ບົດທີ 8
ຂ້ອຍຈະມີໝູ່ທີ່ດີໄດ້ແນວໃດ?
“ຖ້າຂ້ອຍໃຈຮ້າຍ ຂ້ອຍຕ້ອງການທີ່ຈະລະບາຍຄວາມຮູ້ສຶກກັບຜູ້ໃດຜູ້ໜຶ່ງ. ຖ້າຂ້ອຍເສຍໃຈ ຂ້ອຍຕ້ອງການຜູ້ໃດຜູ້ໜຶ່ງປອບໃຈຂ້ອຍ. ຖ້າຂ້ອຍດີໃຈ ຂ້ອຍຕ້ອງການໃຫ້ຜູ້ໃດຜູ້ໜຶ່ງຮ່ວມດີໃຈນຳ. ສຳລັບຂ້ອຍ ການມີໝູ່ເປັນເລື່ອງສຳຄັນຫຼາຍ.”—ນາງ ບິດທານີ.
ມີການເວົ້າກັນວ່າເດັກນ້ອຍຈຳເປັນຕ້ອງມີໝູ່ຫຼິ້ນນຳ ໃນຂະນະທີ່ໜຸ່ມສາວຈຳເປັນຕ້ອງມີໝູ່ແທ້. ມີຫຍັງທີ່ແຕກຕ່າງກັນໃນເລື່ອງນີ້?
ໝູ່ຫຼິ້ນ ຄືຜູ້ທີ່ຊ່ວຍເຈົ້າບໍ່ໃຫ້ເຫງົາ.
ໝູ່ແທ້ ຄືຜູ້ທີ່ມີຄ່ານິຍົມແບບດຽວກັບເຈົ້າ.
ຍິ່ງກວ່ານັ້ນ ຄຳພີໄບເບິນກ່າວວ່າ: “ສ່ຽວຮັກຢູ່ທຸກເວລາແລະ [ເປັນ] ອ້າຍນ້ອງຜູ້ໜຶ່ງໄດ້ເກີດເພື່ອຈະຊ່ອຍໃນເວລາຂັດສົນຫຼາຍ.” (ສຸພາສິດ 17:17) ຄຳເວົ້ານີ້ຄົງຈະເປັນການພັນລະນາເຖິງມິດຕະພາບທີ່ເລິກເຊິ່ງກວ່າມິດຕະພາບທີ່ໄດ້ຈາກເດີ່ນຫຼິ້ນຂອງເດັກນ້ອຍ!
ຄວາມເປັນຈິງ ເມື່ອເຈົ້າກ້າວເຂົ້າສູ່ໄວຜູ້ໃຫຍ່ ເຈົ້າຈຳເປັນຕ້ອງມີໝູ່ແທ້ເຊິ່ງ
1. ມີຄຸນລັກສະນະທີ່ເປັນຕາໜ້າຍົກຍ້ອງ
2. ດຳເນີນຊີວິດຕາມມາດຕະຖານທີ່ເປັນຕາໜ້ານັບຖື
3. ມີອິດທິພົນໃນທາງທີ່ດີ ຕໍ່ເຈົ້າ
ຄຳຖາມ ເຈົ້າຈະຫາໝູ່ທີ່ມີຄຸນສົມບັດເຫຼົ່ານີ້ແນວໃດ? ໃຫ້ເຮົາພິຈາລະນາຄຸນສົມບັດແຕ່ລະຢ່າງນຳກັນ.
