Kuuwu Wũ-Tuo Veaitiɛ Lili

1. Jehova dɛɛvɛ ɣɛ le ga wõila ɣa zeea na numaitiɛ ʋaa ma?

JEHOVA na numaitiɛ te ʋize wogɛ gaazu. E Ziizɛ leveni, nii e ga wõila lui ga e va e za te ʋaa ma. Na ɣa ɣɛɛna, e yee ɓado kuuwu wũ-tuo veaitiɛ va ga te ɣɛ ga te maazu vɛtɛ vea. (Te Ɣɛɛ Ʋaitiɛ 20:28) Gala ge wõini kuuwu wũ-tuo veaitiɛ te na numaitiɛ zo ga pagɔ. Kuuwu wũ-tuo veaitiɛ ta ziɛ zu ga nii Ziizɛ boga, tiɛ te ɣaa yɔwɔ̃itiɛ yii-lɔɔ. Na ɣa ɣɛɛna, tiɛ ɓɔ te va ga te lo kpãa Jehova ʋeli ʋai zu.—Isa. 32:1, 2.

2. E ɣɛ velei Ezekiel 34:15, 16 boga la, ɓɛɛni ka Jehova ɣa ɓɔ te va?

² Wõila ɣa Jehova ya na numaitiɛ ɓɔgapɛ faa ma. Na ɓalaa ɣɛɛvɛ, e wõini ɓɔɔ e ɓɔ niitiɛ va te laa-nɔwɔ-wosu. Kuuwu wũ-tuo veaitiɛ zaala zu, Jehova ɣa ɓɔsu niitiɛ va te ziɣia pele va (Ezekiel 34:15, 16 lodo) Na ɓalaa ɣɛɛvɛ, Jehova wõini de kpɔba maa zɔlɔwo ani da ziɣina pele va. Siɛgi na zu, Jehova wõini de feli ga e ɓɔ de va. Jehova wõini wɔnɔ de kpɔba maa zɔlɔwo baala maazu vɛtɛ veaitiɛ ya ta kala-mɔitiɛ kuuwui zu.—Ɛfɛ. 4:11, 12.

3. De pɛ da wulo ɣɛ le tiitiɛ zu-nu-ma kuuwu wũ-tuo veaitiɛ ta kɛ?

³ Kɔlɔ zɛvɛi nii zu, da vaazu yɛpɛzu e vile velei va Jehova ɓɔsu la niitiɛ va te ʋii ɓɛɛ zee-la-mai zu kuuwu wũ-tuo veaitiɛ zaala zu. Da vaazu gaa-zaɣa-kɛɛ niitiɛ ɣaa wotesu: Siɛ sɛɓɛi da kuuwu wũ-tuo veaitiɛ lili la ga te ɓɔ de va? Zɛɓɛi e kɛɛ maa nɛɛ de na ɣɛ? Na ɣa ɣɛɛna ta ɓɔ de va ɣɛ le? Ani ɓalaa siɛ-pului e de yɔɔzu da Jehova su ɓaavɛ dɛ, gaa-zaɣa-kɛɛ niitiɛ ɣaa wotegi ɣa vaazu ɓɔsu de va de dɛ ga de wuuzu nɛɛvɛ Jehova na deʋei ʋaa ma e vile kuuwu wũ-tuo veaitiɛ va. Tɔwɔ na ɣa ɓɔ de va.

SIƐ SƐƁƐI MAA NƐƐ DE KUUWU WŨ-TUO VEAITIƐ LILI LA?

