-
ຕາຍແລ້ວເປັນແນວໃດ?ຮຽນຄຳພີໄບເບິນແລ້ວໄດ້ຫຍັງ?
-
-
ບົດທີ 6
ຕາຍແລ້ວເປັນແນວໃດ?
1-3. ຄົນເຮົາຢາກຮູ້ຫຍັງແດ່ກ່ຽວກັບຄວາມຕາຍ? ແລະສາສະໜາຕ່າງໆສອນແນວໃດ?
ຄຳພີໄບເບິນບອກວ່າອີກບໍ່ດົນ “ຄວາມຕາຍຈະບໍ່ມີອີກຕໍ່ໄປ.” (ພະນິມິດ 21:4) ໃນບົດທີ 5 ເຮົາຮູ້ວ່າຄ່າໄຖ່ຊ່ວຍເຮົາໃຫ້ມີຊີວິດຕະຫຼອດໄປໄດ້ ແຕ່ຕອນນີ້ເຮົາທຸກຄົນຍັງຕ້ອງຕາຍ. (ຜູ້ເທສະໜາປ່າວປະກາດ 9:5) ດັ່ງນັ້ນ ເລື່ອງສຳຄັນເລື່ອງໜຶ່ງທີ່ເຮົາຢາກຮູ້ກໍຄື ເມື່ອເຮົາຕາຍແລ້ວຈະເປັນແນວໃດ?
2 ເຮົາແຮ່ງຢາກຮູ້ເລື່ອງນີ້ຫຼາຍຖ້າມີຜູ້ໃດຜູ້ໜຶ່ງທີ່ເຮົາຮັກໄດ້ຕາຍຈາກໄປ. ເຮົາຢາກຮູ້ວ່າ: ‘ຕອນນີ້ລາວເປັນແນວໃດ? ລາວຢູ່ໃສ? ລາວລຳບາກບໍ? ລາວເບິ່ງເຮົາຢູ່ບໍ? ລາວຊ່ວຍເຮົາໄດ້ບໍ? ເຮົາຈະໄດ້ພົບລາວອີກບໍ?’
3 ແຕ່ລະສາສະໜາຕອບຄຳຖາມເຫຼົ່ານີ້ບໍ່ຄືກັນ. ບາງສາສະໜາສອນວ່າ ຖ້າເຮັດດີກໍໄດ້ໄປສະຫວັນ ຖ້າເຮັດຊົ່ວກໍຕົກນະລົກ. ບາງສາສະໜາກໍສອນວ່າຕາຍແລ້ວເປັນຜີ ຫຼືເປັນວິນຍານໄປຢູ່ກັບບັນພະບຸລຸດທີ່ຕາຍໄປແລ້ວ. ບາງສາສະໜາສອນວ່າຫຼັງຈາກທີ່ເຮົາຕາຍແລ້ວແລະຖືກຕັດສິນ ເຮົາຈະມາເກີດໃໝ່ ຫຼືກັບມາມີຊີວິດໃນອີກຮ່າງໜຶ່ງ ບາງເທື່ອກໍມາເກີດເປັນອີກຄົນໜຶ່ງຫຼືເປັນສັດ.
4. ເລື່ອງໜຶ່ງທີ່ສາສະໜາຕ່າງໆສອນຄືກັນແມ່ນຫຍັງ?
4 ເບິ່ງຄືວ່າສາສະໜາຕ່າງໆສອນບໍ່ຄືກັນກ່ຽວກັບຄົນຕາຍ. ແຕ່ມີເລື່ອງໜຶ່ງທີ່ສອນຄືກັນ ນັ້ນແມ່ນ ເມື່ອຄົນເຮົາຕາຍແລ້ວຈະມີວິນຍານຍັງເຫຼືອຢູ່. ເປັນແບບນັ້ນແທ້ໆບໍ?
ຕາຍແລ້ວເປັນແນວໃດ?
5, 6. ເມື່ອຄົນເຮົາຕາຍແລ້ວເປັນແນວໃດ?
5 ພະເຢໂຫວາຮູ້ວ່າເມື່ອເຮົາຕາຍແລ້ວຈະເປັນແນວໃດ ແລະພະອົງບອກເຮົາວ່າ ຊີວິດຈົບສິ້ນຕອນທີ່ເຮົາຕາຍ. ຄວາມຕາຍຈຶ່ງກົງກັນຂ້າມກັບຊີວິດ ດັ່ງນັ້ນ ຄົນຕາຍແລ້ວບໍ່ມີວິນຍານ ບໍ່ມີຄວາມຮູ້ສຶກແລະບໍ່ມີຄວາມຊົງຈຳເຫຼືອຢູ່.a ເມື່ອເຮົາຕາຍແລ້ວກໍເບິ່ງບໍ່ເຫັນ ບໍ່ໄດ້ຍິນ ແລະບໍ່ສາມາດຄິດຫຍັງໄດ້ອີກເລີຍ.
6 ກະສັດໂຊໂລໂມນຂຽນໄວ້ວ່າ “ຄົນຕາຍແລ້ວບໍ່ຮູ້ຈັກສິ່ງໃດ.” ຄົນຕາຍຮັກຫຼືຊັງໃຜກໍບໍ່ໄດ້ ແລະ “ໃນບ່ອນທີ່ຕາບໍ່ເຫັນ [“ຫຼຸມຝັງສົບ,” ລ.ມ.] ທີ່ເຈົ້າໄປນັ້ນບໍ່ມີກິດຈະການ ບໍ່ມີຄວາມຄຶດ ບໍ່ມີວິຊາຄວາມຮູ້ ບໍ່ມີຄວາມປັນຍາ.” (ອ່ານຜູ້ເທສະໜາປ່າວປະກາດ 9:5, 6, 10) ແລະຄຳເພງ 146:4 (ລ.ມ.) ບອກວ່າ ເມື່ອຄົນເຮົາຕາຍ “ຄວາມຄິດຂອງລາວ” ກໍຕາຍໄປນຳ.
ພະເຢຊູບອກແນວໃດກ່ຽວກັບສະພາບຂອງຄົນຕາຍ?
ພະເຢໂຫວາສ້າງມະນຸດເພື່ອໃຫ້ຢູ່ຕະຫຼອດໄປໃນໂລກ
7. ພະເຢຊູບອກແນວໃດກ່ຽວກັບສະພາບຂອງຄົນຕາຍ?
7 ຕອນທີ່ລາຊະໂຣໝູ່ຮັກຂອງພະເຢຊູຕາຍ ເພິ່ນບອກພວກລູກສິດວ່າ: “ລາຊະໂຣໝູ່ຂອງພວກເຮົານອນຫຼັບຢູ່.” ແຕ່ພະເຢຊູບໍ່ໄດ້ໝາຍຄວາມວ່າລາຊະໂຣກຳລັງນອນຫຼັບພັກຜ່ອນ ເພາະວ່າຫຼັງຈາກນັ້ນເພິ່ນບອກວ່າ: “ລາຊະໂຣຕາຍແລ້ວ.” (ໂຢຮັນ 11:11-14) ພະເຢຊູເວົ້າແບບນີ້ຍ້ອນເພິ່ນກຳລັງປຽບທຽບຄວາມຕາຍຄືກັບການນອນຫຼັບສະໜິດ. ພະເຢຊູບໍ່ໄດ້ບອກວ່າລາຊະໂຣຢູ່ໃນສະຫວັນຫຼືເປັນວິນຍານໄປຢູ່ກັບບັນພະບຸລຸດທີ່ຕາຍໄປແລ້ວ ແລະກໍບໍ່ໄດ້ບອກວ່າລາຊະໂຣກຳລັງທຸກທໍລະມານຢູ່ໃນນະລົກ ຫຼືໄປເກີດໃໝ່ ຫຼືເປັນຜີ. ແຕ່ພະເຢຊູບອກວ່າລາຊະໂຣເປັນຄືກັບຄົນນອນຫຼັບສະໜິດ. ມີພະຄຳພີຂໍ້ອື່ນອີກທີ່ປຽບທຽບຄ້າຍໆກັນນີ້ ເຊັ່ນ: ຄຳພີໄບເບິນເວົ້າເຖິງຊະເຕຟາໂນທີ່ຖືກຂ້າວ່າລາວ “ຫຼັບໄປ.” (ກິດຈະການ 7:60, ໄຂເງື່ອນ) ແລະອັກຄະສາວົກໂປໂລຂຽນກ່ຽວກັບຄລິດສະຕຽນບາງຄົນທີ່ຕາຍໄປແລ້ວວ່າພວກເຂົາ “ຫຼັບ” ໄປແລ້ວ.—1 ໂກຣິນໂທ 15:6, ໄຂເງື່ອນ
8. ເຮົາຮູ້ໄດ້ແນວໃດວ່າພະເຈົ້າບໍ່ໄດ້ສ້າງມະນຸດມາເພື່ອໃຫ້ຕາຍ?
