ບົດທີ 43
ຄຳພີໄບເບິນບອກຫຍັງກ່ຽວກັບເຄື່ອງດື່ມມຶນເມົາ?
ເມື່ອເວົ້າເຖິງການດື່ມເຄື່ອງດື່ມມຶນເມົາ ຜູ້ຄົນທົ່ວໂລກມີຄວາມຄິດເຫັນທີ່ບໍ່ຄືກັນ. ບາງຄົນດື່ມເປັນບາງຄັ້ງຄາວກັບໝູ່ຄູ່. ບາງຄົນເລືອກທີ່ຈະບໍ່ດື່ມເລີຍ. ສ່ວນບາງຄົນກໍດື່ມຈົນເມົາ. ແລ້ວຄຳພີໄບເບິນບອກຫຍັງກ່ຽວກັບການດື່ມເຄື່ອງດື່ມມຶນເມົາ?
1. ຜິດບໍທີ່ຈະດື່ມເຄື່ອງດື່ມມຶນເມົາ?
ຄຳພີໄບເບິນບໍ່ໄດ້ບອກວ່າການດື່ມເຄື່ອງດື່ມມຶນເມົາເປັນເລື່ອງຜິດ. ເພາະເມື່ອເວົ້າເຖິງສິ່ງດີໆຫຼາຍຢ່າງທີ່ມາຈາກພະເຈົ້າ ຄຳພີໄບເບິນກໍບອກວ່າ ‘ເຫຼົ້າແວງເຮັດໃຫ້ມີຄວາມມ່ວນຊື່ນ.’ (ເພງສັນລະເສີນ 104:14, 15) ແທ້ໆແລ້ວໃນສະໄໝກ່ອນຜູ້ຮັບໃຊ້ທີ່ສັດຊື່ຫຼາຍຄົນຂອງພະເຈົ້າກໍດື່ມເຄື່ອງດື່ມມຶນເມົາ.—1 ຕີໂມທຽວ 5:23
2. ຄຳພີໄບເບິນມີຄຳແນະນຳຫຍັງສຳລັບຄົນທີ່ດື່ມເຄື່ອງດື່ມມຶນເມົາ?
ພະເຢໂຫວາຕຳໜິການດື່ມຫຼາຍເກີນໄປແລະການເມົາເຫຼົ້າ. (ຄາລາເຕຍ 5:21) ຄຳພີໄບເບິນບອກວ່າ: “ຢ່າເປັນໜຶ່ງໃນຄົນທີ່ກິນເຫຼົ້າແວງຫຼາຍໂພດ.” (ສຸພາສິດ 23:20) ດັ່ງນັ້ນ ບໍ່ວ່າເຮົາຈະຢູ່ຄົນດຽວຫຼືຢູ່ກັບຄົນອື່ນ ເຮົາຈະບໍ່ດື່ມຫຼາຍເກີນໄປຈົນບໍ່ສາມາດຄວບຄຸມຄວາມຄິດ ຄຳເວົ້າ ແລະການກະທຳຂອງເຮົາ ແລະເຮົາຈະບໍ່ດື່ມຫຼາຍເກີນໄປຈົນເຮັດໃຫ້ເສຍສຸຂະພາບ. ຖ້າເຮົາຄວບຄຸມໂຕເອງບໍ່ໄດ້ວ່າຈະດື່ມສ່ຳໃດ ເຮົາກໍຄວນເລືອກທີ່ຈະບໍ່ດື່ມເລີຍ.
3. ເຮົາຈະເຮັດໃຫ້ເຫັນໄດ້ແນວໃດວ່າເຮົານັບຖືການຕັດສິນໃຈຂອງຄົນອື່ນ?
