖ້ອຍຄຳທີ່ຍົກມາໜ້າ 95]
“ຖ້າຍ້ອນເວລາກັບໄປໄດ້ ຂ້ອຍຈະບໍ່ຄາດໝາຍຄວາມສົມບູນແບບຈາກໝູ່. ຂ້ອຍຈະຮັບຟັງລາວຫຼາຍຂຶ້ນ ຊ່ວຍເຫຼືອລາວ ແລະຖ້າລາວເຮັດຫຍັງຜິດພາດ ຂ້ອຍກໍຈະບໍ່ເຮັດໃຫ້ມັນເປັນເລື່ອງໃຫຍ່. ຕອນນີ້ຂ້ອຍເຂົ້າໃຈແລ້ວວ່າເພື່ອທີ່ຈະເປັນໝູ່ກັນໄປໄດ້ຕະຫຼອດກໍຕ້ອງຜ່ານບັນຫາແລະອຸປະສັກຫຼາຍຢ່າງ.”—ຄີນ໋ອນ
[ຮູບພາບໜ້າ 94]
ຮອຍແຕກລະຫວ່າງໝູ່ກໍຄືກັບເສື້ອທີ່ມີຮອຍຂາດ ສາມາດແກ້ໄຂແລະຟື້ນຟູໄດ້