8 ເຮົາໄດ້ຮຽນຮູ້ແລ້ວວ່າພະເຈົ້າສ້າງອາດາມກັບເອວາມະນຸດຄູ່ທຳອິດ ແຕ່ພະອົງສ້າງພວກເຂົາມາເພື່ອໃຫ້ຕາຍບໍ? ບໍ່ແມ່ນ! ພະເຢໂຫວາສ້າງພວກເຂົາໃຫ້ມີຄວາມສຸກກັບຊີວິດຕະຫຼອດໄປພ້ອມທັງມີສຸຂະພາບແຂງແຮງສົມບູນ. ຕອນທີ່ພະເຢໂຫວາສ້າງມະນຸດ ພະອົງໃສ່ຄວາມຮູ້ສຶກໃຫ້ພວກເຂົາຢາກມີຊີວິດຕະຫຼອດໄປນຳ. (ຜູ້ເທສະໜາປ່າວປະກາດ 3:11) ບໍ່ມີພໍ່ແມ່ຄົນໃດຢາກເຫັນລູກເຈັບປ່ວຍແລະຕາຍ. ພະເຢໂຫວາກໍຄືກັນ ພະອົງບໍ່ຢາກເຫັນພວກເຮົາເຈັບປ່ວຍ ເຖົ້າລົງແລ້ວກໍຕາຍ. ແຕ່ຖ້າພະເຈົ້າສ້າງເຮົາໃຫ້ມີຊີວິດຕະຫຼອດໄປ ແລ້ວເປັນຫຍັງເຮົາຈຶ່ງຕາຍ?
ເປັນຫຍັງເຮົາຈຶ່ງຕາຍ?
9. ເປັນຫຍັງອາດາມກັບເອວາຄວນເຮັດຕາມທີ່ພະເຢໂຫວາສັ່ງ?
9 ໃນສວນເອເດນພະເຢໂຫວາບອກອາດາມວ່າ: “ໝາກໄມ້ທຸກຢ່າງໃນສວນນີ້ເຈົ້າກິນໄດ້. ແຕ່ວ່າແຕ່ຕົ້ນໄມ້ແຫ່ງຄວາມຮູ້ການດີແລະຊົ່ວ ເຈົ້າຢ່າຊູ່ກິນ ເຫດວ່າໃນວັນໃດເຈົ້າຫາກກິນແຕ່ໝາກນັ້ນ ເຈົ້າຈະຕາຍໄປເປັນແທ້.” (ຕົ້ນເດີມ 2:9, 16, 17) ອາດາມກັບເອວາຄວນຈະເຮັດຕາມທີ່ພະເຢໂຫວາສັ່ງ ຄຳສັ່ງທີ່ຊັດເຈນນີ້ເຮັດໄດ້ບໍ່ຍາກ. ພະເຢໂຫວາເປັນຜູ້ສ້າງອາດາມກັບເອວາ ແລະພະອົງຮູ້ດີວ່າສິ່ງໃດດີສິ່ງໃດຊົ່ວ. ຖ້າພວກເຂົາເຊື່ອຟັງພະເຢໂຫວາກໍສະແດງວ່າພວກເຂົານັບຖືພະອົງແລະເຕັມໃຈໃຫ້ພະອົງປົກຄອງ ແລະຍັງເຮັດໃຫ້ເຫັນອີກວ່າພວກເຂົາສຳນຶກບຸນຄຸນທີ່ພະອົງໃຫ້ທຸກສິ່ງທີ່ດີແກ່ພວກເຂົາ.
10, 11. (ກ) ຊາຕານເຮັດແນວໃດໃຫ້ອາດາມກັບເອວາບໍ່ເຊື່ອຟັງພະເຈົ້າ? (ຂ) ເປັນຫຍັງສິ່ງທີ່ອາດາມກັບເອວາເຮັດຈຶ່ງບໍ່ຄວນໃຫ້ອະໄພ?
10 ແຕ່ໜ້າເສົ້າໃຈ ອາດາມກັບເອວາເລືອກບໍ່ເຊື່ອຟັງພະເຢໂຫວາ. ຊາຕານເວົ້າກັບເອວາວ່າ: “ຈິງຫຼືພະເຈົ້າໄດ້ບອກຫ້າມວ່າພວກເຈົ້າຢ່າຊູ່ກິນໝາກໄມ້ທຸກຢ່າງໃນສວນນີ້?” ເອວາຕອບວ່າ: “ໝາກໄມ້ທັງປວງທີ່ຢູ່ໃນສວນນີ້ພວກເຮົາພາກັນກິນໄດ້. ແຕ່ວ່າໝາກຜົນລະໄມ້ນັ້ນທີ່ຢູ່ກາງສວນພະເຈົ້າໄດ້ຫ້າມວ່າ ‘ຢ່າກິນແລະຢ່າບາຍ ຢ້ານວ່າພວກເຈົ້າຈະຕາຍໄປ.’”—ຕົ້ນເດີມ 3:1-3
11 ຈາກນັ້ນຊາຕານກໍບອກວ່າ: “ພວກເຈົ້າຈະບໍ່ຕາຍດອກ. ເພາະວ່າພະເຈົ້າຮູ້ຢູ່ວ່າພວກເຈົ້າຫາກກິນໝາກໄມ້ນັ້ນໃນວັນໃດ ຕາຂອງພວກເຈົ້າຈະມືນແຈ້ງຂຶ້ນໃນວັນນັ້ນ ແລະພວກເຈົ້າຈະເປັນເໝືອນພະເຈົ້າ ຮູ້ຈັກການດີແລະຊົ່ວ.” (ຕົ້ນເດີມ 3:4-6) ຊາຕານຢາກໃຫ້ເອວາຄິດວ່າລາວຕັດສິນໃຈເອງໄດ້ວ່າສິ່ງໃດດີສິ່ງໃດຊົ່ວ ແລະມັນກໍຕົວະອີກວ່າເຖິງຈະບໍ່ເຊື່ອຟັງເຈົ້າກໍບໍ່ເປັນຫຍັງດອກ. ເອວາຈະບໍ່ຕາຍຄືກັບທີ່ພະເຈົ້າບອກ ລາວຈຶ່ງກິນໝາກໄມ້ນັ້ນ ແລ້ວຍື່ນໃຫ້ຜົວກິນນຳ. ອາດາມກັບເອວາຮູ້ຢູ່ແກ່ໃຈວ່າພະເຢໂຫວາສັ່ງວ່າຢ່າກິນໝາກໄມ້ນັ້ນ ແຕ່ພວກເຂົາກໍຍັງກິນ ສະແດງວ່າພວກເຂົາເລືອກທີ່ຈະບໍ່ເຊື່ອຟັງພະເຈົ້າ. ການທີ່ພວກເຂົາກິນໝາກໄມ້ທີ່ພະເຈົ້າຫ້າມຈຶ່ງເທົ່າກັບວ່າພວກເຂົາບໍ່ນັບຖືພະເຈົ້າຜູ້ເປັນພໍ່ໃນສະຫວັນທີ່ຮັກພວກເຂົາຫຼາຍ. ພວກເຂົາເຮັດສິ່ງທີ່ບໍ່ຄວນໃຫ້ອະໄພ!
12. ເປັນຫຍັງຈຶ່ງເປັນຕາຜິດຫວັງແທ້ໆທີ່ອາດາມແລະເອວາບໍ່ເຊື່ອຟັງພະເຢໂຫວາ?
12 ເປັນຕາຜິດຫວັງແທ້ໆທີ່ມະນຸດຄູ່ທຳອິດບໍ່ເຊື່ອຟັງພະເຈົ້າທັງໆທີ່ພະອົງສ້າງພວກເຂົາມາ! ລອງຄິດເບິ່ງແມ້ ຖ້າເຈົ້າເປັນພໍ່ແມ່ທີ່ພະຍາຍາມລ້ຽງດູລູກດ້ວຍຄວາມຮັກ ແຕ່ພວກເຂົາພັດເນລະຄຸນ ບໍ່ເຊື່ອຟັງເຈົ້າ ແລະເຮັດຕາມໃຈຕົວເອງ ເຈົ້າຈະຮູ້ສຶກແນວໃດ? ເຈົ້າຕ້ອງຜິດຫວັງແລະເສຍໃຈຫຼາຍແທ້ໆ.