ແຕ່ລະຄົນຕ້ອງຕັດສິນໃຈດ້ວຍໂຕເອງວ່າຈະດື່ມເຄື່ອງດື່ມມຶນເມົາບໍ. ເຊັ່ນ ຖ້າເຮົາບໍ່ດື່ມ ເຮົາກໍບໍ່ຄວນໄປຕຳໜິຄົນທີ່ດື່ມ ແລະຖ້າເຮົາດື່ມ ເຮົາກໍບໍ່ຄວນກົດດັນໃຫ້ຄົນອື່ນດື່ມ. (ໂຣມ 14:10) ຖ້າມີໃຜຮູ້ສຶກບໍ່ສະບາຍໃຈທີ່ເຮົາດື່ມ ເຮົາກໍໜ້າຈະບໍ່ດື່ມດີກວ່າ. (ອ່ານໂຣມ 14:21) ເຮົາຈະ ‘ບໍ່ຄິດເຖິງປະໂຫຍດຂອງຕົວເອງ ແຕ່ຄິດເຖິງປະໂຫຍດຂອງຄົນອື່ນ.’—ອ່ານ 1 ໂກຣິນໂທ 10:23, 24
ຮຽນຮູ້ຫຼາຍຂຶ້ນ
ຫຼັກການໃນຄຳພີໄບເບິນຈະຊ່ວຍເຈົ້າໃຫ້ຕັດສິນໃຈວ່າຈະດື່ມເຄື່ອງດື່ມມຶນເມົາບໍ ຖ້າດື່ມຈະດື່ມຫຼາຍສ່ຳໃດ ແລະຈະຊ່ວຍໃຫ້ຮູ້ວ່າຈະຕ້ອງເຮັດແນວໃດຖ້າເຈົ້າດື່ມຈົນຕິດ.
4. ຕັດສິນໃຈວ່າຈະດື່ມບໍ
ພະເຢຊູຄິດແນວໃດກັບເຄື່ອງດື່ມມຶນເມົາ? ໃຫ້ເຮົາມາເບິ່ງເລື່ອງນີ້ນຳກັນຈາກການອັດສະຈັນເທື່ອທຳອິດທີ່ເພິ່ນເຮັດ. ອ່ານໂຢຮັນ 2:1-11 ແລ້ວລົມກັນກ່ຽວກັບຄຳຖາມຕໍ່ໄປນີ້:
ຈາກການອັດສະຈັນເທື່ອທຳອິດນີ້ ພະເຢຊູຄິດແນວໃດກັບເຄື່ອງດື່ມມຶນເມົາ ແລະເພິ່ນຮູ້ສຶກແນວໃດກັບຄົນທີ່ດື່ມ?
ໃນເມື່ອພະເຢຊູບໍ່ໄດ້ຕຳໜິການດື່ມເຄື່ອງດື່ມມຶນເມົາ ແລ້ວຄລິດສະຕຽນຄວນຮູ້ສຶກແນວໃດກັບຄົນທີ່ດື່ມ?
ເຖິງວ່າບໍ່ຜິດທີ່ຄລິດສະຕຽນຈະດື່ມເຄື່ອງດື່ມມຶນເມົາ ແຕ່ກໍມີບາງສະຖານະການທີ່ລາວບໍ່ຄວນດື່ມ. ອ່ານສຸພາສິດ 22:3 ແລ້ວລົມກັນວ່າມີເຫດຜົນຫຍັງແດ່ທີ່ເຈົ້າບໍ່ຄວນດື່ມ.
ຖ້າເຈົ້າຕ້ອງຂັບລົດຫຼືເຮັດວຽກກັບເຄື່ອງຈັກ.
ຖ້າເຈົ້າກຳລັງຖືພາ.
ຖ້າໝໍແນະນຳວ່າເຈົ້າບໍ່ຄວນດື່ມ.
ຖ້າເຈົ້າເປັນຄົນທີ່ເລີ່ມດື່ມແລ້ວຢຸດບໍ່ໄດ້.
ຖ້າກົດໝາຍບໍ່ອະນຸຍາດໃຫ້ດື່ມ.
ຖ້າມີຄົນທີ່ເຄີຍຕິດເຫຼົ້າຢູ່ນຳໃນຕອນນັ້ນ.
ເຈົ້າຄວນໃຫ້ມີເຄື່ອງດື່ມມຶນເມົາໃນງານແຕ່ງດອງແລະໃນງານລ້ຽງບໍ? ເພື່ອເບິ່ງວ່າອັນໃດຈະຊ່ວຍໃຫ້ເຈົ້າຕັດສິນໃຈໃນເລື່ອງນີ້ໄດ້ ເປີດວິດີໂອ.
