ບົດຄວາມສຶກສາທີ 25
ເພິ່ງພະເຢໂຫວາເມື່ອຮູ້ສຶກເຄັ່ງຕຶງແລະທຸກໃຈ
“ຜູ້ຂ້າ . . . ມີໃຈທຸກໜັກ.”—1 ຊາມ. 1:15
ເພງ 30 ພະອົງເປັນພະເຈົ້າ ເປັນພໍ່ແລະເພື່ອນຂອງຂ້ອຍ
ໃຈຄວາມສຳຄັນa
1. ເປັນຫຍັງເຮົາຕ້ອງຟັງຄຳເຕືອນຂອງພະເຍຊູ?
ໃນຄຳພະຍາກອນກ່ຽວກັບສະໄໝສຸດທ້າຍ ພະເຍຊູບອກວ່າ: “ລະວັງໃຫ້ດີ ຢ່າໝົກມຸ້ນກັບການກິນ . . . ຫຼືມົວແຕ່ກັງວົນກັບຊີວິດ [ຫຼື “ອຸກໃຈວ່າຈະຫາເງິນບໍ່ພໍໃຊ້” ຫຼື “ກັງວົນກັບຊີວິດປະຈຳວັນ,” ໄຂເງື່ອນຄຳພີໄບເບິນສະບັບແປໂລກໃໝ່ (ສະບັບສຶກສາ)].” (ລືກາ 21:34, ລ.ມ.) ເຮົາຕ້ອງຟັງຄຳເຕືອນນີ້. ຍ້ອນຫຍັງ? ຍ້ອນວ່າໃນປັດຈຸບັນ ເຮົາກໍປະສົບກັບບັນຫາຫຼາຍຢ່າງທີ່ເຮັດໃຫ້ເຄັ່ງຕຶງຄືກັບຄົນອື່ນໆ.
2. ພີ່ນ້ອງຂອງເຮົາປະສົບກັບບັນຫາຫຍັງແດ່ທີ່ເຮັດໃຫ້ໜັກໃຈ?
2 ບາງເທື່ອ ເຮົາຕ້ອງປະສົບກັບບັນຫາຫຼາຍຢ່າງພ້ອມໆກັນ. ຂໍໃຫ້ເບິ່ງຕົວຢ່າງຕໍ່ໄປນີ້. ພະຍານພະເຢໂຫວາຄົນໜຶ່ງຊື່ຈອນb ເຊິ່ງເປັນພະຍາດເຍື່ອຫຸ້ມເສັ້ນປະສາດອັກເສບ (multiple sclerosis) ລາວເສຍໃຈຫຼາຍເມື່ອເມຍທີ່ຢູ່ນຳກັນມາປະມານ 19 ປີໄດ້ປະຖິ້ມລາວ. ຈາກນັ້ນ ລູກສາວທັງສອງຄົນກໍເຊົາຮັບໃຊ້ພະເຢໂຫວາ. ສ່ວນຄູ່ຜົວເມຍທີ່ຊື່ບ໋ອບແລະລິນດາມີບັນຫາທີ່ຕ່າງກັບຈອນ. ເຂົາເຈົ້າຕົກວຽກ ເຮືອນກໍຖືກຍຶດເພາະບໍ່ມີເງິນໄຊ້ໜີ້. ນອກຈາກນັ້ນ ທ່ານໝໍບອກລິນດາວ່າ ລາວເປັນໂລກຫົວໃຈທີ່ອາດເຮັດໃຫ້ລາວຕາຍໄດ້ ແລະຍັງເປັນອີກພະຍາດໜຶ່ງທີ່ທຳລາຍລະບົບພູມຕ້ານທານ.
3. ຕາມທີ່ຂຽນໄວ້ໃນຟີລິບ 4:6, 7 ເຮົາສາມາດໝັ້ນໃຈໃນເລື່ອງຫຍັງ?