4. Zɛɓɛi e kɛɛ da boga seeɓɛi Jĩi 5:14-16, 19, 20 yɛpɛzu e vile ba, lɛ ga seeɓɛ ɓɔɔɓɔɔ? (Wɛlɛ ɓalaa footeitiɛ va.)

⁴ Ziizɛ na kala-dopoi Jĩi yɛpɛni e vile velei va Jehova ɣa ɓɔ la de va kuuwu wũ-tuo veaitiɛ zaala zu. Jĩi ɣɛni tea: “Nu ta nɛpɛ ka zeeɓɛzu wo zaama? Pagɛ manui (kuuwu wũ-tuo veaitiɛ) lili” (Jĩi 5:14-16, 19, 20 lodo.) Woitiɛ te Gala goi nii wo ba, ta dɛɛzu ga Jĩi ɣa yɛpɛzu e vile niitiɛ va te ziɣia pele va. Na ɣa e kɛɛ e boga ga, nui e zeeɓɛzu, e mɛlɛ li wui sale lii ɣɛɛ nu wɔ, kɛ e li kuuwu wũ-tuo veaitiɛ wɔ. Nu ɣa ziɣina pele va, towa kɔlɔ su-wodo maa zɔlɔwo ani na faa yowũi zu ʋaa ɣa yɛ na. Velei nɔ ta ɓɔ la nui nii va e zeeɓɛzu, vele ɣa na ta ɓɔ la nui nii va e ziɣia pele va. Ani da ɣɛna zeeɓɛzu, da li wui sale lii ɣɛɛ nui wɔ, de yɛpɛ e vile niitiɛ va te ɣɛɛzu ga diɛ. Na ɣa ɣɛɛna de ziɛ ga niitiɛ ya bo de ma. Vele ɣa nɔ e la, ani da ziɣina pele va, maa nɛɛ de li kuuwu wũ-tuo veaitiɛ wɔ, de yɛpɛ e vile nii va de kɛɛ. Na ɣa ɣɛɛna de yee-zei tɛnɛgoitiɛ wu ta fe de ya.

5. Da leve ɣɛ le sa de kwɛ̃ɛ ga siɛ-pului e de yɔɔzu da Jehova maa ɣa sa yii zu?

⁵ Jĩi toso 5 ɣa bosu de ma ga, de yɛpɛ kuuwu wũ-tuo veaitiɛ wɔ ani da kwɛ̃ɛna ga siɛ-pululi e de yɔɔzu da Jehova maa ɣa sa yii zu. Tɔ ga kele-ɣele faa ga kuuwu wũ-tuo veaitiɛ te ɓɔ de va. kɛɛ ʋaa ma, de mɛlɛ vala siɛ-pului ma e de yɔɔzu da Jehova! Gala Kɔlɔi boga ga, ani dɛ lɛ ɣɛ daani ma da vaazu yɛsu ɓɔɔ ɣaa wɔlɔzu ga siɛ-pulu vagɔ ɣa de yɔɔzu da Jehova. (Jĩi. 1:22) Nii ɣa e ɣɛɛni ga Kolai Maa Veaitiɛ taniga te ɣɛni Saadi. Kɛ Ziizɛ te lɛnɛni, e bo te ma ga tɛlɛ ɣɛni sa Gala yii-mai ɣɛɛzu. (Faa. 3:1, 2) Pele gila da kwɛ̃ɛ la ga da dɛ ɣaa ɓaazu Jehova ʋeli ʋai zu, tɔ ga de ɣi-gaa-ziɛ velei dɔ feli la wɔlɔ ta velei de felizu la saa. (Faa. 2:4, 5) Ɣeeta, da ɣi-gaa-ziɛ gaa-zaɣa-kɛɛ niitiɛ ma: ‘Ga ɣɛna Gala Kɔlɔi lodosu giɛ ɣi-gaa-ziɛ ma, ga maa ɣaa nɛɛ wulo e ɣɛ velei wɔlɔ gɔ kɛɛ la? Ga li gaalɛ-baitiɛ ɓɔgapɛ su? Ga ɣavele ɓɛtɛ gɔ vɛɛ liizu gaalɛ-bai zu? Gala goo fai ɣa dɛ ga faa ɓi gaazu? Ga sa ɣi-gaa-ziɛzu ga ʋike e vile naʋolo ʋaa va?’ Ani gaa-zaɣa-kɛɛ nii ta ɣaa wotegi ɣa ga ooi, su-wulo-zu ɣa ga faa ɣa ya ziɛ-pului va wo yɔɔzu wa Jehova. Tɔwɔ ani lɛ faa ɣɛɛni ɔ vile ba su ɣa wɔɔlɔ. Ani dɛ lɛ zoo ga dɔ fai nii ɣaa wulo ba ɓɔɔ yee ma ɔɔ de faa ɣɛɛ ga Jehova lɛ wõini la, maa nɛɛ de kuuwu wũ-tuo veaitiɛ lili ga te ɓɔ de va.

