KALABO 26
Zɛɓɛi E Kɛɛ Faa Yowũi Ɓɔga Daa-Nɔwɔ-Wogi Ŋeteai Zu?
Ani faa yowũ ɣa ɣɛɛna tanisu da ɣɛ tea, zɛɓɛi e kɛɛ nii yɛ ɣɛ? De wuuzu nɛɛvɛ ga ʋike tei de kwɛ̃ɛ ga ga Gala Kɔlɔi gaa-zaɣa-kɛɛ nii ɣaa wotegɛ!
1. Zɛɓɛi Seeta kɛɛni e kɛɛ faa yowũ yɛ va ŋetea?
Seeta, nii e ga Dɛvelei goo-mɛni-tala wuloni Gala zeea. Seeta ɣɛni wõini e nu ɓuse leʋe. Na ɣa e kɛɛni e kɛ Adã ɓɔga Iivi te goo-mɛni-tala wulo Gala zeea. E nii ɣɛɛni tei e zɛɛ ʋaa woni Iivi ma. (Genesis 3:1-5) E kɛɛni Iivi ɣi-gaa-ziɛ ga Jehova ɣɛni faa vagɔi ta loowũsu te va. E zɛɛ ʋaa maa wũgi woni tei e ɣɛni Iivi ma: ɛ lɛ vaazu zaazu. Nii ɣa e kɛɛ Gala Kɔlɔi ɣa Seeta lili ga ‘zɛɛ ʋaa nu é ga zɛɛ ʋaa ʋaitiɛ te maɣeea.’—Jɔ̃ 8:44.
2. Zɛɓɛi Adã ɓɔga Iivi te kɛɛni?
Jehova faa-nɛɛ lamaa ɣɛɛni Adã ɓɔga Iivi vɛ. E boni ga tɔ guluitiɛ gaa vai mi tulugi zu, e wulo nɔ gulu gila pulu. (Genesis 2:15-17) Kɛ gului tɛ lɛ ɣɛni ga tɔ gaa vai mi, te liini te mi. Iivi “zɛba sa e gaa vai ta wulo e mi.” Tei na tawolo kɛɛni Adã “tɔ ɓalaa e ta miini.” (Genesis 3:6) Te felegɔ pɛ te goo-mɛni-tala wuloni Gala zeea. Adã ɓɔga Iivi te ɣɛni ga tele-bo tuo wo bea. Nii ɣa dɛɛzu ga tɔ zoo te faa vagɔ ɣɛ siɛ nɛpɛ ma. Kɛ te daani ɓɔɔ ɣisu ga te goo-mɛni-tala wulo Gala zeea. Nii ɣa dɛɛzu ga tɛ lɛ yee zeini Gala Na Masadai wu. Fai nii vaani ɓɔɔ ga daa-nɔwɔ-wo lamaa te wɔ.—Genesis 3:16-19.
3. Nii Adã ɓɔga Iivi te kɛɛni, e faa vɛɛvɛ de va ɣɛ le?
Siɛgi Adã ɓɔga Iivi te goo-mɛni-talai wuloni la, te ɣɛɛni ga faa yowũ ɣɛɛ vea. Nii ɣa e kɛɛ te leaitiɛ ɓɔgapɛ ta ga faa yowũ ɣɛɛ vea. Nii ɣa Gala Kɔlɔi boga e vile Adã va, e ɣɛ: “É ɣɛ velei faa yowũ vaani la zui zu nu ɣila daa-zɔ su, saa wɔ ge va faa yowũ laa-zɔ su, vele nɔ na saa ɓɔʋɔɔ la nu pɛ ma.”—Loomɛitiɛ 5:12.
Zɛɓɛi e kɛɛ diɛ laa-nɔwɔ-wo? Tanisu ani dɛ lɛ deʋe vagɔ ɓɛtɛni, towa kɛ de laa-nɔwɔ-wo. Da laa-nɔwɔ-wo tanisu ani numaa tɛ lɛ deʋe vagɔ wusu. Da laa-nɔwɔ-wo wɔnɔ ɓɔvɛlaale faa yowũ ɣa ɣɛ ga de ta nɛpɛ siɛ nɛpɛ ma.—Ecclesiastes 9:11 lodo.
FAA LAMAA MAA WOLI
Wɛlɛ nii va e kɛɛ da ɣɛ tea faa yowũi ɓɔga daa-nɔwɔ-wogi e zui zu Gala laale e ga zaɓu. Wɛlɛ wɔnɔ velei va Gala ɣa ɣi-gaa-ziɛ la e vile da laa-nɔwɔ-wogi va.
4. Ɓɛɛ ɣa e kɛɛ diɛ laa-nɔwɔ-wo?
Tɔ nu lamaa ɣisu ga, Gala ka na gaa-ɓai zui maazu. Kɛ e ɣisu na ɣa ga gaama? ƲILIOGI nii lɛ ga.
A Jĩi 1:13 ɓɔga 1 Jɔ̃ 5:19 lodo, wo gaa-zaɣa-kɛɛ nii ɣaa wote.
E ɣisu daa-nɔwɔ-wogi ɓɔga faa yowũitiɛ te ɣɛɛzu zui zu Gala ka e ga zaɓu?
5. Wɛlɛ niitiɛ va te ɣɛɛzu ɓɔvɛlaale Seeta ɣa na gaa-ɓai zui maazu
A Genesis 3:1-6 lodo, wo gaa-zaɣa-kɛɛ niitiɛ ɣaa wote:
Zɛɛ ʋaa zɛɓɛi Seeta boni?—Wɛlɛ ma woo 4 ɓɔga 5 va.