ຄຸນສົມບັດຂອງໝູ່ຢ່າງທີ 1 ຄຸນລັກສະນະທີ່ເປັນຕາໜ້າຍົກຍ້ອງ
ສິ່ງທີ່ເຈົ້າຄວນຮູ້. ບໍ່ແມ່ນໝົດທຸກຄົນຈະເປັນໝູ່ແທ້ໄດ້. ແມ່ນແຕ່ຄຳພີໄບເບິນໄດ້ກ່າວວ່າ: “ມີໝູ່ທີ່ພ້ອມຈະທຳລາຍກັນໃຫ້ຍ່ອຍຍັບ.” (ສຸພາສິດ 18:24, ລ.ມ.) ນັ້ນອາດຟັງຄືວ່າໂຫດແທ້. ແຕ່ຂໍໃຫ້ຄິດເບິ່ງດູ ເຈົ້າເຄີຍມີ “ໝູ່” ທີ່ເອົາປຽບເຈົ້າບໍ? ຈະວ່າແນວໃດກັບໝູ່ທີ່ເວົ້າລັບຫຼັງຫຼືແພ່ຂ່າວລືທີ່ບໍ່ດີກ່ຽວກັບເຈົ້າ? ປະສົບການແບບນັ້ນເຮັດໃຫ້ເຈົ້າບໍ່ໄວ້ເນື້ອເຊື່ອໃຈໃນຕົວໝູ່ໄດ້ອີກຕໍ່ໄປ.a ຂໍໃຫ້ຈື່ໄວ້ສະເໝີວ່າເມື່ອເວົ້າເຖິງໝູ່ເພື່ອນ ຄຸນນະພາບເປັນສິ່ງສຳຄັນກວ່າປະລິມານ!
ສິ່ງທີ່ເຈົ້າເຮັດໄດ້. ໃຫ້ເລືອກຄົບໝູ່ສະເພາະແຕ່ຜູ້ທີ່ມີຄຸນລັກສະນະທີ່ສົມຄວນຈະຮຽນເອົາເປັນແບບຢ່າງ.
“ທຸກຄົນຄິດເຖິງນາງຟີໂອນາໝູ່ຂອງຂ້ອຍໃນທາງທີ່ດີ. ຂ້ອຍຢາກໃຫ້ມີຄົນເວົ້າເຖິງຂ້ອຍໃນທາງທີ່ດີເຊັ່ນກັນ. ຂ້ອຍຢາກມີຊື່ສຽງແບບດຽວກັບທີ່ລາວມີ. ສຳລັບຂ້ອຍແລ້ວ ນັ້ນເປັນສິ່ງທີ່ເປັນຕາໜ້າຍົກຍ້ອງ.”—ນາງ ອີເວັດ ອາຍຸ 17 ປີ.
ໃຫ້ລອງເຮັດບົດຝຶກຫັດນີ້.
1. ອ່ານຄາລາຊີ 5:22, 23.
2. ໃຫ້ຖາມຕົວເອງວ່າ ‘ໝູ່ຂອງຂ້ອຍໄດ້ສະແດງຄຸນລັກສະນະບາງຢ່າງທີ່ມີໃນ “ໝາກແຫ່ງພະວິນຍານ” ບໍ?’
3. ໃຫ້ຂຽນລາຍຊື່ໝູ່ສະໜິດທີ່ສຸດໃສ່ທາງລຸ່ມນີ້. ທາງຂ້າງແຕ່ລະຊື່ ໃຫ້ຂຽນລັກສະນະນິດໄສໃຈຄໍທີ່ກົງກັບຜູ້ນັ້ນຫຼາຍທີ່ສຸດ
ຊື່ ນິດໄສໃຈຄໍ
․․․․․ ․․․․․
ຄຳແນະນຳ ຖ້າເຈົ້າຄິດພໍ້ແຕ່ນິດໄສໃຈຄໍທີ່ບໍ່ດີ ກໍອາດຮອດເວລາແລ້ວທີ່ຈະຊອກໝູ່ທີ່ດີກວ່ານັ້ນ!
ຄຸນສົມບັດຂອງໝູ່ຢ່າງທີ 2 ດຳເນີນຊີວິດຕາມມາດຕະຖານທີ່ເປັນຕາໜ້ານັບຖື
ສິ່ງທີ່ເຈົ້າຄວນຮູ້. ແຮ່ງເຈົ້າຕ້ອງການຢາກມີໝູ່ຫຼາຍເທົ່າໃດ ກໍເບິ່ງຄືວ່າເຈົ້າຈະໄດ້ໝູ່ແບບທີ່ບໍ່ເປັນຕາເອົາຫຼາຍເທົ່ານັ້ນ. ພະຄຳພີກ່າວວ່າ: “ຜູ້ສ່ຽວຂອງພວກຄົນໂງ່ກໍຈະໃຫ້ຕົວຊົ່ວໄປ.” (ສຸພາສິດ 13:20) ຄຳວ່າ “ຄົນໂງ່” ບໍ່ໄດ້ໝາຍເຖິງຜູ້ທີ່ຮຽນໜັງສືອ່ອນຫຼືຜູ້ທີ່ບໍ່ສະຫຼາດ. ແທນທີ່ຈະເປັນແນວນັ້ນ ຄຳນີ້ພັນລະນາເຖິງຄົນທີ່ບໍ່ຍອມຮັບຟັງການຫາເຫດຜົນທີ່ສຸຂຸມ ແລະຍັງຝືນຕິດຕາມແນວທາງການປະພຶດດ້ານສິລະທຳທີ່ລະຫຼວມ. ນັ້ນຄືລັກສະນະຂອງໝູ່ທີ່ບໍ່ຄວນຄົບຫາ!