3 ເຮົາໝັ້ນໃຈໄດ້ວ່າພະເຢໂຫວາພໍ່ທີ່ຮັກເຊິ່ງເປັນຜູ້ສ້າງເຮົາເຂົ້າໃຈວ່າຄວາມເຄັ່ງຕຶງສົ່ງຜົນຕໍ່ເຮົາແນວໃດ ແລະພະອົງກໍຢາກຊ່ວຍເຮົາໃຫ້ຮັບມືກັບບັນຫາທີ່ເຮົາປະສົບ. (ອ່ານຟີລິບ 4:6, 7) ຄຳພີໄບເບິນມີຫຼາຍເລື່ອງທີ່ເວົ້າກ່ຽວກັບບັນຫາຕ່າງໆທີ່ຜູ້ຮັບໃຊ້ຂອງພະເຈົ້າເອົາຊະນະໄດ້ ແລະຍັງເວົ້າເຖິງວິທີທີ່ພະເຢໂຫວາຊ່ວຍເຂົາເຈົ້າໃຫ້ຮັບມືກັບຄວາມເຄັ່ງຕຶງແລະທຸກໃຈ. ໃຫ້ເຮົາມາພິຈາລະນາບາງຕົວຢ່າງນຳກັນ.
ເອລີຢາ “ເປັນຄົນທຳມະດາຄືເຮົາ”
4. ເອລີຢາປະສົບກັບບັນຫາຫຍັງແດ່ ແລະລາວໝັ້ນໃຈວ່າພະເຢໂຫວາຈະເຮັດຫຍັງ?
4 ເອລີຢາຮັບໃຊ້ພະເຢໂຫວາໃນໄລຍະທີ່ຫຍຸ້ງຍາກລຳບາກ ແລະປະສົບກັບບັນຫາທີ່ໜັກໜ່ວງ. ກະສັດອາກາບເປັນກະສັດອົງໜຶ່ງຂອງອິດສະລາແອນທີ່ບໍ່ສັດຊື່ ລາວແຕ່ງດອງກັບເຢຊາເບນເຊິ່ງເປັນຄົນຊົ່ວທີ່ນະມັດສະການພະບາອານ. ສອງຜົວເມຍນີ້ເຮັດໃຫ້ແຜ່ນດິນເຕັມໄປດ້ວຍການນະມັດສະການພະບາອານ ແລະໄດ້ຂ້າຜູ້ພະຍາກອນຂອງພະເຢໂຫວາຫຼາຍຄົນ. ແຕ່ເອລີຢາໜີລອດໄປໄດ້ແລະລາວຍັງລອດຈາກໄພອຶດຫິວໂດຍໝາຍເພິ່ງພະເຢໂຫວາ. (1 ກະ. 17:2-4, 14-16) ນອກຈາກນັ້ນ ເອລີຢາໄດ້ໝາຍເພິ່ງພະເຢໂຫວາເມື່ອປະເຊີນໜ້າກັບຜູ້ພະຍາກອນແລະຜູ້ນະມັດສະການຂອງພະບາອານ ແລະຍັງກະຕຸ້ນຊາວອິດສະລາແອນໃຫ້ຮັບໃຊ້ພະເຢໂຫວາ. (1 ກະ. 18:21-24, 36-38) ເອລີຢາມີຫຼັກຖານຫຼາຍຢ່າງທີ່ສະແດງວ່າພະເຢໂຫວາຊ່ວຍລາວໃນສະພາບການທີ່ຫຍຸ້ງຍາກລຳບາກເຫຼົ່ານັ້ນ.
ພະເຢໂຫວາສົ່ງທູດສະຫວັນອົງໜຶ່ງມາຊ່ວຍເອລີຢາໃຫ້ກັບມາມີແຮງອີກ (ເບິ່ງຂໍ້ 5-6)c
5-6. ຕາມທີ່ຂຽນໄວ້ໃນ 1 ກະສັດ 19:1-4 ເອລີຢາຮູ້ສຶກແນວໃດ ແລະພະເຢໂຫວາສະແດງໃຫ້ເຫັນແນວໃດວ່າພະອົງຮັກລາວ?