ອາດາມຖືກສ້າງມາຈາກດິນ ແລະລາວຕ້ອງກັບໄປເປັນດິນອີກ
13. ເມື່ອພະເຢໂຫວາບອກວ່າ “ເຈົ້າຈະຫຼົບໄປໃນຂີ້ຝຸ່ນອີກ” ໝາຍຄວາມວ່າແນວໃດ?
13 ເມື່ອອາດາມກັບເອວາບໍ່ເຊື່ອຟັງພະເຈົ້າ ພວກເຂົາຈຶ່ງໝົດໂອກາດທີ່ຈະມີຊີວິດຕະຫຼອດໄປ. ພະເຢໂຫວາບອກອາດາມວ່າ: “ເພາະວ່າເຈົ້າໄດ້ອອກມາຈາກດິນ ເພາະວ່າເຈົ້າເປັນຂີ້ຝຸ່ນ ແລະເຈົ້າຈະຫຼົບໄປໃນຂີ້ຝຸ່ນອີກ.” (ອ່ານຕົ້ນເດີມ 3:19) ນີ້ໝາຍຄວາມວ່າຫຼັງຈາກອາດາມເຮັດບາບລາວກໍຕາຍ ລາວກາຍເປັນດິນຄືກັບກ່ອນທີ່ຈະຖືກສ້າງ ນັ້ນກໍຄືບໍ່ມີຊີວິດ ບໍ່ມີວິນຍານ.—ຕົ້ນເດີມ 2:7
14. ເປັນຫຍັງເຮົາຈຶ່ງຕາຍ?
14 ຖ້າຕອນນັ້ນອາດາມກັບເອວາເຊື່ອຟັງພະເຈົ້າ ພວກເຂົາກໍຈະມີຊີວິດຢູ່ຈົນເຖິງຕອນນີ້. ແຕ່ພວກເຂົາພັດບໍ່ເຊື່ອຟັງພະເຈົ້າເຊິ່ງເປັນການເຮັດບາບ ແລະສຸດທ້າຍກໍຕ້ອງຕາຍ. ບາບເປັນຄືກັບພະຍາດຮ້າຍແຮງທີ່ມະນຸດຄູ່ທຳອິດຖ່າຍທອດມາເຖິງພວກເຮົາທີ່ເປັນລູກຫຼານ. ເຮົາທຸກຄົນຈຶ່ງເກີດມາພ້ອມກັບບາບ ຍ້ອນແນວນີ້ແຫຼະເຮົາຈຶ່ງຕ້ອງຕາຍ. (ໂຣມ 5:12) ແຕ່ພະເຈົ້າບໍ່ຢາກໃຫ້ເປັນແບບນີ້ ພະອົງບໍ່ເຄີຍຢາກໃຫ້ມະນຸດຕາຍ ແລະຄຳພີໄບເບິນກໍເອີ້ນຄວາມຕາຍວ່າ “ສັດຕູ.”—1 ໂກຣິນໂທ 15:26
ຄວາມຈິງເຮັດໃຫ້ເຮົາຫຼຸດພົ້ນຈາກຄວາມເຊື່ອຜິດໆ
15. ເຮົາຮູ້ຄວາມຈິງອັນໃດກ່ຽວກັບຄົນຕາຍ ແລະເຮົາໄດ້ຮັບປະໂຫຍດຫຍັງຈາກການຮູ້ຄວາມຈິງເລື່ອງນີ້?
15 ຄວາມຈິງກ່ຽວກັບຄົນຕາຍເຮັດໃຫ້ເຮົາຫຼຸດພົ້ນຈາກຄວາມເຊື່ອຜິດໆ. ຫຼາຍສາສະໜາສອນວ່າຕາຍແລ້ວມີວິນຍານ ແຕ່ຄຳພີໄບເບິນບໍ່ໄດ້ສອນແບບນັ້ນ. ຄຳພີໄບເບິນສອນວ່າຄົນຕາຍບໍ່ເຈັບປວດ ແລະບໍ່ຮູ້ສຶກຫຍັງເລີຍ. ເຮົາລົມກັບພວກເຂົາບໍ່ໄດ້ແລະພວກເຂົາກໍລົມກັບເຮົາບໍ່ໄດ້. ພວກເຂົາທຳຮ້າຍເຮົາບໍ່ໄດ້ ດັ່ງນັ້ນ ເຮົາບໍ່ຕ້ອງຢ້ານຄົນຕາຍຫຼືຢ້ານຜີ. ນອກຈາກນັ້ນ ເມື່ອເຮົາຮູ້ຄວາມຈິງກ່ຽວກັບສະພາບຂອງຄົນຕາຍ ເຮົາກໍບໍ່ຕ້ອງຫຼົງເຊື່ອແບບຜິດໆອີກຕໍ່ໄປ ເຊັ່ນ: ເຮົາບໍ່ຕ້ອງເສຍເງິນຫຼາຍກັບການເຮັດບຸນໃຫ້ຄົນຕາຍ.
16. ຫຼາຍສາສະໜາສອນຜິດໆແນວໃດກ່ຽວກັບຄົນຕາຍ?
16 ຊາຕານໃຊ້ສາສະໜາປອມເພື່ອຕົວະເຮົາແລະເຮັດໃຫ້ເຮົາເຊື່ອແບບຜິດໆວ່າຄົນຕາຍບໍ່ໄດ້ຕາຍແທ້ໆ. ຕົວຢ່າງເຊັ່ນ: ບາງສາສະໜາສອນວ່າຫຼັງຈາກເຮົາຕາຍ ວິນຍານຈະອອກຈາກຮ່າງແລ້ວໄປຢູ່ບ່ອນໃດບ່ອນໜຶ່ງ. ເຈົ້າເຄີຍຖືກສອນມາແບບນີ້ບໍ? ຊາຕານໃຊ້ເລື່ອງຕົວະຫຼອກລວງຜູ້ຄົນເພື່ອບໍ່ຢາກໃຫ້ຮູ້ຈັກກັບພະເຢໂຫວາ.
17. ຄຳສອນເລື່ອງນະລົກເຮັດໃຫ້ຜູ້ຄົນຮູ້ສຶກແນວໃດຕໍ່ພະເຢໂຫວາ?
17 ສິ່ງທີ່ຫຼາຍສາສະໜາສອນເປັນເລື່ອງທີ່ໜ້າຕົກໃຈ. ຕົວຢ່າງເຊັ່ນ: ບາງສາສະໜາສອນວ່າຄົນຊົ່ວຕ້ອງຖືກທໍລະມານໃນນະລົກຕະຫຼອດໄປ. ຄຳຕົວະແບບນີ້ເປັນການໃສ່ຮ້າຍພະເຢໂຫວາ ເພາະພະອົງບໍ່ເຄີຍຄິດທີ່ຈະໃຫ້ຜູ້ຄົນຕ້ອງທົນທຸກແບບນັ້ນ. (ອ່ານ 1 ໂຢຮັນ 4:8) ຖ້າພໍ່ແມ່ບາງຄົນລົງໂທດລູກໂດຍເອົາມືລູກໄປລົນໄຟ ເຈົ້າຈະຮູ້ສຶກແນວໃດຕໍ່ລາວ? ເຈົ້າຄືຊິຮູ້ສຶກວ່າລາວໂຫດຮ້າຍແລະບໍ່ຢາກຮູ້ຈັກລາວ. ຊາຕານມັນກໍຢາກໃຫ້ເຮົາຮູ້ສຶກແບບນີ້ຕໍ່ພະເຢໂຫວາ!
18. ເປັນຫຍັງເຮົາບໍ່ຕ້ອງຢ້ານຜີຫຼືວິນຍານຄົນຕາຍ?