ສິ່ງທີ່ເຈົ້າເຮັດໄດ້. ແທນທີ່ຈະຄົບກັບຜູ້ໃດກໍໄດ້ເປັນໝູ່ ຈົ່ງເລືອກເຟັ້ນໃນການເລືອກໝູ່. (ຄຳເພງ 26:4) ນັ້ນບໍ່ໄດ້ໝາຍຄວາມວ່າເຈົ້າເປັນຄົນມີອະຄະຕິ. ໃນບົດຄວາມນີ້ ການເປັນຄົນເລືອກເຟັ້ນໃນການເລືອກໝາຍຄວາມວ່າເຈົ້າຕ້ອງເປັນຄົນຮອບຄອບພຽງພໍທີ່ຈະເຫັນຄວາມແຕກຕ່າງລະຫວ່າງ “ຄົນຊອບທຳກັບຄົນຮ້າຍ . . . ຄົນທີ່ບົວລະບັດພະເຈົ້າກັບຄົນທີ່ບໍ່ບົວລະບັດພະເຈົ້າ.”—ມາລາກີ 3:18.
“ຂ້ອຍຮູ້ສຶກຂອບໃຈທີ່ພໍ່ແມ່ຊ່ວຍຂ້ອຍໃຫ້ພົບໝູ່ໃນໄວດຽວກັນເຊິ່ງດຳເນີນຊີວິດຕາມມາດຕະຖານຂອງພະເຈົ້າ.”—ທ້າວ ຄລິດສະໂຕເຟີ ອາຍຸ 13 ປີ.
ຂໍໃຫ້ຕອບຄຳຖາມທາງລຸ່ມນີ້
ເມື່ອຢູ່ກັບໝູ່ ຂ້ອຍມັກກັງວົນວ່າເຂົາເຈົ້າອາດພະຍາຍາມກົດດັນຂ້ອຍໃຫ້ເຮັດໃນບາງສິ່ງທີ່ຂ້ອຍຮູ້ວ່າຜິດບໍ?
◻ ແມ່ນ
◻ ບໍ່ແມ່ນ
ຂ້ອຍລັງເລໃຈທີ່ຈະແນະນຳໝູ່ໃຫ້ພໍ່ແມ່ຮູ້ຈັກບໍ ເພາະຢ້ານວ່າພວກເພິ່ນອາດບໍ່ຍອມຮັບເຂົາເຈົ້າ?
◻ ແມ່ນ
◻ ບໍ່ແມ່ນ
ຄຳແນະນຳ: ຖ້າເຈົ້າຕອບຄຳຖາມທີ່ຢູ່ຂ້າງເທິງນັ້ນວ່າແມ່ນ ຂໍໃຫ້ຊອກໝູ່ທີ່ມີມາດຕະຖານສູງກວ່ານັ້ນເຊິ່ງເປັນຜູ້ທີ່ເປັນຕົວຢ່າງທີ່ດີໃນການດຳເນີນຊີວິດແບບຄລິດສະຕຽນ?