Seeta dɛɛni ɣɛ le ga Jehova ɣɛni faa vagɔi ta loowũsu nu ɓuse va?
E ɣisu Seeta dɛɛni ga manɛɛ de yee zei Jehova Na Masadai wu dɔ vɛɛ kuuzu nɛɛ ɓɔɔɓɔɔ maa zɔlɔ wosu?
A Ecclesiastes 8:9 lodo, wo gaa-zaɣa-kɛɛ nii ɣaa wote:
Tei Jehova laale e ga Masagi zui nii maazu, zɛɓɛi e ɣɛɛzu?
Adã ɓɔga Iivi te ɣɛni ga tele-bo tuo wo bea, te ɣɛni Idɛ̃. Kɛ te wuitoni Seeta ma, te goo-mɛni-tala wulo Gala ya
Goo-mɛni-talai te kuloni, e kɛɛ zui laʋega ga faa yowũ, daa-nɔwɔ-wogi ta saa
Jehova ɣa vaazu faa yowũ, daa-nɔwɔ-wogi ta saa ɓeazu. Yá nii ɣɛɛna, nu ɓuse ɣa ɣɛ sa ga tele-bo tuo wo bea, tiɛ ŋetea ɣɛ zuu vagɔi zu
6. Jehova ɓɛdɛvɛ de ʋaa ma
E ɣisu Jehova ɓɛdɛvɛ de ʋaa ma? Wɛlɛ nii va Masagi Deeve ɓɔga Pite ponɛni. A Psalms 31:7 ɓɔga 1 Pite 5:7 lodo, wo gaa-zaɣa-kɛɛ nii ɣaa wote:
Da ɣi-gaa-ziɛ ɣɛ le, ani da kwɛ̃ɛna ga Jehova ɓɛdɛvɛ de ʋaa ma?
7. Gala ka vaazu da laa-nɔwɔ-wogi ɓɔgapɛ kpeazu
A Isaiah 65:17 ɓɔga Faa wuloai kɛnɛ ma 21:3, 4 lodo, wo gaa-zaɣa-kɛɛ nii ɣaa wote:
Zɛɓɛi e kɛɛ towa de ɣaa-nɛkpɛ, ani da kwɛ̃ɛna ga Jehova ɣa vaazu da laa-nɔwɔ-wogi ɓɔgapɛ kpeazu?
E ɣɛni nii wõni?
Siɛgi ma Seeta zɛɛ ʋaa maa wũgi woni la, e zɛɛ ʋaa vɛɛni Gala ma. E kɛɛni nu lamaa te ɣi-gaa-ziɛ ga Jehova ɣa ga Masagi nii ɛ lɛ tele-bo tuo ʋaa ɣɛɛ. Seeta dɛɛni ga wõila lɛ Gala zeea nu ɓuse ʋaa ma. Jehova ɣa da laa-nɔwɔ-wogi ɓɔgapɛ kpeana ŋinaa ŋeteai zu, tɔ vaazu dɛɛzu ga zɛɛ ʋaa ɣa Seeta boni. Nii zu-wulo-zu ɣa ga, tɔ vaazu dɛɛzu ga na Masadai ɣa ɓɔɔ solowogɛi de ʋaa ma. Tɔ ɓɔɔ ga faa ɓi ga nu pɛ ge kwɛ̃ɛ ga Jehova ɣa manɛɛ na Masadai ɣɛ zui maazu.—Mafiyu 6:9, 10.
NUMAA TANIGA TE ƔƐ: “A da ɣɛna laa-nɔwɔ-wosu, a kɛ tii Gala ka e de ɣaa wõsu.”
Zɛɓɛi e ga yɛdɔ ɣi-gaa-ziɛi?
NII SA È MAA WOLIA
Seeta, nii e ga Dɛvelei ta ɓɔga nu maa wũgitiɛ ka te kɛɛ faa yowũi lamagɛi zui zu. Jehova ɓɛdɛvɛ ɓɔɔ de ʋaa ma ga ʋike. Su lɛ sa woozani ga e daa-nɔwɔ-wogi ɓɔgapɛ kpea.
Ma-ɓigitiɛ
Zɛɛ ʋaa zɛɓɛi Seeta, nii e ga Dɛvele boni Iivi ma?
Goo-mɛni-talai Adã ɓɔga Iivi te kuloni e faa vɛɛvɛ de va ɣɛ le?
De kwɛ̃ɛgɛ ɣɛ le ga Jehova ɓɛdɛvɛ ɓɔɔ de ʋaa ma?
WƐLƐ FAA LAMAA VA
Wɛlɛ nii va Gala Kɔlɔi boga e vile faa yowũ va.
Faa lamaa maa woli e vile nii va Dɛvelei boni e vile Gala ba tulugi zu Idɛ̃.
“Zɛɓɛi E Kɛɛ Gala Ge Ɓega Ba Faa Yowũ Yɛ Ɣɛ Ga Diɛ?” (The Watchtower, January 1, 2014)
Wɛlɛ gaa-zaɣa-kɛɛ ɓaaɓaagitiɛ te ɣaa wotegitiɛ va.
“Zɛɓɛi E Kɛɛ Gala Ɓeni Ba Tiɛ Nu Lamaa Vaa Germany?” (Kɔlɔi nii ɣa fãga wɔlɔi ma)
Wɛlɛ nii va zunui nii kwɛ̃ɛni e vile daa-nɔwɔ-wogi va e ɣɛni pɛtɛsu.