5 ອ່ານ 1 ກະສັດ 19:1-4. ເຖິງຢ່າງນັ້ນ ລາວກໍຍັງຢ້ານເມື່ອລາຊີນີເຢຊາເບນໄດ້ຂູ່ວ່າຈະຂ້າລາວ. ລາວຈຶ່ງໜີໄປເມືອງເບເອນເຊບາ ລາວທໍ້ໃຈເຖິງຂັ້ນວ່າ “ຂໍໃຫ້ຈິດໃຈເອງເຖິງຕາຍ [“ອະທິດຖານຂໍໃຫ້ຕາຍ,” ລ.ມ.]” ເປັນຫຍັງລາວຮູ້ສຶກແນວນັ້ນ? ເອລີຢາເປັນຄົນບໍ່ສົມບູນແບບແລະ “ເປັນຄົນທຳມະດາຄືເຮົາ.” (ຢໂກ. 5:17, ລ.ມ.) ບາງທີ ລາວຮູ້ສຶກບໍ່ໄຫວຍ້ອນວ່າເຄັ່ງຕຶງແລະໝົດແຮງ. ເບິ່ງຄືເອລີຢາຄິດວ່າຄວາມພະຍາຍາມຂອງລາວທີ່ສົ່ງເສີມການນະມັດສະການແທ້ຢູ່ອິດສະລາແອນບໍ່ໄດ້ເກີດຜົນຫຍັງ ແລະເຫຼືອແຕ່ລາວຜູ້ດຽວທີ່ເປັນຜູ້ຮັບໃຊ້ພະເຢໂຫວາ. (1 ກະ. 18:3, 4, 13; 19:10, 14) ເຮົາອາດຈະບໍ່ເຂົ້າໃຈວ່າເປັນຫຍັງຜູ້ພະຍາກອນທີ່ສັດຊື່ຄົນນີ້ຄິດແບບນີ້ ແຕ່ພະເຢໂຫວາເຂົ້າໃຈຄວາມຮູ້ສຶກຂອງລາວ.
6 ພະເຢໂຫວາບໍ່ໄດ້ໃຈຮ້າຍທີ່ເອລີຢາສະແດງຄວາມຮູ້ສຶກແບບນັ້ນ. ແຕ່ພະອົງພັດຊ່ວຍລາວໃຫ້ກັບມາມີແຮງອີກ. (1 ກະ. 19:5-7) ຕໍ່ມາ ພະເຢໂຫວາໄດ້ຊ່ວຍເອລີຢາປັບປຸງຄວາມຄິດໂດຍໃຫ້ລາວເຫັນລິດອຳນາດທີ່ໜ້າງຶດງໍ້ຂອງພະອົງ. ຈາກນັ້ນ ພະອົງໄດ້ໃຫ້ເອລີຢາຮູ້ວ່າ ຍັງມີອີກ 7.000 ຄົນທີ່ບໍ່ຍອມນະມັດສະການພະບາອານ. (1 ກະ. 19:11-18) ໂດຍສິ່ງເຫຼົ່ານີ້ ພະເຢໂຫວາສະແດງໃຫ້ເອລີຢາເຫັນວ່າພະອົງຮັກລາວແທ້ໆ.
ວິທີທີ່ພະເຢໂຫວາຊ່ວຍເຮົາ
7. ເຮົາໄດ້ຮັບກຳລັງໃຈແນວໃດຈາກວິທີທີ່ພະເຢໂຫວາຊ່ວຍເອລີຢາ?
7 ເຈົ້າກຳລັງປະສົບກັບສະພາບການທີ່ເຮັດໃຫ້ເຄັ່ງຕຶງແລະທຸກໃຈບໍ? ການທີ່ຮູ້ວ່າພະເຢໂຫວາເຂົ້າໃຈຄວາມຮູ້ສຶກຂອງເອລີຢາ ຈຶ່ງເຮັດໃຫ້ເຮົາມີກຳລັງໃຈແທ້ໆ! ເລື່ອງນີ້ຮັບຮອງກັບເຮົາວ່າ ພະເຢໂຫວາເຂົ້າໃຈວ່າສິ່ງໃດທີ່ເຮົາເຮັດໄດ້ແລະເຮັດບໍ່ໄດ້. ພະອົງຮູ້ຈັກຂີດຈຳກັດຂອງເຮົາ ແລະຍັງຮູ້ຈັກຄວາມຄິດແລະຄວາມຮູ້ສຶກຂອງເຮົາ. (ເພງ. 103:14; 139:3, 4) ຖ້າເຮົາຮຽນແບບເອລີຢາໂດຍໝາຍເພິ່ງພະເຢໂຫວາ ພະອົງກໍຈະຊ່ວຍເຮົາໃຫ້ຮັບມືກັບບັນຫາທີ່ເຮັດໃຫ້ເຮົາເຄັ່ງຕຶງແລະທຸກໃຈ.—ເພງ. 55:22
8. ພະເຢໂຫວາຈະຊ່ວຍເຮົາໃຫ້ຮັບມືກັບຄວາມເຄັ່ງຕຶງແລະຄວາມທຸກໃຈໄດ້ແນວໃດ?
