-
ຂ້ອຍຄວນຮູ້ຫຍັງແດ່ກ່ຽວກັບການສູບຢາ?ຄຳຖາມທີ່ໜຸ່ມສາວຖາມ—ຄຳຕອບທີ່ໃຊ້ໄດ້ຜົນ ເຫຼັ້ມທີ 1
-
-
ບົດທີ 33
ຂ້ອຍຄວນຮູ້ຫຍັງແດ່ກ່ຽວກັບການສູບຢາ?
ຂໍໃຫ້ເບິ່ງທາງເລືອກຕ່າງໆ ທາງລຸ່ມນີ້ ແລະໃຫ້ໝາຍ ✔ ໃສ່ໃນປ່ອງທາງຂ້າງຫົວຂໍ້ທີ່ບົ່ງບອກເຖິງຄວາມຮູ້ສຶກຂອງເຈົ້າ.
◻ ຂ້ອຍຢາກຮູ້ຢາກເຫັນ
◻ ຂ້ອຍກຳລັງຮັບມືກັບຄວາມເຄັ່ງຕຶງ
◻ ຂ້ອຍຢາກເຂົ້າກັບຄົນອື່ນໄດ້
◻ ຂ້ອຍກັງວົນກ່ຽວກັບນ້ຳໜັກຂອງຕົວເອງ
ຖ້າເຈົ້າໄດ້ໝາຍປ່ອງດໜຶ່ງ ທີ່ຢູ່ໜ້າ 237 ເຈົ້າອາດຈະມີຄວາມຮູ້ສຶກຄ້າຍຄືກັບຄົນຮຸ່ນດຽວກັນທີ່ສູບຢາຫຼືຄິດທີ່ຈະສູບຢາ.a ຕົວຢ່າງເຊັ່ນ
ການສະໜອງຄວາມຢາກຮູ້ຢາກເຫັນ. “ຂ້ອຍຢາກຮູ້ວ່າການສູບຢາເປັນແນວໃດ ດັ່ງນັ້ນຈຶ່ງຂໍຢາສູບກອກໜຶ່ງຈາກໝູ່ຜູ້ຍິງຄົນໜຶ່ງຢູ່ໂຮງຮຽນແລ້ວກໍລັກສູບ.”—ນາງ ເທຊີ.
ການຮັບມືກັບຄວາມເຄັ່ງຕຶງແລະຢາກເຂົ້າກັບຄົນອື່ນໄດ້. “ພວກໝູ່ຢູ່ໂຮງຮຽນມັກເວົ້າວ່າ ‘ຂ້ອຍຢາກ ສູບຢາ’ ແລະເມື່ອສູບແລ້ວກໍເວົ້າວ່າ ‘ໄຄແດ່ ບັດນີ້ພໍຈະອົດທົນໄດ້ແລ້ວ!’ ຕອນທີ່ເຄັ່ງຕຶງ ຂ້ອຍຢາກຮູ້ສຶກແບບນັ້ນຄືກັນ.”—ນາງ ນິກກີ.
ການລົດນ້ຳໜັກ. “ຍິງສາວບາງຄົນສູບຢາເພື່ອຮັກສາຮູບຮ່າງໃຫ້ຈ່ອຍ ມັນງ່າຍກວ່າການອົດອາຫານ!”—ນາງ ຊາມານທາ.
ແຕ່ກ່ອນທີ່ຈະຈູດຢາສູບກອກທຳອິດ ຫຼືກອກຕໍ່ໄປ ຂໍໃຫ້ຢຸດຄິດຈັກບຶດໜຶ່ງກ່ອນ. ຢ່າເປັນຄືກັບປາທີ່ໂດດຄຸບເຫຍື່ອຢູ່ເບັດ. ແມ່ນຢູ່ປາອາດໄດ້ເຫຍື່ອກິນ ແຕ່ມັນກໍຕ້ອງຕາຍ! ແທນທີ່ຈະເປັນແນວນັ້ນ ຈົ່ງເຮັດຕາມຄຳແນະນຳໃນຄຳພີໄບເບິນແລະໃຊ້ “ຄວາມສາມາດໃນການຄິດຢ່າງຊັດເຈນ” ຂອງເຈົ້າ. (2 ເປໂຕ 3:1, ລ.ມ.) ຂໍໃຫ້ຕອບຄຳຖາມຕ່າງໆຕໍ່ໄປນີ້.
ເຈົ້າຮູ້ຈັກຫຍັງແດ່ກ່ຽວກັບການສູບຢາ?
ໃຫ້ໝາຍໃສ່ວ່າຖືກຫຼືຜິດ.
ກ. ການສູບຢາຊ່ວຍຫລຸດຜ່ອນຄວາມເຄັ່ງຕຶງ.
◻ ຖືກ ◻ ຜິດ
ຂ. ຂ້ອຍປ່ອຍຄວັນຢາສູບອອກມາໄດ້ເກືອບທັງໝົດ.
◻ ຖືກ ◻ ຜິດ
ຄ. ການສູບຢາຈະບໍ່ກະທົບໃສ່ສຸຂະພາບຈົນກວ່າອາຍຸໄດ້ຫຼາຍກວ່ານີ້.
◻ ຖືກ ◻ ຜິດ
ງ. ການສູບຢາຈະເຮັດໃຫ້ເພດກົງກັນຂ້າມສົນໃຈຫຼາຍຂຶ້ນ.
◻ ຖືກ ◻ ຜິດ
ຈ. ຖ້າສູບຢາ ຂ້ອຍບໍ່ໄດ້ກໍ່ຄວາມເສຍຫາຍໃຫ້ໃຜນອກຈາກຕົວເອງ.
◻ ຖືກ ◻ ຜິດ
ສ. ພະເຈົ້າບໍ່ສົນໃຈດອກວ່າຂ້ອຍຈະສູບຢາຫຼືບໍ່.
◻ ຖືກ ◻ ຜິດ
ຄຳຕອບ
ກ. ຜິດ. ເຖິງແມ່ນວ່າການສູບຢາຈະບັນເທົາຄວາມເຄັ່ງຕຶງຈາກອາການຖອນຢາໄດ້ຊົ່ວຄາວ ແຕ່ນັກວິທະຍາສາດເຫັນວ່າທີ່ຈິງແລ້ວສານນິໂກຕີນເຮັດໃຫ້ລະດັບຮອກໂມນຄວາມເຄັ່ງຕຶງສູງຂຶ້ນ.
ຂ. ຜິດ. ການສຶກສາຄົ້ນຄວ້າບາງຢ່າງສະແດງວ່າຝຸ່ນຄວັນຢາສູບຫຼາຍກວ່າ 80 ສ່ວນຮ້ອຍທີ່ເຈົ້າຫັນໃຈເຂົ້າໄປຍັງຕົກຄ້າງຢູ່ໃນຮ່າງກາຍ.