18 ບາງສາສະໜາສອນວ່າເມື່ອຄົນເຮົາຕາຍກໍຈະກາຍເປັນວິນຍານຫຼືເປັນຜີ ດັ່ງນັ້ນຈຶ່ງຕ້ອງເຄົາລົບບູຊາຄົນຕາຍ. ບາງຄົນເຮັດແບບນັ້ນຍ້ອນຮັກແລະນັບຖືຄົນທີ່ຕາຍໄປ ສ່ວນຄົນອື່ນກໍຢ້ານເພາະຄິດວ່າວິນຍານນັ້ນອາດຈະມາຊ່ວຍເຫຼືອຫຼືມາທຳຮ້າຍກໍໄດ້. ຄົນສ່ວນຫຼາຍເຊື່ອຄຳຕົວະຫຼອກລວງນີ້ກໍເລີຍຂາບໄຫວ້ບູຊາຄົນຕາຍແທນທີ່ຈະນະມັດສະການພະເຢໂຫວາ. ແຕ່ຢ່າລືມວ່າຄົນຕາຍບໍ່ມີຄວາມຮູ້ສຶກແລະບໍ່ຮັບຮູ້ຫຍັງເລີຍ ດັ່ງນັ້ນ ແທນທີ່ຈະຢ້ານຜີແລະຂາບໄຫວ້ບູຊາຄົນຕາຍ ເຮົາຄວນຢຳເກງແລະນະມັດສະການພະເຢໂຫວາ ເພາະພະອົງເປັນຜູ້ສ້າງເຮົາແລະເປັນພະເຈົ້າທ່ຽງແທ້ອົງດຽວເທົ່ານັ້ນ.—ພະນິມິດ 4:11
19. ການຮູ້ຄວາມຈິງກ່ຽວກັບສະພາບຂອງຄົນຕາຍຊ່ວຍເຮົາແນວໃດ?
19 ການຮູ້ຄວາມຈິງກ່ຽວກັບສະພາບຂອງຄົນຕາຍເຮັດໃຫ້ເຮົາຫຼຸດພົ້ນຈາກຄຳສອນຜິດໆ ແລະຄວາມຈິງເລື່ອງນີ້ຍັງຊ່ວຍເຮົາໃຫ້ເຂົ້າໃຈຄຳສັນຍາທີ່ດີເລີດຂອງພະເຢໂຫວາກ່ຽວກັບຊີວິດແລະອະນາຄົດຂອງເຮົານຳອີກ.
20. ເຮົາຈະຮຽນຫຍັງໃນບົດຕໍ່ໄປ?
20 ດົນນານມາແລ້ວ ຜູ້ຮັບໃຊ້ຄົນໜຶ່ງຂອງພະເຈົ້າຊື່ໂຢບຖາມວ່າ: “ຖ້າຄົນເຮົາຕາຍແລ້ວຈະມີຊີວິດອີກໄດ້ບໍ?” (ໂຢບ 14:14, ລ.ມ.) ເປັນໄປໄດ້ບໍທີ່ຄົນຕາຍຈະກັບມາມີຊີວິດອີກ? ສິ່ງທີ່ພະເຈົ້າບອກເຮົາໃນຄຳພີໄບເບິນເປັນຕາຕື່ນເຕັ້ນຫຼາຍ. ເຮົາຈະຮຽນເລື່ອງນີ້ໃນບົດຕໍ່ໄປ.
a ຫຼາຍຄົນເຊື່ອວ່າເມື່ອເຮົາຕາຍແລ້ວກໍກາຍເປັນຜີຫຼືເປັນວິນຍານ ແຕ່ຄຳພີໄບເບິນບໍ່ໄດ້ສອນແບບນັ້ນ. ເບິ່ງຄຳອະທິບາຍເພີ່ມເຕີມ 17 ແລະ 18
-
-
ຄົນຕາຍຈະກັບມາມີຊີວິດອີກ!ຮຽນຄຳພີໄບເບິນແລ້ວໄດ້ຫຍັງ?
-
-
ບົດທີ 7
ຄົນຕາຍຈະກັບມາມີຊີວິດອີກ!
1-3. ເຮົາທຸກຄົນຄືກັບກຳລັງຕິດຄຸກຫຍັງຢູ່? ພະເຢໂຫວາສັນຍາວ່າຈະເຮັດຫຍັງ?
ສົມມຸດວ່າເຈົ້າຖືກຕັດສິນໃຫ້ຕິດຄຸກຕະຫຼອດຊີວິດທັງໆທີ່ເຈົ້າບໍ່ໄດ້ເຮັດຫຍັງຜິດ. ເຈົ້າບໍ່ສາມາດເຮັດຫຍັງໄດ້ເພື່ອຊ່ວຍຕົວເອງໃຫ້ພົ້ນໂທດແລະບໍ່ມີຫວັງເລີຍວ່າຈະຖືກປ່ອຍຕົວ. ແຕ່ໃນຂະນະທີ່ໝົດຫວັງຢູ່ນັ້ນກໍມີຄົນໜຶ່ງມາຊ່ວຍເຈົ້າ ລາວມີອຳນາດທີ່ຈະຊ່ວຍເຈົ້າໃຫ້ພົ້ນໂທດໄດ້ ແລະລາວກໍສັນຍາວ່າຈະຊ່ວຍເຈົ້າແທ້ໆ! ເຈົ້າຈະຮູ້ສຶກແນວໃດ?
2 ເຮົາທຸກຄົນຄືກັບກຳລັງຕິດຄຸກຢູ່. ຄຸກທີ່ເວົ້າເຖິງນີ້ກໍແມ່ນຄວາມຕາຍ. ບໍ່ມີທາງທີ່ເຮົາຈະອອກໄປຈາກຄຸກນີ້ໄດ້ເຖິງວ່າຈະພະຍາຍາມຫຼາຍສ່ຳໃດກໍຕາມ. ແຕ່ພະເຢໂຫວາມີອຳນາດປົດປ່ອຍເຮົາຈາກຄວາມຕາຍໄດ້ ແລະພະອົງສັນຍາວ່າ “ສັດຕູໂຕສຸດທ້າຍທີ່ຈະຖືກທຳລາຍກໍແມ່ນຄວາມຕາຍ.”—1 ໂກຣິນໂທ 15:26
3 ລອງຄິດເບິ່ງວ່າເຈົ້າຈະຮູ້ສຶກໂລ່ງໃຈສ່ຳໃດຖ້າບໍ່ຕ້ອງຕາຍ! ພະເຢໂຫວາບໍ່ພຽງແຕ່ຈະທຳລາຍຄວາມຕາຍເທົ່ານັ້ນ ແຕ່ພະອົງຍັງຈະເຮັດໃຫ້ຄົນທີ່ຕາຍໄປແລ້ວກັບມາມີຊີວິດອີກ. ພະເຢໂຫວາສັນຍາວ່າຄົນຕາຍຈະກັບມາມີຊີວິດອີກ. ຖ້າເລື່ອງນີ້ເກີດຂຶ້ນແທ້ຈະດີສ່ຳໃດ. (ເອຊາອີ 26:19) ນີ້ແມ່ນສິ່ງທີ່ຄຳພີໄບເບິນເອີ້ນວ່າການຄືນມາຈາກຕາຍ.
ເມື່ອຄົນທີ່ເຮົາຮັກຕາຍຈາກໄປ
4. (ກ) ເຮົາຈະໄດ້ກຳລັງໃຈຈາກໃສເມື່ອຄົນທີ່ເຮົາຮັກຕາຍ? (ຂ) ມີໃຜແດ່ທີ່ເປັນໝູ່ຮັກຂອງພະເຢຊູ?
4 ເມື່ອຄົນໃນຄອບຄົວຫຼືໝູ່ສະໜິດຂອງເຮົາຕາຍ ເຮົາໂສກເສົ້າເສຍໃຈຈົນທົນບໍ່ໄດ້. ເຮົາອາດຮູ້ສຶກໝົດຫວັງທີ່ຊ່ວຍຫຍັງລາວບໍ່ໄດ້ເລີຍ. ເຮົາບໍ່ສາມາດຊ່ວຍລາວໃຫ້ກັບມາມີຊີວິດອີກ. ແຕ່ຄຳພີໄບເບິນໃຫ້ກຳລັງໃຈເຮົາ. (ອ່ານ 2 ໂກຣິນໂທ 1:3, 4) ໃຫ້ເຮົາມາເບິ່ງຕົວຢ່າງໜຶ່ງ ແລ້ວເຮົາຈະເຫັນວ່າພະເຢໂຫວາແລະພະເຢຊູຕ້ອງການຫຼາຍແທ້ໆທີ່ຈະໃຫ້ຄົນທີ່ເຮົາຮັກເຊິ່ງຕາຍໄປແລ້ວກັບມາມີຊີວິດອີກ. ຕອນທີ່ພະເຢຊູຢູ່ໃນໂລກ ເພິ່ນມັກໄປຫາລາຊະໂຣ ມາທາກັບມາຣີ ທັງສາມເອື້ອຍນ້ອງເປັນໝູ່ຮັກຂອງພະເຢຊູ. ຄຳພີໄບເບິນບອກວ່າ: “ພະເຢຊູຮັກມາທາກັບມາຣີລວມທັງລາຊະໂຣນຳ.” ແລ້ວມື້ໜຶ່ງລາຊະໂຣກໍຕາຍ.—ໂຢຮັນ 11:3-5
5, 6. (ກ) ພະເຢຊູຮູ້ສຶກແນວໃດເມື່ອເຫັນຄົນໃນຄອບຄົວແລະໝູ່ເພື່ອນຂອງລາຊະໂຣຮ້ອງໄຫ້ເສຍໃຈຍ້ອນລາວຕາຍ? (ຂ) ເປັນຫຍັງການທີ່ຮູ້ວ່າພະເຢຊູຮູ້ສຶກໂສກເສົ້າເມື່ອມີຄົນຕາຍຈຶ່ງເປັນເລື່ອງທີ່ໃຫ້ກຳລັງໃຈເຮົາ?