8 ຄວາມເຄັ່ງຕຶງແລະຄວາມທຸກໃຈສາມາດເຮັດໃຫ້ເຮົາຄິດໃນແງ່ລົບ ແລະຮູ້ສຶກໝົດກຳລັງໃຈ. ຖ້າເປັນແບບນັ້ນ ຂໍໃຫ້ຈື່ວ່າພະເຢໂຫວາຈະຊ່ວຍເຮົາໃຫ້ຮັບມືໄດ້. ພະອົງຈະຊ່ວຍເຮົາໄດ້ແນວໃດ? ພະອົງເຊີນເຮົາໃຫ້ເວົ້າກັບພະອົງກ່ຽວກັບບັນຫາຂອງເຮົາ ແລະພະອົງຈະຕອບຄຳອະທິດຖານຂອງເຮົາ. (ຄຳເພງ 5:3; 1 ເປໂຕ 5:7) ດັ່ງນັ້ນ ຂໍໃຫ້ເຮົາອະທິດຖານເຖິງພະເຢໂຫວາເລື້ອຍໆແລະເລົ່າໃຫ້ພະອົງຟັງວ່າເຮົາເຈິບັນຫາຫຍັງແດ່. ເຖິງວ່າພະອົງບໍ່ໄດ້ເວົ້າກັບເຮົາໂດຍກົງຄືດັ່ງທີ່ເວົ້າກັບເອລີຢາ ແຕ່ພະອົງກໍເວົ້າກັບເຮົາໂດຍທາງຄຳພີໄບເບິນແລະອົງການຂອງພະອົງ. ເລື່ອງທີ່ເຮົາອ່ານໃນຄຳພີໄບເບິນຈະຊ່ວຍເຮົາໃຫ້ມີຄວາມຫວັງແລະກຳລັງໃຈ. ນອກຈາກນັ້ນ ພີ່ນ້ອງຮ່ວມຄວາມເຊື່ອກໍຈະໃຫ້ກຳລັງໃຈເຮົາຄືກັນ.—ໂລມ 15:4; ເຫບ. 10:24, 25
9. ໝູ່ທີ່ໄວ້ໃຈໄດ້ອາດຊ່ວຍເຮົາແນວໃດ?
9 ເມື່ອພະເຢໂຫວາບອກເອລີຢາມອບວຽກໃຫ້ເອລີເຊ ພະອົງໄດ້ໃຫ້ເອລີຢາມີໝູ່ທີ່ດີເຊິ່ງຈະຊ່ວຍລາວຕອນທີ່ລາວຮູ້ສຶກໝົດກຳລັງໃຈ. ຄ້າຍຄືກັນ ເມື່ອເຮົາເລົ່າຄວາມຮູ້ສຶກໃຫ້ກັບໝູ່ທີ່ໄວ້ໃຈຟັງ ລາວກໍຈະຊ່ວຍເຮົາໃຫ້ຮັບມືກັບຄວາມໜັກໃຈໄດ້. (2 ກະ. 2:2; ສຸພາ. 17:17) ແຕ່ຖ້າເຈົ້າບໍ່ມີໝູ່ແບບນັ້ນ ໃຫ້ອະທິດຖານຂໍພະເຢໂຫວາຊ່ວຍເຈົ້າໃຫ້ຊອກໝູ່ທີ່ເປັນຜູ້ໃຫຍ່ດ້ານຄວາມເຊື່ອທີ່ສາມາດໃຫ້ກຳລັງໃຈເຈົ້າໄດ້.
10. ປະສົບການຂອງເອລີຢາເຮັດໃຫ້ເຮົາມີຄວາມຫວັງແນວໃດ ແລະຄຳສັນຍາໃນເອຊາອີ 40:28, 29 ຊ່ວຍເຮົາແນວໃດ?