ຄ. ຜິດ. ເຖິງແມ່ນວ່າອັນຕະລາຍຈະເພີ່ມຂຶ້ນໃນກອກຢາແຕ່ລະກອກທີ່ເຈົ້າສູບ ແຕ່ຜົນກະທົບບາງຢ່າງເກີດຂຶ້ນໂດຍທັນທີ. ບາງຄົນຕິດຢາສູບຍ້ອນການສູບຢາພຽງກອກດຽວ. ຄວາມສາມາດໃນການເຮັດວຽກຂອງປອດຈະຫລຸດລົງ ແລະເຈົ້າຈະໄອຊຳເຮື້ອ. ຜິວໜັງຈະຫ່ຽວຫຼາຍຂຶ້ນແລະໄວຂຶ້ນ. ການສູບຢາເພີ່ມຄວາມສ່ຽງຕໍ່ການເສື່ອມສະມັດຖະພາບທາງເພດ ມີອາການຕື່ນຕົກໃຈ ແລະຊຶມເສົ້າ.
ງ. ຜິດ. ນັກຄົ້ນຄວ້າຊື່ ລອຍ ຈອນສະຕັນ ເຫັນວ່າໄວຮຸ່ນທີ່ສູບຢາ “ສູນເສຍພາບພົດໃນສາຍຕາຂອງເພດກົງກັນຂ້າມເປັນສ່ວນຫຼາຍ.”
ຈ. ຜິດ. ການຫັນໃຈເອົາຄວັນຢາສູບທີ່ຄົນອື່ນປ່ອຍອອກມາເຮັດໃຫ້ຫຼາຍພັນຄົນເສຍຊີວິດໃນແຕ່ລະປີ. ຄວັນຢາສູບທຳລາຍຄອບຄົວ ໝູ່ເພື່ອນ ແລະແມ່ນແຕ່ສັດລ້ຽງຂອງເຈົ້າ.
ສ. ຜິດ. ຜູ້ທີ່ຕ້ອງການໄດ້ຮັບຄວາມພໍໃຈຈາກພະເຈົ້າຈະຕ້ອງຊຳຮະຕົວເອງຈາກ “ການຖ່ອຍຮ້າຍແຫ່ງເນື້ອໜັງ . . . ທຸກຢ່າງ.” (2 ໂກລິນໂທ 7:1) ແນ່ນອນ ການສູບຢາເຮັດໃຫ້ຮ່າງກາຍເປິເປື້ອນ. ຖ້າເລືອກທີ່ຈະເຮັດໃຫ້ຕົວເອງເປິເປື້ອນ ທຳຮ້າຍຕົວເອງແລະຄົນອື່ນດ້ວຍການໃຊ້ຢາສູບ ເຈົ້າບໍ່ສາມາດເປັນມິດກັບພະເຈົ້າໄດ້.—ມັດທາຍ 22:39; ຄາລາຊີ 5:19-21.
ວິທີຕ້ານທານ
ຈະເຮັດແນວໃດຖ້າມີຄົນຍື່ນຢາສູບໃຫ້ເຈົ້າສູບ? ການຕອບສັ້ນໆແຕ່ວ່າໜັກແໜ້ນທີ່ວ່າ: “ຂອບໃຈ ຂ້ອຍບໍ່ສູບຢາ” ໃຊ້ໄດ້ຜົນຫຼາຍເທື່ອ. ຖ້າຄົນນັ້ນຍັດຢຽດຫຼືແມ່ນແຕ່ທ້າທາຍເຈົ້າ ຂໍໃຫ້ຈື່ໄວ້ວ່າເຈົ້າມີສິດທີ່ຈະເລືອກ. ເຈົ້າອາດບອກວ່າ:
• “ຂ້ອຍຮູ້ວ່າການສູບຢາເປັນອັນຕະລາຍແລະຕັດສິນໃຈວ່າຈະບໍ່ສູບຢາ.”
• “ຂ້ອຍຍັງມີອະນາຄົດຍາວນານ ຂ້ອຍຍັງບໍ່ທັນຢາກຕາຍໄວ.”
• “ເຈົ້າຈະບໍ່ຍອມໃຫ້ຂ້ອຍມີສິດທີ່ຈະເລືອກບໍ?”
ເຊັ່ນດຽວກັບໜຸ່ມສາວທີ່ກ່າວເຖິງໃນຕອນຕົ້ນຂອງບົດນີ້ ເຈົ້າອາດພົບວ່າແຮງກົດດັນສ່ວນຫຼາຍມາຈາກພາຍໃນຕົວເຈົ້າ. ຖ້າເປັນເຊັ່ນນັ້ນ ເຈົ້າສາມາດຕ້ານທານຄວາມປາຖະໜານັ້ນໄດ້ໂດຍໃຫ້ຄິດຫາເຫດຜົນຈາກຄຳຖາມຕໍ່ໄປນີ້:
• ‘ຂ້ອຍຈະໄດ້ຮັບປະໂຫຍດແທ້ໆບໍຈາກການສູບຢາ? ຕົວຢ່າງເຊັ່ນ ຖ້າຂ້ອຍຕັດສິນໃຈທີ່ຈະສູບຢາພຽງເພື່ອຈະເປັນທີ່ຍອມຮັບຂອງຄົນອື່ນໆ ຂ້ອຍຈະເຂົ້າກັນໄດ້ແທ້ໆກັບຄົນອື່ນບໍ ໃນເມື່ອຂ້ອຍເກືອບຈະບໍ່ມີອັນໃດອີກເລີຍທີ່ຄືກັບເຂົາເຈົ້າ? ຂ້ອຍຍັງຢາກ ຈະເຂົ້າກັນໄດ້ກັບຄົນທີ່ຮູ້ສຶກຍິນດີເມື່ອເຫັນຂ້ອຍທຳລາຍສຸຂະພາບຂອງຕົວເອງບໍ?’
• ‘ຂ້ອຍຈະຕ້ອງໃຊ້ເງິນເພື່ອເປັນຄ່າຢາສູບແລະຄ່າປິ່ນປົວສຸຂະພາບຫຼາຍສ່ຳໃດ ແລະຈະຕ້ອງສູນເສຍຄວາມນັບຖືຈາກຄົນອື່ນຫຼາຍສ່ຳໃດ?’
• ‘ຂ້ອຍເຕັມໃຈທີ່ຈະຕັດມິດຕະພາບກັບພະເຈົ້າເພື່ອແລກກັບການສູບຢາບໍ?’
ແຕ່ຈະວ່າແນວໃດຖ້າເຈົ້າຕິດຢາສູບແລ້ວ? ເຈົ້າສາມາດເຮັດຫຍັງໄດ້ແດ່ເພື່ອເຊົາສູບຢາ?