5 ພະເຢຊູໄປຫາມາທາແລະມາຣີເພື່ອປອບໃຈພວກເຂົາ. ເມື່ອມາທາໄດ້ຍິນວ່າພະເຢຊູກຳລັງມາ ລາວກໍອອກໄປຫາເພິ່ນຢູ່ນອກເມືອງ ມາທາດີໃຈທີ່ໄດ້ພົບພະເຢຊູ. ແຕ່ລາວເວົ້າກັບເພິ່ນວ່າ: “ຖ້າທ່ານຢູ່ທີ່ນີ້ ລາວຄືຊິບໍ່ຕາຍ.” ມາທາຄິດວ່າພະເຢຊູມາຊ້າເກີນໄປ ຫຼັງຈາກນັ້ນພະເຢຊູກໍເຫັນມາຣີຮ້ອງໄຫ້. ເມື່ອເຫັນວ່າທຸກຄົນທີ່ຢູ່ຫັ້ນໂສກເສົ້າເສຍໃຈ ເພິ່ນກໍຮູ້ສຶກສະເທືອນໃຈ ເຈັບປວດໃຈ ແລະຮ້ອງໄຫ້ຄືກັນ. (ໂຢຮັນ 11:21, 33, 35) ເລື່ອງນີ້ເຮັດໃຫ້ເຫັນວ່າພະເຢຊູຮູ້ສຶກແບບດຽວກັບເຮົາຕອນທີ່ສູນເສຍຄົນທີ່ຮັກ.
6 ການທີ່ພະເຢຊູຮູ້ສຶກໂສກເສົ້າເຮັດໃຫ້ເຮົາໄດ້ກຳລັງໃຈ ເພາະວ່າພະເຢຊູຄືກັບພະເຢໂຫວາພໍ່ຂອງເພິ່ນ. ນີ້ເຮັດໃຫ້ເຮົາຮູ້ວ່າພະເຢໂຫວາກໍຮູ້ສຶກໂສກເສົ້າແລະກຽດຊັງຄວາມຕາຍຄືກັນ. (ໂຢຮັນ 14:9) ພະເຢໂຫວາມີລິດເດດທີ່ຈະທຳລາຍຄວາມຕາຍໃຫ້ໝົດໄປຕະຫຼອດການ ແລະອີກບໍ່ດົນພະອົງຈະເຮັດສິ່ງນັ້ນ.
“ລາຊະໂຣ ອອກມາ!”
7, 8. ເປັນຫຍັງມາທາບໍ່ຢາກໃຫ້ກິ້ງຫີນອອກຈາກອຸໂມງໄວ້ສົບຂອງລາຊະໂຣ? ແຕ່ພະເຢຊູເຮັດຫຍັງ?
7 ເມື່ອພະເຢຊູມາຮອດອຸໂມງໄວ້ສົບຂອງລາຊະໂຣເຊິ່ງມີຫີນໃຫຍ່ປິດປາກອຸໂມງໄວ້ ພະເຢຊູຈຶ່ງບອກໃຫ້ “ກິ້ງຫີນອອກໄປ.” ແຕ່ມາທາບໍ່ຢາກໃຫ້ເຮັດແບບນັ້ນ ເພາະສົບຂອງລາຊະໂຣຢູ່ໃນອຸໂມງໄດ້ 4 ມື້ແລ້ວ. (ໂຢຮັນ 11:39) ລາວບໍ່ຮູ້ວ່າພະເຢຊູຈະເຮັດຫຍັງເພື່ອຊ່ວຍລາຊະໂຣ.
ລອງນຶກພາບເບິ່ງວ່າຄອບຄົວແລະໝູ່ເພື່ອນຂອງລາຊະໂຣຈະດີໃຈຫຼາຍສ່ຳໃດທີ່ລາວຖືກປຸກໃຫ້ຄືນມາຈາກຕາຍ!—ໂຢຮັນ 11:38-44
8 ຫຼັງຈາກກິ້ງຫີນອອກໄປແລ້ວ ພະເຢຊູຮ້ອງບອກລາຊະໂຣວ່າ “ອອກມາ!” ແລ້ວມາທາກັບມາຣີກໍເຫັນສິ່ງທີ່ເຮັດໃຫ້ຕົກຕະລຶງ. “ລາຊະໂຣທີ່ຕາຍໄປແລ້ວກໍຍ່າງອອກມາທັງໆທີ່ຍັງມີຜ້າພັນມືພັນຕີນຢູ່ ແລະມີຜ້າພັນໜ້າຄືກັນ.” (ໂຢຮັນ 11:43, 44) ລາຊະໂຣກັບມາມີຊີວິດອີກ! ພະເຢຊູປຸກລາຊະໂຣໃຫ້ຄືນມາຈາກຕາຍ. ລາວໄດ້ກັບມາຢູ່ກັບຄອບຄົວແລະໝູ່ເພື່ອນອີກເທື່ອໜຶ່ງ. ພວກເຂົາສາມາດເວົ້າລົມແລະກອດລາຊະໂຣໄດ້. ນີ້ເປັນເລື່ອງທີ່ມະຫັດສະຈັນແທ້ໆ!
“ນາງນ້ອຍ ຂ້ອຍບອກໃຫ້ເຈົ້າລຸກຂຶ້ນ!”
9, 10. (ກ) ໃຜໃຫ້ລິດເດດພະເຢຊູປຸກຄົນໃຫ້ຄືນມາຈາກຕາຍ? (ຂ) ເປັນຫຍັງການອ່ານເລື່ອງຂອງຄົນທີ່ຖືກປຸກໃຫ້ຄືນມາຈາກຕາຍຈຶ່ງເປັນປະໂຫຍດຕໍ່ເຮົາ?