10 ພະເຢໂຫວາຊ່ວຍເອລີຢາໃຫ້ຮັບມືກັບຄວາມເຄັ່ງຕຶງແລະທຸກໃຈ ແລະຮັບໃຊ້ຢ່າງສັດຊື່ເປັນເວລາຫຼາຍປີ. ປະສົບການຂອງເອລີຢາເຮັດໃຫ້ເຮົາມີຄວາມຫວັງເພາະເຮົາອາດຈະປະສົບກັບສະພາບການທີ່ຫຍຸ້ງຍາກເຊິ່ງເຮັດໃຫ້ທໍ້ໃຈແລະໝົດກຳລັງ. ແຕ່ຖ້າເຮົາໝາຍເພິ່ງພະເຢໂຫວາ ພະອົງຈະໃຫ້ເຮົາມີກຳລັງເພື່ອຮັບໃຊ້ພະອົງຕໍ່ໆໄປ.—ອ່ານເອຊາອີ 40:28, 29
ອານາ ດາວິດ ແລະຜູ້ຂຽນພະທຳຄຳເພງຄົນໜຶ່ງໝາຍເພິ່ງພະເຢໂຫວາ
11-13. ໃນສະໄໝບູຮານຄວາມເຄັ່ງຕຶງສົ່ງຜົນແນວໃດຕໍ່ຜູ້ຮັບໃຊ້ຂອງພະເຈົ້າ 3 ຄົນ?
11 ຍັງມີອີກຫຼາຍຄົນໃນຄຳພີໄບເບິນທີ່ໄດ້ປະສົບກັບຄວາມເຄັ່ງຕຶງແລະທຸກໃຈ. ຕົວຢ່າງ: ອານາຮູ້ສຶກອັບອາຍຂາຍໜ້າຍ້ອນລາວບໍ່ມີລູກ ແລະເມຍອີກຄົນໜຶ່ງຂອງຜົວໄດ້ເຍາະເຍີ້ຍລາວ. (1 ຊາມ. 1:2, 6) ຄວາມກົດດັນແບບນີ້ເຮັດໃຫ້ລາວທຸກໃຈຈົນຮ້ອງໄຫ້ແລະບໍ່ຢາກກິນເຂົ້າ.—1 ຊາມ. 1:7, 10
12 ບາງຄັ້ງ ກະສັດດາວິດກໍຮູ້ສຶກບໍ່ໄຫວຍ້ອນຄວາມເຄັ່ງຕຶງ. ໃຫ້ຄິດເຖິງບັນຫາທີ່ລາວປະສົບ ລາວຮູ້ສຶກຜິດຍ້ອນເຄີຍເຮັດຜິດພາດຫຼາຍຢ່າງ. (ເພງ. 40:12) ອັບຊາໂລມລູກຊາຍທີ່ລາວຮັກຫຼາຍໄດ້ກະບົດຕໍ່ລາວ ແລະສຸດທ້າຍກໍຕາຍ. (2 ຊາມ. 15:13, 14; 18:33) ແລະຍັງບໍ່ພໍ ໝູ່ສະໜິດທີ່ສຸດຄົນໜຶ່ງຂອງລາວກໍຫັກຫຼັງລາວ. (2 ຊາມ. 16:23–17:2; ເພງ. 55:12-14) ຄຳເພງຫຼາຍບົດທີ່ດາວິດຂຽນໄດ້ພັນລະນາໃຫ້ເຫັນເຖິງຄວາມຮູ້ສຶກທີ່ທໍ້ແທ້ໃຈ ແລະຕະຫຼອດຈົນເຖິງຄວາມໄວ້ວາງໃຈພະເຢໂຫວາຢ່າງບໍ່ປ່ຽນແປງ.—ເພງ. 38:5-10; 94:17-19
ອັນໃດຊ່ວຍໃຫ້ຜູ້ຂຽນພະທຳຄຳເພງກັບມາຮັບໃຊ້ພະເຢໂຫວາຢ່າງມີຄວາມສຸກອີກ? (ເບິ່ງຂໍ້ 13-15)d
13 ຜູ້ຂຽນພະທຳຄຳເພງຄົນໜຶ່ງໄດ້ອິດສາຊີວິດຂອງຄົນຊົ່ວ. ລາວອາດຈະເປັນລູກຫຼານຂອງອາຊາບເຊິ່ງເປັນຄົນເລວີທີ່ຮັບໃຊ້ຢູ່ ‘ບ່ອນບໍລິສຸດຂອງພະເຈົ້າ.’ ຜູ້ຂຽນພະທຳຄຳເພງນີ້ຮູ້ສຶກເຄັ່ງຕຶງຫຼາຍຈົນບໍ່ມີຄວາມສຸກແລະບໍ່ພໍໃຈກັບຊີວິດ. ລາວເຖິງຂັ້ນຄິດວ່າພອນຕ່າງໆທີ່ໄດ້ຮັບຈາກການຮັບໃຊ້ພະເຈົ້າບໍ່ຄຸ້ມຄ່າ.—ເພງ. 73:2-5, 7, 12-14, 16, 17, 21
14-15. ເຮົາໄດ້ບົດຮຽນຫຍັງຈາກຕົວຢ່າງຂອງ 3 ຄົນໃນຄຳພີໄບເບິນທີ່ຂໍຄວາມເຊື່ອເຫຼືອຈາກພະເຢໂຫວາ?