ວິທີເຊົາສູບຢາ
1. ໂນ້ມນ້າວໃຈຕົວເອງ. ໃຫ້ຂຽນເຫດຜົນຕ່າງໆທີ່ເຈົ້າ ຄວນເຊົາສູບຢາ ແລະໃຫ້ເຈົ້າທົບທວນເຫດຜົນນັ້ນເລື້ອຍໆ. ຄວາມປາຖະໜາທີ່ຢາກເປັນຄົນສະອາດໃນສາຍຕາຂອງພະເຈົ້າສາມາດເປັນແຮງກະຕຸ້ນທີ່ມີພະລັງຫຼາຍ.—ໂລມ 12:1; ເອເຟດ 4:17-19.
2. ຂໍຄວາມຊ່ວຍເຫຼືອ. ຖ້າເຈົ້າລັກສູບຢາໂດຍທີ່ບໍ່ໃຫ້ໃຜຮູ້ ບັດນີ້ຮອດເວລາແລ້ວທີ່ຈະບອກໃຫ້ຄົນອື່ນຮູ້. ບອກຄົນເຫຼົ່ານັ້ນທີ່ເຈົ້າເຄີຍປິດບັງໃຫ້ຮູ້ວ່າເຈົ້າກຳລັງຈະເຊົາ ແລະຂໍຄວາມຊ່ວຍເຫຼືອຈາກເຂົາເຈົ້າ. ຖ້າເຈົ້າຕ້ອງການຢາກຮັບໃຊ້ພະເຈົ້າ ໃຫ້ອະທິດຖານຂໍຄວາມຊ່ວຍເຫຼືອຈາກພະອົງ.—1 ໂຢຮັນ 5:14.
3. ກຳນົດມື້ເຊົາສູບຢາ. ໃຫ້ເວລາຕົວເອງສອງອາທິດຫຼືໜ້ອຍກວ່ານັ້ນ ແລະໃຫ້ໝາຍໃສ່ໃນປະຕິທິນສຳລັບມື້ທີ່ເຈົ້າຕັ້ງໃຈທີ່ຈະເຊົາສູບຢາ. ໃຫ້ບອກຄອບຄົວແລະໝູ່ເພື່ອນວ່າເຈົ້າຈະເຊົາສູບຢານັບຕັ້ງແຕ່ມື້ນັ້ນເປັນຕົ້ນໄປ.
4. ຊອກຫາແລະທຳລາຍ. ກ່ອນຈະຮອດມື້ທີ່ກຳນົດໄວ້ສຳລັບການເຊົາສູບຢາ ໃຫ້ຊອກຫາຢາສູບຢ່າງລະອຽດໃນຫ້ອງນອນ ໃນລົດ ແລະຕູ້ເຄື່ອງນຸ່ງ ແລ້ວທຳລາຍມັນ. ເອົາກະໄຟແຊ໋ກ ກັບໄຟຂີດ ແລະແນວເຂ່ຍຂີ້ກອກຢາໄປຖິ້ມ.
5. ຮັບມືກັບອາການຂອງການຖອນພິດຢາ. ດື່ມນ້ຳໝາກໄມ້ແລະນ້ຳລ້າໃຫ້ຫຼາຍ ແລະໃຫ້ນອນຫຼາຍກວ່າປົກກະຕິ. ຂໍໃຫ້ຈື່ໄວ້ວ່າຄວາມຮູ້ສຶກບໍ່ສະບາຍຈະມີຢູ່ຊົ່ວຄາວ ແຕ່ຂະນະດຽວກັນຜົນປະໂຫຍດຈະມີຢູ່ຖາວອນ!
6. ຫຼີກລ່ຽງການລໍ້ໃຈ. ໃຫ້ຫຼີກໜີຈາກສະພາບການແລະສະຖານທີ່ຕ່າງໆທີ່ຈະຖືກລໍ້ໃຈໃຫ້ສູບຢາ. ນອກຈາກນັ້ນ ເຈົ້າອາດຈຳເປັນຕ້ອງເຊົາຄົບຫາກັບຄົນທີ່ສູບຢາ.—ສຸພາສິດ 13:20.
ຢ່າຖືກຫຼອກລວງ
ໃນແຕ່ລະປີ ບໍລິສັດຢາສູບໃຊ້ເງິນຫຼາຍຕື້ໂດລາສະຫະລັດອາເມລິກາສຳລັບການໂຄສະນາ. ໃຜຄືກຸ່ມເປົ້າໝາຍ? ເອກະສານພາຍໃນຂອງບໍລິສັດຢາສູບກ່າວດັ່ງນີ້: “ໄວຮຸ່ນໃນວັນນີ້ສາມາດເປັນລູກຄ້າປະຈຳໃນວັນໜ້າ.”
ຢ່າຍອມໃຫ້ພວກນັກທຸລະກິດບໍລິສັດຢາສູບດູດເອົາເງິນໄປຈາກກະເປົ໋າຂອງເຈົ້າ. ຈະກິນເຫຍື່ອລໍ້ຂອງເຂົາເຈົ້າເຮັດຫຍັງ? ທັງພວກນັກທຸລະກິດຢາສູບແລະໝູ່ຂອງເຈົ້າທີ່ສູບຢາລ້ວນແຕ່ບໍ່ຫວັງດີນຳເຈົ້າ. ແທນທີ່ຈະຟັງພວກເຂົາເຈົ້າ ຂໍໃຫ້ເຈົ້າຟັງຄຳແນະນຳໃນຄຳພີໄບເບິນແລະຮຽນຮູ້ສິ່ງທີ່ເປັນ “ປະໂຫຍດແກ່ເຈົ້າ.”—ເອຊາອີ 48:17.
ໝູ່ເພື່ອນກົດດັນເຈົ້າໃຫ້ດື່ມເຫຼົ້າບໍ? ຈົ່ງຮຽນຮູ້ເຫດຜົນທີ່ຈຳເປັນຕ້ອງຮູ້ຂອບເຂດຈຳກັດຂອງຕົວເອງ.
[ຂໍ້ຄວາມໄຂເງື່ອນ]
a ເຖິງແມ່ນວ່າໃນບົດນີ້ຈະພິຈາລະນາກ່ຽວກັບຄົນທີ່ສູບຢາ ແຕ່ບັນຫາແລະອັນຕະລາຍທີ່ກ່າວເຖິງກໍໃຊ້ໄດ້ກັບຄົນທີ່ຄ້ຽວຢາເສັ້ນ.
ຂໍ້ພະຄຳພີຫຼັກ
“ເຮົາທັງຫຼາຍຕ້ອງຊຳຮະຕົວໃຫ້ປາສະຈາກການຖ່ອຍຮ້າຍແຫ່ງເນື້ອໜັງ.”—2 ໂກລິນໂທ 7:1.