6. Niitiɛ te faa yowũ ɣɛɛ Jehova ɣaazu zɛɓɛi maa nɛɛ te kɛ?

⁶ Faa yowũi ta ɣana, da kɛɛna towa kɛ te de wulo kuuwui va. Ani da na ɣavele ʋai ta ɣɛɛna, maa nɛɛ de bo kuuwu wũ-tuo veaitiɛ ma. (1 Kɔl. 5:11-13) Nui ya faa yowũ ɣɛ Jehova ɣaazu, maa nɛɛ e kpɔba maa zɔlɔwo ga siɛ-pulu vagɔ ɣɛ te yɔɔzu ta Jehova. Ga Jehova de zu-ʋaa-yɛ wũ-maa-wo ŋɛnii zaa la zu maa nɛɛ de tuoi nii wo ya dɛ ga de wulu ɣaa ʋega da ʋaa yowũitiɛ va. (Te Ɣɛɛ Ʋaitiɛ 26:20) Tuoi na ta ɣa ga, da faa yowũ ɣɛɛ na de bo kuuwu wũ-tuo veaitiɛ ma.

7. Ɓɛɛni ka wɔnɔ maa nɛɛ te kpɔba maa zɔlɔwo kuuwu wũ-tuo veaitiɛ ya?

⁷ Kuuwu wũ-tuo veaitiɛ tɛ lɛ nɔ ɓɔga niitiɛ va ta faa yowũ ɣɛ, kɛ ta ɓɔ wɔnɔ niitiɛ va ta yee-la-mai zu lɛ ɓɔɔ ɓaani. (Te Ɣɛɛ Ʋaitiɛ 20:35) Ma wo-kɔ̃ɔ-mai ta ɣa ga, ya ɣɛna ɣi-gaa-ziɛzu ga ɛ lɛ zooga ɔ ki-gaa-ziɛ yowũi yee maazu ɣale. Towa ɓaa ʋɔlɔ e yee ma ani ɔ zigale yowũ ɓoale, ɔɔ e wɛlɛ maa yãka ʋoote va, ɔɔ e wɛ̃ɛ-ziɛ bo ɔ vɛɛ Jehova wɛ̃ɛsu. Mɛlɛ ɣi-gaa-ziɛ ga kɛni ya fai natiɛ yee maazu ɣale ɓɔɔ yee ma. Ya deʋe ga e yɛpɛ kuuwu wũ-tuo nui nii wɔ e wõini e wuito e woo ma, e tɛnɛ fe e ya, na ɣa ɣɛɛna e ɓɔ e va e kwɛ̃ɛ ga Jehova wuuzu ɣa nɛɛ ga e ɣaa-ɓaa yiɛ goo-mɛni kulo zeea. (Eccl. 4:12) Velei ɓalaa e ɣaa ɓaazu la, ani e yii ɣa dɛ zuuli zu, kuuwu wũ-tuo veaitiɛ ta ɓɔ e va e kwɛ̃ɛ ga Jehova wuuzu nɛɛvɛ, ga tei e ɣaa ɓaazu ga siɛ-pulu vagɔ ɣɛ wo yɔɔzu.—1 Kɔl. 10:12.