9 ພະເຢຊູເຮັດໃຫ້ຄົນຄືນມາຈາກຕາຍດ້ວຍລິດເດດຂອງເພິ່ນເອງບໍ? ບໍ່ແມ່ນ ກ່ອນທີ່ພະເຢຊູຈະປຸກລາຊະໂຣ ເພິ່ນອະທິດຖານເຖິງພະເຢໂຫວາ ແລ້ວພະເຢໂຫວາກໍໃຫ້ລິດເດດເພິ່ນປຸກລາຊະໂຣ. (ອ່ານໂຢຮັນ 11:41, 42) ລາຊະໂຣບໍ່ແມ່ນຄົນດຽວທີ່ຖືກປຸກໃຫ້ຄືນມາຈາກຕາຍ. ຄຳພີໄບເບິນບອກເຮົາກ່ຽວກັບເລື່ອງຂອງເດັກນ້ອຍຜູ້ຍິງຄົນໜຶ່ງອາຍຸ 12 ປີທີ່ເຈັບປ່ວຍໜັກ. ຢາອີໂຣພໍ່ຂອງເດັກນ້ອຍຄົນນີ້ຮູ້ສຶກໝົດຫວັງຈຶ່ງໄປຂໍໃຫ້ພະເຢຊູມາຊ່ວຍປິ່ນປົວລູກຄົນດຽວຂອງລາວ. ຕອນທີ່ຢາອີໂຣກຳລັງເວົ້າກັບພະເຢຊູກໍມີຄົນມາບອກລາວວ່າ: “ລູກສາວຂອງເຈົ້າຕາຍແລ້ວ ບໍ່ຕ້ອງລົບກວນອາຈານແລ້ວ.” ແຕ່ພະເຢຊູບອກຢາອີໂຣວ່າ: “ບໍ່ຕ້ອງຢ້ານ ຂໍໃຫ້ສະແດງຄວາມເຊື່ອເທົ່ານັ້ນ ລູກສາວຂອງເຈົ້າຈະບໍ່ເປັນຫຍັງ.” ຈາກນັ້ນ ເພິ່ນກັບຢາອີໂຣກໍເດີນທາງໄປນຳກັນ. ຕອນທີ່ໃກ້ຈະຮອດເຮືອນ ພະເຢຊູກໍເຫັນແລະໄດ້ຍິນຄົນຮ້ອງໄຫ້ ເພິ່ນຈຶ່ງບອກພວກເຂົາວ່າ: “ຢ່າຮ້ອງໄຫ້ເລີຍ ເດັກນ້ອຍຄົນນີ້ບໍ່ໄດ້ຕາຍ ແຕ່ນອນຫຼັບຢູ່.” ພໍ່ແມ່ຂອງເດັກນ້ອຍຄືຊິສົງໄສວ່າທີ່ພະເຢຊູເວົ້າໝາຍຄວາມວ່າແນວໃດ ແລ້ວພະເຢຊູກໍບອກໃຫ້ທຸກຄົນອອກໄປແລະໃຫ້ພໍ່ແມ່ຂອງເດັກນ້ອຍເຂົ້າມາໃນຫ້ອງທີ່ມີສົບຢູ່. ຈາກນັ້ນ ພະເຢຊູກໍຈັບມືເດັກນ້ອຍຄ່ອຍໆແລະເວົ້າວ່າ: “ນາງນ້ອຍ ຂ້ອຍບອກໃຫ້ເຈົ້າລຸກຂຶ້ນ!” ຂໍໃຫ້ນຶກພາບວ່າພໍ່ແມ່ຂອງລາວຈະດີໃຈສ່ຳໃດທີ່ເຫັນລູກລຸກຂຶ້ນຍ່າງ! ພະເຢຊູປຸກລູກຂອງພວກເຂົາໃຫ້ຄືນມາຈາກຕາຍ. (ມາຣະໂກ 5:22-24, 35-42; ລູກາ 8:49-56) ຕັ້ງແຕ່ນັ້ນມາ ທຸກຄັ້ງທີ່ເຫັນລູກສາວຜູ້ນີ້ ພວກເຂົາກໍຄິດເຖິງສິ່ງທີ່ພະເຢໂຫວາໃຫ້ພະເຢຊູເຮັດເພື່ອພວກເຂົາ.a
10 ຄົນທີ່ພະເຢຊູປຸກໃຫ້ຄືນມາຈາກຕາຍໃນຕອນນັ້ນ ໃນທີ່ສຸດກໍຕ້ອງຕາຍອີກ. ແຕ່ເຖິງຢ່າງນັ້ນການໄດ້ອ່ານເລື່ອງຂອງພວກເຂົາກໍມີປະໂຫຍດຫຼາຍເພາະເລື່ອງນີ້ໃຫ້ຄວາມຫວັງແທ້ກັບເຮົາ ເຮັດໃຫ້ເຮົາຮູ້ວ່າພະເຢໂຫວາຕ້ອງການປຸກຄົນຕາຍໃຫ້ຄືນມາມີຊີວິດອີກ ແລະໃນອະນາຄົດພະອົງຈະເຮັດແບບນັ້ນແນ່ນອນ.
ສິ່ງທີ່ເຮົາໄດ້ຮຽນຈາກເລື່ອງການຄືນມາຈາກຕາຍ
ອັກຄະສາວົກເປໂຕປຸກຍິງຄລິດສະຕຽນຊື່ໂດຣະກາໃຫ້ຄືນມາຈາກຕາຍ.—ກິດຈະການ 9:36-42
ເອລີຢາປຸກລູກຊາຍຄົນດຽວຂອງແມ່ໝ້າຍໃຫ້ຄືນມາຈາກຕາຍ.—1 ກະສັດ 17:17-24
11. ຜູ້ເທສະໜາປ່າວປະກາດ 9:5 ບອກຄວາມຈິງຫຍັງກ່ຽວກັບສະພາບຂອງລາຊະໂຣເມື່ອລາວຕາຍ?
11 ຄຳພີໄບເບິນບອກຢ່າງຈະແຈ້ງວ່າ “ຄົນຕາຍແລ້ວບໍ່ຮູ້ຈັກສິ່ງໃດ.” ແລະຕອນທີ່ລາຊະໂຣຕາຍກໍເປັນແບບນັ້ນແທ້ໆ. (ຜູ້ເທສະໜາປ່າວປະກາດ 9:5) ລາວເປັນຄືຄົນນອນຫຼັບຄືກັບທີ່ພະເຢຊູບອກ. (ໂຢຮັນ 11:11) ຕອນທີ່ລາຊະໂຣຢູ່ໃນອຸໂມງຝັງສົບ ລາວ “ບໍ່ຮູ້ຈັກສິ່ງໃດ.”
12. ເປັນຫຍັງເຮົາໝັ້ນໃຈວ່າເລື່ອງທີ່ລາຊະໂຣຖືກປຸກໃຫ້ຄືນມາຈາກຕາຍເປັນເລື່ອງທີ່ເກີດຂຶ້ນແທ້ໆ?
12 ການທີ່ລາຊະໂຣກັບມາມີຊີວິດອີກພິສູດວ່າການຄືນມາຈາກຕາຍເປັນເລື່ອງທີ່ເກີດຂຶ້ນແທ້. ຕອນທີ່ພະເຢຊູປຸກລາຊະໂຣໃຫ້ຄືນມາຈາກຕາຍມີຫຼາຍຄົນເຫັນເຫດການນັ້ນ ແມ່ນແຕ່ສັດຕູຂອງພະເຢຊູກໍຮູ້ວ່າເພິ່ນເຮັດການອັດສະຈັນນີ້. (ໂຢຮັນ 11:47) ນອກຈາກນັ້ນ ມີຫຼາຍຄົນພາກັນໄປເບິ່ງແລະລົມກັບລາຊະໂຣ. ຜົນກໍຄືພວກເຂົາເຊື່ອວ່າພະເຢຊູເປັນຜູ້ທີ່ພະເຈົ້າສົ່ງມາ. ແຕ່ພວກສັດຕູບໍ່ມັກ ພວກເຂົາຈຶ່ງວາງແຜນຈະຂ້າທັງພະເຢຊູແລະລາຊະໂຣ.—ໂຢຮັນ 11:53; 12:9-11
13. ເປັນຫຍັງເຮົາໝັ້ນໃຈໄດ້ວ່າພະເຢໂຫວາຈະປຸກຄົນໃຫ້ຄືນມາຈາກຕາຍແທ້ໆ?
13 ພະເຢຊູບອກວ່າທຸກຄົນທີ່ຢູ່ໃນ “ອຸໂມງລະນຶກ” ຈະຖືກປຸກໃຫ້ຄືນມາຈາກຕາຍ. (ໂຢຮັນ 5:28, ໄຂເງື່ອນ) ນີ້ໝາຍຄວາມວ່າຄົນຕາຍທຸກຄົນທີ່ຢູ່ໃນຄວາມຊົງຈຳຂອງພະເຢໂຫວາຈະກັບມາມີຊີວິດອີກ. ແຕ່ການທີ່ພະເຢໂຫວາຈະປຸກຜູ້ໃດຜູ້ໜຶ່ງໃຫ້ຄືນມາເປັນຄົນເກົ່າ ພະອົງຕ້ອງຈື່ລາຍລະອຽດທຸກຢ່າງກ່ຽວກັບຄົນນັ້ນໄດ້. ແລ້ວພະອົງຈະເຮັດແບບນັ້ນໄດ້ແທ້ໆບໍ? ໄດ້ແທ້. ຂະໜາດເອກະພົບຂອງເຮົາທີ່ມີດວງດາວຫຼາຍພັນລ້ານດວງ ຄຳພີໄບເບິນກໍຍັງບອກວ່າພະເຢໂຫວາຮູ້ຊື່ດວງດາວເຫຼົ່ານັ້ນທັງໝົດ. (ອ່ານເອຊາອີ 40:26) ຖ້າພະເຈົ້າຈື່ຊື່ດາວແຕ່ລະດວງໄດ້ ກໍບໍ່ຍາກທີ່ພະອົງຈະຈື່ລາຍລະອຽດທຸກຢ່າງຂອງຄົນທີ່ພະອົງຈະປຸກໃຫ້ຄືນມາຈາກຕາຍ. ນອກຈາກນັ້ນ ເຮົາຮູ້ວ່າພະເຢໂຫວາມີລິດເດດທີ່ຈະເຮັດໃຫ້ຄົນຕາຍກັບມາມີຊີວິດອີກແທ້ໆ ເພາະພະອົງເປັນຜູ້ສ້າງທຸກສິ່ງທຸກຢ່າງ.