ຄຳແນະນຳ
ໃຫ້ຫຼີກລ່ຽງການອ້າງເຫດຜົນເຊັ່ນ ຄວາມຄິດທີ່ວ່າ ‘ຂ້ອຍຈະສູບຢາພຽງອຶກດຽວເທົ່ານັ້ນ.’ ຫຼາຍເທື່ອການສູບຢາພຽງອຶກດຽວມັກພາໃຫ້ເລີ່ມຕົ້ນສູບຢາຄືນອີກ.—ເຢເຣມີ 17:9.
ເຈົ້າຮູ້ບໍ . . .?
ຢາສູບທີ່ບໍ່ມີຄວັນເຊັ່ນ ຢາເສັ້ນສຳລັບຄ້ຽວ ໃຫ້ສານນິໂກຕີນຫຼາຍກວ່າຢາສູບເປັນກອກແລະມີສານປະກອບທີ່ພາໃຫ້ເປັນມະເຮັງຫຼາຍກວ່າ 25 ຊະນິດ ເຊິ່ງເພີ່ມອັດຕາສ່ຽງໃຫ້ຜູ້ທີ່ຄ້ຽວຢາເສັ້ນທີ່ຈະເປັນມະເຮັງຢູ່ໃນລຳຄໍແລະໃນປາກ.
ແຜນພາກປະຕິບັດ!
ຖ້າໝູ່ຢູ່ໂຮງຮຽນກົດດັນໃຫ້ສູບຢາ ຂ້ອຍຈະ ․․․․․
ສິ່ງທີ່ຂ້ອຍຢາກຖາມພໍ່ (ແມ່) ກ່ຽວກັບເລື່ອງນີ້ແມ່ນ ․․․․․
ເຈົ້າຄິດວ່າແນວໃດ?
• ເຖິງແມ່ນວ່າຮູ້ເຖິງອັນຕະລາຍ ແຕ່ເປັນຫຍັງເຈົ້າອາດຍັງຖືກລໍ້ໃຈໃຫ້ສູບຢາ?
• ສິ່ງໃດທີ່ເຮັດໃຫ້ເຈົ້າແນ່ໃຈວ່າການສູບຢາແມ່ນສິ່ງທີ່ບໍ່ດີ?
[ຈຸດເດັ່ນໜ້າ 240]
“ເມື່ອມີຄົນຍື່ນຢາສູບໃຫ້ສູບ ຂ້ອຍພຽງແຕ່ຍິ້ມແລະຕອບວ່າ ‘ຂອບໃຈ ຂ້ອຍບໍ່ຢາກເປັນມະເຮັງ.’”—ນາງ ເອລານາ
[ກອບ/ຮູບພາບໜ້າ 241]
ກັນຊາເປັນອັນຕະລາຍແທ້ໆບໍ?
ນາງເອເລນເຊິ່ງອາໄສຢູ່ປະເທດອຽກລັງ (ໄອແລນ) ເວົ້າວ່າ: “ບາງຄົນເວົ້າວ່າການໃຊ້ກັນຊາເປັນທາງອອກຂອງບັນຫາ ແລະບໍ່ມີຜົນກະທົບຂ້າງຄຽງຈັກແນວ.” ເຈົ້າເຄີຍໄດ້ຍິນຄຳເວົ້າທີ່ຄ້າຍໆກັນນີ້ກ່ຽວກັບກັນຊາບໍ? ຂໍໃຫ້ສົມທຽບຄວາມຄິດຜິດໆທີ່ມີຢູ່ທົ່ວໄປກັບຄວາມເປັນຈິງ.
ຄວາມຄິດຜິດໆ. ກັນຊາບໍ່ໄດ້ກໍ່ຄວາມເສຍຫາຍ.
ຄວາມເປັນຈິງ. ເປັນທີ່ຮູ້ຈັກຫຼືສົງໄສກັນວ່າຜົນກະທົບໄລຍະຍາວຂອງກັນຊາແມ່ນມີດັ່ງຕໍ່ໄປນີ້ ທຳລາຍຄວາມຊົງຈຳ ສູນເສຍຄວາມສາມາດໃນການຮຽນຮູ້ ປິດກັ້ນລະບົບພູມຕ້ານທານ ພ້ອມກັນນັ້ນກໍເຮັດໃຫ້ເສື່ອມສະມັດຖະພາບທາງເພດຂອງທັງຜູ້ຊາຍແລະຜູ້ຍິງ. ກັນຊາສາມາດພາໃຫ້ເກີດພາວະກະວົນກະວາຍ ເປັນໂລກຈິດ ແລະວິຕົກສົງໄສ. ເດັກນ້ອຍທີ່ເກີດຈາກຜູ້ຍິງທີ່ສູບກັນຊາອາດເປັນໄປໄດ້ຫຼາຍທີ່ຈະມີບັນຫາໃນເລື່ອງພຶດຕິກຳ ມີສະມາທິສັ້ນ ແລະມີຄວາມຫຍຸ້ງຍາກຫຼາຍໃນການເຮັດການຕັດສິນໃຈ.
ຄວາມຄິດຜິດໆ. ຄວັນຈາກກັນຊາເປັນອັນຕະລາຍໜ້ອຍກວ່າຄວັນຈາກຢາສູບ.
ຄວາມເປັນຈິງ. ເມື່ອສົມທຽບກັບການສູບຢາ ການສູບກັນຊາຈະເຮັດໃຫ້ສານນ້ຳມັນດິບເກາະຢູ່ລະບົບຫັນໃຈເຖິງສີ່ເທົ່າ ແລະຈະນຳເອົາອາຍກາກບອນອົກຊິດທີ່ເປັນພິດເຂົ້າໄປໃນລະບົບເລືອດເຖິງຫ້າເທົ່າ. ການສູບກັນຊາຫ້າກອກສາມາດສົ່ງສານພິດທີ່ພາໃຫ້ເກີດມະເຮັງໃນປະລິມານເທົ່າກັນກັບການສູບຢາໝົດຊອງ.
ຄວາມຄິດຜິດໆ. ກັນຊາບໍ່ສາມາດຕິດໄດ້.
ຄວາມເປັນຈິງ. ໄວຮຸ່ນທີ່ມີບັນຫາທາງຈິດຫຼືທາງອາລົມສາມາດກາຍເປັນຜູ້ທີ່ຕິດກັນຊາໄດ້ໄວ. ສ່ວນຄົນອື່ນໆພາຍຫຼັງທີ່ສູບກັນຊາເປັນໄລຍະເວລາດົນສາມາດກາຍເປັນຄົນທີ່ຕິດກັນຊາໄດ້. ນອກຈາກນັ້ນແລ້ວ ການສຶກສາຄົ້ນຄວ້າສະແດງໃຫ້ເຫັນວ່າໄວຮຸ່ນທີ່ສູບກັນຊາມີຄວາມສ່ຽງສູງຫຼາຍໃນການຕິດຢາເສບຕິດປະເພດອື່ນໆເຊັ່ນ ໂຄເຄນ.