14 ຜູ້ຮັບໃຊ້ທັງ 3 ຄົນທີ່ເວົ້າຂ້າງເທິງນັ້ນໄດ້ໝາຍເພິ່ງພະເຢໂຫວາ. ເຂົາເຈົ້າໝາຍເພິ່ງພະອົງໂດຍລະບາຍຄວາມທຸກໃຈໃນການອະທິດຖານຢ່າງຈິງຈັງແລະເວົ້າກົງໆເຖິງເຫດຜົນທີ່ຮູ້ສຶກເຄັ່ງຕຶງຫຼາຍ. ທີ່ສຳຄັນ ເຂົາເຈົ້າກໍຍັງໄປບ່ອນນະມັດສະການພະເຢໂຫວາເປັນປະຈຳ.—1 ຊາມ. 1:9, 10; ເພງ. 55:22; 73:17; 122:1
15 ພະເຢໂຫວາເຫັນອົກເຫັນໃຈແລະຕອບຄຳອະທິດຖານຂອງເຂົາເຈົ້າທຸກຄົນ. ອານາມີຄວາມສະຫງົບໃຈຫຼາຍຂຶ້ນ. (1 ຊາມ. 1:18) ດາວິດບອກວ່າ: “ຄົນຊອບທຳມີຄວາມທຸກລຳບາກເປັນອັນມາກ ແຕ່ວ່າພະເຢໂຫວາຊ່ອຍເພິ່ນໃຫ້ພົ້ນຈາກການລຳບາກທຸກປະການ.” (ເພງ. 34:19) ແລະຜູ້ຂຽນພະທຳຄຳເພງສະຫຼຸບວ່າ ພະເຢໂຫວາໄດ້ “ກຳເອົາມືຂວາຂອງ [ລາວ]” ແລະໄດ້ໃຫ້ຄຳແນະນຳລາວດ້ວຍຄວາມຮັກ. ລາວຮ້ອງເພງວ່າ: “ຝ່າຍຂ້ານ້ອຍ ຂ້ານ້ອຍຫຍັບເຂົ້າມາໃກ້ພະເຈົ້າອັນນີ້ແມ່ນການດີຂອງຂ້ານ້ອຍ. ຂ້ານ້ອຍໄດ້ວາງຄວາມໄວ້ໃຈໃນພະອົງເຈົ້າພະເຢໂຫວາ.” (ເພງ. 73:23, 24, 28) ເຮົາໄດ້ບົດຮຽນຫຍັງຈາກຕົວຢ່າງຂອງ 3 ຄົນນີ້? ບາງຄັ້ງ ເຮົາຈະປະສົບກັບບັນຫາທີ່ເຮັດໃຫ້ເຮົາຮູ້ສຶກເຄັ່ງຕຶງແລະທຸກໃຈ. ແຕ່ເຮົາຈະຮັບມືໄດ້ ຖ້າເຮົາຄິດຕຶກຕອງເຖິງວິທີທີ່ພະເຢໂຫວາຊ່ວຍເຫຼືອຄົນອື່ນ ໝາຍເພິ່ງພະເຢໂຫວາໂດຍການອະທິດຖານ ແລະເຊື່ອຟັງທຸກຢ່າງທີ່ພະອົງຂໍໃຫ້ເຮົາເຮັດ.—ເພງ. 143:1, 4-8
ໝາຍເພິ່ງພະເຢໂຫວາແລ້ວຈະປະສົບຜົນສຳເລັດ
ທຳອິດ ພີ່ນ້ອງຍິງຄົນໜຶ່ງມັກແຍກຕົວຢູ່ຄົນດຽວ ແຕ່ເມື່ອລາວພະຍາຍາມຊອກຫາວິທີຊ່ວຍຄົນອື່ນ ສະພາບການຂອງລາວກໍດີຂຶ້ນ (ເບິ່ງຂໍ້ 16-17)
16-17. (ກ) ເປັນຫຍັງເຮົາບໍ່ຄວນແຍກຕົວອອກຈາກພະເຢໂຫວາແລະປະຊາຊົນຂອງພະອົງ? (ຂ) ເຮົາຈະໄດ້ກຳລັງໃຈຫຼາຍຂຶ້ນໄດ້ແນວໃດ?