ຄຸນສົມບັດຂອງໝູ່ຢ່າງທີ 3 ມີອິດທິພົນໃນທາງທີ່ດີ
ສິ່ງທີ່ເຈົ້າຄວນຮູ້. ຄຳພີໄບເບິນກ່າວວ່າ: “ການທີ່ຈະຄົບຫາກັນກັບຄົນຊົ່ວນັ້ນຈະກະທຳໃຫ້ທຳນຽມອັນດີກາຍເປັນຊົ່ວໄປດ້ວຍ.” (1 ໂກລິນໂທ 15:33) ຍິງສາວຊື່ລໍເຣັນບອກວ່າ: “ໝູ່ທີ່ຮຽນໜັງສືຢູ່ຫ້ອງດຽວກັນຈະຍອມຮັບຂ້ອຍຕາບໃດທີ່ຂ້ອຍເຮັດໃນສິ່ງທີ່ເຂົາເຈົ້າບອກໃຫ້ເຮັດ. ຂ້ອຍຮູ້ສຶກເຫງົາ ດັ່ງນັ້ນຂ້ອຍຈຶ່ງຕັດສິນໃຈເຮັດຄືພວກເຂົາເຈົ້າເພື່ອຈະເປັນທີ່ຍອມຮັບ.” ລໍເຣັນຄົ້ນພົບວ່າເມື່ອເຈົ້າປັບຕົວໃຫ້ເຂົ້າກັບມາດຕະຖານຂອງຄົນອື່ນ ເຈົ້າເປັນຄືກັບໝາກດ້າມຢູ່ເທິງແປ້ນ ທີ່ເຂົາເຈົ້າ ຈະວາງໄວ້ບ່ອນໃດກໍໄດ້ຕາມໃຈ. ເຈົ້າຄວນຈະໄດ້ໝູ່ທີ່ດີກວ່ານັ້ນ!
ສິ່ງທີ່ເຈົ້າເຮັດໄດ້. ຍຸດຕິສາຍສຳພັນກັບໝູ່ທີ່ຢືນຢັນວ່າເຈົ້າຕ້ອງເຮັດຕາມຮູບແບບຊີວິດຂອງເຂົາເຈົ້າ. ຖ້າເລີ່ມຕົ້ນເຮັດຕາມຂັ້ນຕອນນີ້ ເຈົ້າອາດມີໝູ່ໜ້ອຍລົງ ແຕ່ເຈົ້າຈະຮູ້ສຶກນັບຖືຕົວເອງຫຼາຍຂຶ້ນແລະເຈົ້າຈະເປີດທາງໄວ້ເພື່ອໃຫ້ມີໝູ່ທີ່ດີຂຶ້ນ ເຊິ່ງເປັນສາຍສຳພັນທີ່ສົ່ງຜົນຕໍ່ເຈົ້າໃນທາງທີ່ດີຂຶ້ນ.—ໂລມ 12:2.
“ທ້າວ ຄລິນໝູ່ສະໜິດຂອງຂ້ອຍເປັນຄົນທີ່ມີເຫດຜົນແລະເຫັນອົກເຫັນໃຈຄົນອື່ນ ລາວເປັນແຫຼ່ງແຫ່ງການໜູນໃຈທີ່ດີທີ່ສຸດສຳລັບຂ້ອຍ.”—ທ້າວ ເຈສັນ ອາຍຸ 21 ປີ.
ຂໍໃຫ້ຖາມຕົວເອງດ້ວຍຄຳຖາມຕໍ່ໄປນີ້
ຂ້ອຍປ່ຽນວິທີແຕ່ງຕົວ ການເວົ້າ ຫຼືປະພຶດແບບບໍ່ງາມເພື່ອເອົາໃຈໝູ່ບໍ?
◻ ແມ່ນ
◻ ບໍ່ແມ່ນ
ຂ້ອຍເອງໄປສະຖານທີ່ທີ່ໜ້າສົງໄສໃນເລື່ອງຫຼັກສິລະທຳບໍ ເຊິ່ງຂ້ອຍຈະບໍ່ໄປຖ້າບໍ່ແມ່ນຍ້ອນໝູ່ພາໄປ?
◻ ແມ່ນ
◻ ບໍ່ແມ່ນ
ຄຳແນະນຳ ຖ້າເຈົ້າຕອບຄຳຖາມວ່າແມ່ນ ໃຫ້ຂໍຄຳແນະນຳຈາກພໍ່ແມ່ຫຼືຜູ້ໃຫຍ່ທີ່ອາວຸໂສຈັກຄົນໜຶ່ງ. ຖ້າເຈົ້າເປັນພະຍານພະເຢໂຫວາ ເຈົ້າສາມາດລົມກັບຜູ້ເຖົ້າແກ່ໃນປະຊາຄົມຄລິດສະຕຽນແລະບອກໃຫ້ເພິ່ນຮູ້ວ່າເຈົ້າຢາກໄດ້ຄວາມຊ່ວຍເຫຼືອໃນການເລືອກໝູ່ເຊິ່ງຈະເປັນອິດທິພົນທີ່ດີກວ່າສຳລັບເຈົ້າ.