[ກອບ/ຮູບພາບໜ້າ 244]
ຜົນກະທົບຂອງຢາສູບຕໍ່ຮ່າງກາຍຂອງເຈົ້າ
ໃຫ້ເບິ່ງຄົນທີ່ມີສຸຂະພາບແຂງແຮງທີ່ສະແດງໃນໂຄສະນາຢາສູບ ຈາກນັ້ນໃຫ້ສົມທຽບຮູບພາບເຫຼົ່ານັ້ນກັບສິ່ງທີ່ການສູບຢາເຊິ່ງແທ້ຈິງແລ້ວສົ່ງຜົນກະທົບຕໍ່ຮ່າງກາຍ.
ປາກແລະຮູຄໍ ສາມາດ ເປັນມະເຮັງໄດ້
[ຮູບພາບ]
ເຮັດໃຫ້ລີ້ນເປັນມະເຮັງ
ຫົວໃຈ ເຮັດໃຫ້ເສັ້ນເລືອດໃຫຍ່ໃນຫົວໃຈແຂງແລະຕີບ ເຮັດໃຫ້ຫົວໃຈຂາດທາດອົກຊີແຊນ ແລະເພີ່ມອັດຕາສ່ຽງຂອງການເປັນພະຍາດຫົວໃຈເຖິງສີ່ເທົ່າ
[ຮູບພາບ]
ເຮັດໃຫ້ເສັ້ນເລືອດໃຫຍ່ຕັນ
ປອດ ທຳລາຍຖົງອາກາດໃນປອດ ເຮັດໃຫ້ຫຼອດລົມອັກເສບ ແລະເພີ່ມອັດຕາສ່ຽງໃນການເປັນມະເຮັງໃນປອດເຖິງ 23 ເທົ່າ
[ຮູບພາບ]
ປອດຂອງຄົນທີ່ສູບຢາ
ສະໝອງ ເພີ່ມຄວາມສ່ຽງຕໍ່ເສັ້ນເລືອດໃນສະໝອງອຸດຕັນເຖິງສີ່ເທົ່າ
ຜິວໜັງ ເຮັດໃຫ້ຫ່ຽວກ່ອນຮອດອາຍຸ
ແຂ້ວ ເຮັດໃຫ້ປ່ຽນສີ
ກະເພາະ ເຮັດໃຫ້ເປັນມະເຮັງ
ມ້າມ ເຮັດໃຫ້ເປັນມະເຮັງ
ພົກຍ່ຽວ ເຮັດໃຫ້ເປັນມະເຮັງ
ໝາກໄຂ່ຫຼັງ ເຮັດໃຫ້ເປັນມະເຮັງ
[ຮູບພາບໜ້າ 239]
ຄືກັບປາທີ່ໂດດຄຸບເຫຍື່ອຢູ່ເບັດ ຜູ້ທີ່ສູບຢາໄດ້ສິ່ງຕອບແທນແຕ່ຕ້ອງຈ່າຍດ້ວຍລາຄາແພງ
-
-
ດື່ມເຫຼົ້າຢ່າງບໍ່ອັ້ນຜິດຄືແນວໃດ?ຄຳຖາມທີ່ໜຸ່ມສາວຖາມ—ຄຳຕອບທີ່ໃຊ້ໄດ້ຜົນ ເຫຼັ້ມທີ 1
-
-
ບົດທີ 34
ດື່ມເຫຼົ້າຢ່າງບໍ່ອັ້ນຜິດຄືແນວໃດ?
ເຈົ້າຈະຕອບຄຳຖາມຕໍ່ໄປນີ້ແນວໃດ? ໃຫ້ໝາຍ ✔ ໃສ່ໃນປ່ອງທາງຂ້າງຄຳຕອບຂອງເຈົ້າ.
ມີໝູ່ຂອງເຈົ້າຄົນໃດບໍທີ່ດື່ມເຫຼົ້າກ່ອນຮອດກະສຽນອາຍຸຫຼືດື່ມເຫຼົ້າຢ່າງບໍ່ອັ້ນ?
◻ ມີ ◻ ບໍ່ມີ
ໝູ່ເຄີຍກົດດັນໃຫ້ເຈົ້າດື່ມເຫຼົ້າບໍ?
◻ ເຄີຍ ◻ ບໍ່ເຄີຍ
ເຈົ້າເຄີຍດື່ມເຫຼົ້າຢ່າງບໍ່ອັ້ນບໍ?
◻ ເຄີຍ ◻ ບໍ່ເຄີຍ
ການດື່ມເຫຼົ້າຢ່າງບໍ່ອັ້ນແມ່ນຫຍັງ? ບາງຄົນບອກວ່າມັນຄືການດື່ມພຽງເພື່ອໃຫ້ເມົາ. ລາຍງານຂອງສະຖາບັນທີ່ເບິ່ງແຍງດ້ານການໃຊ້ເຄື່ອງດື່ມປະເພດເຫຼົ້າໃນທາງຜິດແລະພະຍາດຕິດເຫຼົ້າແຫ່ງສະຫະລັດອາເມລິກາພະຍາຍາມຈະອະທິບາຍໃຫ້ເຈາະຈົງຫຼາຍກວ່ານັ້ນ. ສະຖາບັນນີ້ຍັງກ່າວວ່າ: “ການດື່ມຢ່າງບໍ່ອັ້ນໝາຍເຖິງການດື່ມຫ້າຈອກລຽນຕິດບາດດຽວຫຼືຫຼາຍກວ່ານັ້ນສຳລັບຜູ້ຊາຍ ແລະສີ່ຈອກລຽນຕິດບາດດຽວຫຼືຫຼາຍກວ່ານັ້ນສຳລັບຜູ້ຍິງ.”
ຖ້າເຄີຍຖືກລໍ້ໃຈໃຫ້ດື່ມເຫຼົ້າຫຼາຍໂພດຫຼືດື່ມທັງໆທີ່ອາຍຸຍັງບໍ່ຮອດກະສຽນ ບໍ່ແມ່ນມີພຽງແຕ່ເຈົ້າຄົນດຽວ. ໜຸ່ມສາວຫຼາຍຄົນໃຊ້ເຄື່ອງດື່ມປະເພດເຫຼົ້າໃນທາງທີ່ຜິດ.a ແຕ່ຂໍໃຫ້ຖາມຕົວເອງວ່າ ‘ຂ້ອຍຮູ້ແທ້ໆບໍເຖິງເຫດຜົນທີ່ຂ້ອຍຕ້ອງການດື່ມເຫຼົ້າ ແລະເຫຼົ້າສາມາດມີຜົນກະທົບຫຍັງແດ່?’ ຕົວຢ່າງເຊັ່ນ ເຈົ້າຈະຕອບຄຳຖາມເຫຼົ່ານີ້ທີ່ວ່າຖືກຫຼືຜິດວ່າແນວໃດ? ໃຫ້ໝາຍ ✔ ໃນປ່ອງທາງຂ້າງຄຳຕອບຂອງເຈົ້າ ແລະຈາກນັ້ນໃຫ້ພິຈາລະນາຂໍ້ຄວາມຈິງຕ່າງໆ.