ອ່ານໂຣມ 13:13 ແລະ 1 ໂກຣິນໂທ 10:31, 32.ຫຼັງຈາກອ່ານຂໍ້ຄຳພີຂໍ້ໜຶ່ງຈົບແລ້ວ ໃຫ້ຖາມຄຳຖາມທີ່ຢູ່ທາງລຸ່ມແລະໃຫ້ເຮັດແບບນີ້ຈົນຄົບທຸກຂໍ້.
ຫຼັກການນີ້ຈະຊ່ວຍເຈົ້າແນວໃດໃຫ້ຕັດສິນໃຈໃນແບບທີ່ເຮັດໃຫ້ພະເຢໂຫວາພໍໃຈ?
ຄລິດສະຕຽນແຕ່ລະຄົນຕ້ອງຕັດສິນໃຈເອງວ່າຈະດື່ມເຄື່ອງດື່ມມຶນເມົາບໍ. ເຖິງເຈົ້າຮູ້ສຶກວ່າດື່ມໄດ້ແຕ່ກໍອາດມີບາງຄັ້ງທີ່ເຈົ້າເລືອກຈະບໍ່ດື່ມ
5. ຕັດສິນໃຈວ່າຈະດື່ມຫຼາຍສ່ຳໃດ
ພະເຢໂຫວາບອກວ່າບໍ່ຜິດຖ້າເຮົາຈະດື່ມ ແຕ່ເພິ່ນຕຳໜິຖ້າເຮົາດື່ມຫຼາຍເກີນໄປ. ຍ້ອນຫຍັງ? ອ່ານໂຮເຊອາ 4:11, 18 ແລ້ວລົມກັນກ່ຽວກັບຄຳຖາມຕໍ່ໄປນີ້:
ຈະເກີດຫຍັງຂຶ້ນຖ້າເຮົາດື່ມຫຼາຍເກີນໄປ?
ເຮົາຕ້ອງເຮັດແນວໃດເພື່ອຈະບໍ່ດື່ມຫຼາຍເກີນໄປ? ເຮົາຕ້ອງຮູ້ວ່າໂຕເອງດື່ມໄດ້ຫຼາຍສ່ຳໃດ. ອ່ານສຸພາສິດ 11:2 ແລ້ວລົມກັນກ່ຽວກັບຄຳຖາມຕໍ່ໄປນີ້:
ເປັນຫຍັງຈຶ່ງດີທີ່ຈະກຳນົດໄວ້ລ່ວງໜ້າວ່າຈະດື່ມຫຼາຍສ່ຳໃດ?
6. ອັນໃດຊ່ວຍບາງຄົນໃຫ້ເຊົາຕິດເຫຼົ້າໄດ້?
ອັນໃດຊ່ວຍຜູ້ຊາຍຄົນໜຶ່ງໃຫ້ເຊົາຕິດເຫຼົ້າໄດ້. ເປີດວິດີໂອ ແລ້ວລົມກັນກ່ຽວກັບຄຳຖາມຕໍ່ໄປນີ້:
ໃນວິດີໂອ ຕອນເມົາເຫຼົ້າດິມີທຣີກາຍເປັນຄົນແບບໃດ?
ລາວເຊົາດື່ມເຫຼົ້າໄດ້ທັນທີບໍ?
ໃນທີ່ສຸດລາວເຊົາຕິດເຫຼົ້າໄດ້ແນວໃດ?
ອ່ານ 1 ໂກຣິນໂທ 6:10, 11 ແລ້ວລົມກັນກ່ຽວກັບຄຳຖາມຕໍ່ໄປນີ້:
ຄຳພີໄບເບິນບອກຫຍັງກ່ຽວກັບການເມົາເຫຼົ້າ?
ຈາກຂໍ້ຄຳພີນີ້ ເຮົາຮູ້ໄດ້ແນວໃດວ່າຄົນທີ່ເຄີຍຕິດເຫຼົ້າກໍເຊົາໄດ້?