16 ສາມຕົວຢ່າງນັ້ນຍັງສອນບົດຮຽນທີ່ສຳຄັນອີກຢ່າງໜຶ່ງໃຫ້ເຮົາຄື ເຮົາບໍ່ຄວນແຍກຕົວອອກຈາກພະເຢໂຫວາແລະປະຊາຊົນຂອງພະອົງ. (ສຸພາ. 18:1) ແນນຊີທຸກໃຈແລະເຄັ່ງຕຶງຫຼາຍເມື່ອຜົວຖິ້ມລາວ. ລາວບອກວ່າ: “ບາງຄັ້ງຂ້ອຍບໍ່ຢາກເຫັນແລະບໍ່ຢາກເວົ້າກັບໃຜເປັນເວລາຫຼາຍມື້. ແຕ່ແຮ່ງຂ້ອຍແຍກຕົວຢູ່ຄົນດຽວ ຂ້ອຍກໍແຮ່ງຮູ້ສຶກໂສກເສົ້າຫຼາຍຂຶ້ນ.” ເມື່ອແນນຊີພະຍາຍາມຊ່ວຍຄົນອື່ນທີ່ມີບັນຫາ ສະພາບການຂອງລາວກໍປ່ຽນໄປ. ລາວບອກວ່າ: “ເມື່ອຂ້ອຍຟັງຄົນອື່ນເວົ້າກ່ຽວກັບບັນຫາຂອງເຂົາເຈົ້າ ຂ້ອຍສັງເກດເຫັນວ່າແຮ່ງຂ້ອຍເຫັນອົກເຫັນໃຈຄົນອື່ນ ຂ້ອຍກໍແຮ່ງຮູ້ສຶກອີ່ຕົນຕົວເອງໜ້ອຍລົງ.”
17 ເຮົາຈະໄດ້ກຳລັງໃຈຫຼາຍຂຶ້ນເມື່ອເຂົ້າຮ່ວມການປະຊຸມເປັນປະຈຳ. ເມື່ອເຮົາໄປປະຊຸມ ເຮົາກໍເປີດໂອກາດໃຫ້ພະເຢໂຫວາເປັນ “ຜູ້ຊ່ວຍແລະຜູ້ປອບໂຍນ” ເຮົາ. (ເພງ. 86:17, ລ.ມ.) ຢູ່ການປະຊຸມ ພະເຢໂຫວາໃຫ້ກຳລັງໃຈເຮົາໂດຍທາງພະລັງບໍລິສຸດ ຄຳພີໄບເບິນ ແລະພີ່ນ້ອງໃນປະຊາຄົມ. ການປະຊຸມເຮັດໃຫ້ເຮົາມີໂອກາດທີ່ຈະ “ໃຫ້ກຳລັງໃຈກັນແລະກັນ.” (ໂລມ 1:11, 12. ລ.ມ.) ພີ່ນ້ອງຍິງຊື່ໂຊເຟຍບອກວ່າ: “ພະເຢໂຫວາແລະພີ່ນ້ອງຮ່ວມຄວາມເຊື່ອຊ່ວຍໃຫ້ຂ້ອຍອົດທົນ ການປະຊຸມປະຈຳປະຊາຄົມເປັນເລື່ອງສຳຄັນທີ່ສຸດສຳລັບຂ້ອຍ. ຂ້ອຍເຫັນວ່າ ແຮ່ງຂ້ອຍເຮັດວຽກຮັບໃຊ້ແລະຄົບຫາກັບພີ່ນ້ອງຫຼາຍເທົ່າໃດ ຂ້ອຍກໍແຮ່ງຮັບມືກັບຄວາມເຄັ່ງຕຶງແລະຄວາມທຸກໃຈໄດ້ງ່າຍຂຶ້ນ.”