ກ. ໄວຮຸ່ນດື່ມພຽງຍ້ອນວ່າມັກລົດຊາດຂອງເຫຼົ້າເທົ່ານັ້ນ.
◻ ຖືກ ◻ ຜິດ
ຂ. ເນື່ອງຈາກອາຍຸຍັງໜ້ອຍແລະສຸຂະພາບດີກວ່າ ໄວຮຸ່ນປະສົບກັບຜົນເສຍຫາຍຂ້າງຄຽງໜ້ອຍກວ່າຈາກການໃຊ້ເຫຼົ້າແບບຜິດໆເມື່ອສົມທຽບກັບຜູ້ໃຫຍ່.
◻ ຖືກ ◻ ຜິດ
ຄ. ການດື່ມເຫຼົ້າຢ່າງບໍ່ອັ້ນບໍ່ໄດ້ທຳລາຍຊີວິດ.
◻ ຖືກ ◻ ຜິດ
ງ. ຄຳພີໄບເບິນຕຳໜິການໃຊ້ເຫຼົ້າທຸກຮູບແບບ.
◻ ຖືກ ◻ ຜິດ
ຈ. ຜົນພຽງຢ່າງດຽວຈາກການດື່ມເຫຼົ້າຢ່າງບໍ່ອັ້ນແມ່ນເສຍສຸຂະພາບ.
◻ ຖືກ ◻ ຜິດ
ກ. ໄວຮຸ່ນດື່ມພຽງຍ້ອນວ່າມັກລົດຊາດຂອງເຫຼົ້າເທົ່ານັ້ນ. ຄຳຕອບຄື ຜິດ. ໃນການສຳຫຼວດຄວາມຮູ້ເລື່ອງເຫຼົ້າຢູ່ປະເທດອົດສະຕຣາລີ ຄົນໜຸ່ມສາວ 36 ສ່ວນຮ້ອຍທີ່ຖືກສອບຖາມກ່າວວ່າ ເຫດຜົນຫຼັກທີ່ດື່ມເຫຼົ້າຄືເພື່ອເຂົ້າກັບສັງຄົມໝູ່ຄູ່. ໃນປະເທດສະຫະລັດອາເມລິກາ ການສຳຫຼວດພົບວ່າ 66 ສ່ວນຮ້ອຍກ່າວວ່າ ດື່ມເຫຼົ້າຍ້ອນຖືກກົດດັນຈາກຄົນໄວດຽວກັນ. ແນວໃດກໍຕາມ ມີຫຼາຍກວ່າເຄິ່ງໜຶ່ງຍັງກ່າວວ່າດື່ມເຫຼົ້າເພື່ອພະຍາຍາມລືມບັນຫາຕ່າງໆ.
ຂ. ເນື່ອງຈາກອາຍຸຍັງໜ້ອຍແລະສຸຂະພາບດີກວ່າ ໄວຮຸ່ນປະສົບກັບຜົນເສຍຫາຍຂ້າງຄຽງໜ້ອຍກວ່າຈາກການໃຊ້ເຫຼົ້າແບບຜິດໆເມື່ອສົມທຽບກັບຜູ້ໃຫຍ່. ຄຳຕອບຄື ຜິດ. ບົດຄວາມໃນວາລະສານດິດສະຄາເວີ ກ່າວວ່າ: “ການຄົ້ນຄວ້າໃໝ່ຊີ້ບອກວ່ານັກດື່ມທີ່ອາຍຸຍັງໜ້ອຍກຳລັງຫຼິ້ນກັບອັນຕະລາຍຮ້າຍແຮງ.” ຮ້າຍແຮງຍ້ອນຫຍັງ? “ໄວຮຸ່ນທີ່ດື່ມເຫຼົ້າຫຼາຍເກີນໄປອາດທຳລາຍຄວາມສາມາດດ້ານການຄິດໃນລະດັບທີ່ຫຼາຍສົມຄວນ.”
ການດື່ມເຫຼົ້າເປັນເວລາດົນນານຍັງອາດຈະເຮັດໃຫ້ເປັນສິວຫຼາຍຂຶ້ນ ຜິວໜັງຫ່ຽວກ່ອນໄວ ນ້ຳໜັກເພີ່ມຂຶ້ນ ຕົກເປັນທາດຂອງເຫຼົ້າ ແລະຕິດຢາເສບຕິດ. ເຫຼົ້າຍັງມີຜົນເສຍຢ່າງຮ້າຍແຮງຕໍ່ລະບົບປະສາດ ຕັບ ແລະຫົວໃຈ.
ຄ. ການດື່ມເຫຼົ້າຢ່າງບໍ່ອັ້ນບໍ່ໄດ້ທຳລາຍຊີວິດ. ຄຳຕອບຄື ຜິດ. ທາດເຫຼົ້າໃນປະລິມານທີ່ຫຼາຍເກີນໄປຈະເຮັດໃຫ້ສະໝອງຂາດທາດອົກຊີແຊນ ດັ່ງນັ້ນ ອະໄວຍະວະທີ່ສຳຄັນໃນຮ່າງກາຍອາດຈະຢຸດເຮັດວຽກ. ອາດມີອາການຮາກ ໝົດສະຕິ ຫັນໃຈຊ້າຫຼືບໍ່ສະໝ່ຳສະເໝີ. ໃນບາງກໍລະນີອາດເຖິງຂັ້ນເສຍຊີວິດ.
ງ. ຄຳພີໄບເບິນຕຳໜິການໃຊ້ເຄື່ອງດື່ມປະເພດເຫຼົ້າທຸກຮູບແບບ. ຄຳຕອບຄື ຜິດ. ຄຳພີໄບເບິນບໍ່ໄດ້ຕຳໜິການດື່ມເຫຼົ້າ ແລະທັງບໍ່ໄດ້ຫ້າມຄົນໜຸ່ມສາວບໍ່ໃຫ້ມີຄວາມມ່ວນຊື່ນ. (ຄຳເພງ 104:15; ຜູ້ເທສະໜາປ່າວປະກາດ 10:19) ແນ່ນອນວ່າຕ້ອງມີອາຍຸຕາມທີ່ກົດໝາຍກຳນົດໄວ້ເພື່ອດື່ມເຫຼົ້າ.—ໂລມ 13:1.
