ອັນໃດຈະຊ່ວຍເຈົ້າໃຫ້ສຶກສາສ່ວນໂຕໄດ້ເປັນປະຈຳ?
ເຈົ້າຮູ້ສຶກວ່າຍາກບໍທີ່ຈະເຮັດໃຫ້ໂຕເອງມັກສຶກສາສ່ວນໂຕແລະສຶກສາເປັນປະຈຳ? ບາງເທື່ອເຮົາອາດຮູ້ສຶກວ່າຍາກ. ແຕ່ໃຫ້ຄິດເຖິງສິ່ງທີ່ເຮົາຕ້ອງເຮັດເປັນປະຈຳ ເຊັ່ນ ການອາບນ້ຳ. ເຖິງວ່າການອາບນ້ຳຕ້ອງໃຊ້ເວລາແລະຕ້ອງອອກຄວາມພະຍາຍາມ ແຕ່ຫຼັງຈາກອາບນ້ຳແລ້ວເຮົາກໍຮູ້ສຶກສົດຊື່ນ. ການສຶກສາສ່ວນໂຕກໍຄືກັນ ມັນເປັນຄືກັບການ “ລ້າງ . . . ໃຫ້ສະອາດດ້ວຍນ້ຳທີ່ເປັນຄຳສອນຂອງພະເຈົ້າ.” (ອຟຊ. 5:26) ໃຫ້ມາເບິ່ງຄຳແນະນຳບາງຢ່າງທີ່ອາດຊ່ວຍໄດ້:
ຈັດເວລາໄວ້ເປັນປະຈຳ. ການສຶກສາສ່ວນໂຕເປັນສິ່ງທີ່ “ສຳຄັນກວ່າ” ທີ່ເຮົາທຸກຄົນຄວນເອົາໃຈໃສ່. (ຟລປ. 1:10) ເພື່ອຊ່ວຍບໍ່ໃຫ້ລືມເວລາທີ່ຈະສຶກສາສ່ວນໂຕ ເຈົ້າອາດຂຽນວັນແລະເວລາໃສ່ເຈ້ຍແລ້ວຕິດໄວ້ບ່ອນທີ່ເຈົ້າຈະເຫັນໄດ້ງ່າຍ ເຊັ່ນ: ກະດານຫຼືຕູ້ເຢັນ. ຫຼືເຈົ້າອາດຕັ້ງເວລາເຕືອນໄວ້ໃນໂທລະສັບມືຖືວ່າຈະສຶກສາສ່ວນໂຕຕອນໃດ.
ປັບຕາມຄວາມຈຳເປັນ. ສຳລັບເຈົ້າ ສຶກສາແບບໃດເຮັດໃຫ້ມີສະມາທິຫຼາຍກວ່າກັນລະຫວ່າງໃຊ້ເວລາດົນໜ້ອຍໜຶ່ງຫຼືໃຊ້ເວລາສັ້ນໆແຕ່ເຮັດເລື້ອຍໆ? ເຈົ້າຮູ້ດີທີ່ສຸດວ່າແບບໃດເໝາະກັບເຈົ້າແລ້ວກໍປັບຕາມນັ້ນ. ເມື່ອຮອດເວລາທີ່ຕ້ອງສຶກສາ ແຕ່ເຈົ້າຮູ້ສຶກວ່າບໍ່ຢາກເຮັດ ເຈົ້າອາດລອງສຶກສາຈັກ 10 ນາທີກະໄດ້ ຍ້ອນວ່າສຶກສາ 10 ນາທີກໍດີກວ່າບໍ່ໄດ້ສຶກສາເລີຍ. ເມື່ອເຈົ້າເລີ່ມຕົ້ນແລ້ວ ເຈົ້າກໍຈະມ່ວນແລະຈະເຮັດຕໍ່ໄປເລື້ອຍໆ.—ຟລປ. 2:13
ເລືອກເລື່ອງທີ່ຈະສຶກສາໄວ້ລ່ວງໜ້າ. ຖ້າຮອດເວລາສຶກສາສ່ວນໂຕແລ້ວເຈົ້າຈຶ່ງມາຊອກວ່າຈະສຶກສາເລື່ອງຫຍັງ ເຈົ້າອາດບໍ່ໄດ້ “ໃຊ້ເວລາໃຫ້ເປັນປະໂຫຍດຫຼາຍທີ່ສຸດ.” (ອຟຊ. 5:16) ເຈົ້າອາດຂຽນເລື່ອງທີ່ຈະສຶກສາໄວ້ ຫຼືຖ້າເຈົ້າສົງໄສເລື່ອງຫຍັງກໍໃຫ້ຈົດໄວ້. ທຸກເທື່ອຫຼັງຈາກທີ່ສຶກສາແລ້ວໆ ເຈົ້າອາດຈະຂຽນເລື່ອງທີ່ເຈົ້າຢາກສຶກສາຕື່ມໃສ່ໃນລາຍການທີ່ເຈົ້າໄດ້ຈົດໄວ້.
ປັບປ່ຽນຕາມຄວາມຈຳເປັນ. ຕາຕະລາງການສຶກສາສ່ວນໂຕຂອງເຈົ້າຄວນປັບປ່ຽນໄດ້ ເຊັ່ນ ຖ້າຈຳເປັນອາດປັບເວລາຫຼືປ່ຽນເລື່ອງທີ່ເຈົ້າຢາກສຶກສາໄດ້. ສິ່ງສຳຄັນບໍ່ແມ່ນສຶກສາຕອນໃດ ສຶກສາດົນສ່ຳໃດ ຫຼືສຶກສາເລື່ອງຫຍັງ ແຕ່ສິ່ງທີ່ສຳຄັນແມ່ນສຶກສາເປັນປະຈຳ.
ຖ້າເຮົາສຶກສາສ່ວນໂຕເປັນປະຈຳ ເຮົາຈະໄດ້ຮັບປະໂຫຍດແນ່ນອນ. ເຮົາຈະສະໜິດກັບພະເຢໂຫວາ ຕັດສິນໃຈຢ່າງສະຫຼາດ ແລະຮູ້ສຶກສົດຊື່ນ.—ຢຊ. 1:8