8. Faa yowũ zɛɓɛi da kɛ maa lɛ nɛɛni dɔ li kuuwu wũi-tuo veaitiɛ wɔ?

⁸ Faa yowũitiɛ ɓɔgapɛ taale da kɛ maa nɛɛ de li kuuwu wũ-tuo veaitiɛ wɔ. Ma wo-kɔ̃ɔ-mai ta ɣa ga, e fai ta woga e ɣaa yɔwɔ̃i ta ma e lɔɔ la, ɔɔ e fai ta woga yiɛ e e yii ɣaa wãla. Ga de li kuuwu wũ-tuo nui wɔ, towa ɣɛ ga faa vagɔ ga de ziɛ ga nii Ziizɛ boga, e vile velei va maa nɛɛ de yɔɔzu ɓɛtɛ la da de ɣaa yɔwɔ̃itiɛ. (Maf. 5:23, 24) Ya faa maa woli da wɔlɔitiɛ zu e vile velei va ya ɣɛɛ la ga, nu zɛ-sɛ bo nu, zii-lɔɔ nu, ta nui ya ɓɔɔ zo faa ma. Tuɓo-vele vapagi niitiɛ ta ɓɔ e va na luoi zu. Na ɓalaa ɣɛɛvɛ, ani e wõini ga kpɔba, ya kuuwu wũ-tuo nui ta lili ga e ɓɔ e va. Kɔlɔi Pɔɔ ponɛni Felepaitiɛ wɔ, e boni de ɣaa yɔwɔ̃i ta ma, nii dɛ lɛ na daa-zeigi wɛ̃ni ga e ɓɔ Yuwodia ɓɔga Sẽteke va ga te yɔɔzu ɓɛtɛ. Tɔwɔ kuuwu wũ-tuo veaitiɛ te ya wuuwui zu ta ɓalaa ta zoo te ɓɔ e va.—Fel. 4:2, 3.

ZƐƁƐI E KƐƐ MAA NƐƐ DE KUUWU WŨ-TUO VEAITIƐ LILI?

9. Zɛɓɛi e kɛɛ de mɛlɛ ɓe wũfe ba ɔ kɛ dɔ ɓe kuuwu wũ-tuo veatiɛ lilisu? (Proverbs 28:13)

⁹ Ani da faa yowũ ɣɛɛna ɔ naa ɓai de yee ma ga de faa yowũi na yee maazu ɣale, dɔ vɛɛ bosu kuuwu wũ-tuo veaitiɛ ma kɛni de ɣɛ ga zii-lɔɔ vea na ɣa ɣɛɛna zee-la-ma ɣɛ de ya. De mɛlɛ ɓe ba wũfe ɔ kɛ dɔ ɓe kuuwu wũ-tuo veaitiɛ lilisu. Zɛɓɛ ʋaa ma? Ani da ziɛna ga Jehova na deʋei e vile kuuwu wũ-tuo veaitiɛ va, da dɛ ga da yee laazu ma. Na ɣa ɣɛɛna de wõini de goo-mɛni kulo zeea. De kwɛ̃ɛgɛ ga maa nɛɛ de Jehova na kpɔbai maa zɔlɔwo ani da ziɣina pele va. (Ps. 94:18) Ani de faa yowũ ɣɛɛ, de bo kuuwu wũ-tuo veaitiɛ ma, de wulu ɣaaʋe da ʋaa yowũitiɛ va Jehova ɣa de zu-ʋaa-yɛ.—Proverbs 28:13 lodo.

10. Zɛɓɛi ya ɣɛ ani da ɣɛna da ʋaa yowũitiɛ loowũsu?

¹⁰ Ani da faa yowũ ɣɛɛna, de bo kuuwu wũ-tuo veaitiɛ ma Jehova ɣa de zu-ʋaa-yɛ. Na ɣa ɣɛɛna siɛ-pulu vagɔ ɣa ɣɛ de yɔɔzu da Jehova. Kɛ ani da faa yowũ ɣɛɛna diɛ doowũ towa kɛ de laa-nɔwɔ-wo. Tei Masagi Deeve ɣɛni ɣaa ɓaazu ga e na faa yowũitiɛ loowũ, e laa-nɔwɔ-woni, zii yɛ zuuli. Zaɓui ɣa ga e ɣɛni koni ga siɛ-pulu vagɔ lɛ ɣɛni te yɔɔzu ta Jehova. (Ps. 32:3-5) Ani da ɣɛna zeeɓɛzu ɔɔ ŋada ɣa zeina de va tɔwɔ dɛ lɛ siɣini ga zɔɓɛlɛ su ɣa wɔɔlɔ. Jehova nii wɛ̃ni ɓɔɔ ga pagɔ. Na ɣa e kɛɛ e boga ga de li pɔ “de yɔɔzu ɓɛtɛ” deʋei nii zaala zu e daa kẽesu.—Isa. 1:5, 6, 18.

