ບົດທີ 56

ເຮົາຈະເຮັດຫຍັງໄດ້ແດ່ເພື່ອໃຫ້ປະຊາຄົມເປັນໜຶ່ງດຽວກັນ?

ສະບັບພິມ

ເມື່ອເຮົາຢູ່ກັບພີ່ນ້ອງຄລິດສະຕຽນ ເຮົາຮູ້ສຶກຄືກັບກະສັດດາວິດທີ່ບອກວ່າ: “ເມື່ອພີ່ນ້ອງມາຢູ່ຮ່ວມກັນແບບເປັນນ້ຳໜຶ່ງໃຈດຽວ ມັນກໍດີແທ້ໆແລະເຮັດໃຫ້ຊື່ນໃຈຫຼາຍ.” (ເພງສັນລະເສີນ 133:1) ທີ່ພວກເຮົາເປັນໜຶ່ງດຽວກັນແບບນີ້ໄດ້ບໍ່ແມ່ນເລື່ອງບັງເອີນ ແຕ່ເປັນຍ້ອນພວກເຮົາທຸກຄົນຮ່ວມມືກັນ.

1. ປະຊາຊົນຂອງພະເຈົ້າພິເສດແນວໃດ?

ສົມມຸດວ່າເຈົ້າໄປຕ່າງປະເທດ ແລ້ວເຈົ້າກໍໄປເຂົ້າຮ່ວມປະຊຸມກັບພີ່ນ້ອງຢູ່ປະຊາຄົມໜຶ່ງ ເຂົາເຈົ້າຕ້ອນຮັບເຈົ້າຢ່າງອົບອຸ່ນແລະເປັນກັນເອງ. ເຖິງວ່າເຈົ້າອາດຈະບໍ່ເຂົ້າໃຈພາສາທີ່ເຂົາເຈົ້າໃຊ້ ແຕ່ເຈົ້າກໍຮູ້ສຶກສະບາຍໃຈ. ຍ້ອນຫຍັງ? ຍ້ອນບໍ່ວ່າຈະຢູ່ໃສ ປະຊາຊົນຂອງພະເຈົ້າກໍສຶກສາຄຳພີໄບເບິນໂດຍໃຊ້ປຶ້ມທີ່ມີເນື້ອຫາແບບດຽວກັນ ແລະພວກເຮົາຮັກກັນຫຼາຍແທ້ໆ. ພວກເຮົາຈະ ‘ຮ້ອງຊື່ເຢໂຫວາແລະຈະນະມັດສະການເພິ່ນແບບເປັນນ້ຳໜຶ່ງໃຈດຽວກັນ.’—ເຊຟານີຢາ 3:9, ໄຂເງື່ອນ

2. ເຮົາຈະເຮັດຫຍັງໄດ້ແດ່ເພື່ອຊ່ວຍໃຫ້ປະຊາຄົມເປັນໜຶ່ງດຽວກັນຫຼາຍຂຶ້ນ?

“ໃຫ້ພວກເຈົ້າຮັກກັນດ້ວຍສຸດຫົວໃຈ.” (1 ເປໂຕ 1:22) ແລ້ວເຮົາຈະເຮັດຕາມຄຳແນະນຳນີ້ໄດ້ແນວໃດ? ເຮົາຕ້ອງເບິ່ງຂ້າມຂໍ້ເສຍຂອງພີ່ນ້ອງ ແລະພະຍາຍາມເບິ່ງຂໍ້ດີຂອງເຂົາເຈົ້າ. ແທນທີ່ຈະເປັນໝູ່ແຕ່ກັບຄົນທີ່ມີນິດໄສຫຼືມັກຄືກັນກັບເຮົາ ກໍຂໍໃຫ້ເຮົາພະຍາຍາມທີ່ຈະຮູ້ຈັກກັບພີ່ນ້ອງທີ່ມີພູມຫຼັງຕ່າງຈາກເຮົານຳ. ນອກຈາກນັ້ນ ຖ້າເຮົາຮູ້ໂຕວ່າເຮົາເລີ່ມເປັນຄົນລຳອຽງຫຼືມີອະຄະຕິຕໍ່ຄົນອື່ນ ກໍຂໍໃຫ້ເຮົາພະຍາຍາມກຳຈັດຄວາມຮູ້ສຶກແບບນັ້ນອອກໄປ.—ອ່ານ 1 ເປໂຕ 2:17 a

3. ເຮົາຈະເຮັດຫຍັງໄດ້ແດ່ຖ້າບາງເທື່ອເຮົາມີບັນຫາກັບພີ່ນ້ອງຄລິດສະຕຽນ?