ແນວໃດກໍຕາມ ຄຳພີໄບເບິນເຕືອນບໍ່ໃຫ້ດື່ມເຫຼົ້າຫຼາຍເກີນໄປ. ສຸພາສິດ 20:1 ກ່າວວ່າ: “ນ້ຳອະງຸ່ນເປັນຂອງຫົວຂວັນແລະເຫຼົ້າກໍໃຫ້ເກີດສຽງອຶກກະທຶກ ແລະບຸກຄະລະຜູ້ໃດຫຼົງກຳນົດໃນສິ່ງນັ້ນກໍບໍ່ມີປັນຍາ.” ເຫຼົ້າອາດເຮັດໃຫ້ປະພຶດຕົວແບບທີ່ເປັນຕາຫົວຂວັນ! ແມ່ນຢູ່ ເຫຼົ້າອາດເຮັດໃຫ້ຮູ້ສຶກມ່ວນຊື່ນໄລຍະໜຶ່ງ ແຕ່ຖ້າດື່ມຫຼາຍເກີນໄປ ມັນ “ຂົບຄືງູ” ແລະເຮັດໃຫ້ປະສົບບັນຫາຫຼາຍຢ່າງ.—ສຸພາສິດ 23:32.
ຈ. ຜົນພຽງຢ່າງດຽວທີ່ເກີດຈາກການດື່ມເຫຼົ້າຢ່າງບໍ່ອັ້ນແມ່ນເສຍສຸຂະພາບ. ຄຳຕອບຄື ຜິດ. ຖ້າເມົາເຫຼົ້າ ເຈົ້າອາດສ່ຽງທີ່ຈະຖືກທຳຮ້າຍດ້ວຍຫຼາກຫຼາຍຮູບແບບ ຫຼືແມ່ນແຕ່ຖືກຂົ່ມຂືນຊ້ຳ. ໃນຂະນະດຽວກັນ ເຈົ້າອາດເປັນອັນຕະລາຍຕໍ່ຄົນອື່ນນຳອີກ ໂດຍປະພຶດແບບທີ່ບໍ່ສອດຄ່ອງກັບນິດໄສແທ້ຈິງຂອງເຈົ້າ. ຄຳພີໄບເບິນເຕືອນວ່າຖ້າດື່ມເຫຼົ້າຫຼາຍເກີນໄປ “ເຈົ້າຈະບໍ່ສາມາດຄິດຫຼືເວົ້າໄດ້ຢ່າງແຈ່ມແຈ້ງ.” (ສຸພາສິດ 23:33, ທ.ປ.) ສະຫລຸບແລ້ວ ເຈົ້າຈະເຮັດໃຫ້ຕົວເອງເບິ່ງຄືເປັນຄົນໂງ່! ມີຜົນເສຍຫາຍທີ່ເຈັບປວດຢ່າງອື່ນເຊິ່ງລວມເຖິງການທຳລາຍສາຍສຳພັນກັບໝູ່ເພື່ອນ ຜົນການຮຽນແລະການເຮັດວຽກຕົກຕ່ຳ ມີປະຫວັດກໍ່ອາດຊະຍາກຳ ແລະທຸກຍາກ.—ສຸພາສິດ 23:21.
ສິ່ງສຳຄັນທີ່ສຸດ ຈົ່ງຄິດເຖິງຜົນເສຍຫາຍຝ່າຍວິນຍານທີ່ອາດເກີດຈາກການດື່ມເຫຼົ້າຫຼາຍເກີນໄປ. ພະເຢໂຫວາພະເຈົ້າຕ້ອງການໃຫ້ເຮົາຮັບໃຊ້ພະອົງດ້ວຍ “ສຸດຄວາມຄຶດ” ບໍ່ແມ່ນຮັບໃຊ້ດ້ວຍຄວາມຄຶດທີ່ໄດ້ຮັບຄວາມເສຍຫາຍແບບບໍ່ຈຳເປັນເນື່ອງຈາກການດື່ມເຫຼົ້າຫຼາຍເກີນໄປ. (ມັດທາຍ 22:37) ພະຄຳຂອງພະເຈົ້າບໍ່ພຽງແຕ່ຕຳໜິການ “ເມົານ້ຳອະງຸ່ນ” ແຕ່ຍັງຕຳໜິການ “ດື່ມເກີນກຳນົດ” ນຳອີກ. (1 ເປໂຕ 4:3) ດ້ວຍເຫດນີ້ ການດື່ມຢ່າງບໍ່ອັ້ນຈຶ່ງຂັດກັບໃຈປະສົງຂອງຜູ້ສ້າງຂອງເຮົາ ແລະຈະຂັດຂວາງເຮົາບໍ່ໃຫ້ມີສາຍສຳພັນທີ່ໃກ້ຊິດກັບພະເຈົ້າ.
ເຈົ້າຈະເລືອກແນວໃດ?
ເຈົ້າຈະພຽງແຕ່ເຮັດແບບຄົນໄວດຽວກັນທີ່ໃຊ້ເຄື່ອງດື່ມປະເພດເຫຼົ້າໃນທາງຜິດບໍ? ຄຳພີໄບເບິນກ່າວວ່າ: “ທ່ານທັງຫຼາຍບໍ່ຮູ້ຫຼືວ່າພວກທ່ານຈະມອບຕົວໄວ້ເປັນທາດຈະຟັງຄຳຂອງຜູ້ໃດ ທ່ານກໍເປັນທາດຂອງຜູ້ນັ້ນ.” (ໂລມ 6:16) ເຈົ້າຕ້ອງການແທ້ໆບໍທີ່ຈະເປັນທາດຂອງໝູ່ເພື່ອນຫຼືເປັນທາດຂອງເຫຼົ້າ?
ເຈົ້າຈະເຮັດແນວໃດຖ້າເຈົ້າຕິດການດື່ມເຫຼົ້າຢ່າງບໍ່ອັ້ນ? ຈົ່ງຂໍຄວາມຊ່ວຍເຫຼືອທັນທີໂດຍບອກພໍ່ແມ່ຫຼືໝູ່ທີ່ອາວຸໂສ. ຈົ່ງໝາຍເພິ່ງພະເຢໂຫວາພະເຈົ້າໂດຍການອະທິດຖານແລະອ້ອນວອນຂໍຄວາມຊ່ວຍເຫຼືອຈາກພະອົງ. ທີ່ຈິງ ພະອົງເປັນ “ຄວາມຊ່ອຍທີ່ໄດ້ງ່າຍເລື້ອຍໆໃນຄວາມຂັດສົນທັງຫຼາຍ.” (ຄຳເພງ 46:1) ເນື່ອງຈາກການດື່ມຢ່າງບໍ່ອັ້ນແລະການດື່ມກ່ອນຮອດກະສຽນອາຍຸສ່ວນຫຼາຍເປັນຜົນມາຈາກຄວາມກົດດັນຂອງຄົນຮຸ່ນດຽວກັນ ເຈົ້າອາດຈຳເປັນຕ້ອງເຮັດການປ່ຽນແປງຂະໜາດໃຫຍ່ໃນເລື່ອງການເລືອກໝູ່.b ການປ່ຽນແປງແບບນີ້ບໍ່ງ່າຍ ແຕ່ດ້ວຍຄວາມຊ່ວຍເຫຼືອຈາກພະເຢໂຫວາເຈົ້າສາມາດເຮັດໄດ້ສຳເລັດ.