11. Zɛɓɛi ya ɣɛ ga de ɣaa yɔwɔ̃itiɛ ani da ɣɛna da ʋaa yowũitiɛ loowũsu?

¹¹ Ani da faa yowũ ɣɛɛna Jehova ɣaazu de doowũ, towa faa vɛɛ de ɣaa yɔwɔ̃itiɛ va. Towa kɛ kuuwui lɛ sa wuloa Jehova na gaa-ɓai zu-nu-ma. Na ɣa ɣɛɛna towa faa vɛɛ zii-lai va e de ɣaa yɔwɔ̃itiɛ ya kuuwui zu. (Ɛfɛ. 4:30) E wulo na wulu, ani da kwɛ̃ɛ na ga de ɣaa yɔwɔ̃i ta faa yowũ ɣɛɛ Jehova ɣaazu, de ɓɔba e li e bo Kuuwu wũ-tuo veaitiɛ ma.a Ani dɛ lɛ na ɣɛɛni, da ɓalaa da ɣɛ faa yowũ ɣɛɛzu Jehova ɣaazu. (Lev. 5:1) Wõilai e de ya Jehova ʋaa ma towa ya kɛ de li ga de bo. Ani da na ɣɛɛna da kuuwui maazu vɛtɛ, de ɓɔ wɔnɔ nui nii va e faa yowũ ɣɛɛ ga siɛ-pulu vagɔ ɣɛ te yɔɔzu ta Jehova.

KUUWU WŨ-TUO VEAITIƐ TA ƁƆ DE VA ƔƐ LE?

12. Kuuwu wũ-tuo veaitiɛ ta ɓɔ niitiɛ va ɣɛ le ta yee-la-mai zu lɛ ɓaani?

¹² Gala Kɔlɔi boga ga kuuwu wũ-tuo veaitiɛ te ɓɔ niitiɛ va ta yee-la-mai zu lɛ ɓɔɔ ɓaani. (1 Tɛsɛ. 5:14) Ani ya faa yowũ ɣɛɛ na, kuuwu wũ-tuo veaitiɛ ta e ɣaa-zaɣa-kɛ ga te e ɣigii zu ʋaitiɛ wɛ̃ɛ. (Prov. 20:5) Ya ɓɔ te va ani ya yɛpɛna e vile niitiɛ va te e ɣisu, velei ɓalaa na ɣa ɓaa la. Zaɓui ɣa ga, vɛ e wuloai na, e luɓo velei, ɔɔ tanisu towa ɣɛ ga wũfe faa ga e yɛpɛ e vile ba. Mɛlɛ ɣɛ luozu ga niitiɛ e vaazu bosu ta ga woo yowũ. (Job 6:3) Kuuwu wũ-tuo veaitiɛ tɛlɛ vaazu ya ʋaa wogi ɣaa levesu kaʋile, kɛ ta wuito e ma kɛɛ ʋaa ma te faitiɛ ɓɔgapɛ gaa ɣa. Na ɣa ɣɛɛna te tɛnɛ fe e ya. (Prov. 18:13) Kuuwu wũ-tuo veaitiɛ te koni ga, ga te ɓɔ nu va towa siɛ tamaa ziɣi. Na ma wa wõi lii kana tɔ vɛɛ kpɔbai nii ʋeezu e ya maa nɛɛ e sɔlɔwo.

13. Ani kuuwu wũ-tuo veaitiɛ ta Gala feli na de vɛ, te tɛnɛ fe de ya kuloai Gala Kɔlɔi zu na ɣa ɓɔ de va ɣɛ le? (Wɛlɛ ɓalaa footeitiɛ va.)