ສາມາດອ່ານເພີ່ມເຕີມກ່ຽວກັບຫົວເລື່ອງນີ້ໃນບົດທີ 9 ຂອງເຫຼັ້ມທີ 2
ເປັນຍ້ອນໝູ່ຫຼືບາງເທື່ອເປັນຍ້ອນຫົວໃຈຂອງເຈົ້າທີ່ກົດດັນໃຫ້ເຈົ້າເຮັດສິ່ງທີ່ບໍ່ດີ? ຂໍໃຫ້ພິຈາລະນາວິທີທີ່ເຈົ້າສາມາດຕ້ານທານໄດ້!
[ຂໍ້ຄວາມໄຂເງື່ອນ]
a ແນ່ນອນວ່າທຸກຄົນເຮັດຜິດພາດໄດ້. (ໂລມ 3:23) ດັ່ງນັ້ນ ເມື່ອໝູ່ຄົນໜຶ່ງເຮັດໃຫ້ເຈົ້າເສຍໃຈແຕ່ຈາກນັ້ນກໍຂໍໂທດຢ່າງຈິງໃຈ ຂໍໃຫ້ຈື່ໄວ້ວ່າ: “ຄວາມຮັກກໍປົກອັດການຜິດໄວ້ຫຼາຍປະການ.”—1 ເປໂຕ 4:8.
ຂໍ້ພະຄຳພີຫຼັກ
“ມິດສະຫາຍທີ່ສະຖິດຢູ່ ສະໜິດກວ່າອ້າຍນ້ອງອີກ.”—ສຸພາສິດ 18:24.
ຄຳແນະນຳ
ຖ້າເຈົ້າດຳເນີນຊີວິດຕາມມາດຕະຖານທີ່ໜ້ານັບຖື ເປັນໄປໄດ້ຫຼາຍທີ່ຄົນອື່ນໆເຊິ່ງປາຖະໜາທີ່ຈະດຳເນີນຊີວິດແບບດຽວກັນນັ້ນຈະຊອກຫາເຈົ້າ. ເຂົາເຈົ້າຈະເປັນໝູ່ປະເພດທີ່ດີທີ່ສຸດ!
ເຈົ້າຮູ້ບໍ . . .?
ພະເຈົ້າບໍ່ໄດ້ລຳອຽງ ເຖິງຢ່າງນັ້ນກໍຕາມ ພະອົງເລືອກເຟັ້ນຫຼາຍເມື່ອກ່ຽວຂ້ອງກັບປະເດັນທີ່ວ່າໃຜຈະໄດ້ຮັບການຍອມຮັບໃນຖານະເປັນແຂກ “ໃນຈຳໜັກຂອງພະອົງ.”—ຄຳເພງ 15:1-5.
ແຜນພາກປະຕິບັດ!
ເພື່ອພົບໝູ່ທີ່ດີ ຂ້ອຍຈະ ․․․․․
ບາງຄົນທີ່ອາຍຸຫຼາຍກວ່າຂ້ອຍເຊິ່ງຂ້ອຍຢາກຮູ້ຈັກຫຼາຍຂຶ້ນລວມມີ ․․․․․
ສິ່ງທີ່ຂ້ອຍຢາກຖາມພໍ່ (ແມ່) ໃນເລື່ອງນີ້ແມ່ນ ․․․․․
ເຈົ້າຄິດວ່າແນວໃດ?
• ຄຸນລັກສະນະອັນໃດທີ່ເຈົ້າຖືວ່າມີຄຸນຄ່າຫຼາຍທີ່ສຸດໃນຕົວໝູ່ ແລະຍ້ອນຫຍັງຈຶ່ງຖືວ່າມີຄຸນຄ່າ?
• ຄຸນລັກສະນະອັນໃດແດ່ທີ່ເຈົ້າຕ້ອງປັບປຸງເພື່ອຈະເປັນໝູ່ທີ່ດີກວ່ານີ້?