ສາມາດເອົາຊະນະການຕິດຢາເສບຕິດໄດ້. ໃຫ້ເບິ່ງວ່າໂດຍວິທີໃດ.
[ຂໍ້ຄວາມໄຂເງື່ອນ]
a ຂໍໃຫ້ເບິ່ງຂອບສີ່ລ່ຽມ “ໃຜກຳລັງເຮັດສິ່ງນີ້?” ໃນໜ້າ 249.
b ສາມາດເບິ່ງຂໍ້ມູນເພີ່ມເຕີມໃນບົດທີ 8 ແລະບົດທີ 9 ຂອງປຶ້ມຫົວນີ້ ແລະບົດທີ 15 ຂອງເຫຼັ້ມທີ 2.
ຂໍ້ພະຄຳພີຫຼັກ
“ຄົນຂີ້ເຫຼົ້າ . . . ຄົງຈະເປັນຄົນຈົນ.”—ສຸພາສິດ 23:21.
ຄຳແນະນຳ
ໃຫ້ລະບຸເຫດຜົນຕ່າງໆວ່າເປັນຫຍັງຈຶ່ງຢາກດື່ມເຫຼົ້າ. ຈາກນັ້ນໃຫ້ຄິດເຖິງທາງເລືອກ ວິທີທາງຕ່າງໆທີ່ຈະເຮັດໃຫ້ສຸຂະພາບແຂງແຮງກວ່າ ເຊິ່ງພາໃຫ້ເຈົ້າເອງມ່ວນຊື່ນຫຼືເຮັດໃຫ້ຄວາມຮູ້ສຶກກະວົນກະວາຍສະຫງົບລົງ.
ເຈົ້າຮູ້ບໍ . . .?
ການສຶກສາຄົ້ນຄວ້າແຫ່ງໜຶ່ງໃນສະຫະລັດອາເມລິກາລາຍງານວ່າ: “ຜູ້ທີ່ດື່ມຢ່າງບໍ່ອັ້ນເລື້ອຍໆມີໂອກາດທີ່ຈະຂາດໂຮງຮຽນ ເຮັດວຽກບ້ານບໍ່ທັນ ໄດ້ຮັບບາດເຈັບ ແລະທຳລາຍຊັບສິນສູງເຖິງແປດເທົ່າເມື່ອສົມທຽບກັບຄົນທີ່ບໍ່ໄດ້ດື່ມແບບນີ້.”
ແຜນພາກປະຕິບັດ!
ຖ້າໝູ່ຕ້ອງການໃຫ້ຂ້ອຍດື່ມເຫຼົ້າໃນທາງທີ່ຜິດນຳເຂົາເຈົ້າ ຂ້ອຍຈະເວົ້າວ່າ ․․․․․
ສິ່ງທີ່ຂ້ອຍຢາກຖາມພໍ່ (ແມ່) ກ່ຽວກັບເລື່ອງນີ້ແມ່ນ ․․․․․
ເຈົ້າຄິດວ່າແນວໃດ?
• ເປັນຫຍັງໝູ່ຈຶ່ງຢາກໃຫ້ຄົນອື່ນເຂົ້າຮ່ວມນຳເຂົາເຈົ້າໃນການດື່ມເຫຼົ້າໃນທາງທີ່ຜິດ?
• ການດື່ມເຫຼົ້າໃນທາງທີ່ຜິດຈະເຮັດໃຫ້ເພດກົງກັນຂ້າມປະທັບໃຈບໍ ແລະເປັນຫຍັງເຈົ້າຈຶ່ງຕອບແບບນັ້ນ?
[ຈຸດເດັ່ນໜ້າ 250]
“ເມື່ອໝູ່ທີ່ຮຽນໜັງສືຢູ່ຫ້ອງດຽວກັນຍື່ນເຫຼົ້າໃຫ້ຂ້ອຍດື່ມ ຂ້ອຍບອກວ່າບໍ່ຈຳເປັນຕ້ອງດື່ມເຫຼົ້າຈຶ່ງຈະມ່ວນຊື່ນໄດ້.”—ທ້າວ ມາກ
[ກອບໜ້າ 249]
ໃຜກຳລັງເຮັດສິ່ງນີ້?
ການສຶກສາຄົ້ນຄວ້າກ່ຽວກັບນັກຮຽນຊັ້ນມັດທະຍົມໃນປະເທດອັງກິດ ປະເທດສະກ໋ອດແລນ ແລະປະເທດເວວ ຊີ້ບອກວ່າເດັກອາຍຸ 13 ແລະ 14 ປີຂອງຈຳນວນໜຶ່ງໃນສີ່ບອກວ່າ: “ເຄີຍດື່ມເຄື່ອງດື່ມທີ່ມີເຫຼົ້າຢ່າງໜ້ອຍຫ້າຈອກລຽນຕິດບາດດຽວ.” ປະມານເຄິ່ງໜຶ່ງຂອງເດັກທີ່ມີອາຍຸ 15 ເຖິງ 16 ປີເຊິ່ງຖືກສຳຫຼວດບອກວ່າເຂົາເຈົ້າເຄີຍເຮັດແບບດຽວກັນນັ້ນ. ກະຊວງສາທາລະນະສຸກແລະບໍລິການປະຊາຊົນຂອງສະຫະລັດອາເມລິກາລາຍງານວ່າ: “ໄວຮຸ່ນອາຍຸ 12 ຫາ 20 ປີປະມານ 10,4 ລ້ານຄົນກ່າວວ່າດື່ມເຄື່ອງດື່ມທີ່ມີເຫຼົ້າ. ໃນຈຳນວນນີ້ 5,1 ລ້ານຄົນເປັນຜູ້ທີ່ດື່ມຢ່າງບໍ່ອັ້ນແລະມີນັກດື່ມໜັກ 2,3 ລ້ານຄົນທີ່ດື່ມຢ່າງບໍ່ອັ້ນຢ່າງໜ້ອຍຫ້າເທື່ອໃນໜຶ່ງເດືອນ.” ການສຶກສາຄົ້ນຄວ້າທີ່ເຮັດຢູ່ປະເທດອົດສະຕຣາລີຊີ້ບອກວ່າ ໃນປະເທດນັ້ນເດັກຍິງມັກດື່ມຢ່າງບໍ່ອັ້ນຫຼາຍກວ່າເດັກຊາຍ ບາງຄົນດື່ມ 13 ຫາ 30 ຈອກລຽນຕິດບາດດຽວ!
[ຮູບພາບໜ້າ 251]
ເຫຼົ້າຕອດຄືງູຮ້າຍ
-