¹³ Ani ya Kuuwu wũ-tuo veaitiɛ lilina, tɛlɛ vaazu faa ɣɛɛzu ya kɛ e yii zuuli e vile fai nii va e kɛɛ. Kɛ to mu, ta Gala feli e ʋaa ma. Jehova ɣa wuito ta Ɣala-feliai ma, “nii gwala ɣaa-ɓai,” towa gaa ɓaa ʋe e ya e e ɣaa-nɛkpɛ. E wulo na wulu “ta gulo wu e wũ mo Jehova na daa-zeigi zu” (Jĩi. 5:14-16) “Guloi” nii zu-wulo-zu ɣa ga gaamaitiɛ te Gala Kɔlɔi zu. Kuuwu wũ-tuo veaitiɛ ta Gala goi taniga zu-wulo ɓɔɔ e ma ga pagɔ ga te e ɣaa-nɛkpɛ. Na ɣa ɣɛɛna te ɓɔ e va ga siɛ-pulu vagɔ ɣɛ wɔnɔ wo yɔɔzu wa Jehova. (Isa. 57:18) Tɛnɛgoitiɛ ta fe e ya kuloai Gala Kɔlɔi zu towa ɓɔ e va e gaa ɓaa maa zɔlɔwo na ɣa ɣɛɛna e ɣaa-ɓaa Jehova ʋeli ʋai zu. Te zaala zu, ya Jehova woi mɛni yiɛ ɣɛ e ma: “Pelei ɣaa a ziɛ la.”—Isa. 30:21.

14. E ɣɛ velei Galeesiaitiɛ 6:1 boga la, kuuwu wũ-tuo veaitiɛ ta ɓɔ ɣɛ le niitiɛ va ta ziɣi pele va? (Wɛlɛ ɓalaa footeitiɛ va.)

¹⁴ Galeesiaitiɛ 6:1 lodo. Kolai ma nui nii ya “ziɣi pele va” a kɛti, lɛ ziɛzu ga Jehova na tɔgitiɛ. Ani nu ɣa ziɣina pele va, su-wulo-zu ɣa ga manui deʋei ta woga lɛ ɣɛni ga ɔ bo ɔɔ e faa yowũi ta ɣɛɛvɛ Jehova ɣaazu. Wõila vele zu kuuwu wũ-tuo veaitiɛ ta manui loozu ga sɛ-sɛ bo pele. Geliiki woi nii te su-wuloa ga “manui loozu,” su-wulo-zu ɣa ga, e ɣɛ velei zee vɛɛba nui ɣa tii ɣɛɛ la nu maɣai ma kɛɛ ʋaa ma manui mɛlɛ laa-nɔwɔ-wo na luoi zu. E ɣɛ velei nɔ zee vɛɛba nui ɣa da ma la ga e mɛlɛ taɓai ta wu tama, vele ɣa na nɔ kuuwu wũ-tuo veaitiɛ ta da la ma ani ta ɣɛna ɓɔsu de va, kɛɛ ʋaa ma de yii mɛlɛ zuuli. Gala Kɔlɔi boga ɓalaa ga Kuuwu wũ-tuo veaitiɛ “tiɛ wɛlɛ ɓɔɔ maazu va.” Velei ɓalaa kuuwu wũ-tuo veaitiɛ ta ɓɔ la de va ga de lo kpãa, ta ɓalaa te koni ga ta ziɣi pele va. Kɛ ta dɛ ga ta ga kolo vea, tiɛ kɛ wõila vele zu.—1 Pite. 3:8.