[ຈຸດເດັ່ນໜ້າ 60]
“ເມື່ອພໍ່ແມ່ພາຂ້ອຍອອກຈາກກຸ່ມໝູ່ເພື່ອນທີ່ຄົບຫາຢູ່ ຂ້ອຍບອກກັບຕົວເອງວ່າເຂົາເຈົ້າເປັນກຸ່ມດຽວທີ່ຂ້ອຍຢາກຄົບຫານຳ. ແນວໃດກໍຕາມ ຄຳແນະນຳຂອງພໍ່ແມ່ເປັນສິ່ງທີ່ດີ ແລະທັນທີທີ່ຂ້ອຍເລີ່ມຄິດຢ່າງຈິງຈັງກ່ຽວກັບຄຳແນະນຳນັ້ນ ຂ້ອຍກໍສຳນຶກວ່າຍັງມີໝູ່ທີ່ດີກວ່ານັ້ນອີກມາກມາຍ.”—ທ້າວ ໂຄ
[ກອບໜ້າ 61]
ລອງເຮັດຕາມຄຳແນະນຳຕໍ່ໄປນີ້
ເວົ້າກັບພໍ່ແມ່ໃນເລື່ອງໝູ່. ຖາມພໍ່ແມ່ກ່ຽວກັບປະເພດຂອງໝູ່ທີ່ພວກເພິ່ນມີຕອນອາຍຸສ່ຳເຈົ້າ. ພວກເພິ່ນຮູ້ສຶກເສຍໃຈກັບຄົນທີ່ພວກເພິ່ນເລືອກເປັນໝູ່ບໍ? ຖ້າແມ່ນ ຍ້ອນຫຍັງ? ຖາມພວກເພິ່ນວ່າເຈົ້າຈະຫຼີກລ່ຽງບັນຫາຕ່າງໆທີ່ພວກເພິ່ນເຄີຍປະສົບໄດ້ແນວໃດ?
ແນະນຳໝູ່ໃຫ້ພໍ່ແມ່ຮູ້ຈັກ. ຖ້າເຈົ້າລັງເລທີ່ຈະເຮັດເຊັ່ນນັ້ນ ໃຫ້ຖາມຕົວເອງວ່າ ‘ເປັນຫຍັງຈຶ່ງລັງເລ?’ ໝູ່ມີບາງຢ່າງບໍທີ່ເຈົ້າຮູ້ວ່າພໍ່ແມ່ຈະບໍ່ຍອມຮັບ? ຖ້າເປັນເຊັ່ນນັ້ນ ເຈົ້າອາດຈຳເປັນຕ້ອງເລືອກເຟັ້ນກວ່ານີ້ເມື່ອເລືອກໝູ່.
ເປັນຜູ້ຟັງທີ່ດີ. ສະແດງຄວາມສົນໃຈໃນສະຫວັດດີພາບແລະສິ່ງທີ່ໝູ່ເປັນຫ່ວງ.—ຟີລິບ 2:4.
ເປັນຄົນໃຫ້ອະໄພ. ຢ່າຄາດໝາຍຄວາມສົມບູນແບບ. “ເຮົາທັງປວງກະທຳຜິດຫຼາຍປະການ.”—ຢາໂກໂບ 3:2.
ໃຫ້ຄວາມເປັນສ່ວນຕົວກັບໝູ່ແດ່. ເຈົ້າບໍ່ຈຳເປັນຕ້ອງຕິດກັບໝູ່ຕະຫຼອດເວລາ. ເພື່ອນແທ້ຈະຢູ່ພ້ອມສະເໝີທີ່ຈະຊ່ວຍໃນຍາມຈຳເປັນ.—ຜູ້ເທສະໜາປ່າວປະກາດ 4:9, 10.
[ຮູບພາບໜ້າ 63]
ເມື່ອເຈົ້າປັບຕົວໃຫ້ເຂົ້າກັບມາດຕະຖານຂອງຄົນອື່ນ ເຈົ້າກາຍເປັນຄືກັບໝາກດ້າມຢູ່ເທິງແປ້ນ ທີ່ເຂົາເຈົ້າຈະວາງໄວ້ບ່ອນໃດກໍໄດ້ຕາມໃຈ