18. ຖ້າເຮົາຮູ້ສຶກທໍ້ໃຈ ພະເຢໂຫວາຈະຊ່ວຍເຮົາໃຫ້ມີຫຍັງ?
18 ເມື່ອເຮົາຮູ້ສຶກທໍ້ໃຈ ຂໍໃຫ້ຈື່ໄວ້ວ່າພະເຢໂຫວາບໍ່ພຽງແຕ່ສັນຍາວ່າພະອົງຈະກຳຈັດຄວາມເຄັ່ງຕຶງແລະຄວາມທຸກໃຈອອກໄປໃນອະນາຄົດ ແຕ່ພະອົງຍັງຈະຊ່ວຍເຮົາໃຫ້ຮັບມືກັບຄວາມເຄັ່ງຕຶງແລະຄວາມທຸກໃຈໃນປັດຈຸບັນ. ພະອົງຈະຊ່ວຍເຮົາໃຫ້ມີ “ຄວາມຕ້ອງການແລະກຳລັງ” ທີ່ຈະຮັບມືກັບຄວາມຮູ້ສຶກທໍ້ໃຈແລະໝົດຫວັງ.—ຟີລິບ 2:13, ລ.ມ.
19. ໃນໂລມ 8:37-39 ມີຄຳຮັບຮອງຫຍັງກັບເຮົາ?
19 ອ່ານໂລມ 8:37-39. ອັກຄະສາວົກໂປໂລຮັບຮອງກັບເຮົາວ່າ ບໍ່ມີຫຍັງທີ່ຈະແຍກເຮົາອອກຈາກຄວາມຮັກຂອງພະເຈົ້າໄດ້. ເຮົາຈະຊ່ວຍພີ່ນ້ອງຂອງເຮົາທີ່ກຳລັງຮັບມືກັບຄວາມເຄັ່ງຕຶງແລະຄວາມທຸກໃຈໄດ້ແນວໃດ? ໃນບົດຄວາມຕໍ່ໄປ ເຮົາຈະພິຈາລະນາວ່າເຮົາຈະຮຽນແບບພະເຢໂຫວາແນວໃດໃນການເຫັນອົກເຫັນໃຈແລະຊ່ວຍພີ່ນ້ອງທີ່ມີຄວາມເຄັ່ງຕຶງແລະທຸກໃຈ.
ເພງ 44 ຄຳອະທິດຖານຂອງຄົນທຸກໃຈ
a ການມີຄວາມກົດດັນຫຼືຄວາມເຄັ່ງຕຶງດົນໂພດຈະສົ່ງຜົນເສຍຕໍ່ທັງຮ່າງກາຍແລະອາລົມຄວາມຮູ້ສຶກຂອງເຮົາ. ພະເຢໂຫວາຊ່ວຍເຮົາແນວໃດ? ເຮົາຈະພິຈາລະນາວິທີທີ່ພະອົງຊ່ວຍເອລີຢາໃຫ້ຮັບມືກັບຄວາມເຄັ່ງຕຶງແລະທໍ້ໃຈ. ຕົວຢ່າງອື່ນໃນພະຄຳພີຈະສະແດງໃຫ້ເຫັນສິ່ງທີ່ເຮົາຕ້ອງເຮັດເພື່ອຮັບຄວາມຊ່ວຍເຫຼືອຈາກພະເຢໂຫວາເມື່ອມີຄວາມເຄັ່ງຕຶງແລະທຸກໃຈ.
b ຊື່ໃນບົດຄວາມນີ້ເປັນຊື່ສົມມຸດ.
c ຄຳອະທິບາຍຮູບພາບ: ທູດສະຫວັນຄ່ອຍໆປຸກເອລີຢາໃຫ້ຕື່ນ ແລະເອົານ້ຳກັບເຂົ້າຈີ່ໃຫ້ລາວກິນ.
d ຄຳອະທິບາຍຮູບພາບ: ຜູ້ຂຽນພະທຳຄຳເພງເຊິ່ງອາດເປັນລູກຫຼານຄົນໜຶ່ງຂອງອາຊາບກຳລັງມີຄວາມສຸກກັບການຂຽນບົດເພງແລະຮ້ອງເພງກັບໝູ່ທີ່ເປັນຄົນເລວີ.