15. Zɛɓɛi maa nɛɛ de kɛ ani da ziɣina pele va?

¹⁵ Da zoo de la ga kuuwu wũ-tuo veaitiɛ te da wuuwuitiɛ zu. Te te ɣalaboga ga nii nɛpɛgi da bo te ma te mɛlɛ bo nu ta ɓalaa ma. Tɛnɛgoitiɛ ta fe de ya ta kulo Gala Kɔlɔi zu, lɛ gaa ta ɓɔɔ ɣi-gaa-ziɛ. Na ɣa ɣɛɛna, te ɓɔ de va de lo kpãa faa ɓaa nɛpɛ su. (Prov. 11:13; Gal. 6:2) Kuuwu wũ-tuo veaitiɛ te luɓo-veleitiɛ tɛ lɛ ga fa gila. Na ɣa ɣɛɛna taniga te faa lamaa wɛ̃ni e vile kuuwu wũ-tuo lii va e leve taniga va. Na ɓalaa ɣɛɛvɛ, da li kuuwu wũ-tuo nu nɛpɛ pɔ ga de yɛpɛ e vile nii va de levesu su. Gaama zu nii lɛ dɛɛzu ga kɛni diɛ li kuuwu wũ-tuo veaitiɛ wɔ ga gile-gile ga te tɛnɛ fe de ya, nii ya kɛ nii de wõini de mɛni de na mɛni. Ani da na ɣɛɛna de maʋaa ɣa wulo e ɣɛ taitiɛ te “wui zu ɓelesu” na ɣa ɣɛɛna tɛ lɛ zii-lɔɔ wulozu “kalabogi nii ʋaa ma maa wuoai” Gala Kɔlɔi zu. (2 Tem. 4:3) Ani da yɛpɛna kuuwu wũ-tuo nui ta wɔ e vile nii va de levesu su, towa de ɣaa-zaɣa-kɛ ani de boga kuuwu wũ-tuo nu ɓalaa ma e vɛɛ tɛnɛgoi va manui feeni de ya. Na ɣa ɣɛɛna, tei e ga kolo nu na ɣa kɛ e bo kuuwu wũ-tuo nu ɓalaa ma ga e tɛnɛ fe.—Prov. 13:10.

NII MAA NƐƐ DA ƁƆƆ DE KƐ

16. Zɛɓɛi maa nɛɛ de ɓɔgapɛ de kɛ?

¹⁶ E ɣɛ velei ɓalaa kuuwu wũ-tuo veaitiɛ te Jehova na numaitiɛ maazu vɛtɛsu la, tɛ lɛ deʋe woga de vɛ. De ɣile-giledaitiɛ, maa nɛɛ de ŋetea kɛ e ɣɛ velei Jehova wõini de kɛɛ la. Tɔwɔ da na ɣɛ ga velei da yɛpɛ la ta velei da luɓo la. Tɔwɔ, Jehova ɣana ga e ɓɔ de va ga de deʋe vagɔ wo, na ɣa ɣɛɛna de feli ga pagɔ. (Loo. 14:12) Na ma, tɛ lɛ deʋe woga de vɛ, kɛ ta ɓɔ de va de kwɛ̃ɛ velei Jehova ɣi-gaa-ziɛzu la e vile fai na va. Na ɣa ɣɛɛna de deʋe wo da ɓɔɔ. Ani da ɣɛna ziɛzu ga tɛnɛgoitiɛ ta ʋe de ya na ɣa ɓɔ de va, “de faa yowũ ɓɔga faa vagɔ” yɔɔzu wɛ̃ɛ ga de zoo de deʋe vagɔ wo.—Hii. 5:14.

17. Zɛɓɛi Jehova wõini de kɛ?

¹⁷ Tɔ ga tuuyiɛ ga de ɣɛ ga Jehova na numaa! Jehova Ziizɛ leveni, nii e ga “baala maazu vɛtɛ nui,” ga e wũ-maa-wo ŋɛnii ʋe de ʋaa ma ga de zɛʋui nii zɔlɔwo kwɛ̃ɛ gɛ lɛ ba. (Jɔ̃ 10:11) Jehova yee ɓadoga kuuwu wũ-tuo veaitiɛ va kuuwuitiɛ zu ga te ɓɔ de va, kɛɛ ʋaa ma nii Jehova boni e leve ma. Yiɛ ɣɛ tea: “Na ɣa ɣɛɛna, ga baala maazu vɛtɛ vea ʋe wo ya, e ga zii-ma ʋaa, na ɣa ɣɛɛna ta wo ɣalabo te kele-ɣele fe wo ya.” (Jer. 3:15) Ani de ʋii ɣa ɓɛɛzu zee-la-mai zu ɔɔ de faa yowũ ɣɛɛ, de mɛlɛ ɣɛ luozu ga de bo kuuwu wu-tuo veaitiɛ ma ga te ɓɔ de va. Na ma, de ɣaa ɓaa ga de wulo faa nɛɛ nii zu-nu-ma Jehova kɛɛ de vɛ. Na ɣa ga kuuwu wũ-tuo veaitiɛ.