ເຖິງວ່າເຮົາຈະເປັນໜຶ່ງດຽວກັນ ແຕ່ເຮົາທຸກຄົນກໍເປັນຄົນທີ່ບໍ່ສົມບູນແບບ. ບາງເທື່ອເຮົາກໍອາດເຮັດໃຫ້ຄົນອື່ນຮູ້ສຶກຜິດຫວັງຫຼືເສຍໃຈ. ດັ່ງນັ້ນ ຄຳພີໄບເບິນຈຶ່ງບອກເຮົາວ່າ: “ໃຫ້ອະໄພກັນ . . . ຕໍ່ໆໄປ” ແລະບອກອີກວ່າ: “ພວກເຈົ້າຕ້ອງເຕັມໃຈໃຫ້ອະໄພກັນຄືກັບທີ່ພະເຢໂຫວາເຕັມໃຈໃຫ້ອະໄພພວກເຈົ້າ.” (ອ່ານໂກໂລຊາຍ 3:13) ເຖິງວ່າເຮົາຈະເຮັດໃຫ້ພະເຢໂຫວາເສຍໃຈຫຼາຍເທື່ອ ແຕ່ເພິ່ນກໍໃຫ້ອະໄພເຮົາ. ດັ່ງນັ້ນ ເພິ່ນກໍຢາກໃຫ້ເຮົາເຕັມໃຈໃຫ້ອະໄພພີ່ນ້ອງຂອງເຮົານຳ. ຖ້າເຮົາຮູ້ວ່າເຮົາເຮັດໃຫ້ບາງຄົນເສຍໃຈ ກໍຂໍໃຫ້ເຮົາເປັນຝ່າຍເຂົ້າໄປຂໍໂທດແລະຄືນດີກັບລາວ.—ອ່ານມັດທາຍ 5:23, 24 b

ຮຽນຮູ້ຫຼາຍຂຶ້ນ

ລອງຄິດເບິ່ງວ່າເຈົ້າຈະເຮັດຫຍັງໄດ້ແດ່ເພື່ອຊ່ວຍໃຫ້ປະຊາຄົມສະຫງົບສຸກແລະເປັນໜຶ່ງດຽວກັນຫຼາຍຂຶ້ນ.

ຮູບ: ພີ່ນ້ອງຊາຍຄືນດີກັບພີ່ນ້ອງອີກຄົນໜຶ່ງ. 1. ມີພີ່ນ້ອງຄົນໜຶ່ງເວົ້າບໍ່ດີກັບລາວ. 2. ລາວຄິດກ່ຽວກັບສິ່ງທີ່ພີ່ນ້ອງຄົນນັ້ນເວົ້າ. 3. ລາວເບິ່ງຄຳແນະນຳຈາກຄຳພີໄບເບິນວ່າຈະເຮັດແນວໃດເມື່ອມີບັນຫາກັບຄົນອື່ນ. 4. ລາວນັດພີ່ນ້ອງຄົນນັ້ນກິນກາເຟນຳກັນແລະຄືນດີກັນ. — ເຈົ້າຈະເຮັດຫຍັງເພື່ອຄືນດີກັບຄົນອື່ນ?

4. ບໍ່ມີອະຄະຕິ

ເຮົາຢາກຮັກພີ່ນ້ອງທຸກຄົນ. ແຕ່ກໍອາດມີບາງຄົນທີ່ເຮົາຮູ້ສຶກວ່າຍອມຮັບເຂົາເຈົ້າໄດ້ຍາກເພາະເຂົາເຈົ້າແຕກຕ່າງຈາກເຮົາ. ແລ້ວອັນໃດຈະຊ່ວຍເຮົາໄດ້? ອ່ານກິດຈະການ 10:34, 35 ແລ້ວລົມກັນກ່ຽວກັບຄຳຖາມຕໍ່ໄປນີ້:

ບໍ່ວ່າຜູ້ຮັບໃຊ້ຂອງພະເຢໂຫວາຈະເປັນໃຜຫຼືມາຈາກໃສ ເພິ່ນກໍຍອມຮັບເຂົາເຈົ້າ. ເມື່ອຮູ້ແບບນີ້ແລ້ວ ເຈົ້າຈະຮຽນແບບເພິ່ນໄດ້ແນວໃດ?
ໃນປະເທດທີ່ເຈົ້າຢູ່ ຄົນທົ່ວໄປມັກຈະລຳອຽງຫຼືມີອະຄະຕິເລື່ອງຫຍັງແດ່? ແຕ່ເປັນຫຍັງເຈົ້າບໍ່ຄວນຮູ້ສຶກແບບນັ້ນ?