14, 15. ຄຳເວົ້າຂອງໂຢບເຮັດໃຫ້ຮູ້ວ່າພະເຢໂຫວາຕ້ອງການເຮັດຫຍັງ?
14 ໂຢບຊາຍທີ່ສັດຊື່ຕໍ່ພະເຈົ້າເຊື່ອເລື່ອງການຄືນມາຈາກຕາຍ. ລາວຖາມວ່າ: “ຖ້າຄົນເຮົາຕາຍແລ້ວຈະມີຊີວິດອີກໄດ້ຫຼື?” ແລ້ວລາວກໍເວົ້າກັບພະເຢໂຫວາຕໍ່ໄປວ່າ: “ພະອົງຈະເອີ້ນແລະຂ້ອຍຈະຕອບ. ພະອົງຄິດເຖິງຄົນທີ່ພະອົງສ້າງມາກເຫຼືອເກີນ.” ໂຢບຮູ້ວ່າພະເຢໂຫວາລໍຖ້າມື້ທີ່ພະອົງຈະປຸກຄົນຕາຍໃຫ້ກັບມາມີຊີວິດອີກ.—ໂຢບ 14:13-15, ລ.ມ.
15 ເຈົ້າຮູ້ສຶກແນວໃດກ່ຽວກັບຄວາມຫວັງເລື່ອງການຄືນມາຈາກຕາຍ? ເຈົ້າອາດສົງໄສວ່າ ‘ຄັນຊັ້ນຄົນໃນຄອບຄົວແລະໝູ່ເພື່ອນຂອງຂ້ອຍທີ່ຕາຍໄປແລ້ວກໍຈະຖືກປຸກໃຫ້ຄືນມານຳບໍ?’ ເປັນເລື່ອງທີ່ໃຫ້ກຳລັງໃຈຫຼາຍທີ່ຮູ້ວ່າພະເຢໂຫວາຕ້ອງການແທ້ໆທີ່ຈະໃຫ້ຄົນຕາຍກັບມາມີຊີວິດອີກ. ໃຫ້ເຮົາມາເບິ່ງໃນຄຳພີໄບເບິນວ່າຄົນທີ່ຄືນມາຈາກຕາຍຈະຢູ່ໃສ ແລະມີໃຜແດ່ຈະຖືກປຸກໃຫ້ຄືນມາຈາກຕາຍ.
ພວກເຂົາ “ຈະໄດ້ຍິນສຽງເພິ່ນ ແລະຈະອອກມາ”
16. ຄົນທີ່ຖືກປຸກໃຫ້ຄືນມາຈາກຕາຍຈະຢູ່ໃສແລະຈະມີຊີວິດແບບໃດ?
16 ໃນອະດີດ ຄົນທີ່ຖືກປຸກໃຫ້ຄືນມາຈາກຕາຍໄດ້ກັບມາມີຊີວິດຢູ່ໃນໂລກນີ້ນຳຄອບຄົວແລະໝູ່ເພື່ອນຂອງພວກເຂົາ ແລະໃນອະນາຄົດຄົນທີ່ຖືກປຸກກໍຈະໄດ້ຢູ່ໃນໂລກນີ້ຄືກັນ. ແຕ່ຈະຢູ່ໃນສະພາບທີ່ດີກວ່ານີ້ຫຼາຍ. ຍ້ອນຫຍັງ? ຍ້ອນພວກເຂົາຈະມີໂອກາດທີ່ຈະມີຊີວິດຕະຫຼອດໄປ ບໍ່ຕ້ອງເຈັບປ່ວຍແລະຕາຍຄືກັບທີ່ເປັນຢູ່ໃນທຸກມື້ນີ້. ພວກເຂົາຈະໄດ້ຢູ່ໂລກທີ່ບໍ່ມີສົງຄາມແລະອາດຊະຍາກຳ.
17. ໃຜຈະຖືກປຸກໃຫ້ຄືນມາຈາກຕາຍ?
17 ໃຜຈະຖືກປຸກໃຫ້ຄືນມາຈາກຕາຍ? ພະເຢຊູບອກວ່າ “ທຸກຄົນເຊິ່ງຢູ່ໃນອຸໂມງຝັງສົບຈະໄດ້ຍິນສຽງເພິ່ນ ແລະຈະອອກມາ.” (ໂຢຮັນ 5:28, 29) ແລະພະນິມິດບົດ 20:13 ບອກວ່າ: “ທະເລໄດ້ປ່ອຍຄົນທີ່ຕາຍໃນທະເລ ຄວາມຕາຍແລະຫຼຸມຝັງສົບກໍປ່ອຍຄົນຕາຍທີ່ຢູ່ໃນນັ້ນ.” ຂໍ້ນີ້ໝາຍຄວາມວ່າຫຼາຍພັນລ້ານຄົນທີ່ຕາຍໄປແລ້ວຈະກັບມາມີຊີວິດອີກ. ອັກຄະສາວົກໂປໂລຍັງບອກວ່າ “ທັງຄົນດີແລະຄົນຊົ່ວ” ຈະຖືກປຸກໃຫ້ຄືນມາຈາກຕາຍ. (ອ່ານກິດຈະການ 24:15) ນີ້ໝາຍຄວາມວ່າແນວໃດ?
ຄົນຕາຍຈະຖືກປຸກໃຫ້ກັບມາມີຊີວິດອີກເພື່ອຢູ່ກັບຄົນທີ່ພວກເຂົາຮັກໃນອຸທິຍານ
18. “ຄົນດີ” ທີ່ຈະຖືກປຸກໃຫ້ຄືນມາຈາກຕາຍໝາຍເຖິງໃຜແດ່?
18 “ຄົນດີ” ໃນພະຄຳພີຂໍ້ນີ້ໝາຍລວມເຖິງຄົນທີ່ເຮັດຕາມມາດຕະຖານຂອງພະເຢໂຫວາ ແລະຮັບໃຊ້ພະອົງຢ່າງສັດຊື່ທັງໃນສະໄໝກ່ອນແລະສະໄໝນີ້. ຕົວຢ່າງເຊັ່ນ: ໂນອາ ອັບຣາຮາມ ຊາຣາ ໂມເຊ ຣຸດ ເອເຊເທຣ ເປັນຄົນທີ່ຮັບໃຊ້ພະເຢໂຫວາຢ່າງສັດຊື່ກ່ອນທີ່ພະເຢຊູຈະມາໃນໂລກ. ພວກເຂົາຈະຖືກປຸກໃຫ້ຄືນມາຢູ່ໃນໂລກອີກ. ເຈົ້າອ່ານເລື່ອງຂອງບາງຄົນໄດ້ໃນປຶ້ມເຮັບເຣີບົດ 11. ແລ້ວຄົນທີ່ຮັບໃຊ້ພະເຢໂຫວາຢ່າງສັດຊື່ໃນສະໄໝນີ້ທີ່ຕາຍໄປເດ? ພວກເຂົາກໍຢູ່ໃນກຸ່ມ “ຄົນດີ” ທີ່ຈະຖືກປຸກໃຫ້ຄືນມາຈາກຕາຍຄືກັນ.
19. ໃຜແມ່ນ “ຄົນຊົ່ວ” ທີ່ຈະຖືກປຸກ? ພວກເຂົາໄດ້ຮັບໂອກາດຫຍັງຈາກພະເຢໂຫວາ?
19 “ຄົນຊົ່ວ” ໃນພະຄຳພີຂໍ້ນີ້ໝາຍລວມເຖິງຫຼາຍພັນລ້ານຄົນທີ່ຍັງບໍ່ໄດ້ເຮັດດີຕາມມາດຕະຖານຂອງພະເຢໂຫວາ ຍ້ອນພວກເຂົາຍັງບໍ່ມີໂອກາດຮູ້ຈັກພະອົງ. ເຖິງວ່າພວກເຂົາຕາຍໄປແລ້ວ ພະເຢໂຫວາກໍບໍ່ລືມພວກເຂົາ. ພະອົງຈະປຸກພວກເຂົາໃຫ້ກັບມາມີຊີວິດອີກ ເພື່ອພວກເຂົາຈະມີໂອກາດໄດ້ຮຽນຮູ້ເລື່ອງພະເຢໂຫວາແລະຮັບໃຊ້ພະອົງ.
20. ເປັນຫຍັງບໍ່ແມ່ນທຸກຄົນຈະຖືກປຸກ?
20 ນີ້ໝາຍຄວາມວ່າຄົນຕາຍທຸກຄົນຈະຖືກປຸກໃຫ້ຄືນມາບໍ? ບໍ່ແມ່ນ. ພະເຢຊູບອກວ່າຈະມີບາງຄົນທີ່ຈະບໍ່ຖືກປຸກໃຫ້ຄືນມາຈາກຕາຍ. ຄົນທີ່ຖືກຕັດສິນວ່າເປັນຄົນບາບທີ່ບໍ່ກັບໃຈຈະບໍ່ຖືກປຸກ. (ລູກາ 12:5) ແລ້ວໃຜຈະເປັນຜູ້ຕັດສິນວ່າຜູ້ໃດແມ່ນຄົນກຸ່ມນີ້ທີ່ຈະບໍ່ຖືກປຸກ? ພະເຢໂຫວາເປັນຜູ້ຕັດສິນ ພະອົງເປັນຜູ້ຕັດສິນອົງສູງສຸດ. ສ່ວນເລື່ອງການ “ຕັດສິນທັງຄົນເປັນແລະຄົນຕາຍ” ພະເຢໂຫວາໃຫ້ອຳນາດພະເຢຊູໃນການຕັດສິນ.—ກິດຈະການ 10:42; ເບິ່ງຄຳອະທິບາຍເພີ່ມເຕີມ 19
ຖືກປຸກໃຫ້ໄປສະຫວັນ
21, 22. (ກ) ຄົນທີ່ຖືກປຸກໃຫ້ໄປສະຫວັນຈະມີຮ່າງກາຍແບບໃດ? (ຂ) ໃຜເປັນຄົນທຳອິດທີ່ຖືກປຸກໃຫ້ໄປສະຫວັນ?
21 ຄຳພີໄບເບິນບອກເຮົາວ່າຈະມີບາງຄົນໄດ້ໄປສະຫວັນ. ຄົນນັ້ນຈະຖືກປຸກໃຫ້ມີຊີວິດໃໝ່ ບໍ່ແມ່ນຮ່າງກາຍແບບມະນຸດ ແຕ່ເປັນຮ່າງກາຍສຳລັບສະຫວັນທີ່ບາງຄົນເອີ້ນວ່າກາຍທິບເຊິ່ງເປັນກາຍທີ່ເຮົາເບິ່ງບໍ່ເຫັນ.
22 ພະເຢຊູເປັນຄົນທຳອິດທີ່ຖືກປຸກໃຫ້ໄປສະຫວັນ. (ໂຢຮັນ 3:13) ຫຼັງຈາກທີ່ຕາຍໄດ້ 3 ມື້ ພະເຢໂຫວາກໍປຸກເພິ່ນໃຫ້ຄືນມາຈາກຕາຍ. (ກິດຈະການ 13:34, 35) ພະເຢຊູບໍ່ໄດ້ຖືກປຸກໃຫ້ຄືນມາເພື່ອມີຮ່າງກາຍແບບມະນຸດ. ອັກຄະສາວົກເປໂຕບອກວ່າພະເຢຊູ “ຖືກຂ້າໃນຮ່າງກາຍມະນຸດ ແຕ່ໄດ້ຊີວິດໃໝ່ໃນຮ່າງກາຍສຳລັບສະຫວັນ.” (1 ເປໂຕ 3:18) ພະເຢຊູກັບມາມີຊີວິດເປັນຜູ້ທີ່ມີລິດເດດຫຼາຍໃນຮ່າງກາຍສຳລັບສະຫວັນ. (1 ໂກຣິນໂທ 15:3-6) ແລະຄຳພີໄບເບິນຍັງບອກວ່າມີຄົນອື່ນອີກທີ່ຈະມີຮ່າງກາຍສຳລັບສະຫວັນຄືກັບພະເຢຊູ.
23, 24. ໃຜຈະຖືກປຸກໃຫ້ໄປຢູ່ກັບພະເຢຊູໃນສະຫວັນ ແລະຈະມີຈຳນວນເທົ່າໃດ?
23 ບໍ່ດົນກ່ອນພະເຢຊູຈະຕາຍ ເພິ່ນບອກລູກສິດທີ່ສັດຊື່ວ່າ: “ຂ້ອຍກຳລັງຈະໄປກຽມບ່ອນຢູ່ໃຫ້ພວກເຈົ້າ.” (ໂຢຮັນ 14:2) ນີ້ໝາຍຄວາມວ່າລູກສິດຂອງເພິ່ນບາງຄົນຈະຖືກປຸກໃຫ້ໄປຢູ່ກັບເພິ່ນໃນສະຫວັນ. ມີຈັກຄົນທີ່ຖືກປຸກໃຫ້ໄປສະຫວັນ? ພະເຢຊູບອກວ່າຄົນທີ່ຈະໄປສະຫວັນມີບໍ່ຫຼາຍ ເພິ່ນເອີ້ນພວກເຂົາວ່າ “ແກະຝູງນ້ອຍ.” (ລູກາ 12:32) ອັກຄະສາວົກໂຢຮັນເຫັນພະເຢຊູ “ຢືນຢູ່ເທິງພູເຂົາຊີໂອນ [ສະຫວັນ] ແລະມີຄົນ 144.000 ຄົນຢູ່ນຳ.” ນີ້ເຮັດໃຫ້ເຮົາຮູ້ວ່າຄົນທີ່ໄປສະຫວັນມີຈຳນວນ 144.000 ຄົນ.—ພະນິມິດ 14:1
24 ຄລິດສະຕຽນ 144.000 ຈະຖືກປຸກຕອນໃດ? ຄຳພີໄບເບິນບອກເຮົາວ່າພວກເຂົາຈະຖືກປຸກຫຼັງຈາກພະເຢຊູເລີ່ມປົກຄອງໃນສະຫວັນ. (1 ໂກຣິນໂທ 15:23) ຕອນນີ້ເຮົາກຳລັງຢູ່ໃນໄລຍະນັ້ນເຊິ່ງເປັນເວລາທີ່ 144.000 ຄົນຖືກປຸກ ແລະພວກເຂົາສ່ວນຫຼາຍກໍຖືກປຸກໃຫ້ໄປສະຫວັນແລ້ວ. ສ່ວນຄົນທີ່ເຫຼືອຢູ່ຕອນນີ້ເມື່ອພວກເຂົາຕາຍກໍຈະຖືກປຸກໃຫ້ໄປສະຫວັນທັນທີ. ແລ້ວຄົນທີ່ບໍ່ໄດ້ຢູ່ໃນກຸ່ມ 144.000 ຄົນເດ? ພວກເຂົາຈະຖືກປຸກໃນອະນາຄົດແລະຈະຄືນມາມີຊີວິດໃນໂລກທີ່ເປັນສວນອຸທິຍານ.
25. ເຮົາຈະຮຽນຫຍັງໃນບົດຕໍ່ໄປ?
25 ອີກບໍ່ດົນພະເຢໂຫວາຈະປົດປ່ອຍມະນຸດທຸກຄົນຈາກຄວາມຕາຍ ແລະຄວາມຕາຍຈະບໍ່ມີອີກຕໍ່ໄປ! (ອ່ານເອຊາອີ 25:8) ແລ້ວຄົນທີ່ຖືກປຸກໃຫ້ໄປສະຫວັນເດ ພວກເຂົາຈະໄປເຮັດຫຍັງຢູ່ຫັ້ນ? ຄຳພີໄບເບິນບອກວ່າພວກເຂົາຈະປົກຄອງກັບພະເຢຊູໃນລັດຖະບານຂອງພະເຈົ້າ. ເຮົາຈະຮຽນເລື່ອງລັດຖະບານນີ້ໃນບົດຕໍ່ໄປ.
a ຄຳພີໄບເບິນຍັງມີເລື່ອງຂອງຄົນອື່ນໆທີ່ຖືກປຸກໃຫ້ຄືນມາຈາກຕາຍທັງຄົນໜຸ່ມແລະຜູ້ເຖົ້າ ຜູ້ຊາຍແລະຜູ້ຍິງ ຄົນອິດສະຣາເອນແລະຄົນຕ່າງຊາດ. ເຈົ້າອ່ານເລື່ອງຂອງພວກເຂົາໄດ້ໃນ 1 ກະສັດ 17:17-24; 2 ກະສັດ 4:32-37; 13:20, 21; ມັດທາຍ 28:5-7; ລູກາ 7:11-17; 8:40-56; ກິດຈະການ 9:36-42; 20:7-12
-