ອ່ານມັດທາຍ 5:30 ແລ້ວລົມກັນກ່ຽວກັບຄຳຖາມຕໍ່ໄປນີ້:
ຕອນທີ່ພະເຢຊູໃຊ້ຕົວຢ່າງປຽບທຽບເລື່ອງການຕັດມື ເພິ່ນບໍ່ໄດ້ບອກໃຫ້ເຮົາຕັດມືແທ້ໆ ແຕ່ເພິ່ນໝາຍຄວາມວ່າເຮົາຕ້ອງລົງມືເຮັດບາງຢ່າງ. ສະນັ້ນ ເພື່ອຈະເຮັດໃຫ້ພະເຢໂຫວາພໍໃຈ ເຈົ້າຕ້ອງເຮັດຫຍັງຖ້າຢາກເຊົາຕິດເຫຼົ້າ?a
ອ່ານ 1 ໂກຣິນໂທ 15:33 ແລ້ວລົມກັນກ່ຽວກັບຄຳຖາມຕໍ່ໄປນີ້:
ເຈົ້າອາດກາຍເປັນຄົນແບບໃດຖ້າເຈົ້າຄົບຫາກັບຄົນທີ່ມັກດື່ມເຫຼົ້າ?
ບາງຄົນອາດຖາມວ່າ: “ຄຳພີໄບເບິນຫ້າມກິນເຫຼົ້າຫວາ?”
ຖ້າມີຄົນຖາມແບບນີ້ ເຈົ້າຈະຕອບແນວໃດ?
ສະຫຼຸບ
ພະເຢໂຫວາບອກວ່າບໍ່ຜິດທີ່ຈະດື່ມເຄື່ອງດື່ມມຶນເມົາ ແຕ່ເພິ່ນຕຳໜິການດື່ມຫຼາຍເກີນໄປແລະການເມົາເຫຼົ້າ.
ຄຳຖາມທົບທວນ
ຄຳພີໄບເບິນບອກຫຍັງກ່ຽວກັບເຄື່ອງດື່ມມຶນເມົາ?
ມີຜົນເສຍຫຍັງແດ່ຖ້າເຮົາດື່ມເຄື່ອງດື່ມມຶນເມົາຫຼາຍເກີນໄປ?
ເຮົາຈະນັບຖືການຕັດສິນໃຈຂອງຄົນອື່ນເລື່ອງການດື່ມເຄື່ອງດື່ມມຶນເມົາໄດ້ແນວໃດ?
ເບິ່ງເພີ່ມເຕີມ
ໄວລຸ້ນຄວນຄິດຈັ່ງໃດກັບການດື່ມເຄື່ອງດື່ມມຶນເມົາ?
ມີວິທີຫຍັງແດ່ທີ່ຊ່ວຍເຈົ້າໃຫ້ເຊົາຕິດເຫຼົ້າໄດ້?
“ວິທີຄວບຄຸມການດື່ມເຄື່ອງດື່ມມຶນເມົາ” (ຫໍສັງເກດການ 1 ມັງກອນ 2010)
ຄລິດສະຕຽນຄວນຮ່ວມໃນການດື່ມອວຍພອນບໍ?
ອ່ານເລື່ອງ “ຂ້ອຍເປັນຖັງກົ້ນຮົ່ວ” ເພື່ອຈະເບິ່ງວ່າອັນໃດຊ່ວຍຜູ້ຊາຍຄົນໜຶ່ງໃຫ້ເຊົາຕິດເຫຼົ້າໄດ້.
a ຄົນທີ່ຕິດເຫຼົ້າອາດຕ້ອງໄດ້ຮັບຄວາມຊ່ວຍເຫຼືອຈາກຜູ້ຊ່ຽວຊານເພື່ອຈະເຊົາຕິດເຫຼົ້າໄດ້ສຳເລັດ. ແພດຫຼາຍຄົນແນະນຳວ່າຄົນຕິດເຫຼົ້າບໍ່ຄວນດື່ມເລີຍ.