ອ່ານ 2 ໂກຣິນໂທ 6:11-13 ແລ້ວລົມກັນກ່ຽວກັບຄຳຖາມຕໍ່ໄປນີ້:

ເຖິງວ່າພີ່ນ້ອງຈະມີພູມຫຼັງບໍ່ຄືກັບເຈົ້າ ແຕ່ເຈົ້າຈະຮັກເຂົາເຈົ້າຫຼາຍຂຶ້ນໄດ້ແນວໃດ?

5. ເຕັມໃຈໃຫ້ອະໄພແລະຄືນດີກັບພີ່ນ້ອງ

ເຖິງພະເຢໂຫວາຈະບໍ່ເຄີຍເຮັດຜິດແລະບໍ່ຈຳເປັນຕ້ອງໄດ້ຮັບການຍົກໂທດຈາກໃຜ ແຕ່ເພິ່ນກໍເປັນພະເຈົ້າທີ່ເຕັມໃຈໃຫ້ອະໄພເຮົາທຸກຄົນຢ່າງໃຈກວ້າງ. ອ່ານເພງສັນລະເສີນ 86:5 ແລ້ວລົມກັນກ່ຽວກັບຄຳຖາມຕໍ່ໄປນີ້:

ຂໍ້ຄຳພີນີ້ບອກຫຍັງກ່ຽວກັບພະເຢໂຫວາເລື່ອງການໃຫ້ອະໄພ?
ເຈົ້າຮູ້ສຶກຂອບໃຈພະເຢໂຫວາບໍທີ່ເພິ່ນພ້ອມຈະໃຫ້ອະໄພ? ເປັນຫຍັງເຈົ້າຈຶ່ງຮູ້ສຶກແບບນັ້ນ?
ມີເລື່ອງຫຍັງແດ່ທີ່ອາດເຮັດໃຫ້ເຮົາເຂົ້າກັບຄົນອື່ນໄດ້ຍາກ?

ເຮົາຈະຮຽນແບບພະເຢໂຫວາແລະເປັນໜຶ່ງດຽວກັບພີ່ນ້ອງໄດ້ແນວໃດ? ອ່ານສຸພາສິດ 19:11 ແລ້ວລົມກັນກ່ຽວກັບຄຳຖາມຕໍ່ໄປນີ້:

ຖ້າມີຄົນເຮັດບາງຢ່າງທີ່ອາດເຮັດໃຫ້ເຈົ້າບໍ່ພໍໃຈ ເຈົ້າຈະເຮັດຫຍັງໄດ້ແດ່ເພື່ອໃຫ້ສະຖານະການດີຂຶ້ນ?

ບາງເທື່ອເຮົາອາດເຮັດໃຫ້ຄົນອື່ນບໍ່ພໍໃຈ. ຖ້າເປັນແນວນັ້ນເຮົາໜ້າຈະເຮັດຫຍັງ? ເປີດວິດີໂອ ແລ້ວລົມກັນກ່ຽວກັບຄຳຖາມຕໍ່ໄປນີ້:

ວິດີໂອ: ການສ້າງສັນຕິສຸກເຮັດໃຫ້ໄດ້ຮັບພອນ (6:01)

ໃນວິດີໂອ ພີ່ນ້ອງຍິງຄົນໜຶ່ງເຮັດຫຍັງເພື່ອຈະຄືນດີກັບຄົນອື່ນ?

6. ເບິ່ງຂໍ້ດີຂອງພີ່ນ້ອງ

ເມື່ອເຮົາສະໜິດກັບພີ່ນ້ອງຫຼາຍຂຶ້ນ ເຮົາກໍເຫັນທັງຂໍ້ດີແລະຂໍ້ເສຍຂອງເຂົາເຈົ້າ. ແຕ່ອັນໃດຈະຊ່ວຍໃຫ້ເຮົາເບິ່ງແຕ່ຂໍ້ດີຂອງພີ່ນ້ອງ? ເປີດວິດີໂອ ແລ້ວລົມກັນກ່ຽວກັບຄຳຖາມຕໍ່ໄປນີ້: